Bible in one year
December 4

1. Адя́кэ мэ пэрвонэ́ бэршэстыр Мидиякирэ Дариёс яцём мэ тэ зорьякирав лэс и тэ подрикирав лэс.
2. Акана́ пхэна́ва ту́кэ чачипэ́н: акэ, ишчо (инкэ́) трин кра́лья ґаздэ́напэ дрэ Персия; пало́ дова́ шта́рто кра́ли пиризорьякирэла сарэ́н барэ́ барвалыпнаса, и, ке́ли зорьякирэла пэс пэ́скирэ барвалыпнаса, то тэды ёв ґаздэ́ла сарэ́н проти Греки́тко (Балами́тко) кралипэ́н.
3. Пало́ лэ́ндэ ґаздэ́лапэ о кра́ли древа́н зоралыпнаскиро, саво́ явэ́ла тэ хулаинэ́л барэ́ райканыпнаса и лэ́ла тэ кэрэ́л пир пэ́скири во́ля.
4. Нэ ке́ли ёв уштэ́ла, то кралипэ́н лэ́скиро роспэрэлапэ и роскэрэлапэ пэ штар болыбны́тка балваля, никонэ́скэ лэскрэ сэмэнца́кэ на пириджала дова́ кралипэ́н, и кадасавэ́ зорья́са, савья́са ёв хулаинэлас; хасёла кралипэ́н лэ́скиро и дорэсэлапэ явирэ́нгэ, апри́ч кодолэндэ.
5. Зорьякирэлапэ кра́ли паш-дывэсытконэ́ (южнонэ) рига́тыр и адя́кэ-паць екх тхага́ри лэ́скиро, саво́ пиризорьякирэла лэс и лэ́ла тэ хулаинэ́л, и явэ́ла лэ́стэ древа́н баро́ райканыпэн. Лэ́скирэ-райканыпнаскиро тхагарипэн явэ́ла баро́.
6. Нэ пир вари-кицы́ бэрша́ ёнэ явэ́на кучэдыр екх екхэ́са, и чхай паш-дывэсытконэ́ крали́скири явэ́ла кэ кра́ли паш-ратитконэ́ рига́тыр, соб (кай) ёнэ тэ явэ́н дрэ екх годы́; нэ ёй на вырикирэ́ла зор дрэ пэ́скирэ васта́, и на вытэрдёла ла́киро ро́до, нэ ёй явэ́ла выдыны тэ мэрэ́л, адя́кэ и пашатунэ́ ла́кирэ, и одолэ́, кон барьякирдя ла, и кодолэ́, кон ла́кэ дыя́ зор дро кодолэ́ часы.
7. Нэ ґаздэ́лапэ екх рандь (вэтка) ла́кирэ рукхэстыр (корнёстыр) пэ ла́киро штэ́то и явэ́ла тэ марэ́лпэ халадэнца и ёв заджа́ла дро тва́рдыма/диз (крепость) паш-ратитконэ́ крали́скиро, и пэ ла́киро штэ́то лэ́ла тэ кэрэ́л андрэ́ лэ́ндэ, и ёв лэ́ла бари зор.
8. Ишчо ёв лэ́ла дро пле́но кэ Еги́пто и лэ́нгирэ дэвэла́, вычхудэ́ лэ́нгирэ муенца, а лэ́нгирэ кучонэ́ кхорэнца, сувнакунэ́ и рупувэнца, и ёв, и пэ вари-кицы́ бэрш ёв явэ́ла тэ тэрдёл вучэды́р паш-ратитконэ́ крали́стыр.
9. Тэ́ньци адава́-паць кра́ли и явэ́ла пэ паш-рати́тко (северно) тхэм, нэ ёв рисёла пэ лэ́скири пхув.
10. И лэ́на марды́тко (оружыё) чхавэ́ лэ́скирэ и скэдэ́на бут халадэ́н, и екх лэ́ндыр сы́гэс явэ́ла, пхэрдякирэла саро́ и проджа́ла, и тэ́ньчи, рисии, лэ́ла тэ марэ́лпэ лэ́са паш-ратитконэ́ крали́са пашы́л лэ́скири тва́рдыма.
11. И росхолясола сарэ́са паш-дывэсы́тко (южно) кра́ли, и выджа́ла тэ марэ́лпэ лэ́са, паш-ратитконэ́ крали́са, саво́ вычхувэла баро́ халадыбэ́н, нэ отдыно́ явэ́ла дава́ халадыбэ́н дрэ лэ́скирэ (вэргоскирэ) васта́.
12. И ке́ли лыджа́на халадыбэ́н, то крали́скиро ило́ ґаздэ́лапэ; ёв тэлякирэла бут тысёнцы, нэ ёв зоралэды́р кодолэстыр на явэ́ла.
13. Пал-дова́ со паш-рати́тко (южно) кра́ли рисёла и тэрдякирэла тэ марэ́лпэ э халадэ́н бутыдыр, сыр сыс лэ́стэ, и пир вари-кицы́ бэрша́ сыго явэ́ла барэ́ халадыбнаса и барэ́ барвалыпнаса.
14. Дрэ кодолэ́ дывэса́ бутджинэ ґаздэ́напэ пэ крали́стэ паш-дывэсытконэстэ, и нахрата (нахальна) мануша́ тырэ́ народо́стыр, Даниеле, ґаздэ́напэ, соб (кай) тэ кэрдёл чачипна́са, нэ ёнэ пэрэ́на.
15. И явэ́ла паш-рати́тко кра́ли, и ґаздэ́ла вало пхувья́тыр и халадыбэ́н лэ́скиро лэ́ла зоралякирдо фо́ро, а ни паш-дывэсытка зорья на вытэрдёна, ни выкэдыно халадыбэ́н лэ́скиро; на ухтылэ́ла зор тэ тэрдёл проти.
16. И кодова́, кон выджа́ла кэ ёв, кэ паш-рати́тко кра́ли, лэскрэ волятыр, и нико́н на вытэрдёла анги́л лэ́стэ. Ёв тэрдёла табороса пэ Славу́тно Пхув, и ёй, сари́ пхув, дорэсэ́ла чорипэ́н лэскрэ вастэ́стыр.
17. И кадава́ кра́ли (паш-рати́тко) закамэ́ла тэ выджа́л сарэ́ зорьенца пэ́скирэ кралипнастыр, и лэ́скирэ чачипнаскирэнца, и кэрэ́ла дава́. И чхае́н лэ́скирэ джувленгирьен отдэ́ла лэ́скэ (крали́скэ паш-дывэсытконэскэ), соб (кай) тэ хасякирэ́л лэн, нэ дасави́ дума на рисёла чачипна́са, и на явэ́ла лэ́скэ ко́фо одолэ́стыр.
18. Пало́ дова́ ёв обрискирэла пэ́скиро муй кэ пхувья́ пашыл море (дэрьяв)-кэ островы (джипа́-р.с.) и лэ́ла пэ́скэ бут лэн; нэ вари-саво́ тхага́ри чхувэ́ла ко́нцо пэ лэ́нгири ладж, и ишчо (инкэ́) пэ́скири ладж чхувэ́ла пэ лэ́стэ, крали́стэ, паш-ратитконэстэ.
19. Тэ́ньци ёв дэ́лапэ пэ́скирэ мо́са кэ тва́рдыми пэ пэ́скири пхув; нэ ёв обштавэлапэ, пэрэ́ла и на явэ́ла лэс буты́р.
20. Пэ лэ́скиро штэ́то явэ́ла вари-кон, кон бичхавэ́ла мытарис/мыта-скэдыибнаскирэс, тэ джал дурэды́р пир славу́тно кралипэ́н; нэ и ёв палэ ада́кицы дывэса́ хасёла, и на мижэхипнастыр, и на марибнастыр.
21. И ґаздэ́лапэ пэ лэ́скиро штэ́то о бэдо (понижэно) ману́ш, и на дэ́на лэ́скэ паты́в крали́тко, нэ ёв явэ́ла бигодлякирэс и фрэнтымаса ёв залэла кралипэ́н.
22. Халадыбэна явэ́на тасадэ сы́рбы потопоса и пхарадэ анги́л лэ́стэ, и о кокоро́ тхага́ри завето́скиро, явэ́ла ростасадо.
23. И долэ́ дывэсэ́стыр, сыр кэрэ́на доракирибэ́н лэ́са, и ёв ґаздэ́лапэ, лэ́ла зор набутэ манушэ́нца.
24. И заджа́ла ёв дре раманёна (мирна) и барвалэ́ штэ́ты дро тхэм, Еги́пто, и ёв кэрэ́ла дасаво, со на кэрэ́нас лэскрэ дада́ и дадэнги́рэ-дада́ лэ́скирэ: дорэсыбэ́н/ чордо миштыпэ́н и барвалыпэ́н явэ́ла ёв тэ роздэл пэскирэнгэ, ёв лэ́ла тэ придуминэл пэ́скирэ планы и пэ тва́рдыми, нэ фэ́ни (то́ка) пэ набаро́ часо.
25. Тэ́ньци ёв джангавэла пэ́скири зор и ду́хо (фа́но) пэ́скиро бутджинэнца халадэнца проти крали́стэ паш-дывэсэ́стыр, и о кра́ли паш-дывэсы́тко выджа́ла пэ марибэ́н ишчо (инкэ́) бутэды́р зоралэ́ халадыбнаса, ёв на тэрдёла проти, пал-дова́ со проти лэ́стэ явэ́ла придуминдло хохаибэ́н.
26. И кодолэ́, кон лэ́са хая, закамэна тэ хасякирэ́н лэс, и халадыбэ́н лэ́скиро ростхадэлапэ, и пэрэ́на бут замардэ́ халадэ́.
27. Дуйджинэндэ адалэ́ кралье́ндэ пэ ило́ явэ́ла хохаибэ́н, и пало́ екх сками́нд ёнэ лэ́на тэ хохавэн, ракири́, нэ на явэ́ла ко́фо, пал-дова́ со ко́нцо (яго́ро) отчхувэлапэ пэ часо.
28. И дэ́лапэ ёв (кра́ли) пэ пэ́скири пхув (паш-рати́тко) барэ́ барвалыпнаса и лэ́скирэ илэ́са проти свэ́нто завето, и ёв кэрэ́ла дош, сыр ёв выкэдыя́, и ёв рисёла, кай исын лэ́скири пхув.
29. Дро упхэндло́/гиндло часо рисёла ёв кэ паш-рат (юго); нэ дава́ дро яго́ро (дро ко́нцо) на явэ́ла псирибэн дасаво, сыр сыс англэды́р.
30. Пал-дова́ со дро екх часо явэ́на пэ лэ́стэ па́рмы (корабли) Китимостыр; и ёв пэрэ́ла духо́са, и рисёла палэ и ёв кэрэ́ла, сыр ёв придуминдя и нэвэ́стыр (нэвэ́с) джа́ла, доракирэлпэ кодолэнца, кон отгия́ Свэнтонэ́ Заветостыр.
31. И халадыбэна, со ёв бичхавэ́ла, магирэна Свэ́нто Штэ́то дрэ Кхангири́ и тва́рдыма, и тэрдякирэна кажнонэ́-дывэсытка свэ́нта дыибэна́ (жэртвы), и янэ́на далэ́са джунгалыпэ́н чхучипнастыр (пустотатыр).
32. Кодолэ́н, кон кэрэ́ла бипатывалэс проти Завето, ёв прикхарэла кэ пэ гудлэ́ лавэ́нца; нэ э мануша́, кон гинэ́ла Дэвлэ́с, лэ́на зор и явэ́на тэ кэрэ́н, сыр трэй.
33. Нэ годьварэ́ мануша́ манушытконэ́ нацыятыр (народо́стыр) дэ́на годы́ бутэнгэ, на дыкхи́ пэ дова́, со ёнэ явэ́на тэ страдынэн ада́кицы дывэса́ ягатыр и куртала́тыр, плено́стыр и миштыпнытконэ чорибнастыр.
34. Ке́ли лэ́на тэ хан лэн дукха́, то явэ́ла лэ́нгэ вари-саво́ подрикирибэ́н, бутджинэ кхэтанякирэнапэ лэ́нца, нэ пэфроми (наилыткэс).
35. Латхэнапэ доша вари-савэ́ и годьварэндэ, соб (кай) тэ спробинэн лэн тэ жужакирэн и тэ парнякирэн кэ дывеса дро ко́нцо (яго́ро); пал-дова́ со ишчо (инкэ́) исын часо кэ упхэндло́ сроко.
36. И явэ́ла тэ кэрэ́л о кра́ли (паш-рати́тко) пир пэ́скири во́ля, и ґаздэ́лапэ кэ вучипэ́н и барьякирэ́ла пэс вучэды́р кажнонэ́ Дэвлэ́стыр, и пал Дэвлэ́стэ дэвлыканэстэ ёв лэ́ла тэ ракирэ́л калэ́ лава́, и явэ́ла тэ удэлпэ лэ́скэ, пака кэрдёлапэ холы́: пал-дова́ со сыс припхэндло, одова́ кэрэ́лапэ.
37. И пал дэвлэндэ пэ́скрэ дадэнги́рэ ёв на подуминэла, ни пал дова́, со исын пэ ило́ джувленгиро, ни хай дэвлыпнаскэ нисавэскэ ёв на дэ́ла паты́в; пал-дова́ со ёв фэ́ни (то́ка) пэс ґаздэ́ла вучэды́р сарэ́ндыр.
38. Нэ дэвлэскэ, саво́ дыкхэ́ла пал тва́рдыми (диза́) пиро́ штэ́то лэ́скиро, ёв явэ́ла тэ дэл паты́в, и кодолэ́ дэвлэс, савэ́с на джиндлэ́ лэ́скирэ дада́, ёв лэ́ла тэ дэл паты́в сувнака́са и рупэ́са и куч барэ́нца, и разнонэ дрогонэ́ дарэнца,
39. и чхувэ́ла ёв зоралы́ тва́рдыма/диз (крепость) чужонэ́ дэвлэса: нэ кодолэ́, савэ́ пригалёна лэс, одолэ́нгэ ёв дэ́ла зор пэ бутэндэ, и ёв роздэла пхув сыр мазу́ри (награда).
40. Пэ ко́нцо (яго́ро) дывэсэнгиро явэ́ла тэ марэ́лпэ лэ́са о кра́ли паш-дывэсэ́стыр (югостыр), и о кра́ли паш-рати́тко чхурдэлапэ сыр рискирибнаскири балва́л (вихро) пэ лэ́стэ марибнытконэ́ вурдэнэнца, уклистэнца (всадникэнца) и бутэ́ пармэнца (корабленца), и ёв пэрэ́ла пэ далэ́ тхэма, пхэрдякирэла лэн, и проджа́ла пир лэ́ндэ.
41. И заджа́ла адя́кэ-паць ёв пэ Славу́тно Пхув, и бут тхэма (страны) пэрэ́на и зракхэнапэ лэ́скирэ вастэ́стыр фэ́ни (то́ка) Эдо́мо, Моа́во и барэды́р паш Амонэнгирэн чхавэнгири.
42. И тырдэла ёв васт лэ́скиро пэ яви́р тхэма; на зракхэ́лапэ и Египто́скири пхув.
43. И залэла ёв пираля́ сувнака́са и рупэ́са и явирэ кучипнэнца Египто́стыр; э Ливиитка и Ефиопиитка джа́на пал лэ́стэ.
44. Нэ малвы (нэвипэна́) вастокоскирэ и паш-ратитконэ́ рига́тыр страхакирэна лэс, выджа́ла ёв барэ́ мижэхипнаса, соб (кай) тэ замарэ́л и тэ вымарэл сарэ́са бутэн.
45. И чхувэ́ла ёв кралитка ша́тры пэ́скирэ фелатинятыр машки́р мо́рё (дэрья́в) и славу́тно свэ́нто бэ́рга; явэ́ла ёв кэ пэ́скиро ко́нцо (яго́ро) и нико́н на подэла васт лэ́скэ.
1. И уштэ́ла дро долэ́ дывэса́ о Миха, тхага́ри баро́, кон явэ́ла тэрдо́ пал чхавэ́ндэ тырэ́ народо́стыр; и явэ́ла часо пхаро́, саво́ на сыс долэ́ дывэсэ́ндыр, сыр явнэ́ мануша́ пэ свэ́то кэ/жы́ко акана́; нэ зракхэнапэ дро дова́ часо сарэ́ мануша́ тырэ́ народо́стыр, конэ́с латхэ́на дрэ лылвари́.
2. И бут кодолэ́, савэ́ исын сутэ́ дро пхувья́киро пра́хо, джангадёна, екх ваш ве́чно джиибэ́н, яви́р пэ ве́чно ладжаипэ́н и обракирибэн.
3. И годьварэ́ явэ́на тэ зяинэн, сыр дуда (светилы) пэ болыбна́скиро сво́до, и кодолэ́, савэ́ рискирэна бутэн кэ чачипэ́н – сыр чэргэня́ дро ве́ко, пэ сарэ́ ве́ки.
4. Нэ ту, Даниеле, гарав далэ́ лава́ и запечатын лылвари́ кэ палатуно́ (последнё) часо; бут мануша́ прогинэна ла, и явэ́ла тэ барьёл джиныбэ́н.”
5. Тэ́ньци мэ, Дание́лё, дыкхцём, и, акэ, тэрдэ́ сыс дуй яви́р Янго́лы, екх пэ дава́ брэ́го рэкакиро (лэнякиро), яви́р пэ яви́р брэ́го рэкакиро (лэнякиро).
6. И пхэндя́ екх Янго́ло муршэскэ дро ґандладытко (лёнытко) урибэ́н, саво́ сыс тэрдо́ упра́л рэкитка пани́: “Ке́ли явэ́ла ко́нцо (яго́ро) далэ́ дивэнгэ?”
7. И шунавас мэ, сыр о мурш дро гандладытко урибэ́н, саво́ сыс упра́л рэкитко пани́, ґаздыя́ чачо́ и зэ́рво (ле́во) васт кэ болыбэ́н, совлахадя́ вечнонэ Джидэса, со кэ дывэсэнгиро ко́нцо (яго́ро) и кэ часы и кэ паш-часы, и, сыр кончынэлапэ сарэ́са зор свэнтонэ́ народоскири, то саро́ дава́ кэрэ́лапэ, чачипна́са сыр трэиндя́.
8. Мэ шундём дава́, нэ мэ на’ галыём, палдава́ пхэндём: “Раё миро! Со исын тэ явэ́л пало́ дава́?”
9. И отпхэндя́ ёв: “Джа́, Даниеле; пал-дова́ со исын закэрдэ и запечатымэ далэ́ лава́ кэ палатуно́ часо.
10. Бутджинэ жужакирэнапэ (чыстинэнапэ), парнякирэнапэ и явэ́на пирибиладэ ваш пропатякирибэн; э фуй мануша́ явэ́на тэ кэрэ́н бипатывалэс, и на ґалёла нико́н адалэстыр лав бипатывалэндыр (фуе́ манушэ́ндыр), нэ э годьварэ́ ґалёна.
11. Кодолэ́ часостыр, сыр пириячэна кажнонэ́-дывэсытка свэ́нта дыибэна́, и сыр явэ́ла чхудо джунгалыпэ́н чхучипнаскиро, проджа́ла (накхэла) тысёнцо тэ дуйшэла́ енядэша дывэса́.
12. Бахтало́ исын одова́, кон ужакирэ́ла и додживэла тысёнцо тэ триншэла́ трия́нда пандж дывэса́.
13. И ту, Даниеле, джа́ кэ тыро́ ко́нцо (яго́ро) и ту явэ́са тэ откхинёс, и тэ уштэс, соб (кай) тэ дорэсэс тыро́ мэкно́ миштыпэ́н пэ ко́нцо (яго́ро) дывэсэнгиро.”
1. Давидо́скиро Пса́лмо. Мэ ява́ва тэ парикира́в Ту́кэ сарэ́ мирэ́ илэ́стыр, мэ ява́ва тэ бага́в псалмы ту́кэ анги́л дэвлорэндэ.
2. Мэ ява́ва тэ клонинавпэ патыва́са кэ Тыри́ свэ́нто Кхангири́ и тэ вышарав Тыро́ лав пал Тыро́ дро́го лачхипэ́н, и пал Тыро́ патяибэ́н, пал-дова́ со Ту ґаздыян вучэды́р сарэ́стыр Тыро́ лав.
3. Ту отпхэндян ма́нгэ дро дывэ́с, ке́ли мэ дыём го́дла ясвэ́нца: Ту кэрдя́н муршканэдыр ман, ке́ли Ту дыя́н зор мирэ́ дескэ.
16. Ке́ли фуй мануша́ явэ́на уса́ буты́р и буты́р, тэды фуипэ́н барьёла, нэ чачунэ́ мануша́ явэ́на тэ дыкхэ́н, сыр ёнэ пэрэ́на.
1. Чхаворалэ мирэ́! Мэ чхина́ва дава́ тумэ́нгэ, соб (кай) тумэ́ тэ на кэрэ́н грэ́хо, и ко́ли вари-кон кэрэ́ла грэ́хо, амэ́ндэ исын Екх тэ тэрдёл пал амэ́ндэ анги́л Дадэ́стэ-Ису́со Христо́со, Чачипна́скиро;
2. и Ёв исын Кодова́, Кон пирилыджия пхарипэ́н кэ мэрибэ́н Пэ́скирэ ратэ́са пал амарэ́ грэ́хи сы́рбы свэ́нто дыибэ́н, и на фэ́ни (то́ка) пал амарэ́, а адя́кэ-паць пал грэ́хи сарэ́ свэто́скирэ.
3. И адя́кэ амэ уджинаса, со амэ джина́са Лэс, ко́ли амэ ракхаса Лэ́скирэ припхэныбэна́.
4. Кон ракирэ́ла: “Мэ уджиндём Лэс” и на ракхэ́ла Лэ́скирэ припхэныбэна́, одова́ ману́ш исын хохаибнари, и нанэ нисаво́ чачипэ́н дрэ лэ́стэ;
5. а кон ракхэ́ла Лэ́скиро лав, кодолэстэ исын бидошакиры паты́в кэ Дэвэ́л. Адя́кэ амэ уджинаса, со амэ сам дро кхэтаныпэн Дэвлэ́са.
6. Кон ракирэ́ла, со ёв дживэ́ла дро екхипэ́н Дэвлэ́са, кодолэ́скэ трэй адя́кэ-паць тэ дживэ́л сыр Христо́со дживдя́.
7. Дро́га мирэ́! Мэ чхина́ва на нэво́ припхэныбэ́н тумэ́нгэ, а пхурано́ припхэныбэ́н, саво́ исын тумэ́ндэ англыпна́стыр. Пхурано́ припхэныбэ́н исын лав, саво́ тумэ́ шундлэ́ англыпна́стыр.
8. Нэ дава́ исын дава́-паць и нэво́ припхэныбэ́н, со мэ чхина́ва тумэ́нгэ, пал-дова́ со дава́ чачипэ́н сыс бицяло́ и дрэ Христосо́стэ и дрэ тумэ́ндэ: пал-дова́ со калыпэ́н проджа́ла и чачуно́ дуд какана́ хачола.
9. Кон ракирэ́ла, со ёв исын дро дуд, а лэ́скэ исын надрого пэ́скиро пшал, одова́ исын ишчо (инкэ́) дро калыпэ́н.
10. Конэ́скэ исын дро́го лэ́скиро пшал, одова́ ячэ́лапэ дро дуд, и нанэ бар пэ дром лэ́стэ, соб (кай) ёв тэ пэрэ́л дро грэ́хо;
11. а конэ́скэ исын надрого пэ́скиро пшал, одова́ исын дро калыпэ́н, и псирэ́ла дро калыпэ́н, и ёв на джинэ́ла, карик ёв джа́ла, пал-дова́ со калыпэ́н корьякирдя якха́ лэ́скэ.
12. Мэ чхина́ва тумэ́нгэ, чхаворэ́, пал-дова́ со отмэкнэ тумарэ́ грэ́хи пир Христосо́скиро лав.
13. Мэ чхина́ва тумэ́нгэ, дада́, пал-дова́ со тумэ́ прилынэ́ Одолэ́с, Саво́ исын англыпна́стыр. Мэ чхина́ва тумэ́нгэ, тэрнэ́ мануша́лэ, пал-дова́ со тумэ́ пиризорьякирдэ налачхэ́с. Мэ чхина́ва тумэ́нгэ, бияталэ, пал-дова́ со тумэ́ приджиндлэ Дадэ́с.
14. Мэ чхиндём тумэ́нгэ, дадолэ, пал-дова́ со тумэ́ уджиндлэ́ Одолэ́с, Кон исын усады (сак) англыпна́стыр [Дадэ́стэ-ю.о.]. Мэ чхиндём тумэ́нгэ, тэрнэ́ мануша́лэ, пал-дова́ со тумэ́ сан зоралэ́; и Дэвлэ́скиро лав ячэ́лапэ дрэ тумэ́ндэ и тумэ́ пиризорьякирдэ налачхэ́с.
15. На дэн паты́в свэтоскэ, и дова́, со исын дро свэ́то: кон дэ́ла паты́в свэтоскэ, кодолэ́ манушэ́скэ исын надрого Дад:
16. пал-дова́ со саро́, со исын дро свэ́то: лочакиро тырдыпэ́н кэ грэ́хо, грэхоскиро камибэн дрэ якха́, пхутькирибэ́н пэ́скирэ джиибнаса, дава́ саро́ нанэ Дадэ́стыр, а джа́ла свэто́стыр.
17. Свэ́то проджа́ла и адя́кэ-паць и грэхоскирэ камибэна, нэ одова́, кон кэрэ́ла пир Дэвлэ́скири во́ля, явэ́ла тэ дживэ́л ве́чнэс.
18. Тэрнэ́ мануша́лэ! Дава́ исын палатуно́ (последнё) часо. И пал-дова́ со тумэ́ шундлэ́, со явэ́ла антихристо и какана́ явнэ́ пэ якха́ бут антихристы, амэ джина́са далэ́стыр, со явдя́ палатуно́ часо.
19. Ёнэ выгинэ́ амэ́ндыр, нэ ёнэ на сыс амарэ́; пал-дова́ со, ко́ли ёнэ тэ явэ́н амарэ́, тэды ёнэ ячэнас амэ́нца, нэ ёнэ выгинэ́ амэ́ндыр ваш дова́, соб (кай) тэ явэ́л сыкадо, со ние́кх лэ́ндыр нанэ амаро́.
20. Нэ тумэ́ дорэснэ́ Свэ́нто Ду́хо (Фа́но) Христосостыр, и тумэ́ джинэ́на саро́ чачипэ́н.
21. Мэ чхиндём тумэ́нгэ на палдова́ со тумэ́ на джинэ́на чачипэ́н, нэ пал-дова́ со тумэ́ джинэ́на лэс, адя́кэ-паць сыр и дова́, со кажно хохаибэ́н нанэ чачипнастыр.
22. Кон хохавэла? Адава́ исын одова́ ману́ш, кон на приґалёла, со Ису́со исын Христо́со? Дава́ исын антихристо, саво́ на приґалёла ни Дадэ́с, ни Чхавэ́с.
23. Кажно ману́ш, кон на приґалёла Чхавэ́с, лэ́стэ нанэ и Дадэ́с, а кон приґалёла Чхавэ́с, одолэ́ манушэ́стэ исын и Дад.
24. Тэды тумэ́, со тумэ́ шундлэ́ англыпна́стыр, мэк дова́ тэ явэ́л дрэ тумэ́ндэ; ко́ли явэ́ла дрэ тумэ́ндэ, дова́, со тумэ́ шундлэ́ англыпна́стыр, тэды тумэ́ явэ́на дро екхипэ́н Чхавэ́са и Дадэ́са.
25. И, акэ, исын дова́, пал со Христо́со Кокоро́ дыя́ лав, дава́ исын ве́чно джиибэ́н.
26. Дава́ чхиндём мэ тумэ́нгэ пал одолэ́ндэ, савэ́ камэ́на тэ лыджа́н тумэн дро блэ́ндо:
27. нэ помакхибэн, Свэ́нто Ду́хо (Фа́но), Саво́ тумэ́ дорэснэ́ Христосостыр, ячэ́лапэ дрэ тумэ́ндэ, и тумэ́ндэ нанэ трэ́бима, соб (кай) вари-кон тэ сыклякирэ́л тумэн. И дава́ Свэ́нто Ду́хо (Фа́но) сыклякирэ́ла тумэн, и Ёв сыс чачуно́ и нанэ хохано́. И сыр Свэ́нто Ду́хо (Фа́но) высыклякирдя тумэн, ячэ́нпэ дро екхипэ́н Христосо́са.
28. Ѓа́да, бияты, ячэ́нпэ дро екхипэ́н Христосо́са, соб (кай) Ёв, ке́ли сыкадёла, тэ явэ́л амэ́ндэ зорало́ патяибэ́н и тэ на явэ́л ладжаво анги́л Лэ́стэ, ке́ли Ёв явэ́ла.
29. И ко́ли тумэ́ джинэ́на, со Христо́со исын чачуно́, джинэ́н и дова́, со кажно ману́ш, кон кэрэ́ла пир чачипэ́н, исын Дэвлэ́скиро чхаво́.
Romani Bible Baltic 2019
United Bible Societies for the Baltic Romani Mission