Bible in one year December 7Hosea 5:1-151. ‘Шунэ́н дава́, рашая́лэ! Причхувэ́н кан, кхэр Израилёскиро! Рикирэнпэ кэ дова́, со шунэ́на, о кхэр крали́скиро! Пал-дова́ со сэ́ндо явэ́ла проти тумэ́ндэ, пир-дова́ со тумэ́ са́нас сы́рбы фэлы́ (петля) дрэ Маси́фа (Мицпа) и сы́рбы кхуды́ (сеть) пэ Фаворо.2. Ёнэ хор загинэ́ дро блэ́ндо [бунтыибнарья бут замарэна ваш свэ́нта дыибэна́-ю.о.], нэ Мэ бангякирава лэн сарэ́н.3. Мэ джино́м Ефремос, и Израилё исын на гарадо́ Ма́ндыр, и акана́, Ефре́мо, ту кэрэ́са биладжакунэ́ рэ́нды, а Израилё исын магирдо́.4. Дова́, со ёнэ кэрэ́на, на домэкэла лэн тэ рисён кэ лэ́нгиро Дэвэ́л, пал-дова́ со ду́хо (фа́но) тэ кэрэ́л биладжаипэ́н, исын машки́р лэ́ндэ, и ёнэ на джинэ́на Рас-Дэвлэ́с.5. Пхутькирибэ́н Израилёскиро тыкнякирдо дрэ лэ́нгирэ якха́ [допхэнэ́ла лэ́скирэ манушэ́нгэ дро муй-ю.о.], на дыкхи́ пэ дова́, со Израилё и Ефре́мо обштавэнапэ (пэрэ́на) дро лэ́нгиро чорипэ́н; и Юда обштавэлапэ адя́кэ-паць лэ́нца.6. Ёнэ явэ́на тэ родэ́н Рас-Дэвлэ́с лэ́нгирэ бакрэ́нгирэ стадэнца и табунэнца, нэ ёнэ на латхэ́на Лэс; Ёв рисия́ (отгия́) криг лэ́ндыр.7. Ёнэ ячкирдэ́ (парудэ) напатяибныткэс Рас-Дэвлэ́с; пал-дова́, со лэ́ндэ латхнэпэ кхэлбы (незаконна бияты): акана́ нэво́-чхонытко свэ́нко похала лэн и лэ́нгиро миштыпэ́н.8. Пхурдэ́н дро бакрано ро́го дрэ Гива́, пхурдэ́н дро ро́го (труба), дрэ Ра́ма; дэн го́дла зоралэ́с дро Беф-Авэно, дыкх жа пала́л пал пэ́стэ, о Вениамино!9. Ефремостыр ячэ́лапэ голоты́ня (чхучипэн) дро дывэ́с, сыр Мэ бангякирава лэн; машки́р ро́дыцы Израилёскирэ Мэ пхэндём, со дава́ явэ́ла чачэс.10. Тхага́рья Юда́скирэ исын сы́рбы кодолэ́, кон дурьякирдя шпэры (знаки) пэ пхув: Мэ вычхувава Миро мижэхипэн (мижэх холы́) и пэ лэ́ндэ сыр пани́.11. О Ефре́мо, притасадо, сэ́ндо пэкадя́ зоралэ́с лэс, пир-дова́, со ёв илэ́стыр лыя́ тэ псирэ́л пир манушы́тко упхэныбэ́н.12. Мэ ява́ва сы́рбы моль (мэль) ваш Ефремоскэ, и сы́рбы кирмо [кирныпэн-ю.о.] ваш кхэр Юда́скиро.13. Ке́ли Ефре́мо дыкхця́ пэ́скири дукх, и Юда дыкхця́ пэ́скиро фра́нсо (рана), тэды гия́ Ефре́мо кэ Асуро, и бичхадя́ пал крали́стэ Иаревостэ (Яревостэ), нэ ёв на дэ́ла ра́да тэ састякирэл тумэн, ци тэ драбакирэл тумэн тумарэ́ рискирдэ́ франсостыр (ранатыр).14. Пал-дова́ со Мэ ява́ва сы́рбы шчэр (ле́во) пэ Ефремостэ, и сыр тэрно́ шчэроро пэ Юда́скиро кхэр. Мэ аж роскушава лэн и джа́ва криг, и Мэ лыджа́ва криг лэн, и одо́й на явэ́ла ние́кх тэ ракхэ́л лэн.15. Мэ джа́ва криг, Мэ рисёва́ва пэ Миро штэ́то анги́л дова́, сыр ёнэ приджинэна пэ́скири банг [лэ́нгиро чорипэ́н-ю.о.] и явэ́на тэ родэ́н Миро муй: ке́ли лэн притасавэ́на, ёнэ явэ́на добусо́вэс тэ родэ́н Ман.Hosea 6:1-111. Дрэ смэнтныма пэ́скири ёнэ пэ зло́ко (ра́нко) явэ́на тэ родэ́н Ман и тэ ракирэ́н: ‘Явэ́н, и рисёваса амэ кэ Рай Дэвэ́л: пал-дова́ со Ёв дукхадя, и Ёв састякирэла амэн; Ёв пэкадя́ амэн, и Ёв пирипхандэла амарэ́ фра́нсы (раны).2. Пало́ дуй дывэса́ Ёв джидякирэла амэн; пэ три́то дывэ́с Ёв чхувэ́ла пэ ґэра́ амэн, соб (кай) амэ́нгэ тэ джива́с анги́л Лэ́скиро дыкхибэ́н.3. Амэ́нгэ трэй тэ джинас буты́р, амэ́нгэ трэй тэ причхувас тэ джинас буты́р Рас-Дэвлэ́с, Лэ́скиро явибэн явэ́ла сыр зло́ко, Ёв явэ́ла сыр брышы́нд, сыр ґаратуно брышы́нд (позднё), со панякирэла пхув.’4. ‘О, Ефремэ, со Ма́нгэ тэ кэра́в ту́са? О, Юда, со Ма́нгэ тэ кэра́в ту́са? Пал-дова́ со тумари́ паты́в кэ Мэ исын сы́рбы туча пэ зло́ко (ра́нко), и сы́рбы пахлын (роса) пэ зло́ко, сави́ сыг хасёла (проджа́ла).5. Палдава́ Мэ вычингиравас лэн пир пророкэ́ндэ, Мэ мулякиравас лэн Мирэ́ лавэ́нца; и Миро сэ́ндо пэ лэ́ндэ явэ́ла сы́рбы дуд (свэ́то), со ґаздэ́лапэ.6. Пал-дова́ со Ма́нгэ исын древа́н пир ило́ лачхэ́-илы́ткима, а на свэ́нто дыибэ́н, и джиныбэ́н пал Ма́ндэ, Дэвлэ́стэ, буты́р, сыр цэ́ло схачкирибэ́н.7. Нэ ёнэ сыр Адамо пхагирдэ́ Завето; одо́й ёнэ ячадэ хоханэ́с Ман.8. Галаа́до исын фо́ро, дро саво́ дживэ́на бибахталэ́, и ёв исын магирдо́ ратэ́са.9. Сыр розмарибнарья [розмарибнытко шайка-ю.о.], кон подракхэла манушэ́с тэ замарэ́л, адя́кэ-паць и кампания рашангири запасёла тэ замарэ́л пир дром кэ Сехэмо; чачэс, ёнэ кэрэ́на стэтка (джунгалэ́) рэ́нды.10. Дро кхэр Израилёскиро Мэ дыкхцём трашано: одо́й кэрэ́лапэ Ефрамоскиро биладжаипэ́н; Израилё исын магирдо́.11. Адя́кэ-паць, ваш ту́кэ, Юдэ, сыкадо дывэ́с ваш гивэнгиро счхиныбэн, ке́ли Мэ рискира́ва Мирэ́ – манушэ́нгирэ пленонэн.Psalms 139:1-61. Хоро́скирэ Дирижоро́скэ. Давидо́скиро Пса́лмо. О, Раё Дэ́вла, Ту роздыкхцян лачхэ́с ман, и Ту джинэ́са ман.2. Ту джинэ́са, ке́ли мэ бэшава и уштава; ту ґалёса дурипнастыр, со мэ думинава.3. Ту дыкхэ́са пирда́л (скрозь) миро дром и миро пасибэн и сарэ́ мирэ́ дрома́ исын джиндлэ́ Ту́кэ;4. пал-дова́ со ишчо (инкэ́) нанэ лав пэ мири́ чиб, соб (кай) Ту акана́ тэ на джинэсас миштэ́с лэс.5. Ту облыян ман пала́л и анги́л, и Тыро́ васт исын чхудо пэ ма́ндэ.6. Дасаво Тыро́ джиныбэ́н пал ма́ндэ дивинэла ман, дава́ исын вучо́ годыпэ́н, мири́ годы́ на доджа́ла кэ дава́.Proverbs 29:19-1919. Ту на высыклякирэса писхари́с пал доша (промэкибэна) лавэ́нца, мэк ёв и ґалёла, нэ усае́кх ёв на явэ́ла тэ кандэл.1 Jan 5:1-211. Кажно (сва́ко) ману́ш, кон патя́ла, со Ису́со исын Христо́со (Месия), исын Дэвлэ́скиро чхаво́, и кажно ману́ш, конэ́скэ исын дро́го Дад, лэ́скэ адя́кэ-паць исын дро́го Лэ́скиро Чхаво́.2. Пир дава́ амэ уджинаса, со амэ́нгэ исын дро́га Дэвлэ́скирэ чхавэ́: ко́ли амэ рикираса сыр Дро́гима дро ило́ Дэвлэ́с и кэра́са пир Лэ́скирэ припхэныбэна́.3. И амари́ паты́в и ило́ кэ Дэвэ́л исын кадасавэ́; соб (кай) амэ тэ ракхас Лэ́скиро припхэныбэ́н. И Лэ́скирэ припхэныбэна́ исын напхарэ.4. Пал-дова́ со кажно ману́ш, кон исын Дэвлэ́скиро чхаво́, пиризорьякирэла свэ́то. И амэ пиризорьякираса дава́ свэ́то амарэ́ патяибна́са.5. Кон исын кодова́, саво́ пиризорьякирэла свэ́то: ґа́да (акэ), исын одова́, кон патя́ла, со Ису́со исын Дэвлэ́скиро Чхаво́.6. Дава́ исын Ёв, Ису́со Христо́со, Саво́ явдя́ пане́са, ке́ли Ёв болдяпэ: и ратэ́са, ке́ли Ёв мыя́. Ёв явдя́ на фэ́ни (то́ка) пане́са, нэ пане́са и ратэ́са. И Ду́хо (Фа́но) Кокоро́ допхэнэ́ла пал дава́, пал-дова́ со Ду́хо (Фа́но) исын чачипэ́н.7. Палдава́ исын трин якхи́тка пэ болыбэ́н:8. Дад, Лав и Свэ́нто Ду́хо (Фа́но), и адалэ́ трин исын сыр екх допхэныбэ́н.9. И ко́ли амэ приласа манушы́тко допхэныбэ́н, тэды Дэвлэ́скиро допхэныбэ́н исын зоралэды́р, пал-дова́ со Дэвэ́л допхэнэ́ла пал Пэ́скирэ Чхавэ́стэ.10. Кон патя́ла дрэ Дэвлэ́скирэ Чхавэ́стэ, кодолэстэ исын допхэныбэ́н дро пэ́скиро ило́. А кон на патя́ла Дэвлэ́скэ, одова́ кэрдя́ Лэс Хохаибнариса, пал-дова́ со ёв на упатяндыя дро допхэныбэ́н, савэ́са Дэвэ́л допхэнэ́ла пал Пэ́скирэ Чхавэ́стэ.11. Дава́ допхэныбэ́н исын дро дова́, со Дэвэ́л дыя́ амэ́нгэ ве́чно джиибэ́н и дая́ джиибна́скири ґанынгори исын дрэ Лэ́скирэ Чхавэ́стэ.12. Конэ́стэ исын Чхаво́, кодолэстэ исын дава́ джиибэ́н; конэ́стэ нанэ Дэвлэ́скирэ Чхавэ́с, кодолэстэ нанэ джиибэ́н.13. Далэ́ чачипэна́ мэ чхиндём тумэ́нгэ, кон патя́ла дро Дэвлэ́скирэ-Чхавэ́скиро лав, соб (кай) тумэ́ тэ джинэ́н, со тумэ́ндэ исын ве́чно джиибэ́н.14. И ґа́да, исын муршыпэн, саво́ исын амэ́ндэ дрэ Дэвлэ́стэ, со ко́ли амэ мангаса вари-со пир Лэ́скири во́ля, Ёв шунэ́ла амэн.15. И ко́ли амэ джина́са, со Ёв шунэ́ла амэн, пал со амэ мангаса, амэ джина́са и дова́, со Ёв кандэ́ла амаро́ мангипэ́н, ке́ли амэ мангдям Лэс.16. Ко́ли вари-кон бидыкхэла пэ́скирэ пшалэ́с, саво́ кэрэ́ла грэ́хо на кэ мэрибэ́н, мэк ёв тэ мангэ́лпэ Дэвлэ́скэ, и Ёв дэ́ла одолэ́скэ джиибэ́н. Дава́ исын ваш одолэ́нгэ, кон на кэрэ́ла грэ́хо кэ мэрибэ́н. Нэ исын грэ́хо кэ мэрибэ́н: и мэ на ракира́ва пал дава́, соб (кай) ёв тэ мангэ́лпэ Дэвлэ́скэ пал дасаво грэ́хо.17. Кажно хохаибэ́н исын грэ́хо, нэ исын грэ́хо, саво́ исын на кэ мэрибэ́н.18. Амэ джина́са, со кажно ману́ш, кон исын Дэвлэ́скиро чхаво́, на кэрэ́ла грэ́хи, нэ кон исын Дэвлэ́скиро чхаво́, кодова́ ракхэ́ла пэс, и на́лачхо на чилавэ́ла лэс.19. Амэ джина́са, со амэ сам Дэвлэ́скирэ, и со саро́ свэ́то исын тэл налачхэскири зор.20. Амэ джина́са, со Дэвлэ́скиро Чхаво́ явдя́ и дыя́ амэ́нгэ годы́, соб (кай) амэ тэ уджинас, кон исын чачуно́ Дэвэ́л, и соб (кай) амэ́нгэ тэ явас дро екхипэ́н чачунэ́ Дэвлэ́са, Лэ́скирэ Чхавэ́са, Исусо́са Христосо́са. Дава́ исын чачуно́ Дэвэ́л и ве́чно джиибэ́н.21. Чхаворалэ! Ракхэ́н пэс идолэндыр. Ами́нь. Romani Bible Baltic 2019 Maintained by the United Bible Societies for the Baltic Romani Mission