Beblia

1. Ко́ли вари-конэ́скиро свэ́нто дыибэ́н исын ми́рно (раманёно), и, ко́ли ёв янэ́ла барэ́ кхэритконэ́ мурдалэ́ндыр (ското́стыр), муршканэ́с ци джувликанэс, мэк тэ янэл лэс Ра́скэ-Дэвлэ́скэ, тэ явэ́л ёв бидошэ́нгиро,

2. и чхувэ́ла пэ́скиро васт пэ пэ́скирэ-жэртвакиро шэро́, и зачхинэла лэс пашы́л вуда́р скэдыибна́скири ша́тра; а Аароно́скирэ чхавэ́, рашая́, побрызгинэна ратэ́са пэ алта́рё сарэ́ ригэ́ндыр;

3. и янэ́ла ёв мирнонэ жэртватыр дро свэ́нто дыибэ́н Ра́скэ-Дэвлэ́скэ ту́ко (чэкэ́н), саво́ учхакирэ́ла андратунэ́ маса́ (букорэ), и саро́ чэкэ́н (ту́ко), саво́ исын пэ андратунэ́ маса́,

4. и дуй букорэ (почки) и чэкэ́н (ту́ко), саво́ тэ явэ́л пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца (почкэнца) ёв роскэдэла дава́;

5. и Аароно́скирэ чхавэ́ схачкирэна дава́ пэ алта́рё кхэтанэ́ цэлонэ́ схачкирибнаса, саво́ исын пэ кашта́ пэ яг: дова́ исын свэ́нто дыибэ́н, гудло́ тхув, Ра́скэ-Дэвлэ́скэ.

6. А ко́ли тыкнэ́ кхэритконэ́ мурдалэ́ндыр янэ́ла ёв Ра́скэ-Дэвлэ́скэ ми́рно (раманёно) свэ́нто дыибэ́н, муршкано́ ци джувликано, мэк тэ янэл лэс, тэ явэ́л бидошэ́нгиро.

7. Ко́ли ёв янэ́ла пэ́скиро свэ́нто дыибэ́н бакрэ́ндыр, мэк тэ янэл лэс тэ явэ́л анги́л Растэ-Дэвлэ́стэ,

8. и чхувэ́ла пэ́скиро васт пэ шэро́ пэ́скирэ жэртвакиро, и зачхинэла ла анги́л скэдыибна́скири ша́тра, и Аароно́скирэ чхавэ́ побрызгинэна ла́кирэ ратэ́са пэ алта́рё сарэ́ ригэ́ндыр;

9. и мэк тэ янэл мирнонэ жэртватыр Ра́скэ-Дэвлэ́скэ дро свэ́нто дыибэ́н ла́киро чэкэ́н, саро́ курдюко, отчхины лэс пир са́мо хребтоскиро кокало, и чэкэ́н (ту́ко), саво́ заучхакирэла андратунэ́ маса́ (букорэ), и саро́ чэкэ́н, саво́ исын пэ андратунэ́ маса́,

10. и дуй букорэ (почки) и чэкэ́н, саво́ исын пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца ёв откэдэла дава́;

11. раша́й схачкирэ́ла дава́ пэ алта́рё; дава́ исын ягакиро маро́ – свэ́нто дыибэ́н Ра́скэ-Дэвлэ́скэ.

12. А ко́ли ёв янэ́ла свэ́нто дыибэ́н бузнендыр, мэк тэ янэл лэс анги́л Растэ-Дэвлэ́стэ,

13. и чхувэ́ла пэ́скиро васт пэ ла́киро шэро́, и зачхинэла ла анги́л скэдыибна́скири ша́тра, и побрызгинэна Аароно́скирэ чхавэ́ лэ́скирэ ратэ́са пэ алта́рё сарэ́ ригэ́ндыр;

14. и янэ́на лэ́стыр дро яныбэ́н, дро свэ́нто дыибэ́н Ра́скэ-Дэвлэ́скэ чэкэ́н, саво́ учхакирэ́ла андратунэ́ маса́,

15. и дуй букорэ (почки) и чэкэ́н (ту́ко), саво́ исын пэ лэ́ндэ, саво́ исын пэ стёгны, и сальнико, саво́ исын пэ кало́ буко (печонка); букорэнца (почкэнца) ёв откэдэла дава́;

16. и схачкирэ́ла лэн раша́й пэ алта́рё: дава́ исын ягакиро маро́, гудло́ тхув, Ра́скэ-Дэвлэ́скэ; а саро́ чэкэ́н Ра́скэ-Дэвлэ́скэ.

17. Дава́ исын упхэныбэ́н ве́чно дрэ тумарэ́ ро́ды, дрэ сарэ́ тумарэ́ кхэра́; ни саво́ чэкэ́н (ту́ко), и ни саво́ рат тэ на хан.

1. И пхэндя́ Рай Дэвэ́л Мойза́скэ ракири́:

2. “Пхэн Израилёскирэ чхавэ́нгэ: ко́ли саво́ ди кэрэ́ла грэ́хо на джины́ проти вари-савэ́ Ра́скирэ-Дэвлэ́скирэ припхэныбэна́ и кэрэ́ла вари-со, со нашты́ тэ кэрэ́л;

3. ко́ли помакхно раша́й кэрэ́ла грэ́хо и кэрэ́ла манушэ́н бангэнца, то тэды пал пэ́скиро грэ́хо, саво́ кэрдя́ ёв, мэк тэ янэл барэ́ кхэритконэ́ мурдалэстыр гуруво́рэс, бидошэнгирэс, Ра́скэ-Дэвлэ́скэ дро свэ́нто дыибэ́н пал грэ́хо,

4. и тэ янэл гуруво́рэс кэ шатракирэ-скэдыибнаскиро вуда́р анги́л Растэ-Дэвлэ́стэ, и чхувэ́ла пэ́скирэ васта́ пэ гуруворэскиро шэро́, и зачхинэла гуруво́рэс анги́л Растэ-Дэвлэ́стэ;

5. и лэ́ла помакхно раша́й гуруворэскиро рат, и лыджа́ла лэс дрэ скэдыибна́скири ша́тра,

6. и обмакнинэла (булавэла) раша́й пэ́скиро ангу́шт (пальцо) дро рат, и побрызгинэла ратэ́са эфта́ (битринэ́нгиро дэш) мо́лы анги́л Растэ-Дэвлэ́стэ анги́л шы́рма пэ свэ́нто штэ́то;

7. и чхувэ́ла раша́й гуруворэскиро рат анги́л Растэ-Дэвлэ́стэ пэ алтарёскирэ шынга́ ваш гудло́ тхув, саво́ исын дрэ скэдыибна́скири ша́тра, а палатуно́ гуруворэскиро рат вычхувэла тэл ґэра́ дро алта́рё ваш цэ́ла схачкирибэна, саво́ исын пашы́л скэдыибнаскиро загиибэ́н дрэ ша́тра;

8. и вылэла гуруворэстыр пал саро́ грэ́хо лэ́скиро чэкэ́н (ту́ко), саво́ учхакирэ́ла андратунэ́ маса́, и саро́ чэкэ́н, саво́ исын пэ андратунэ́ маса́,

9. и дуй букорэ (почки) и чэкэ́н, саво́ исын пэ лэ́ндэ, саво́ исын пэ стёгны, и сальнико пэ кало́ буко (печонка); букурэнца откэдэла ёв дава́,

10. сыр откэдэлапэ гуруворэстыр мирна свэ́нта дыибэна́ (жэртвы); и схачкирэ́ла лэн сарэ́ раша́й пэ схачкирибнаскиро алта́рё;

11. а гуруворэскири цы́па и саро́ лэ́скиро мас лэ́скирэ шэрэ́са и ґэрэ́нца, и лэ́скирэ андратунэ́ маса́ и лэ́скиро нажужыпэн,

12. сарэ́ гуруво́рэс мэк ёв тэ вылыджал пал ста́но пэ жужо́ штэ́то, кай вычхувэлапэ пра́ска (пепло), и схачкирэ́ла лэс яга́са пэ кашта́; кай вычхувэлапэ пра́ска, одо́й мэк тэ явэ́л ёв схачкирдо.

13. Ко́ли саро́ Израилёскиро скэдыибэ́н кэрэ́ла грэ́хо, на джины́ пал дава́, и гарадо́ явэ́ла рэ́ндо (де́ло) скэдыибнаскирэ якхэ́ндыр, и кэрэ́ла вари-со проти Ра́скирэ-Дэвлэ́скирэ припхэныбэна́, со на трэиндя́ тэ кэрэ́л, и явэ́ла банго́,

14. то тэды, ке́ли грэ́хо явэ́ла уджиндло, саво́ ёнэ кэрдэ́, мэк сарэ́ скэдыибна́стыр ёнэ тэ янэ́н гуруво́рэс барэ́ кхэритконэ́ мурдалэ́ндыр дро свэ́нто дыибэ́н (жэ́ртва) пал грэ́хо, и тэ янэ́н лэс анги́л скэдыибна́скири ша́тра;

15. и чхувэ́на скэдыибнаскирэ пхурыдыра́ пэ́скирэ васта́ пэ гуруворэскиро шэро́ анги́л Растэ-Дэвлэ́стэ, и зачхинэна гуруво́рэс анги́л Растэ-Дэвлэ́стэ.

16. И залыджала помакхно раша́й гуруворэскиро рат дрэ скэдыибна́скири ша́тра,

17. и обмакнинэла (булавэла) раша́й пэ́скиро ангу́шт (пальцо) дрэ рат и побрызгинэла эфта́ мо́лы анги́л Растэ-Дэвлэ́стэ анги́л шы́рма пэ свэ́нто штэ́то,

18. и почхувэла рат пэ алтарёскирэ шынга́ (ро́ги), савэ́ исын анги́л Растэ-Дэвлэ́стэ дрэ скэдыибна́скири ша́тра, а палатуно́ рат вычхувэла тэл ґэра́ дро алта́рё ваш цэ́ла схачкирибэна, саво́ исын пашы́л загиибэ́н дрэ скэдыибна́скири ша́тра;

19. и саро́ лэ́скиро чэкэ́н вылэла лэ́стыр, и схачкирэ́ла пэ алта́рё;

20. и ёв кэрэ́ла гуруворэса дова́, со кэрэ́лапэ гуруворэса пал грэ́хи; адя́кэ трэй тэ кэрэ́л лэ́са, и адя́кэ жужакирэла лэн раша́й, отмэкно явэ́ла лэ́нгэ;

21. и вылыджала гуруво́рэс пал ста́но (та́боро (лод)), и схачкирэ́ла лэс адя́кэ, сыр схачкирдя́ пэрвонэ́ гуруво́рэс. Дава́ исын свэ́нто дыибэ́н пал скэдыибнаскиро грэ́хо.

22. А ко́ли кэрэ́ла грэ́хо барэды́р, и кэрэ́ла на джины́ вари-со проти Ра́скирэ-Дэвлэ́скирэ, Дэвлэ́скирэ припхэныбэна́, со на трэиндя́ тэ кэрэ́л, и явэ́ла банго́,

23. то тэды, ке́ли уджиндло явэ́ла грэ́хо, саво́ ёв кэрдя́, мэк тэ янэл ёв дро свэ́нто дыибэ́н бузнэ́с (козлос) бидошэнгирэс,

24. и чхувэ́ла пэ́скиро васт пэ бузнэскиро шэро́, и зачхинэла лэс пэ штэ́то, кай сарэ́ цэ́ла схачкирибэна зачхинэнапэ анги́л Растэ-Дэвлэ́стэ, дава́ исын свэ́нто дыибэ́н пал грэ́хо;

25. и лэ́ла раша́й пэ́скирэ ангуштэса (пальцоса) жэртватыр рат пал грэ́хо, и почхувэла лэс пэ сарэ́ схачкирибнаскирэ шынга́ (ро́ги), а палатуно́ лэ́скиро рат вычхувэла тэл ґэра́ дро алта́рё ваш цэ́ла схачкирибэна;

26. и саро́ лэ́скиро чэкэ́н (ту́ко) схачкирэ́ла пэ алта́рё, адя́кэ-паць сыр чэкэ́н мирнонэ жэртвакиро, и адя́кэ выжужакирэ́ла лэс раша́й лэ́скирэ грэхостыр, и отмэкно лэ́скэ явэ́ла.

27. Ко́ли вари-кон манушэ́ндыр пэ пхув кэрэ́ла грэ́хо, и на джинэ́ла и кэрэ́ла вари-со проти Ра́скирэ-Дэвлэ́скирэ припхэныбэна́, со на трэиндя́ тэ кэрэ́л, и явэ́ла банго́,

28. то тэды, ке́ли уджинэла ёв пэ́скиро грэ́хо, саво́ ёв кэрдя́, мэк тэ янэл ёв дро свэ́нто дыибэ́н (жэ́ртва) бузня бидошэнгирья пал пэ́скиро грэ́хо, саво́ ёв кэрдя́,

29. и чхувэ́ла ёв пэ́скиро васт пэ жэртвакиро шэро́ пал цэ́ло грэ́хо, и зачхинэна бузня (коза) дро свэ́нто дыибэ́н пал грэ́хо пэ штэ́то, кай зачхинэна цэ́ла схачкирибнаскирэ свэ́нта дыибэна́ (жэртвы);

30. и лэ́ла раша́й дава́ рат пэ́скирэ ангуштэса, и росчхувэла алтарёскирэ шынга́, ваш цэ́ла схачкирибэна ла́киро рат, саво́ ячэ́лапэ, вычхувэла кэ ґэра́ дро алта́рё;

31. и саро́ ла́киро чэкэ́н откэдэла, адя́кэ-паць сыр откэдэла чэкэ́н раманёнэ (мирнонэ) свэнтонэ́ дыибна́стыр (жэртватыр), и схачкирэ́ла лэс раша́й пэ алта́рё дро гудло́ тхув, Ра́скэ-Дэвлэ́скэ; и адя́кэ выжужакирэ́ла лэс раша́й, и отмэкно лэ́скэ явэ́ла.

32. А ко́ли ёв закамэ́ла тэ янэл свэ́нто дыибэ́н пал грэ́хо бакрэ́н стадатыр, мэк тэ янэл джувликанэ родо́стыр, бидошэнгирья,

33. и чхувэ́ла ёв пэ́скиро васт пэ свэнтонэ́-дыибнаскиро шэро́ пал грэ́хо пэ дова́ штэ́то, кай зачхинэна цэ́ла схачкирибнаскира свэ́нта дыибэна́;

34. и лэ́ла раша́й пэ́скирэ ангуштэса рат свэнтонэ́ дыибна́стыр пал грэ́хо, и почхувэла пэ сарэ́ алтарёскирэ шынга́ (ро́ги) ваш цэ́ла схачкирибэна, а ла́киро рат, саво́ ячэ́лапэ, вычхувэла кэ алтарёскирэ ґэра́;

35. и саро́ ла́киро чэкэ́н откэдэла, сыр откэдэлапэ бакрякиро чэкэ́н мирнонэ жэртватыр, и схачкирэ́ла дава́ раша́й пэ алта́рё дро свэ́нто дыибэ́н Ра́скэ-Дэвлэ́скэ; и адя́кэ выжужакирэ́ла лэс раша́й грэхостыр, саво́ ёв кэрдя́, и отмэкно явэ́ла лэ́скэ.

1. Давидо́скиро Пса́лмо. Раё Дэ́вла, ми́ро Па́стырё (Чхупна́ри); ма́ндэ на явэ́ла трэ́бима ни дро со,

2. Ёв чхувэ́ла ман тэ пасёвав пэ зэлэна чарья́ и лыджа́ла ман кэ лента (насыгна) паня́,

3. Ёв зорьякирэла нэвэ́стыр миро ди, лыджа́ла ман пир маму́й дроморо ваш Пэ́скиро лав.

4. Мэк мэ джа́ва пир до́ло дара́са кэ мэрибэ́н, мэ на страхадёвава чорипна́стыр, пал-дова́ со Ту сан ма́нца: Тыро́ кашт и Тыро́ дэсто́-ёнэ подрикирэна ман.

5. Ту кэрэ́са сками́нд ваш ма́нгэ анги́л мирэ́ вэргэ́ндэ; Ту помакцян миро шэро́ оливитконэ дзэтэса (алеёса), миро тахта́й (чаша) исын пхэрдо́.

6. Чачо́, Тыро́ лачхипэ́н и Тыри́ лачхэ́-илы́ткима явэ́на ма́нца пэ сарэ́ дывэса́ дро миро джиибэ́н, и мэ ява́ва тэ бэшав дро Ра́скирэ-Дэвлэ́скиро Кхэр пэ адакицык, кицы́ мэ ява́ва тэ джива́в.

1. Годыпэ́н чхудя́ пэ́скиро кхэр, ёв вычингирдя пэ́скэ эфта́ (битринэ́нгиро дэш) сты́лбы;

2. ёв чхиндя́ пэ́скирэ мурдалэ́н (жывотнонэн), ёв змешындя пэ́скири мол (вино), ёв адя́кэ-паць кэрдя́ пэ́скиро сками́нд (хабэ́н).

3. Годыпэ́н бичхадя́ анги́л пэ́скирэ дынарицэн, ёв кхарэ́ла кэ пэ най вучэдыршонэ штэтэ́ндыр дро фо́ро:

4. “Кон исын набарэ́ – годя́киро, рисёв адари́к.” Одолэ́скэ, саво́ бут на ґалёла, годыпэ́н пхэндя́:

5. “Явэ́н, хан миро маро́ и пьен мол (вино), сави́ мэ змешындём.

6. Мэкэ́н дылныпэ́н, соб (кай) тэ дживэ́н, псирэ́н годьварэ́ дромэ́са.”

55. И бут джувля́ дыкхэнас дурипнастыр, савэ́ джа́нас пал Исусо́стэ Галилеятыр, и савэ́ дынариндлэ́ (служындлэ) Лэ́скэ,

56. машки́р савэ́ндэ сыс Мари́я Магдалина, и Мари́я, дай Яковоскири и Ёзаскири, Заведеёскири ромны́, дай лэ́скирэ чхавэ́нгэ.

57. Ке́ли явдя́ бэльвэ́ль, явдя́ барвало́ ману́ш Аримафеятыр пир лав Ёза (Иосифо), саво́ кокоро́ адя́кэ-паць сыс Исусо́скиро сыкляибны́тко.

58. Адава́ ману́ш подги́я кэ Пила́то и мангдя́ Исусо́скиро тру́по. Тэ́ньци Пила́то припхэндя́ тэ отдэ́н Исусо́скиро тру́по.

59. И Ёза лыя́ тру́по, закрэнцындя Лэс дро жужо́ (чысто) похтан,

60. и чхудя́ Лэс дрэ пэ́скири нэви́ копли́ца, сави́ ёв вычингирдя дрэ ска́ла; и ке́ли прирадя баро́ бар кэ загиибэ́н дрэ копли́ца, гия́ криг.

61. И сыс одо́й Мари́я Магдалина и яви́р Мари́я, савэ́ сыс бэштэ́ анги́л копли́ца.

62. Пэ яви́р дывэ́с, саво́ сыс са́вато (субо́та), скэдынэ́пэ раша́нгирэ барыдыра́ и Фарисе́и кэ Пила́то,

63. пхэни́: “Раё, амэ рипираса, со хохаибнари, сыр сыс ишчо (инкэ́) джидо́, пхэндя́: ‘Пир трин дывэса́ Мэ отджидёвава.’

64. Палдава́ припхэн тэ ракхэ́н магила кэ/жы́ко три́то дывэ́с, соб (кай) сыкляибны́тка тэ на чорэн Лэс, ко́ли явэ́на и тэ на пхэнэ́н манушэ́нгэ ‘уштыя́ мулэ́ндыр,’ и явэ́ла палатуно́ хохаибэ́н фуеды́р Пэрвонэстыр.”

65. Пхэндя лэ́нгэ Пила́то: “Тумэ́ндэ исын халадэ́-ракхибна́рья: мэк ёнэ тэ джа́н, тэ ракхэ́н, сыр тумэ́ джинэ́на.”

66. И ёнэ гинэ́, и чхудэ́ халадэ́н тэ ракхэ́н копли́ца, чхуви чэргэнори́ (печать) кэ бар.

Romani Bible Baltic 2019

United Bible Societies for the Baltic Romani Mission