Beblia

1. Дро дова́ дывэ́с псиравэлапэ (откэрэлапэ) ґанынгори ваш Давидо́скиро кхэр и Ерусалимо́скирэ манушэ́нгэ, соб (кай) тэ выморэн (тэ халавэн криг) лэ́ндыр грэ́хо и кажно мэлалыпэн.

2. И явэ́ла дро дова́ дывэ́с’, – ракирэ́ла Рай Дэвэ́л, янголэ́нгирэ-болыбна́скиро, – ‘Мэ чхина́ва криг идолэнгирэ лава́ далэ́ пхувья́тыр, и пал лэ́ндэ нико́н буты́р на лэ́ла тэ рипирэл. Мэ адя́кэ кэра́ва, со кокорэ́ хоханэ́ пророкэ́н и нажужо ду́хо Мэ традава криг пхувья́тыр.

3. И явэ́ла адя́кэ: сыр кон лэ́ла тэ анги́л пхэнэ́л пал дова́, со явэ́ла, то дад и дай лэ́скирэ, со яндлэ́ лэс, пэ свэ́то, пхэнэ́на лэ́скэ: ‘Ту́кэ нашты́ тэ дживэ́с, пал-до со ту хохаибэ́н ракирэсас Ра́скирэ-Дэвлэ́скирэ лавэ́стыр.’ И мулякирэна лэс дад лэ́скиро и дай лэ́скири, савэ́ бияндлэ лэс, сыр ёв лэ́ла тэ ангилпхэнэл’.

4. И явэ́ла дро дова́ дывэ́с, со заладжанапэ кадасавэ́ проро́ки, кажно пэ́скирэ дыкхибнастыр, сыр ёв лэ́ла тэ ангилпхэнэл, и ёнэ на лэ́на тэ урьен пэ лэ́стэ балытка гонэ́, соб (кай) тэ хохавэн.

5. Нэ ёв пхэнэ́ла: Мэ на сом проро́ко, Мэ сом гавитко ману́ш, пал-дова́ со сыс вари-кон тэ кэрэ́л ма́ндыр дынари́с мирэ́ чхаворитконэ бэршэ́ндыр.

6. Лэ́скэ пхэнэ́на: “Со́скэ исын ту́тэ ка́рбы (рубцы) пэ васта́?” И ёв отпхэнэ́ла: “Ваш дова́, со марэнас ман дро кхэр, кай сыс мирэ́ дру́ги (мала́).”

7. О, Курта́ля! Ѓаздэпэ пэ пастырёстэ Мирэстэ и пэ сэмэнцатэ Мирьятэ, ракирэ́ла янголэ́нгирэ-болыбна́скиро Рай Дэвэ́л. Замар пастырёс, и роспрастанапэ бакрэ́! И Мэ протырдава васт Миро кэ тыкнэ́.

8. И явэ́ла адя́кэ пэ сари́ пхув, – ракирэ́л Рай-Дэвэ́л, – ‘Дуй трита пэ ла́тэ явэ́на хасякирдэ́, вымэрна, а три́то паш ячэ́лапэ пэ ла́тэ.

9. И лыджа́ва Мэ до три́то паш дрэ яг, билякирава лэс, сыр билякирэна руп, и выжужакирава лэс, сыр жужакирэна сувнака́й: ёнэ лэ́на тэ кхарэ́н лав Миро. И Мэ вышунава лэн и отпхэнава: ‘Дава́ исын Мирэ́ мануша́,’ нэ ёнэ пхэнэ́на: ‘Рай Дэвэ́л исын Дэвэ́л миро!’”

1. Акэ, явэ́ла дывэ́с Ра́скирэ-Дэвлэ́скиро, и роскэрэна миштыпэ́н, чордо ту́тыр, машки́р ту́тэ.

2. И Мэ скэда́ва сарэ́н манушэ́н пэ марибэ́н проти Ерусалимо, и лэ́на фо́ро и обчорна кхэра́ и кэрна ладж джувленгэ, паш-фо́ро джа́ла дро пле́но; нэ яви́р мануша́, савэ́ ячэ́напэ, на хасёна форо́стыр.

3. Тэ́ньци явэ́ла Рай Дэвэ́л и холясо́ла пэ Наюды́тка на́цыи, сыр холя́сыя пэ лэ́ндэ дро марибнаскиро дывэ́с.

4. И тэрдёна ґэра́ Лэ́скирэ дро дова́ дывэ́с пэ Оливи́тко (Елеоноскири) бэ́рга, со анги́л Ерусалимо кэ/жы́ко васто́ко; и роспхарьёла пэ паш бэ́рга Оливи́тко вастоко́стыр кэ/жы́ко западо (кэ пал-паня) древа́н барэ́ фэлдаса, и паш бэ́рга отджала кэ паш-рати́тко риг, а яви́р паш-кэ паш-дывэсы́тко (южно) риг пэ древа́н баро́ до́ло.

5. И тумэ́ нашэ́на дрэ фэ́лда машки́р бэ́рги Мирэ́; пал-дова́ со фэ́лда протырдэлапэ кэ Асило; и тумэ́ праста́на, сыр нашэнас пхувья́кирэ тринскирибнастыр дрэ дывэса́ Озияскирэ, Юдэя́кирэ крали́скирэ; и явэ́ла Рай Дэвэ́л, Дэвэ́л миро и сарэ́ свэ́нта Лэ́са.

6. И явэ́ла дро дова́ дывэ́с: на явэ́ла дуд, кхам, чхон и чэргэня́ дурьёна.

7. Дова́ дывэ́с явэ́ла екх екхоро, пал лэ́стэ джинэ́ла фэ́ни екх Рай Дэвэ́л: ни рат, ни дывэ́с, фэ́ни бэльвэле́ явэ́ла дуд.

8. И явэ́ла дро дова́ дывэ́с: джидэ́ паня́ лэ́на тэ тхадэн Ерусалимо́стыр, паш лэ́ндыр кэ васточно мо́рё (дэрья́в). И паш лэ́ндыр кэ за́падно мо́рё (дэрья́в): лына́скиро и ивантэ́скиро (зимакиро) явэ́ла адя́кэ.

9. И Рай Дэвэ́л явэ́ла кра́ли пир сари́ пхув; дро дова́ дывэ́с явэ́ла фэ́ни (екх) Рай Дэвэ́л, и лав Лэ́скиро-фэ́ни екх.

10. Сари́ дая́ пхув явэ́ла, сыр ровно (во́рто) фэ́лда, Гаваоностыр кэ Рима, пэ паш-дывэ́с Ерусалимо́стыр, саво́ вучэ́с лэ́ла тэ тэрдёл пэ пэ́скиро штэ́то и лэ́на тэ дживэ́н дрэ лэ́стэ мануша́ Бенджминоскирэ Портатыр кэ штэ́то, кай исын пэ́рво по́рта (врата), кэ Вэнглоскири по́рта, и Хананеилоскирэ вучардятыр кэ кралитка пресы.

11. Э мануша́ лэ́на тэ дживэ́н дрэ лэ́стэ, и на явэ́ла буты́р лавитко прокошыбэ́н, нэ Ерусалимо явэ́ла тэ тэрдёл бидаракиро.

12. И, акэ, савэ́ явэ́на хасибны́тка фра́нсы, савэ́нца хасякирэ́ла Рай Дэвэ́л сарэ́ манушэ́н, со марэнаспэ Ерусалимоса: кажнонэ́стэ вышутёна маса́ лэ́скирэ, сыр ёв ишчо (инкэ́) явэ́ла тэрдо́ пэ пэ́скирэ ґэра́, и якха́ лэ́скирэ билёна дрэ пэ́скирэ ямицы, и чиб лэ́скири вышутёла дро муй лэ́стэ.

13. И явэ́ла дро дова́ дывэ́с: явэ́ла машки́р лэ́ндэ бари паника Ра́стыр-Дэвлэ́стыр адя́кэ, со явэ́ла тэ ухтылэл пал явирэскиро васт, и ґаздэ́лапэ васт лэ́скиро пэ васт лэ́скирэ сэмэнцакиро.

14. Нэ и кокоро́ Юда лэ́ла тэ марэ́лпэ Ерусалимоса, и скэдыно́ явэ́ла миштыпэ́н сарэнгиро пашылатунэ Наюдытконэ́-нацыенгиро: сувнака́й, руп и и́ди бут бутэндыр.

15. Явэ́ла дасаво кокоро́ хасякирибэн грэнгиро и лошакэнгиро, хасёна и верблюды, и ослы (мега́рья), и сарэ́ мурдала́ кхэри́тка (ското), савэ́ явэ́на пашы́л лэ́нгирэ буды дро лод (ста́но).

16. Пало́ дова́ сарэ́ яви́р Наюдытконэ́ нацые́ндыр, савэ́ явэ́нас тэ марэ́лпэ Ерусалимоса, лэ́на бэрш бэршэстыр тэ явэ́н тэ кэрэ́н шэрэ́са анги́л Крали́стэ Растэ-Дэвлэ́стэ янголэ́нгирэ-болыбнаскирэстэ, и тэ кэрэ́н будэнгиро (кушчэнгиро) Свэ́нко.

17. И явэ́ла: со ко́ли вари-саво́ кхэри́тко ро́до (племё) пэ дая́ пхув на джа́ла дро Ерусалимо тэ бандякирэл пэ́скиро шэро́ анги́л Крали́стэ, Растэ-Дэвлэ́стэ, янголэ́нгирэ-болыбнаскирэстэ, тэды на явэ́на лэ́ндэ брышында.

18. И ко́ли Египто́скиро кхэри́тко ро́до (племё) на ґаздэ́лапэ до дром и на явэ́ла, тэды и лэ́ндэ на явэ́ла брышы́нд, и ухты́лла (до́си) лэн хась, савья́са хасякирла Рай Дэвэ́л манушэ́н, савэ́ на явэ́на тэ кэрэ́н шатрэнгиро Свэ́нко.

19. Акэ, со явэ́ла пал Египто́скиро грэ́хо и пал грэ́хо сарэ́ манушэ́нгиро, савэ́ на явэ́на тэ свэнкинэн будэнгиро Свэ́нко – пхаро́ сэндякирибэн!

20. Дро долэ́ дывэса́ и по грэнгиро ґа́мо кудуненца явэ́ла чхиндло́: “Свэнтыма Ра́скэ-Дэвлэ́скэ”, и какавья (котлы) дро Кхэр Ра́скирэ Дэвлэ́скиро явэ́на сыр чарэ́ (чашы) анги́л алта́рё.

21. И сарэ́ пирья (какавья) дро Ерусалимо и дрэ Юдэ́я явэ́на сыр свэнтыма Ра́скирэ-Дэвлэ́скири. И сарэ́, кон явэ́ла тэ янэл свэ́нто дыибэ́н, лэ́на лэн и кэравэна дрэ лэ́ндэ. И на явэ́ла буты́р ни екх Хананеё дро Кхэр Ра́скирэ-Дэвлэ́скиро, янголэ́нгиро-болыбна́скиро дро дова́ дывэ́с.

5. Мэк свэ́нта тэ явэ́н ра́да славатыр, мэк ёнэ тэ бага́н зоралэ́с пэ лэ́нгирэ чхуибэна.

6. Мэк лэ́нгирэ муя́ тэ шарэ́н зоралэ́с кэ вучипэ́н Дэвлэ́с, мэк дуе́-риги́тко курта́ла тэ явэ́л дрэ лэ́нгирэ васта́:

7. соб (кай) тэ отдэ́н фуипнаса палэ Наюдэнгирэ́ нацые́нгэ, тэ кэрэ́н ка́ра манушыпнаскирэ нацыенгэ,

8. тэ пхандэн кхэтанэ́ лэ́нгирэ кралье́н зандирьенца (узэнца) и лэ́нгирэ барэ́ ран саструнэ́ пентэнца;

9. тэ кэрэ́н ка́ра пэ лэ́ндэ, со исын зачхиндлы. Дава́ исын паты́в сарэ́ свэнтонэнгэ. Аллилуя.

1. Крали́скирэ-Лемуилоскирэ лава́. Упхэныбэ́н, савэ́са лэ́скири дай сыклякирдя́ лэс:

2. Со, мро чха́ва? Со чха́ва, саво́ сан мирэ́ лочовя́тыр? Со чхаво́, мирэ́ совлахатыр?

3. На отдэ́ сарэ́са тыри́ зор джувленгэ, ци на отдэ́ пэс одолэ́скэ, со хасякирдя́ кралье́н.

4. Дава́ исын на ваш кральенгэ, о Лемуило, дава́ исын на ваш кральенгэ тэ пьен мол, ци тхэмэ́скирэ барыдырэ́нгэ тэ пхучэ́н: “Кай исын зорало́ пибэ́н?”:

5. соб (кай) ёнэ тэ на матён, и соб (кай) ёнэ тэ на бистрэн пал зако́но, и соб (кай) ёнэ тэ на рискирэ́н чачипэ́н одолэ́ндыр, савэ́н притасавэ́на.

6. Дэ зорало́ пибэ́н кодолэ́скэ, кон исын хасибны́тко, и мол кодолэ́скэ, савэ́скэ исын кирко пэ ило́:

7. мэк ёв тэ пьел, и тэ бистрэл пал пэ́скиро чорорипэн, мэк ёв тэ на рипирэл буты́р пал пэ́скири бари би́да.

8. Ра́кир пал манушэ́ндэ, савэ́ на ракирэ́на, и пал рэ́ндо одолэнгиро, савэ́н мэкнэ́.

9. Ра́кир пал одолэ́ндэ, савэ́н притасавэ́на, и пал богэ́ндэ; сэндякир лэн пир чачипэ́н и рисёв кэ лэ́нгиро чачипэ́н.

1. И мэ дыкхцём Янголо́с, Саво́ джа́лас тэлэ́ Болыбна́стыр Раёстыр и Савэ́стэ сыс клыды́н люностыр (адостыр), и сыс бари заньди́р (цэпо) дро Лэ́скиро васт.

2. Ёв ухтылдя драконос, пхуранэ́ сапэс, кон исын на́лачхо ци сатана и пхандя лэс пэ бар (тысёнцо) бэрш;

3. и Янго́ло чхурдыя́ лэс дро лю́но и пхандя лэс пэ чэргэнори́ (печать) пэ лэ́стэ, соб (кай) ёв буты́р тэ на хохавэ́л манушэ́н пака кончынэлапэ тысёнцо (бар) бэрш. Пало́ дава́ ёв явэ́ла отпхандло пэ набаро́ часо.

4. И мэ дыкхцём троны и одолэ́н, савэ́ бэшэнас пал сками́нд, савэ́нгэ сыс дыно́ тэ сэндякирэн. И мэ дыкхцём дия́ одолэнгирэ, конэ́скэ чингирдэ шэрэ́, палдова́ со ёнэ допхэнэнас пал Христосо́стэ и пал Дэвлэ́скиро лав. Ёнэ на клониндлэпэ патыва́са анги́л рискирибна́скирэ мурдалэ́стэ ци анги́л лэ́скири патри́н (о́бразо), ёнэ на прилынэ́ клеймоскири шпэ́ра пэ чэка́т ци пэ лэ́нгиро васт. И ёнэ отджидынэ и кралиндлэ Христосо́са бар бэрш.

5. Яви́р дия́ мулэ́ндыр на отджидынэ, пака бар бэрш кончынэлапэ. Дава́ исын пэ́рво отджидыипэн мэрибна́стыр.

6. Бахталэ́ и свэ́нта исын одолэ́, савэ́нгэ явэ́ла штэ́то дро пэ́рво отджидыипэн мэрибна́стыр. Яви́р мэрибэ́н на явэ́ла тэ рикирэ́л зор пэ лэ́ндэ, а ёнэ явэ́на рашая́ Дэвлэ́скэ и Христосо́скэ, и ёнэ явэ́на тэ кралинэн Лэ́са бар бэрш.

7. И ке́ли бар (тысёнцо) бэрш кончынэлапэ, тэды сатанас (налачхэ́с) отпхандэна лэ́скирэ штарибнастыр,

8. и ёв джа́ла анги́л тэ хохавэ́л манушы́тка на́цыи (народы), савэ́ исын пэ штар пхувья́кирэ вэ́нглы, Гога и Магога. На́лачхо явэ́ла тэ кэдэл кхэтанэ́ лэн пэ марибэ́н, лэ́нгиро кицыпэн (количэство) явэ́ла баро́-сыр морёскиро (дэрьявэ́скиро) пра́хо.

9. И яг пыя́ болыбна́стыр и хая лэн. И ёнэ гинэ́ сарэ́са пир пхувья́киро буґлыпэ́н и облынэ свэнтонэ́ Дэвлэ́скиро фо́ро, со сыс дро́го Дэвлэ́скэ.

10. И на́лачхо, кон хохадя лэн, сыс чхурдыно́ дро зеро (озеро) яга́са и дзэвэля́са (сераса), кай сыс адя́кэ-паць рискирибна́скиро мурда́л и хоханэ́ проро́ки. И ёнэ явэ́на тэ мэнчынэнпэ раты́ и дывэсэ́ пэ сарэ́ ве́ки.

11. И мэ дыкхцём баро́ парно́ троно и Екхэ́с, Кон сыс бэшто́ пэ лэ́стэ. Пхув и болыбэ́н нашэнас криг Лэ́скирэ мо́стыр и штэ́то на сыс латхно лэ́нгэ.

12. И мэ дыкхцём мулэн, барэн и тэрнэн, савэ́ сыс тэрдэ́ анги́л троно и лылваря свиткостыр сыс отпхандлэ. Яви́р лылвари́ сыс отпхандлы, сави́ сыс джиибна́скири лылвари́, и мулэ́ сыс сэндиндлэ пир дова́, со ёнэ кэрдэ́ пал пэ́скиро джиибэ́н, и со сыс зачхиндло́ дрэ лылваря.

13. И мо́рё (дэрья́в) отдыя́ пэ́скирэ мулэн, со сыс дрэ лэ́стэ. Мэрибнаскиро штэ́то и лю́но (адо), со исын тэл пхув, дынэ́ палэ пэ́скрэ мулэн, савэ́ сыс дрэ лэ́ндэ. Лэн сэндиндлэ со екхэ́с пир дова́, со ёнэ кэрдэ́.

14. Мэрибнаскиро штэ́то и лю́но (адо) сыс чхурдынэ́ дро зеро яга́са. Дава́ исын яви́р мэрибэ́н-зеро яга́са.

15. И ко́ли вари-кон на сыс латхно дрэ джиибнаскри лылвари́, ёв сыс чхурдыно́ дро зеро (озеро) яга́са.

Romani Bible Baltic 2019

United Bible Societies for the Baltic Romani Mission