Bible in one year
December 6

1. И пхэндя́ Рай Дэвэ́л ма́нгэ: “Джа́ нэвэ́стыр, кам джувля́, сави́ исын камлы (пирамни) ромны́ ромэстэ, нэ сави́ камэ́ла и явирэ муршэ́н. Нэ ту кам ла, адя́кэ-паць, сыр Рай Дэвэ́л сыкавэ́ла ла́ска чхаворэнгэ Израилёскирэнгэ, савэ́ дыкхэ́на пал явирэ дэвлорэндэ и выкэдэна марикля зюмоса, со пэкэна лэ́нгэ Наюды́тка на́цыи.
2. Ѓа́да, мэ киндём ла ваш пэ́скэ пал дэшупандж шэ́кели руп, и пал екх пашэ́са хомеро ґэрсто (ячменё).”
3. И пхэндём мэ ла́кэ: “Ту ячэсапэ ма́нца бут дывэса́; и ту буты́р на явэ́са тэ камэс явирэ муршэ́н, и ту на явэ́са буты́р никонэскири, и мэ ява́ва кадасаво́-паць ваш ту́кэ.”
4. Пал-дова́ со чхавэ́ Израилёскирэ ячэ́напэ бут дывэса́ би крали́скиро, би тхагари́скиро, би свэнтонэ́-дыибна́скиро, би обсвэнцындлэ́-стылбо́скиро, би эфодо́скиро, би терафимо́скиро.
5. Пало́ (после) дава́ чхавэ́ Израилёскиро рисёна, и ёнэ явэ́на тэ родэ́н Рас-Дэвлэ́с, лэ́нгирэ Дэвлэ́с, и лэ́нгирэ крали́с Давидо́с: и ёнэ явэ́на тэ дарэ́н Ра́стыр-Дэвлэ́стыр и тэ рисён кэ Лэ́скиро лачхипэ́н дрэ палатунэ́ (последня) дывэса́.
1. Шунэ́н лав, Ра́скирэ-Дэвлэ́скиро, чхавэ́ Израилёскирэ, пал-дова́ со Рай Дэвэ́л бангякирэла манушэ́н, кон дживэ́ла пэ доя́ пхув: ‘Нанэ патяибэ́н, нанэ лачхипэ́н, и нанэ джиныбэ́н пал Дэвлэ́стэ пэ кодоя пхув.
2. Мануша́ совлахана, хохавэна, мулякирэна, и чорэна, мурша́ и джувля́ кэрэ́на биладжакунэ́ рэ́нды, ёнэ пхагирэна сарэ́ меры, и манушэ́нгиро рат чхувэ́лапэ екх пал екх.
3. Палдава́ пхув явэ́ла тэ тугинэл зоралэ́с, и кажно (сва́ко) ману́ш, кон дживэ́ла пэ ла́тэ, явэ́ла тэ хасёл (тэ пропэрэл) кхэтанэ́ фэлдытконэ мурдалэ́нца (зверенца), болыбнытконэ чирикленца, адя́кэ-паць и мачхэ́ морёскирэ (дэрьявэ́скирэ) хасёна.”
4. Соб (кай) ние́кх ману́ш тэ на лыджа́л чинга́рд явирэса, ци тэ на выракирэл явирэскэ, пал-дова́ со тумарэ́ мануша́ исын сы́рбы кодолэ́, савэ́ лыджа́на чинга́рд (чингардэнапэ) раша́са.
5. Тумэ́ явэ́на тэ обштавэнпэ дывэсэ́, и проро́ко адя́кэ-паць обштавэлапэ тумэ́нца раты́: и Мэ хасякира́ва тумарья да.
6. Мирэ́ мануша́ хасёна пир дова́, со лэ́ндэ на ухтылэ́ла (на́доси) джиныбэ́н Нэ пал-дова́, со тумэ́, рашаялэ, отпхэндлэпэ джиныбнастыр, Мэ адя́кэ-паць отпхэнава тумэ́нгэ, соб (кай) тумэ́ буты́р тэ на явэ́н сыр рашая́ анги́л Ма́ндэ, и пир дова́, со, тумэ́ бистырдэ Дэвлэ́скиро Зако́но, Мэ бистрава тумарэ́ чхаворэ́н (биятэ́н).
7. Со бутэды́р исын рашая́, то бутэды́р ёнэ кэрэ́на грэ́хи проти Ма́ндэ, и Мэ рискира́ва лэ́нгиро барипэ́н дрэ ладж.
8. Ёнэ чалякирэнапэ Мирэ́-манушэ́нгирэ грэхэ́нца, со янэ́на Мирэ́ мануша́, а лэ́нгиро ило́ тырдэлапэ кэ кэрэ́л чорипэ́н.
9. И явэ́ла адя́кэ: со явэ́ла манушэ́нца, дова́-паць явэ́ла рашанца. И Мэ пхарэ́с сэндякирава лэн пал дова́, со ёнэ кэрдэ́, и Мэ отда́ва палэ пал лэ́нгирэ рэ́нды (де́лы).
10. Ёнэ явэ́на тэ хан, нэ ёнэ на явэ́на чалэ, ёнэ явэ́на тэ кэрэ́н ладжакунэ рэ́нды (де́лы), нэ ёнэ на розбарьёнапэ, пал-дова́ со ёнэ пириячнэ тэ кандэ́н Рас-Дэвлэ́с.
11. Биладжаипэ́н, мол (вино), нэви́ бравинта [напитко-р.с.] – ґа́да, со исын лэ́ндэ пэ ило́ тэ кэрэ́н.
12. Мирэ́ мануша́ пхучэна каштунэ идолэндыр, соб (кай) тэ дэн годы́ лэ́нгэ, и лэ́нгиро дэсто́ сы́рбы пхэнэ́ла лэ́нгэ, со тэ кэрэ́н. Биладжакуно ду́хо (фа́но) лыджа́ла адя́кэ, со ёнэ дэнапэ дукха́, и ёнэ гинэ́ тэ кэрэ́н биладжакунэ́ рэ́нды и дуринэ Ма́ндыр, лэ́нгирэ Дэвлэ́стыр.
13. Ёнэ янэ́на свэ́нта дыибэна́ пэ вучипэна́ бэргакирэ (фэли), и ёнэ тхувалякирэна дрогонэ́ смолэнца пэ бэ́ргицы, тэл дэмбы, тэл тополи, и тэл тэрэбинто пир дова́, со лэ́нгири зэр (засенка) исын бари, палдава́ лэ́нгирэ чхая́ кэрэ́на биладжаипэ́н и лэ́нгирэ борья камэ́на явирэ муршэ́н.
14. Мэ на ява́ва пхарэ́с тэ сэндякирав лэ́нгирэ чхае́н, ко́ли ёнэ кэрэ́на биладжаипэ́н и лэ́нгирэ борьен, ко́ли ёнэ камэ́на явирэ муршэ́н, пал-дова́ со лэ́нгирэ мурша́ кокорэ́ кхэтанякирэнапэ налачхэ́ джувле́нца, и ёнэ янэ́на свэ́нта дыибэна́ биладжакунэ́ джувле́нца, а мануша́, савэ́ на джинэ́на бут, хасёна.
15. На дыкхи́ пэ дава́, со тумэ́, Израилёскирэ мануша́лэ, кэрэ́на биладжаипэ́н, хоць бы тэ на кэрэ́н чорипэ́н Юда́скирэ мануша́. Соб (кай) ёнэ тэ на джа́н пэ Галга́ло, и тэ на ґаздэ́нпэ пэ Бер-Авен, и соб (кай) ёнэ тэ на совлахан: ‘Тэ явэ́л джидо́ Рай Дэвэ́л’
16. Палдава́ Израилёскирэ мануша́ исын пхарэ́-шэри́тка (нарта) сы́рбы пхарэ́-шэри́тко рэ́ца (тёлка) исын; акана́ сыр дава́, Мэ, Рай Дэвэ́л, ява́ва тэ чаравав лэн сы́рбы бакрорэс пэ бари фэ́лда.
17. Ефраимо (Израилё) рисия́ кэ и́долы, мэкэ́н лэс кокорэс, екхджинэс.
18. Лэ́нгиро матыбэн исын джунгало́ (брыдко), ёнэ дурэды́р кэрэ́на биладжакунэ́ рэ́нды, лэ́нгирэ тхагарьенгэ (князенгэ) трэй илэ́стыр бипатыв.
19. Балва́л учхакирэ́ла лэн пэ́скирэ пхакэнца, и ёнэ явэ́на ладжакирдэ́ лэ́нгирэ свэнтонэ́ дыибнэндыр.’
7. Ко́ли явэ́ла пхаро́ ма́нгэ сарэ́ ригэ́ндыр, Ту джидякирэса нэвэ́стыр ман: Ту динд(з)ькирэса (тырдэса) Тыро́ васт, ке́ли вэ́рги зоралэ́с холясона и Тыро́ чачо́ васт вытэрдэла ман бидатыр.
8. Рай Дэвэ́л кэрэ́ла адя́кэ, со мэ ява́ва бидошэ́нгиро: Тыри́ лачхэ́-илы́ткима, о Раё Дэ́вла, ячэ́лапэ пэ сарэ́ ве́ки; на мэк бутя́, со кэрдэ́ Тырэ́ васта́.
18. Кай нанэ сыкадыипэн упралэстыр, одо́й мануша́ на обрикирэна пэс, нэ бахтало́ исын одова́, кон рикирэ́лапэ кэ Зако́но.
1. Дро́га мирэ́! На патя́н кажнонэ́ духоскэ, а спробинэн (пропатякирэн) ду́хи, ци Дэвлэ́стыр исын ёнэ, пал-дова́ со бут хоханэ́ проро́ки явэ́на дро свэ́то.
2. Тумэ́ уджинэна Дэвлэ́скиро ду́хо (фа́но) адя́кэ: кажно ду́хо (фа́но), саво́ приґалёла Исусо́с Христосо́с, со Ёв явдя́ дро манушы́тко лоч (плоть), исын Дэвлэ́стыр;
3. а кажно ду́хо (фа́но), саво́ на приґалёла Исусо́с Христосо́с, со Ёв явдя́ дро манушы́тко лоч, нанэ Дэвлэ́стыр, дава́ исын антихристоскиро ду́хо (фа́но), пал савэ́стэ тумэ́ шундлэ́, со ёв явэ́ла и какана́ Ёв ужэ исын дро свэ́то.
4. Бияталэ (чхаворэ́)! Тумэ́ сан Дэвлэ́скирэ и пиризорьякирдэ лэн, пал-дова́ со Ду́хо (Фа́но), Саво́ дживэ́ла дрэ тумэ́ндэ, исын зоралэды́р духо́стыр, саво́ исын дро свэ́то.
5. Кадалэ́ хоханэ́ проро́ки исын свэто́стыр: ёнэ и ракирэ́на пал свэто́скирэ рэ́нды, и свэ́то шунэ́ла лэн.
6. Амэ сам Дэвлэ́скирэ: кон джинэ́ла Дэвлэ́с, одова́ шунэ́ла амэн; кон на Дэвлэ́скиро, одова́ на шунэ́ла амэн. Пир дава́ амэ уджинаса чачуно́ ду́хо (фа́но) и хохано́ ду́хо (фа́но).
7. Дро́га мирэ́! Ява́са амэ тэ дас паты́в екх екхэ́скэ, пал-дова́ со пшалы́тко паты́в исын Дэвлэ́стыр и кажно (сва́ко), кон исын лачхо́ кэ яви́р, исын Дэвлэ́скиро чхаво́ и джинэ́ла Дэвлэ́с.
8. Одова́, кон исын на́лачхо кэ яви́р ману́ш, на джинэ́ла Дэвлэ́с, пал-дова́ со Дэвэ́л исын пшалы́тко паты́в.
9. Дэвлэ́скири ла́ска кэ амэ сыс сыкады дро дова́, со Дэвэ́л бичхадя́ дро свэ́то Лэ́скирэ Екхорэ Чхавэ́с, соб (кай) амэ тэ дорэсас (тэ долас) ве́чно джиибэ́н пир Лэ́стэ.
10. Акэ, дро со пшалы́тко паты́в исын: дава́ нанэ, со амэ́нгэ яця́ дро́го Дэвэ́л, а дава́ исын, со Лэ́скэ яця́м дро́га амэ и Ёв бичхадя́ Пэ́скирэ Чхавэ́с тэ страдынэл (тэ пирилыджал пхарипэ́н) кэ мэрибэ́н пал амарэ́ грэ́хи.
11. Дро́га мирэ́! Ко́ли Дэвлэ́скэ яця́м дро́га амэ, тэды амэ́нгэ адя́кэ-паць трэй тэ дас паты́в екх екхэ́скэ.
12. Ние́кх ману́ш ние́кхвар на дыкхця́ Дэвлэ́с. Ко́ли амэ сам лачхэ́ екх кэ екх, тэды Дэвэ́л дживэ́ла дро екхипэ́н амэ́нца, и Лэ́скири ла́ска исын пхэрды́ дрэ амэ́ндэ.
13. Пир дава́ амэ уджинаса, со амэ дживаса дро екхипэ́н Лэ́са, и со Ёв исын дрэ амэ́ндэ, пал-дова́ со Ёв дыя́ амэ́нгэ Пэ́скиро Ду́хо (Фа́но).
14. И амэ дыкхцям и сам якхи́тка (якхалэ), со Дад бичхадя́ Чхавэ́с тэ зракхэ́л свэ́то.
15. Кон приґалёла, со Ису́со исын Дэвлэ́скиро Чхаво́, кодова́ ману́ш дживэ́ла дро екхипэ́н Дэвлэ́са, и Дэвэ́л исын дро екхипэ́н лэ́са.
16. И амэ уджиндям ла́ска и упатяндыям, сави́ ла́ска исын Дэвлэ́стэ кэ амэ. Дэвэ́л исын дрэ пшалы́тко паты́в кэ яви́р мануша́, и одова́ ману́ш, кон исын лачхо́ кэ яви́р, дживэ́ла дро екхипэ́н Дэвлэ́са и Дэвэ́л исын дро екхипэ́н лэ́са.
17. Пир дава́ екхипэ́н Дэвлэ́са пшалы́тко паты́в ячэ́лапэ пхэрдо́ дрэ амэ́ндэ, соб (кай) амэ́ндэ тэ явэ́л муршыпэн дро дывэ́с, ке́ли явэ́ла сэ́ндо, пал-дова́ со амэ дживаса дро дава́ свэ́то адя́кэ, сыр Христо́со дживдя́.
18. Ко́ли амэ сам лачхэ́ кэ яви́р мануша́ и амэ на дара́са ни конэ́стыр, пал-дова́ со пхэрды́ паты́в вытрадэла дар, а кон дарэ́ла, кодова́ сы́рбы ужакирэ́ла ка́ра. А кодова́, кон дарэ́ла, дрэ лэ́стэ нанэ пхэрды́ паты́в.
19. Амэ сам лачхэ́ екх кэ екх, пал-дова́ со Дэвлэ́скэ англэды́р яця́м дро́га амэ.
20. Ко́ли вари-кон пхэнэ́ла: “Ма́нгэ исын дро́го Дэвэ́л”, а кокоро́ нанэ лачхо́ кэ пэ́скиро пшал, одова́ исын хохаибнари; пал-дова́ со кон нанэ лачхо́ кэ пэ́скиро пшал, савэ́с ёв дыкхця́, на могинэ́ла тэ дэл паты́в Дэвлэ́скэ, Савэс ёв на дыкхця́?
21. И дава́ исын дасаво припхэныбэ́н, саво́ амэ́ндэ исын Христосостыр, со одова́ ману́ш, конэ́скэ дро́го исын Дэвэ́л, исын банго́ (мусинэла) адя́кэ-паць тэ явэ́л лачхо́ кэ пэ́скиро пшал.
Romani Bible Baltic 2019
United Bible Societies for the Baltic Romani Mission