Bible in one year
February 6

1. На розлыджа чхучо́ (пусто) ракирибэ́н, на дэ тыро́ васт напатяибнытконэскэ, соб (кай) тэ явэс якхитконэса хохаибнаскэ.
2. На джа́ пала́л пал манушэ́нгиро скопо тэ кэрэ́с фуипэ́н, и на допхэн дро рэ́ндо адя́кэ, соб (кай) чачипэ́н тэ рискирэ́н, сыр бут мануша́.
3. И чорорэс на подрикир дро лэ́скиро рэ́ндо пир чачипэ́н,
4. ко́ли латхэса тырэ́-вэргоскирэ гурувэ́с, ци лэскирэс осло́с; саво́ заблэндындя, ян лэс палэ кэ ёв.
5. Ко́ли дыкхэ́са тырэ́-вэргоскирэ осло́с, саво́ пыя́ тэл пэ́скиро пхарипэ́н, тэды на ячкир лэс, злэ лэ́стыр пхарипэ́н;
6. на сэндякир хоханэ́с тырэ́-чорорэскиро рэ́ндо пир чачипэ́н,
7. отджа хохаибнастыр, и на мулякир набангэс и саво́ исын чачипна́скиро; пал-дова́ со Мэ на чачакирава (на оправдынава), кон кэрэ́ла фуес.
8. Мыты (взятки) на прилэ́: пал-дова́ со мыты (взятки) кэрэ́на корорэнца, кон дыкхэ́ла, и пирикэрэна лава́ чачунэ́ манушэ́ндыр.
9. Кон явэ́ла явирэ рига́тыр, на дукхав (на притасав) лэс: тумэ́ джинэ́на лэ́скиро ди, пал-дова́ со тумэ́ кокорэ́ са́нас на пэ́скирэ мануша́ пэ Египто́скири пхув.
10. Шов бэрш чхув зя́рка (зярно) дрэ тыри́ пхув и скэ́дэ, со ёй биянэ́ла,
11. а пэ эфта́то (битринэ́нгиро дэ́што) бэрш ячкир ла тэ откхинёл, соб (кай) тэ чаравэнпэ тырэ́ манушэ́ндыр чорорэ́, а со ячэ́лапэ пал лэ́ндэ, то мэк тэ чаравэнпэ фэлды́тка рискирибна́скирэ мурдала́ (звери); адя́кэ-паць кэр тырэ́ винаградникоса и тырэ́ оливитконэ унтаса (маслинаса).
12. Шов дывэса́ кэр тырэ́ рэ́нды, а пэ эфта́то дывэ́с откхинёв, соб (кай) тэ откхинёл тыро́ гурув и тыро́ о́сло (мега́ри), и тэ откхинёл бутя́тыр тырэ́-дынарицакиро чхаво́, и кон явдя́ явирэ рига́тыр.
13. Ракхэ́н саро́, со Мэ пхэндём тумэ́нгэ; и явирэ-дэвлэнгирэ лава́ на ракирэ́н: мэк тэ на явэ́л дава́ шундло тырэ́ уштэндыр.
14. Трин мо́лы дро бэрш свэнкин Ма́нгэ:
15. дыкх (ракх) свэ́нко апреснокэнгиро: эфта́ дывэса́ ха пресно маро́, сыр Мэ ракирдём ту́кэ, дро упхэндло́ часо чхонэ́скиро Авиво; пал-дова́ со дро дава́ чхон ту выгиян Египто́стыр; и мэк тэ на явэ́н мануша́ анги́л Ма́ндэ чхучэ́ вастэ́нца;
16. дыкх (ракх) и свэ́нко убияныпнаскиро пэрвонэ́ барьякирдэнца (плодэнца) пхарэ́ бутя́тыр, савэ́ ту почхудян пэ фэ́лда, и свэ́нко плодэнгиро скэдыибэ́н дро бэршэскиро ко́нцо (яго́ро), ке́ли укэдэса фэлдатыр тыри́ буты́.
17. Трин мо́лы дро бэрш исын бангэ́ тэ явэ́н сарэ́ тырэ́ мурша́ анги́л Барэ́-Ра́скиро, Ра́скирэ-Дэвлэ́скиро муй.
18. На чхув рат Мирэ́-свэнтонэ́ дыибна́стыр (жэртватыр) квашэнонэ марэ́са, и чэкэ́н (ту́ко) Мирэ́ свэнкоскирэ жэртватыр нашты́ тэ ячэ́лпэ кэ ра́нко (кэ зло́ко).
19. Тырэ́ пэ́рва (англатунэ́) пхувья́кирэ барьякирдэ́ (пло́ды) ян дрэ Ра́скиро-Дэвлэ́скиро, тырэ́ Дэвлэ́скиро Кхэр. На кэра́в бузнорэс дро лэ́скирэ – да́киро тхуд.
20. Ѓа́да, Мэ бичхава́ва анги́л ту́тэ Янголо́с тэ ракхэ́л тут пэ дром и тэ залыджал тут пэ дова́ штэ́то, саво́ Мэ кэрдём скэдыно́.
21. Ракх пэс анги́л Лэ́скиро муй, и шун Лэ́скири зан; на яв проти Лэ́стэ, пал-дова́ со Ёв на отмэкэ́ла тумаро́ грэ́хо; пал-дова́ со Миро лав исын дрэ Лэ́стэ.
22. Ко́ли ту явэ́са тэ шунэ́с Лэ́скири зан и тэ кэрэ́с саро́, со Мэ пхэна́ва, тэды Мэ ява́ва вэргоса (врогоса) тырэ́ вэргэ́нгэ и намалэса (противникоса) тырэ́ намалэнгэ.
23. Ке́ли джа́ла анги́л ту́тэ Миро Янго́ло, и лыджа́ла тут кэ Амореи, Хетеи, Ферезеи, Хананеи, Евеи и Евусеи, и Мэ вымарава лэн:
24. тэды на клонинпэ (на кэр шэрэ́са) лэ́нгирэ дэвлорэ́нгэ, и на дынарин лэ́нгэ, и на пирилэ лэ́нгирэ рэ́нды, нэ пхагир лэн, и роспхагир лэ́нгирэ сты́лбы:
25. дынарин Ра́скэ-Дэвлэ́скэ, тумарэ́ Дэвлэ́скэ, и Ёв бахтякирэ́ла Тыро́ маро́ и Тыро́ пани́; и Мэ отлыджава насвалыпэна тумэ́ндыр.
26. На явэ́ла би часоскиро тэ биянэн и на явэ́ла накхабнэн (бичхаворэнгирэн) пэ тыри́ пхув; Мэ кэра́ва пхэрдэ́ тырэ́-джиибна́скирэ дывэса́.
27. Мэ бичхава́ва Мири́ траш (дар) анги́л ту́тэ, и дро конфузо Мэ яна́ва кажнонэ́ манушэ́н, кэ савэ́ ту явэ́са, и Мэ ява́ва тэ обрискирав кэ ту палалэса сарэ́н тырэ́ вэргэ́н;
28. Мэ бичхава́ва анги́л ту́тэ шэршнен (вослэн), и ёнэ традэ́на тырэ́ мо́стыр Евеен, Хананеен и Хетеен;
29. Мэ на вытрадава лэн тырэ́ мо́стыр дро екх бэрш, соб (кай) пхув тэ на кэрэ́лпэ чхучи́ и тэ на выбарьён проти ту́тэ фэлды́тка рискирибна́скирэ мурдала́ (звери);
30. на́бут пэ на́бут Мэ ява́ва тэ традав лэн ту́тыр, кэ дава́ часо, пака ту выбарьёса дрэ манушэ́ндэ и на лэ́са дрэ пэ́скирэ васта́ дая́ пхув.
31. Пролыджава тырэ́ ме́жы Лолэ́ морёстыр (дэрьявэстыр) кэ мо́рё (дэрья́в) Филистимиякиро и чхучэ́ пхувья́тыр кэ рэка (лэнь); пал-дова́ со Мэ отда́ва дрэ тумарэ́ васта́ адалэ́-пхувья́кирэ манушэ́н, и ту традэса лэн криг тырэ́ мо́стыр;
32. на кэр завето (доракирибэ́н) ни лэ́нца, ни лэ́нгирэ дэвлорэнца;
33. лэ́нгэ нашты́ тэ дживэ́н пэ тыри́ пхув, соб (кай) ёнэ тэ на залыджан тут дро грэ́хо пэ Ма́ндэ; пал-дова́ со, ко́ли ту явэ́са тэ мангэспэ лэ́нгирэ дэвлорэ́нгэ, то дава́ явэ́ла ту́кэ фэляса (сеткаса).”
1. И пхэндя́ Ёв Мойза́скэ: “Джа́ упрэ́ кэ Рай Дэвэ́л, ту и Ааро́но, Надаво и Авиудо и эфтадэша́ Израилёскирэ пхурыдыра́, и кэрэ́н шэрэ́са (поклонинэнпэ) дура́л.
2. И Мо́йза, мэк екхджино́ тэ подджа́л кэ Рай Дэвэ́л, а ёнэ мэк тэ на подджан, и мануша́ мэк тэ на ґаздэ́нпэ лэ́са.”
3. И явдя́ Мо́йза, и пирипхэндя манушэ́нгэ сарэ́ лава́ Ра́стыр-Дэвлэ́стыр и сарэ́ зако́ны. И отпхэндлэ́ сарэ́ мануша́ дрэ екх зан, и пхэндлэ́: “Саро́, со пхэндя́ Рай Дэвэ́л, кэра́са.”
4. И зачхиндя́ Мо́йза сарэ́ лава́ Ра́стыр-Дэвлэ́стыр, и, уштыи пэ ра́нко, чхудя́ тэл бэ́рга алта́рё (жэртвенико) и дэшуду́й бара́, пир дэшуду́й Израилёскирэ ро́дыцы;
5. и бичхадя́ Израилёскирэ чхавэ́ндыр тэрнэн, и ёнэ яндлэ́ цэ́ла схачкирибэна, и замардэ́ гуруворэ́н (тельцэн) ваш ми́рно свэ́нто дыибэ́н (жэ́ртва) Ра́скэ-Дэвлэ́скэ.
6. Мо́йза лыя́ паш рат, чхудя́ дрэ тахтая́, а явирэ пашэ́са обчхудя́ алта́рё;
7. и лыя́ заветоскири лылвари́, и прогиндя зоралэ́с (дыя́ упрэ́) манушэ́нгэ, и пхэндлэ́ ёнэ: “Саро́, со пхэндя́ Дэвэ́л, кэра́са и ява́са тэ кандас.”
8. И лыя́ Мо́йза рат, и обрызгиндя манушэ́н, ракири́: “Ѓа́да, исын завето́скиро рат, саво́ Рай Дэвэ́л кэрдя́ тумэ́нца пир сарэ́ далэ́ лава́.”
9. Тэ́ньци гия́ упрэ́ Мо́йза и Ааро́но, Надаво и Авиудо и эфтадэша́ Израилёскирэ пхурыдыра́,
10. и дыкхнэ́ ёнэ Израилёскирэ Дэвлэ́с; и тэл Лэ́скирэ ґэра́ сыс вари-со, со поджалас сыр буты́ кэрды жужэ́ сапфиростыр, и сыс ясно, сыр кокоро́ болыбэ́н.
11. И Ёв на протырдыя́ Пэ́скиро васт пэ выкэдынэ́ Израилёскирэ чхавэ́ндэ: ёнэ дыкхнэ́ Дэвлэ́с, и ханэ́, и пинэ́.
12. И пхэндя́ Рай Дэвэ́л Мойза́скэ: “Джа́ упрэ́ кэ Мэ пэ бэ́рга; и яв одо́й, и Мэ да́ва ту́кэ барунэ́ скрижа́ли (таблицы), и Зако́но и припхэныбэна́ (дэшатунэ), савэ́ Мэ чхиндём тэ сыклякирэс лэ́нгэ.”
13. И уштыя́ Мо́йза Исусо́са (Ёхошуаса), пэ́скирэ помогибнаскирэса, и гия́ Мо́йза пэ Дэвлэ́скири бэ́рга,
14. а пхурыдырэнгэ пхэндя́: “Ячэ́нпэ ада́й, пака амэ рисёваса кэ тумэ́; ґа́да, Ааро́но и Оро исын тумэ́нца; ко́ли явэ́ла тумэ́ндэ рэ́ндо, мэк тэ явэ́л кэ ёнэ.”
15. И гия́ упрэ́ Мо́йза пэ бэ́рга, и учхакирдя́ о́блоко бэ́рга,
16. и Ра́скирэ-Дэвлэ́скири сла́ва закэрдя бэ́рга Синаё; и учхакирэ́ла ла о́блоко шов дывэса́, а пэ эфта́то дывэ́с кхардя́ Рай Дэвэ́л кэ Пэ Мойза́с облокостыр.
17. Бицялы сыс сла́ва Ра́скирэ-Дэвлэ́скири пэ бэрга́киро вучипэ́н анги́л Израилёскирэ-чхавэ́нгирэ якха́, сыр яг, сави́ схачкирэ́ла.
18. Мо́йза загия́ дрэ машкира́л о́блоко, и гия́ упрэ́ пэ бэ́рга; и сыс Мо́йза пэ бэ́рга штардэша́ дывэса́ и штардэша́ ратя.
1. Хоро́скирэ Дирижироскэ. Давидо́скиро Пса́лмо.
2. Болыбэ́н дудвалякирэла (роспхэнэ́ла) пал Дэвлэ́скири бари сла́ва и свэтоскиро буґлыпэ́н (сво́до) сыкавэ́ла, со Дэвэ́л создыя́.
3. Кажно дывэ́с пирипхэнэла лава́ явирэ дывэсэскэ, и рат пиридэла лава́ тэ джинэ́л явирэ ратякэ.
4. Нанэ чиб, нанэ лава́, соб (кай) тэ на явэ́л екхори зан шундлы,
5. Лэ́нгирэ-глосакири ме́ра розджалапэ пир сари́ пхув и лэ́нгирэ лава́ аж кэ яго́ры (кэ пределы) пхувья́кирэ.
6. Дэвэ́л чхудя́ штэ́то тэ дживэ́л кхамэскэ дрэ лэ́ндэ, саво́ выджа́ла сыр тэрно́ бьявитконэ штубатыр. Ёв радынэ́лапэ сыр прастаибнаскиро ману́ш анги́л дова́, сыр тэ прастал пэ призо.
30. Мануша́ на примангэна чорэскэ, ко́ли ёв чорэла, соб (кай) тэ явэ́л чало, ке́ли ёв бокхалёла:
31. нэ ко́ли латхэ́на лэс, тэньці ёв явэ́ла банго́ тэ дэл палэ эфта́ мо́лы бутэды́р; лэ́скэ приявэлапэ тэ отдэ́л саро́ лэ́скирэ кхэрэ́стыр.
23. Бида тумэ́нгэ, дуемуитка лылвари́тка и Фарисе́и: пал-дова́ со тумэ́ дэ́на дэ́што ме́ра мятатыр, укропостыр, кминостыр, нэ тумэ́ на кутякирэна дова́, со буты́р трэй дро Зако́но: чачуно́ сэ́ндо и тангипэ́н и патяибэ́н: дава́ трэиндя́ тэ кэрэ́н и адя́кэ-паць тэ на бистрэн пал яви́р.
24. Тумэ́ сан корорэ́ лыджаипнарья, савэ́ пирицэдинэна дзындзарис (комарос), нэ накхавэна верблюдос!
25. Бида тумэ́нгэ, дуемуитка лылвари́тка и Фарисе́и: пал-дова́ со тумэ́ жужакирэна тахта́й (чаша) и чаро́ яврестыр, нэ андра́л ёнэ сыкавэ́на тумари́ бокх кэ чу́жо миштыпэ́н и сквапныма.
26. Ту сан короро́ Фарисеё! Анги́л выжужакир андра́л тахта́й и чаро́, соб (кай) тэ явэ́н жужэ́ яврестыр.
27. Бида тумэ́нгэ, дуемуитка лылвари́тка и Фарисе́и: пал-дова́ со тумэ́ сан сыр коплицы, савэ́ исын парнякирдэ и савэ́ исын гожа яврестыр, нэ андра́л ёнэ исын пхэрдэ́ кокалэнца мулэ́ манушэ́ндыр и сарэ́ джунгалыпнаса (брыдкимаса).
28. Адя́кэ-паць тумэ́ яврестыр сыкадёна сыр патяибнытка мануша́ манушэ́нгэ, нэ андра́л тумэ́ сан дуемуитка и древа́н грэхи́тка.
29. Бида тумэ́нгэ, дуемуитка лылвари́тка и Фарисе́и, пал-дова́ со кэрэ́на коплицы пророкэнгэ и гожакирэна помники патяибнытконэнгэ,
30. и ракирэ́на: ‘Ко́ли амэ дживасас дрэ амарэ́ дадэнги́рэ дывэса́, амэ на явасас мала́ одолэ́нгэ, савэ́ мулякирэнас пророкэ́н.’
31. Пир дая́ причына тумэ́ допхэнэна пэ пэ́стэ, со тумэ́ сан кодолэнгирэ чхавэ́, савэ́ мулякирэнас пророкэ́н:
32. тэды кончынэн дава́, со тумарэ́ прапапы лынэ́ тэ кэрэ́н.
33. Тумэ́ сан сапа, ро́до сапитко, сыр тумэ́нгэ тэ нашэ́н сэндостыр дро лю́но (адо)?
34. Акэ, палдава́ Мэ бичхава́ва кэ тумэ́ пророкэ́н и годьварэ́ манушэ́н и лылваритконэн; вари-савэ́н лэ́ндыр тумэ́ мулякирэна и примарэна пэ трушу́л, и явирэ́н явэ́на тэ шулякирэн дрэ синагоги и традэ́н штэто́стыр пэ штэ́то;
35. палдава́ мэк тэ гинэлпэ пал тумэ́ндэ саро́ рат патяибнытконэ манушэ́нгиро, со тумэ́ прочхудэ пэ пхув: Авелёскирэ патяибнытконэ ратэстыр кэ Захариёскиро рат, Варахиёскирэ чхавэ́скиро, конэ́с тумэ́ мулякирдэ́, машки́р Кхангири́ и алта́рё.
36. Чачэс, Мэ ракира́ва тумэ́нгэ: кадай сари́ ка́ра явэ́ла пэ дава́ ро́до.
37. Ерусалимэ! Ерусалимэ! Дро саво́ мулякирэнас пророкэ́н и шулякирэнас барэ́нца кодолэ́н, савэ́н бичхадэ́ кэ ту. Кицы́ мо́лы Мэ кама́м тэ скэдав чхаворэ́н тырэ́н, сыр чириклы скэдэ́ла чириклорэн тэл пхак и тумэ́ на камлэ́!
38. Акэ, кхэр тумаро́ мэкэлапэ чхучо́ (пусто) тумэ́нгэ.
39. Палдава́ Мэ ракира́ва тумэ́нгэ: тумэ́ на явэ́на тэ дыкхэ́н Ман кадалэ́ дывэсэ́стыр анги́л дова́, сыр тумэ́ пхэнэ́на: ‘Бахтякирдо́ исын Одова́, Саво́ джа́ла ваш Дэвлэ́скиро лав.’”
Romani Bible Baltic 2019
United Bible Societies for the Baltic Romani Mission