Bible in one year - Пэ Балтитко Романи чиб

Bible in one year December 23

1. Англатуно́ дыкхибэ́н, саво́ проро́ко Авакумо дыкхця́.

2. Кицы́, мэ ява́ва тэ кхарав Тут, Раё Дэ́вла, и Ту на шунэса, кицы́ мэ ява́ва тэ годлав Ту́кэ пал “нахратыма!” Нэ Ту на дэ́са васт тэ ракхэ́с амэн.

3. Со́скэ Ту дэ́са ма́нгэ тэ дыкха́в чорипэ́н, и кэрэ́са адя́кэ, соб (кай) мэ тэ дыкха́в мэ́ньки? Пал-дава́ со чорья и нахрата рэ́нды исын анги́л мирэ́ якха́, мануша́ кошэнапэ и чингардэнапэ.

4. Пир дова́ Зако́но яця́ бизорья́киро (нашадя зор), и нанэ чачуно́ сэ́ндо. Фуй ману́ш пиризорьякирэла чачунэ́ манушэ́с, а сэ́ндо рискирэна, сыр камэ́на.

5. “Дыкхэ́н машки́р народы, и придыкхэнпэ, и акэ – тумэ́ кэрэ́на барэ́ якха́!”, – ракирэ́ла Рай Дэвэ́л. Пал-дова́ со Мэ кэра́ва дасаво рэ́ндо дрэ тумарэ́ дывэса́, дро саво́ тумэ́ на явэ́на тэ патя́н, на дыкхи́ пэ дова́, со тумэ́нгэ роспхэнэна.

6. Пал-дова́ со Мэ, акэ, ґазда́ва Халдеен, кирки и сы́гно нацыя, сави́ кхарэ́лапэ (двигинэлапэ) пир пхувья́киро буґлыпэ́н, соб (кай) тэ заухтылэн джиибна́скирэ штэ́ты, савэ́ исын на лэ́нгирэ.

7. Ёнэ исын даракунэ и трашанэ мануша́: пхаро́ сэ́ндо кэрэ́ла лэ́нгири зор, лэ́ндыр кокорэндыр выджа́ла сэ́ндо.

8. Лэ́нгирэ граё исын сыгэды́р леопардэндыр и ёнэ исын холямэдыр бэльвэлитконэ рувэндыр. Лэ́нгирэ уклистэнгирэ халадэ́ традэ́на барипнаса; лэ́нгирэ грая явэ́на дурипнастыр; ёнэ праста́на сы́рбы вурняла о́рло (ки́до), саво́ сыгэды́р явэ́ла тэ хал дорэсыбэ́н.

9. Ёнэ сарэ́ явэ́на тэ одлэн нахратэс, мина пэ лэ́нгирэ муя́ рискирды пэ васто́ко, ёнэ скэдэ́на пленнонэн сы́рбы пра́хо.

10. Ёнэ сыкавэ́на бипатыв кэ кра́лья, ёнэ санапэ холямэс тхагарьендыр, ёнэ просана кажно тва́рдыма (диз), пал-дова́ со ёнэ чхувэ́на валы пхувья́тыр и заухтылэна лэн.

11. Тэ́ньци лэ́нгиро ду́хо (фа́но) парудёла и ёнэ джа́на сыр балва́л, и ёнэ кэрэ́на чорипэ́н: лэ́нгиро зор ячэ́лапэ ваш лэ́нгэ сыр лэ́нгиро дэвлоро.

12. Ци на сан Ту векэндыр и пэ сарэ́ ве́ки, О, Раё Дэ́вла, миро Дэ́вла, миро Екх Свэ́нто, – амэ на мэраса. Ту, Раё Дэ́вла! Ту выкэдыян лэн, Халдеен, ваш пхаро́ сэ́ндо пэ амэ́ндэ. Э, Ска́ла! Ту дыя́н зор лэ́нгэ тэ пирисыклякирэн амэн.

13. Тырэ́ якха́ исын древа́н свэ́нта, соб (кай) тэ дыкхэ́н пэ дая́ биба́хт, и лэ́нгэ нашты́ тэ дыкхэ́н фуипэ́н. Со́скэ Ту дыкхэ́са кодолэ́н, савэ́ кэрэ́на злыдниткэс, и Ту на ракирэ́са нисо́, сыр бибахтало́ ману́ш хасякирэ́ла одолэ́с, саво́ исын чачунэдыр лэ́стыр?

14. Со́скэ Ту кэрэ́са адя́кэ, со мануша́ ячэ́напэ сыр морёскирэ (дэрьявэ́скирэ) мачхэ́, сыр цапня, пэ савэ́ндэ нанэ барыдыро́?

15. Ёнэ, Халдеи, старэна манушэ́н вэндкаса, ёнэ ухтылэна лэн дрэ лэ́нгири кхуды́ (сеть), и ёнэ скэдэ́на лэн дро лэ́нгиро неводо, палдава́ ёнэ древа́н радынэ́напэ, и ёнэ исын весе́ла (лошалэ́).

16. Палдава́ ёнэ янэ́на свэ́нта дыибэна́ лэ́нгирэ кхудякэ и ёнэ хачкирэна дро́га смо́лы лэ́нгирэ неводоскэ; пал-дова́ со кхудятыр лэ́нгири до́ля (паш) исын барвалы, и пэ лэ́нгиро сками́нд исын бут хабэна.

17. Ци явэ́на ёнэ ишчо (инкэ́) тэ чхучакирэн пэ́скири кхуды́, и дурэды́р тэ марэ́н (тэ мулякирэ́н) манушы́тка на́цыи би тангипнаскирэс?

Habakkuk 2:1-20

1. И мэ ява́ва тэ тэрдёвав пэ стрэ́га, и мэ ява́ва пэ вало тэ дыкха́в, со Ёв отпхэнэ́ла ма́нгэ, соб (кай) ма́нгэ тэ отпхэнав пэ миро жалиныбэн пэ Лэ́стэ.

2. Тэ́ньци отпхэндя́ ма́нгэ Рай Дэвэ́л и пхэндя́: “Зачхин дыкхибэ́н и кэр бицялэс (яснэс) дава́ пэ таблицы, соб (кай) кодова́, кон явэ́ла тэ гинэл, сашты́ локхэс тэ гинэл.

3. Пал-дова́ со дава́ дыкхибэ́н сыкавэ́ла пэ часо (цы́ро), саво́ ишчо (инкэ́) явэ́ла, нэ ёв явэ́ла тэ ракирэ́л пал ко́нцо (яго́ро), и ёв на явэ́ла тэ хохавэ́л. На дыкхи́ пэ дава́, со ёв зарикирэлапэ, ужакир лэс. Пал-дова́ со ёв явэ́ла, соб (кай) тэ на явэ́л, ёв на зарикирэлапэ (на отпарувэлапэ).

4. Дыкхэ́н: пхутькирдо ману́ш камэ́ла намиштыпэн и хасёла, нэ чачуно́ ману́ш явэ́ла тэ дживэ́л пир лэ́скиро патяибэ́н.”

5. Пхутькирдо ману́ш кэрэ́ла чорипэ́н сыр моля́тыр (виностыр), сави́ здэла лэс, и лэ́скэ уса́ нанэ штылыпэн (спокоё). Пал-дова́ со лэ́скиро тырдыпэ́н барьёла дрэ лэ́стэ сыр штэ́то дро лю́но (адо), и ёв исын на чало сыр мэрибэ́н, ёв, Халдеё, кэдэла кэ пэ сарэ́ манушы́тка ро́ды, и ёв затырдэла (заухтылэла) кэ пэ сарэ́ манушы́тка ро́дыцы.

6. Ци на лэ́на сарэ́ кадалэ́ мануша́ (конэ́с ёв росчордя) тэ ракирэ́н притча проти лэ́стэ, и тэ высан лавэ́нца лэс, пхэни́: “Бида пэ лэ́стэ, кон прибарьякирэла кэ пэ дова́, со нанэ лэ́скиро – пэ кицы́ дурэды́р дава́ явэ́ла? Бида пэ кадалэстэ, кон обчхувэла пэс сымаденца (залогэнца)?”

7. Ци на ґаздэ́напэ екха́тыр (сра́зу) одолэ́, савэ́ ужакирэ́на тэ дандырэн тут? Ци на джангадёна (на ґаздэ́напэ) одолэ́, савэ́ явэ́на тэ притасавэн тут адя́кэ, со ту ячэса ваш лэ́нгэ сы́рбы лэ́нгиро дорэсыбэ́н?

8. Пал-дова́ со ту обчордян бут народы (манушы́тка на́цыи), сарэ́, кон яця́пэ кадалэ́ манушэ́ндыр, явэ́на тэ обчорэн тут пал манушэ́нгиро рат, и пал нахратыма пэ пхув и дро фо́ро, пал сарэ́ манушэ́ндэ, савэ́ дживэ́на пэ дая́ пхув.

9. Бида пэ лэ́стэ, кон дорэсэ́ла барвалыпэ́н бибахталэ́ рэндэ́ндыр пэ́скирэ кхэрэ́скэ, соб (кай) лэ́скэ тэ кэрэ́л гня́зда (ку́фо) вучэ́с, соб (кай) ёв саштынэлас тэ зракхэлпэ бибахталэ́ зорья́тыр.

10. Ту придуминдян ладж пэ́скирэ кхэрэ́скэ, ке́ли ту хасякирдян бут народы (манушы́тка на́цыи), и палдава́ ту лыян грэ́хо пэ пэ́скиро ди.

11. Пал-дова́ со аж бара́ явэ́на тэ дэн го́дла зоралэ́ заня́са вантатыр, и бэранда (перекладины) каштэ́стыр явэ́на тэ отпхэнэн:

12. “Бида пэ лэ́стэ, кон чхувэ́ла фо́ро пэ рат, и кон зачхувэла тва́рдыма/ фо́ро начапипнаса (чорипнаса)!”

13. Акэ, дава́ нанэ янголэ́нгирэ-болыбна́скирэ Ра́стыр-Дэвлэ́стыр, со манушы́тка на́цыи кэрэ́на буты́ пхарэ́с ваш яг, со кхэри́тка ро́ды (пле́ми) кхинякирэна пэс ивья́ (напра́снэс)?

14. Пал-дова́ со пхув явэ́ла пхэрды́ джиныбнаса пал Ра́скирэ-Дэвлэ́скири сла́ва, сыр паня́ учхакирэна (пхэрдякирэна) мо́рё (дэрья́в).

15. Бида пэ лэ́стэ, кон дэ́ла тэ пьел пэ́скирэ суседоскэ (котарискэ/пашатунэскэ) и вычхувэла пэ́скири холы́, соб (кай) тэ матякирэл лэс, соб (кай) ёв сыс сашты́ (могиндя́) тэ дыкхэ́л лэ́скиро нангипэ́н.

16. Ту сан пхэрдо́ ладжаипнаса, а на слава́са. Акана́ Ту адя́кэ-паць, пи! Мэк тэ явэ́л отчхакирдо тыро́ наобчхиныбэн! Тахта́й чачунэ́-вастэскиро Ра́стыр-Дэвлэ́стыр рисёла проти ту́тэ, и ладжаипэ́н (ладжакуно чадыипэн) пэрэ́ла пэ тыро́ барипэ́н (сла́ва).

17. Пал-дова́ со чорипэ́н, со ту кэрдя́н Ливаноскэ, учхакирэ́ла тут (пэрэ́ла пэ ту́тэ); мурдала́ (жывотна), со ту трашадян лэн, явэ́на тэ трашавэн тут, пал манушэ́нгиро рат, пал чорипэ́н, со кэрдя́н пхувьякэ, фороскэ, и сарэ́нгэ, кон дживэ́ла дро фо́ро.

18. Саво́ лачхипэ́н исын вычхиндлэ́ мо́стыр, со вычхиныбнаскиро (резчыко) кэрдя́. Вычхиндло муй на сыклякирэ́ла нисоскэ, на дыкхи́ пэ дова́, со лэ́скирэ кэрибнаскиро ману́ш патя́ла дрэ лэ́стэ, ке́ли ёв кэрэ́ла мута (нема) и́долы?

19. Бида пэ лэ́стэ, кон ракирэ́ла пэ кашт: “Джангадёв (ушты́)!”, кашукэ (мутонэ) барэскэ: “Ушты́!” Ци явэ́ла ёв тэ сыклякирэ́л? Акэ, ёв исын пиричхудо сувнака́са и рупэ́са, нэ нанэ джидо́ ду́хо (фа́но) дрэ лэ́стэ.

20. Нэ Рай Дэвэ́л исын дро Лэ́скири свэ́нто Кхангири́. Мэк сари́ пхув тэ явэ́л штыл анги́л Лэ́стэ [Лэ́скиро муй-р.с.].”

Habakkuk 3:1-19

1. Па́тери (моли́тва) Авакумоскири, пророкоскири, тэ бага́н тэл балытко струменто.

2. Раё Дэ́вла! Мэ шундём Тыри́ зан и дарандыём. Раё Дэ́вла! Кэр нэвэ́стыр Тырэ́ рэ́нды дро амарэ́ часы, кэр адя́кэ, соб (кай) тэ джинэ́н тырэ́ рэ́нды машкира́л амарэ́ часы. На дыкхи́ пэ дова́, со Ту холясыян пэ амэ́ндэ, сыка́в Тыри́ ла́ска.

3. О Дэвэ́л явэ́ла Феманостыр, о Свэ́нто Дэвэ́л бэрга́тыр Фаран. Лэ́скиро барипэ́н учхакирдя́ болыбэ́н, Лэ́скирэ слава́са пхэрдия пхув (и пхув исын пхэрды́ шарибнаса Лэ́скэ).

4. Лэ́стыр зяиныпэн отмарэла сыр кхамитко дуд (свэ́то), Лэ́скирэ вастэ́ндыр лучы (лунки) зяинэна яга́са, [и дро дова́, Лэ́скири зор исын гарады!-ю.о.]

5. Анги́л Лэ́стэ [Лэ́скиро муй-р.с.] прогия́ мэрибнытко фра́нсо, а пал Лэ́скирэ пирэ́ (сто́пы) сляды джа́ла хачкирды балва́л.

6. Ёв тэрдия́, и пхув тринскирдяпэ, Ёв подыкхця́, и мануша́ издрандынэ и ґаратунэ́ бэ́рги пхарадынэ пэ котэра́, а векитка бэ́ргицы бандинэ. Лэ́скирэ дрома́ исын вечна.

7. Мэ дыкхцём, сыр ша́тры Эфиопиитка (Кушаноскирэ) пынэ́ дро ду́хо (фа́но), и сыр буды пэ Мидиякири пхув издрандынэ.

8. О, Раё Дэ́вла! Ци Ту холясыян пэ рэ́ки (лэня́), Ци сыс Тыри́ холы́ проти рэ́ки (лэня́), Ци сыс Тыри́ бари холы́ проти мо́рё (дэрья́в), со Ту традэсас уклисто (уклистэ́) пэ тырэ́ ґрэндэ, Тырэ́ марибны́тка вурдэна́, савэ́ зракхэна.

9. Тыро́ лу́ко исын откэрдо тэ дэн карье пир совлаха́, со Ту пхэндя́н Тырэ́ родыцэнгэ. Сэ́ла. Ту роскэрдян пхув рэкицэнца.

10. Бэ́рги дыкхнэ́ дава́ и лынэ́ Тэ издран, сыгна панинга́ дынэпэ тэ тхадэн потокоса. Хор паня́ пхэндлэ́ лэ́нгирэ заня́са, и ґаздынэ́ вучэ́с лэ́нгирэ валны сыр васта́.

11. Кхам и чхон тэрдинэ́ пэ лэ́нгиро штэ́то пэ болыбэ́н, ке́ли Тырэ́ марибны́тка бустя́ (стре́лы) дынэпэ яга́са, и лынэ́ тэ зяинэн Тырэ́ чхурдыбнытка бустя́ (коп΄и), со отмарэна зяиныбнаса.

12. Ту ги́ян сы́рбы халадыбэ́н пир пхув дрэ холы́, Ту штакирдян манушы́тка ро́ды дрэ нарадыма.

13. Ту ги́ян анги́л тэ зракхэс Тырэ́ манушэ́н, соб (кай) тэ зракхэс Тырэ́ Помакхнэс, Ту пэкадян шэралэс кхэрэ́стыр, кай исын бибахталэ́, Ту росчхудян (розуридян) лэс кэ нангипэ́н шэрэстыр кэ ґэра́. Сэ́ла.

14. Ту пхарадян лэ́скэ шэро́ лэ́нгирэ шэралэн чхурдыбнытконэ бустенца, ке́ли лэ́скирэ халадэ́ ґаздынэ́пэ сыр рискирибнаскири балва́л тэ росчхурдэн амэн, ёнэ радындлэпэ сы́рбы пэ свэ́нко, со накхавэна (глытынэна) чораханэ́с чорорэнгирэ маса́ Израилёстыр.

15. Ту штадян (прочхудян дром) пир мо́рё (дэрья́в) пэ́скирэ грэнца пирда́л барэ́-паненгиро вучипэ́н, со отмарэлапэ пенаса.

16. Ке́ли мэ шундём, мирэ́ маса́ лынэ́ тэ издран, мирэ́ ушта́ лынэ́ тэ издран локхэс далэ́ занятыр: кирныпэн загия́ дрэ мирэ́ кокалы́; и мэ яцём тэ тринскиравпэ пэ пэ́скиро штэ́то. Нэ ма́нгэ трэй тэ явав штыл дро дывэ́с дарано, ке́ли явэ́ла вэ́рго пэ мирэ́ манушэ́ндэ пэ́скирэ халадэнца.

17. Ко́ли и инжыритко дрэ́во (кашт), хачи, на явэ́ла тэ лулудёл (тэ цвэцинэл), и на явэ́на му́ри пэ винаграды́тка хру́сты; ко́ли маслинитконэ барьятыр на явэ́ла ничы́, и пэ фэ́лды на выбарьёла нисо́; ко́ли ста́ды бакрэ́нгирэ хасёна яври́ гражостыр (загоностыр), и на явэ́на кхэри́тка ста́ды дрэ шталы,

18. нэ мэ усае́кх древа́н ява́ва тэ радынавпэ Ра́стыр-Дэвлэ́стыр, и мэ ява́ва тэ радынавпэ Дэвлэ́стыр, Саво́ зракхэ́ла ман.

19. Ра́стыр-Дэвлэ́стыр лэ́лапэ мири́ зор, и Ёв кэрэ́ла мирэ́ ґэрэндыр сы́рбы оленёскирэ сыгна ґэра́ и Ёв ґаздэ́ла ман тэ псирав пир мирэ́ вучэ́ бэ́ргицы. (Хоро́скирэ Дирижоро́скэ пэ балытка струме́нты).

Psalms 146:1-10

1. Аллилуя! Шар миро ди Рас-Дэвлэ́с!

2. Кицы́ мэ ява́ва тэ джива́в, ада́кицы мэ ява́ва тэ шара́в Рас-Дэвлэ́с, мэ ява́ва тэ бага́в псалмы мирэ́ Дэвлэ́скэ, пака мэ сом джидо́.

3. На патя́н зоралэ́с дрэ тхагарьендэ (дрэ князьендэ), ци дрэ манушэ́скирэ чхавэ́стэ, пал-дова́ со нанэ зракхибэ́н лэ́ндыр.

4. Сыр ёнэ мэрэ́на, лэ́нгиро ду́хо (фа́но) джа́ла криг, ёв рисёла дро пра́хо, дро дова́-паць дывэ́с сарэ́ лэ́нгирэ ду́мы хасёна.

5. Бахтало́ исын кодова́ ману́ш, конэ́скэ подэла васт Яково́скиро Дэвэ́л, кон ужакирэ́ла лачхипэ́н Ра́стыр-Дэвлэ́стыр, Лэ́скирэ Дэвлэ́стыр.

6. Ёв создыя́ болыбэ́н и пхув, мо́ри (дэрьява́) и саро́, со исын дрэ лэ́ндэ. Ёв усады (сак) рикирэ́ла патяибэ́н.

7. Ёв кэрэ́ла чачипна́скиро сэ́ндо ваш одолэ́нгэ, савэ́н притасавэнас. Ёв дэ́ла хабэ́н бокхалэ́нгэ: Рай Дэвэ́л мэкэ́ла пэ во́ля штарибнаскирэн (бэшыбнаскирэн).

8. Рай Дэвэ́л отпхандэла якха́ корорэнгэ, Рай Дэвэ́л ґаздэ́ла одолэ́н, савэ́ бандинэ тэлэ́ пхарипнастыр, Ра́скэ Дэвлэ́скэ трэй чачипнаскирэ.

9. Рай Дэвэ́л ракхэ́ла чужонэ́ манушэ́н; Ёв лэ́ла криг пхарипэ́н пиротэ́ндыр (сиротэндыр) и пивле́ндыр (удовэндыр), нэ Ёв бандякирэла дром фуе́ манушэ́нгэ.

10. Рай Дэвэ́л явэ́ла тэ кралинэ́л усады (сак)! О Сио́но, Тыро́ Дэвэ́л явэ́ла пир сарэ́ ро́ды. Аллилуя.

Proverbs 30:17-17

17. Манушэ́стэ, кон просала дадэ́с, и кон салапэ холямэс, соб (кай) тэ на кандэл пэ́скирэ да, то лэ́скэ кораки, со исын пэ до́ло, выхана лэ́скирэ якха́, и тэрнэ́ орлы (кидорэ) схана лэн сарэ́са.

Zjaveňie 13:1-18

1. И мэ со́мас тэрдо́ пэ морёскиро (дэрьявэ́скиро) пра́хо. И мэ дыкхцём рискирибна́скирэ мурдалэс (зверёс), саво́ ґаздэласпэ морёстыр (дэрьявэстыр), савэ́стэ сыс эфта́ шэрэ́ и дэш шынга́ (ро́ги). Пэ кажно лэ́скиро шынг сыс диадэма, а пэ кажно шэро́ сыс лав тэ калякирэн Дэвлэ́с.

2. И рискирибна́скиро мурда́л, савэ́с мэ дыкхцём, сыс сы́рбы леопардо, а ґэра́ (пирэ́) сыс лэ́стэ сы́рбы ричэскирэ ґэра́, а муй лэ́скиро сыс сы́рбы муй шчэрэстэ (левостэ). И драконо дыя́ лэ́скэ пэ́скири зор и троно и бари зор.

3. И екх шэро́ рискирибна́скирэ – мурдалэскирэ шэрэндыр сыс хасякирдо кэ мэрибэ́н, нэ дава́ мэрибнытко фра́нсо (рана) сыс састякирдо. И сари́ пхув дивиндяпэ и гия́ пал рискирибна́скирэ мурдалэ́стэ. И ёнэ клониндлэпэ драконоскэ, саво́ дыя́ зор рискирибна́скирэ мурдалэскэ.

4. И ёнэ клониндлэпэ патыва́са рискирибна́скирэ мурдалэскэ, ракири́: “Кон исын адасаво́, сыр дава́ рискирибна́скиро мурда́л? Кон могинэ́ла (саштынэла) тэ марэ́лпэ лэ́са?”

5. И мурдалэскирэ москэ сыс дыны́ во́ля тэ пхэнэ́л пхутькирдэ́ лава́ тэ калякирэл Дэвлэ́с, и лэ́скэ сыс дыны́ зор тэ кэрэ́л пэ́скири буты́ штардэша́ дуй чхона́.

6. И ёв отпхандя пэ́скиро муй тэ калякирэл Дэвлэ́с и тэ калякирэл Лэ́скиро лав и штэ́то, кай Ёв дживэ́ла и одолэ́н, савэ́ дживэ́на дро Болыбна́скиро Раё.

7. И лэ́скэ сыс дыно́ тэ джал марибна́са пэ свэнтонэндэ и тэ лэл упралыпэ́н пэ лэ́ндэ, и лэ́скэ сыс дыно́ право пэ кажно ро́дыцо (колено) и пэ манушы́тко нацыя (народо), и пэ кажно екхэ́-чиба́кири ири́/сэ́м΄я (чиб), и пэ кажно кхэри́тко ро́до (племё).

8. И сарэ́, кон дживэ́ла пэ пхув, явэ́на тэ клонинэнпэ патыва́са далэ́ рискирибна́скирэ мурдалэскэ, кон исын на зачхиндло́ дрэ джиибна́скири лылвари́, сави́ исын Свэнтонэ́ Бакрорэстэ, Саво́ сыс мулякирдо свэто́скирэ англыпна́стыр.

9. Конэ́стэ исын кана́, мэк ёв тэ шунэ́л.

10. Конэ́скэ трэй тэ лыджа́л дро пле́но, одова́ кокоро́ джа́ла дро пле́но. Кон замарэла куртала́са, одова́ кокоро́ явэ́ла замардо куртала́тыр. Ада́й трэй вырикирибэн и патяибэ́н Дэвлэ́скирэ манушэ́нгэ.”

11. И мэ дыкхцём явирэ рискирибна́скирэ мурдалэ́с, саво́ джа́лас яври́ пхувья́тыр. Лэ́стэ сыс дуй шынга́ сыр бакрорэстэ и ёв ракирдя́ сыр драконо.

12. И ёв кэрэ́лас саро́ пэрвонэ́-мурдалэ́скирэ право́са. Ёв зачхувэлас сари́ пхув и одолэ́н, савэ́ дживэ́на пэ ёй, тэ клонинэнпэ патыва́са пэрвонэ́ рискирибна́скирэ мурдалэскэ, савэ́стэ мэрибнытко фра́нсо сыс састякирдо.

13. И ёв кэрэ́лас барэ́ знаме́нии (ґертыка́), со аж лыджалас тэлэ́ яг болыбна́стыр пэ пхув анги́л манушэ́ндэ.

14. И ёв хохавэлас одолэ́н, савэ́ дживэ́на пэ пхув кодолэнца ґертыкэ́нца, со лэ́скэ сыс дыно́ тэ кэрэ́л анги́л пэрвонэ́-рискирибна́скирэ мурдалэ́стэ, ракири́ сарэ́нгэ, кон дживэ́ла пэ пхув, тэ кэрэ́н дая́ парти́н (о́бразо) адалэ́ мурдалэскири, савэ́стэ сыс фра́нсо куртала́тыр и саво́ дживдя́.

15. Адалэ́ явирэ-рискирибна́скирэ мурдалэскэ сыс дыны́ зор тэ дэл джидо́ ду́хо (фа́но) дрэ дая́ патри́н (о́бразо) пэрвонэ́ мурдалэскири адя́кэ, соб (кай) дая патри́н (о́бразо) тэ лэл тэ ракирэ́л и создыя́ адя́кэ, соб (кай) сарэ́, кон на клонинэнапэ патыва́са мурдалэскирэ патринякэ (образоскэ), тэ явэ́н мулякирдэ́.

16. И кадава́ яви́р рискирибна́скиро мурда́л кэрэ́лас адя́кэ, соб (кай) сарэ́ манушэ́нгэ, тыкнэнгэ и барэнгэ, барвалэнгэ и богэнгэ, вольнонэ и писхарье́нгэ тэ дорэсэн шпэ́ра (знако) пэ чачо́ (право) васт ци пэ лэ́нгиро чэкат;

17. соб (кай) нико́н на могинэлас тэ кинэл, тэ бикнэл апри́ч одолэ́стэ, савэ́стэ исын шпэ́ра; ци мурдалэскирэ лавэ́са ци лэ́скирэ-лавэ́скирэ гинэ́са (чыслоса).

18. Ада́й исын годыпэ́н. Конэ́стэ исын пэ́скири годы́, мэк ёв тэ выгинэл мурдалэскиро гин (чысло): дава́ исын манушы́тко гин (чысло), лэ́скиро гин (чысло) исын шовшэла́ шовдэша́ шов.

Romani Bible Baltic 2019

Maintained by the United Bible Societies for the Baltic Romani Mission