Beblia

Bible in one year February 8

1. И кэр алта́рё (жэртвенико) вэшэ́стыр ситимо (акацыя) длэнгипна́са дрэ пандж куня́ (локти) и буґлыпнаса пандж куня́ адя́кэ, соб (кай) ёв тэ явэ́л алта́рё штарэ́-вэнглытко, и вучипна́са трин куня́.

2. И кэр шынга́ (ро́ги) пэ лэ́скирэ штар вэ́нглы, адя́кэ, соб (кай) лэ́стыр тэ выджа́н шынга́; и обчхув лэс харкомаса (медяса).

3. Кэр кэ ёв пирья тэ вычхувэн дрэ лэ́ндэ пра́ска (пепло), и лопаткицы, копаныцы тэ скэдэл, и бустя́ (видэлки), лопаткицы ваш вангар; сарэ́ приборы кэр харкома́тыр (медятыр).

4. Кэр кэ ёв решотка, кхудякирэ (сеткакирэ) родо́стыр, харкома́тыр, и скэр пэ харкомакири кхуды́, пэ ла́кирэ штар вэ́нглы, штар барэ́ ангрустя́ харкома́тыр;

5. и чхув ла пир яго́ро алтарёскиро тэла́л, адя́кэ, соб (кай) кхуды́ (сетка) тэ явэ́л кэ паш алта́рё.

6. И кэр баландиня́ ваш алта́рё вэшэ́стыр ситимо, и обчхув лэн харкомаса;

7. и чхув андрэ́ баландиня́ лэ́скирэ дрэ брэнчы адя́кэ, соб (кай) баландиня́ тэ явэ́н пир дуй рига́ дро алта́рё, ке́ли тэ лыджас лэс.

8. Кэр лэс чхучэса андра́л, пхалендыр, сыр сыс сыкадо ту́кэ пэ бэ́рга, адя́кэ мэк тэ кэрэ́н.

9. И кэр грэ́да (дво́ро): паш-дывэсытконэ́ (южнонэ) рига́тыр кэ юго. Ублады́тка (шырмы) ваш грэ́да трэй тэ явэ́н крэнцона, висоно́стыр, длэнгипна́са дрэ шэл куня́ пир екх риг;

10. сты́лбы ваш лэ́нгэ биш, и основы ваш лэ́нгэ тэ явэ́н биш харкунэ́ (меди́тка); нанглорэ пэ сты́лбы и спхандыпэна пэ лэ́ндэ рупэ́стыр.

11. Адя́кэ-паць и пир паш-рати́тко (северно) риг-ублады́тка (шырмы) шэл куня́ длэнгипна́са; сты́лбы ваш лэ́нгэ биш, и основы ваш лэ́нгэ (сты́лбы) биш харкунэ́; нанглорэ пэ сты́лбы и спхандыпэна пэ лэ́ндэ рупэ́стыр.

12. И пир грэдакиро буґлыпэ́н западоскирэ рига́тыр-ублады́тка (шырмы) длэнгипна́са пандждэша́ куня́; сты́лбы ваш лэ́нгэ дэш, и основы кэ ёнэ дэш.

13. И дро грэдакиро буґлыпэ́н англатунэ́ рига́тыр кэ васто́ко-ублады́тка (шырмы) тэ явэ́н пандждэша́ куня́.

14. Кэ екх риг-ублады́тка (шырмы) дрэ дэшупандж куня́, сты́лбы ваш лэ́нгэ трин, основы ваш лэ́нгэ трин;

15. и кэ яви́р риг-ублады́тка (шырмы) дрэ дэшупандж куня́; сты́лбы ваш лэ́нгэ трин и сты́лбы ваш лэ́нгэ трин.

16. А ваш грэдакири по́рта шы́рма дрэ биш куня́ голубовонэ́ и пурпуронэ и чэрвлёнонэ вылна́тыр и крэнцонэ висоно́стыр высудэ бутя́тыр спецостыр; сты́лбы ваш ла́кэ тэ явэ́н штар, и основы кэ ёнэ штар.

17. Сарэ́ сты́лбы пашы́л грэ́да трэй, соб (кай) ёнэ тэ явэ́н кхэтанякирдэ спхандыпнаса рупэ́стыр; нанглорэ лэ́ндэ рупэ́стыр, а основы кэ ёнэ харкома́тыр (медятыр).

18. Грэдакиро длэнгипэ́н явэ́ла шэл куня́, а буґлыпэ́н пир саро́ длэнгипэ́н-пандждэша́, вучипэ́н пандж куня́; шырмы крэнцонэ висоно́стыр, а основы тэл сты́лбы харкома́тыр.

19. Сарэ́ приборы дрэ ша́тра ваш кажно дынарибэ́н дрэ ла́тэ, и сарэ́ килэ далэ́, и сарэ́ килэ пир грэ́да-харкома́тыр.

20. И припхэн Израилёскирэ чхавэ́нгэ, соб (кай) ёнэ тэ янэ́н ту́кэ елеё (оливи́тко дзэт) жужо́, вымардо маслинэндыр тэ освэнцынэн, соб (кай) тэ хачол дуд (свэ́то) дро кажно часо;

21. дрэ ша́тра скэдыибна́скири, пал полого, саво́ исын анги́л ковчэго досыкаибна́са (откровенияса), явэ́ла тэ захачкирэл Ааро́но и лэ́скирэ чхавэ́, бэльвелятыр кэ ра́нко, анги́л Ра́скирэ-Дэвлэ́скиро муй. Дава́ исын стату́то ве́чно ваш лэ́нгирэ стрэ́чы (поколении) Израилёскирэ чхавэ́ндыр.

Exodus 28:1-43

1. Акана́ лэ кэ пэ Аароно́с, тырэ́ пшалэ́с, и лэ́скирэ чхавэ́н лэ́са, чхавэ́н Израилёскирэ родо́стыр, соб (кай) ёв тэ явэ́л Ма́нгэ раша́са, Аароно́с и Надавос, Авиудос, Елизарос и Ифоамарос, Аароно́скирэ чхавэ́н.

2. И кэр тырэ́ пшалэ́скэ Аароно́скэ свэ́нта урибэна́ ваш сла́ва и шукарипэ́н.

3. И пхэн сарэ́нгэ годьварэ́ илэ́са, савэ́н Мэ пхэрдякирдём годэ́ духо́са (фаноса), соб (кай) ёнэ тэ кэрэ́н Аароно́скэ урибэна́ тэ высвэнцынэн лэс, соб (кай) ёв тэ явэ́л раша́й Ма́нгэ.

4. Ѓа́да, исын и́ди, савэ́ ёнэ исын бангэ́ тэ кэрэ́н: наперстнико (жылетка), эфо́до, упратуны риза, хитоно стяжно, кидаро и кусты́к. Мэк тэ кэрэ́н свэ́нта и́ди Аароно́скэ, тырэ́ пшалэ́скэ, и лэ́скирэ чхавэ́нгэ, соб (кай) ёв тэ явэ́л раша́й ваш Ма́нгэ.

5. Мэк ёнэ тэ лэн сувнака́й, голубово и пурпурно и чэрвлено вы́лна (шэрсь) и висоно,

6. и мэк тэ кэрэ́н эфо́до сувнака́стыр, голубовонэ́, пурпурнонэ и чэрвлёнонэ вылна́тыр и крэнцононэ висоно́стыр, высудэ бутя́тыр спецостыр.

7. Лэ́стэ трэй тэ явэ́н пэ дуй лэ́скирэ яго́ры (концы) дуй нарамники тэ спхандэн лэс, соб (кай) ёв тэ явэ́л спхандло.

8. И кусты́к эфодоскири, сави́ тэ явэ́л упралэстыр, трэй, соб (кай) ёй тэ явэ́л екхэ бутя́тыр лэ́са (эфодоса), сувнака́стыр, голубовонэ́, пурпуронэ и чэрвлёнонэ вылна́тыр и крэнцононэ висоно́стыр.

9. И лэ дуй бара́ аниксостыр и вычхин пэ лэ́ндэ Израилёскирэ-чхавэ́нгирэ лава́:

10. шов лэ́нгирэ лава́ пэ екх бар, и шов лава́, савэ́ ячэ́напэ, пэ яви́р бар пир лэ́нгиро бияныпэ́н: кон джал пэ́рво;

11. трэй, соб (кай) тэ кэрэ́л дава́ о чхиныбнари пэ бар, саво́ вычхинэла якхи́тка (чэргэнорья), вычхин пэ дуй бара́ Израилёскирэ-чхавэ́нгирэ лава́; и чхув лэн андрэ́ дрэ сувнакунэ́ оправы;

12. и чхув далэ́ дуй бара́ пэ эфодоскирэ нарамники: далэ́ бара́ пэ рипирибэ́н Израилёскирэ чхавэ́нгэ; и явэ́ла Ааро́но тэ лыджа́л лэ́нгирэ лава́ анги́л Растэ-Дэвлэ́стэ пэ дуй пэ́скирэ псикэ́ ваш рипирибэ́н.

13. И кэр оправы сувнака́стыр;

14. и дуй цэпочки (зандирорья) жужэ́ сувнака́стыр, кэр лэн крэнцонэнца кхудэ́ бутя́тыр, и прикэр крэнцона зандирорья кэ оправы.

15. Кэр наперстнико (жылетка) тэ сэндинэс вастэнгирэ бутя́тыр, сыр эфо́до: сувнака́стыр, голубовонэ́, пурпуронэ и чэрвлёнонэ вылна́тыр и крэнцононэ висоно́стыр кэр лэс;

16. трэй, соб (кай) ёв тэ явэ́л штарэ́ вэнглэнца, дуе ригэ́ндыр, дрэ бурнык (пядень) длэнгипна́са и дрэ бурнык буґлыпнаса;

17. и чхув андрэ́ дрэ лэ́стэ бара́ дрэ оправы дрэ штар ряды; пэ́рво рядо: рубино, топазо, изумрудо, – дава́ исын екх рядо;

18. яви́р рядо: карбункуло, сапфиро и алмазо (диаманто);

19. три́то рядо: яхонто, агато и аметисто

20. шта́рто рядо: хрисолито, ониксо и ясписо; дрэ сувнакунэ́ оправы трэй, соб (кай) ёнэ тэ явэ́н чхудэ́ андрэ́.

21. Трэй, соб (кай) сарэ́ бара́ тэ явэ́н дэшуду́й, ада́кицы, ци бут исын Израилёскирэ чхавэ́, пир лэ́нгирэ лава́; пэ кажно, сы́рбы пэ якхи́тко (чэргэнори́), трэй, соб (кай) ёнэ тэ явэ́н вычхиндлэ́ пир екх лав дэшудуе́ родыцэндыр.

22. Кэ наперстнико (жылетка) кэр крэнцона цэпочки (ланцужки) крэнцононэ кхудэ́ бутя́тыр жужэ́ сувнака́стыр;

23. и кэр кэ наперстнико (жылетка) дуй барэ́ ангрустя́ сувнака́стыр, и прикэр дуй барэ́ ангрустя́ кэ дуй наперстникоскирэ яго́ры;

24. и чхув андрэ́ дуй кхудэ́ цэпочки (зандирорья) сувнака́стыр дрэ барэ́ ангрустя́ пир наперстникоскирэ яго́ры (концы),

25. а дуй яви́р яго́ры (краи́) дуе далэ́ зандирорьенгирэ (цэпочкэнгирэ) прикэр кэ дуй оправы, и прикэр кэ эфодоскирэ нарамники лэ́скирэ рига́тыр, сави́ исын анги́л;

26. ишчо (инкэ́) кэр дуй сувнакунэ́ барэ́ ангрустя́ и прикэр лэн кэ яви́р дуй наперстникоскирэ яго́ры, пэ доя́ риг, сави́ исын пашты кэ эфо́до андра́л;

27. адя́кэ-паць кэр дуй сувнакунэ́ барэ́ ангрустя́ и прикэр лэн кэ дуй эфодоскирэ нарамники тэла́л, лэ́скирэ рига́тыр, сави́ исын анги́л, пашы́л лэ́скиро шово, пэ эфодоскири кусты́к;

28. и прикэрэн кэ ёнэ наперстнико (жылетка) лэ́скирэ барэ́ ангрустенца кэ эфодоскирэ барэ́ ангрустя́ шнуроса (дорьяса) ґолубовонэ вылна́тыр, соб (кай) ёв тэ явэ́л пэ эфодоскири кусты́к, и, соб (кай) кай тэ на пэрэ́л наперстнико эфодостыр.

29. И явэ́ла тэ лыджа́л Ааро́но Израилёскирэ чхавэ́нгирэ лава́ пэ наперстнико, соб (кай) тэ сэндякирэ́л (тэ роспхандэл чачипэ́н) пашы́л лэ́скиро ило́, ке́ли явэ́ла тэ заджа́л андрэ́ свэ́нто штэ́то, ваш кажно рипирибэ́н пал чачипэ́н анги́л Растэ-Дэвлэ́стэ.

30. И чхув пэ наперстнико, соб (кай) тэ роспхандэл чачипэ́н Уримо и Тумимо, и ёнэ явэ́на пэ ило́ Аароностэ, ке́ли ёв явэ́ла тэ джал андрэ́ свэ́нто штэ́то анги́л муй Ра́скиро-Дэвлэ́скиро, и явэ́ла Ааро́но саро́ часо (цы́ро) тэ лыджа́л Израилёскирэ-чхавэ́нгиро сэ́ндо пашы́л пэ́скиро ило́ анги́л Ра́скиро-Дэвлэ́скиро муй.

31. И кэр упратуны риза кэ ефодо сари́ голубовонэ́ цвятоса (мастиняса);

32. машкира́л ла́тэ трэй, соб (кай) тэ явэ́л отчхакирибэн (кула) ваш шэро́; пашы́л дава́ отчхакирибэн трэй, соб (кай) ёв тэ явэ́л обсудо похтанэса, адя́кэ-паць сыр пашы́л бронякиро (панцырёскиро) отчхакирибэн, соб (кай) ёв тэ на кушэлпэ;

33. пир ла́кири подя кэр пхаба́ голубовонэ́ тхавэндыр, яхонтовонэ, пурпуронэ и чэрвлёнонэ цвятоса (мастиняса), пашы́л ла́кири подя; сувнакунэ́ кудунорья (позвонки) машки́р лэ́ндэ пашы́л:

34. сувнакуны́ кудунори и пхабай, сувнакуны́ кудунори и пхабай, трусця́л (кругом) пир упратунэ-ризакири подя;

35. ёй явэ́ла пэ Аароностэ, ке́ли ёв явэ́ла тэ дынаринэ́л сыр раша́й, соб (кай) тэ явэ́л шундлы лэ́стыр знико (звуко), ке́ли ёв явэ́ла тэ заджа́л андрэ́ свэ́нто штэ́то анги́л Ра́скирэ-Дэвлэ́скиро муй и, ке́ли явэ́ла тэ выджа́л, соб (кай) лэ́скэ тэ на мэрэ́л.

36. И кэр пхалёри (досочка) жужэ́ сувнака́стыр, и вычхин пэ ла́тэ, сыр вычхинэна пэ якхи́тко (чэргэнори́): “Свэнтыма Дэвлэ́скири”,

37. и прикэр ла голубовонэ́-цвятоскирэ шнуроса (дорьяса) кэ кидаро, адя́кэ, соб (кай) ёй тэ явэ́л пэ англатуны кидароскири риг;

38. и явэ́ла ёй пэ Аароноскиро шэро́, и лыджа́ла пэ пэ́стэ Ааро́но яныбнаскирэ надо ухтылыбэна, ке́ли высвэнцынэнас Израилёскирэ чхавэ́ндыр, и сарэ́ да́ры, савэ́ ёнэ янэ́нас; и явэ́ла ёй саро́ часо пэ лэ́скиро шэро́, соб (кай) ёнэ тэ латхэ́н ла́ска анги́л Растэ-Дэвлэ́стэ.

39. И кэр хитоно висоно́стыр и кидаро висоно́стыр, и кэр кусты́к высудэ бутя́тыр узорэнца;

40. кэр Аароно́скирэ чхавэ́нгэ хитоны, скэр лэ́нгэ кустыка, и пхандлуня (повязки) пэ шэро́, кэр лэ́нгэ ваш сла́ва и шукарипэ́н,

41. и ури дрэ лэ́ндэ Аароно́с, тырэ́ пшалэ́с, и лэ́скирэ чхавэ́н лэ́са, и помакх лэн, и пхэрдякир лэ́нгирэ васта́, и высвэнцын лэн, и ёнэ явэ́на рашая́ Ма́нгэ.

42. И кэр лэ́нгэ тэлатунэ́ и́ди лёностыр (ґандладэстыр) тэ учхакирэн нангэ маса́ трушулэндыр кэ чанга́,

43. и мэк тэ явэ́н ёнэ пэ Аароностэ и пэ лэ́скирэ чхавэ́ндэ, ке́ли ёнэ явэ́на тэ заджа́н дрэ ша́тра (ски́ния) ваш скэдыибэ́н ци тэ подджан кэ алта́рё (жэртвенико) тэ дынаринэ́н пэ свэ́нто штэ́то, соб (кай) лэ́нгэ тэ на лыджа́н пэ пэ́стэ грэ́хо и тэ на мэрэ́н. Дава́ исын стату́то пэ ве́ко ваш лэ́скэ и ваш лэ́скирэ-чхавэ́нгирэ чхавэ́нгэ пал лэ́стэ.

Psalms 20:1-5

1. Хоро́скирэ Дирижоро́скэ. Давидо́скиро Пса́лмо.

2. Мэк Рай Дэвэ́л тэ шунэ́л тут дро дывэ́с, ке́ли исын пхаро́; мэк Яково́скирэ-Дэвлэ́скирэ лав тэ зракхэ́л тут вэргэ́ндыр;

3. Мэк Ёв тэ бичхавэл ту́кэ зор Лэ́скирэ Свэнтонэ́ Штэто́стыр и тэ подрикирэ́л тут Сионоскирэ Бэрга́тыр.

4. Мэк Ёв тэ рипирэл сарэ́ тырэ́ Свэ́нта дыибэна́, и мэк Ёв тэ прилэл Тырэ́ хачкирибнаскирэ яныбэна́. Сэ́ла.

5. Мэк Ёв тэ дэл ту́кэ, со тырэ́ илэскэ трэй и, соб (кай) тэ сполнинэ́лпэ сарэ́ тырэ́ планы.

Proverbs 7:1-5

1. Ми́ро чха́ва! Ри́пир мирэ́ лава́, и ракх лэн дрэ годы́ сыр барвалыпэ́н мирэ́ припхэныбэна́.

2. Рикирпэ кэ мирэ́ припхэныбэна́ и ракх дрэ годы́ миро зако́но сыр лялька (зрачко) дрэ якх.

3. Припхандэ лэн кэ тырэ́ ангушта (пальцы), чхин лэн пэ ило́ сыр пэ таблицы.

4. Пхэн годыпнаскэ: “Ту сан мири́ пхэн, и кхар годы́ сыр тыри́ са́мо фэды́р сэмэ́нца:

5. соб (кай) ёнэ тэ ракхэ́н тут чужонэ́ джувлятыр, одолятыр, сави́ притырдэла кэ пэ гудлэ́ лавэ́нца.

Matuš 24:29-51

29. И екха́тыр (сра́зу) пало́ дая́ пхари́ би́да дрэ долэ́ дывэса́ кхам мурдёла, чхон на явэ́ла тэ свэнцынэл, и чэргэня́ пэрэ́на болыбна́стыр, и болыбна́скирэ зорья явэ́на триинскирдэ

30. И тэды сыкадёла ґерты́к пэ болыбэ́н, сави́ дэ́ла манушэ́нгэ джиныбэ́н, со явэ́ла Чхаво́ Манушэ́скиро, и тэ́ньчи сарэ́ манушы́тка ро́ды явэ́на то ровэ́н пхарэ́с и дыкхэ́на Чхавэ́с Манушэскирэс, Саво́ явэ́ла тэ джал тэлэ́ дрэ о́блоки барэ́ зорья́са и ярконэ Дэвлэ́скирэ слава́са.

31. И бичхавэ́ла Ёв Пэ́скирэ Янголэн барэ́ рогоса (трубаса), и скэдэ́ла кхэтанэ́, конэ́с Ёв выкэдыя́, штарэ́ ригэ́ндыр и екхэ болыбнытконэ ягоро́стыр (краёстыр) кэ яви́р.

32. Сыклён сыкаибэ́н (приме́ро) инжыритконэ каштэ́стыр: ке́ли лэ́скирэ рандя́ (вэ́тки) ячэ́напэ ковлэ́ и мэкэ́на патря (листы), джинэ́н, со сыг явэ́ла лынай.

33. Адя́кэ-паць и тумэ́, сыр явэ́на тэ дыкхэ́н, со саро́ дава́ кэрэ́лапэ, джинэ́н, со Ёв исын на́дур, пашы́л вудара́.

34. Чачэс, Мэ ракира́ва тумэ́нгэ: на проджа́ла дава́ манушы́тко ро́до анги́л дова́, сыр саро́ дава́ кэрэ́лапэ.

35. Болыбэ́н и пхув проджа́на, а лава́ Мирэ́ на проджа́на.

36. Нэ нико́н на джинэ́ла ни дывэ́с, ни мардо́, ке́ли саро́ дава́ явэ́ла, ни болыбна́скирэ Янго́лы, ни Чхаво́, а екх Дад джинэ́ла.

37. И, сыр сыс дрэ долэ́ дывэса́, ке́ли сыс Ноё, адя́кэ-паць явэ́ла Чхаво́ Манушэ́скиро.

38. Палдава́ со, сыр анги́л потопо мануша́ ханэ́ и пинэ́, лынэпэ и джа́нас палоро́м анги́л дова́ дывэ́с, дро саво́ Ноё загия́ дро ковчэго,

39. и на ґалёнас, пака яця́ патопо и на лыджыя пэ́са лэн сарэ́н, адя́кэ-паць явэ́ла Чхаво́ Манушэ́скиро.

40. Тэды явэ́на дуй мануша́ пэ фэ́лда: екхэ́с Рай Дэвэ́л лэ́ла, явирэ́с ячкирэ́ла,

41. ци дуй джувля́, со мелинэна жэрновонэ барэ́нца (бэлэдиненца): екха Рай Дэвэ́л лэ́ла, явирья ячкирэ́ла.

42. Ракхэ́нпэ, пал-дова́ со на джинэ́на, ке́ли явэ́ла тумаро́ Рай Дэвэ́л.

43. Тумэ́ ж джинэ́н дава́, со, ко́ли кхэрэ́скиро хула́й джинэлас, ке́ли раты́ явэ́ла чор, ёв на явэ́лас суто́ и на дэ́лас, соб (кай) чор тэ под΄ганавэлпэ тэл лэ́скиро кхэр.

44. Палдава́ явэ́н тумэ́ адя́кэ-паць скэдынэ́, пал-дова́ со Чхаво́ Манушэ́скиро явэ́ла дрэ дасаво мардо́ (шту́нда), со тумэ́ на думинэ́на.

45. Кон тэды исын патяибны́тко и годьваро́ писха́ри (ра́бо), конэ́скэ лэ́скиро хула́й дыя́ зор пэ лэ́скирэ бутярнэндэ, соб (кай) тэ дэл тэ хал лэ́нгэ дро часо, саво́ трэй?

46. Бахтало́ исын кодова́ писха́ри, конэ́скиро хула́й, сыр явэ́ла, латхэ́ла, со ёв кэрэ́ла адя́кэ, сыр исын упхэндло́ лэ́скэ.

47. Чачэс, Мэ ракира́ва тумэ́нгэ: ёв дэ́ла лэ́скэ зор пэ саро́ лэ́скиро миштыпэ́н.

48. Нэ ко́ли адава́ фуй писха́ри пхэнэ́ла пэ́скэ: ‘Миро рай зарикирэлапэ’,

49. и лэ́ла тэ шулякирэл пэ́скирэ малэн-писхарье́н, и хал и тэ пьел матыбнарьенца,

50. тэды явэ́ла писхарискиро хула́й дро дова́-паць мардо́ (шту́нда), пал саво́ ёв на джинэ́ла,

51. и росчингирэла хула́й лэс пэ паш и дэ́ла лэ́скэ дасаво тала́но, сыр дуе́муитконэнгэ: одо́й явэ́ла роибэ́н и дандэнгири скрежыма.

Romani Bible Baltic 2019

Maintained by the United Bible Societies for the Baltic Romani Mission