Beblia

1. И дживдя́ Израилё кэ Ситимо, и лынэ́ мануша́ тэ кэрэ́н биладжаипэ́н Моавоскирэ чхаенца,

2. и кхардэ́ ёнэ манушэ́н кэ пэ́скирэ-дэвлэнгиро свэ́нто яныбэ́н, и ханэ́ мануша́ лэ́нгиро свэ́нто яныбэ́н и мангнэпэ лэ́нгирэ дэвлорэ́нгэ.

3. И прияця Израилё кэ Ваал-Фегоро. И захачи́я Ра́скирэ-Дэвлэ́скири холы́ пэ Израилё.

4. И пхэндя́ Рай Дэвэ́л Мойза́скэ: “Лэ манушэнгирэн сарэ́н барыдырэ́н, и ублав лэн анги́л Растэ-Дэвлэ́стэ анги́л кхам, и отрисёла Израилёстыр Ра́скирэ-Дэвлэ́скири холы́.”

5. И пхэндя́ Мо́йза Израилёскирэ сэндарьенгэ: “Кажно (сва́ко) тэ мулякирэ́л пэ́скирэ манушэ́н, савэ́ причхудэпэ кэ Ваало-Фегоро.”

6. И ґа́да, вари-кон Израилёскирэ чхавэ́ндыр явдя́, и яндя́ кэ пэ́скирэ пша́ла Мадианитянка, пэ Мойза́скирэ якха́ и пэ якха́ Израилёскирэ чхавэ́нгиро пэ саро́ скэдыибэ́н, ке́ли ёнэ рондлэ́ пашы́л скэдыибнаскиро загиибэ́н.

7. О Финеесо, чхаво́ Елизароскиро, Аароно́скирэ-рашаскиро чхавэ́скиро, дыкхи́ дава́, ґаздыя́пэ скэдыибнаскирэ манушэ́ндыр, и лыя́ дро васт пэ́скиро чхурдыбнытко буст (коп΄ё),

8. и гия́ ёв пала́л пал Израильтяностэ, кай ёнэ сыс сутэ́, и пропусадя лэн дуе́н, Израильтянос и джувля́ дрэ ла́киро пэр: и пирияця́ Израилёскирэ-чхавэ́нгиро мэрибэ́н.

9. Манушэ́н, савэ́ мынэ́ моровостыр, сыс биш тэ штар тысёнцы.

10. И пхэндя́ Рай Дэвэ́л Мойза́скэ дасавэ́ лава́:

11. “О Финеесо, чхаво́ Елизароскиро, Аароно́скирэ-рашаскиро чхавэ́скиро, отлыджия Мири́ холы́ Израилёскирэ чхавэ́ндыр, сыр лыя́ тэ зэвлынэл (тэ чхуинэл накуч) пир Ма́ндэ машки́р лэ́ндэ, и Мэ на хасякирдём Израилёскирэ чхавэ́н дро зэвлыныпэ́н Миро;

12. палдава́ пхэн лэ́скэ: Ѓа́да, Мэ да́ва лэ́скэ Миро завето пал рама́нё (миро),’

13. и явэ́ла ёв лэ́скэ и лэ́скирэ-чхавэ́скирэ родо́скэ пал лэ́стэ векоскирэ пхэндлэ́ лавэ́са (заветоса) пал рашаипэн, пал-дова́ со ёв сыкадя́ зэвлыныпэ́н пал пэ́скирэ Дэвлэ́стэ и затэрдия пал Израилёскирэ чхавэ́ндэ.

14. Лав Израильтяниноскиро, савэ́с замардя́ Мадианитянка, сыс Зимри, Салоскиро чхаво́, барыдыро́ Симеоноскирэ родо́стыр;

15. а лав Мадианитянкакиро, савья́ замардэ́, сыс Хазва; ёй сыс Цураскири чай, Омофоскирэ-барыдырэскири, Мадиамоскирэ кхэритконэ́ родо́стыр (племёстыр).

16. И пхэндя́ Рай Дэвэ́л Мойза́скэ дасавэ́ лава́:

17. “Притасавэн Мадианитянэн и марэ́н лэн,

18. палдава́ со ёнэ накуч кэрдэ́ тумэ́нца дро пэ́скиро хохаибэ́н, подлынэ тумэн Фегороса и Хазваса, Мадиамоскирэ-барыдырэскирэ чхаса, пэ́скирэ пхэняса, савья́ замардэ́ дро марибнаскиро дывэ́с пал Фегоро.”

1. Пало́ дава́ марибэ́н Рай Дэвэ́л пхэндя́ Мойза́скэ и Елизароскэ, Аароно́скирэ-рашаскирэ чхавэ́скэ:

2. “Пиригинэн саро́ Израилёскирэ-чхавэ́нгиро скэдыибэ́н бишэ́ бэршэ́ндыр и пхурэды́р, пир лэ́нгирэ чэ́карья (семействы), [дадэ́скири сэмэ́нца-ю.о.], сарэ́н, кон исын лахчо ваш марибэ́н дро Израилё.”

3. И пхэндлэ́ лэ́нгэ Мо́йза и Елиза́ро, раша́й, пэ лошчы́на Моавитоскири пашы́л Иорда́но, проти Ерихо́но:

4. “Пиригинэн сарэ́н манушэ́н бишэ́ бэршэ́ндыр и пхурэды́р, сыр пхэндя́ Рай Дэвэ́л Мойза́скэ и Израилёскирэ чхавэ́нгэ, савэ́ выгинэ́ Египто́скирэ пхувья́тыр:

5. О Рувимо, англатуно́ (пэ́рво) чхаво́ Израилёскиро. Рувимо́скирэ чхавэ́ сыс: Ханохостыр стрэч (поколениё) Ханохоскири, Фалустыр Фалускири стрэч (поколениё),

6. Хецроностыр стрэч Хецроноскири, Хармастыр стрэч Хармаскири.

7. Ѓа́да, исын стрэ́чы Рувимо́скирэ: и пиригиндло лэн сыс штардэша́ трин тысёнцы эфташэла́ трия́нда.

8. И Фалускирэ чхавэ́: Елиаво.

9. Елиавоскирэ чхавэ́ сыс: Немуило, Дафано и Авироно. Дава́ сыс одолэ́ Дафано и Авироно, савэ́ кхардэ́ пэ скэдыибэ́н тэ ракирэ́н, савэ́ подракирдэ манушэ́н проти Мойзастэ и Аароностэ кхэтанэ́ Кореёскирэ манушэ́нца, ке́ли ёнэ подракирдэ манушэ́н пэ Растэ-Дэвлэ́стэ;

10. и росчхакирдя пхув пэ́скирэ ушта́ и проглытындя лэн и Кореёс; кхэтанэ́ лэ́нца мынэ́ и дру́ги (мала́) лэ́нгирэ, ке́ли яг схая дуйшэла́ пандждэша́ манушэ́н, и ячнэ́ ёнэ сыр ґерты́к (знаме́ниё).

11. Нэ Кореёскирэ чхавэ́ на мынэ́.

12. Симеоноскирэ чхавэ́ пир лэ́нгирэ стрэ́чы (поколении) сыс: Немуилостыр стрэч Немуилоскири, Яминостыр стрэч Яминоскири, Яхиностыр стрэч Яхиноскири,

13. Заростыр стрэч Зароскири, Саулостыр стрэч Саулоскири.

14. Ѓа́да, исын Симёноскирэ стрэ́чы: биш тэ дуй тысёнцы дуйшэла́.

15. Гадо́скирэ чхавэ́ пир лэ́нгирэ стрэ́чы сыс: Цэфоностыр стрэч Цэфоноскири, Хагеёстыр стрэч Хагеёскири, Шунистыр стрэч Шунискири,

16. Озниёстыр стрэч Озниёскири, Ериёстыр стрэч Ериёскири,

17. Ародостыр стрэч Ародоскири, Арелиёстыр стрэч Арелиёскири.

18. Ѓа́да, исын Гадо́скирэ стрэ́чы, пир лэ́нгиро пиригиныбэ́н: штардэша́ тысёнцы панджшэла́.

19. Юда́скирэ чхавэ́ сыс: Иро и Онано; нэ Иро и Онано мынэ́ пэ Ханаано́скири пхув;

20. и Юда́скирэ чхавэ́ пир лэ́нгирэ стрэ́чы сыс: Шэластыр стрэч Шеласкири, Фаресостыр стрэч Фаресоскири, Заростыр стрэч Зароскири;

21. и Фаресоскирэ чхавэ́ сыс: Эсромостыр стрэч Эсромо́скиро, Хамулостыр стрэч Хамулоскири;

22. Ѓа́да, исын Юда́скирэ стрэ́чы, пир гиныбэ́н лэ́нгиро: эфтадэшашов тысёнцы панджшэла́.

23. Исахароскирэ чхавэ́ пир лэ́нгирэ стрэ́чы сыс: Фоластыр стрэч Фоласкири, Фувастыр стрэч Фуваскири,

24. Яшувастыр стрэч Яшуваскири, Шымроностыр стрэч Шымроноскири.

25. Ѓа́да, исын Исахароскирэ стрэ́чы пир лэ́нгиро гиныбэ́н: шовдэша́ штар тысёнцы триншэла́.

26. Завулоноскирэ чхавэ́ пир лэ́нгирэ стрэ́чы сыс: Сэредостыр стрэч Сэредоскири, Елоностыр стрэч Елоноскири, Яхлеилостыр стрэч Яхлеилоскири;

27. ґа́да, исын Завулоноскирэ стрэ́чы пир лэ́нгиро гиныбэ́н: шовдэша́ тысёнцы панджшэла́.

28. Иосифо́скирэ (Ёза́скирэ) чхавэ́ пир лэ́нгирэ стрэ́чы сыс: Мана́сия и Ефре́мо.

29. Манасия́скирэ чхавэ́: Махиростыр стрэч Махироскири, Махиростыр бия́ндыя Галаа́до, Галаадостыр стрэч Галаадоскири.

30. Ѓа́да, исын Галаадо́скирэ чхавэ́: Езеростыр стрэч Езероскири, Хелекостыр стрэч Хелекоскири,

31. Асриилостыр стрэч Асриилоскири, Шэхемостыр стрэч Шэхемоскири,

32. Шэмидастыр стрэч Шэмидаскири, Хеферостыр стрэч Хефероскири.

33. Салпаадостэ, Хефероскирэ чхавэ́стэ на сыс чхавэ́н, а екх чхая́; лава́ Салпаадоскирэ чхаенгирэ: Махла, Ноа, Хогла, Милка и Фирца.

34. Ѓа́да, исын Манасия́скирэ стрэ́чы, а пиригиндо лэн сыс пандждэша́ дуй тысёнцы эфташэла́.

35. Ѓа́да, исын Ефремо́скирэ чхавэ́ пир лэ́нгирэ стрэ́чы: Шутеластыр стрэч Шутеласкири, Бехеростыр стрэч Бехероскири, Таханостыр стрэч Таханоскири;

36. и ґа́да, исын Шутеласкирэ чхавэ́: Араностыр стрэч Араноскири;

37. ґа́да, исын Ефремо́скирэ стрэ́чы, пир лэ́нгиро гиныбэ́н: трияндадуй тысёнцы панджшэла́. Ѓа́да, исын Иосифо́скирэ (Ёза́скирэ) чхавэ́ пир лэ́нгирэ стрэ́чы.

38. Вениамино́скирэ чхавэ́ пир лэ́нгирэ стрэ́чы: Бэластыр стрэч Бэласкири, Ашбелостыр стрэч Ашбелоскири, Ахирамостыр стрэч Ахирамоскири,

39. Шэфуфамостыр стрэч Шэфуфамоскири, Хуфамостыр стрэч Хуфамоскири.

40. И Беласкирэ чхавэ́ сыс: Ардо и Наамано; Ардостыр стрэч Ардоскири, Нааманостыр стрэч Нааманоскири.

41. Ѓа́да, исын Вениамино́скирэ чхавэ́ пир лэ́нгирэ стрэ́чы; а пиригиндло сыс лэн штардэша́ пандж тысёнцы шовшэла́.

42. Ѓа́да, исын Дано́скирэ чхавэ́ пир лэ́нгирэ стрэ́чы: Шухамостыр стрэч Шухамоскири. Ѓа́да, исын Дано́скирэ чэ́карья (семействы) пир лэ́нгирэ стрэ́чы.

43. И сарэ́ Шухамоскирэ стрэ́чы пир лэ́нгиро гиныбэ́н сыс: шовдэша́ штар тысёнцы штаршэла́.

44. Асироскирэ чхавэ́ пир лэ́нгирэ стрэ́чы сыс: Имнастыр стрэч Имнаскири, Ишвастыр стрэч Ишваскири, Вериятыр стрэч Верияскири;

45. Верияскирэ чхавэ́ндыр: Хеверостыр стрэч Хевероскири, Малхиилостыр стрэч Малхиилоскири;

46. Асироскирэ-чхакиро лав сыс Сара [Сэрах-ю.о.].

47. Ѓа́да, исын Асироскирэ-чхавэ́нгиро стрэ́чы, пир лэ́нгиро гиныбэ́н: пандждэша́ трин тысёнцы штаршэла́.

48. Нефалимоскирэ чхавэ́ пир лэ́нгирэ стрэ́чы сыс: Яхцэилостыр стрэч Яхцэилоскири, Гуниёстыр стрэч Гуниёскири,

49. Ецэростыр стрэч Ецэроскири, Шылемостыр стрэч Шылемоскири;

50. ґа́да, исын стрэч Нефалимоскири пир лэ́нгирэ стрэ́чы; пиригиндло лэн сыс штардэша́ пандж тысёнцы штаршэла́.

51. Ѓа́да, кицы́ сыс манушэ́н, савэ́ загинэ́ дрэ Израилёскирэ-чхавэ́нгиро пиригиныбэ́н: шовшэла́ екх тысёнцо эфташэла́ трия́нда мануша́.

52. И пхэндя́ Рай Дэвэ́л Мойза́скэ, ракири́:

53. “Пир дава́ пиригиныбэ́н трэй тэ роздэс пхув сыр мэкно́ миштыпэ́н адалэ́ манушэ́нгэ пир лэ́нгиро гиныбэ́н (кицыпэн) пир лав.

54. Конэ́с буты́р, одолэ́нгэ пхув дэ буты́р; а конэ́с тыкнэды́р, одолэ́нгэ пхув дэ тыкнэды́р: кажнонэ́скэ трэй тэ дэн пхув дакицы, ци бут манушэ́н загинэ́ дро гиныбэ́н.

55. Пир жре́биё трэй тэ роздэн пхув: пир лава́ лэ́нгирэ-дадэнги́рэ ро́дыцы ёнэ исын бангэ́ тэ дорэсэн пхув;

56. пир жре́биё трэй лэ́нгэ тэ роздэн лэ́нгири пхув сыр мэкно́ миштыпэ́н, сыр бутэ́-манушэнгирэнгэ, адя́кэ и тыкнэ́-манушэнгирэнгэ.

57. Акэ, адалэ́ исын, кон загия́ дрэ гиныбэ́н Левитэнгиро пир лэ́нгирэ стрэ́чы: Гирсоностыр стрэч Гирсоноскири, Каафостыр стрэч Каафоскири, Мераристыр стрэч Мерарискири.

58. Ѓа́да, исын стрэ́чы Левиёноскирэ: стрэч Ливниёскири, стрэч Хевроноскири, стрэч Махлиёскири, стрэч Мушыёскири, стрэч Кореёскири. Каафостыр бия́ндыя Амрамо.

59. Амрамоскирэ-ромнякиро лав сыс Иохаведа, Левиёскири чхай, савья́ бияндя́ Левиёскири ромны́ дро Еги́пто, а ёй бияндя́ Амрамоскэ Аароно́с, Мойза́с и Мариам, лэ́нгирэ пхэня́.

60. И бия́ндынэ Аароностыр Надаво и Авиудо, Елиза́ро и Ифамаро;

61. нэ Надаво и Авиудо мынэ́, ке́ли яндлэ́ натрэбимо яг анги́л Растэ-Дэвлэ́стэ.

62. И сыс пиригиндло лэн биштэ трин тысёнцы сарэ́н муршэ́н, екхэ чхонэстыр и буты́р, пал-дова́ со ёнэ на сыс пиригиндлэ кхэтанэ́ Израилёскирэ чхавэ́нца, пал-дова́ со на сыс дыно́ лэ́нгэ участко (пхув) машки́р Израилёскирэ чхавэ́ндэ пир пхув сыр мэкно́ миштыпэ́н.

63. Ѓа́да, исын одолэ́, савэ́н пиригиндлэ Мо́йза и Елиза́ро, раша́й, савэ́ гиндлэ́ Израилёскирэ чхавэ́н пэ Моавоскирэ лошчыны пашы́л Иорда́но, проти Ерихо́но;

64. машки́р лэ́ндэ на сыс ни екхэ манушэ́с, савэ́н гиндя Мо́йза и Ааро́но, раша́й, савэ́ гиндлэ́ Израилёскирэ чхавэ́н пэ Синаёскири чхучи́ пхув;

65. пал-дова́ со Рай Дэвэ́л пхэндя́ лэ́нгэ, со мэрэ́на ёнэ пэ чхучи́ пхув, – и на яця́пэ лэ́ндыр нико́н (никонэ́с), апри́ч Халевостэ, Ефонияскирэ чхавэ́стэ, и Исусо́стэ (Ёхошуастэ), Навиноскирэ чхавэ́стэ.

1. Давидо́скиро Пса́лмо, ке́ли Ёв парудя пэс пэ бигодякирэ Манушэ́стэ анги́л Авимелехостэ, саво́ традыя́ лэс криг и Дави́до гия́ пэ́скэ.

2. Мэ ява́ва тэ славинав, тэ парикира́в Ра́скэ-Дэвлэ́скэ саро́ часо, мэ ява́ва ўса́ды/сак (усегда) тэ шара́в Лэс мирэ́ уштэ́нца.

3. Миро ди явэ́ла тэ шарэлпэ Ра́са-Дэвлэ́са. Мануша́, савэ́ ха́на мэ́ньки, шунэ́на пал дава́ и явэ́на тэ радынэ́нпэ.

4. Шарэ́н и славинэ́н Рас-Дэвлэ́с ма́нца, ява́са кхэтанэ́ тэ барьякирас Лэ́скиро лав.

5. Мэ мангдёмпэ Ра́скэ-Дэвлэ́скэ и Ёв отпхэндя́ ма́нгэ, и Ёв зракхця́ ман мирэ́ трашаибнэндыр.

6. Ёнэ, савэ́ страдындлэ, дыкхнэ́ пэ Лэ́стэ и ёнэ зяиндлэ радыма́тыр, и лэ́нгирэ муя́ на сыс ладжакирдэ́.

7. Чороро́ ману́ш кхардя́ Лэс и Рай Дэвэ́л шундя́, и зракхця́ лэс сарэ́ лэ́скирэ пхарипнэндыр.

28. Кон зоралэ́с патя́ла дро пэ́скиро барвалыпэ́н, одова́ пэрэ́ла, нэ чачунэ́ мануша́ явэ́на най шука́р сыр патря (листы) пэ кашт (дрэ́во).

21. Тэ́ньци ко́ли вари-кон пхэнэ́ла тумэ́нгэ: ‘Ѓа́да, исын Христо́со!’ Ци ‘Ёв исын одо́й’, – на патя́н,

22. явэ́на хоханэ́ Христосы, хоханэ́ проро́ки; ёнэ сыкавэ́на барэ́ ґэртыка (знаме́нии) и кэрэ́на ди́вы, соб (кай) тэ хохавэн аж кодолэ́н манушэ́н, савэ́н Дэвэ́л выкэдыя́, ко́ли явэ́ла сашты́.

23. Ракхэ́нпэ. Мэ тумэ́нгэ саро́ анги́л пхэндём.

24. А дро долэ́ дывэса́, сыр проджа́ла (накхэла) дая́ пхари́ би́да, кхам мурдёла, и чхон на явэ́ла тэ свэнцынэл пэ́скирэ свэтоса (лосаса),

25. и чэргэня́ пэрэ́на болыбна́стыр, и болыбна́скирэ зорья явэ́на тринскирдэ.

26. Тэды мануша́ дыкхэ́на Манушэ́скирэ Чхавэ́с, Саво́ явэ́ла тэ джал дрэ о́блоки барэ́ зорья́са и дрэ сла́ва.

27. И тэды бичхавэ́ла Ёв Пэ́скирэ Янголэн и скэдэ́ла кхэтанэ́, конэ́с Ёв выкэдыя́ штарэ́ ригэ́ндыр, пхувья́кирэ ягоро́стыр (краёстыр) кэ Болыбна́скиро яго́ро.

28. Сыклён приме́ро (сыкаибэ́н) инжыритконэ каштэ́стыр: ке́ли лэ́скирэ рандя́ ячэ́на ковлэ́ и мэкэ́на патря (листы), то тумэ́ джинэ́н, со сыг явэ́ла лынай (нилай)

29. адя́кэ и тумэ́, сыр дыкхэ́на, со дава́ саро́ адя́кэ кэрлапэ, джинэ́н, со Ёв исын на́дур, пашы́л вудара́.

30. Чачэс, Мэ ракира́ва тумэ́нгэ: на проджа́ла дава́ манушы́тко ро́до, пака саро́ дава́ кэрэ́лапэ кэ ко́нцо/кэ яго́ро (сполнинэлапэ).

31. Болыбэ́н и пхув проджа́на, а лава́ Мирэ́ на проджа́на.

32. Нико́н на джинэ́ла ни дывэ́с, ни мардо́ (шту́нда), ке́ли дава́ саро́ явэ́ла, ни болыбна́скирэ Янго́лы, ни Чхаво́ – а екх Дад джинэ́ла.

33. Дыкхэ́н, и ракхэ́нпэ и мангэ́нпэ Дэвлэ́скэ: пал-дова́ со тумэ́ на джинэ́на, ке́ли дасаво часо явэ́ла.

34. Дава́ сашты́ (можна) тэ примеринэс манушэ́са, саво́ гия́ дро даратуно дром. Ёв ячкирэ́ла пэ́скиро кхэр, соб (кай) тэ придыкхэн писха́рья. Кажнонэ́скэ писхари́скэ ёв дэ́ла задыибэн, а одолэ́скэ, саво́ сыс тэрдо́ пашы́л по́рта, припхэндя́ тэ дыкхэ́л ракхунэс (пильнэс).

35. Адя́кэ и тумэ́: “Дыкхэ́н, на совэн!” Пал-дова́ со тумэ́ на джинэ́на, ке́ли рисёла кхэрэ́скиро хула́й: могинэ́ла дрэ паш рат, ци сыр пробагала башно, ци пэ зло́ко;

36. соб (кай), ке́ли ёв явэ́ла, тэ на заухтылэл тумэн, со тумэ́ сан сутэ́.

37. И дова́, со Мэ ракира́ва тумэ́нгэ, ракира́ва сарэ́нгэ: ракхэ́нпэ!”

Romani Bible Baltic 2019

United Bible Societies for the Baltic Romani Mission