Bible in one year - Пэ Балтитко Романи чиб

Bible in one year March 15

1. И явнэ́ Салпаадоскирэ чхая́, Хефероскирэ чхавэ́скирэ, Галаадо́скирэ чхавэ́скирэ, Махироскирэ чхавэ́скирэ, Манасия́скирэ-чхавэ́скирэ стрэчатыр, Иосифо́скирэ чхавэ́скиро, и ґа́да, сыс лэ́скирэ-чхаенгирэ лава́: Махла, Ноа, Хогла, Милка и Фирца;

2. и тэрдинэ́ ёнэ анги́л Мойзастэ и анги́л Елизаростэ рашастэ, и анги́л тхагарьендэ и анги́л саро́ скэдыибэ́н, пашы́л загиибэ́н дрэ скэдыибна́скири ша́тра, и пхэндлэ́:

3. “Амаро́ дад мыя́ пэ чхучи́ пхув, и ёв на сыс кхэтанэ́ одолэ́ манушэ́нца, савэ́ скэдынэ́пэ проти Растэ-Дэвлэ́стэ кхэтанэ́ Кореёскирэ малэнца, нэ ёв пал пэ́скиро грэ́хо мыя́, и чхавэ́ лэ́стэ на сыс;

4. пал со тэ хасёл амарэ́-дадэ́скиро лав лэ́скирэ родыцо́стыр, пал-дова́ со лэ́стэ нанэ чхавэ́с? Дэ амэ́нгэ пхув машки́р амарэ́ дадэ́скирэ пшалэ́ндэ.”

5. И яндя́ Мо́йза лэ́нгиро рэ́ндо (де́ло) анги́л Растэ-Дэвлэ́стэ.

6. И пхэндя́ Рай Дэвэ́л Мойза́скэ:

7. “Чачипэ́н ракирэ́на Салпаадоскирэ чхая́, дэ лэ́нгэ миштыпна́скири ме́ра пир пхув машки́р лэ́нгирэ-дадэ́скирэ пшалэ́ндэ и пиридэ лэ́нгэ лэ́нгирэ дадэ́скири пхув, сыр мэкно́ миштыпэ́н.

8. И Израилёскирэ чхавэ́нгэ дэ тэ джинэ́н, и пхэн: ‘Ко́ли кон мэрэ́ла, и на сыс лэ́стэ чхавэ́с, тэды пиридэ́н лэ́скири пхув лэ́скирэ чхакэ’;

9. ко́ли лэ́стэ нанэ чха, пиридэ́н лэ́скири пхув лэ́скирэ пшалэ́нгэ;

10. ко́ли нанэ лэ́стэ пшалэ́н, отдэ́н лэ́скири пхув лэ́скирэ-дадэ́скирэ пшалэ́нгэ;

11. ко́ли нанэ лэ́скирэ-дадэ́скирэ пшалэ́н, отдэ́н лэ́скири пхув лэ́скирэ-пашатунэ́ сэмэнцакэ лэ́скирэ стрэчатыр, соб (кай) ёй тэ явэ́л лэ́стэ; и мэк тэ явэ́л дава́ ваш Израилёскирэ чхавэ́нгэ залыджино дро Зако́но, сыр пхэндя́ Рай Дэвэ́л Мойза́скэ.”

12. И пхэндя́ Рай Дэвэ́л Мойза́скэ: “Джа́ упрэ́ пэ дая́ бэ́рга Аваримо, и подыкх пэ пхув, сави́ Мэ да́ва Израилёскирэ чхавэ́нгэ;

13. и ке́ли подыкхэса пэ ла́тэ, прияч кэ пэ́скирэ мануша́ и ту, сыр прияця Ааро́но, тыро́ пшал;

14. пал-дова́ со тумэ́ на кандынэ́ Миро ракирибэ́н пэ чхучи́ пхув Син, дро дова́ часо, ке́ли сыс кошыбэ́н пэ скэдыибэ́н, соб (кай) тэ сыкавэс анги́л лэ́нгирэ якха́ Мири́ свэнтыма пашы́л пани́ Мерива.”

15. И пхэндя́ Мо́йза Ра́скэ-Дэвлэ́скэ дасавэ́ лава́:

16. “Мэк тэ чхувэ́л Рай Дэвэ́л, Саво́ исын пэ кажно ду́хо (фа́но) дрэ кажно лоч (плоть) манушэ́с пэ скэдыибэ́н;

17. саво́ выджа́ла анги́л лэ́ндэ и саво́ заджа́ла анги́л лэ́ндэ, саво́ вылыджала лэн и саво́ янэ́ла лэн, соб (кай) тэ на ячэ́лпэ Ра́скирэ-Дэвлэ́скиро скэдыибэ́н, сыр бакрэ́, савэ́ндэ нанэ чхупнарис (пастухос).”

18. И пхэндя́ Рай Дэвэ́л Мойза́скэ: “Лэ пэ́скэ Исусо́с (Ёхошуас), Навиноскирэ чхавэ́с, манушэ́с, дрэ савэ́стэ исын Ду́хо (Фа́но), и чхув пэ лэ́стэ тыро́ васт,

19. и чхув лэс анги́л Елизаростэ, рашастэ, и анги́л саро́ скэдыибэ́н, и дэ лэ́скэ припхэныбэ́н анги́л лэ́нгирэ якха́,

20. и дэ лэ́скэ тырэ́ славатыр, соб (кай) тэ шунэ́л лэс саро́ скэдыибэ́н Израилёскирэ чхавэ́ндыр;

21. и явэ́ла ёв тэ тэрдёл кэ Елиза́ро раша́й, и тэ пхучэл лэ́стыр пал лэ́стэ тэ дэл годыпэ́н лэ́скэ, Уримоскирэ сэндоса анги́л Растэ-Дэвлэ́стэ; и пир лэ́скиро лав бангэ́ исын ёнэ (мусинэна) тэ выджа́н, и пир лэ́скиро лав бангэ́ тэ заджа́н, ёв и сарэ́ Израилёскирэ чхавэ́ лэ́са, и саро́ скэдыибэ́н.”

22. И кэрдя́ Мо́йза, сыр припхэндя́ лэ́скэ Рай Дэвэ́л, и лыя́ Исусо́с (Ёхошуас), и чхудя́ лэс анги́л Елизаростэ рашастэ и анги́л саро́ скэдыибэ́н;

23. и чхудя́ упрэ́ пэ лэ́стэ пэ́скирэ васта́, и дыя́ лэ́скэ припхэныбэ́н, сыр ракирдя́ Рай Дэвэ́л пир Мойзастэ.

Numbers 28:1-31

1. И пхэндя́ Рай Дэвэ́л Мойза́скэ, ракири́:

2. “Припхэн Израилёскирэ чхавэ́нгэ и пхэн лэ́нгэ: ‘Дыкхэ́н, соб (кай) Миро яныбэ́н, маро́ Миро сыр свэ́нто яныбэ́н Ма́нгэ, дро гудло́ тхув Ма́нгэ, тэ янэ́н Ма́нгэ дро пэ́скиро часо.’”

3. И пхэн лэ́нгэ: “Дава́ исын свэ́нто яныбэ́н ваш яг, сави́ тумэ́ сан бангэ́ тэ янэ́н Ра́скэ Дэвлэ́скэ: дуй бакрэ́ екхэ-бэршы́тка би дошакирэ пэ дывэ́с, дро цэ́ло схачкирибэ́н кажно дывэ́с.

4. Екхэ бакрэ́с ян ранкоса (злокоса), а явирэ бакрэ́с ян бэльвэле́;

5. и дро маруно́ яныбэ́н ян дэ́што паш ефа пшэничнонэ яржэстыр, перемешындло екхэ штартонэ гинаса вымардэ елеёстыр;

6. дава́-цэ́ло схачкирибэ́н пэ кажно дывэ́с, саво́ кэрдо́ сыс пашы́л бэ́рга Синаё, дро гудло́ тхув, свэ́нто яныбэ́н Ра́скэ-Дэвлэ́скэ;

7. и ваш тхадуно свэ́нто дыибэ́н пашы́л ла́тэ тэ явэ́л екх шта́рто гино пэ екхэ бакрэстэ: пэ свэ́нто штэ́то кэр вычхуибэн, мол (вино) Ра́скэ-Дэвлэ́скэ.

8. Явирэ́с бакрэ́с бэльвэле́, дасавэ́ марунэ яныбнаса, сыр злокостыр (ранкостыр), и дасавэ́ вычхуибнаса пашы́л лэ́стэ ян лэс дрэ свэ́нто яныбэ́н, дро гудло́ тхув, лачхо́ Ра́скэ-Дэвлэ́скэ.

9. А дро са́вато (субо́та) янэ́н дуе́н екхэ-бэршытконэн бакрэ́н би дошакиро, и ваш маруно́ дыибэ́н янэ́н дуй-дэшэнгирэ паша́ эфатыр пшэничнонэ яржэстыр, пиримешындло елеёса и вычхуибэн пашы́л лэ́стэ:

10. дава́-саватоскиро цэ́ло схачкирибэ́н дро кажно са́вато, буты́р кажнонэ́-дывэсэскирэ цэлонэ́ схачкирибнастыр и вычхуибэн пашы́л лэ́стэ.

11. И дро нэво́ чхон тумаро́, янэ́н цэ́ло схачкирибэ́н Ра́скэ-Дэвлэ́скэ: барэ́ кхэритконэ́ мурдалэстыр (ското́стыр) дуе́н тэрнэн гуруворэ́н, екхэ́с бакрэ́с и эфта́ екхэ-бэршытконэн бакрэ́н би дошакиро,

12. и трин дэшта паша́ эфатыр пшэничнонэ яржэстыр, пиримешындло елеёса, дро маруно́ яныбэ́н пэ екхэ́стэ гурувэстэ, и дуй дэшта паша́ эфатыр пшеничнонэ яржэстыр, перемешандло елеёса, дро маруно́ яныбэ́н пэ бакрэстэ,

13. и пир дэ́што паш эфатыр пшэничнонэ яржэстыр, перемешындло елеёса, дро маруно́ яныбэ́н пэ кажнонэ́ бакрэстэ; дава́-цэ́ло схачкирибэ́н, гудло́ тхув, свэ́нто яныбэ́н, лачхо́ Ра́скэ-Дэвлэ́скэ;

14. и вычхуибэн кхэтанэ́ лэ́нца банго́ тэ явэ́л паш гино мол (вино) пэ гуруворэстэ, екх три́то паш гиностыр пэ бакрэстэ, и екх шта́рто паш гиностыр пэ бакрэстэ; дава́-цэ́ло схачкирибэ́н дро кажно нэво́ чхон дрэ сарэ́ бэршы́тка чхона́.

15. И екхэ́с бузнэ́с янэ́н Ра́скэ-Дэвлэ́скэ дрэ свэ́нто яныбэ́н пал грэ́хо: буты́р цэлонэ́ схачкирибнастыр, со пэ кажно дывэ́с тумэ́ сан бангэ́ тэ янэ́н лэс вычхуибнаса лэскирэса.

16. Дро пэ́рво чхон, пэ дэшуштарто чхонэ́скиро дывэ́с-Патради́ Ра́скирэ-Дэвлэ́скири.

17. И пэ дэшупанджто дывэ́с далэ́-чхонэ́скиро тэ явэ́л свэ́нко; эфта́ (битринэ́нгиро дэш) дывэса́ ёнэ исын бангэ́ тэ хан опресноки.

18. Пэ пэ́рво дывэ́с мэк тэ явэ́л тумэ́ндэ свэ́нто скэдыибэ́н, нисави́ буты́ тэ на кэрэ́н;

19. и янэ́н свэ́нто яныбэ́н, цэ́ло схачкирибэ́н Ра́скэ-Дэвлэ́скэ: барэ́ кхэритконэ́ мурдалэстыр (ското́стыр) дуе гурувэ́н, екхэ бакрэ́с и эфта́ екхэ-бэршытконэ бакрэ́н; би дошакиро бангэ́ ёнэ тэ явэ́н тумэ́ндэ.

20. И кхэтанэ́ лэ́нца дро маруно́ яныбэ́н янэ́н пшэнично яржо́, пиримешиндло елеёса, трин дэшта паша́ эфатыр пэ кажнонэ́ гурувэстэ, и дуй дэшта паша́ эфатыр пэ бакрэстэ,

21. и пир дэ́што паш эфатыр ян пэ кажнонэ́стэ эфта́ бакрэ́ндыр,

22. и екхэ бузнэ́с дро свэ́нто дыибэ́н Ра́скэ-Дэвлэ́скэ пал грэ́хо, ваш жужакирибэн тумаро́;

23. апри́ч цэ́ло схачкирибэ́н пэ ра́нко (пэ зло́ко), саво́ исын цэ́ло схачкирибэ́н кажнонэ́ дывэсэскиро.

24. Адя́кэ янэ́н и дро кажно эфта́ дывэсэ́ндыр, дава́ исын маро́, свэ́нто дыибэ́н, гудло́ тхув, лачхо́ Ра́скэ-Дэвлэ́скэ; апри́ч кажнонэ́-дывэсэскиро цэ́ло схачкирибэ́н и лэ́скирэ вычхуибнастыр, трэй тэ янэ́н дава́.

25. И пэ эфта́то дывэ́с мэк тэ явэ́л тумэ́ндэ свэ́нто скэдыибэ́н; на кэрэ́н нисави́ буты́.

26. И дро дывэ́с, ке́ли янэ́на пэ́рва барьякирдэ́ (пло́ды) и ке́ли янэ́на Ра́скэ-Дэвлэ́скэ нэво́ маруно́ яныбэ́н дрэ эфтангирья (седмицы) тумарэ́, мэк тэ явэ́л тумэ́ндэ свэ́нто скэдыибэ́н; нисави́ буты́ тэ на кэрэ́н;

27. и янэ́н цэ́ло схачкирибэ́н дро гудло́ тхув Ра́скэ-Дэвлэ́скэ: кхэритконэ́ мурдалэстыр (барэ́ ското́стыр) дуе́н гуруворэ́н, екхэ бакрэ́с и эфта́ екхэ-бэршытконэ бакрэ́н,

28. и ваш лэ́нгэ дро маруно́ яныбэ́н пшэнично яржо́, перемешындло елеёса, трин дэшта паша́ эфатыр пэ кажнонэ́ гуруворэстэ, дуй дэшта паша́ эфатыр пэ бакрэстэ,

29. и пир дэ́што паш эфатыр пэ кажнонэ́стэ эфта́ бакрэ́ндыр,

30. и екхэ бакрэ́с дрэ свэ́нто дыибэ́н Ра́скэ-Дэвлэ́скэ пал грэ́хо, ваш жужакирибэн тумаро́;

31. Апри́ч кажнонэ́-дывэсытконэскиро цэ́ло схачкирибэ́н и маруно́ яныбэ́н ваш лэ́нгэ, янэ́н дава́ Ма́нгэ лэ́нгирэ вычхуибнаса: би дошакиро ёнэ исын бангэ́ тэ явэ́н ёнэ тумэ́ндэ.

Psalms 34:8-14

8. Лэ́скиро Янго́ло обджала трусця́л и ракхэ́ла сарэ́н, конэ́стэ исын трашаибэ́н анги́л Растэ-Дэвлэ́стэ и зракхэ́ла лэн.

9. Шунэ́н, соб (кай) тэ уджинэ́н, сыр Рай Дэвэ́л исын лачхо́; тэ явэ́л бахтякирдо́ адава́ ману́ш, кон гарадёла пал Лэ́стэ.

10. О, тумэ́ свэ́нта, мэк тэ явэ́л трашаибэ́н тумэ́ндэ анги́л Растэ-Дэвлэ́стэ, пал-дова́ со одолэ́ндэ, савэ́ндэ исын трашаибэ́н анги́л Лэ́стэ, на явэ́ла трэ́бима ни дро со.

11. Тэрнэ́ шчэрорэндэ (левицэндэ) исын трэ́бима и ёнэ ха́на мэ́ньки бокха́тыр, нэ одолэ́ манушэ́ндэ, савэ́ гарадёна пал Растэ-Дэвлэ́стэ, на явэ́ла трэ́бима ни дро со.

12. Явэ́н, мирэ́ чхавалэ, шунэ́н ман. Мэ сыклякирава тумэн пал дова́, соб (кай) тэ явэ́л дасаво трашаибэ́н анги́л Растэ-Дэвлэ́стэ.

13. Конэ́скэ исын дро́го джиибэ́н и конэ́скэ исын дро́го тэ дыкхэ́л лачхэ́ дывэса́?

14. То обрикирэс пэ́скири чиб фуе́ лавэ́ндыр и пэ́скирэ ушта́ хоханэ́ лавэ́ндыр;

Proverbs 11:29-29

29. Кон кэрэ́ла дош (чорипэ́н) пэ́скирэ кхэрэ́скэ, одова́ дорэсэ́ла балва́л сыр мэкно́ миштыпэ́н, нэ дылынинько ману́ш явэ́ла писха́ри годэ́-илэ́скирэ манушэ́скэ.

Marek 14:1-26

1. Пир дуй дывэса́ явэ́лас свэ́нко Патради́ и Апреснокэнгиро; раша́нгирэ барыдыра́ и лылвари́тка дыкхнэ́ ракхибны́ткэс, сыр тэ ухтылэ́н Исусо́с фрэнтымаса и тэ мулякирэ́н Лэс.

2. “Нэ пэ свэ́нко Патради́ дава́ нашты́ тэ кэра́с нисыр, – ракирдэ́ ёнэ машки́р пэ́стэ, – мануша́ могинэ́на тэ ґаздэ́н бу́нто.”

3. Ке́ли Ису́со сыс дрэ Вифания, Ёв сыс бэшто́ пал сками́нд дро кхэр кэ Си́моно Проказытконэскиро, и дро кхэр загия́ джувлы́ алибастрытконэ кхорэса (жбаноса) кучонэ́ макхибнаса, саво́ сыс кэрдо́ чачунэ́ нарданостыр. Ёй розмардя́ кхоро́ и лыя́ тэ чхувэ́л пэ шэро́ Исусо́скэ.

4. Вари-савэ́ сыкляибны́тка холясынэ, ракири́: “Палсо́ дасаво макхибнаскиро хасякирибэн!

5. Нау́што (ужэли) сыс нашты́ тэ бикнэл дава́ макхибэн буты́р сыр пал триншэла́ динарии и тэ роздэн ловэ́ богэнгэ.” И ёнэ ракирдэ́ холя́са ла́кэ.

6. Нэ Ису́со пхэндя́: “Мэкэ́н ла, со тумэ́ кэрэ́на пхаро́ ла́кэ. Ёй кэрдя́ лачхо́ рэ́ндо ваш Ма́нгэ.

7. Боги исын ўса́ды (сак) пашы́л тумэ́ндэ и тумэ́ могинэ́на тэ дзн васт лэ́нгэ, ко́ли тумэ́нгэ исын пир ило́, а Мэ на ява́ва ўса́ды (сак) тумэ́нца.

8. Ёй кэрдя́, со сыс сашты́ дрэ ла́кири зор, ёй англэды́р помакхця Мирэ́ маса́ кэ гараибэн.

9. Чачэс, Мэ ракира́ва тумэ́нгэ: кай бы тэ на явэ́л тэ пхэнэлпэ лав далэ́ Евангелиятыр пир саро́ свэ́то, дро рипирибэ́н пал адалятэ джувля́тэ явэ́на тэ ракирэ́н пал дова́, со ёй кэрдя́.”

10. И Юда Искариото, екх дэшудуендыр сыкляибнытконэндыр, гия́ тэды кэ раша́нгирэ барыдыра́ тэ здэл Исусо́с.

11. И ке́ли ёнэ шундлэ́ дава́, ёнэ адя́кэ обрадындлэпэ и дынэ́ лав тэ дэн ловэ́ лэ́скэ. И ёв лыя́ тэ родэ́л ваканцыя (случаё), соб (кай) тэ здэл Исусо́с.

12. Дро пэ́рво ж дывэ́с Апреснокэнгиро Свэ́нко, ке́ли чхинэнас Патрадитконэ бакрорэс, сыкляибны́тка ракирэ́на Лэ́скэ: “Кай Ту́кэ исын пир ило́, соб (кай) амэ тэ джас и тэ кэра́с Ту́кэ патрадитко сками́нд?”

13. Ису́со бичхавэ́ла дуе́н лэ́ндыр и ракирэ́ла: “Джа́н дро фо́ро; и тумэ́ дыкхэ́на манушэ́с пирьяса пане́са, джа́н пал лэ́стэ,

14. и заджа́н дро кхэр, дро саво́ ёв заджа́ла, и пхэнэ́н кхэритконэ́ хула́скэ: “Сыклякирибна́скиро пхучэла: кай явэ́ла шту́ба, соб (кай) Мэ Пэ́скирэ сыкляибнытконэ́нца тэ хав Патради́?”

15. Ёв тумэ́нгэ сыкавэ́ла упратуны бари шука́р шту́ба; одо́й кэрэ́н сками́нд ваш амэ́нгэ”.”

16. Сыкляибны́тка Лэ́скирэ гинэ́, явнэ́ дро фо́ро; саро́ сыс адя́кэ, сыр пхэндя́ лэ́нгэ Ису́со, и ёнэ кэрдэ́ патрадитко сками́нд.

17. И ке́ли яця́ бэльвэ́ль, Ёв явдя́ дэшудуе́ сыкляибнытконэ́нца.

18. И ке́ли ёнэ сыс бэштэ́ пал сками́нд и ханас, Ису́со пхэндя́: “Чачэс, Мэ ракира́ва тумэ́нгэ: екх тумэ́ндыр здэла Ман, саво́ ха́ла Ма́нца.”

19. Сыкляибны́тка пынэ́ дро ду́хо (фа́но), и лынэ́ тэ пхучэ́н екх палэ екхэ́стэ: “Чачэс, дава́ на мэ, Раё Дэ́вла?”

20. “Екх дэшудуендыр”, – пхэндя́ Ису́со, – “одова́, кон кхэтанэ́ Ма́нца макинэла дро чаро́.

21. Чхавэ́скэ Манушэскирэскэ проджалапэ тэ мэнчынэлэпэ, сыр дава́ сыс анги́л пхэндло́, а би́да кодолэ́ манушэ́скэ, саво́ здэла Чхавэ́с Манушэскирэс! Фэды́р явэ́лас ваш лэ́скэ тэ на бияндёл.”

22. Ке́ли ёнэ ханас, Ису́со лыя́ маро́, парикирдя Дэвлэ́скэ пал лэ́стэ, пхагирдя́ лэс, дыя́ лэ́нгэ, ракири́: “Лэн, хан; акэ, исын Мирэ́ маса́.”

23. И ке́ли Ёв лыя́ тахта́й (чаша), пхэндя́ парикирибэн Дэвлэ́скэ, дыя́ лэ́нгэ и ёнэ сарэ́ пинэ́ лэ́стыр.

24. “Акэ, исын Миро рат завето́скиро, саво́ прочхудо пал бутэндэ”, – пхэндя́ Ёв лэ́нгэ.

25. “Чачэс, Мэ ракира́ва тумэ́нгэ: Мэ на ява́ва тэ пья́в буты́р аплодо винаградоскирэ хрустостыр анги́л дова́ дывэ́с, ке́ли Мэ ява́ва тэ пья́в нэви́ мол (вино) дро Дэвлэ́скиро Кралипэ́н.”

26. И ке́ли ёнэ збагандлэ шардытко гилы́ Дэвлэ́скэ, тэды гинэ́ пэ Оливи́тко Бэ́рга.

Romani Bible Baltic 2019

Maintained by the United Bible Societies for the Baltic Romani Mission