Bible in one year December 5Hosea 1:1-111. Акэ, исын лав Ра́скирэ-Дэвлэ́скиро, саво́ явдя́ Осия́скэ, чхавэ́скэ Беероскирэ́скэ дрэ долэ́ дывэса́, ке́ли раиндлэ́ штар кра́лья Юдэя́кирэ: Ози́я, Иоафа́мо (Ёфамо), Аха́зо, и Езэки́я и дрэ долэ́ са́ма дывэса́, ке́ли кралиндя́ пэ Израилё о Еровоа́мо (Иеровоамо), чхаво́ Ёасоскиро (Иоасоскиро).2. Акэ, сыр Рай Дэвэ́л лыя́ тэ ракирэ́л пир Осия́стэ. И пхэндя́ Рай-Дэвэ́л Осияскэ: “Джа́, лэ пэ́скэ биладжакуня джувля́, и тэ явэ́н тырэ́ чхаворэ́ биладжакунэ́. Пал-дова́ со дая́ пхув древа́н кэрэ́ла биладжаипэ́н (марки), сыр лэ́нгирэ мануша́ дурьёна (отгинэ́) Ра́стыр-Дэвлэ́стыр.”3. И ёв гия́ и лыя́ Гомерья́, чха Дивлаимоскирья, и ёй яця́ пхари́ и бияндя́ лэ́скэ чхаворэс.4. И пхэндя́ Рай-Дэвэ́л лэ́скэ: “Дэ лав лэ́скэ Изреелё, пал-дова́ со ишчо (инкэ́) на́бут и проджа́ла и Мэ дукхавава палэ пал рат дро Изрееле, со прочхудяпэ дро кхэр Ииуёскиро (Игуёскиро), и Мэ кэра́ва адя́кэ, со пириячэна тэ явэ́н кра́лья кхэрэ́стыр Израилёскирэстыр.5. И явэ́ла адя́кэ: Мэ пхагирава лу́ко Израилёскиро пэ до́ло Изреелёскиро.”6. И ёй нэвэ́стыр яця́ пхари́ и ёй бияндя́ чхаёрья. И Дэвэ́л пхэндя́ Осияскэ: “Дэ лав ла́кэ Лорухама, пал-дова́ со Мэ буты́р на ява́ва тэ сыкавав ла́ска пэ кхэр Израилёскиро, соб (кай) тэ отмэкав банг лэ́нгэ.7. Нэ Мэ сыкава́ва ла́ска пэ кхэр Юда́скиро, и Мэ, Рай Дэвэ́л, лэ́нгиро Дэвэ́л, выракхава лэн, нэ на́ луко́са, на́ куртала́са, на́ марибна́са, на́ грэ́нца, на́ уклистэнгирэ халадэнца.”8. И, акэ, пало́ (после) дова́, сыр Гомерь дыя́ колы́н Лорухамакэ, ёй яця́ пхари́ и бияндя́ чхаворэс.9. И пхэндя́ Рай-Дэвэ́л Осияскэ: “Дэ лав лэ́скэ Ло-амми́, пал-дова́, со тумэ́ на сан Мирэ́ мануша́, и Мэ на ява́ва тумаро́ Дэвэ́л.”10. Нэ чхавэ́ Израилёскирэ явэ́на ада́кицы бут, кицы́ исын пра́хо пэ мо́рё (дэрья́в), со нашты́ тэ вымеринэс и тэ гинэс. И явэ́ла адя́кэ: пэ штэ́то, кай ракирдэ́ лэ́нгэ: “Тумэ́ на сан Мирэ́ мануша́,” акана́ одо́й пхэнэ́на лэ́нгэ: “Тумэ́ сан чхавэ́ джидэ́ Дэвлэ́скирэ.”11. Тэды чхавэ́ Юда́скирэ и чхавэ́ Израилёскирэ кэдэнапэ кхэтанэ́ и ёнэ чхувэ́на пэ́скэ екхэ шэралэс, и ёнэ джа́на криг чужонэ́ пхувья́тыр, пал-дова́ со баро́ явэ́ла дывэ́с Израилёскиро.Hosea 2:1-221. Ракирэ́н тумарэ́ пшалэ́нгэ: ‘Мирэ́ мануша́лэ,’ и ракирэ́н тумарэ́ пхэненгэ: ‘Потангиндлы’ (пожалиндлы).’2. Бангякирэ́н [сэндинэ́н-р.с.] тумарэ́ да, бангякирэн ла: пал-дова́ со ёй буты́р на явэ́ла Мири́ ромны́, и Мэ на сом ла́киро ром! Мэк ёй тэ дурьякирэл ла́кирэ мо́стыр ла́киро биладжаипэ́н, и ла́киро на́лачхо камибэн криг ла́кирэ колынэндыр;3. соб (кай) Мэ тэ на росчхакирав ла́киро нангипэ́н, и тэ на чхував ла анги́л, сыр дро дывэ́с, ке́ли ёй бия́ндыя; и соб (кай) Мэ на кэра́в ла́тыр чхучи́ (пусто) фэ́лда, и соб (кай) Мэ тэ на пирикэрав ла дрэ шуки́ пхув, и тэ на пэкавав ла смэгаса тэ пьел.4. Мэ на сыкава́ва ла́ска ваш ла́кирэ чхаворэнгэ (биятэнгэ), пал-дова́ со ёнэ исын бияты биладжакунэ́ джувлятыр.5. Пал-дова́ со лэ́нгири дай кхэлдя биладжакунэс; ёй сыс пхари́ лэ́нца напатывалэ́с: пал-дова́ со ёй пхэндя́: “Мэ джа́ва пал мирэ́ камлытконэндэ, савэ́ дэ́на ма́нгэ миро маро́, и миро пани́, и мири́ вы́лна (шэрсь), миро ґандладо (лёно), миро оливи́тко дзэт (елеё) и миро пибэ́н.”6. Палдава́, акэ, Мэ закэрава дром ла́кэ пхусаибнытконэ́ хрустэ́нца (терненца), и Мэ обчхувава ла вантаса, соб (кай) ёй тэ на дэл ра́да тэ латхэл пэ́скирэ дроморэ.7. И ёй традэлапэ пал ла́кирэ камлытконэндэ, нэ ёй на дотрадэла лэн; и ёй явэ́ла тэ родэ́л лэн, нэ ёй на латхэ́ла лэн: И тэды пхэнэ́ла ёй: ‘Нэ, джа́ва мэ и рисёва́ва палэ кэ миро пэ́рво ром, пал-дова́ со сыс фэды́р ма́нгэ сыр акана́ исын ма́нца.’8. Ёй на джиндя́, со дава́ со́мас Мэ, Рай Дэвэ́л, Кон дэ́лас ла́кэ гив (маро́), мол (вино), и дзэт, и Кон кэрдя́ бутэды́р (бутэдырьякирдя) ла́киро руп и сувнака́й, савэ́ндыр ёнэ кэрдэ́ Ваало.9. Пал-дава́ Мэ рисёва́ва палэ, и Мэ ла́ва палэ Миро гив (маро́) дро умалотно часо, и Мири́ мол (вино) дро ла́киро сезоно, и Мэ ла́ва палэ Мири́ вы́лна и Миро ґандладо (лёно), со дыно́ сыс ла́кэ тэ учхакирэл ёй пэ́скиро нангипэ́н.10. Акана́ Мэ откэрава ла́киро биладжаипэ́н анги́л якха́ ла́кирэ камлытконэ муршэндэ, и ние́кх ману́ш нашты́ на выракхэла ла Мирэ́ вастэ́стыр.11. И Мэ кэра́ва адя́кэ, со ла́тэ пириячэ́ла (кончынэлапэ) сабэн радыма́са, буты́р на явэ́на свэ́нки ла́кирэ, ла́кирэ-чхонэскирэ свэнкицы, и ла́кирэ са́ваты-сарэ́ ла́кирэ скаминда.12. И Мэ чхучакирава ла́кирэ винаграды́тка барья (посадки) и ла́кирэ инжыритка дрэвицы, пэ савэ́ ёй ракирэ́ла: ‘Ѓа́да, кадалэ́ исын мирэ́ мазу́рья (награды), со мирэ́ камлытка мурша́ дынэ́ ма́нгэ.’” И Мэ кэра́ва лэ́ндыр вэш, соб (кай) фэлды́тка мурдала́ (звери) тэ хан лэн.13. И Мэ пхарэ́с сэндякирава ла пал кодолэ́ дывэса́, пэ савэ́ ёй тхувалякирдя дро́га смо́лы Ваалэнгэ. Ёй шукарьякирдя пэс чэненца и мирикленца, и ёй гия́ пал ла́кирэ камлытконэ муршэндэ, и тэды ёй бистырдя Ман”, – ракирэ́ла Рай Дэвэ́л.14. “Палдава́ Мэ затырдава (уракирава) ла и яна́ва ла пэ чхучи́ пхув, и Мэ ява́ва тэ ракира́в илыткэс ла́са.15. И Мэ да́ва ла́кэ винаграды́тка барья одотхы́р и до́ло Ахороскиро, сыр вуда́р тэ ужакирэл лачхипэ́н. Одо́й ёй явэ́ла тэ багал, сыр дрэ дывэса́ ла́кирэ тэрныпнаскирэ, и сыр дро дывэ́с, ке́ли ёй гия́ криг Египто́скирэ пхувья́тыр.16. И явэ́ла адя́кэ пэ дро дова́ дывэ́с, – ракирэ́ла Рай Дэвэ́л, – ‘со ту явэ́са тэ кхарэс Ман: ‘Миро ром,’ и ту на явэ́са буты́р тэ кхарэс Ман ‘Ваали’,17. пал-дова́ со Мэ кэра́ва адя́кэ, со ла́кирэ ушта́ буты́р на явэ́на тэ пхэнэ́н лава́ Ваалэнгирэ, и кадалэ́ кхарибэна (лава́) буты́р на явэ́на тэ рипирэнпэ пэ годы́ манушэ́нгирэ Израилёстыр.18. Пэ дова́ дывэ́с Мэ чхува́ва завето ваш лэ́нгэ фэлдытконэ мурдалэ́нца (зверенца), болыбнытконэ чирикленца и цапненца (ползучонэ джидыпнэнгэ), савэ́ ползынэна пир пхув. И Мэ пхагирава лу́ко и курта́ла, соб (кай) ёнэ тэ на явэ́н пэ доя́ пхув, и Мэ кэра́ва адя́кэ, соб (кай) ёнэ тэ пасён би дара́киро, и соб (кай) тэ на явэ́л марибэ́н.19. И Мэ ява́ва тэ ангрустынав (обрэнчынава) тут Ма́нца усады (сак); и Мэ ангрустынава (обрэнчынава) тут Ма́нца пир чачипэ́н и чачуно́ сэ́ндо, и пир дро́го лачхипэ́н, и пир лачхэ́-илы́ткима;20. и Мэ ангрустынава (обрэнчынава) тут Ма́нца, со ту явэ́са патяибны́тко кэ Мэ, и Ту явэ́са тэ джинэ́с Ман, Рас-Дэвлэ́с.21. И явэ́ла адя́кэ дро дова́ дывэ́с, со Мэ ушунава [отпхэнава-ю.о.], – ракирэ́ла Рай Дэвэ́л, – и Мэ шунава болыбэ́н, и ёв явэ́ла тэ шунэ́л пхув.22. Пхув шунэла и дэ́ла гив (маро́), и мол (вино), и дзэт (елеё), и адалэ́ ушунэна Изреелёс [Израилёскэ-ю.о.].Psalms 138:4-64. Сарэ́ кра́лья пэ пхув явэ́на тэ вышарэн Тут, о Раё Дэ́вла, пал-дова́ со ёнэ шундлэ́ лава́, со Ту пхэндя́н.5. И ёнэ явэ́на тэ бага́н пал Ра́скирэ-Дэвлэ́скирэ дрома́, пал-дова́ со Раскири-Дэвлэ́скири сла́ва исын вучы.6. Мэк Рай Дэвэ́л исын вучэ́с, нэ Ёв дыкхэ́ла тэлэ́ пэ одолэ́ндэ, савэ́ кандэ́на Лэс, а пхутькирдэс Ёв пинджкирэла дурипнастыр.Proverbs 29:17-1717. Сыкля́кир кэ дукха́ чхавэ́с, и ёв дэ́ла ту́кэ откхиныбэн, и ёв обрадынэла тыро́ ди.1 Jan 3:1-241. Дыкхэ́н! Сави́ бари ра́дыма дыя́ амэ́нгэ Дад, соб (кай) тэ кхарэ́н амэн Дэвлэ́скирэ чхаворэнца. Палдава́ свэ́то на джинэ́ла тумэн, пал-дова́ со на приґалыя Лэс.2. Дро́га мирэ́! Амэ сам какана́ Дэвлэ́скирэ чхавэ́, нэ ишчо (инкэ́) на сыкадыя́ амэ́нгэ, савэ́ амэ ява́са анги́л. Амэ екх джина́са, со ке́ли Христо́со сыкадёла, амэ ячасапэ кадасавэ́-паць, сыр Ёв исын, пал-дова́ со амэ ява́са тэ дыкхас, саво́ Ёв явэ́ла.3. И кажно ману́ш, конэ́стэ исын наде́я пэ Лэ́стэ, выжужакирэ́ла (вычыстинэла) пэс, пал-дова́ со Христо́со исын жужо́.4. Кажно (сва́ко) ману́ш, кон кэрэ́ла грэ́хи, кэрэ́ла проти Дэвлэ́скиро Зако́но; и грэ́хо исын дова́, ке́ли пхагирэна Зако́но.5. И тумэ́ джинэ́на, со Ёв явдя́ ваш дова́, соб (кай) тэ лэл амарэ́ грэ́хи, и со нанэ грэ́хо дрэ Лэ́стэ.6. Кажно ману́ш, кон дживэ́ла дро екхипэ́н Исусо́са, на кэрэ́ла грэ́хи, а кажно, кон кэрэ́ла грэ́хи, кодова́ ману́ш на дыкхця́ Лэс и на приґалыя Лэс.7. Бияторалэ! Мэк нико́н тэ на лыджа́л тумэн дро блэ́ндо. Кон кэрэ́ла пир чачипэ́н, одова́ исын кадасаво́ чачуно́, сыр Ёв исын чачуно́.8. Кодова́, кон кэрэ́ла грэ́хи, исын налачхэстыр, пал-дова́ со на́лачхо кэрдя́ грэ́хи англыпна́стыр. Ваш дава́ и явдя́ Дэвлэ́скиро Чхаво́, соб (кай) тэ пхаравэл налачхэскирэ бутя́.9. Кажно ману́ш, саво́ яця́ Дэвлэ́скирэ чхавэ́са, на кэрэ́ла буты́р грэ́хи, пал-дова́ со Дэвлэ́скири зя́рка исын дрэ Лэ́стэ, и ёв на могинэ́ла тэ кэрэ́л грэ́хи, пал-дова́ со Дэвэ́л яця́ лэ́скирэ Дадэ́са.10. Ѓа́да, сыр Дэвлэ́скирэ чхавэ́ и налачхэскирэ чхавэ́ исын бицялэ: кажно (сва́ко), кон кэрэ́ла на пир чачипэ́н, одова́ нанэ Дэвлэ́стыр и адя́кэ-паць, сыр кодова́, кон на кэрэ́ла паты́в пэ́скирэ пшалэ́скэ.11. Палдава́ дасави́ исын мавлы́н (малва), сави́ амэ шундя́м англыпна́стыр, соб (кай) амэ тэ дас паты́в екх екхэ́скэ,12. нэ на адя́кэ, сыр Каино, саво́ сыс налачхэстыр и саво́ замардя́ (мулякирдя́) пэ́скирэ пшалэ́с. Пал со ж ёв замардя́ лэс? Пал-дова́ со лэ́скирэ рэ́нды сыс фуй, а лэ́скирэ-пшалэ́скирэ рэ́нды сыс чачунэ́.13. На дивинэн, пша́ла мирэ́, ко́ли мануша́ свэто́стыр явэ́на тэ бидыкхэн (тэ ненавидинэн) тумэн.14. Амэ джина́са, со амэ пиригиям мэрибна́стыр дро джиибэ́н, пал-дова́ со амэ даса паты́в пшалэ́нгэ. Кон на дэ́ла паты́в пшалэ́скэ, кодова́ исын ишчо (инкэ́) тэл мэрибнаскири зор.15. Кажно (сва́ко) ману́ш, кон на дэ́ла паты́в пэ́скирэ пшалэ́скэ, исын замарибнари (умарибнари), а тумэ́ джинэ́на, со ни екхэ замарибнарискэ на явэ́ла ве́чно джиибэ́н.16. Амэ уджинаса пшалы́тко паты́в дро дава́, со Христо́со отдыя́ Пэ́скиро джиибэ́н пал амэ́ндэ; и амэ сам бангэ́ тэ отдас пэ́скиро джиибэ́н пал пшалэ́ндэ.17. А ко́ли вари-конэ́стэ исын саро́, со трэй ваш джиибэ́н дро дава́ свэ́то, а ёв дыкхэ́ла, со лэ́скирэ пшалэ́скэ трэй вари-со ваш джиибэ́н и ёв зачхакирэла пэ́скиро ило́ лэ́стыр, тэды сави́ жа исын Дэвлэ́скири ла́ска дрэ Лэ́стэ?18. Бияталэ, ява́са тэ дас паты́в на лавэ́са ци чиба́са, а рэндоса (делоса) и чачипна́са.19. И пир дава́, сыр амэ кэра́са, амэ уджинаса, со амэ сам чачипнаскирэ и штылякираса амарэ́ илэ анги́л Лэ́стэ;20. пал-дова́ со, ко́ли амаро́ ило́ ракирэ́ла маму́й проти амэ́ндэ, тэды Дэвэ́л джинэ́ла саро́, пал-дова́ со Ёв исын бутэды́р илэ́стыр, и Ёв джинэ́ла саро́.21. Дро́га мирэ́! Ко́ли амаро́ ило́ на ракирэ́ла маму́й проти амэ́ндэ, тэды амэ́ндэ исын муршыпэн тэ рисёвас кэ Дэвэ́л.22. И со амэ тэ на помангас Лэ́стыр, явэ́ла дыно́ амэ́нгэ, пал-дова́ со амэ ракхаса Лэ́скирэ припхэныбэна́ и кэра́са дова́, со исын пир ило́ Дэвлэ́скэ.23. А припхэныбэ́н Лэ́скиро исын дасаво: соб (кай) амэ тэ патяс дро лав Лэ́скирэ-Чхавэ́скирэ, Исусо́скирэ Христосо́скиро, и соб (кай) тэ дас паты́в екх екхэ́скэ, сыр Ёв припхэндя́ амэ́нгэ.24. И кон ракхэ́ла Лэ́скирэ припхэныбэна́, одова́ дживэ́ла дро екхипэ́н Лэ́са, и Дэвэ́л исын дро екхипэ́н Лэ́са. И дова́, со Дэвэ́л дживэ́ла дро екхипэ́н Лэ́са, амэ уджинаса пир Ду́хо (Фа́но), Саво́ Ёв дыя́ амэ́нгэ. Romani Bible Baltic 2019 Maintained by the United Bible Societies for the Baltic Romani Mission