Bible in one year - Пэ Балтитко Романи чиб

Bible in one year December 22

1. Ангилпхэныбэ́н проти Ниневия. Лылвари́ пал Наумоскиро дыкхибэ́н, саво́ сыс Елкосостыр.

2. О Рай-Дэвэ́л исын зэвлыныпнаскиро Дэвэ́л, и Ёв отдэ́ла палэ сэндоса. Рай Дэвэ́л отдэ́ла палэ сэндоса, и Ёв исын древа́н дарано дрэ холы́. Рай Дэвэ́л отдэ́ла палэ сэндоса Лэ́скирэ намалэнгэ, и Ёв на потангинэла Лэскирирэ вэргэ́н [пригаравэла Лэ́скири бари холын пэ Лэ́скирэ вэргэ́ндэ-ю.о.].

3. Рай Дэвэ́л насыгэс холясо́ла (ґара́ / длу́гэс ужакирэ́ла) и Лэ́стэ исын баро́ зоралыпэ́н. И Ёв на ковлякирэла ило́ анги́л бибахталэндэ: сыр о Рай Дэвэ́л псирэ́ла, тэды ґаздэ́напэ рискирибнаскири балва́л и штормо, и о́блоки сыр пра́хо вурняна тэл Лэ́скирэ ґэра́.

4. Ёв штылякирэла мо́рё (дэрья́в) и шутькирэла лэс, и Ёв пиришутькирэла сарэ́ рэ́ки (лэня́): Васа́но и Кармило зашутёна и лулуди́ (цвэ́то) пэ Лива́но нашавэла масти́н (цвято).

5. Бэ́рги издрана анги́л Лэ́стэ, и бэ́ргицы биладёна; пхув кунинэлапэ анги́л Лэ́скиро явибэн [муй-р.с.]; свэ́то, и саро́, со дживэ́ла пэ свэ́то.

6. Кон дэ́ла ра́да тэ тэрдёл штылэ́с, ке́ли Рай Дэвэ́л зоралэ́с холясо́ла? Кон дэ́ла ра́да тэ вырикирэл мижэхипэн Лэ́скирэ холя́тыр? Лэ́скиро холякирибэ́н вычхувэлапэ сыр яг, и скалы (бэ́рги) пхарадёна пэ котэра́ анги́л Лэ́стэ.

7. О Рай Дэвэ́л исын лачхо́, и сы́рбы кхэр тэ гарадёл, сыр исын пхаро́ манушэ́скэ: Ёв джинэ́ла кодолэ́н, савэ́ допатяна Лэ́скэ.

8. Нэ барэ́-тасадыпнаскирэ паненца, савэ́ исын сыр потопо, Ёв янэ́ла хасибэ́н кэ ко́нцо (кэ яго́ро) далэ́ штэтоскэ Ниневиякэ, и калыпэ́н учхакирэ́ла Лэ́скирэ вэргэ́н.

9. Со тумэ́ придуминэна проти Растэ-Дэвлэ́стэ? Ёв хасякирэ́ла тумэн сарэ́са, пхарипэ́н на явэ́ла яви́р мо́ло.

10. На дыкхи́ пэ дова́, со тумэ́ спэнтындлэпэ кхэтанэ́ сыр пхусадытка хру́сты, и спинэпэ сыр матымарья, тумэ́ явэ́на тэ хачон сыр пхусэскири цецива (шуко пхус).

11. Ту́тыр выгия́ одова́ ману́ш, саво́ придуминэла биба́хт (холы́) проти Растэ-Дэвлэ́стэ, ёв явэ́ла советнико (юнка́ро), саво́ дэ́ла годы́ тэ кэрэ́л фуипэ́н.

12. Адя́кэ ракирэ́ла Рай-Дэвел Юдэякэ: “На дыкхи́ пэ дова́, со ёнэ, Асирия́кирэ халадэ́, исын бидарипнаскирэ и исын бут лэн, сароекх, лэн чингирэна пэ котэра́, и ёнэ хасёна. Сыр Мэ притасававас тут, то буты́р Мэ на ява́ва тэ кэра́в дава́ ту́кэ.

13. Акана́ Мэ пхагирава ґа́мо тырэ́ мэнятыр, со ёнэ чхудэ́ пэ ту́тэ, и Мэ пхаравава (роскушава) тырэ́ састыра́ пэ паша́.”

14. О Рай Дэвэ́л дыя́ припхэныбэ́н пал ту́тэ, Асуро: “Буты́р на явэ́ла ро́до тырэ́ лавэ́са; Мэ хасякира́ва вычхиндлэ́ муя́ кхэрэ́стыр, кай исын тырэ́ дэвлорэ́, и тырэ́ вычхудэ́ муя́. Мэ ґанавава ту́кэ маґила (кула), пал-дова́ со ту сан бэдо?’

15. Акэ, дыкхэ́н кодолэскирэ пирэ́ (сто́пы) пэ бэ́рга, саво́ пхэнэ́ла бахталы́ звесь (зан), саво́ ракирэ́ла зоралэ́с пал рама́нё (миро)! “О Юдэие! Кэр свэнкитка скаминда, выпхэрдякирэн пэ́скирэ совлаха́, пал-дова́ со буты́р ние́кх фуй ману́ш на проджа́ла пир ту́тэ: ёв исын сарэ́са хасякирдо.”

Nahum 2:1-13

1. Мулякирибнаскиро джа́ла пэ ту́тэ, Ниневие! Ракх форо́скирэ зорьякирдэ ва́нты! Дыкхэ́н цямкэс пало́ дром, зорьякирэн тумарэ́ фланги! Скэдэ́н бутэды́р тумари́ зор!

2. Пал-дава́ со Рай Дэвэ́л чхувэ́ла дро зор нэвэ́стыр барипэ́н Яково́скиро, сыр барипэ́н Израилёскиро, пал-дова́ со вэ́рги ячкирдэ́ чхучэ́ штэ́ты лэ́ндэ, и ёнэ хасякирдэ́ дрэ руи́ны лэ́нгирэ винаграды́тка рандя́.

3. Шчыты Лэ́скирэ зоралэ́-муршэнгирэ исын лолэ́, Лэ́скирэ бидарипнаскирэ мурша́ (халадэ́) исын дро ярко лоло́ урибэ́н, а марибны́тка вурдэна́ явэ́на зяиндлэ састырэнца дро дова́ дывэ́с, ке́ли сарэ́ скэдэ́напэ пэ марибэ́н, и чхурдыбнытка бустя́ (коп΄и) кунинэнапэ.

4. Марибны́тка вурдэна́ вурняна годла́са пир га́сы [форуны́/пло́шча-р.с.], ёнэ шпулэна екх екхэ́с и кхарэнапэ екх анги́л явирэ́стэ пэ буґлэ дрома́: ёнэ зяинэна и отмарнапэ яга́са, ёнэ праста́на сы́гэс сыр блискавица.

5. Лэ́нгиро барыдыро́ кхарэ́ла кэ пэ лэ́скирэ выкэдынэ́ муршэ́н, ёнэ обштавэнапэ, гии пир дром; ёнэ праста́на сы́гэс пэ форо́скирэ ва́нты, и ёнэ ячнэ́ скэдынэ́ тэ отмарэнпэ.

6. По́рта пэ рэ́ки (лэня́) отпхандэлапэ, и бари фэлатин/колов (дворцо) роспхадёла.

7. И исын кадасаво́ упхэныбэ́н: чу́жа халадэ́ росчхувэна кра́лица и лыджа́на ла дро пле́но. Ла́кирэ-штубакирэ писхарицы явэ́на тэ тугинэн зоралэ́с пал ла́тэ голумбицэнгирэ занорьенца, мариндой (пэкави) пэс дро колы́н.

8. Ниневия сыс сыр вэндэри́н (прудо) пане́са самонэ пэрвонэ́ дывэсэ́ндыр, нэ акана́, мануша́ нашэ́на форо́стыр. “Тэрдён, тэрдён!” – вари-савэ́ годлэна, нэ ние́кх (нико́н) на рисёла палэ.

9. ‘Чорэн руп! Чорэн сувнака́й! Нанэ ме́ра миштыпнаскэ и барвалыпнаскэ дро кажно вучы пири́!

10. Ла́тыр яця́ чхучо́ штэ́то и хасякирдо штэ́то; ило́ биладёла и чанга́ издрана; зоралы́ дукх исын дро кажно пашваро, и муя́ сарэ́ндэ калынэ.

11. Кай исын акана́ хашча (логово) шчэрэнгиро, и тэрнэ́-шчэрэнгиро чараибнытко штэ́то; пир саво́ псирдэ́ шчэр, шчэрица, и шчэроро, и нико́н на трашавэлас лэн?

12. Шчэр (ле́во) кусця пэ котэра́, кицы́ трэй мас ваш лэ́скирэ шчэрорэндэ, и, тасадя ваш пэ́скирэ шчэрицатэ. Ёв пхэрдякирдя́ ґебара́ (пешчэры) масэса дрэ данда́, и лэ́скирэ хашчы (логовы) джидэ́ масэса.

13. “Акэ, Мэ джа́ва проти ту́тэ, Ниневие!”, – ракирэ́ла янголэ́нгирэ-болыбна́скиро Рай Дэвэ́л. “Мэ хачкирава тырэ́ марибны́тка вурдэна́ дро тхув, и курта́ла почингирэла тырэ́ тэрнэ́ шчэрэн; Мэ чхува́ва ко́нцо (яго́ро) пэ тыро́ дорэсыбэ́н пэ пхув, и буты́р на явэ́ла шундлы зан тырэ́-бичхаибнаскирэндыр.”

Nahum 3:1-19

1. Бида пэ ратвало фо́ро! Ёв исын пхэрдо́ хохаибнаса и чорибнаса, дро саво́ на пириячэна тэ чорэн.

2. Шунэлапэ зоралэ́с, сыр марэла чхупны, и чхинэла кан, сыр ро́ты праста́на (грюкинэна), сыр уклистэ́ грая грымитынэна, сыр марибны́тка вурдэна́ подухтэна!

3. Уклистэнгирэ халадэ́ сы́гэс вурняна зяиндлэ курталэнца, марибны́тка бустя́ отмарнапэ зяиндлэ курталэнца; бут исын замардэ́, бут бут исын мулэ́ тру́пы, со нашты́ тэ погинэс: – ёнэ обштавэнапэ пир тру́пы.

4. Дава́ пал биладжакунэ́-джувлякирэ бут грэ́хи, сави́ исын хуланы пэ човахано джиныбэ́н; сави́ здэлас на́цыи пал пэ́скиро биладжаипэ́н, и кхэри́тка ро́ды и пал ла́киро човахано джиныбэ́н.

5. “Акэ, Мэ сом проти ту́тэ”, – ракирэ́ла янголэ́нгирэ-болыбна́скиро Рай Дэвэ́л: “Мэ ґазда́ва тыри́ подя пэ тыро́ муй, Мэ сыкава́ва нацыенгэ тыро́ нангипэ́н, и кралипнэнгэ тыри́ ладж.

6. И Мэ ява́ва тэ чхурдав тэ приячэл кэ ту джунгалы мэл, Мэ кэра́ва тут адя́кэ, со ту ячэса бэдытко, и Мэ чхува́ва тут пэ сабэн сарэ́нгэ.

7. И явэ́ла адя́кэ, со кажно (сва́ко) ману́ш, кон явэ́ла тэ дыкхэ́л тут, явэ́ла тэ нашэ́л ту́тыр, и тэ ракирэ́л: ‘Ниневи́я исын пашты чхучи́! Кон жа явэ́ла тэ тангинэ́л ясвэ́нца ла? Кай тэ латхав манушэ́н тэ подрикирэн ду́хо дрэ ту́тэ, Ниневи́е?”

8. Ци ту фэды́р сан Но-Амоностыр, саво́ сыс машки́р рэ́ки (лэня́) пашы́л Нило, пашы́л саво́ тхадэнас паня́, савэскиро вало исыс сыр мо́рё (дэрья́в), и мо́рё (дэрья́в) сыс сыр ва́нта трусця́л дава́ фо́ро?

9. Эфиопия и Еги́пто сыс да бимеракиро форо́скиро зоралыпэ́н, Копты и Ливийцы сыс лэ́скирэ помогипнаскирэ.

10. Нэ лэс лыджинэ́ криг, и ёв гия́ дро пле́но, лэ́скирэ биятэ́н адя́кэ-паць розмардэ пэ котэра́ пэ трушулытка ґасы (вули́цы). Ёнэ, Асирийцы, чхурдынэ́ жре́биё пал лэ́скирэ манушэ́ндэ, савэ́ сыс дрэ паты́в и сарэ́ лэ́скирэ барэ́ рая сыс пхандлэ зандирьенца.

11. Ту адя́кэ-паць явэ́са маты, гарадёса, ту адя́кэ-паць явэ́са тэ родэс гарадыибэн вэргостыр.

12. Сарэ́ форо́скирэ рикирибэна исын сы́рбы инжыритка кашта́ (дрэвы) спялонэ инжыроса: ко́ли тринскирэса лэн, тэды ёнэ пэрэ́на дро муй одолэскиро, кон камэ́ла тэ хал лэн.

13. Дыкхэ́н! Машкир тырэ́ халадэ́ндэ исын мурша́ сыр джувля́: по́рта пэ тырэ́ пхувья́ псирады буґлэс анги́л вэргэ́ндэ: яг похала штабы пэ тыри́ по́рта.

14. Пхэр пани́ ваш обчхувибэн форо́скиро! Зорьякир тырэ́ форо́скирэ рикирибэна! Джа́ пал ґлэя (глина), и штакир растворо, подкэр бов тэ обхачкирэн бара́!

15. Одо́й яг похала тут, а курта́ла чингирэла тут; ёй хасякирэ́ла (ха́ла) тут сы́рбы скочко. На дыкхи́ пэ дова́, со тэ ячэн тумэ́ бутэды́р-ада́кицы бут, сыр листэнгирэ кирмэ; тэ ячэн тумэ́ бутэды́р-ада́кицы бут, сыр пхакитка скочки (саранча)!

16. Ту́тэ яця́ бутэды́р тылгарьен сыр чэргэня́ пэ болыбэ́н нэ далэ́ сыр пхакитка скочки (саранча): розвурнянапэ и вурняна криг.

17. Тырэ́ тхага́рья исын сыр пхакитка скочки, тырэ́ халадэ́нгирэ барыдыра́ исын сыр грасторэ (кузнечыки), савэ́ кэрэ́на гня́зды (ку́фы) дрэ вантакирэ шчэли, а сыр кхам ґаздэ́лапэ, то ёнэ вурняна пэ́скэ криг, и на джиндло́ штэ́то, кай сыс ёнэ.

18. Тырэ́ чхупна́рья (пастыри) исын сутэ́, кра́лё Асирия́киро, а тырэ́ лачхэ́-родоскирэ рая (упратунэ) откхинёна штылэ́с. Тырэ́ мануша́ росчхурдынэ тэ дживэ́н пэ бэ́рги, и ние́кх на скэдэ́ла лэн.

19. Тыро́ фра́нсо (рана) нашты́ тэ састякирэс, тырэ́-масэнгирэ фуя́ (язвы) исын хор. Сарэ́, кон шунэ́ла дая́ звесь пал ту́тэ, явэ́на тэ марэ́н дрэ васта́ радыма́тыр; пал-дова́ со нанэ ние́кх ману́ш, конэ́с тыро́ фуипэ́н тэ обджал ригаса.

Psalms 145:17-21

17. Рай Дэвэ́л исын чачипна́скиро дро саро́, со Ёв кэрэ́ла и Ёв исын лачхо́ дро сарэ́ Лэ́скирэ рэ́нды (де́лы).

18. Рай Дэвэ́л исын пашы́л сарэ́ндэ одолэ́ндэ, савэ́ кхарэ́на Лэс чачипна́са.

19. Ёв кэрэ́ла пир одолэнгиро лав, пэ ило́, савэ́ндэ исын трашаибэ́н анги́л Лэ́стэ и Ёв явэ́ла тэ шунэ́л лэ́скиро ровибэн и зракхэ́ла лэн.

20. Рай Дэвэ́л приракхэла сарэ́н, савэ́нгэ исын дро́го Ёв; нэ Ёв хасякирэ́ла сарэ́н фуе́ манушэ́н.

21. Миро муй явэ́ла тэ шарэл Рас-Дэвлэ́с и мэк кажно лоч (плоть) тэ шарэл лэ́скиро Свэ́нто лав усады (сак) и пэ сарэ́ ве́ки.

Proverbs 30:16-16

16. Дава́ исын: маґила (кула), и бибиятэнгири джувлы́; пхув, сави́ нанэ чалы пане́стыр, и яг, сави́ тэ пхэнэ́л: ‘Ухты́лла.’”

Zjaveňie 12:1-17

1. И сыс дыцьлы/бицялы древа́н бари ґерты́к (знаме́ниё) пэ болыбэ́н: сыс джувлы́ сы́рбы уриды дро кхам и чхон сыс тэл ла́кирэ ґэра́, и вя́нка (коро́на), сави́ сыс чхуды́ кхэтанэ́ дэшудуе́ чэргэнендыр, сыс пэ ла́киро шэро́.

2. Адая джувлы́ сыс пхари́: ёй дэ́лас го́дла дукхэндыр и ёй мэнчындяпэ сыр джувлы́, сави́ биянэ́ла.

3. И сыс яви́р ґерты́к дыцьлы/бицялы пэ болыбэ́н: и, акэ, баро́ лоло́ драконо эфта́ (эфтанэ) шэрэнца и дэшэнца шынгэнца и пэ далэ́ шэрэ́ сыс эфта́ диадэмы;

4. и лэ́скири пори тырдэла три́то паш болыбна́скирэ чэргэнендыр и ёв чхурдыя́ тэлэ́ лэн пэ пхув. И драконо тэрдия́ анги́л джювлятэ, савьякэ трэиндя́ тэ биянэ́л, соб (кай), сыр ёй биянэ́ла, ёв могиндя́ тэ хал тыкнорэ́с.

5. И ёй бияндя́ муршорэс, саво́ явэ́ла тэ хулаинэ́л пэ сарэ́ манушы́тка ро́ды саструнэ́ дэстэса. А ла́киро тыкноро сыс чхудо ваш Дэвлэ́скэ и Лэ́скиро троно.

6. Джувлы́ насця пэ чхучи́ пхув пэ штэ́то, саво́ Дэвэ́л приготовиндя ла́кэ, соб (кай) ёнэ тэ чалякирэн ла екх бар и дуйшэла́ шовдэша́ дывэса́.

7. И кэрдя́пэ марибэ́н дро Болыбна́скиро Раё. Михаило и лэ́скирэ Янго́лы мардэ́пэ драконоса. А драконо и лэ́скирэ Янго́лы мардэ́пэ палэ и лэ́нца:

8. и ёнэ на пиримардэ, и на латхяпэ аж штэ́то ваш лэ́нгэ дро Болыбна́скиро Раё.

9. И баро́ драконо сыс чхурдыно́ тэлэ́, пхурано́ сап, савэ́с кхарэ́на на́лачхо ци бэнг, саво́ хохавэлас саро́ свэ́то. Ёв сыс чхурдыно́ тэлэ́ пэ пхув и лэ́скирэ Янго́лы сыс чхурдынэ́ тэлэ́.

10. И мэ шундём зоралы́ зан болыбна́стыр, со ракирдя́: “Какана́ явдя́ зракхибэ́н и зор и Кралипэ́н Дэвлэ́стыр Дадэ́стыр. Какана́ исын Лэ́скирэ-Христососкири зор, пал-дова́ со бангякирибнаскиро пэ амарэ́ пшалэ́ндэ, саво́ бангякирэлас лэн анги́л Дэвлэ́стэ дывэсэ́ и раты́, сыс чхурдыно́ тэлэ́.

11. И амарэ́ пша́ла лынэ́ упралыпэ́н пэ лэ́стэ свэнтонэ́ Бакрорэ́скирэ ратэ́са и лавэ́са лэ́нгирэ допхэныбнэндыр и ёнэ на дэ́нас чол (цэниндлэ) пэ́скиро джиибэ́н буты́р мэрибна́стыр.

12. Палдава́ ра́дынпэ, Болыбна́скиро Раё! Радынэ́нпэ одолэ́, кон дживэ́ла одо́й! Нэ би́да пэ пхув и пэ мо́рё (дэрья́в), пал-дова́ со на́лачхо гия́ тэлэ́ даранэ холя́са, джининдой, со яця́пэ лэ́скэ на́бут часо.

13. И ке́ли драконо дыкхця́, со лэс чхурдынэ́ тэлэ́ пэ пхув, тэды ёв лыя́ тэ традэл джувля́, сави́ бияндя́ муршорэс.

14. И ла́кэ сыс дынэ́ барэ́-орло́скирэ (кидо́скирэ) дуй пхака́ (крылы), соб (кай) ёй тэ вурнял пэ чхучи́ пхув пэ пэ́скиро штэ́то, кай ла чаравэнас трин пашэ́са бэрш криг сапэстыр.

15. И мэкця́ сап мо́стыр пани́ сыр рэка (лэнь), соб (кай) рэкакири (лэнякири) пани́ тэ лыджа́л криг ла.

16. Нэ пхув помогиндя джувля́кэ и псирадя (отпхандя) пхув пэ́скиро андрыпэн сы́рбы муй и затырдыя рэкакиро (лэнякиро) пани́, саво́ драконо мэкця́ мо́стыр.

17. А драконо зоралэ́с холя́сыя пэ джувля́тэ и гия́ пэ марибэ́н явирэ ла́кирэ биятэнца, савэ́ ячнэ́пэ ла́кирэ родо́стыр, кон приракхэлас Дэвлэ́скирэ припхэныбэна́ и рикирэлас Христосо́скирэ лава́.

Romani Bible Baltic 2019

Maintained by the United Bible Societies for the Baltic Romani Mission