Bible in one year
March 10

1. И пхэндя́ Рай Дэвэ́л Мойза́скэ, ракири́:
2. “Пхэн Израилёскирэ чхавэ́нгэ, и лэ лэ́ндыр пир дэсто́ дадэнги́рэ родыцо́стыр, сарэ́ лэ́нгирэ барыдырэндыр пир ро́дыцы, дэшуду́й и кажнонэскиро лав зачхин пэ лэ́скиро дэсто́;
3. лав Аароноскиро зачхин пэ Левиёскиро дэсто́, пал-дова́ со екх дэсто́ лэ́нгирэ родыцоскирэ барыдырэстыр трэй ёнэ тэ дэн;
4. и чхув лэн дрэ скэдыибна́скири ша́тра, анги́л ковчэго досыкаибна́са (откровениёса), кай сыкадёвава Мэ тумэ́нгэ;
5. и конэ́с Мэ выкэдава, одолэ́стэ дэсто́ лындёла (зацвэтинэла); и адя́кэ Мэ штылякирава Израилёскирэ чхавэ́нгиро ракирибэ́н холя́са, савэ́са ёнэ ракирэ́на пэ амэ́ндэ.”
6. И пхэндя́ Мо́йза Израилёскирэ чхавэ́нгэ, и дынэ́ лэ́скэ сарэ́ лэ́нгирэ барыдыра́, кажнонэ́ барыдырэстыр пир дэсто́ пир лэ́нгирэ дадэнги́рэ ро́дыцы дэшуду́й дэстэ́, и Аароноскиро дэсто́ сыс машки́р лэ́нгирэ дэстэ́.
7. И чхудя́ Мо́йза дэстэ́ анги́л Ра́скирэ-Дэвлэ́скиро муй, дрэ ша́тра досыкаибна́са (ски́ния).
8. Пэ яви́р дывэ́с загия́ Мо́йза дрэ досыкаибнаскири ша́тра, и ґа́да, Аароноскиро дэсто́, Левиёскирэ кхэрэ́стыр, лындия (зацвэтиндя), мэкця́ букорэ (почки), дыя́ лулудя́ (цвэты) и яндя́ миндали.
9. И вылыджия́ Мо́йза сарэ́ дэстэ́ Ра́скирэ-Дэвлэ́скирэ мо́стыр кэ сарэ́ Израилёскирэ чхавэ́. И дыкхнэ́ ёнэ дава́, и лыя́ кажно пэ́скиро дэсто́.
10. И пхэндя́ Рай Дэвэ́л Мойза́скэ: “Чхув нэвэ́стыр дэсто́ Аароноскиро пэ зракхибэ́н, сыр ґерты́к (сыр сыкаибэ́н) ваш напатяибнытконэ манушэ́нгэ, соб (кай) тэ пириячэл лэ́нгиро холямо́ ракирибэ́н пэ Ма́ндэ, и ёнэ тэ на мэрэ́н.”
11. О Мо́йза кэрдя́ дава́ сыр припхэндя́ лэ́скэ Рай Дэвэ́л, адя́кэ ёв и кэрдя́.
12. И пхэндлэ́ Израилёскирэ чхавэ́ Мойза́скэ: “Ѓа́да, амэ мэраса, хасёваса, сарэ́ хасёваса!
13. Кажно, кон подджа́ла кэ Ра́скирэ-Дэвлэ́скири ша́тра, мэрэ́ла: ци на приджалапэ сарэ́нгэ амэ́нгэ тэ мэрас?”
1. И пхэндя́ Рай Дэвэ́л Аароно́скэ: “Ту и тырэ́ чхавэ́ и кхэр тырэ́-дадэ́скиро ту́са лыджа́на пэ пэ́стэ отпхэныбэ́н пал бизладо пэ свэ́нто штэ́то: и ту и тырэ́ чхавэ́ ту́са лыджа́на пэ пэ́стэ грэ́хо пал бизладо пэ тумаро́ свэ́нто штэ́то.
2. Адя́кэ-паць и тырэ́ пшалэ́н, Левиёскиро ро́до, тырэ́-дадэ́скиро кхэри́тко ро́до (племё), лэ пэ́скэ: мэк ёнэ тэ явэ́н паш ту́тэ и тэ кэрэ́н буты́ ту́кэ, а ту и тырэ́ чхавэ́ ту́са явэ́на паш досыкаибнаскири ша́тра;
3. мэк ёнэ тэ дынаринэ́н (тэ служынэн) ту́кэ и тэ дынаринэ́н пэ сари́ ски́ния; екх, соб (кай) тэ на подджан кэ свэнтонэ́-штэтоскирэ предметы и кэ алта́рё, соб (кай) тэ на мэрэ́н и лэ́нгэ, и тумэ́нгэ.
4. Мэк ёнэ тэ явэ́н паш ту́тэ и лыджа́на тэ дынаринэ́н дрэ скэдыибна́скири ша́тра, сарэ́ бутя́ пир ша́тра; а яви́р ману́ш нашты́ тэ подджа́л кэ тумэ́.
5. Адя́кэ дынаринэ́н пэ свэ́нто штэ́то и пашы́л алта́рё, соб (кай) тэ на явэ́л буты́р холы́ пэ Израилёскирэ чхавэ́ндэ;
6. пал-дова́ со тумарэ́ пшалэ́н, Левитэ́н, Мэ лыём Израилёскирэ чхавэ́ндыр, и дыём лэн тумэ́нгэ, дро да́ро Ма́нгэ, Ра́скэ-Дэвлэ́скэ, соб (кай) ёнэ тэ кэрэ́н свэ́нто буты́ пашы́л скэдыибна́скири ша́тра;
7. и ту, и тырэ́ чхавэ́ ту́са, дыкхэ́н пал тумари́ свэнтыма дро саро́, со исын алтарёскиро и со исын андра́л пал шы́рма, и дынаринэ́н; тумэ́нгэ дава́ Мэ дрэ да́ро свэ́нто дынарибэ́н, а яви́р ману́ш, и саво́ подджа́ла, отдыно́ явэ́ла мэрибна́скэ.
8. И пхэндя́ Рай Дэвэ́л Аароно́скэ: “Ѓа́да, Мэ допатява ту́кэ тэ дыкхэ́с, сыр янэ́на свэ́нто дыибэ́н ґаздыпнаса Ма́нгэ; сарэ́стыр, со янэ́на Израилёскирэ чхавэ́, Мэ дыём ту́кэ и тырэ́ чхавэ́нгэ, ваш тумаро́ рашаипэн, сыр упхэныбэ́н пэ ве́ко.
9. Ѓа́да, со исын тыро́ самонэ барэ́ яныбнаскирэ свэнтыматыр, со янэ́на пэ яг: кажно лэ́нгиро маруно́ яныбэ́н, и кажно лэ́нгиро свэ́нто яныбэ́н пал грэ́хо, и кажно свэ́нто яныбэ́н пал лэ́нгири банг, со ёнэ янэ́на Ма́нгэ, дава́ тэ явэ́л сыр бари свэнтыма ту́кэ и тырэ́ чхавэ́нгэ.
10. Пэ са́мо свэ́нто штэ́то хан дава́, сарэ́ мурша́ сашты́ тэ хан, дава́ мэк тэ явэ́л ваш ту́кэ.
11. И ґа́да, ишчо (инкэ́) со ту́кэ: лэ́нгирэ свэнтонэ́ яныбнаскирэ ту́кэ да́ры и свэ́нта дыибэна́ ґаздыпнаса сарэ́ Израилёскирэ чхавэ́ндыр. Мэ дыём ту́кэ свэ́нто дыибэ́н, и тырэ́ чхавэ́нгэ, и тырэ́ чхаенгэ ту́са сыр упхэныбэ́н пэ ве́ко; кажно жужо́ ману́ш дро тыро́ кхэр сашты́ (могинэ́ла) тэ хал дава́.
12. Саро́ фэдыршонэ алеёстыр и саро́ фэдыршонэ винаградостыр и марэстыр, лэ́нгирэ пэ́рва барьякирдэ́ (пло́ды), савэ́ ёнэ янэ́на Ра́скэ-Дэвлэ́скэ, Мэ дыём лэн ту́кэ.
13. Саро́ пэ́рво, со дэ́ла лэ́нгири пхув, савэ́ ёнэ янэ́на Ра́скэ-Дэвлэ́скэ, мэк тэ явэ́н тырэ́; кажно жужо́ (чысто) ману́ш дро тыро́ кхэр сашты́ (могинэ́ла) тэ хал дава́.
14. Саро́ совлахадо пэ Израилёскири пхув, мэк тэ явэ́л тыро́.
15. Сарэ́, савэ́ роскушэна дакири лочови́ дрэ кажно лоч (плоть), сави́ янэ́на Ра́скэ-Дэвлэ́скэ, манушэ́ндыр и кхэритконэ́ мурдалэ́ндыр (ското́стыр), мэк тэ явэ́л тырэ́; екх англатуно́ (пэ́рво) манушэ́ндыр исын банго́ тэ явэ́л выкиндло, и англатуно́ нажужэ́ кхэритконэ́ мурдалэстыр тэ явэ́л выкиндло;
16. а выкиныбэ́н пал лэ́ндэ: лэн екхэ чхонэстыр пир тыри́ тими́н, лэ выкиныбэ́н пандж шэ́кели рупэ́са, пир свэ́нто шэ́келё, саво́ дрэ биш геры;
17. нэ пал пэрвонэ́ тыкнорэстэ гурумнендыр [гурувэндыр-р.с.], и пал пэрвонэстэ бакрэ́ндыр, и пал пэрвонэстэ бузнэндыр, на лэ выкиныбэ́н: ёнэ исын свэ́нта; лэ́нгирэ ратэ́са обчхув алта́рё, и ада́й лэн хачкир сыр свэ́нто дыибэ́н, дро гудло́ тхув, лачхо́ Ра́скэ-Дэвлэ́скэ;
18. А мас лэ́нгиро приджалапэ ту́кэ, адя́кэ-паць сыр колы́н свэнтонэ́ дыибна́стыр тринскирибнаса и право (чачо́) псико́ приджалапэ ту́кэ.
19. Кажно свэ́нто дыибэ́н ґаздыпнаса, саво́ Израилёскирэ чхавэ́ янэ́на Ра́скэ-Дэвлэ́скэ, Мэ отда́ва ту́кэ, и тырэ́ чхавэ́нгэ, и чхаенгэ тырэнгэ ту́са сыр упхэныбэ́н дро ве́ко, дава́ исын завето лондэскиро пэ ве́ки анги́л Растэ-Дэвлэ́стэ, саво́ сыс дыно́ ваш ту́кэ и родо́скэ тырэ́скэ ту́са.”
20. И тэ́ньчи пхэндя́ Рай Дэвэ́л Аароно́скэ: “Пэ лэ́нгири пхув ту́тэ на явэ́ла право пэ мэкно́ миштыпэ́н, и паш на явэ́ла ту́кэ машки́р лэ́ндэ; Мэ сом паш тыри́ и мэкно́ миштыпэ́н тыро́ машки́р Израилёскирэ чхавэ́ндэ.”
21. А Левиёскирэ чхавэ́нгэ, ґа́да, Мэ дыём сыр мэкно́ миштыпэ́н дэ́што (дэшэнгири) ме́ра сарэ́стыр, со исын дро Израилё, пал лэ́нгиро дынарибэ́н, пал дова́, со ёнэ лыджа́на мангипэ́н дрэ скэдыибна́скири ша́тра;
22. и палдава́ Израилёскирэ чхавэ́ нашты́ буты́р тэ подджан кэ скэдыибна́скири ша́тра, соб (кай) тэ на кэрэ́н грэ́хо и тэ на мэрэ́н:
23. мэк Леви́ты тэ кэрэ́н рашаитко буты́ дрэ скэдыибна́скири ша́тра и тэ лыджа́н пэ пэ́стэ лэ́нгиро грэ́хо. Дава́ явэ́ла упхэныбэ́н пэ ве́ки дрэ тумарэ́ ро́ды; машки́р Израилёскирэ чхавэ́ндэ ёнэ на дорэсэ́на миштыпна́скири ме́ра;
24. адя́кэ, сыр дэ́што паш Израилёскирэ чхавэнгири, сави́ ёнэ янэ́на дро свэ́нто яныбэ́н Ра́скэ Дэвлэ́скэ, Мэ да́ва Левитэ́нгэ дрэ миштыпна́скири ме́ра, палдава́ Мэ и пхэндём лэ́нгэ, машкира́л Израилёскирэ чхавэ́ндэ ёнэ на дорэсэ́на миштыпна́скири ме́ра.”
25. И пхэндя́ Рай Дэвэ́л Мойза́скэ, ракири́:
26. “Дэ тэ джинэ́н Левитэ́нгэ и пхэн лэ́нгэ: ‘Ке́ли тумэ́ явэ́на тэ лэн Израилёскирэ чхавэ́ндыр дэ́што ме́ра, сави́ Мэ дыём тумэ́нгэ лэ́ндыр дро мэкно́ миштыпэ́н, тэды янэ́н лэ́стыр свэ́нто дыибэ́н ґаздыпнаса Ра́скэ-Дэвлэ́скэ, дэ́што ме́ра дэшэнгирьятыр,
27. и загиндло явэ́ла тумэ́нгэ дава́ тумаро́ свэ́нто яныбэ́н, сыр маро́ гумностыр и сыр мол (вино) пресостыр;
28. адя́кэ и явэ́на тумэ́ тэ янэ́н свэ́нто дыибэ́н ґаздыпнаса Ра́скэ-Дэвлэ́скэ сарэ́ тумарэ́ дэштонэ мерэндыр (пашэндыр), савэ́ явэ́на тэ лэн Израилёскирэ чхавэ́ндыр, и явэ́на тэ дэн лэ́ндыр свэ́нто дыибэ́н Ра́скирэ-Дэвлэ́скиро раша́скэ Аароно́скэ;
29. сарэ́стыр, со дэлэлапэ тумэ́нгэ, янэ́н свэ́нто дыибэ́н ґаздыинаса Ра́скэ-Дэвлэ́скэ, сарэ́ фэдыршонэстыр, со сыс свэнцякирдо.’
30. И пхэн лэ́нгэ: ‘Ке́ли тумэ́ янэ́на сарэ́ фэдырша далэ́стыр, тэды дава́ явэ́ла загиндло Левитэ́нгэ, сыр дыно́ (гиваобкэрибнаскирэ шурнатыр) гумностыр и сыр дыно́ пресостыр;
31. тумэ́ сашты́ (могинэ́на) тэ хан дава́ пэ кажно штэ́то, тумэ́ и тумарэ́ чэ́карья (семействы), пал-дова́ со дава́ исын плэскирибэн пал тумарэ́ бутя́ дрэ скэдыибна́скири ша́тра;
32. и тумэ́ на лыджа́на пал дава́ грэ́хо, ке́ли янэ́на фэдыршо сарэ́стыр; и тумэ́ на магирэна свэнцякирдо Израилёскирэ чхавэ́нца и на мэрэ́на тумэ́.
6. Палдава́ кажно дэвлы́тко ману́ш явэ́ла тэ мангэ́лпэ Ту́кэ дро часо, ке́ли ёв сашты́ тэ латхэл Тут; чачо́, сыр барэ́ паня́ росчхувэнапэ, ёнэ на доджана кэ дасаво ману́ш.
7. Ту сан Штэ́то тэ гарадёвав ваш ма́нгэ: Ту приракхэса ман пхарипнастыр; Ту обджаса трусця́л ма́ндэ радымакирэ гиленца, со Ту зракхця́н Ман.
8. Мэ, Рай Дэвэ́л, ява́ва тэ сыклякирав тут чачипнаскэ и сыкава́ва дром, савэ́са трэй ту́кэ тэ джас. Мэ да́ва годыпэ́н ту́кэ, Мири́ якх явэ́ла пэ ту́тэ.
9. На яв сыр грай, ци сыр лошако, со лэ́ндэ нанэ “галыибэн, со лэн трэй тэ дэн андрэ́ цугле́нца и савари́са, соб (кай) ёнэ тэ подэнпэ Ту́кэ.
10. Фуй ману́ш бут мо́лы пэрэ́ла духо́са, нэ кодова́, Саво́ зоралэ́с патя́ла дрэ Растэ-Дэвлэ́стэ, Рай Дэвэ́л облэла лачхэ́-илыткимаса.
11. Явэ́н весе́ла (лошалэ́) дрэ Растэ-Дэвлэ́стэ и зоралэ́с радынэ́нпэ, тумэ́, савэ́ сан чачипнаскирэ, и сарэ́, кон исын чачуно́ илэ́са, радынэ́нпэ зоралэ́с.
19. Чачипэ́н лыджа́ла кэ джиибэ́н, нэ одова́, кон родэ́ла чорипэ́н, родэ́ла лэс ваш пэ́скиро мэрибэ́н.
20. Рай Дэвэ́л рикирлапэ криг одолэ́ндыр, савэ́ кэрэ́на чорипэ́н пэфроми (нарошнэс), нэ бидошэнгирэ дрэ сарэ́ дрома́ зоралэ́с радынэна Лэс.
21. Мэк ёнэ и кхэтанякирэнпэ вастэ́нца, нэ фуй мануша́ на ячэ́напэ набангэ; нэ чачунэ́-манушэ́нгиро ро́до (миштыпэ́н) явэ́ла ракхно.
20. Тася́рлэс (ра́нэс) пэ яви́р дывэ́с, сыр ёнэ джа́нас пашы́л, ёнэ дыкхнэ́, со инжыро зашутия кэ пхув.
21. Пэ́три пририпирдя и пхэндя́ Лэ́скэ: “Равви! Дыкх, инжыро зашутия, саво́ Ту прокостян!”
22. И Ису́со пхэндя́ лэ́нгэ: “Патя́н дрэ Дэвлэ́стэ!”
23. Чачэс ракира́ва тумэ́нгэ: “Ко́ли кон припхэнэла далякэ бэргакэ: ‘Ѓаздэпэ и чхурдэпэ дро пани́’ и, ко́ли тумэ́ на явэ́на тэ кунинэнпэ дро тумаро́ ило́, и явэ́на тэ патя́н, со явэ́ла дова́, со ёв ракирэ́ла, тэды Дэвэ́л сполнинэла ваш адалэ́ манушэ́скэ.
24. Палдава́ Мэ ракира́ва тумэ́нгэ: саро́, пал со тумэ́ мангэ́напэ и мангэна, патя́н, со тумэ́ дорэснэ́ (долынэ), и явэ́ла дыно́ тумэ́нгэ.
25. И ко́ли тумэ́ мангэ́напэ, тэды примангэн сарэ́нгэ, пэ конэ́стэ рикирэ́на холы́, соб (кай) и тумэ́нгэ тумаро́ Дад, Саво́ исын дро Болыбна́скиро Раё, тэ отмэкэ́л тумарэ́ грэ́хи.”
26.
27. Ису́со сыкляибнытконэ́нца явнэ́ нэвэ́стыр дро Ерусалимо. И ке́ли Ису́со сыс дрэ Кхангири́, кэ Ёв подгинэ́ раша́нгирэ барыдыра́, лылвари́тка и годэпхурэ́.
28. И ячнэ́ тэ ракирэ́н Лэ́скэ: “Савэ зорья́са Ту кэрэ́са саро́ дава́? И кон дыя́ Ту́кэ дасави́ зор тэ кэрэ́с дава́?”
29. Ису́со ж пхэндя́ Лэ́нгэ: “Мэ пхучава тумэ́ндыр екх лав и отпхэнэн Ма́нгэ, и тэды Мэ пхэна́ва тумэ́нгэ, савэ́ зорья́са Мэ кэра́ва саро́ дава́.
30. Ианоскиро болдэипэн исын болыбна́стыр ци манушэ́ндыр? Отпхэнэн Ма́нгэ.”
31. Ёнэ ракирдэ́ машки́р пэ́стэ: ‘Ко́ли пхэна́са, со болыбна́стыр’, Ёв тэды пхучэла: ‘Со́скэ тумэ́ на патяндынэ́ Лэ́скэ?’
32. Нэ ко́ли амэ пхэна́са: ‘Манушэ́ндыр’ – ёнэ дара́ндынэ манушэ́ндыр, савэ́ сыс одо́й, пал-дова́ со сарэ́ гиндлэ́ Ианос пал Дэвлэ́скирэ пророкостэ.
33. И ёнэ пхэндлэ́ Исусо́скэ дро отпхэныбэ́н: “На джина́са.” И Ису́со пхэндя́ лэ́нгэ: “И Мэ на пхэна́ва тумэ́нгэ, савэ́ зорья́са Мэ кэра́ва дава́.”
Romani Bible Baltic 2019
United Bible Societies for the Baltic Romani Mission