Bible in one year
December 25

1. Пэ яви́р бэрш, сыр лыя́ тэ раинэл Кра́ли Дариё, дро шо́вто чхон, пэ́рво дывэ́с чхонэ́скиро, сыс лав Ра́скиро-Дэвлэ́скирэ пророкоскэ Агеёскэ ваш Зоровавелёскэ, чхавэ́скэ Салафиилоскирэскэ [Шалтилоскирэскэ-ю.о.], кон сыс шэрало́ рай пэ Юдэ́я, и ваш Ешуаскэ [Исусо́скэ-р.с.], чхавэ́скэ Иосэдэкоскирэскэ, кон сыс пэ́рво раша́й, пхэни́:
2. “Адя́кэ ракирэ́ла янголэ́нгиро-болыбна́скиро Рай Дэвэ́л, пхэни́: ‘Кадалэ́ мануша́ ракирэ́на: ишчо (инкэ́) на явдя́ часо тэ чхувэ́л Кхэр (Кхангири́) Ра́скирэ-Дэвлэ́скиро.’”
3. Тэ́ньци сыс лав Ра́скирэ-Дэвлэ́скиро пророкоскэ Агеёскэ, и пхэндя́:
4. “Ци исын часо тумэ́нгэ тэ дживэ́н дрэ обсыдэ кхэра́, а Кхэрэ́скэ (Кхангирьякэ) тэ пасёл дрэ руи́ны?
5. Палдава́ акана́ адя́кэ ракирэ́ла янголэ́нгирэ-болыбна́скиро, Рай-Дэвэ́л: “Рисён илэ́са пэ далэ́ рэ́нды (де́лы)!
6. Тумэ́ бут чхувэ́на дрэ пхув, нэ на́бут лэ́на тумэ́: тумэ́ ха́на, нэ тумэ́ на сан чалэ; тумэ́ пьена, нэ тумэ́ на выпьена чалэ́с, тумэ́ урьенапэ, нэ тумэ́нгэ исын на тато; и кон кэрэ́ла буты́ тэ закэрэл, закэрэла, соб (кай) тэ чхувэ́л дро миенгиро (кошэлько) лёхэнца (дыркэнца)”
7. Адя́кэ ракирэ́ла янголэ́нгирэ-болыбна́скиро, Рай Дэвэ́л: “Рисён илэ́са пэ далэ́ рэ́нды!”
8. Джа́н упрэ́ пэ бэ́рга и янэ́н вэш, и чхувэ́н Кхангири́, и Мирэ́ илэскэ явэ́ла лачхо́, и тумэ́ кэрэ́на паты́в Ма́нгэ”, – ракирэ́ла Рай Дэвэ́л.
9. “Тумэ́ ужакирэ́на бут, нэ чачипна́са далэ́стыр явэ́ла на́бут, и ке́ли тумэ́ янэ́на дава́ кхэрэ́, Мэ роспхурдава криг. Со́скэ? – ракирэ́ла янголэ́нгирэ-болыбна́скиро, Рай Дэвэ́л: ‘Ваш дова́, со Миро кхэр исын дрэ руи́ны, нэ кажно (сва́ко) тумэ́ндыр прастала кэ пэ́скиро кхэр.
10. Палдава́ болыбэ́н, со исын упра́л тумэ́ндэ, зарикирдя пахлын (роса), и пхув зарикирдяпэ тэ дэл барьякирдэ́ (пло́ды).
11. Пал-дова́ со Мэ выкхардём шутькирибэн пэ пхув, и пэ бэ́рги, пэ гив и пэ нэви́ мол (вино), и пэ маслинитко дзэт (елеё), пэ саро́, со пхув биянэ́ла, пэ манушэ́ндэ, и пэ кхэритконэ́ мурдалэ́ндэ, и пэ сари́ буты́ тумарэ́ вастэнгири.”
12. Тэ́ньци о Зоровавелё, чхаво́ Салафиилёскиро (Шалтилоскиро), и Ешуа, чхаво́ Иосэдэкоскиро (Ехозадакоскиро), пэ́рво раша́й, и сарэ́ мануша́, кон яця́пэ, кандынэ́ Ра́скирэ-Дэвлэ́скири зан, лэ́нгирэ Дэвлэ́скири, и пророкоскирэ Агеёскирэ лава́, пир дова́, со о Рай Дэвэ́л, лэ́нгиро Дэвэ́л бичхадя́ лэс, и мануша́ трашандынэ анги́л Растэ-Дэвлэ́стэ.
13. Тэ́ньци о Агеё, Ра́скирэ-Дэвлэ́скиро вестя-яныбнаскиро (вестнико), пхэндя́ дая́ звесь Ра́стыр-Дэвлэ́стыр манушэ́нгэ, пхэни́: “Мэ сом тумэ́нца”, – ракирэ́ла Рай Дэвэ́л.”
14. И джангадя о Рай Дэвэ́л ду́хо (фа́но) Зоровавелёскиро, чхавэ́скирэ Салафиилёскиро, кон сыс шэрало́ рай пэ Юдэ́я, и ду́хо (фа́но) Ешуаскиро, чхавэ́скирэ Иоседэкоскиро (Ехозадакоскиро), кон сыс пэ́рво раша́й и сарэ́-манушэ́нгиро ду́хо (фа́но), кон яця́пэ, и ёнэ явнэ́ и кэрдэ́ буты́ пэ янголэ́нгирэ-болыбна́скиро, Ра́скирэ-Дэвлэ́скиро Кхэр (Кхангири́), лэ́нгирэ Дэвлэ́скиро,
1. Дро эфта́то (битринэ́нгиро дэ́што) чхон, пэ биш тэ пэ́рво дывэ́с далэ́ чхонэ́скиро явдя́ лав Ра́скирэ-Дэвлэ́скиро пророкоскэ Агеёскэ, пхэни́:
2. “Пхэн акана́ Зоровавелёскэ, чхавэ́скэ Салафиилёскирэскэ, кон сыс шэрало́ рай пэ Юдэ́я и Ешуаскэ, чхавэ́скэ Ехозадакоскирэскэ, кон исын пэ́рво раша́й, и манушэ́нгэ, кон яця́пэ, ракири́:
3. ‘Ци яця́пэ вари-кон машки́р тумэ́ндэ, кон дыкхця́ дава́ Кхэр (Кхангири́) дрэ лэ́скиро барипэ́н, со сыс вагэдыр (΄гарэдыр)? И саво́ тумэ́ дыкхэ́на лэс акана́? Ци дава́, со тумэ́ дыкхэ́на, нанэ дукх тумарэ́ якхэнгэ?
4. Нэ акана́ яв муршкано́, Зоровавеле,’ – ракирэ́ла Рай Дэвэ́л; яв муршкано́, Ешуае, Чхаво́ Ехозадакоскиро пэ́рво раша́й, и явэ́н муршканэ́, сарэ́ мануша́лэ далэ́ пхувья́тыр,’ – ракирэ́ла Рай Дэвэ́л и кэрэ́н бутя́, пал-дова́ со Мэ сом тумэ́нца,’ – ракирэ́ла янголэ́нгирэ-болыбна́скиро, Рай Дэвэ́л.
5. Пир дава́ лав, савэ́са Мэ чхудём Завето тумэ́нца, ке́ли тумэ́ выджа́нас Египто́стыр, и Миро ду́хо (фа́но) ячэ́лапэ тумэ́нца: На дарэ́н.
6. Ишчо е́кхвар на́бут проджа́ла, и Мэ тринскирава болыбэ́н, и пхув, и мо́рё (дэрья́в), и шуки́ пхув;
7. и Мэ тринскирава сарэ́ манушы́тка на́цыи (народы), и явэ́ла Месия и ваш сарэ́, манушы́тка ро́ды, и Мэ пхэрдякирава дава́ Кхэр (Кхангири́) барипнаса,’ – ракирэ́ла янголэ́нгирэ-болыбна́скиро, Рай Дэвэ́л.
8. Руп исын Миро, и сувнака́й исын Миро,’ – пхэндя́ янголэ́нгирэ-болыбна́скиро, Рай Дэвэ́л.
9. “Нэви́ Кхангири́ явэ́ла бари сыр кодоя, со сыс вагэдыр (ґарэдыр),’ – ракирэ́ла янголэ́нгирэ-болыбна́скиро, Рай-Дэвэ́л. “И пэ дава́ штэ́то Мэ да́ва рама́не (миро)”, – ракирэ́ла янголэ́нгирэ-болыбна́скиро, Рай-Дэвэ́л.
10. Пэ биш тэ шта́рто дывэ́с дро еня́то (биекхэ́скиро дэ́што) чхон, пэ яви́р бэрш, ке́ли раиндя Дариё, сыс лав Ра́скирэ-Дэвлэ́скиро Агеёскэ, пророкоскэ, пхэни́:
11. “Адя́кэ ракирэ́ла янголэ́нгирэ-болыбна́скиро, Рай Дэвэ́л: ‘Акана́ пхучэ́н рашандыр пал Зако́но, и пхэнэ́н:
12. ‘Ко́ли вари-кон лыджа́ла мас дрэ бринда (складка) лэ́скирэ урибнаскири, и идякиро яго́ро (краё) чилавэ́ла маро́ ци вари-саво́ кэрадо хабэ́н, ци мол (вино), ци оливи́тко дзэт (елеё), ци вари-саво́ яви́р хабэ́н, ци со да саро́ ячэ́лапэ (посвэнцынло)? Тэ́ньци рашая́ отпхэндлэ́ и пхэндлэ́: “Над.”
13. Тэ́ньци пхэндя́ Агеё: “Ко́ли вари-кон яця́ нажужо пир дова́, со ёв чиладя́ тру́по, и чилавэ́ла вари-со кодолэ́ кокалэндыр, ци ячэ́ла ёв исын нажужо?” Пэ дова́ рашая́ отпхэндлэ́ и пхэндлэ́: “Ёв явэ́ла нажужо.”
14. Тэ́ньци Агеё отпхэндя́ и пхэндя́: “Адя́кэ, исын дая́ манушы́тко нацыя (народо) и адя́кэ исын кадава́ кхэри́тко ро́до (племя) анги́л Ма́ндэ”, – ракирэ́ла Рай Дэвэ́л, – “и дова́, со ёнэ янэ́на сыр свэ́нто дыибэ́н, кодова́ исын нажужо.”
15. И акана́, рисён илэ́са кэ дава́ дывэ́с и кэ дова́ часо, со явэ́ла анги́л: анги́л дова́, сыр сыс чхудо бар пэ бар дрэ Кхангири́ Ра́скирэ-Дэвлэ́скири –
16. кодолэ́ самонэ дывэсэ́ндыр, ке́ли тумэ́ псирдэ́ кэ копна, сави́ сыс биш гивэскирэ меры, то тумэ́ латхэнас дэш. Ке́ли тумэ́ псирдэ́ кэ молякиро (виноскиро) пресо тэ пхэрэн пандждэша́ прэсэнгирэ меры пресоскирэ чаностыр, одо́й сыс фэ́ни биш.
17. Мэ бичхававас шукипэн, кирныпэн пэ гив, градо пэ бутя́, со тумарэ́ васта́ кэрдэ́, нэ тумэ́ усае́кх на рисинэ́ кэ Мэ”, – ракирэ́ла Рай Дэвэ́л.
18. Акана́, (Мэ манга́ва тумэн), рисён илэ́са кэ дава́ дывэ́с и пэ дова́, со явэ́ла, биш тэ штартонэ дывэсэ́стыр енятонэ (биекхэскирэ дэштонэ) чхонэ́скиро, кадасавэ́ дывэсэ́стыр, ке́ли сыс чхудо фунда́менто дрэ Кхангири́ Ра́скирэ-Дэвлэ́скири, рисён тумэ́ илэ́са кэ дава́.
19. Ци исын ишчо (инкэ́) зя́рка тэ чхувэ́н дрэ пхув дрэ шу́рна (жытница)? Пал-дова́ со, сыр ишчо (инкэ́) ни винаграды́тко хру́сто, ни инжыритко дрэ́во, ни гранатытко дрэ́во, ни маслинитко дрэ́во на дэ́нас пэ́скирэ барьякирдэ́ (пло́ды), то ададывэсатунэ дывэсэ́стыр и анги́л Мэ ява́ва тэ бахтякирав тумэн.”
20. И нэвэ́стыр сыс лав Ра́скирэ-Дэвлэ́скиро Агеёскэ пэ бэш тэ шта́рто дывэ́с дро еня́то чхон, пхэни́:
21. “Пхэн Зоровавелёскэ, шэралэ́ барыдырэ́скэ пэ Юдэ́я, ракири́: ‘Мэ тринскирава болыбэ́н и пхув.
22. Мэ равава дрэ руи́ны троно кралипнэнгиро, Мэ хасякира́ва Наюдытконэ́ – кралипнэнгири зор. Мэ пириравава марибны́тка в урдэна кодолэнца, савэ́ традэ́на пэ лэ́ндэ: граё и лэ́нгирэ уклистэнгирэ (всадники) пэрэ́на, со кэ екх лэ́ндыр пэрэ́ла куртала́тыр лэ́скирэ пшалэскирьятыр.’
23. “‘Дро дова́ дывэ́с,’ – ракирэ́ла янголэ́нгирэ-болыбна́скиро, Рай Дэвэ́л, ‘Мэ ла́ва тут, Зоровавеле, Миро писха́ри, чхаво́ Салафиилоскиро,’ – ракирэ́ла Рай-Дэвэ́л, – ‘и Мэ кэра́ва ту́тыр ангу́шт чэргэнорьяса, пал-дова́ со Мэ выкэдыём тут,’ – ракирэ́ла янголэ́нгирэ-болыбна́скиро Рай Дэвэ́л.”
7. Бага́н Ра́скэ-Дэвлэ́скэ и парикирэ́н Лэ́скэ, бага́н псалмы пэ лута амарэ́ Дэвлэ́скэ:
8. Кон учхакирдя́ болыбэ́н облокэ́нца, Кон кэдэла брышы́нд ваш пхув, Кон кэрэ́ла адя́кэ, со чар барьёла пэ бэ́рги.
9. Ёв дэ́ла кхэритконэ́ мурдалэскэ лэ́нгиро хабэ́н, и тыкнэ́ коракэ́нгэ (воронятэнгэ), савэ́ дэ́на го́дла (кэ Ёв).
10. Ёв на радынэ́лапэ зоралэ́с грэскирэ зорья́тыр, Лэ́скэ исын на дро́го муршэскири зор дрэ ґэра́.
11. Лэ́скэ исын дро́га одолэ́, савэ́ дарэ́на Лэ́стыр, кодолэ́, савэ́ ужакирэ́на лачхипэ́н Лэ́скирэ ковлэ́-илыткиматыр.
20. Акэ, сыр налачхи джувлы́ кэрэ́ла: ёй ха́ла, и кхосэла пэ́скиро муй, и ёй ракирэ́ла: “Мэ на кэрдём ни саво́ фуипэ́н.”
1. И мэ дыкхцём яви́р бари и дивно ґерты́к (знаме́ниё) пэ болыбэ́н: сыс эфта́ Янго́лы эфта́ (эфтэ) палатунэ́ франсэнца, савэ́нца Дэвлэ́скири холы́ кончындяпэ.
2. Тэды мэ дыкхцём вари-со сы́рбы стёклы́тко (балунало́) мо́рё (дэрья́в), саво́ сыс змешындло яга́са. И сыс тэрдэ́ пэ мо́рё (дэрья́в) кодолэ́, савэ́ лынэ́ упралыпэ́н пэ рискирибна́скирэ мурдалэ́стэ, пэ лэ́скири патри́н (о́бразо) и лэ́скирэ-лавэскиро чысло (гин). Ёнэ рикирдэ Дэвлэ́скирэ гусли.
3. И ёнэ баганас Мойзаскири гилы́, Дэвлэ́скирэ писхарискири, и Свэнтонэ́ Бакрорэскири гилы́, пхэни́: “Савэ барэ́ и ди́вна тырэ́ бутя́, Раё Дэ́вла, Сарэзорья́киро! Тырэ́ дрома́ исын чачунэ́ и чачипнаскирэ, Кра́ли манушэ́нгиро!
4. Кон исын одова́, саво на дарэ́ла Ту́тыр, Раё Дэ́вла, И кон на славинэла Тыро́ Лав? Пал-дова́ со Ту сан Екх Свэ́нто, пал-дова́ со сарэ́ мануша́ явэ́на, и ёнэ поклонинэнапэ патыва́са анги́л Ту́тэ пал-дова́, со Ту чачунэ́с приджинэса манушэ́н анги́л бангипэн!”
5. И пало́ (после) саро́ дава́ мэ дыкхцём Свэ́нто Ша́тра, дрэ Сави́ псирадяпэ Кхангири́.
6. И выгинэ́ эфта́ Янго́лы далэ́ Кхангирья́тыр, савэ́ндэ сыс эфта́ фра́нсы, и савэ́ сыс уридэ́ дрэ жужэ́, парнэ́, похтанытка урибэна́ и ёнэ сыс пирипхандлэ кэ колы́н сувнакунэ́ кустыкэнца.
7. И екх штарэ́ джидалэндыр (жывотнонэндыр) дыя́ эфта́ Янголэнгэ эфта́ сувнакунэ́ кучика, со сыс пхэрдэ́ Дэвлэ́скирэ холя́са, со явэ́ла тэ дживэ́л пэ сарэ́ ве́ки.
8. И Кхангири́ яця́ пхэрды́ тхувэса Дэвлэ́скирэ славатыр и зоралыпнастыр и никонэ́скэ сыс нашты́ тэ заджа́л дрэ Кхангири́, пака кончынэнапэ эфта́ фра́нсы Янголэ́нгирэ.
Romani Bible Baltic 2019
United Bible Societies for the Baltic Romani Mission