Bible in one year December 21Micah 6:1-161. Шунэ́н акана́, со Рай Дэвэ́л ракирэ́ла: “Тэрдёв пэ ґэра́, обсэндякир тыро́ рэ́ндо (де́ло) анги́л бэ́рги, и мэк бэ́ргицы тэ шунэ́н тыри́ зан.2. Шунэ́н, бэ́рги, пал со Рай Дэвэ́л сэндякирэ́ла [жалинэлапэ-ю.о.], и шунэ́н тумэ́, зоралэ́-пхувья́кирэ рикирибнытка (фундаменты), пал-дова́ со Растэ-Дэвлэ́стэ исын сэ́ндо Лэ́скирэ манушэ́нца, и Ёв лыджа́ла рэ́ндо проти Израилё.”3. О Рай Дэвэ́л ракирэ́ла: “О Мирэ́ мануша́лэ! Со Мэ кэрдём тумэ́нгэ? И сыр дава́ сыс, со сы́рбы Мэ мэнчындём тумэн? Досыкавэн [отпхэнэн-р.с.] Ма́нгэ.4. Пал-дова́ со Мэ вылыджиём тумэн Египто́скирэ пхувья́тыр, Мэ выракхцём тумэн писхарьенгирэ састырэндыр; и Мэ бичхадём анги́л тумэ́ндэ Мойза́с, Аронос и Мириам.5. О Мирэ́ мануша́лэ! Пририпирэн акана́, сыр о Вала́ко, кра́ли Моавитоскиро, придуминэлас чорипэ́н, и со отпхэнэ́лас лэ́скэ Валаа́мо, чхаво́ Веороскиро, и со кэрдя́пэ пэ маля (степи) машки́р Ситимо и Галга́ло, соб (кай) тумэ́ могинэ́нас сашты́ тэ уджинэ́н чачипэ́н Ра́скирэ-Дэвлэ́скиро.”6. Со́са тэ явав ма́нгэ анги́л Растэ-Дэвлэ́стэ, и сыр ма́нгэ тэ бандякирав шэро́ анги́л Болыбна́скирэ Дэвлэ́стэ? Ци тэ явав ма́нгэ анги́л Лэ́стэ хачкирибнаскирэ свэнтонэ́ дыибнэнца? Ци екхэ-бэршэскирэ целянтэнца?7. Ци явэ́ла лачхо́ Ра́скэ-Дэвлэ́скэ, ко́ли мэ яна́ва бут (тысёнцы) бакрэ́н? Ци дэш бара́ (тысёнцы) рэ́ки (лэня́) маслинитконэ дзэтэса? Ци ма́нгэ трэй тэ дав мирэ́ пэрвонэс, кон бияндёла ма́ндэ пал миро чорипэ́н, биято́с мирэ́ масэ́ндыр пало́ грэ́хо мирэ́-дескиро?’8. О Рай Дэвэ́л сыкадя́ ту́кэ, о манушэ, со исын лачхипэ́н, и со трэй Ра́скэ-Дэвлэ́скэ ту́тыр: тэ кэрэ́с пир чачипэ́н, тэ выкэдэс тэ кэрэ́с лачхипэ́н, и тэ дживэ́с напхутькирдэс анги́л тырэ́ Дэвлэ́стэ!9. Ра́скирэ-Дэвлэ́скири зан дэ́ла го́дла фороскэ Ерусалимоскэ, и годыпэ́н дэ́ла паты́в Лэ́скирэ лавэ́скэ: “Шунэ́н, кхия, и Кодолэ́с, Саво́ чхудя́ лэс.10. Ци исын ишчо (инкэ́) савэ́ кучипэна (сокровишчы) дро злыднитко кхэр, дро саво́ злыдни мануша́ яндлэ́; и тыкнякирды (кротко) ме́ра, сави́ исын джунгалы Ма́нгэ, Ра́скэ-Дэвлэ́скэ.11. Сыр Ма́нгэ тэ гинав пал чачунэндэ кодолэ́н, савэ́ндэ исын начачунэ (фуй) ублады́тка (весы), и хоханэ́ пхурдынэ (гири) дро екх гоно́?12. Барвалэ́ мануша́ далэ́ форо́стыр исын древа́н начачунэ [нахрата-ю.о.], и кодолэ́ сарэ́, кон дживэ́ла дро дава́ фо́ро, хохавэнас, и чиб лэ́нгири исын хоханы дро лэ́нгирэ ушта́.13. Палдава́ Мэ адя́кэ-паць кэра́ва, со ту явэ́са ґара́ насвалы, ке́ли Мэ пэкавава тут, ке́ли Мэ кэра́ва, со ячэ́лапэ голоты́ня (чхучипэн) ту́тыр пал тырэ́ грэ́хи.14. Ту явэ́са тэ хас, нэ ту на явэ́са чалы; бокх (чхучипэн) явэ́ла андрэ́ тыро́ кужум (жэлудко). Ту явэ́са тэ лыджас криг вари-со [отчхувэса пэ́скэ-р.с.], нэ ту на зракхэ́са дова́, и кодова́, со ту зракхэ́са, Мэ да́ва тэл курта́ла.15. Ту явэ́са тэ почхувэс дрэ пхув, нэ ту на явэ́са тэ счхинэс гива́; ту явэ́са тэ тасавэс (тэ штакирэс) маслинитка му́ри, нэ ту на явэ́са тэ макхэспэ маслинитконэ дзэтэса; и ту вытасавэса винаграды́тко со́ко (хум), нэ ту на явэ́са тэ пьес мол (вино).16. Пал-дова́ со тумэ́ рикирдэпэ кэ стату́ты Амврияскирэ, и кэ сарэ́ бутя́ Ахавоскирэ кхэрэ́стыр, и тумэ́ кэрэ́на саро́ пир лэ́нгири годы́, со Мэ кэра́ва тумэ́ндыр голоты́ня (пустота), соб (кай) тэ дэн шоля тумарэ́ мануша́, и ячэ́лапэ пэ тумэ́ндэ бипатыв Мирэ́-манушэ́нгири.”Micah 7:1-201. Бида ма́ндэ! Пал-дова́ со мэ, сом сы́рбы ману́ш, кон кэдэла лынаитка му́ри, сы́рбы кодолэ́, кон подкэдэла винаградо (дракх), нанэ ние́кх грозно (вэтка му́ри) тэ хав, нанэ ние́кх спяло мурина, со миро ди камэ́ла.2. Э патяибнытка мануша́ лачхэ́ илэ́са хасинэ́ пэ пхув, и нанэ чачунэ́ манушэ́н машки́р муршэндэ. Ёнэ сарэ́ подракхэна тэ прочхувэн рат, кажно (сва́ко) ману́ш чорьёлапэ пал пэ́скирэ пшалэ́стэ фэляса (сеткаса).3. Лэ́нгирэ васта́ рискирдэ́ тэ кэрэ́н биба́хт (фуипэ́н): о тхага́ри пхучэла почастунко (да́ро), о сэнда́ри (наенгиро) родэ́ла мыто (взятка), и барэ́ рая выпхэнэна лэ́нгири бибахталы мысля пэ годы́, со ёнэ камэ́на; и ёнэ адя́кэ кхэтанэ́ пиририскирэна чачипэ́н.4. Най фэдэды́р ману́ш лэ́ндыр исын сы́рбы канрало хру́сто, а най чачунэдыр ману́ш исын вострэдыр (чолалэдыр) тыностыр пхусадытконэ хрустэндыр; явдя́ дывэ́с Тырэ́-ракхибнарьенгиро, со Ту явэ́са тэ сэндинэс, акана́ явэ́ла лэ́нгиро конфузо (бу́нто).5. На патя малэ́скэ, на допатя дромэскирэ малэ́скэ (другоскэ), ракх лава́ тырэ́-москирэ кодолятыр, сави́ исын пашты пашы́л тыро́ колы́н.6. Пал-дова́ со о чхаво́ ладжакирэла дадэ́с (на дэ́ла паты́в дадэ́скэ), э чхай ґаздэ́лапэ пэ ла́кирэ датэ, э бори пэ сасятэ, манушэ́скирэ вэ́рги исын мануша́ лэ́скирэ кхэрэ́стыр.7. Нэ мэ кокоро́ ява́ва тэ дыкха́в пэ Растэ-Дэвлэ́стэ, мэ ява́ва тэ ужакирав Дэвлэ́с, Саво́ ракхэ́ла ман; Миро Дэвэ́л шунэ́ла ман.8. На ра́дынпэ зоралэ́с ма́ндыр, мири́ вэргица! Ко́ли пэрава мэ, мэ усае́кх ґаздавапэ. Ко́ли мэ сом бэшто́ дро калыпэ́н, нэ Рай Дэвэ́л дэ́ла дуд (свэ́то) ма́нгэ.9. Мэ вырикирава холякири зор Ра́скирэ-Дэвлэ́скири, пал-дова́ со мэ кэрдём грэ́хи проти Лэ́стэ, анги́л дова́, сыр Ёв обсэндякирэла миро рэ́ндо и кэрэ́ла пир чачипэ́н ма́нгэ. Ёв вылыджала ман пэ дуд, и мэ дыкха́ва Лэ́скиро чачипэ́н.10. Тэ́ньци и мири́ вэргица явэ́ла тэ дыкхэ́л дава́, и ладж чхакирэла ла, сави́ пхэндя́ ма́нгэ: “Кай исын Рай Дэвэ́л тыро́ Дэвэ́л?” Мирэ́ якха́ явэ́на тэ дыкхэ́н ла, акана́ заштакирэна ґэрэ́нца ла, сыр бла́та пэ вули́цы (га́сы).11. Дро дова́ дывэ́с, ке́ли тырэ́ ва́нты, Ерусалимо, нэвэ́стыр явэ́на тэ кэрэ́н, дро дова́-са́мо дывэ́с стату́то пал Израилё бу΄глэдыр отчхувэла ме́жа Израилёскири.12. Дро дова́-са́мо дывэ́с, ёнэ явэ́на плено́стыр кэ ту, мануша́лэ Израилёскирэ, Асириятыр и Египто́скирэ форье́ндыр; Египто́стыр аж кэ рэка (лэнь) Евфрато, морёстыр (дэрьявэстыр) кэ мо́рё (дэрья́в), бэрга́тыр кэ бэ́рга.13. Нэ доя́ пхув явэ́ла чхучи́ (пусто) пал банг кодолэгири, кон дживэ́ла пэ ла́тэ, и пал дова́ чорипэ́н, со ёнэ кэрдэ́.14. (Дэ́вла!) Чарав дэстэса Тырэ́ манушэ́н, кон исын дро ґурто Тырэ́-миштыпнаскиро, савэ́ дживэ́на кокорэ́ пэ́скэ дро вэш, машки́р Кармило: мэк ёнэ тэ чаравэнпэ пэ Васа́но и пэ Галаа́до, сыр сыс дрэ ґаратунэ́ дывэса́.15. Сыр сыс дрэ дывэса́, ке́ли ёнэ выджа́нас Египто́скирэ пхувья́тыр, сыка́в лэ́нгэ Тырэ́ ди́вна рэ́нды.16. Э на́цыи явэ́на тэ дыкхэ́н, и ёнэ явэ́на тэ ладжан сарэ́ лэ́нгирэ зоралыпнастыр, ёнэ чхувэ́на васт пэ муй пэ́скэ; лэ́нгирэ кана́ явэ́на кашукэ.17. Ёнэ явэ́на тэ чарэн (тэ лизинэн) пра́хо сыр саплын; ёнэ явэ́на тэ рэсэн яври́ лэ́нгирэ гарадэ́ штэтэ́ндыр сыр кирмэ, со исын пэ пхув. Ёнэ явэ́на тэ дарэ́н Ра́стыр-Дэвлэ́стыр, амарэ́ Дэвлэ́стыр. Лэ́ндэ явэ́ла трашаибэ́н анги́л Ту́тэ, Дэ́вла.”18. Кон исын Кадасаво́, Дэ́вла, сыр Ту сан? Кон отмэкэ́ла чорипэ́н и промэкэла чорэ́ рэ́нды манушэ́нгэ Лэ́скирэ мэкнэ́ миштыпна́стыр, савэ́ ячнэ́пэ? Ту на явэ́са ўса́ды (сак) тэ рикирэс холы́, пал-дова́ со Ту радынэсапэ тэ сыкавэс ла́ска.19. Тыро́ ило́ нэвэ́стыр пэрэ́ла пал амэ́ндэ, и Ту штакирэса (злэса) амаро́ чорипэ́н, и Ту чхурдэса сарэ́ амарэ́ грэ́хи дро хорипэ́н морёскиро (дэрьявэ́скиро).20. Ту сыкавэса чачипэ́н Яково́скэ, и ла́ска Авраамо́скэ (Абрамоскэ), пал со Ту совлахадян амарэ́ дадэ́нгэ дрэ дывэса́ ґаратунэ́.Psalms 145:10-1610. Саро́, со Ту кэрдя́н, явэ́ла тэ парикирэл Ту́кэ, о Раё Дэ́вла, и Тырэ́ свэ́нта явэ́на тэ шарэ́н Тут.11. Ёнэ явэ́на тэ роспхэнэ́н пал Тырэ́-кралипнаскири сла́ва и тэ ракирэ́л пал Тыро́ зоралыпэ́н,12. соб (кай) тэ джинэ́н манушэ́нгирэ чхавэ́ пал Тырэ́-зоралыпнаскирэ рэ́нды и пал славу́тно райканы сла́ва Тырэ́ кралипнастыр.13. Тыро́ кралипэ́н – кралипэ́н пир сарэ́ ве́ки, и Ту рикирэса зор пир сарэ́ ро́ды.14. Рай Дэвэ́л подрикирэ́ла сарэ́н, кон пэрэ́ла, и ґаздэ́ла сарэ́ одолэ́н, савэ́ бандинэ пхарипнастыр.15. Сарэ́ манушэ́нгирэ якха́ ужакирэ́на лачхипэ́н Ту́тыр, и Ту дэ́са хабэ́н лэ́нгэ тэды, ке́ли трэй лэ́нгэ.16. Ту роскэрэса Тыро́ васт и дэ́са чалэ́с сарэскэ, со исын джидо́.Proverbs 30:15-1515. Ратпибнаскирэстэ (пиявкатэ) [дро началыпэн-р.с.] исын дуй чхая́, савэ́ дэ́на го́дла: ‘Дэ! Дэ!’ Исын трин чачипэна́, савэ́ ние́кхвар нанэ чалэ. Исын штар вешчы, со ние́кхвар на пхэнэ́на: ‘Ухты́лла (до́си).’Zjaveňie 11:1-191. И сыс дыно́ ма́нгэ тришчынитко кашт (трость) сыр дэсто́ тэ меринав, и сыс пхэндло́: “Ушты́ и вымерин Дэвлэ́скири Кхангири́ и алта́рё и одолэ́н манушэ́н, савэ́ клонинэнапэ патыва́са одо́й.2. А грэ́да (дво́ро), сави́ исын яврестыр пал Кхангири́, мэк ла и на мерин ла. Ёй сыс дыны́ Наюдэ́нгэ. Ёнэ явэ́на тэ штакирэн ґэрэ́нца Свэ́нто Фо́ро штардэша́ дуй чхона́.3. И мэ да́ва зор мирэ́ дуе Якхитконэнгэ и ёнэ явэ́на тэ ангилпхэнэн тысёнцо дуй шэла́ шовдэша́ дывэса́, савэ́ явэ́на уридэ́ дрэ гонэ́ балэндыр.”4. Далэ́ дуй Якхи́тка исын оливитка кашта́ и дуй момолытка (светильники), савэ́ исын тэрдэ́ анги́л Дэвлэ́стэ пир пхув.5. И ко́ли вари-кон выкэдэ́ла тэ кэрэ́л чорипэ́н лэ́нгэ, тэды яг выджа́ла лэ́нгирэ мо́стыр и хасякирэ́ла лэ́нгирэ вэргэ́н. И ко́ли вари-кон закамэ́ла тэ кэрэ́л чорипэ́н лэ́нгэ, тэды адя́кэ-паць одолэ́скэ трэй тэ мэрэ́л.6. Адалэ́ Якхитконэндэ исын зор тэ пхандэн болыбэ́н, соб (кай) тэ на джал брышы́нд, ке́ли ёнэ явэ́на тэ ангилпхэнэн (тэ пророчынэн). И ёнэ рикирэ́на зор, соб (кай) паня́ тэ пирикэрэнпэ дро рат и тэ мулякирэ́н лэн франсэнца ада́кицы бут мо́лы, кицы́ ёнэ выкэдэна.7. И ке́ли ёнэ кончындлэ пэ́скиро допхэныбэ́н, тэды драконо, саво́ выджа́ла люностыр, явэ́ла тэ марэ́лпэ лэ́нца, и лэ́ла упралыпэ́н пэ лэ́ндэ и мулякирэ́ла лэн.8. И явэ́на лэ́нгирэ тру́пы пэ барэ́-форо́скирэ вули́цы (га́сы). Дава́ фо́ро пир ду́хо (фа́но) явэ́ла тэ кхарэлпэ Содо́мо и Еги́пто, кай адя́кэ-паць амаро́ Рай Дэвэ́л сыс примардо пэ трушу́л.9. И мануша́ манушытконэ́ нацые́ндыр, екхэ-чибакирэ ирье́ндыр (сэм΄е́ндыр), кхэритконэ́ родэндыр и явирэ манушэ́ндыр явэ́на тэ дыкхэ́н пэ дуй далэ́ тру́пы трин пашэ́са дывэса́ и на домэкэна тэ заганавэн лэн дрэ пхув.10. И одолэ́, савэ́ явэ́на тэ дживэ́н пэ пхув, явэ́на тэ радынэ́нпэ лэ́нгирэ мэрибна́стыр. Ёнэ явэ́на тэ радынэппэ зоралэ́с и тэ бичхавэн да́ры екх екхэ́скэ, пал-дова́ со кодолэ́ дуй проро́ки древа́н мэнчындлэ манушэ́н.11. И пало́ трин пашэ́са дывэса́ джиибна́скиро ду́хо (фа́но) Дэвлэ́стыр загия́ дрэ лэ́ндэ. Ёнэ тэрдинэ́ пэ пэ́скирэ ґэра́ и бари дар пыя́ пэ одолэ́ндэ, савэ́ дыкхнэ́ пэ лэ́ндэ.12. И ёнэ шундлэ́ зоралы́ зан болыбна́стыр, со ракирдя́ лэ́нгэ: “Джа́н упрэ́ адари́к.” И адалэ́ дуй проро́ки гинэ́ упрэ́ пэ болыбэ́н дро о́блоко, и лэ́нгирэ вэ́рги дыкхнэ́ пэ лэ́ндэ.13. И дро дова-паць мардо́ (шту́нда) кэрдя́пэ древа́н баро́ пхувья́киро тринскирибэн и дэ́што форо́скири паш пыя́, и эфта́ тысёнцы манушэ́н сыс замардэ́. И одолэ́, савэ́ ячнэ́пэ, страха́дынэ и славиндлэ Дэвлэ́с, Саво́ исын дро Болыбна́скиро Раё.14. Яви́р би́да гия́ криг: дыкх, три́то би́да джа́ла сы́гэс.15. И эфта́то (битринэнтиро дэ́што) Янго́ло пхурдыя дрэ пэ́скиро ро́го (труба): и сыс зоралэ́ заня́ пэ болыбэ́н, со ракирдэ́: “Свэтытко Кралипэ́н амарэ́ Ра́скирэ-Дэвлэ́скиро и Лэ́скирэ Христосо́скиро явдя́ и Ёв явэ́ла тэ кралинэн пэ сарэ́ ве́ки.”16. И биш тэ штар годэпхурэ́, савэ́ сыс бэштэ́ пал пэ́скирэ троны анги́л Дэвлэ́стэ пынэ́ пэ пэ́скирэ муя́ и поклониндлэпэ патыва́са Дэвлэ́скэ, пхэни́:17. “Амэ парикираса Ту́кэ, Баро́ Раё Дэ́вла, Сарэзорья́киро, Екх, Кон исын и Кон сыс, пал-дова́ со Ту лыян Тыро́ зоралыпэ́н и яця́н тэ кралинэс.18. На́юды холясынэ долэ́скэ, со явдя́ Тыри́ холы́ дро часо тэ сэндякирэс мулэн, и тэ отдэс палэ Пэ́скирэ писхарье́нгэ, пророкэнгэ, и свэнтонэнгэ и одолэ́нгэ, савэ́ дарэ́на Тырэ́ лавэ́стыр, барэнгэ и тыкнэнгэ. Тэ мулякирэс одолэ́н, савэ́ хасякирэна пхув.”19. И псирадыя (отпхандя́пэ) Дэвлэ́скири Кхангири́, сави́ исын дро Болыбна́скиро Раё и Ковчэ́го (Мохто́) Дэвлэ́скирэ завето́са сыс дыцьло дрэ Кхангири́. И ячнэ́ блискави́цы, и заня́ (глося́), и гро́мы, и пхувья́киро триинскирибэн и баро́ ґра́до. Romani Bible Baltic 2019 Maintained by the United Bible Societies for the Baltic Romani Mission