Bible in one year - Пэ Балтитко Романи чиб

Bible in one year December 9

1. На ра́дынпэ древа́н (бут), Изра́иле кэ вучипэ́н, сыр яви́р манушы́тка на́цыи (народы), пал-дова́ со ту дуриян тырэ́ Дэвлэ́стыр пир биладжакунэ́ рэ́нды (де́лы). Ту́кэ яця́ пир ило́ плэскирибэн пал биладжаипэ́н пэ кажно шу́рна (гумно).

2. Шурна гиваобкэрибнаскири и пресо на чалякирэна лэн, и нэви́ мол / со́ко (хум) хохавэла лэн.

3. Ёнэ на явэ́на тэ дживэ́н пэ пхув Ра́скирэ-Дэвлэ́скири, а Ефре́мо рисёла палэ кэ Еги́пто, и ёнэ явэ́на тэ хан нажужэ́ хабэна дрэ Асирия.

4. Ёнэ на явэ́на тэ чхувэ́н ваш Ра́скэ-Дэвлэ́скэ мол (вино) сыр свэ́нто дыибэ́н, адя́кэ-паць и лэ́нгирэ свэ́нта яныбэна́ на явэ́на лачхэ́ Лэ́скэ: ёнэ явэ́на сыр маро́ пэ гараибэн, и сарэ́, кон ха́ла, лэс, явэ́на магирдэ́. Дава́ маро́ явэ́ла екх лэ́нгэ тэ явэ́н чалэ, нэ ёв на явэ́ла ваш Кхэр Ра́скирэ-Дэвлэ́скиро.

5. Со явэ́на тумэ́ тэ кэрэ́н дро дывэ́с, ке́ли трэй тэ явэ́л скэдыибэ́н, дро дывэ́с свэнкитко Ра́скирэ-Дэвлэ́скиро?

6. Пал-дова́ со, акэ, ёнэ джа́на криг, сыр явэ́ла хасибэ́н. О Еги́пто кэдэла лэн кхэтанэ́; О Мемфисо явэ́ла тэ гаравэл лэн. Цукнуда (стрекава) лэ́ла лофо пэ лэ́нгирэ рупувэ́ барвалыпэна (кучипэна); а пхусадытка хру́сты явэ́на дрэ лэ́нгирэ ша́тры.

7. Явнэ́ дывэса́ тэ дыкхэ́н лэн, явнэ́ дывэса́ ваш сэ́ндо: ту, Израиле, явэ́са тэ джинэ́с пал дава́! О магико исын на барэ-годя́киро; а ману́ш, саво́ россэндякирэлас дро ду́хо (фа́но), исын бигодякиро, пир дова́, со древа́н хор исын тыро́ чорипэ́н, и древа́н зорало́ исын тыро́ намалыпэн (врогима).

8. Ци исын Ефремостэ ракхибнаскиро (стражо) тэ дыкхэ́л пал явирэндэ пала́л мирэ́ Дэвлэ́стэ? Нэ лэ́скиро проро́ко исын сы́рбы фэлы́ чириклэ-ухтылыбнаскирэстэ (птицэловстэ) пэ сарэ́ лэ́скирэ дрома́, и исын сы́рбы кхуды́ (сетка) дро кхэр лэ́скиро Дэвлэ́скиро.

9. Ёнэ хор пынэ́ дро биладжаипэ́н, сыр дрэ дывэса́ Гивакирэ. О Дэвэ́л явэ́ла тэ рипирэл лэ́нгиро чорипэ́н, Ёв явэ́ла пхарэ́с тэ сэндякирэ́л пал лэ́нгирэ грэ́хи.

10. Мэ латхём тут, о Израиле, сы́рбы винаграды́тко (дракхитко) мура пэ чхучи́ (пусто) фэ́лда; Мэ дыкхцём тумарэ́ дадэн сы́рбы пэ́рва баритка (пло́ды) пэ инжыритко дрэ́во дро пэ́скиро пэ́рво сезоно. Нэ ке́ли ёнэ гинэ́ кэ Ваалфегоро, тэды ёнэ отдынэ́ пэс ладжаипнаскэ; ёнэ ячнэ́ джунгалэ́ сы́рбы и́долы, со ёнэ камлэ́.

11. Ефремоскиро барипэ́н, сыр чириклы вурняла криг – на явэ́ла ни бияныпэ́н, ни пхарипэ́н, нанэ ни кхабныпэн (зачатиё).

12. На дыкхи́ пэ дава́, со ёнэ барьякирэна пэ́скирэ чхаворэ́н (биятэ́н), нэ Мэ ла́ва криг лэн кэ палатуно́ (последнё) манушоро. Чачо́, би́да пэрэ́ла пэ лэ́ндэ, ке́ли Мэ отджава (дурьёвава) лэ́ндыр!’

13. Нэ адя́кэ-паць мэ, Осия, дыкхцём Ефремос, саво́ сыс сыр Ти́ро, саво́ сыс почхудо пэ шука́р штэ́то. Нэ Ефре́мо лыджа́ла анги́л пэ́скирэ биятэ́н тэ замарэ́н лэн.

14. Дэ лэ́нгэ, Раё Дэ́вла, – дова́, со Ту дэ́са? Дэ лэ́нгэ лочови́/ джувля́ бичхаворэнгирья, и шукэ́ цюця!’

15. Рай Дэвэ́л ракирэ́ла: ‘Саро́ лэ́нгиро фуипэ́н исын дро Галга́ло, пал-дова́ со одо́й Мэ лыём зоралэ́с тэ на вырикирав лэн: пир дова́ фуипэ́н, со ёнэ кэрдэ́, Мэ традава криг лэн Мирэ́ кхэрэ́стыр, Мэ на ява́ва буты́р тэ прилав лэн. Лэ́нгирэ сарэ́ тхага́рья (кня́зи) бунтынэна.

16. Ефремо́скирэ мануша́ исын дукхадэ: лэ́скирэ ко́рни (рукха́) вышутинэ, ёнэ на дэ́на пхаба́. Чачо́, лэ́ндэ буты́р на явэ́на чхаворэ́, Мэ мулякирава дрогонэ́ биятэ́н лэ́нгирэ лочовя́тыр (утробатыр).

17. Миро, Осияскиро Дэвэ́л, чхувэ́ла лэн криг Пэ́стыр, пал-дова́ со ёнэ на кандынэ́ Лэс; и ёнэ явэ́на псирибна́скирэ мануша́ (скитальцы) машки́р Наюды́тка на́цыи (народы).

Hosea 10:1-15

1. Израилё исын пышно винаграды́тко кашторо, саво́ бутэды́р янэ́ла му́ри пэ́скэ. Со бутэды́р ёв дэ́ла му́ри, то бутэды́р ёв кэрэ́ла алта́ри; со фэдэды́р ячэ́лапэ лэ́скири пхув, то ёнэ бутэды́р гожакирэна (шукарьякирэна) сты́лбы вычхудэ́ муенца / патренца (образэнца).

2. Лэ́нгиро ило́ росчхудо пэ паш, акана́ Рай Дэвэ́л пхагирэ́ла тэлэ́ лэ́нгирэ алта́ри (жэ́ртва), Ёв пхагирэ́ла пэ котэра́ лэ́нгирэ сты́лбы вычхудэ́ муенца / патренца (образэнца).

3. Пал-дова́ со акана́ ёнэ ракирэ́на: ‘Амэ́ндэ нанэ Кра́ли, пал доваа со амэ на дарандыям Ра́стыр-Дэвлэ́стыр. Ко́ли тэ явэ́л кра́ли амэ́ндэ, со ёв кэрэ́ла амэ́нгэ?’

4. Ёнэ ракирэ́на хартытка (пуста) лава́, хоханэ́с совлахана, ке́ли счхувэна завето. Палдава́ пхаро́ сэ́ндо ґаздэ́лапэ пэ лэ́ндэ сы́рбы трутитко чар (ядовито), со исын пэ лесьни (борозны) фэлдэнгирэ.

5. Мануша́, кон дживэ́ла кэ Сама́рия, дарэ́на вычхиндлэ́ гуруворэстыр Беф-Авеностыр. Лэ́нгирэ мануша́ тугинэна зоралэ́с пал лэ́ндэ, и лэ́нгирэ биладжакунэ́ рашая́ явэ́на тэ тринскирэнпэ пал лэ́ндэ, пал лэ́нгиро барипэ́н, саво́ ячкирдя́ лэн.

6. Кадава́ идоло кокоро́ явэ́ла лыджино кэ Асирия, сыр да́ро крали́скэ Иаревоскэ (Яревоскэ); нэ Ефремос обухтылэла ладж, и Израилё явэ́ла ладжакирдо́ годэ́ лавэ́стыр, пал саво́ ёнэ гинэ́.

7. Нэ со ракирэлапэ пал Сама́рия, то ла́киро кра́ли хасёла криг сы́рбы пена/вэткица упра́л пэ тхадунэ панинга́.

8. И адя́кэ-паць явэ́на розмардэ пэ котэра́ вучэ́ штэ́ты пэ Авено, грэ́хо Израилёскиро. Хру́сты сувьенца и жылта хру́сты пхусаденца выбарьёна пэ лэ́нгирэ алта́ри; ёнэ пхэнэ́на бэргэнгэ: ‘Чхакирэн амэн,’ и бэргицэнгэ: ‘Пэрэн пэ амэ́ндэ.’

9. О, Израилё Тырэ́ манушэ кэрдэ́ буты́р грэ́хи сыр и дро долэ́ дывэсэ́ дрэ Гива́, – одо́й тумэ́ ячнэ́пэ. Ци со марибэ́н дрэ Гавао́но (Гива́) проти чхавэ́ндэ, савэ́ кэрэ́на чорипэ́н, на догия́ кэ ёнэ?

10. Ко́ли тэ явэ́л Миро выкэдэибэн, то Мэ высыклякирава лэн. Манушы́тка на́цыи (народы) явэ́на тэ кэдэнпэ проти лэ́ндэ, ке́ли ёнэ бангякирэна лэн пал дуе-молытко чорипэ́н.

11. О Ефреме, саво́ исын сы́рбы высыклякирды рэца (тёлка), савьякэ камэлапэ тэ штакирэл гива́, нэ Мэ чхува́ва ґа́мо пэ лэ́скири тхулы мэн: Мэ зачхувава Ефремос тэ тырдэл плуго, а Юда явэ́ла тэ пашынэл (тэ пхаравэл) пхув, а Яково явэ́ла тэ рандэл (тэ розмарэл) комки.

12. Почхувэн дрэ пхув ваш пэ́скэ пир чачипэ́н; счхинэн тэлэ́ пир лачхэ́-илы́ткима, и ґаздэ́н тумари́ напочхуды фэ́лда; пал-дова́ со исын часо тэ родэ́н Рас-Дэвлэ́с анги́л дова́, сыр Ёв явэ́ла и почхувэла чачипна́са сыр брышындэса пэ тумэ́ндэ.

13. Тумэ́ пхарадэ пхув ваш фуипэ́н, тумэ́ счхиндлэ чорипэ́н. Тумэ́ ханэ́ хохано́ баритко (пло́до), пал-дова́ со тумэ́ допатяндынэ зоралэ́с дрэ пэ́скирэ дроморэ, дро бутыпэн тумарэ́ зоралыпнаскирэ муршэндэ.

14. И ґаздэ́лапэ бу́нто машки́р тумарэ́ манушэ́ндэ, и сарэ́ тумарэ́ тва́рдыми / диз (крепости) явэ́на пхагирдэ́ – сыр Салмано пхагирдя́ Бет-Арбело дро марибны́тко дывэ́с: э дай сыс чингирды пэ котэра́ ла́кирэ биятэнца.

15. Адя́кэ кэрэ́ла тумэ́нца, о Вефи́лё, пир-дова́ со тумэ́ бут кэрдэ́ фуипэ́н.

Psalms 139:13-16

13. Пал-дова́ со Ту создыян мирэ́ андратунэ́ паша́, Ту чхудя́н кхэтанэ́ ман дрэ мирэ́-дакири лочови́.

14. Мэ ява́ва тэ парикира́в Ту́кэ, пал-дова́ со мэ сом создыно́ дивнэс кэ дар. Древа́н ди́вна исын Тырэ́ бутя́, и миро ди джинэ́ла миштэ́с дава́.

15. Мирэ́ кокалы́ на сыс ґарадэ́ Ту́тыр, ке́ли мэ бариём тэ явав пэ свэ́то дро гарадо́ штэ́то, и ке́ли ман кхувэнас дро екхипэ́н дро хор штэ́то.

16. Тырэ́ якха́ дыкхнэ́ ман, ке́ли мэ со́мас тыкно́ джидо́ и сарэ́ мирэ́ масэнгирэ паша́ сыс зачхиндлэ́ дрэ Тыри́ лылвари́; адя́кэ-паць одо́й сыс сарэ́ мирэ́ дывэса́, ке́ли ишчо (инкэ́) ни екх дывэ́с на сыс.

Proverbs 29:21-21

21. Кон бучынэла (пестинэла) пэ́скирэ дынари́с тыкнал, тэ́ньчи кадасаво́ писха́ри закамэ́ла тэ лыджа́л пэс сыр чхаво́.

3 Jan 1:1-14

1. Пхурэстыр, мирэ́ дрогонэ́ Гаёскэ, кон исын дро́го ма́нгэ чачипна́са.

2. Дро́го миро! Мэ мангавапэ Дэвлэ́скэ, соб (кай) тэ явэ́л ко́фо (польза) пэ саро́, со ту кэрэ́са, соб (кай) тэ явэс ту састо́, адя́кэ-паць сыр тыро́ ду́хо (фа́но) барьёла.

3. Пал-дова́ со мэ древа́н обрадындёмпэ, ке́ли дэвлы́тка пша́ла явнэ́ и допхэндлэ пал тыро́ чачипэ́н, сыр ту и дживэса пир чачипэ́н.

4. Ваш ма́нгэ нанэ барэды́р ра́дыма, сыр тэ шунав, со мирэ́ чхаворэ́ дживэ́на пир чачипэ́н.

5. Дро́го миро! Ту кэрэ́са патяибныткэс саро́, со кэрэ́са ваш дэвлытконэ́ пшалэ́нгэ и чужонэ́ манушэ́нгэ,

6. савэ́ допхэнэнас анги́л кхангири́ пал тыри́ пшалы́тко паты́в, ке́ли ту бичхавэсас лэн дро дром, сыр трэй и, сыр исын лачхо́ Дэвлэ́скэ, тэды ту кэрэ́са лачхэ́с;

7. пал-дова́ со ёнэ гинэ́ пал Христосо́скиро лав, ёнэ на лынэ́ нисо́ Наюдэндыр.

8. Палдава́ амэ́нгэ трэй тэ прилас шука́р адасавэ́ манушэ́н, соб (кай) амэ могинасас тэ кэра́с буты́ кхэтанэ́ ваш чачипэ́н.

9. Мэ чхиндём кхангирьякэ, нэ Диатрефо, савэ́скэ явдя́ пэ годы́ тэ явэ́л лэ́нгирэ шэралэса, на прилэ́ла дова́, со мэ чхина́ва.

10. Палдава́, ке́ли мэ ява́ва, мэ да́ва лэ́скэ тэ рипирэл пал дова́, со ёв кэрэ́ла, сыр ёв злыджала плётки пэ амэ́ндэ. Нэ ёв адя́кэ исын ґа́лко кэ дава́, со ёв и кокоро́ на прилэ́ла дэвлытконэ́ пшалэ́н, и адя́кэ-паць кэрэ́ла проти одолэ́ндэ, кон камэ́ла тэ прилэл и ишчо (инкэ́) ёв традэ́ла яври́ лэн кхангирья́тыр.

11. Миро дро́го! На яв ту адасаво́, соб (кай) тэ кэрэ́с чорипэ́н, а яв адасаво́, соб (кай) тэ кэрэ́с лачхипэ́н. Кон кэрэ́ла лачхипэ́н, одова́ исын Дэвлэ́стыр, а кон кэрэ́ла чорипэ́н, одова́ на дыкхця́ Дэвлэ́с.

12. Сарэ́ допхэнэна лачхипэ́н пал Дмитриёстэ (Митрастэ), и чачипэ́н адя́кэ-паць пал лэ́стэ; амэ адя́кэ-паць дочхуваса амаро́ допхэныбэ́н и тумэ́ джинэ́на, со амаро́ допхэныбэ́н исын чачуно́.

13. Ма́ндэ бут трэиндя́ тэ чхинав тумэ́нгэ, нэ мэ на кама́м тэ кэра́в дава́ чэрниласа́ и порэ́са;

14. нэ мэ патя́ва, со сыг мэ дыкхаво тумэн, и амэ ява́са тэ ракирас муй кэ муй.

Romani Bible Baltic 2019

Maintained by the United Bible Societies for the Baltic Romani Mission