Beblia

1. И ґа́да, исын зако́ны, савэ́ ту дэ́са тэ джинэ́с лэ́нгэ (Израильтянэнгэ):

2. “Ко́ли ту кинэса писхари́с Юдос, мэк ёв тэ кэрэ́л буты́ шов бэрш, а пэ эфта́то (битринэ́нгиро дэ́што) мэк ёв тэ выджа́л пэ во́ля би ловэнгиро;

3. ко́ли ёв явдя́ екхджино́, мэк екхджино́ и тэ выджа́л; а ко́ли ёв исын романдуно, мэк тэ выджа́л лэ́са и лэ́скири ромны́;

4. ко́ли лэ́скиро хула́й дыя́ лэ́скэ ромня́, и ёй бияндя́ лэ́скэ чхавэ́н и чхае́н, тэды ромны́ и ла́кирэ чхавэ́ мэк тэ ячэ́нпэ адалэ́ хуластэ, а ёв выджа́ла екхджино́;

5. нэ ко́ли писха́ри пхэнэ́ла: ‘Миро хула́й исын дро́го ма́нгэ, миры ромны́ и мирэ́ чхавэ́, мэ на джа́ва пэ во́ля,’ –

6. тэды мэк лэ́скиро хула́й тэ янэл лэс анги́л сэндарьендэ (дэвлорэндэ), и тэ чхувэ́л лэс кэ вуда́р ци кэ косяко, и лэ́скиро хула́й тэ пропхусавэл лэ́скиро кан ярьяса, и ёв ячэ́лапэ лэ́скирэ писхариса пэ саро́ ве́ко.

7. Ко́ли вари-кон бикнэла пэскирья́ чха дрэ писхарицатэ, тэды ёй нашты́ (на могинэ́ла) тэ выджа́л, сыр выджа́на писха́рья;

8. ко́ли ёй на кэрдя́ пир ило́ пэ́скирэ хула́скэ, и ёв ла на обрэнчынэла (ангрустякирэла), мэк ёв тэ дэл во́ля ла́кэ, соб (кай) ла тэ выкинэн; а чужонэ́ манушэ́нгэ нашты́ ла тэ бикнэл лэ́скэ, ке́ли кокоро́ на закамдя́ ла;

9. ко́ли ёв обрэнчынэла (ангрустякирэла) ла пэ́скирэ чхавэ́скэ, мэк тэ обжалпэ ла́са, сыр пэ́скирэ чхаенца;

10. ко́ли явирья пал лэ́стэ лэ́ла, тэды ёй на банги тэ ячэ́лпэ би хабнаскиро, би идякиро и би романдуно джиибна́скиро;

11. а ко́ли ёв далэ́ трин рэ́нды на кэрэ́ла ваш ла́кэ, мэк ёй тэ отджал во́льно, би выкиныбнаскиро.

12. Кон пэкавэла манушэ́с адя́кэ, со ёв мэрэ́ла, мэк одова́ ману́ш тэ явэ́л отдыно́ пэ мэрибэ́н;

13. нэ, ко́ли вари-кон на камдя́, а Дэвэ́л домэкця лэ́скэ тэ попэрэл тэл лэ́скирэ васта́, тэды Мэ упхэнава ту́кэ штэ́то, карик тэ нашэ́л о ману́ш, саво́ замардя́;

14. а ко́ли, кон скэдэлапэ тэ замарэ́л пашатунэс, тэды и Мирэ́ алтарёстыр (жэртвеникостыр) лэ лэс пэ мэрибэ́н.

15. Кон пэкавэла пэ́скирэ дадэ́с ци пэ́скирэ да, одолэ́с трэй тэ отдэ́н пэ мэрибэ́н.

16. Кон чорэла манушэ́с и бикнэла лэс; ци ёв латхэлапэ дрэ лэ́скирэ васта́, тэды трэй тэ отдэс лэс пэ мэрибэ́н.

17. Кон кошэла пэ́скирэ дадэ́с ци пэскирья́ да, одолэ́с трэй тэ отдэс пэ мэрибэ́н.

18. Ке́ли кошэнапэ, и екх ману́ш пэкавэла явирэ́с барэса ци бурныкаса (кулакоса), и одова́ на мэрэ́ла, нэ занасвалёла,

19. тэды, ко́ли ёв уштэ́ла и явэ́ла тэ выджа́л кхэрэ́стыр каштэса, кон пэкадя́ лэс, на явэ́ла отдыно́ пэ мэрибэ́н; екх мэк одова́ ману́ш тэ заплэскирэл ловэ́ пал дова́ часо, ци бут ёв на кэрдя́ буты́ и тэ дэл ловэ́ пэ лэ́скиро састякирибэн.

20. А ко́ли кон пэкавэла пэ́скирэ писхари́с ци дына́рица каштэса, и ёнэ мэрэ́на тэл лэ́скиро васт, тэды ёв исын банго́ тэ лыджа́л ка́ра;

21. нэ ко́ли ёнэ екх дывэ́с ци дуй дывэса́ явэ́на джидэ́, тэды нашты́ тэ чхувэ́л ка́ра пэ лэ́стэ, пал-дова́ со ёнэ исын лэ́скиро руп.

22. Ке́ли марэнапэ мануша́, и пэкавэна пэраля джувля́, и ёй счхурдэла, нэ на явэ́ла яви́р дош, тэды трэй тэ лэс бангэ́ манушэ́стыр штрафо, саво́ чхувэ́ла пэ лэ́стэ одолэ́-джувля́киро ром, и ёв исын банго́ тэ заплэскирэл, ци бут лэ́скэ пхэнэ́на сэнда́рья анги́л манушэ́ндэ;

23. а ко́ли явэ́ла дош, тэды отдэ́ ди пал ди,

24. якх пал якх, данд пал данд, васт пал васт, ґэро́й пал ґэро́й,

25. обхачкирибэн пал обхачкирибэн, рана (дукхады) пал рана (дукхады), пэкаибэн пал пэкаибэн.

26. Ко́ли вари-кон пэкавэла пэ́скирэ писхари́с дрэ якх, ци пэскирья́ писхарица дрэ якх, и пошкодынэла ла: мэк тэ отмэкэ́л лэн пэ во́ля пал якх;

27. и ко́ли вымарла пэ́скирэ писхари́скэ ци пэ́скирэ писхарицакэ данд, мэк тэ отмэкэ́л пэ во́ля пал данд.

28. Ко́ли гурув запхусавэла муршэ́с ци джувля́ кэ мэрибэ́н, тэды гурувэ́с тэ замарэ́н барэ́нца, и лэ́скиро мас тэ на хан; а хула́й гурувэскиро на банго́;

29. нэ ко́ли гурув англэды́р пхусадяпэ (бодиндяпэ) и тася́ и пэ три́то дывэ́с, и лэ́скирэ хула́скэ сыс пхэндло́ пал дава́, и ёв на ракхця́ лэс, а гурув замардя́ муршэ́с ци джувля́, тэды гурувэ́с тэ замарэ́н барэ́нца, и лэ́скирэ хула́с тэ отдэ́н пэ мэрибэ́н;

30. ко́ли пэ лэ́стэ явэ́ла чхудо выкиныбэ́н, мэк тэ дэл выкиныбэ́н пал пэ́скиро ди, саво́ чхудо явэ́ла пэ лэ́стэ.

31. Нэ ко́ли ёв запхусавэла ци чхаворэс, ци запхусавэла чхаёрья, – пир дава́-паць зако́но тэ обжанпэ лэ́са.

32. Ко́ли гурув запхусавэла дынари́с ци дына́рица, тэды лэ́скирэ хула́скэ тэ заплэскирэл трия́нда шэкэли руп, а гурувэ́с тэ замарэ́н барэ́нца.

33. Ко́ли кон росчхакирэла ґанби́н (яма), ци, ко́ли кон выганавэла ґанби́н (яма) и на зачхакирэла ла, и пэрэ́ла дрэ ла́тэ гурув ци о́сло (мега́ри),

34. тэды хула́й ґанбинакиро исын банго́ тэ заплэскирэл, тэ отдэ́л руп лэ́нгирэ хула́скэ, а мас явэ́ла лэ́скиро.

35. Ко́ли конэ́скиро гурув запхусавэла кэ мэрибэ́н лэ́скирэ-суседоскирэ гурувэ́с, мэк тэ бикнэн джидэ́ гурувэ́с и тэ роскэрэн пэ паш лэ́скири тими́н; адя́кэ-паць и замардэ́ гурувэ́с мэк тэ роскэрэн пэ паш;

36. а ко́ли исын джиндло́, со гурув пхусавэлапэ (бодинэлапэ) и тася́ и пэ три́то дывэ́с, нэ лэ́скиро хула́й на ракхця́ лэс, тэды ёв исын банго́ тэ заплэскирэл гурувэ́с пал гурувэстэ, а замардо явэ́ла лэ́скиро.

1. Ко́ли вари-кон чорэла гурувэ́с ци бакря́, и зачхинэла, ци бикнэла, тэды ёв исын банго́ пандж гурувэ́н тэ выплэскирэл пал гурувэстэ, и штар бакрен пал бакрятэ.

2. Ко́ли вари-кон ухтылэ́ла чорэс, саво́ подґанавэлапэ тэ чорэл, и пэкавэла лэс адя́кэ, со ёв мэрэ́ла, тэды рат на явэ́ла пэ лэ́стэ;

3. нэ ко́ли ґаздыя́пэ кхам пэ лэ́стэ, тэды лэ́скиро рат явэ́ла пэ лэ́стэ. Чор исын банго́ тэ заплэскирэл; а ко́ли нанэ со́са, тэды мэк лэс тэ бикнэн ваш выплэскирибэн лэ́са пал чордо миштыпэ́н;

4. ко́ли латхэлапэ чордо дрэ лэ́скирэ васта́, со исын джидо́, ци гурув, ци о́сло (мега́ри), ци бакри, мэк тэ выплэскирэл ёв дрэ дуй мо́лы.

5. Ко́ли вари-кон мэкэ́ла кхэритконэ́ мурдалэс (ското) пэ чу́жо фэ́лда ци дро винагра́днико тэ выхал, пал-дова́ со ёв мэкця́ пэ́скирэ мурдалэс тэ выхал чу́жо фэ́лда, то мэк ёв тэ отдэ́л фэдыршо да́ро пэ́скирэ фэлдатыр и фэдыршонэ лэ́скирэ винаградникостыр.

6. Ко́ли ячэ́ла яг и облэла тернё (кодро), и выхачкирла ґарбы (снопы), ци жатва, ци фэ́лда, тэды одова́ ману́ш исын банго́ тэ заплэскирэл, кон кэрдя́ дава́ схачкирибэ́н.

7. Ко́ли вари-кон отдэ́ла пашатунэскэ тэ зракхэ́л руп ци и́ди, и ёнэ явэ́на чордэ лэ́скирэ кхэрэ́стыр, тэды, ко́ли латхэлапэ чор, мэк ёв тэ заплэскирэл дрэ дуй мо́лы;

8. а ко́ли на латхэлапэ чор, мэк кхэрэ́скиро хула́й тэ явэ́л анги́л сэндарьендэ и тэ совлахал, со ёв на ґаздыя́ пэ́скиро васт пэ лэ́скирэ-пашатунэскиро миштыпэ́н.

9. Пал кажно спрэчно рэ́ндо, пал гурувэстэ, пал ослостэ, пал бакрятэ, пал и́ди, пал кажно вешча (вешч), сави́ хасия́, пал сави́ вари-кон пхэнэ́ла, со ёй исын лэ́скири, рэ́ндо (де́ло) дуенгиро банго́ тэ явэ́л долыджино кэ сэнда́рья. Конэ́с сэнда́рья бангякирэна, одова́ заплэскирэла пэ́скирэ пашатунэскэ дрэ дуй мо́лы.

10. Ко́ли вари-кон отдэ́ла пэ́скирэ пашатунэскэ осло́с, ци гурувэ́с, ци бакря́, ци явирэ́с вари-савэ́с кхэритконэ́ мурдалэс пэ зракхибэ́н, а ёв мэрэ́ла, ци явэ́ла калечындло, ци отлыджино адя́кэ, со нико́н дава́ на дыкхэ́ла,

11. то совла́х анги́л Растэ-Дэвлэ́стэ мэк тэ явэ́л машки́р дуендэ дрэ дова́, со кон лыя́ пэ зракхибэ́н, на ґаздыя́ пэ́скиро васт пэ пэ́скирэ-пашатунэскиро миштыпэ́н; и хула́й исын банго́ тэ прилэл, а одова́ на явэ́ла тэ плэскирэл;

12. а ко́ли лэ́стэ явэ́ла чордо, тэды ёв исын банго́ тэ заплэскирэл лэ́скирэ хула́скэ;

13. ко́ли явэ́ла захано рискирибна́скирэ мурдалэса (зверёса), тэды мэк дро допхэныбэ́н тэ янэл захано дова́: пал захано ёв на плэскирэла.

14. Ко́ли вари-кон залэла пэ́скирэ пашатунэстыр кхэритконэ́ мурдалэс (ското), и ёв явэ́ла калечындло, ци мурдёла, а лэ́скирэ хула́с на сыс пашы́л лэ́стэ, тэды ёв исын исын банго́ тэ заплэскирэл;

15. нэ ко́ли лэ́скиро хула́й сыс пашы́л лэ́стэ, тэды ёв исын на банго́ тэ плэскирэл; ко́ли ёв сыс лыно́ пал вужлыпэ́н (длуго) пал ловэ́, тэды мэк ёв и тэ джал пал доя́ тими́н.

16. Ко́ли вари-кон обхохавэла напалоромиткона чха, сави́ исын наобрэнчындлы (наангрустякирды) и пирисовэла ла́са, мэк тэ дэл ла́кэ вено (да́ро) и тэ лэл ла пэ́скэ палоро́м (тэ лэл ла ромня́са);

17. а ко́ли дад на закамэ́ла тэ отдэ́л ла пал лэ́стэ, мэк ёв тэ заплэскирэл ада́кицы руп, ци бут трэй пэ вено, сыр пал напалоромитконэ чхаендэ.

18. Драбакирибнаскирэн на ячкир джидэнца.

19. Кажно скотоложнико мэк тэ явэ́л отдыно́ пэ мэрибэ́н.

20. Кон янэ́ла свэ́нто дыибэ́н (жэ́ртва) дэвлорэ́нгэ, апри́ч екхэ Растэ-Дэвлэ́стэ, мэк ёв тэ явэ́л мулякирдо.

21. Манушэ́с, саво́ явэ́ла явирэ рига́тыр, на притасав, и на дукхав лэс, пал-дова́ со тумэ́ кокорэ́ са́нас явирэ-ригакирэ мануша́, савэ́ явнэ́ пэ Египто́скири пхув.

22. Ни ўдовэн (пивлен), ни сиротэн (пиротэн) на притасавэн;

23. ко́ли ту притасавэса лэн, тэды, ке́ли ёнэ явэ́на тэ годлэн кэ Мэ, Мэ шунава лэ́нгири го́дла,

24. и захачкирэлапэ Мири́ холы́, и Мэ замарава тумэн куртала́са (мечоса), и явэ́на тумарэ́ ромня́ ўдовэнца (пивленца), и тумарэ́ чхавэ́ сиротэнца (пиротэнца).

25. Ко́ли дэ́са ту дро длуго (вужлыпэ́н) ловэ́ чорорэскэ Мирэ́ манушэ́ндыр, тэды на притасав лэн, и на чхув пэ лэ́ндэ ко́фо (процэнто).

26. Ко́ли лэ́са дрэ сымады́ (залого) тырэ́-пашатунэскири и́дя, кэ кхамэскиро загиибэ́н, отдэ́ ла палэ,

27. пал-дова́ со ёй (и́дя) исын екхори учхакирибэн лэ́стэ, ёй-лэ́скирэ-масэ́нгиро урибэ́н: дро со ёв явэ́ла тэ совэ́л? Адя́кэ, ке́ли ёв загодлэла кэ Мэ, Мэ ушунава, пал-дова́ со Мэ сом тангипнаскиро.

28. Сэндарьен на кош, и тхагарьен дрэ тырэ́ манушэ́ндэ на обракир.

29. На зарикир тэ янэс Ма́нгэ пэ́рва барьякирдэ́ (пло́ды) тырэ́ гумностыр (гиваобкэрибнаскирэ шурнатыр) и тырэ́ пресостыр (точылостыр); отдэ́ Ма́нгэ одолэ́ чхавэ́ндыр, кон бия́ндыя англатуно́;

45. Сыр фэ́ни ёнэ шунэ́на пал ма́ндэ, ёнэ кандэ́на ман, чхавэ́, намирэ-манушэ́нгирэ, бандякирэна шэрэ́ анги́л ма́ндэ.

46. Чужонэ-манушэ́нгирэ чхавэ́ ячэ́на зломка и ёнэ выджа́на пэ́скирэ барунэ́ рикирибнэндыр, издраиндой.

47. Тэ дживэ́л Рай Дэвэ́л! Тэ явэ́л бахтякирды мири́ Бэ́рга тэ зракхавпэ! Тэ шарэл вучэ́с саро́, со исын джидо́, Дэвлэ́с, Саво́ зракхэ́ла ман.

48. Ёв исын Дэвэ́л, Саво́ отдэ́ла палэ вэргэ́нгэ пал ма́ндэ, Саво́ помогинэла тэ лав упралыпэ́н пэ манушэ́ндэ;

49. Ёв зракхэ́ла ман мирэ́ вэргэ́ндыр: чачо́, одолэ́ндыр, савэ́ джа́на проти ма́ндэ. Ту зракхця́н ман нахратонэ (нахальнонэ) манушэ́ндыр.

50. Палдава́ мэ парикирава, бут мо́лы Ту́кэ, Раё Дэ́вла, анги́л Наюды́тка на́цыи и мэ ява́ва тэ бага́в гиля́ Тырэ́ лавэ́скэ.

26. Пал-дова́ со биладжакуны джувлы́ пэ́скирэ биладжаипнаса чорьякирэла манушэ́с кэ лабо маро́, а джувлы́, сави́ кэрэ́ла биладжаипэ́н, сы́рбы чорьёла пэ лэ́скиро дро́го джиибэ́н.

27. Ци могинэ́ла ману́ш тэ чхувэ́л яг пал пэ́скири брэк и, соб (кай) лэ́скирэ и́ди тэ на прохачон?

28. Ци могинэ́ла ману́ш тэ джал пир хачкирдэ́ вангара и, соб (кай) лэ́скирэ ґэра́ тэ на обхачон?

29. Дова́-паць исын кодолэ́ манушэ́са, саво́ псирэ́ла кэ пэ́скирэ-пашатунэскири ромны́: ко́ли вари-кон чилавэ́ла (чэпинэла) ла, кодова́ на ячэ́лапэ бибангипнаскиро (на явэ́ла на банго́).

1. Тэды Ису́со пхэндя́ манушэ́нгэ и Пэ́скирэ сыкляибнытконэ́нгэ:

2. “Пэ Мойза́скиро штэ́то сыклякирэ́на лылвари́тка и Фарисе́и;

3. палдава́ саро́, со ёнэ пхэнэ́на, кандэ́н и кэрэ́н саро́, а на кэрэ́н, сыр ёнэ кэрэ́на; пал-дова́ со ёнэ на кэрэ́на дова́, со ёнэ сыклякирэ́на,

4. и ёнэ пхандэна кхэтанэ́ барэ́ пхарипэна и чхувэ́на лэн пэ манушэ́нгирэ псикэ́, а кокорэ́ на камэ́на и ангуштэса тэ дэн васт лэ́нгэ.

5. Нэ саро́, со ёнэ кэрэ́на, – дава́ ваш дова́, соб (кай) лэн тэ дыкхэ́н мануша́: ёнэ буґлякирэна пхарты (ленты) пэ чикат и пэ васт мангипнытконэ лавэ́нца и барьякирэна брынды (фальбонки),

6. и выкэдэна най фэдэды́р штэ́ты пал кхардэ́ скаминда и англатунэ́ штэ́ты дрэ синагоги,

7. соб (кай) мануша́ тэ дэн ‘паклоно’ лэ́нгэ пэ таргитка штэ́ты и тэ кхарэ́н лэн ‘Равви’;

8. нэ мэк нико́н тэ на кхарэл тумэн ‘Равви’; пал-дова́ со амэ́ндэ исын екх Сыклякирибна́скиро, тумэ́ ж сан пша́ла машки́р пэ́стэ.

9. И никонэ́с пэ пхув тэ на кхарэ́н ‘дадэ́са’, пал-дова́ со тумэ́ндэ исын екх Дад, Саво́ исын дро Болыбна́скиро Раё.

10. И тэ на кхарэ́н тут ‘сыклякирибна́скиро’; пал-дова́ со исын екх тумэ́ндэ Сыклякирибна́скиро Христо́со.

11. И кон барэды́р тумэ́ндыр пир штэ́то машки́р манушэ́ндэ, мэк тэ явэ́л дына́ри тумэ́нгэ.

12. Нэ дова́, кон ґаздэ́ла пэс, лэс Дэвэ́л чхувэ́ла тэлэды́р, а кон чхувэ́ла пэс тэлэды́р, кодолэ́с Дэвэ́л ґаздэ́ла вучэды́р.

13. Бида тумэ́нгэ, дуемуитка лылвари́тка и Фарисе́и, савэ́ зачхакирэна вудара́ дро Кралипэ́н дро Болыбна́скиро Раё анги́л манушэ́ндэ; пал-дова́ со тумэ́ кокорэ́ на заджа́на, и тумэ́ сан тэрдэ́ пэ дром одолэ́ндэ, савэ́ камэ́на тэ заджа́н.

14. Бида тумэ́нгэ, дуемуитка лылвари́тка и Фарисе́и, со тумэ́ обхана пивленгирэ (удовэнгирэ) кхэра́ и пэфроми ґара́ (длу́гэс) мангэ́напэ Дэвлэ́скэ: пал дава́ тумэ́нгэ явэ́ла пхари́ ка́ра.

15. Бида тумэ́нгэ, дуемуитка лылвари́тка и Фарисе́и, со тумэ́ проджа́на мо́рё (дэрья́в) и пхув, соб (кай) тэ рискирэ́н екхэ манушэ́с тэ патял Наюдэндыр: и ке́ли ёв прилэ́ла лав, тэды кэрэ́на лэ́стыр кадасавэс, саво́ дрэ дуй мо́лы исын буты́р мол тэ джал дро лю́но (адо), сыр тумэ́ сан.

16. Бида тумэ́нгэ, корорэ́ лыджаибна́скирэ, савэ́ ракирэ́на: ‘Кон совлахала кхангирьяса, дава́ исын нисо́; нэ кон совлахала кхангирья́кирэ сувнака́са, кодова́ ману́ш исын банго́ тэ кэрэ́л пир лав.’

17. Тумэ́ сан бигодякирэ и корорэ́, со исын кучэдыр: сувнака́й ци кхангири́, сави́ свэнцякирэла сувнака́й?

18. И, ‘кон совлахала алтарёса нисо́, нэ кон совлахала свэнтонэ́ дыибнаса, кодова́ исын банго́ тэ кэрэ́л саро́.’

19. Тумэ́ сан корорэ́ мануша́! Со ж исын кучэдыр: свэ́нто дыибэ́н ци алта́рё, кай свэ́нто дыибэ́н свэнцякирэлапэ ваш Дэвлэ́скэ?

20. Палдава́, кон совлахала алтарёса, совлахала сарэ́са, со мануша́ чхудэ́ пэ алта́рё;

21. И кон совлахала кхангирьяса, совлахала ла́са и Кодолэса, Кон дживэ́ла дрэ кхангири́.

22. И кон совлахала Болыбна́скирэ Раёса, совлахала Дэвлэ́скирэ штэтоса, кай Дэвэ́л хулаинэла, и Лэ́са, Саво́ исын бэшто́ пэ дава́ штэ́то.

Romani Bible Baltic 2019

United Bible Societies for the Baltic Romani Mission