Bible in one year December 3Daniel 9:1-271. Пэ пэ́рво бэрш Дариёскиро, чхавэ́скирэ Асуироскиро [Ахашверошоскиро-ю.о.], Мидянытконэ родо́стыр, саво́ сыс чхудо крали́са пэ Халдеитко кралипэ́н,2. пэ пэ́рво бэрш лэ́скирэ кралипнаскиро, мэ-да, Дание́лё, ґалыём лылварьендыр чысло (гин) бэршуно, пал саво́ сыс лав Ра́скиро-Дэвлэ́скиро кэ проро́ко Ереме́ё, со пал эфтадэша́ бэрш Ерусалимо явэ́ла чхучо́ (пусто).3. И рискирдём мэ муй миро Ра́скэ-Дэвлэ́скэ патерьяса и мангипнаса дро посто и дро балытко гоно́ праскаса.4. И мангдёмпэ мэ Ра́скэ-Дэвлэ́скэ мирэ́скэ и откэравас мэ ило́ и ракиравас: “Манга́ва Ту́тыр, Раё Дэ́вла, баро́ и дивно кэ дар, Кон ракхэ́ла завето и ла́ска кодолэнца, савэ́ рикирэ́на Тут сыр Дро́гима дро ило́ и рикирэнапэ кэ припхэныбэна́ Тырэ́!5. Кэрдя́м грэ́хо амэ, бизаконытка рэ́нды, кэрасас бипатывалэс, кэрдя́м бу́нто и отгиям Тырэ́ припхэныбнастыр и Тырэ́ упхэныбнастыр,6. со кандасас писхарье́н Тырэ́н, э пророкэ́н, савэ́ Тырэ́ лавэ́стыр ракирдэ́ амарэ́ кральенгэ, и амарэ́ тхагарьенгэ, и амарэ́ дадэ́нгэ, и сарэ́ манушэ́нгэ долэ́ тхэмэстыр.7. Ту́тэ, Раё, исын чачипэ́н, и амэ́ндэ пэ муя́ исын ладж; сыр акана́, кажнонэ́ Юдостэ, сыр Ерусалимо́скирэ джиибнаскирьендэ, и кэ саро́ Израилё, дрэ пашатунэндэ и дуранэндэ, дрэ сарэ́ тхэма, карик Ту традыян лэн пало́ лэ́нгиро отгиибэн, савэ́са ёнэ отгинэ́ Ту́тыр.8. Раё Дэ́вла! Амэ́ндэ ладж исын пэ муя́, амарэ́ кралье́ндэ, амарэ́ тхагарьендэ и амарэ́ дадэндэ, пал-дова́ со амэ грэ́хо кэрдя́м анги́л Ту́тэ.9. И амарэ́ Растэ-Дэвлэ́стэ исын ла́ска, отмэкибэн грэхэнгиро, пал-дова́ со амэ са́мас бунтуи́тка проти Лэ́стэ.10. И амэ на кандыям зан Ра́скирэ-Дэвлэ́скири, амарэскири, соб (кай) тэ кэра́с пир Лэ́скирэ зако́ны, савэ́ Ёв дыя́ амэ́нгэ пир Лэ́скирэ дынарьендэ, пророкэ́ндэ.11. И саро́ Израилё пхагирдя́ Зако́но Тыро́, и отрисия, соб (кай) тэ на кандэл зан Тыри́; и палдава́ вытхадыя пэ амэ́ндэ прокошыбэ́н и совла́х, савэ́ исын зачхиндлэ́ дро Мойза́скиро Зако́но, Дэвлыканэ дынарискиро, пал-дова́ со амэ кэрдя́м грэ́хо анги́л Ту́тэ.12. И Ту пхэрдякирдян Пэ́скирэ лава́, савэ́ Ту ракирдян пэ амэ́ндэ, и пэ амарэ́ сэндарьендэ, савэ́ сэндякирэнас амэн, бичхави пэ амэ́ндэ бари би́да, сави́ на сыс тэл болыбэ́н, и сави́ кэрдя́пэ пэ Ерусалимо.13. Сыр чхиндло́ исын дро Мойза́скиро Зако́но, адя́кэ сари́ кадая́ би́да мардя амэн; нэ амэ на мангдям дрэ па́тери (моли́тва) Рас-Дэвлэ́с амарэс, соб (кай) амэ́нгэ тэ рисёвас амарэ́ бизаконытконэ рэндэ́ндыр, и тэ ґалёвас чачипэ́н Тыро́.14. Палдава́ приракхця о Рай Дэвэ́л кадасави би́да и бичхадя́ ла пэ амэ́ндэ; пал-дова́ со чачуно́ исын Рай Дэвэ́л амаро́ дро сарэ́ Лэ́скирэ рэ́нды, Савэ кэрэ́ла, нэ амэ на кандыям зан Лэ́скири.15. Акана́, Раё Дэ́вла амаро́, Саво́ лыджия́ Тырэ́ манушэ́н Египто́скирэ пхувья́тыр зоралэ́ вастэ́са и сыкави́ Тыри́ сла́ва, сыр ададывэ́с! Кэрдя́м грэ́хо амэ, кэрдя́м напатывалэс.16. Раё Дэ́вла! Пиро саро́ Тыро́ чачипэ́н, мэк тэ рисёл Тыри́ холы́ и Тыро́ баро́ холякирибэ́н Тырэ́ форо́стыр, Ерусалимо́стыр, свэнтонэ́ Тырэ́ бэрга́тыр, пал-дова́ со пал амарэ́ грэ́хи и бизаконытка рэ́нды (де́лы) амарэ́ дадэнги́рэ, о Ерусалимо и Тырэ́ манушэ́н обракирэна сарэ́, савэ́ исын пашы́л амэ́ндэ.17. Акана́ шун, амаро́ Дэ́вла, э па́тери (моли́тва) тырэ́ писхарискири и мангипэ́н лэ́скиро, и, мэк тэ зяинэл Тыро́ муй пиро́ чхучакирдо Тыро́ свэнтыпнаскиро штэ́то, саво́ исын чхучакирдо (пустошоно) Ту́тэ, Раё Дэ́вла.18. Причху́в, миро Дэ́вла, кан Тыро́ и шун, откэр Тырэ́ якха́ и дыкх пэ амарэ́ чхучипэна и пэ фо́ро, саво́ кхардо пир лав Тыро́; пал-дова́ со амэ кэдасам амарэ́ мангипэна анги́л Ту́тэ, амарэ́ чачунэ́ рэ́нды, нэ пир Тыри́ бари лачхэ́-илы́ткима.19. Раё Дэ́вла, шун! Приманг (простин) амэ́нгэ, Раё Дэ́вла! Кандэ и кэр сыгэды́р ваш Ту́кэ Кокорэскэ, Дэ́вла миро, Тыро́ Лав дыно́ Тырэ́ фороскэ и Тырэ́ манушэ́нгэ.”20. И ке́ли мэ ракиравас и мангаваспэ, и откэравас ило́ пал мирэ́ грэ́хи и пал грэ́хи мирэ́ народоскирэ Израилёстыр, и пашлякиравас мангипэ́н миро анги́л Растэ-Дэвлэ́стэ мирэстэ пал свэ́нта бэ́рга мирэ́ Дэвлэ́скири;21. ке́ли ишчо (инкэ́) мэ ракиравас па́тери (моли́тва), о мурш Габриэлё, савэ́с мэ дыкха́вас дро са́мо англыпэ́н дро дыкхибэ́н, сыго приурняндыя, чиладя́ ман, ке́ли сыс пашы́л часо ваш бэльвэлякиро свэ́нто дыибэ́н,22. и ёв дэ́лас годы́ ма́нгэ, ракирдя́ ма́нца и пхэндя́: “Даниеле! Акана́ мэ гиём тэлэ́, соб (кай) тэ сыклякирав тут тэ ґалёс.23. Анги́л, сыр тыро́ илытко мангипэ́н дыя́ о лав, и мэ явдём тэ пхэна́в ту́кэ, со ту сан мурш пир ило́ (жэланно): адя́кэ тэ ґалёс дава́ лав и тэ ґалёс дыкхибэ́н:24. эфтадэша́ куркэ сыс гиндлэ́ ваш тыро́ народо и тыро́ свэ́нто фо́ро, Ерусалимо, соб (кай) учхакирдо тэ явэ́л чорипэ́н и тэ кончынэнпэ грэ́хи и тэ явэ́н выкхослэ бизаконытка рэ́нды (бизаконии), и, соб (кай) тэ явэ́л лыджино ве́чно чачипэ́н, тэ явэ́н запечатымэ дыкхибэ́н и проро́ко, и тэ явэ́л помакхно Свэ́нто-свэнтонэнгиро.25. Адя́кэ джин и ґалёв: со долэ́ дывэсэ́ндыр, ке́ли выджа́ла припхэныбэ́н тэ ґаздэ́н нэвэ́с Ерусалимо, кэ/жы́ко о Помакхно (Меси́я) [Христо́со, Баро́ Рай-р.с.] исын эфта́ эфтытка (седьмины) и шовдэша́ дуй эфтытка, и ґаздэ́на нэвэ́стыр вули́цы (га́сы) и ва́нты, нэ дрэ пхарэ́ часы.26. Сыр проджа́на шовдэша́ дуй эфтытка, то явэ́ла отдыно́ пэ мэрибэ́н о Помакхно (Месия) [Христо́со-р.с.], и на явэ́ла Лэс; яви́р тхага́ри лэ́скирэ манушэ́нца роспхагирэна и фо́ро и свэ́нто штэ́то, саво́ явэ́ла, и ко́нцо лэ́стыр явэ́ла сыр да барэ́-тасадыпнаскирэ панингэстыр, и кэ ко́нцо марибнаскиро явэ́на чхучакирибэна (спустошэнии).27. Тэ́ньци ёв чхувэ́ла зор пэ завето ваш бутэнгэ пэ екх эфтытко, и дрэ паш эфтытко пириячэлапэ свэ́нто яныбэ́н, и маруно́ свэ́нто дыибэ́н, и пэ пхак (крыло) свэнтонэ́ штэтоскиро явэ́ла чхучакирдо джунгалыпэ́н (брыткима) и анги́л дова́, сыр сыкадыно хасибэ́н пэрэ́ла пэ чхучибнаристэ (спустошытелёстэ).”Daniel 10:1-211. Пэ три́то бэрш о Кираскиро, Персытконэ Крали́скиро, сыс сыкадо чачипэ́н Даниелёскэ, савэ́с кхардэ́ пир лав Валтасаро; и чачуно́ сыс дава́ сыкадыипэн и древа́н зорало́. Ёв ґалыя́ дава́ чачипэ́н и уґалыя дыкхибэ́н.2. Дрэ кодолэ́ дывэса́ мэ со́мас, Дание́лё, дрэ ту́га ясвэ́нца трин эфтытка (седьмины) дывэса́.3. Лачхо́ маро́ мэ на хавас; мас и мол (вино) на гинэ́ дрэ мирэ́ ушта́, и макхибнаса мэ на кхосавас ман кэ/жы́ко дова́, сыр пхэрдинэ (сполниндлэпэ) трин эфтытка дывэса́.4. Пэ биш тэ шта́рто дывэ́с пэрвонэ́-чхонэ́скиро со́мас мэ пэ брэ́го барэ́-рэкакиро (лэнякиро) пашы́л Тигро,5. и ґаздыём мэ мирэ́ якха́, и дыкхцём: акэ, екх мурш, уридо́ дро ґандладытко (лёнытко) урибэ́н, и кусты́к пэ лэ́стэ сыс сувнака́стыр Уфазостыр.6. Э маса́ лэ́стэ – сыр куч бар топазо, о муй лэ́скиро – сыр о блискавицакиро дыкхибэ́н; лэ́скирэ якха́ – сыр хачкирдэ́ ягэнгирэ (факелы), васта́ лэ́скирэ и ґэра́ лэ́скирэ сыс сыр зяиндлы харко́ма (медь), и зан лэ́скирэ ракирибнаскири – сыр зан бутэ́-манушэ́нгири.7. Фэ́ни (то́ка) мэ екхджино́, Даниеле, дыкха́вас дасаво дыкхибэ́н, э мануша́, савэ́ сыс ма́нца, на дыкхнэ́ дасаво дыкхибэ́н; нэ пыя́ пэ лэ́ндэ бари дар и ёнэ нашнэ́, соб (кай) тэ гаравэнпэ.8. Палдава́ яцёмпэ мэ екхджино́, и дыкха́вас мэ да́ва баро́ дыкхибэ́н, нэ дрэ ма́ндэ на яця́пэ зор, мина пэ миро муй древа́н парудяпэ дара́тыр, на яця́пэ ма́ндэ нисаво́ састыпэн.9. И шундём мэ зан лэ́скирэ лавэнгири; и фэ́ни шунавас мэ зан (глос) лэ́скирэ лавэнгири, сыр кашталуно дыёмпэ (замыём) мэ муял и со́мас пашто́ тэлэ́ мо́са кэ пхув.10. Нэ акэ, чиладя́ ман о васт и чхудя́ ман пэ мрэ чанга́ и пэ бурныка (ладони) мрэ вастэнгирэ.11. И пхэндя́ ёв ма́нгэ: “Даниеле, мурш пир ило́! ‘Галёв лава́, савэ́ мэ пхэна́ва ту́кэ, ушты́ маму́й (ровнэс) пэ ґэра́ тырэ́; пал-дова́ со мэ сом бичхадо́ акана́ кэ ту.” Ко́ли ёв пхэндя́ ма́нгэ далэ́ лава́, то мэ уштыём, издрандой.12. Нэ ёв пхэндя́ ма́нгэ: “На андырша, Даниеле; пэрвонэ́ дывэсэ́стыр, сыр ту чхудя́н тыро́ ило́, соб (кай) тэ дорэсэс ґалыибэ́н, и тэ тэлякирэс пэс анги́л тырэ́ Дэвлэ́стэ, лава́ тырэ́ сыс шундлэ́, и мэ явавас пал тырэ́ лава́.13. Нэ тхага́ри (князё) Персытконэ кралипнастыр тэрдёлас проти ма́ндэ биш тэ екх дывэса́; нэ, акэ, Миха, екх пэрвонэ́ тхагарьендыр, явдя́ тэ дэл васт ма́нгэ, и мэ яцёмпэ одо́й пашы́л Персытка кралье́ндэ.14. Акана́ мэ явдём тэ пхэна́в джины́ (звесь) ту́кэ, саро́, со явэ́ла тырэ́ манушэ́нца дрэ дывэса́, со явэ́на анги́л, адя́кэ, сыр дыкхибэ́н сыкавэ́ла пэ дуратунэ́ дывэса́.”15. Ке́ли ёв ракирэ́лас ма́нгэ дасавэ́ лава́, мэ пыём мо́са кэ пхув и яцём муто (немо).16. Нэ, акэ, вари-кон, кон здэла (подджа́ла) пэ манушытконэ́ чхавэ́стэ, чиладя́ мирэ́ ушта́, и мэ откэрдём мирэ́ ушта́, лыём тэ ракира́в и пхэндём одолэ́скэ, со сыс тэрдо́ анги́л ма́ндэ: “Раё миро! Кадалэ́ дыкхибнастыр сарэ́ бидытка туги мирэ́ обрисинэ пэ ма́ндэ, и на яця́ мэндэ зор.17. И сыр сашты́ тэ ракирэ́л о писха́ри кадасавэ́ мирэ́ ра́скиро, сыр мэ, Дание́лё, сыр ту сан? Пал-дова́ со адрал ма́ндэ нанэ зор, и пхурдыпэн (дыхиныбэн) замыя́ дрэ ма́ндэ.”18. Тэ́ньци нэвэ́стыр чиладя́ ман одова́ джино, саво́ сыс дрэ патри́н (о́бразо) манушы́тко и састякирдя ман,19. и пхэндя́: “На андарша, о мурш пир ило́! Рама́нё (миро) тэ явэ́л ту́кэ; лы́джа пэс муршканэ́с, яв муршкано́!” И ке́ли ёв ракирэ́лас ма́нца, мэ састиём и пхэндём: “Ра́кир, Раё миро; пал-дова́ со ту састякирдян ман.”20. И ёв пхэндя́: “Ци джинэ́са, палсо́ мэ явдём кэ ту? Акана́ мэ рисёва́ва, соб (кай) тэ маравпэ Персытконэ тхагариса; и ке́ли мэ выджава, то, акэ, явэ́ла Греки́тко (Балами́тко) тхага́ри.21. Нэ анги́л мэ пхэна́ва ту́кэ, со исын чхиндло́ дро чачуно́ чхиныбэ́н. И нанэ нико́н, кон подрикирэлас бы ман дрэ дова́, апри́ч Михастэ, тумарэ́ тхагаристэ.”Psalms 137:7-97. О, Раё Дэ́вла! Ри́пир Эдомоскирэ чхавэ́нгэ пал Ерусалимоскиро дывэ́с, савэ́ пхэндлэ́: “Пхагирэн сарэ́са! Пхагирэн сарэ́са кэ са́мо пхув.”8. О, чха́ё Вавилоно́стыр, тут мулякирэна. Тэ явэ́л бахтякирдо́ дова́, кон отплэскирэла палэ́ тумэ́нгэ, пал дова́, со тумэ́ кэрдэ́ амэ́нгэ:9. тэ явэ́л бахтякирдо́ одова́, кон ухтылэ́ла тумарэ́ тыкнэн и тэ пхаравэл лэн пир бара́.Proverbs 29:15-1515. Ко́ли чхаворэс сыклякирэ́на пхарэ́с и раняса (розгаса), тэды ёв ячэ́лапэ годэдыр. Нэ ко́ли чхаворо́ мэкно́ кокоро́ пэ́скэ, то ёв ладжакирэла пэ́скирэ да.1 Jan 1:1-101. Пал дова́, со сыс англыпна́стыр, пал дова́, со амэ шундя́м, со дыкхцям пэ́скирэ якхэ́нца, со амэ роздыкхасас, и со чилавэнас амарэ́ васта́, дова́ и амэ пхэнасас пал Джиибна́скиро лав, –2. дава́ джиибэ́н сыс сыкадо, и амэ дыкхцям дава́ и амэ сам якхи́тка и амэ пхэна́са тумэ́нгэ пал дава́ ве́чно джиибэ́н, саво́ сыс Дадэ́са, и саво́ сыс сыкадо амэ́нгэ,3. акэ, дова́-паць, со амэ дыкхцям и шундя́м, и пхэна́са тумэ́нгэ, соб (кай) тумэ́ндэ тэ явэ́н кхэтаныпэн амэ́нца, а амаро́ кхэтаныпэн исын Дадэ́са, и Лэ́скирэ чхавэ́са, Исусо́са Христосо́са.4. И дава́ амэ чхинаса тумэ́нгэ, соб (кай) тумари́ ра́дыма тэ явэ́л пхэрды́.5. И, ґа́да, пал со исын мавлы́н (малва), сави́ амэ шундя́м Чхавэстыр и пхэна́са тумэ́нгэ: Дэвэ́л исын дуд (свэ́то) и нанэ нисаво́ калыпэ́н дрэ Лэ́стэ.6. Ко́ли амэ ракираса, со амэ́ндэ исын кхэтаныпэн Лэ́са, а кокорэ́ псираса дро калыпэ́н, тэды амэ хохаваса и на псираса пир чачипэ́н.7. А ко́ли амэ псираса дро Дэвлэ́скиро дуд, адя́кэ-паць сыр Христо́со исын дуд, тэды амэ́ндэ исын кхэтаныпэн екх екхэ́са, и Исусо́скиро Христосо́скиро рат, Лэ́скирэ чхавэ́скиро, жужакирэла (чыстинэла) амэн кажнонэ́ грэхэ́ндыр.8. Ко́ли амэ ракираса, со амэ́ндэ нанэ грэ́хо, тэды амэ хохаваса кокорэ́ пэс, и нанэ амэ́ндэ чачипэ́н.9. Ко́ли амэ приґалёваса амарэ́ грэ́хи анги́л Дэвлэ́стэ, тэды Ёв выжужакирэ́ла амаро́ начачипэ́н, пал-дова́ со Ёв исын патяибны́тко, и чачуно́.10. Ко́ли амэ ракираса, со амэ на кэрдя́м грэ́хи, тэды амэ кэра́са Лэ́стыр Хохаибнарис, и нанэ Лэ́скиро лав амэ́ндэ. Romani Bible Baltic 2019 Maintained by the United Bible Societies for the Baltic Romani Mission