Bible in one year February 26Leviticus 21:1-241. И пхэндя́ Рай Дэвэ́л Мойза́скэ: “Ра́кир рашангэ, Аароно́скирэ чхавэ́нгэ, и пхэн лэ́нгэ: ‘Мэк ёнэ тэ на магирэ́н пэс чилавибнаса кэ муло́ пэ́скирэ манушэ́ндыр;2. екх со кэ пэ́скири пашатуны сэмэ́нца, кэ пэ́скири дай и кэ пэ́скиро дад, кэ пэ́скиро чхаво́ и кэ пэ́скири чхай, кэ пэ́скиро пшал,3. и кэ пэ́скири пхэн, сави́ тэ явэ́л дрэ чхая́, и дживдя́ пашы́л лэ́стэ и на сыс палоро́м, сашты́ лэ́скэ тэ кэрэ́л дава́ нажужыпэн;4. и чилавибнаса кэ кон бы да тэ на явэ́л дрэ пэ́скирэ манушэ́ндэ ёв нашты́ тэ магирэл пэс, соб (кай) тэ на ячэ́л нажужо.5. Лэ́нгэ нашты́ тэ чхинэн кэ нангипэ́н (тэ муравэн) пэ́скирэ шэрэ́ и тэ подчхинэн яго́ры (краи́) дрэ пэ́скирэ чхора (брода), и тэ кэрэ́н чхиныбэ́н пэ пэ́скирэ маса́.6. Лэ́нгэ трэй тэ явэ́н свэ́нта пэ́скирэ Дэвлэ́скэ, и лэ́нгэ нашты́ тэ тэлякирэн пэ́скирэ-Дэвлэ́скиро лав, пал-дова́ со ёнэ янэ́на Ра́скэ-Дэвлэ́скэ свэ́нто дыибэ́н (жэ́ртва) пэ яг, маро́ пэ́скирэ Дэвлэ́скэ, и палдава́ исын бангэ́ тэ явэ́н свэ́нта.7. Лэ́нгэ нашты́ тэ лэн пал пэ́стэ биладжакуня джувля́ и дошваля чха, и нашты́ тэ лэн и джувля́, савья́ мэкця́ ла́киро ром, пал-дова́ со ёнэ исын свэ́нта пэ́скирэ Дэвлэ́скэ.8. Высвэнцын лэн, пал-дова́ со ёнэ янэ́на маро́ тырэ́ Дэвлэ́скэ: мэк тэ явэ́н ёнэ ту́тэ свэ́нта, пал дова́ со Мэ сом свэ́нто Рай Дэвэ́л, Саво́ свэнцякирэла тумэн.9. Ко́ли э рашаскири чхай магирэла пэс биладжаипнаса, тэды ёй тэлякирэла пэ́скирэ дадэ́с; яга́са трэй ла тэ хачкирэ́н.10. И баро́ раша́й пэ́скирэ пшалэ́ндыр, пэ савэскиро шэро́ чхувэ́ла макхибнаскиро елеё (дзэт), и саво́ исын высвэнцындло, соб (кай) тэ урьелпэ дрэ свэ́нта ризы, нашты́ тэ нангякирэл пэ́скиро шэро́ и тэ на кушэл пэ́скирэ ризы;11. и ни кэ кон мулэ́ндыр нашты́ ёв тэ подджа́л: адя́кэ-паць чилавибнаса кэ муло́ пэ́скиро дад и пэ́скири дай ёв нашты́ тэ магирэл пэс.12. И свэнтонэ́ штэто́стыр ёв нашты́ тэ отджал и тэ тэлякирэл пэ́скирэ Дэвлэ́скиро свэ́нто штэ́то, пал-дова́ лэс высвэнцындлэ макхибнаскирэ елеёса ваш лэ́скирэ-Дэвлэ́скэ. Мэ сом Рай Дэвэ́л.13. Палоро́м лэ́скэ трэй тэ лэл патываля тэрня джувля́.14. Лэ́скэ нашты́ тэ лэл джувля́, савьятэ мыя́ ром, ци савья́ ром мэкця́, ци савья́ обхохадэ, ци биладжакуня джувля́, нэ патываля тэрня джувля́ пэ́скирэ манушэ́ндыр исын банго́ ёв тэ лэл палоро́м;15. Лэ́скэ нашты́ тэ ладжакирэл пэ́скиро семё (сал) дрэ пэ́скирэ манушэ́ндэ, пал дова́ со Мэ сом Рай Дэвэ́л, Саво́ лэс свэнцякирава.’”16. И пхэндя́ Рай Дэвэ́л Мойза́скэ дасавэ́ лава́:17. “Ра́кир Аароно́скэ дасавэ́ лава́: ‘Нико́н тырэ́ родо́стыр дрэ сарэ́ лэ́нгирэ ро́ды, савэ́ндэ пэ маса́ явэ́ла наухтылыбэн, нашты́ тэ подджа́л, соб (кай) тэ янэл маро́ пэ́скирэ-Дэвлэ́скэ;18. нико́н, конэ́стэ пэ маса́ исын наухтылыбэн, нашты́ тэ подджа́л, ни короро́, ни лангало, ни рагандо (уродо),19. ни саво́, конэ́стэ исын пирипхагирды ґэро́й, ци пирипхагирдо васт,20. ни ґырбаса, ни шукэ́ членоса, ни карлико, ни плямаса пэ якх, ни ґэрало, ни джувало (пошэсяса), ни дошвало мурш (евнухо);21. ние́кх ману́ш рашаскирэ Аароно́скирэ родо́стыр, савэ́стэ пэ маса́ исын наухтылыбэн, нашты́ тэ подджа́л, соб (кай) тэ янэл Ра́скэ-Дэвлэ́скэ свэ́нта дыибэна́; наухтылыбэн исын пэ лэ́стэ, палдава́ лэ́скэ нашты́ тэ подджа́л, соб (кай) тэ янэл маро́ пэ́скирэ-Дэвлэ́скэ.22. Маро пэ́скирэ Дэвлэ́скиро исын барэ́ свэнтыматыр и свэнтыматыр ёв сашты́ тэ хал;23. нэ кэ полого ёв нашты́ тэ явэ́л, и кэ алта́рё нашты́ лэ́скэ тэ подджа́л, пал-дова́ со наухтылыбэн исын пэ лэ́стэ: ёв нашты́ тэ тэлякирэл Миро свэ́нто штэ́то, пал-дова́ со Мэ сом Рай Дэвэ́л, Саво́ свэнцякирэла лэн.”24. И дыя́ тэ джинэ́л дава́ Мо́йза Аароно́скэ и лэ́скирэ чхавэ́нгэ и сарэ́ Израилёскирэ чхавэ́нгэ.Leviticus 22:1-331. И пхэндя́ Рай Дэвэ́л Мойза́скэ, ракири́:2. “Ра́кир Аароно́скэ и лэ́скирэ чхавэ́нгэ, соб (кай) ёнэ ракхибнаса тэ рикирэ́н пэс анги́л Израилёскирэ-чхавэ́нгирэ свэнтыма, и тэ на магирэ́н Миро свэ́нто лав дро дова́, со ёнэ ракирэ́на Ма́нгэ. Мэ сом Рай Дэвэ́л.3. Пхэн лэ́нгэ: ‘Ко́ли вари-кон сарэ́ тумарэ́ манушэ́ндыр дрэ тумарэ́ ро́ды, тэ рикирэ́л пэ пэ́стэ нажужыпэн, тэ подджа́л кэ свэнтыма, савэ́ посвэнцынэна Израилёскирэ чхавэ́ Ра́скэ-Дэвлэ́скэ, тэды тэ хасёл дова́ ди Мирэ́ мо́стыр. Мэ сом Рай Дэвэ́л.4. Ние́кх Аароно́скирэ родо́стыр проказаса ци конэ́стэ тхадэ́ла, одолэ́скэ нашты́ тэ хал свэнтыма, пака ёв на выжужакирэлапэ; и кон чилавэ́ла вари-со нажужо мулэстыр, ци конэ́стэ вычхувэлапэ семё (сал),5. ци ко́ли вари-кон чилавэ́ла вари-саво́ создыибэн, со ползынэла, савэ́стыр ёв ячэ́ла нажужо, ци чилавэ́ла манушэ́с, савэ́стыр ёв ячэ́ла нажужо, саво́ тэ на явэ́л нажужыпэн,6. одова́, кон чилавэ́ла саро́, нажужо явэ́ла ёв кэ бэльвэ́ль, и лэ́скэ нашты́ тэ хал свэ́нто англэды́р, сыр ёв обморэла пэ́скирэ маса́ пане́са;7. нэ ке́ли заджа́ла кхам и ёв явэ́ла жужо́, тэды ёв могинэ́ла тэ хал свэнтыма, пал-дова́ со дава́ сыс лэ́скиро хабэ́н.8. Падаль и мас, со яця́пэ рискирибна́скирэ мурдалэстыр (зверёстыр) ёв тэ на хал, соб (кай) тэ на магирэлпэ далэ́са. Мэ сом Рай Дэвэ́л.9. Мэк тэ ракхэ́н ёнэ Мирэ́ упхэныбэна́, соб (кай) тэ на лыджа́н пэ пэ́стэ грэ́хо, и тэ на мэрэ́н дрэ лэ́стэ, ке́ли ёнэ пхагирэна дава́. Мэ сом Рай Дэвэ́л, саво́ свэнцякирэла лэн.10. Никонэ́скэ явирэ манушэ́скэ нашты́ тэ хал свэнтыма: саво́ дживэ́ла кэ раша́й и налыно бутярно нашты́ тэ хал свэнтыма;11. ко́ли раша́й кинэла пэ́скэ манушэ́с пал руп, тэды ёв сашты́ (могинэ́ла) тэ хал свэнтыма; адя́кэ-паць и лэ́скирэ кхэри́тка сашты́ тэ хан лэ́скиро маро́.12. Ко́ли рашаскири чхай выджа́ла палоро́м пал явирэ манушэ́стэ рига́тыр, тэды ёй нашты́ тэ хал, со янэ́на дрэ свэнтыма;13. ке́ли рашаскири чхай ячэ́лапэ пивляса (удоваса) ци розджалапэ ромэса, и чхавэ́н ла́тэ нанэ, и рисёла дрэ пэ́скирэ дадэ́скиро кхэр, сыр сыс дро пэ́скиро тэрныпэн, тэды ёй сашты́ (могинэ́ла) тэ хал пэ́скирэ-дадэ́скиро маро́; а ние́кх явирэ рига́тыр нашты́ лэс тэ хал.14. Кон дэ́лапэ дукха́ (кэрэ́ла доша) и ха́ла вари-со свэнтыматыр, одова́ исын банго́ тэ отдэ́л раша́скэ свэ́нто и тэ дочхувэл кэ ёй ла́кири па́нджто паш.15. Рашангэ кокорэнгэ нашты́ тэ магирэ́н Израилёскирэ-чхавэнгири свэнтыма, саво́ ёнэ янэ́на Ра́скэ-Дэвлэ́скэ,16. и лэ́нгэ нашты́ тэ выкхарэн пэ пэ́стэ банг дро чорипэ́н, ке́ли явэ́на тэ хан пэ́скири свэнтыма, пал-дова́ со Мэ сом Рай Дэвэ́л, Саво́ свэнцынэла лэн.’”17. И пхэндя́ Рай Дэвэ́л Мойза́скэ дасавэ́ лава́:18. “Ра́кир Аароно́скэ и лэ́скирэ чхавэ́нгэ и сарэ́ Израилёски-рэ чхавэ́нгэ, и пхэн лэ́нгэ: ‘Ко́ли вари-кон Израилёскирэ кхэрэ́стыр, и манушэ́ндыр, савэ́ явнэ́ явирэ рига́тыр, и дживэ́на машки́р Израильтянэндэ, ци пир сави́ совла́х, ци пир ило́ янэ́ла пэ́скиро свэ́нто дыибэ́н, саво́ янэ́на Ра́скэ-Дэвлэ́скэ дро цэ́ло схачкирибэ́н,19. тэды, соб (кай) лэ́нгэ тэ явэ́л Ра́стыр-Дэвлэ́стыр ла́ска, свэ́нто дыибэ́н трэй тэ явэ́л бидошэ́нгиро, мурш, барэ́ мурдалэстыр, бакрэ́ндыр и бузнэндыр (козлэндыр);20. нисаво́ мурда́л (жывотно), пэ савэ́стэ исын дош, тэ на янэ́н; пал-дова́ со дава́ на дэ́ла тумэ́нгэ Ра́стыр-Дэвлэ́стыр ла́ска.21. И ко́ли вари-кон янэ́ла ми́рно свэ́нто дыибэ́н Ра́скэ-Дэвлэ́скэ, соб (кай) тэ кэрэ́л пир совла́х, ци пир ило́, барэ́ мурдалэстыр ци тыкнэстыр, тэды свэ́нто дыибэ́н исын банго́ тэ явэ́л бидошэ́нгиро, соб (кай) тэ явэ́л лачхо́ Ра́скэ-Дэвлэ́скэ: нисави́ дош нашты́ пэ лэ́стэ тэ явэ́л;22. корорэс мурдалэс, ци савэ́с домардэс, ци уродос, ци насвалэс, ци ґэралэс, ци джувалэс, дасавэн на янэ́н Ра́скэ-Дэвлэ́скэ, и дро свэ́нто дыибэ́н на дэн лэн пэ Ра́скирэ-Дэвлэ́скиро алта́рё;23. гуруво́рэс и бакрэ́с членэнца древа́н длэнгонэнца ци тыкнэнца, сыр свэ́нто дыибэ́н пэ́скирэ илэ́стыр ту могинэ́са тэ янэс; а ко́ли пир совла́х, тэды дава́ на явэ́ла пир ла́ска Дэвлэ́скэ;24. мурдала́, савэ́стэ ятры ростасадэ, розмардэ, откушнэ ци вычхиндлэ́ на янэ́н Ра́скэ-Дэвлэ́скэ, и пэ тумари́ пхув дава́ на кэрэ́н;25. и явирэ-пхувья́кирэ манушэ́нгирэ вастэ́ндыр на янэ́н сарэ́н дасавэн мурдалэ́н дро свэ́нто дыибэ́н тумарэ́ Ра́скэ-Дэвлэ́скэ, пал-дова́ со пэ лэ́ндэ исын дош; ёнэ на янэ́на тумэ́нгэ ла́ска Дэвлэ́стыр.’”26. И пхэндя́ Рай Дэвэ́л Мойза́скэ дасавэ́ лава́:27. “Ке́ли бияндёла (лотёла) гуруворо, ци бакроро́, ци бузноро, тэды эфта́ дывэса́ лэ́скэ трэй тэ явэ́л пашы́л пэ́скирэ датэ, а охтотонэ (бидуенгирэ дэштонэ) дывэсэ́стыр явэ́ла лачхо́ ваш яныбэ́н дро свэ́нто дыибэ́н Ра́скэ-Дэвлэ́скэ;28. нэ ни гурумня, ни бакря́ на чхинэн дро екх дывэ́с лэ́нгирэ даса.29. Ко́ли янэ́на Ра́скэ-Дэвлэ́скэ парикирибнаскиро свэ́нто дыибэ́н, тэды янэ́н лэс адя́кэ, соб (кай) ёв тэ дэл тумэ́нгэ ла́ска;30. дрэ дова́-паць дывэ́с трэй лэс тэ хан, на ячкирэн ла́тыр кэ ра́нко (кэ зло́ко). Мэ сом Рай Дэвэ́л.31. И ракхэ́н Мирэ́ припхэныбэна́ и кэрэ́н саро́ пир лэ́ндэ. Мэ сом Рай Дэвэ́л.32. На магирэ́н Миро свэ́нто лав, соб (кай) Мэ тэ явав свэнтонэса машки́р Израилёскирэ чхавэ́ндэ. Мэ сом Рай Дэвэ́л, Саво́ свэнцякирэла тумэн,33. Саво́ вылыджия́ тумэн Египто́скирэ пхувья́тыр, соб (кай) тэ явэ́л тумаро́ Дэвэ́л. Мэ сом Рай Дэвэ́л.”Psalms 27:11-1411. Сыкля́кир ман, О Раё Дэ́вла, тэ джав Тырэ́ дромэ́са и лы́джа ман чачипнаскирэ дромэ́са, пал-дова́ со бут вэ́рги дыкхэ́на цямкэс пал ма́ндэ.12. На ячкир ман пэ мирэ́-вэргэнгири во́ля: пал-дова́ со хоханэ́ якхи́тка уштынэ́ проти ма́ндэ и одова́, кон пхурдэла хоханэ́ холя́са пэ ма́ндэ.13. Нэ мэ патя́ва, со мэ дыкха́ва Ра́скирэ-Дэвлэ́скиро лачхипэ́н дро дава́ джиибэ́н.14. Рикирэ́н наде́я пэ Растэ-Дэвлэ́стэ, явэ́н муршканэ́ и Ёв зорьякирэла Тумаро ило́; чачо́, рикирэ́н наде́я пэ Растэ-Дэвлэ́стэ.Proverbs 10:13-1613. Годыпэ́н джа́ла годыпнаскирэ манушэ́стыр, а ран кэдэлапэ тэ марэл пир думо кодолэ́скэ, саво́ на ґалёла годыпэ́н.14. Годэ́ мануша́ скэдэ́на (зракхэна) джиныбэ́н, нэ дылыно́ ракирэ́ла кэ хасибэ́н.15. Барвалэ́-манушэ́скиро миштыпэ́н исын сыр зорало́ фо́ро, нэ чороро́ ману́ш пэрэ́ла дро ду́хо (фа́но) пэ́скирэ богипнастыр.16. Чачипнаскирэ-манушэскири пхари́ буты́ лыджа́ла кэ джиибэ́н, нэ бажын (приросто), сави́ дорэсэ́ла начачуно (чоро) ману́ш, лыджа́ла кэ грэ́хо.Marek 5:21-4321. Ке́ли Ису́со рисия́ палэ пэ яви́р риг дрэ ба́рка, кэ Ёв скэдынэ́пэ бут мануша́. Ёв яця́пэ пэ брэ́го.22. И явэ́лас Иаиро, екх барыдыро́ синагогатыр, и, сыр дыкхця́ Исусо́с,23. то пыя́ кэ Лэ́скирэ ґэра́, и яця́ тэ мангэ́л Лэс: “Мири́ чхай мэрэ́ла, яв и чхув упрэ́ васта́ пэ ла́тэ, соб (кай) ёй тэ высастёл и тэ дживэ́л!”24. И Ёв (Ису́со) гия́ лэ́са; пал Лэ́стэ гинэ́ бут мануша́, тасави Лэс.25. И сыс джувлы́, сави́ дэшуду́й бэрш сыс насвалы ратвалыпнаса,26. ёй вырикирдя бут, пал-дова́ со састякирэласпэ бутэндэ састыпнарьендэ (докторэндэ), роздыя пэ састякирибэн бут ловэ́, а заме́ст фэдырипэн, ла́киро насвалыпэн яця́ фуеды́р.27. Ке́ли ёй шундя́ пал Исусо́стэ, ёй подги́я кэ Ёв палалэстыр машки́р манушэ́ндэ и чиладя́ Лэ́скиро урибэ́н;28. “Ко́ли Ма́нгэ екх урибэ́н Лэ́скиро тэ чилавав, тэды мэ высастёвавас”, – ракирдя́ ёй;29. и ада́й жэ ла́киро рат пирияця́ тэ джал, и ёй шундя́ дро пэ́скирэ маса́, со ёй састия пэ́скирэ насвалыпнастыр.30. Ису́со екха́тыр ґалыя́, со Лэ́стыр выгия́ зор, Ёв рисия и пхуця́: “Кон чиладя́ Миро урибэ́н?”31. И Лэ́скирэ сыкляибны́тка ракирдэ́ Лэ́скэ: “Трусця́л (кругом) Ту́тэ исын ада́кицы мануша́ и Ту пхучэса, кон Тут чиладя́?”32. Ису́со облыджия манушэ́н дыкхибнаса, соб (кай) тэ дыкхэ́л, кон дава́ кэрдя́.33. А джувлы́, сыр ґалыя́, со сыс ла́са и триинскири дара́тыр, подги́я, пыя́ кэ Лэ́скирэ ґэра́ и роспхэндя́ саро́ чачипэ́н.34. Ёв пхэндя́ ла́кэ: “Чха́е Мири́! Патяибэ́н тыро́ зракхця́ тут! Джа́ бахтяса, яв састы тырэ́ насвалыпнастыр.”35. Пака Ису́со ракирдя́ джувля́са, явнэ́ синагогакирэ-барыдырэскирэ Иаироскирэ кхэрэ́стыр мануша́, савэ́н бичхадэ́, и ракирэ́на Лэ́скэ: “Чхай Тыри́ мыя́, палсо́ ишчо (инкэ́) тэ пхарьякирэс Сыклякирибнаскирэс?”36. Нэ Ису́со, сыр шундя́ дова́, со ракирдэ́, пхэндя́ синагогакирэ барыдырэ́скэ: “На андырша, фэ́ни (то́ка) патя!”37. И Ёв на домэкця никонэ́с тэ джал Лэ́са, апри́ч Пэтристэ, Яковостэ и лэ́скирэ пшалэ́стэ Ианостэ.38. И, акэ, ёнэ явнэ́ дро Иаироскиро кхэр и одо́й дыкхнэ́ пхэрдо́ манушэ́н, машки́р савэ́ндэ сыс шумо годлэнца; ёнэ годлэнас, и рондлэ́ ясвэ́нца.39. Сыр Ёв загия́ дро кхэр, то пхэндя́ лэ́нгэ: “Палсо́ тумэ́ кэрэ́на шумо и ровэна; патывалы́ тэрны́ джувлы́ на мыя́, ёй исын суты.”40. И ёнэ сандлэпэ Лэ́стыр. Ису́со пхэндя́ сарэ́нгэ тэ джа́н яври́, нэ Кокоро́ Ёв патывалэ́-тэрнэ́-джувлякирэ дадэ́нца и тринэ́ сыкляибнытконэ́нца загия́ дрэ шту́ба, кай патывалы́ тэрны́ джувлы́ сыс пашты.41. Лыи ла пал васт, Ису́со пхэндя́ патывалэ́ тэрнэ́ джувля́кэ: “Талита куми!” (Со значынэ́ла Романэс: “Тэрны́ Джувли́е, Ту́кэ ракира́ва, ушты́!”).42. Патывалы́ тэрны́ джувлы́ екха́тыр уштыя́ и яця́ тэ псирэ́л; ла́кэ сыс дэшуду́й бэрш. И сарэ́ екха́тыр ячнэ́ штыл дивостыр.43. Ису́со шылалэс припхэндя́ лэ́нгэ никонэ́скэ тэ на ракирэ́н пал дава́, со сыс; а патываля-тэрня-джувля́ пхэндя́ тэ чалякирэн. Romani Bible Baltic 2019 Maintained by the United Bible Societies for the Baltic Romani Mission