Bible in one year February 7Exodus 25:1-401. И пхэндя́ Рай Дэвэ́л Мойза́скэ, и ракирдя́:2. “Пхэн Израилёскирэ чхавэ́нгэ, соб (кай) ёнэ тэ кэрэ́н Ма́нгэ яныбэ́н; кажнонэ́ манушэ́стыр, саво́ пэ ило́ явэ́ла тэ дэл, прилэ́н яныбэ́н Ма́нгэ.”3. Ѓа́да, исын яныбэ́н, савэ́ тумэ́ сан бангэ́ тэ прилэ́н лэ́ндыр: сувнака́й, и руп, и харко́ма (медь),4. и ґолубово вы́лна (шэрсь), пурпурно и чэрвлено, и висоно, и бузненгири вы́лна,5. и бакранэ лолэ́ цыпи, синэ цыпи, и вэш ситимо,6. дзэт (елеё) ваш шандало (свети́льнико), ароматытка чарья́ тэ макхэс и ваш гудло́ тхув (дымо),7. бар ониксо и учхудэ бара́ ваш эфо́до и ваш наперснико (жылетка).8. И кэрэ́на ёнэ Ма́нгэ свэ́нто штэ́то, и Мэ ява́ва тэ джива́в машки́р лэ́ндэ;9. саро́, сыр Мэ ту́кэ сыкава́ва, и сыкаибэ́н (образцо) шатракиро (скиниякиро), и сыкаибэ́н сарэ́ далэ́ ла́кирэ кхорэнгиро; адя́кэ и кэрэ́н.10. Кэрэ́н ковчэго (мохто́) вэшэ́стыр ситимо: длэнгипэ́н лэ́скэ тэ явэ́л дуй пашэ́са куня́ (локти), и буґлыпэ́н лэ́скэ тэ явэ́л екх пашэ́са куня́, и вучипэ́н лэ́скэ екх пашэ́са куня́;11. и обчхув лэс жужэ́ сувнака́са, андрэстыр и яврестыр, учхакир лэс; и кэр упра́л пашы́л лэ́стэ сувнакуны́ вя́нка.12. И вычхув ваш лэ́скэ штар сувнакунэ́ барэ́ ангрустя́ и призорьякир (прикэр) пэ штар тэлатунэ́ лэ́скирэ вэ́нглы; дуй барэ́ ангрустя́ пэ екх лэ́скири риг, дуй барэ́ ангрустя́ пэ яви́р лэ́скири риг.13. Кэр вэшэ́стыр ситимо баландиня́ (шосты), и обчхув лэн сувнака́са;14. И чхув андрэ́ шосты дрэ барэ́ ангрустя́, пир ковчэгоскирэ рига́, соб (кай) лэ́нца тэ лыджа́н ковчэго;15. дрэ ковчэгоскирэ барэ́ ангрустя́ бангэ́ тэ явэ́н шосты и нашты́ тэ отлэн лэ́стыр.16. И чхув лэн дрэ ковчэго досыкаибна́са (откровенияса), саво́ Мэ ту́кэ дыём.17. Кэр адя́кэ-паць жужэ́ сувнака́стыр дэнко (крышка): длэнгипэ́н ла́киро дуй куня́ пашэ́са, а буґлыпэ́н ла́киро екх пашэ́са куня́;18. и кэр сувнака́стыр дуе́н херувимэн: чеканонэ бутя́тыр кэр лэн пэ дуй заучхакирибнытка яго́ры (концы);19. кэр екхэ херувимос екхэ ягоро́стыр, а явирэ херувимос явирэ ягоро́стыр; кэрэ́н херувимэн кхэтанэ́ дэнкоса (крышкаса) пэ ла́кирэ дуй яго́ры;20. и явэ́на херувимы ґаздынэ́ упрэ́ пхакэнца, заучхакири пэ́скирэ пхакэнца крышка, а пэ́скирэ муенца явэ́на екх кэ екх; кэ дэнко явэ́на херувимэнгирэ муя́.21. И чхув пэ ковчэго (мохто́) упрэ́, дро ковчэго чхув досыкаибэн (откровения), саво́ Мэ ту́кэ дава́;22. одо́й Мэ ява́ва тэ сыкадёвав ту́кэ и тэ ракира́в ту́са упра́л, кай упрэ́ дэнко, машкира́л дуй херувимы, савэ́ пэ ковчэго досыкаибна́са (откровенияса), пал саро́, со Мэ ява́ва тэ пиридав пир ту́тэ Израилёскирэ чхавэ́нгэ.23. И кэр сками́нд вэшэ́стыр ситимо, длэнгипна́са дрэ дуй куня́, буґлыпнаса дрэ екх кунь, а вучипна́са дрэ екх кунь пашэ́са,24. и обчхув лэс жужэ́ сувнака́са, и кэр пашы́л лэ́стэ сувнакуны́ вя́нка (фризо).25. И кэр пашы́л лэ́скирэ рига́ (боки) дрэ бурнык (ладошка) буґлыпнаса, и пашы́л лэ́скирэ рига́ кэр сувнакуны́ вя́нка пашы́л;26. и кэр ваш лэ́скэ штар сувнакунэ́ барэ́ ангрустя́, и призорьякир (прикэр) ангрустя́ пэ штар вэ́нглы пашы́л лэ́скирэ штар ґэрорэ;27. пашы́л боки (рига́) бангэ́ тэ явэ́н брэнчы (обручи), соб (кай) тэ чхувэ́с баландиня́ (шосты), соб (кай) тэ лыджас пэ лэ́ндэ сками́нд;28. а баландиня́ кэр вэшэ́стыр ситимо, и обчхув лэн сувнака́са, и явэ́на тэ лыджа́н пэ лэ́ндэ дава́ сками́нд;29. кэр адя́кэ-паць ваш лэ́скэ чарорэ, кадилы, тахтая́ и кучика, соб (кай) лэ́нца тэ обчхувэс: жужэ́ сувнака́стыр кэр лэн;30. и чхув пэ сками́нд свэ́нта марэ́ (предложэния) анги́л Миро муй саро́ часо.31. И кэр момолы́тко (свети́льнико) жужэ́ сувнака́стыр; чэканиндло банго́ тэ явэ́л дава́ момолы́тко; лэ́скиро дэсто́, лэ́скирэ рандя́, кучикорья лэ́скирэ, пхаба́ лэ́скирэ и лулудя́ (цвэты) лэ́скирэ трэй, соб (кай) ёнэ тэ выджа́н лэ́стыр;32. трэй, соб (кай) шов рандя́ тэ выджа́н лэ́скирэ ригэ́ндыр: трин рандя́ момолытконэскирэ екхэ лэ́скирэ рига́тыр, и трин рандя́ момолытконэскирэ явирэ лэ́скирэ рига́тыр;33. трин кучикорья, савэ́ поджана пэ миндально лулуди́ (цвэто) тэ явэ́н пэ екх рандь, пхабаса и лулуденца и трин кучикорья, савэ́ подджана пэ миндально лулуди́ (цвэто) пэ яви́р рандь, пхабаса и лулуденца: адя́кэ явэ́ла пэ сарэ́ шов рандя́, савэ́ выджа́на момолытконэстыр;34. а пэ момолытконэскиро дэсто́ трэй, соб (кай) тэ явэ́л штар кучикорья, савэ́ тэ явэ́н сы́рбы миндально лулудя́ пхабэнца и лулуденца;35. шовэ рандендыр, савэ́ выджа́на момолытконэскирэ ґэрьятыр тэ явэ́л пхабай тэл дуй лэ́скирэ рандя́, и пхабай тэл трита дуе лэ́скирэ рандендыр.36. Пхаба и рандя́ лэ́нгирэ трэй, соб (кай) ёнэ тэ выджа́н лэ́ндыр: трэй, соб (кай) ёв саро́ тэ явэ́л чэкандло, цэ́ло, жужэ́ сувнака́стыр.37. И кэр кэ ёв эфта́ лампады, и чхув пэ лэ́стэ лампады лэ́скирэ, соб (кай) тэ свенцынэн (тэ дэн дуд) пэ англатуны лэ́скири риг (боко);38. и шчыпцы (цымты) кэ ёв и лотки кэ ёв тэ явэ́н жужэ́ сувнака́стыр;39. талантостыр, жужэ́ сувнака́стыр, тэ кэрэ́н лэс сарэ́ лэ́скирэ судинкэнца.40. Дыкх, кэр лэн пир дова́ сыкаибэ́н (образцо), саво́ сыс сыкадо ту́кэ пэ бэ́рга.Exodus 26:1-371. Ша́тра (ски́ния) кэр дэшэ цэргэндыр (покрывалэндыр) крэнцэнонэ висоно́стыр, и голубовонатыр, пурпуровонатыр и чэрвлёнонэ вылна́тыр, и кэр херувимы пэ лэ́ндэ высудэ бутяса;2. длэнгипэ́н кажнонэ́-цэргакирэ тэ явэ́л биш тэ охто́ (бидуе́нгиро дэш) куня́ (локти), а буглыпэн кажнонэ́-цэргкиро ядякэ-паць тэ явэ́л штар куня́: тэ явэ́л екх барипэ́н сарэ́ цэргэнгэ.3. Пандж цэрги мэк тэ явэ́н кхэтанякирдэ екх екхаса, и яви́р пандж цэрги кхэтанякирдэ екх екхаса.4. Кэр фэля́ (петли) голубовонэ́ цвятоса (мастиняса) пэ яго́ро (краё) дрэ англатуны цэ́рга пэ яго́ро, кай кхэтанякирэнапэ дуй паша́; адя́кэ кэр и пэ яго́ро (краё) пэ палатуны цэ́рга.5. Пандждэша́ фэля́ (петли) кэр дрэ екх цэ́рга, и пандждэша́ фэля́ (петли) кэр пэ яго́ро цэргакиро, сави́ кхэтанякирэлапэ явирьяса; фэля́ трэй, соб (кай) тэ поджан екх кэ яви́р;6. и кэр пандждэша́ нанглорэ (крючки) сувнакунэ́, и нанглорэнца кхэтанякир цэрги екх явирьяса, и явэ́ла ша́тра (ски́ния) сыр екх цэ́ло.7. И кэр дэки (цэрги) бузненгирэ вылна́тыр, соб (кай) тэ заучхакирэн ша́тра; дэшуекх цэрги кэр дасавэ́;8. длэнгипэ́н дрэ екх цэ́рга тэ явэ́л трия́нда куня́ (локти), а буглыпэн штар куня́; дава́ исын екх цэ́рга: дрэ дэшуекх цэрги екх барипэ́н (размеро).9. И кхэтанякир пандж цэрги ишчо (инкэ́) е́кхвар и шов цэрги ишчо (инкэ́) е́кхвар; шо́вто цэ́рга кэр дуендыр англатунэ́-шатракирэ рига́тыр.10. Кэр пандждэша́ фэля́ (петли) пэ яго́ро дро крайнё цэ́рга, соб (кай) тэ кхэтанякирэс ла явирьяса, и пандждэша́ фэля́ пэ яго́ро дрэ яви́р цэ́рга, ваш кхэтанякирибэн ла́са;11. кэр пандждэша́ нанглорэ харкома́тыр (медятыр), и чхув дрэ фэля́, и кхэтанякир лэн, соб (кай) ёв тэ явэ́л сыр екх цэ́рга.12. А лишнё ишчо (инкэ́) котэ́р, со ячэ́лапэ шатракирэ цэргэндыр, – паш лишнё цэ́рга мэк тэ явэ́л змэкны пэ палатуны шатракири риг (боко);13. а лишнё котэ́р шатракирэ-цэргакирэ длэнгипнастыр, пэ кунь екхэ рига́тыр, и пэ кунь явирэ рига́тыр, мэк тэ явэ́л змэкно пир рига́ дрэ ша́тра долэ́ и явирэ рига́тыр, ваш ла́киро учхакирибэн.14. И кэр дэка (покрышка) бакранэ лолэ́ цыпэндыр, и ишчо (инкэ́) упратуны дэка синэ (барсукэнгирэ) цыпэндыр.15. И кэр брусы ваш ша́тра вэшэ́стыр ситимо, соб (кай) ёнэ тэ тэрдён:16. длэнгипна́са брусо дрэ дэш куня́ (локти), и екх пашэ́са кунь буґлыпэ́н дрэ кажно брусо;17. дрэ кажно брусо пир дуй шыпы, екх анги́л явирэ́стэ; адя́кэ кэр дрэ сарэ́ брусы дрэ ша́тра.18. Адя́кэ кэр брусы ваш ша́тра: биш брусы пир паш-дывэсы́тко риг, кэ юго,19. И тэл биш брусы кэр штардэша́ рупунэ (рупувэ́) гэрорэ: дуй ґэрорэ тэл екх брусо ваш дуй лэ́скирэ шыпы, и дуй ґэрорэ тэл яви́р брусо ваш дуй лэ́скирэ шыпы;20. и биш брусы ваш явирэ-шатракири риг кэ паш-рат (северо),21. и ваш лэ́нгэ штардэша́ рупувэ́ ґэрорья: дуй ґэрорья тэл екх брусо, и дуй ґэрорья тэл яви́р брусо.22. Ваш палатуны шатракири риг кэ западо кэр шов брусы.23. И дуй брусы кэр ваш шатракирэ вэ́нглы пэ палатуны риг;24. трэй, соб (кай) ёнэ тэ явэ́н кхэтанякирдэ дро низо и кхэтанякирдэ упрэ́ кэ екх бари ангрусты (брэнчо): адя́кэ трэй тэ явэ́л лэ́нца дуенца; ваш дуй вэ́нглы мэк ёнэ тэ явэ́н;25. и адя́кэ явэ́ла охто́ (бидуе́нгиро дэш) брусы, и ваш лэ́нгэ дэшушов рупувэ́ ґэрорья: дуй ґэрорья тэл екх брусо, и дуй ґэрорья тэл яви́р брусо.26. И кэр баландиня́ (шосты) вэшэ́стыр ситимо, пандж ваш брусы екхэ-ригакирэ скиниятыр,27. и пандж баландиня́ ваш брусы явирэ рига́тыр дрэ ша́тра, и пандж баландиня́ ваш брусы палатунэ́ рига́тыр (бокостыр) палэ ша́тра, кэ западо;28. а андратуны́ баландин явэ́ла тэ проджал машкира́л брусы екхэ ягоро́стыр кэ яви́р;29. брусы обчхув сувнака́са, и барэ́ ангрустя́ (брэнчы) тэ чхувэ́н андрэ́ баландиня́, кэр сувнака́стыр, и баландиня́ (шосты) обчхув сувнака́са.30. И чхув ша́тра (ски́ния) упрэ́ пир сыкаибэ́н (образцо), саво́ сыс сыкадо ту́кэ пэ бэ́рга.31. И кэр полого (завеса) голубовонэ́, пурпуронэ и чэрвлёнонэ вылна́тыр и крэнцонэ висоно́стыр; узорэнца спецоскирэ бутя́тыр трэй тэ явэ́н кэрдэ́ пэ ла́тэ херувимы;32. и ублав ла пэ штар ситимоскирэ сты́лбы, обчхудэ сувнака́са, сувнакунэ́ нанглорэнца, пэ штар рупувэ́ ґэрорья;33. и ублав полого тэлэ́ пэ нанглорэ, и залыджа одори́к пал шы́рма, сави́ исын анги́л ковчэго досыкаибна́са (откровениё); и явэ́ла шы́рма, тэ роскэрэ́л свэ́нто штэ́то Свэнтонэ́ – Свэнтонэндыр.34. И чхув дэнко (крышка) пэ ковчэго досыкаибна́са (откровенияса) дро Свэ́нто-Свэнтонэндыр.35. И чхув сками́нд пал шы́рма, и момолы́тко (свети́льнико) проти сками́нд пэ риг шатракири кэ паш-дывэ́с (юго); сками́нд чхув пэ паш-рати́тко (северно) риг.36. И кэр шы́рма тэ учхакирэс загиибэ́н дрэ ша́тра голубовонэ́ и пурпуронэ и чэрвлёнонэ вылна́тыр и крэнцононэ висоно́стыр высудэ бутя́тыр пир узоро;37. и кэр ваш шы́рма пандж сты́лбы ситимостыр, и обчхув лэн сувнака́са; нанглорэ кэ ёнэ тэ явэ́н сувнакунэ́; и вычхув ваш лэ́нгэ пандж ґэрорья харкома́тыр (медятыр).Psalms 19:7-147. Ёв (кхам) лэ́ла тэ джал болыбна́скирэ ягоро́стыр и лэ́скиро круго доджа́ла кэ яви́р Болыбна́скиро яго́ро (краё) и нисо́ нашты́ тэ гарадёл Лэ́скирэ хачкирибнастыр.8. Ра́скирэ-Дэвлэ́скиро Зако́но исын бидошэ́нгиро, со дэ́ла зор дескэ. Ра́скирэ-Дэвлэ́скиро допхэныбэ́н исын чачуно́, со дэ́ла годы́ одолэ́скэ, конэ́скэ дава́ трэй.9. Ра́скирэ-Дэвлэ́скирэ упхэныбэна́ исын чачунэ́, ёнэ лошакирэна (веселинэна) ило́; Ра́скирэ-Дэвлэ́скирэ допхэныбэна исын чыстонэ-илэ́скирэ, ёнэ дэ́на ясныма якхэнгэ.10. Дар анги́л Растэ-Дэвлэ́стэ исын чачуны́ сарэ́са, ёй ячэ́лапэ пэ сарэ́ ве́ки. Ра́скирэ-Дэвлэ́скиро сэ́ндо исын чачуно́, ёнэ исын сарэ́ чачипнастыр.11. Ёнэ исын мол буты́р сувнака́стыр, аж буты́р чачунэ́ сувнака́стыр и гудлэдыр авгинэстыр и сотэнгирэ кроплендыр авгинэстыр.12. Упхэныбэна́ адя́кэ-паць подсыклякирдэ ман, Тырэ́ дынари́с, мэ дорэсцём бут лачхипэ́н, ке́ли мэ приракхцём лэн.13. Конэ́скэ сашты́ тэ ґалёл пэ́скирэ доша́? Отмэк ма́нгэ мирэ́ грэ́хи, савэ́ мэ на ґалёвава,14. Рикир дрэ риг, Тырэ́ писхари́с, нартонэ грэхэ́ндыр; мэк ёнэ тэ на лэн лофо́ (верхо) пэ ма́ндэ: тэ́ньчи мэ ява́ва бидошэ́нгиро, и мэ ява́ва бибангипнаскиро анги́л Зако́но.Proverbs 6:32-3532. Кодолэстэ, кон кэрэ́ла биладжаипэ́н явирэ джувля́са, исын на́бут годы́. Ко́ли ману́ш кэрэ́ла дава́, ёв сы́рбы хасякирэ́ла кокоро́ пэс.33. Ёв дорэсэ́ла даба (марибэ́н) и бипатыв (ладжакирибэн), и лэ́скиро обракирибэн ячэ́лапэ пэ лэ́стэ.34. Пал-дова́ со зэвлыныпэ́н выкхарэла ла́кирэ-ромэскиро холякирибэ́н, и ёв на явэ́ла тэ тангинэ́л (тэ жалинэл) дро дывэ́с, сыр явэ́ла тэ дукхавэл палэ.35. Ёв на прилэ́ла ни саво́ выкиныбэ́н, ёв на явэ́ла штыл, мэк ту и дэ́са лэ́скэ бут да́ры.Matuš 24:1-281. И ке́ли Ису́со выгия́ Кхангирья́тыр и кэдэласпэ тэ джал Пэ́скэ, подгинэ́ кэ Ёв Лэ́скирэ сыкляибны́тка, соб (кай) тэ сыкавэ́н Лэ́скэ саро́ кэрибэн Кхангирья́киро.2. Ёв ракирэ́ла лэ́нгэ адя́кэ: “Дыкхэ́на дава́ саро́? Чачэс, Мэ ракира́ва тумэ́нгэ: на ячэ́лапэ ада́й ни екх бар пэ бар, саво́ тэ на явэ́л пхагирдо́.”3. И ке́ли Ёв сыс бэшто́ пэ Оливи́тко бэ́рга, подгинэ́ Лэ́скирэ сыкляибны́тка кэ Ёв екхджинэ и пхучнэ́: “Пхэн амэ́нгэ, ке́ли дава́ саро́ явэ́ла, и сави́ ґерты́к (знаме́ниё) явэ́ла анги́л, сыр Ту явэ́са и ваш свэтоскиро ко́нцо (яго́ро)?”4. И отпхэндя́ Ису́со и пхэндя́ лэ́нгэ: “Ракхэ́нпэ, соб (кай) нико́н тэ на хохавэ́л тумэн.5. Пал-дова́, со бут явэ́на Мирэ́ лавэ́са, ракири́: ‘Мэ сом Христо́со,’ и хохавэна бут манушэ́н.6. И тумэ́ явэ́на тэ шунэ́н пал марибэ́н и ракирибэна пал марибэна. Дыкхэ́н, на страхадён; саро́ дава́ трэй тэ явэ́л, нэ дава́ ишчо (инкэ́) на ко́нцо (на яго́ро).7. Пал-дова́ со ґаздэ́напэ мануша́ пэ манушэ́ндэ и кралипэ́н пэ кралипэ́н, и бокха явэ́на, и мэрибнытка фра́нсы и пхув явэ́ла тэ тринскирэлпэ пир штэ́ты.8. Саро́ кадава́ явэ́ла анги́л сы́рбы дукха́, дрэ саво́ нэво́ свэ́то бияндёла.9. Тэды явэ́на тэ здэн тумэн пэ мэ́ньки и мулякирэна тумэн, и явэ́на тэ на сыкавэ́н паты́в тумэ́нгэ пал Миро лав.10. И бут тумэ́ндыр мэкэ́на тэ патя́н, и явэ́на тэ здэн екх екхэ́с, и явэ́на тэ на сыкавэ́н паты́в екх екхэ́скэ;11. и явэ́на бут хоханэ́ проро́ки и хохавэна бут манушэ́н;12. и пал-дова́ со явэ́ла буты́р чорипэ́н, бут мануша́ мэкэ́на тэ сыкавэ́н паты́в екх екхэ́скэ.13. Нэ кон вырикирэ́ла саро́ кэ ко́нцо (кэ яго́ро), кодова́ зракхэ́лапэ.14. И явэ́ла тэ пхэнэлпэ бахталы́ зан (звесь) пал Дэвлэ́скиро Кралипэ́н пир саро́ свэ́то сыр допхэныбэ́н ваш сарэ́ на́цыи; и тэды явэ́ла ко́нцо (яго́ро)!15. Палдава́, ке́ли тумэ́ дыкхэ́на голотынякиро джунгалыпэ́н (брыткима), саво́ явэ́ла тэ тэрдёл пэ свэ́нто штэ́то, со ракирдя́ проро́ко Дание́лё, (кон гинэ́ла, мэк тэ ґалёл),16. тэды кодолэ́, савэ́ исын дрэ Юдэ́я, мэк тэ нашэ́н дрэ бэ́рги;17. и кон исын пэ кхэри́тко стрэ́ха (чхаки́н), мэк тэ на джал тэлэ́ тэ лэл вари-со кхэрэ́скирэ миштыпна́стыр,18. и кон исын пэ фэ́лда, мэк тэ на рисёл палэ тэ лэл пэ́скиро урибэ́н.19. Мэ́ньки явэ́на тэды пэралэ джувленгэ, и джувленгэ, савэ́ чаравэна колынэса тыкнэ́ биятэ́н дрэ долэ́ дывэса́.20. Мангэ́нпэ Дэвлэ́скэ, соб (кай) тэ на явэ́л трэй тэ нашэ́н иванта(тэс)киро (зимакиро) ци саватонэ́ (суботонэ́):21. пал-дова́ со тэды явэ́ла дасави́ биба́хт, сави́ на сыс свэто́скирэ англыпна́стыр, и со буты́р на явэ́ла ние́кхвар;22. И ко́ли далэ́ дывэса́ тэ на явэ́нас кроткэдыр, нико́н джидэндыр на зракхэласпэ; нэ ваш манушэ́нгэ, савэ́н Дэвэ́л выкэдыя́, явэ́на кроткэдыр далэ́ дывэса́.23. Тэ́ньци, ко́ли вари-кон пхэнэ́ла тумэ́нгэ: ‘Акэ, исын Христо́со’ ци ‘одо́й’, на патя́н.24. Пал-дова́ со явэ́на хоханэ́ христосы, хоханэ́ проро́ки и ёнэ сыкавэ́на барэ́ ґертыка́ и кэрэ́на ди́вы, соб (кай) тэ хохавэн аж кодолэ́н, савэ́н Дэвэ́л выкэдыя́, ко́ли сашты́ явэ́ла.25. Акэ, Мэ тумэ́нгэ ангилпхэндём.26. Палдова́, ко́ли ёнэ пхэнэ́на тумэ́нгэ: ‘А́кэ, Ёв исын пэ чхучэ́ прахи’, на джа́н яври́; ко́ли ёнэ пхэнэ́на: ‘А́кэ, Ёв исын дро андратуны́ шту́ба’, на патя́н.27. Пал-дова́ со, сыр блискавица джа́ла вастоко́стыр и яснэдыр явэ́ла кэ западо, адя́кэ явэ́ла Чхаво́.28. Кай явэ́ла тру́по, одо́й скэдэ́напэ орлы (киды). Romani Bible Baltic 2019 Maintained by the United Bible Societies for the Baltic Romani Mission