Bible in one year
December 29

1. Мангэ́н Ра́стыр-Дэвлэ́стыр брышы́нд, ке́ли вэснакиро ёв трэй тэ явэ́л; Дэвэ́л зазяинэла блискавицаса и дэ́ла тумэ́нгэ ґэнсто брышы́нд, чар пэ фэ́лда.
2. Пал-дова́ со тэрафимы башэна чиба́са, а зумакирибнаскирэ (вешчуны) дыкхэ́на хоханэ́с и роспхэнэна сунэ́ хоханэ́; ёнэ ковлякирэна илэ чхучипнаса (пустотаса); ваш-дова́ ёнэ псирэ́на сыр бакрэ́, савэ́нгэ исын пхаро́, пал-дова́ со нанэ чхупнарис (пастырёс).
3. Пэ чхупнарьендэ захачи́я холын Мири́, и бузнэн (козлэн) Мэ ява́ва тэ мара́в; пал-дова́ со явэ́ла янголэ́нгирэ-болыбна́скиро Рай Дэвэ́л кэ ґурто Пэ́скиро, Юда́скиро кхэр, и чхувэ́ла лэн, сыр тхагаритконэ грэс пэ́скирэс пэ марибны́тко фэ́лда.
4. Лэ́стыр явэ́ла вэнглытко бар, лэ́стыр – килоро ваш ша́тра, лэ́стыр – лу́ко тэ марэ́лпэ, лэ́стыр явэ́на тхэмэ́скирэ барыдыра́ (правители).
5. И ёнэ явэ́на зоралэ́ мурша́, савэ́ явэ́на тэ штакирэн вэргэ́н, ко́ли исын марибэ́н, сыр мэл пэ га́са, и марэ́нпэ, пал-дова́ со Рай Дэвэ́л исын лэ́нца, и задэна ёнэ бари ладж одолэ́нгэ, савэ́ исын уклистэ́ пэ грэ́ндэ.
6. Мэ зоралякирава кхэр Юда́скиро и зракха́ва кхэр Ёзаскиро, и Мэ рискира́ва лэн палэ, пал-дова́ со ковлыя ило́ Миро пал лэ́ндэ, и ёнэ явэ́на, сы́рбы Мэ на мэкавас лэн: пал-дова́ со Мэ Рай-Дэвэ́л лэ́нгиро, и Мэ вышунава лэн.
7. Сыр зорало́ мурш явэ́ла Ефре́мо; тэды явэ́ла тэ зрадынэлапэ ило́ лэ́нгиро, сыр моля́тыр (виностыр); и дыкхэ́на дава́ чхавэ́ лэ́нгирэ и ёнэ явэ́на тэ радынэ́нпэ; ра́дыма явэ́ла дро лэ́нгиро ило́ ваш Ра́скэ-Дэвлэ́скэ.
8. Мэ да́ва шоля, лэ́нгэ и скэда́ва лэн, пал-дова́ со выракхцём лэн; ёнэ явэ́на ада́кицы бутджинэ, сыр сыс англэды́р.
9. И Мэ росчхувава тэ дживэ́н лэн машки́р манушэ́ндэ, и дрэ дуратунэ́ пхувья́, ёнэ лэ́на тэ рипирэ́н пал Ма́ндэ, и ёнэ лэ́на тэ дживэ́н пэ́скирэ чхаворэнца (биятэнца), и рисёна палэ.
10. Мэ адя́кэ-паць рискира́ва лэн палэ Египто́скирэ пхувья́тыр и Асириятыр, скэда́ва лэн, и Мэ лыджа́ва лэн пэ Галаадоскири пхув и пэ Лива́но адя́кэ пэ ґара́, сыр на ухты́лла (на́доси) штэ́то ваш лэ́нгэ.
11. И ёнэ джа́на пир бари би́да пир мо́рё (дэрья́в) и Мэ хасякира́ва валны моритка адя́кэ, со тэрдёна сарэ́ хорипна рэкакирэ (лэнякирэ), тыкнёла Асуроскиро пхутькирибэ́н и отлэна скипетро Египто́стыр.
12. И Мэ зоралякирава лэн дрэ Растэ-Дэвлэ́стэ, и ёнэ лэ́на тэ псирэ́н дро лав Лэ́скиро”, – ракирэ́ла Рай Дэвэ́л.
1. Откэр (псирав), Лива́но, по́рта тыри́, соб (кай) тэ похал яг тырэ́ кедры.
2. Ров, кипарисо, пал-дова́ со пыя́ кедро, пал-дова́ со и барэ́ кашта́ подынэпэ; ровэ́н, дэмбы Васаноскирэ, пал-дова́ со пыя́ ґэнсто вэш.
3. Зан чхупнарьенгири (пастырьенгири) исын шундлы ровибнаса, пал-дова́ со чхучия лэ́нгири вольныма; шунэлпэ холям зан тэрнэ́-шчэрэнгири, пал-дова́ со хасия́ Иорданоскиро шукарипэ́н.
4. Адя́кэ ракирэ́ла Рай Дэвэ́л, Дэвэ́л миро: “чарав бакрэ́н, савэ́ джа́на тэл чхури,
5. савэ́н хулая́ чхинэна би дара́киро, а одолэ́, савэ́ лэн бикиндлэ, ракирэ́на: ‘Парикирибэн Дэвлэ́скэ; мэ барвалыём!” И лэ́нгирэ чхупна́рья (пастухи) на тангинэна пал лэ́ндэ.
6. Пал-дова́ со Мэ на лава́ буты́р тэ тангинав манушэ́н далэ́ – пхувьякирэн’, – ракирэ́ла Рай Дэвэ́л; – акэ, Мэ отда́ва манушэ́н, кажнонэс дрэ васта́ лэ́скирэ сэмэнцакэ, и дрэ васта́ лэ́скирэ крали́скэ. Ёнэ лэ́на тэ хасякирэ́н пхув, нэ Мэ на зракха́ва лэн лэ́нгирэ вастэ́ндыр’.”
7. И Мэ чарадём бакрэ́н, савэ́ джа́на тэл чхури, бакрэ́н, чачэс, чорорэн. Мэ лыём Пэ́скэ дуй саструнэ́ дэстэ́ (жэзлы) и Мэ лыём тэ кхарав екх ‘Шук’, а яви́р – ‘Саструнэ́ Пэнты, и чарадём бакрэ́н.
8. И Мэ хасякирдём тринэн чхупнарьен дро екх чхон; и одрисия ди Миро лэ́ндыр, сыр лэ́нгиро ди одрисия Ма́ндыр.
9. Теньци Мэ пхэндём: “Мэ на лава́ тэ чарав тумэн. Саво́ исын тэ мэрэ́л, мэк тэ мэрэ́л, и хасибнаскиро – мэк тэ хасёл, а савэ́ ячэ́напэ, мэк тэ хан маса́ екх явирэстыр.
10. И Мэ лыём Миро саструно дэсто́ – Шук – и Мэ пхагирдём лэс пэ паш, соб (кай) тэ кхосав криг завето, со счхудём Мэ сарэ́ манушэ́нца.
11. И сыс дэсто́ пхагирдо́ дро до дывэ́с. И тэ́ньчи ґалынэ́ чорорэ́ машки́р бакрэндэ, савэ́ ужакирдэ Ман, со дава́ сыс лав Ра́скирэ-Дэвлэ́скиро.
12. И Мэ пхэндём лэ́нгэ: “Ко́ли тумэ́ камэ́на, дэн Ма́нгэ Миро плэскирибэн; ко́ли над – на дэн; и ёнэ важындлэ Ма́нгэ сыр плэскирибэн трия́нда рупувэ́ ловорэ.
13. И пхэндя́ ма́нгэ Рай Дэвэ́л: “Чхурдэ лэн дрэ пири́ кхангирья́кири, – кадасави вучи́ тими́н, сави́ ёнэ дынэ́ пал Ма́ндэ! И лыём Мэ трия́нда рупуворэ и чхурдыём лэн дро Кхэр Ра́скирэ-Дэвлэ́скиро ваш манушэ́скэ, кон липинэл пирья глинатыр (глэятыр).
14. И пхагирдём Мэ яви́р саструно дэсто́ Миро – Саструнэ́ Пэнты, соб (кай) тэ роспхандав пшалыпэн машки́р Юдастэ и Израилёстэ.
15. И Рай Дэвэ́л пхэндя́ ма́нгэ: “Лэ ишчо (инкэ́) пэ́скэ струменто екхэскирэ дылынэ́ чхупнарьендыр.
16. Пал-дова́ со, акэ, Мэ ячавава пэ дая́ пхув чхупнарис, саво́ на лэ́ла тэ пэкэлпэ пал хаськирибнаскирэндэ, и ёв на лэ́ла тэ родэ́л нашадэн, на лэ́ла тэ састякирэл насвалэн, и састэн ёв на лэ́ла тэ чаравэл, нэ ёв явэ́ла тэ хал мас тхулэнгиро, и копыты (ная) лэ́нгирэ роскушнэ пэ котэра́.
17. Мэк тэ явэ́л би́да пэ джунгалэ́ пастырёстэ, саво́ ячкирэ́ла пэ́скирэ бакрэ́н! Мэк тэ чхинэл чхури васт лэ́скиро и чачи́ якх лэ́скири! Мэк тэ шутёл сарэ́са лэ́скиро васт, и мэк лэ́скири чачи́ якх сарэ́са тэ корьёл.”
1. Ангилпхэныбэ́н Ра́стыр-Дэвлэ́стыр пало́ Израилё. Адя́кэ ракирэ́ла Рай-Дэвэ́л, Саво́ розбуґлякирдя болыбэ́н, Саво́ кэрдя́ пхув и дыя́ манушэ́скэ ди андрэ́ лэ́стэ, ракирэ́ла:
2. “Акэ, Мэ кэра́ва Ерусалимо́стыр тахта́й (чаша) тэ матён ваш сарэ́ манушэ́нгэ, кон исын трусця́л, сыр ёнэ лэ́на тэ обчхувэн трусця́л Юдас и Ерусалимо.
3. И явэ́ла дро дова́ дывэ́с, со Мэ кэра́ва Ерусалимо́стыр древа́н пхаро́ бар ваш сарэ́ манушэ́нгэ; сарэ́, кон камэ́ла тэ ґаздэл лэс, пхарьёла пэ котэра́, мэк тэ скэдэ́нпэ проти лэ́стэ сарэ́ мануша́ далэ́-пхувья́кирэ.
4. Дро дова́ дывэ́с, – ракирэ́ла Рай Дэвэ́л, – ‘Мэ кэра́ва кажнонэ́ грэс бэнгалэса и одолэ́с, кон явэ́ла уклисто пэ лэ́стэ, дылынэса, пэ кхэр Юда́скиро откэрава якха́ Мирэ́; кажнонэ́ грэс манушэнгирэс Мэ корьякирава’.
5. И пхэнэ́на барэ́ рая Юда́скирэ дрэ илэ пэ́скирэ: ‘Зор мири́ – Ерусалимо́скирэ мануша́ дрэ янголэ́нгирэ-болыбна́скирэ Растэ-Дэвлэ́стэ, лэ́нгирэ Дэвлэ́стэ.”
6. Дро дова́ дывэ́с Мэ кэра́ва ран Юдаскирэн – сыр хич (скороведа) яга́са машки́р кашта́ и сыр момолы́тко (свети́льнико) машки́р ґарбы (снопы), и ёнэ повымарна сарэ́н пашылатунэн манушэ́н чачэ́ и зэрвонэ (левонэ) рига́тыр, и нэвэ́стыр явэ́на дро Ерусалимо мануша́ пэ лэ́скиро, Ерусалимоскиро штэ́то.
7. И зракхэ́ла Рай Дэвэ́л анги́л сарэстэ Юда́скирэ ша́тры, соб (кай) Давидо́скирэ-кхэрэ́скиро барипэ́н и барипэ́н Ерусалимо́скирэ манушэ́нгиро тэ на явэ́л вучэды́р Юдастыр.
8. Дро дова́ дывэ́с лэ́ла тэ затэрдёл Рай Дэвэ́л пал манушэ́ндэ Ерусалимоскирэн, тэ най бизорья́киро лэ́ндыр дро до дывэ́с явэ́ла сыр Дави́до, нэ кхэр Давидо́скиро явэ́ла сыр Дэвэ́л, сыр Дэвлэ́скиро Янго́ло анги́л лэ́ндэ.
9. И явэ́ла дро дова́-дывэ́с, со Мэ ла́ва тэ родав, соб (кай) тэ хасякира́в сарэ́ Наюды́тка на́цыи, савэ́ явэ́на тэ марэ́н Ерусалимоса.
10. Нэ пэ кхэр Давидо́скиро и пэ Ерусалимо́скирэ манушэ́ндэ Мэ чхува́ва бахталыпнаскиро и мангипаскиро ду́хо (фа́но), и ёнэ дыкхэ́на пэ Лэ́стэ, Конэ́с пхусадэ́, и ёнэ лэ́на тэ ровэ́н пал Лэ́стэ, сыр пал екхорэстэ чхавэ́стэ и лэ́на тэ тангинэн пал Лэ́стэ, сыр тангинэн пэрвонэ́ чхаворэс.
11. Дро дова́ дывэ́с ґаздэ́лапэ бари ту́га ясвэ́нца дро Ерусалимо, сыр Гададримоноскиро роибэ́н пэ Мегидоноскирэ фэ́лды.
12. И лэ́ла тэ тугинэл ясвэ́нца пхув, кажно кхэри́тко ро́до кэ пэ: мануша́ Давидо́скирэ-кхэритконэ́ родо́стыр кэ пэ, а джувля́ лэ́нгирэ кэ пэ; мануша́ Нафаноскирэ кхэритконэ́ родо́стыр кэ пэ, и джувля́ лэ́нгирэ кэ пэ;
13. Мануша́ Левиёскирэ кхэритконэ́ родо́стыр кэ пэ, и джувля́ лэ́нгирэ кэ пэ; Симеоноскирэ мануша́ кэ пэ, и джувля́ лэ́нгирэ кэ пэ.
14. Сарэ́ яви́р кхэри́тка ро́ды, савэ́ ячэ́напэ – кажно ро́до кэ пэ, и джувля́ лэ́нгирэ кэ пэ.
1. Аллилуя! Бага́н Ра́скэ-Дэвлэ́скэ нэви́ гилы́; бага́н псалмы Лэ́скэ пэ скэдыибэ́н, кай дэвлы́тка мануша́ исын.
2. Мэк Израилё тэ радынэ́лпэ Кадалэстыр, Кон создыя́ лэс, мэк чхавэ́ Сионо́стыр тэ веселинэнпэ (тэ лошалён) лэ́нгирэ Крали́стыр.
3. Мэк ёнэ тэ шарэ́н Лэ́скиро лав кхэлыбнаса, мэк ёнэ тэ бага́н псалмы Лэ́скэ бубноса и пэ лута (тыкнэ́ гусли).
4. Пал-дова́ со Рай Дэвэ́л зоралэ́с радынэ́лапэ Лэ́скирэ манушэ́ндыр, Ёв шукарьякирэла ковлэ́-илэ́скирэ манушэ́н зракхибнаса.
32. Ко́ли ту бигодякирэс шардян пэс кэ вучипэ́н, ци придуминдян биба́хт, чхув пэ́скиро васт пэ муй.
33. Кон змарэла тхуд, кодова́ кэрэ́ла ксил, ци кон тасавэла накх, кодова́ ратвалякирэла накх; и адя́кэ-паць кон ґаздэ́ла холын, кодова́ залыджала кошыбэ́н.
1. Пало́ дава́ мэ шундём зан, сы́рбы бутэ́-манушэ́нгиро народо (ра́са) болыбна́стыр, сави́ пхэнэлас: “Аллилуя! Тэ явэ́л зракхибэ́н и сла́ва, паты́в и зор амарэ́ Дэвлэ́скэ.”
2. Чачунэ́ и чачипнаскирэ исын Лэ́скирэ сэнды. Ёв сэндякирдя барья́ розмэкна́ джувля́, сави́ калякирдя пхув пэ́скирэ блэндо́са. Дэвэ́л чхудя́ хась (ка́ра) палэ пэ ла́тэ пал рат Лэ́скирэ писхарьенгиро ла́кирэ вастэ́стыр.”
3. И яви́р мо́ло ёнэ пхэндлэ́: “Аллилуя! Тхув, со ґаздэ́лапэ ла́тыр, сыр ёй хачолас, явэ́ла пэ сарэ́ ве́ки.”
4. Тэды биш тэ штар годэпхурэ́ и штар джидалэ́ (жывотна) пынэ́ и клониндлэпэ патыва́са Дэвлэ́скэ, Саво́ сыс бэшто́ пэ троно и пхэнэлас: “Ами́нь! Аллилуя!”
5. И зан троностыр явдя́, пхэни́: “Шарэ́н амарэ́ Дэвлэ́с! Сарэ́ тумэ́-Лэ́скирэ писха́рья и тумэ́, барэ́ и тыкнэ́, савэ́ дарэ́на Лэ́стыр.”
6. И мэ шундём зан сы́рбы бутэ́-манушэ́нгирэ народо́стыр, сы́рбы бурэ́-пане́нгирэ шоля́ (шумо), сы́рбы барэ́ громэнгиро, со пхэнэнас: “Аллилуя! Пал-дова́ со амаро́ Рай Дэвэ́л, Сарэзорья́киро кралинэла!
7. Явэ́н тэ радынаспэ и ява́са древа́н ра́да; барьякираса Лэс слава́са, пал-дова́ со явдя́ Свэнтонэ́-Бакрорэскиро бьяв, и Лэ́скири джувлы́ приготовиндя пэс!”
8. Ла́кэ сыс дыно́ ярко, жужо́ висонытко тхан тэ урьел: “пал-дова́ со висонытко тхан сыкавэ́ла свэнтонэ́-Дэвлэ́скирэ манушэ́нгиро чачипэ́н.”
9. И Янго́ло пхэндя́ ма́нгэ: “Зачхин: ‘Бахталэ́ исын одолэ́, савэ́н кхардэ́ пэ Свэнтонэ́-Бакрорэ́скиро бьяв.’” И Ёв ишчо (инкэ́) допхэндя: “Ѓа́да, исын чачунэ́ Дэвлэ́скирэ лава́.”
10. И мэ пыём анги́л лэ́скирэ ґэра́ тэ поклонинавпэ патыва́са лэ́скэ. Нэ ёв пхэндя́ ма́нгэ: “Дыкх жа, на́ кэр дава́. Мэ сом дасаво-паць писха́ри, сыр ту сан, и мэ сом кхэтанэ́ тырэ́ пшалэ́нца тэ досыкавав пал Христосо́стэ. Дэ паты́в Дэвлэ́скэ, пал-дова́ со допхэныбэ́н пал Христосо́стэ исын Христосо́скиро лав.”
11. И мэ дыкхцём псирадо (отпхандло) Болыбна́скиро Раё и, акэ, сыс парно́ грай. Пэ лэ́стэ сыс бэшто́ уклисто́/э́ Кодова́, Кон кхарэ́лапэ Чачуно́ и Патяибны́тко, Саво́ сэндякирэ́ла чачунэ́с и марэлапэ пал чачипэ́н.
12. Лэ́скирэ якх сыс сыр яга́нгири чибори́ и бут диадэмы сыс пэ Лэ́скиро шэро́. Лэ́стэ исын зачхиндло́ титуло (лав), со нико́н на джиндя́ апри́ч Лэ́стэ,
13. и Ёв исын уридо́ дро урибэ́н, саво́ сыс макхно ратэ́са. Лэ́скиро титуло исын “Дэвлэ́скиро Лав.”
14. И халадэ́ болыбны́тка джа́нас пал Лэ́стэ, савэ́ сыс пэ парнэ́ грэ́ндэ и уридэ́ дро парно́ и жужо́ висонытко тхан.
15. И Лэ́скирэ мо́стыр джа́ла яври́ востро (чолалы́) курта́ла и Ёв явэ́ла тэ мулякирэ́л расы (народы). Ёв явэ́ла тэ чалякирэл лэн саструнэ́ дэстэ́са, и Ёв явэ́ла тэ штакирэл моля́киро (виноскиро) пресо барэ́ холя́тыр, ке́ли Сарэзорья́киро Дэвэ́л древа́н холясо́ла.
16. Пэ Лэ́скиро урибэ́н и пэ Лэ́скири статя (стёгны) сыс зачхиндло́ титуло: “Кра́ли кралье́нгиро, Рай рае́нгиро.”
17. И мэ дыкхцём явирэ Янголо́с, саво́ сыс тэрдо́ пэ кхам. Ёв дэ́лас го́дла зоралэ́ заня́са сарэ́ чириклэнгэ, савэ́ вурняна машки́р фа́но (воздухо) дро болыбэ́н: “Явэ́н, скэдэ́нпэ пэ бэльвэлякиро хабэ́н барэ́ Дэвлэ́скиро,
18. соб (кай) тумэ́нгэ сашты́ тэ хан кральенгирэ-трупэнгиро мас, и капитанэнгирэ, и тысёнцэнгирэ-халадэ́нгирэ барыдырэнгирэ, и лоч зоралэ́ манушэ́нгирэ, и грастано́ мас и трупо́скиро мас одолэ́нгиро, савэ́ исын бэштэ́ пэ грэ́ндэ, и сарэ́-манушэ́нгири тру́пы: вольнонэ манушэ́нгирэ и адя́кэ-паць писхарьенгирэ, тыкнэнгирэ и барэнгирэ.”
19. И мэ дыкхцём рискирибна́скирэ мурдалэс и кралье́н пэ пхув лэ́нгирэ халадыбнэнца, савэ́ скэдынэ́пэ пэ марибэ́н анги́л Одолэ́стэ, Кон исын бэшто́ пэ грэстэ и анги́л Лэ́скиро халадыбэ́н.
20. И рискирибна́скиро мурда́л сыс лыно́ и кхэтанэ́ лэ́са хохано́ проро́ко, саво́ кэрдя́ ди́вы анги́л лэ́стэ, савэ́нца ёв хохавэлас манушэ́н, савэ́ дорэснэ́ рискирибна́скирэ-мурдалэ́скири шпэ́ра сыр клеймо и клониндлэпэ патыва́са мурдалэ́скирэ патриня́кэ (образо́скэ). Ёнэ сыс чхурдынэ́ джидэнца дро зеро (озеро) яга́са, со хачолас дзэвэляса (сераса).
21. А лэ́нгирэ явирэ манушэ́н, савэ́ ячнэ́пэ, замардя́ Одолэскиро, Саво́ сыс бэшто́ уклисто́/э́ пэ грэстэ куртала́са; сави́ джа́лас яври́ Лэ́скирэ мо́стыр и сарэ́ чирикля́/э́ чалынэ лэ́нгирэ трупэндыр.
Romani Bible Baltic 2019
United Bible Societies for the Baltic Romani Mission