Beblia

1. И рисия́ дова́ Янго́ло, саво́ ракирдя́ ма́нца, и джангадя ман, сыр джангавэна манушэ́с соибнастыр лэскирэстыр.

2. И пхэндя́ ёв ма́нгэ: “Со ту дыкхэ́са?” И отпхэнавас мэ: дыкха́ва момолы́тко (свети́льнико) саро́ сувнака́стыр и тахтаёро (чашэчка) ваш маслинитко дзэт упра́л лэ́стэ, и эфта́ момолэнгирэ (лампады) пэ лэ́стэ, и пэ эфта́ трубкицы кэ момолэнгирэ, савэ́ исын упра́л лэ́стэ;

3. И дуй маслинки пэ лэ́стэ, екх пэ чачи́ риг тахтаёрэстыр, яви́р пэ зэ́рво (ле́во) риг лэ́скири.

4. И отпхэнавас мэ и пхэндём Янголоскэ, саво́ ракирдя́ ма́нца: “Со дава́ исын, Раё миро?”

5. Тэ́ньци Янго́ло, саво́ ракирдя́ ма́нца, отпхэнэ́лас и пхэндя́ ма́нгэ: “Ци ту на джинэ́са, со дава́ исын?” И пхэндём мэ: “На джино́м, Раё миро.”

6. Тэды отпхэнэ́лас ёв и пхэндя́ ма́нгэ: “Адя́кэ: дава́ исын лав Ра́скирэ-Дэвлэ́скиро кэ Зоровавелё, саво́ ракирэ́ла: ‘На муршыпнаса и на зорья́са, нэ Духо́са Мирэса’”, – ракирэ́ла янголэ́нгирэ-болыбна́скиро, Рай Дэвэ́л.

7. “Кон сан ту, бари бэ́рга анги́л Зоровавелёстэ! Ту сан плоско пхув (лошчы́на), и вылыджала ёв вэнглытко бар, и сарэ́ задэна го́дла: ‘Бахталыпэ́н, бахталыпэ́н пэ лэ́стэ!”

8. И сыс кэ мэ лав Ра́скирэ-Дэвлэ́скиро, пхэны:

9. “Зоровавелёскирэ васта́ кэрдэ́ фунда́менто далэ́ Кхэрэ́скэ (Кхангирьякэ); лэ́скирэ васта́ и кончинэна лэс, тэды ту доджинэсапэ, со янголэ́нгирэ-болыбна́скиро, Рай Дэвэ́л, бичхадя́ Ман кэ тумэ́.

10. Пал-дова́ со, кон могинэ́ла тэ думинэл; со дывэ́с дава́ исын на древа́н важно, ке́ли дасавэ́ радыма́са дыкхэ́на пэ уровнё дрэ васта́ Зоровавелёскирэ, одолэ́ эфта́ (битринэ́нгиро дэш), дава́ исын якха́ Ра́скирэ-Дэвлэ́скирэ, савэ́ обухтылэна дыкхибнаса сари́ пхув?’”

11. Тэды отпхэнавас мэ и пхэндём лэ́скэ: “Со сыкавэ́на долэ́ дуй маслинки пэ чачи́ риг шандалоскири и пэ зэ́рво риг лэ́скири?”

12. Яви́р мо́ло лыём мэ тэ ракира́в и пхэндём лэ́скэ: “Со сыкавэ́на дуй маслинитка рандя́ (вэ́тки), савэ́ пирда́л дуй сувнакунэ́ трубкицы чхувэ́на пэ́стыр сувнака́й?”.

13. И пхэндя́ ёв ма́нгэ: “Ци ту на джинэ́са, со дава́ исын? Мэ отпхэнавас: “Мэ на джино́м, Раё миро.”

1. И нэвэ́стыр (нэвэ́с) газдыём мэ якха́ мирэ́ и дыкцём: акэ, вурняла сви́тко (скрэнцлы папира).

2. И пхэндя́ ёв ма́нгэ: “Со дыкхэ́са ту?” Мэ отпхэнавас: “Мэ дыкха́ва сви́тко, саво́ вурняла; длэнгипэ́н лэ́скиро исын биш куня́ (логци), буґлыпэ́н лэ́скиро исын дэш куня́.”

3. Ёв пхэндя́ ма́нгэ: “Дава́ исын прокошыбэ́н (арман), саво́ ячэ́ла пэ риг сарэ́ пхувья́кири; пал-дова́ кажно (сва́ко), кон чорэла, явэ́ла хасякирдо, сыр исын чхиндло́ пэ екх риг, и кажно, кон дэ́ла хоханы совэ́л, хасякирдо явэ́ла, сыр исын чхиндло́ пэ яви́р риг.”

4. ‘Мэ залыджиём лэс’, – ракирэ́ла янголэ́нгирэ-болыбна́скиро, Рай Дэвэ́л, – и дава́ явэ́ла дро чорэскиро кхэр и дро кхэр одолэскиро, кон дэ́ла хоханы совэ́л Мирэ́ лавэ́са и ячэ́ла дро кхэр лэ́скиро и хасякирла лэс, и кашта́ лэ́скирэ, и бара́ лэ́скирэ.

5. И выгия́ Янго́ло, саво́ ракирдя́ ма́нца, и пхэндя́ ма́нгэ: “Ѓаздэ ишчо (инкэ́) якха́ тырэ́ и дыкх, со да выджа́ла?”

6. Ке́ли жэ мэ пхэндём: “Со дава́ исын? Ёв отпхэнэ́лас: “Дава́ выджа́ла эфа (кхудо), и пхэндя́: “Дава́ исын патри́н (о́бразо) лэ́нгиро пир сари́ пхув.”

7. И акэ, котэ́р молови (свинцо) ґаздыя́пэ, и одо́й исыс бэшты екх джувлы́ машки́р эфа.

8. И пхэндя́ ёв: “Адая джувлы́ – кокоро́ бипатывалыпэн”, и чхурдыя́ ла дрэ эфа машкира́л, нэ пэ отверстиё (пэ кула) ла́кири чхурдыя́ котэ́р моловано́ (свинцово).

9. И газдыём мэ якха́ мирэ́, и задыкхцём: акэ, явнэ́ дуй джувля́, балва́л пхурдэлас дрэ лэ́нгирэ пхака́ (крылы), и пхака́ лэ́ндэ – сыр пхака́ боц(т)яноскирэ; и ґаздынэ́ ёнэ эфа и лыджинэ́ ла машки́р пхув и болыбэ́н.

10. И пхэндём мэ Янголоскэ, саво́ ракирдя́ ма́нца: “Кай лыджа́на ёнэ дая́ эфа?”

11. Тэ́ньци пхэндя́ ёв ма́нгэ: “Соб (кай) тэ кэрэ́н ваш ла́кэ кхэр пэ пхув Сэнаар, и, ке́ли саро́ явэ́ла кэрдо́, тэды ёй чхувэ́лапэ одо́й пэ пэ́скиро фунда́менто.”

1. И нэвэ́стыр (нэвэ́с) ґаздыём мэ якха́ мирэ́ и дыкха́ва: акэ, штар марибны́тка вурдэна́ (колесницы) выджа́нас машки́р дуй бэ́рги; нэ бэ́рги долэ́ исыс бэ́рги харкунэ́ (меди́тка).

2. Дро пэ́рво вурдэ́н андрэ́ дынэ́ граё лолэ́, нэ дро яви́р вурдэ́н – граё калэ́.

3. Дро три́то вурдэ́н граё парнэ́, нэ дро шта́рто вурдэ́н грая сыва, зоралэ́.

4. И лыём мэ тэ ракира́в, и пхэндём Янголоскэ, саво́ ракирдя́ ма́нца: “Со дава́ исын, Раё миро?”.

5. И отпхэнэ́лас Янго́ло и пхэндя́ ма́нгэ: “Дава́ исын штар болыпнаскирэ ду́хи, савэ́ исын отпхэныбнаскирэ анги́л Растэ-Дэвлэ́стэ сарэ́ пхувьякирэстэ.

6. Калэ́ граё одо́й выджа́на пэ риг паш-рати́тко (северно), и парнэ́ нашэ́на палэ лэ́ндэ, нэ сыва джа́на пэ риг паш-дывэсы́тко (южно).

7. И зоралэ́ выгинэ́ и камлэ́ тэ джа́н, соб (кай) тэ джа́н дурэды́р пир пхув; и ёв пхэндя́: “Джа́н и джа́н пир сари́ пхув”, – и ёнэ гинэ́ пир сари́ пхув.

8. Тэды кхардя́ ёв ман и пхэндя́ ма́нгэ: “Адя́кэ, дыкх, савэ́ выгинэ́ пэ паш-рати́тко (северно) пхув, ковлякирдэ́ Миро ду́хо (фа́но) пэ пхув паш-рати́тко.”

9. И сыс Ра́скирэ-Дэвлэ́скиро лав кэ мэ, пхэны:

10. “Лэ одолэ́ндыр, савэ́ явнэ́ плено́стыр, кэ Хелдайо, кэ Товия и кэ Иедаё, и джа́ дро дова́ кокоро́ дывэ́с, джа́ дро кхэр Иосия́скиро-Софониёскирэ чхавэ́скиро, кай ёнэ явнэ́ Вавилоно́стыр,

11. Лэ лэ́ндыр руп и сувнака́й и кэр крали́тка стадыка́ (короны) и чхув по шэро́ Исусо́скиро, Иоседекоскирэ чхавэ́скиро, барэ́ рашаскиро,

12. и пхэн лэ́скэ: – “Адя́кэ ракирэ́ла янголэ́нгирэ-болыбна́скиро Рай Дэвэ́л: ‘Акэ, Мурш, – лав Лэ́скиро Отбарьякирибэн, Ёв барьёла Пэ́скирэ корнёстыр (рукхэстыр) и кэрэ́ла Кхангири́ Дэвлэ́скири.

13. Ёв кэрэ́ла Кхангири́ Ра́скирэ-Дэвлэ́скири и прилэ́ла сла́ва, и лэ́ла тэ бэшэ́л сыр барыдыро́ пэ Пэ́скиро троно; явэ́ла и раша́й пэ Пэ́скиро троно, и лавэнгиро рама́нё (миро) явэ́ла машки́р дова́ и яви́р.

14. А долэ́ кралитка стадыка явэ́на Хелемоскэ и Товияскэ, Иедаёскэ и Хеноскэ, Софронияскирэ чхавэ́скэ, ваш рипирибэ́н дро Дэвлэ́скири Кхангири́.

15. Дуралыпнастыр явэ́на и кхэтанэ́ явирэнца лэ́на тэ ґаздэ́н Кхангири́ Ра́скирэ-Дэвлэ́скири, и тумэ́ доджинэнапэ, со янголэ́нгиро-болыбна́скиро, Рай Дэвэ́л, бичхадя́ ман кэ тумэ́, и дава́ явэ́ла, ке́ли тумэ́ зоралэ́с лэ́на тэ кандэ́н зан тумарэ́ Ра́скирэ-Дэвлэ́скири.”

1. Аллилуя! Шарэ́н Рас-Дэвлэ́с болыбна́стыр; шарэ́н Лэс, Кон дживэ́ла упра́л.

2. Мэк тэ шарэ́н Лэс сарэ́ Лэ́скирэ Янго́лы, мэк тэ шарэ́н Лэс сарэ́ болыбна́скирэ Янго́лы.

3. Шарэ́н Лэс, кхам и чхон, мэк тэ шарэ́н Лэс сарэ́ чэргэня́, со хачона.

4. Шарэ́н Лэс, най вучэды́р болыбэ́н и паня́, со исын упра́л (упрэ́) болыбна́стыр.

5. Мэк ёнэ тэ шарэ́н Ра́скирэ-Дэвлэ́скиро лав, пал-дова́ со Ёв припхэндя́ и ёнэ кэрдэ́пэ:

6. И Ёв дыя́ зор лэ́нгэ ўса́ды (сак) и пэ сарэ́ ве́ки; Ёв дыя́ припхэныбнытко стату́то, со ёнэ на обджана лэс.

24. А́кэ, штар тыкнэ́ джидалэ, нэ ёнэ исын древа́н годэ́:

25. кирья (мурашки), ёнэ исын назоралэ; нэ ёнэ лынаскиро кэдэна хабэ́н пэ́скэ;

26. бэргитка кармуса (мышы), савэ́ исын набарэ́-зорьякирэ, нэ ёнэ кэрэ́на пэ́скэ кхэра́ пэ скалы.

27. Скочкэндэ (саранчатэ) нанэ кра́ли, нэ ёнэ джа́на анги́л сарэ́ пир линия.

28. Мизгирё (пауко), сава джинэ́ла тэ ухтылэлпэ пэ́скирэ лапкэнца, нэ ёв явэ́ла дрэ крали́скирэ фэлатиня́.

1. И выгия́ екх эфта́ (эфтанэ) Янголэндыр, савэ́стэ сыс эфта́ тахтая́, и ракирдя́ ма́нца и пхэндя́: “Яв, мэ сыкава́ва ту́кэ сыр барья розмэкнэ джувля́ явэ́на тэ сэндинэ́н, сави́ сыс бэшты пир бут паня́,

2. савья́са кра́лья пэ пхув кэрдэ́ биладжаипэ́н и мануша́ пхувья́тыр матёнас моля́тыр ла́кирэ биладжаипнастыр.”

3. И Ду́хо (Фа́но) лыджия́ ман пэ чхучи́ пхув. И мэ дыкхцём джувля́, сави́ сыс бэшты пэ лолэ́-рискирибна́скирэ мурдалэ́стэ. Дава́ мурда́л сыс саро́, сы́рбы счхиндло лавэ́нца, савэ́ калякирэнас Дэвлэ́с. Лэ́стэ сыс эфта́ шэрэ́ и дэш шынга́ (ро́ги).

4. И джувлы́ сыс уриды дро сливитко (кхилавитко) и ярко лоло́ тхан, со зяинэлас сувнака́са, кучонэ́ барэ́нца и мутинаса (жэмчугоса). Ёй рикирдя дро пэ́скиро васт сувнакуно́ тахта́й, саво́ сыс пхэрдо́ джунгалыпнаса (брыткимаса) и нажужыпнаса ла́кирэ биладжаипнастыр.

5. И пэ ла́киро чэкат сыс чхиндло́ лав, со значындя чораханэ́с: “Бари Вавилония – исын дай розмэкнэ джувленгэ и кажнонэ́ джунгалыпнаскэ пэ пхув.”

6. И мэ дыкхцём, со ада́я джувлы́ сыс маты свэнтонэ́-манушэ́нгирэ ратэстыр и мэнькэнгирэ-якхитконэнгирэ ратэстыр, савэ́н замардэ́ пал Христосо́стэ. И ке́ли мэ дыкхцём ла, мэ древа́н дивиндёмпэ.

7. И Янго́ло пхэндя́ ма́нгэ: “Со́скэ ту дивинэсапэ? Мэ пхэна́ва ту́кэ кадаля-джувля́киро и далэ́-рискирибна́скирэ-мурдалэскиро чораханыбэн, саво́ лыджа́ла ла и савэ́стэ сыс эфта́ шэрэ́ и дэш шынга́ (ро́ги).

8. Рискирибна́скиро мурда́л, савэ́с ту дыкхця́н, сыс и буты́р нанэ лэс, и ёв выджа́ла люностыр (адостыр) и джа́ла пэ хасякирибэн. И мануша́, савэ́ дживэ́на пэ пхув, савэнгирэ лава́ нанэ зачхиндлэ́ дрэ джиибна́скири лылвари́ свэто́скирэ англыпна́стыр, явэ́на тэ дивинэнпэ, сыр дыкхэ́на, со рискирибна́скиро мурда́л сыс, и нанэ лэс, нэ ёв нэвэ́стыр явэ́ла.

9. Ваш дава́ трэй бари годы́ и годыпэ́н. Ефта шэрэ́ исын эфта́ бэ́рги, пэ савэ́ джувлы́ исын бэшты.

10. Далэ́ эфта́ шэрэ́ адя́кэ-паць исын сы́рбы эфта́ кра́лья, пандж кра́лья пынэ́ зорья́тыр, екх кра́ли исын, яви́р кра́ли ишчо (инкэ́) на явдя́; ке́ли ёв явэ́ла, тэды на́бут часо лэ́скэ тэ явэ́л.

11. И рискирибна́нскиро мурда́л, саво́ сыс и савэ́с буты́р нанэ, исын охто́то (бидуе́нгиро дэ́што) кра́ли, кон исын екх кадалэ́ эфта́ (эфтэ) кральендыр, и кон джа́ла пэ хасякирибэн.

12. И дэш шынга́, со ту дыкхця́н, дава́ исын дэш кра́лья, савэ́ндэ ишчо (инкэ́) нанэ кралипэ́н, нэ ёнэ дорэсэ́на зор пэ екх мардо́ (шту́нда), сыр кра́лья рискирибна́скирэ мурдалэса.

13. Кадалэ́ дэшэ кралье́ндэ исын екх мы́сля, и ёнэ пиридэна пэ́скири зор и право рискирибна́скирэ мурдалэ́скэ.

14. Ёнэ явэ́на тэ марэ́нпэ проти Свэнтонэ́ Бакрорэстэ и Свэ́нто Бакроро́ лэ́ла упралыпэ́н пэ лэ́ндэ, пал-дова́ со Ёв исын Кра́ли Кралье́ндыр, Рай Дэвэ́л ра́ндыр, кхэтанэ́ пэ́скирэ выкэдынэ́ и патяибнытконэ манушэ́нца, савэ́ исын пашы́л Лэ́стэ.

15. И Янго́ло пхэндя́ ма́нгэ: “Паня́, со ту дыкхэ́са, пэ савэ́ розмэкны джувлы́ исын бэшты, дава́ – манушы́тка ро́ды, и манушы́тка на́цыи (народы), кхэри́тка ро́ды (пле́ми) и екхэ́-чиба́кирэ ирья́ (языки).

16. И дэш шынга́, савэ́ ту дыкхця́н пэ рискирибна́скирэ мурдалэ́стэ, явэ́на древа́н тэ на сыкавэ́н паты́в розмэкнэ джувля́кэ: ёнэ лэ́на сари́ зор ла́тыр и мэкэ́на ла нангяса и ха́на сарэ́са ла́кири лоч (плоть) и хачкирэна ла яга́са.

17. Пал-дова́ со Дэвэ́л дыя́ лэ́нгирэ илэнгэ тэ кэрэ́н пир Лэ́скири годы́, тэ кэрэ́н екх задуминыбэн и тэ дэн лэ́нгиро Кралипэ́н рискирибна́скирэ мурдалэскэ, пака сполнинэнапэ Дэвлэ́скирэ лава́.

18. И джувлы́, савья́ ту дыкхця́н, исын сы́рбы баро́ фо́ро, саво́ кралинэла пэ кралье́ндэ пэ пхув.”

Romani Bible Baltic 2019

United Bible Societies for the Baltic Romani Mission