Bible in one year - Пэ Балтитко Романи чиб

Bible in one year February 17

1. Ко́ли вари-кон кэрэ́ла грэ́хо долэса, со шундя́ прокошыбнаскири зан и сыс якхи́тко, ци дыкхця́ ци джиндя́, нэ на пхэндя́ дава́, тэды ёв лыджа́ла пэ пэ́стэ грэ́хо.

2. Ци, ко́ли вари-кон чилавэлапэ кэ вари-со нажужо, ци кэ нажужэ́ рискирибна́скирэ мурдалэскиро (зверёскиро) тру́по, ци кэ нажужэ́ кхэритконэ́ мурдалэскиро (скотоскиро) тру́по, ци кэ нажужэ́-ґадоскиро тру́по, нэ ёв на джиндя́ дава́, тэды ёв исын нажужо и явэ́ла банго́.

3. Ци ко́ли ёв чилавэлапэ кэ манушэ́скиро нажужыпэн (начыстота), саво́ тэ на явэ́л дава́ нажужыпэн, савэ́стыр магирэнапэ, и ёв на джиндя́ дава́, нэ коригэды́р (позжэды́р) ёв уджинэла, тэды ёв явэ́ла банго́.

4. Ци, ко́ли вари-кон, на подумины пэ́скирэ уштэ́нца, совлахадя́ тэ кэрэ́л вари-со на́лачхо ци лачхо́, саво́ б тэ на явэ́л дава́ рэ́ндо (де́ло), дрэ саво́ на думины мануша́ совлахана, и ёв на джиндя́ дава́, нэ коригэды́р уджинэла, тэды ёв дро дава́ явэ́ла банго́.

5. Ко́ли ёв исын банго́ дро вари-со далэ́стыр, и приджиндя банг, дрэ со ёв кэрдя́ грэ́хо,

6. тэды мэк тэ янэл Ра́скэ-Дэвлэ́скэ пал пэ́скиро грэ́хо, саво́ ёв кэрдя́, свэ́нто дыибэ́н сы́рбы пал банг тыкнэ́ кхэритконэ́ мурдалэ́ндыр (ското́стыр), бакря́ ци бузня, пал грэ́хо, и выжужакирэ́ла лэс раша́й лэ́скирэ грэхостыр.

7. Ко́ли ёв на могинэ́ла тэ янэл бакря́, тэды дрэ банг пал пэ́скиро грэ́хо, мэк тэ янэл Ра́скэ-Дэвлэ́скэ дуе́н горлицэн ци дуе́н тэрнэн голумбэн, екхэ́с дро свэ́нто дыибэ́н пал грэ́хо, а явирэ́с дро цэ́ло схачкирибэ́н;

8. мэк тэ янэл лэн кэ раша́й, и раша́й тэ янэл англэды́р доя́ далэ́ чириклендыр, сави́ тэ явэ́л пал грэ́хо и отрискирэла ла́кэ шэро́ мэнятыр лакирьятыр, нэ тэ на откэдэл;

9. и побрызгинэла далэ́-жэртвакирэ ратэ́са пал грэ́хо пэ алтарёскири ва́нта, а палатуно́ рат, саво́ ячэ́лапэ, вытасавэла кэ алтарёскирэ ґэра́: дава́ исын свэ́нто дыибэ́н пал грэ́хо;

10. а явирья мэкэ́ла дро цэ́ло схачкирибэ́н пир упхэныбэ́н; и адя́кэ выжужакирэ́ла лэс раша́й лэ́скирэ грэхостыр, саво́ ёв кэрдя́, и отмэкно лэ́скэ явэ́ла.

11. Ко́ли ёв на могинэ́ла тэ янэл дуе́н горлицэн ци дуе́н тэрнэ́ голумбэн, мэк тэ янэл пал дава́, со кэрдя́ грэ́хо, дэ́што паш (эфа) дрэ свэ́нто дыибэ́н пал грэ́хо; мэк тэ на чхувэ́л пэ ла́тэ елеё, и ливано, мэк тэ на чхувэ́л пэ ла́тэ, пал-дова́ со дава́ исын пал грэ́хо;

12. и янэ́ла лэс кэ раша́й, а раша́й ла́тыр лэ́ла пхэрды́ бурнык (жменя) дро рипирибэ́н, и схачкирэ́ла пэ алта́рё дро дава́ свэ́нто дыибэ́н Ра́скэ-Дэвлэ́скэ: дава́ исын свэ́нто дыибэ́н пал грэ́хо;

13. и адя́кэ выжужакирэ́ла лэс раша́й лэ́скирэ грэхостыр, саво́ ёв кэрдя́ дро вари-со далэ́ ваканцыендыр (случаендыр), и отмэкно лэ́скэ явэ́ла; а со ячэ́лапэ, дова́ явэ́ла раша́скэ, сыр маруно́ яныбэ́н.

14. И пхэндя́ Рай Дэвэ́л Мойза́скэ дасавэ́ лава́:

15. “Ко́ли вари-кон кэрэ́ла чорипэ́н и пир наджиныбэн кэрэ́ла грэ́хо проти дова́ предмето, со сыс обсвэнцындло Ра́скэ-Дэвлэ́скэ, мэк пал пэ́скири банг ёв тэ янэл Ра́скэ-Дэвлэ́скэ бакрэ́нгирэ стадатыр бакрэ́с бидошэнгирэс, пир тыри́ тими́н, рупувэ́ шэкеленца пир шэ́келё свэнтонэскиро, дро свэ́нто дыибэ́н (жэ́ртва) пал чорипэ́н;

16. пал доя́ свэнтыма, проти сави́ ёв кэрдя́ грэ́хо, мэк ёв тэ отдэ́л и тэ дочхувэл кэ дова́ па́нджто паш (до́ля), и тэ отдэ́л ла раша́скэ, и раша́й выжужакирэ́ла лэс бакрэскирэ яныбнаса пал чорипэ́н, и отмэкно лэ́скэ явэ́ла.

17. Ко́ли вари-кон кэрэ́ла грэ́хо и кэрэ́ла вари-со проти Ра́скирэ-Дэвлэ́скирэ припхэныбэна́, со на трэиндя́ тэ кэрэ́л, и пир наджиныбэн кэрэ́лапэ бангэса и лыджа́ла пэ пэ́стэ грэ́хо,

18. мэк тэ янэл кэ раша́й дро свэ́нто дыибэ́н пал чорипэ́н бакрэ́с бидошэнгирэс, пир тыри́ тими́н и выжужакирэ́ла раша́й тырэ́ чорипна́стыр, со ёв кэрдя́ пир наджиныбэн, и отмэкно лэ́скэ явэ́ла.

19. Акэ, исын свэ́нто дыибэ́н пал банг, саво́ ёв кэрдя́ анги́л Растэ-Дэвлэ́стэ.”

Leviticus 6:1-23

1. И пхэндя́ Рай Дэвэ́л Мойза́скэ, ракири́:

2. “Ко́ли вари-кон кэрэ́ла грэ́хо и кэрэ́ла чорипэ́н анги́л Растэ-Дэвлэ́стэ, и явэ́ла тэ хохавэ́л анги́л пэ́скирэ пашатунэстэ дрэ дова́, со лэ́скэ сыс дыно́ тэ гаравэл, ци лэ́стэ чхудо, ци дро дова́, дро со ёв чордя, ци дро дова́, со ёв хохавэла пэ́скирэ пашатунэс,

3. ци ко́ли ёв латхэ́ла хасякирдо, и хохавэла дро дова́, и совлахала хоханэ́с дро вари-со, со мануша́ кэрэ́на и кэрэ́на грэ́хо долэса,

4. то тэды, сыр ёв кэрдя́ грэ́хо и яця́ банго́, лэ́скэ трэй тэ рискирэ́л; чордо ци со чордя, ци отлыно, ци дова́, со сыс дыно́ тэ гаравэл, ци нашадо, ци дова́, со ёв латхя́;

5. ци ко́ли ёв дро со совлахадя́ хоханэ́с, то тэды лэ́скэ трэй тэ отдэ́л саро́, и тэ причхувэл кэ дова́ па́нджто до́ля, и тэ отдэ́л одолэ́скэ, конэ́скэ трэй, дро дывэ́с, ке́ли ёв янэ́ла свэ́нто дыибэ́н пал чорипэ́н;

6. и пал пэ́скири банг мэк ёв тэ янэл Ра́скэ-Дэвлэ́скэ кэ раша́й дрэ свэ́нто дыибэ́н (жэ́ртва) пал чорипэ́н бакрэ́нгирэ стадатыр бакрэ́с бидошэнгирэс, пир тыри́ тими́н;

7. и выжужакирэ́ла лэс раша́й анги́л Растэ-Дэвлэ́стэ, и отмэкно лэ́скэ явэ́ла, со бы ёв тэ на кэрэ́л, саро́, дро со ёв кэрдя́ чорипэ́н.

8. И пхэндя́ Рай Дэвэ́л Мойза́скэ, ракири́:

9. “Припхэн Аароно́скэ и лэ́скирэ чхавэ́нгэ: ‘Ѓа́да, исын Зако́но пал цэ́ло схачкирибэ́н: цэ́ло схачкирибэ́н мэк тэ ячэ́лпэ пэ схачкирибнаскиро штэ́то пэ алта́рё сари́ рат кэ зло́ко (ра́нко), и алтарёскири яг мэк тэ хачол пэ лэ́стэ;

10. и мэк раша́й тэ урьелпэ дрэ пэ́скири гандладытко (лёнытко) и́дя, и урьела пэ пэ́скирэ маса́ похтанытка тэлатунэ́ холова, и злэла пра́ска (пепло) цэлонэ́ схачкирибнастыр, саво́ хачкирдя́ яг пэ алта́рё, и чхувэ́ла лэс пашы́л алта́рё;

11. и мэк тэ злэл пэ́стыр и́ди пэ́скирэ, и урьявэла яви́р и́ди, и вылыджала пра́ска (пепло) пал ста́но пэ жужо́ штэ́то;

12. а яг пэ алта́рё мэк тэ хачол, тэ на мурдёл, и мэк раша́й тэ хачкирэл пэ лэ́стэ кашта́ кажно зло́ко (ра́нко), и росчхувэла пэ лэ́стэ цэ́ло схачкирибэ́н, и хачкирэ́ла пэ лэ́стэ чэкэ́н (ту́ко) мирнонэ свэнтонэ́ дыибна́стыр (жэртватыр);

13. яг пэ алта́рё мэк саро́ часо тэ хачол и тэ на мурдёл.

14. Ѓа́да, исын Зако́но пал маруно́ яныбэ́н: Аароно́скирэ чхавэ́нгэ трэй тэ янэ́н лэс анги́л Растэ-Дэвлэ́стэ кэ алта́рё;

15. и мэк тэ лэл раша́й пэ́скирэ бурныкаса (жменяса) марунэ яныбнастыр и парнэ́-гивэскирэ яржэстыр и елеёстыр и саро́ ливано, саво́ пэ алта́рё: дава́ исын гудло́ тхув дро рипирибэ́н, лачхо́, анги́л Растэ-Дэвлэ́стэ;

16. а палатуно́ лэ́стыр мэк тэ хан Ааро́но и лэ́скирэ чхавэ́; пресно трэй тэ хан лэс пэ свэ́нто штэ́то, пэ грэ́да (дво́ро) дрэ скэдыибна́скири ша́тра мэк тэ хан лэс;

17. нашты́ тэ пэкэн лэс квашэно. Дава́ Мэ да́ва лэ́нгэ дрэ до́ля Мирэ́ свэнтонэ́ дыибнэндыр. Акэ, исын бари свэнтыма, дасави́-паць исын сыр свэ́нто дыибэ́н пал грэ́хо и свэ́нто дыибэ́н пал чорипэ́н.

18. Саро́ Аароно́скирэ-муршытко ро́до могинэ́ла лэс тэ хал. Акэ, исын ве́чно котэ́р дрэ тумарэ́ ро́ды Ра́скирэ-Дэвлэ́скирэ свэнтонэ́ дыибнэндыр. Сарэ́, кон причилавэлапэ кэ ёнэ, освэнцинэнапэ.’”

19. И пхэндя́ Рай Дэвэ́л Мойза́скэ дасавэ́ лава́:

20. “Ѓа́да, исын яныбэ́н Аароностыр и лэ́скирэ чхавэстыр, саво́ ёнэ янэ́на Ра́скэ-Дэвлэ́скэ дро свэ́нто дыибэ́н дро дывэ́с, ке́ли лэс помакхэна: дэ́што эфакири паш парнэ́-гивэскири яржэстыр дро свэ́нто дыибэ́н саро́ часо, паш далэ́стыр ваш зло́ко (ра́нко) и яви́р паш ваш бэльвэ́ль;

21. пэ скороведа (хич) дро елеё лэс трэй тэ кэравэс; ко́ли ёв прочхудо елеёса ян лэс дрэ котэра́ (куски), сыр пхагэлапэ дро котэра́ сыр маруно́ яныбэ́н; ян лэс дро гудло́ тхув, лачхо́ Ра́скэ-Дэвлэ́скэ;

22. и раша́скэ, саво́ помакхно пэ лэ́скиро (Аароноскиро) штэ́то лэ́скирэ чхавэ́ндыр, трэй тэ кэрэ́л дава́: дава́ исын ве́чно упхэныбэ́н Ра́стыр-Дэвлэ́стыр. Саро́ трэй тэ явэ́л хачкирдо;

23. и кажно маруно́ яныбэ́н рашастыр, саро́ мэк тэ явэ́л схачкирдо, а на схано.”

Psalms 24:1-6

1. Давидо́скиро Пса́лмо. Сари́ пхув исын Дэвлэ́скири и саро́, со исын дро свэ́то, исын Лэ́скиро, и сарэ́, кон дживэ́ла пэ дава́ свэ́то (лот).

2. Пал-дова́ со Ёв чхудя́ пхувья́киро фунда́менто, пэ хор мо́ри (дэрьява́) и чхудя́ дава́-паць пэ паня́.

3. Кон сашты́ тэ джал упрэ́ пэ Ра́скирэ-Дэвлэ́скиро вучипэ́н? Кон сашты́ тэ тэрдёл пэ Лэ́скиро свэ́нто штэ́то?

4. Кодова́, конэ́стэ васта́ исын жужэ́ (чыста), конэ́стэ исын лачхо́ ило́. Кон на совлахадя́ пэ́скирэ илэ́са ивья́, и кон на совлахадя́ хоханэ́с.

5. Кодова́ дорэсэ́ла бахтякирибэ́н Ра́стыр-Дэвлэ́стыр и чачипэ́н Дэвлэ́стыр, Саво́ зракхэ́ла.

6. Дава́ исын одолэ́ мануша́, савэ́ родэ́на Лэс, дава́ исын Яково́скиро ро́до, кон родэ́ла Тыро́ муй. Сэ́ла.

Proverbs 9:7-9

7. Ману́ш, кон сыкавэ́ла банг явирэ манушэ́скэ, саво́ сыкавэ́ла напатыв кэ яви́р мануша́, прилэ́ла ладжаипэ́н пэ пэ́стэ; кодова́ ману́ш, кон бангякирэла чорэ́ манушэ́с, дорэсэ́ла дош пэ́скэ.

8. На сыка́в банг кодолэ́скэ, саво́ сыкавэ́ла напатыв кэ яви́р мануша́, соб (кай) ёв тэ на бидыкхэл тут: сыка́в банг годэ́ манушэ́скэ и ёв явэ́ла тэ сыкавэ́л паты́в ту́кэ.

9. Подсыклякир годэ́ манушэ́с, и ёв явэ́ла годэдыр, сыкля́кир чачунэ́ (вортэ) манушэ́с и лэ́стэ явэ́ла бутэды́р джиныбэ́н.

Matuš 28:1-20

1. Пэ зло́ко, дро пэ́рво куркитко дывэ́с пало́ са́вато, явнэ́ Мари́я Магдалина и яви́р Мари́я тэ дыкхэ́н маґила дрэ копли́ца.

2. И акэ, кэрдя́пэ баро́ пхувья́киро тринскирибэн; пал-дова́ со Дэвлэ́скиро Янго́ло гия́ тэлэ́ болыбна́стыр, и подгии, рискирдя́ бар и сыс бэшто́ пэ лэ́стэ.

3. Лэ́скиро выдыкхибэн сыс сыр блискавица, и лэ́скиро урибэ́н сыс парно́ сыр ив.

4. И ракхибна́рья издранас дара́тыр анги́л лэ́стэ, и кэрдэ́пэ, хай, ёнэ сыс мулэ́.

5. И лыя́ тэ ракирэ́л Янго́ло, пхэни́ джувленгэ: “На андыршан; мэ джино́м (джина́в), со тумэ́ родэ́на Исусо́с, Савэс примардэ пэ трушу́л;

6. Лэс (Ёв) нанэ ада́й, пал-дова́ со Ёв отджидыя́, сыр Ёв и пхэндя́. Явэ́н, подыкхэн штэ́то, кай Ёв сыс пашто́;

7. и джа́н сыгэды́р, пхэнэ́н Лэ́скирэ сыкляибнытконэ́нгэ, со Ёв отджидыя́ мэрибна́стыр и Ёв джа́ла анги́л тумэ́ндэ дрэ Галиле́я, одо́й тумэ́ Лэс дыкхэ́на, акэ, мэ пхэндём тумэ́нгэ.”

8. И выгии сы́гэс коплицатыр, ёнэ праста́ндынэ дара́са и барэ́ радыма́са тэ роспхэнэ́н Лэ́скирэ сыкляибнытконэ́нгэ.

9. И, акэ, Ису́со пирилыя лэн, ракири́: “Радынэ́нпэ!” И ёнэ, сыр подгинэ́, облынэ ґэра́ Лэ́скирэ и поклониндлэпэ Лэ́скэ.

10. Тэды ракирэ́ла лэ́нгэ Ису́со: “На андыршан; джа́н, и пхэнэ́н Мирэ́ пшалэ́нгэ, соб (кай) тэ джа́н дрэ Галиле́я; и одо́й ёнэ дыкхэ́на Ман.”

11. Сыр ёнэ джа́нас, тэды вари-савэ́ халадэ́нгирэ ракхибнарьендыр явнэ́ дро фо́ро и роспхэндлэ́ раша́нгирэ барыдырэ́нгэ саро́, со кэрдя́пэ.

12. И ке́ли ёнэ скэдынэ́пэ кхэтанэ́ годэпхурэнца, зракирдэпэ машки́р пэ́стэ; ёнэ дынэ́ бут рупувэ́ ловэ́ халадэнгэ,

13. ракири́: “Пхэнэ́н: ‘Лэ́скирэ сыкляибны́тка явнэ́ раты́, чордэ Лэс, ке́ли амэ са́мас сутэ́.’

14. И ко́ли дава́ явэ́ла джиндло́ тхэмэ́скирэ барыдырэ́скэ, амэ патякира́са лэс и зракхаса тумэн пиридживипнастыр.”

15. И ёнэ лынэ́ рупувэ́ ловэ́ и кэрдэ́, сыр лэн сыклякирдэ́. И кадая́ мавлы́н (малва) розгия́пэ машки́р Юдэ́ндэ кэ/жы́ко ададывэсатуно дывэ́с.

16. Дэшуекх жа сыкляибны́тка гинэ́ дрэ Галиле́я пэ бэ́рга, карик пхэндя́ лэ́нгэ Ису́со.

17. И ке́ли ёнэ дыкхнэ́ Лэс, поклониндлэпэ Лэ́скэ; нэ вари-савэ́ на патянас.

18. На Ису́со явдя́ и пхэндя́ лэ́нгэ; “Саро́ право дыно́ Ма́нгэ, сыр пэ болыбэ́н, адя́кэ пэ пхув.

19. Палдава́ джа́н, сыклякирэ́н сарэ́ на́цыи, болэн лэн дро лав Дадэ́скиро, Чхавэ́скиро и Свэнтонэ́ Духоскиро (Фаноскиро);

20. сыклякирэ́н лэн тэ кэрэ́н саро́, со Мэ припхэндём тумэ́нгэ. И, акэ, Мэ сом тумэ́нца кэ векоскиро ко́нцо (яго́ро).”

Romani Bible Baltic 2019

Maintained by the United Bible Societies for the Baltic Romani Mission