Bible in one year - Пэ Балтитко Романи чиб

Bible in one year March 16

1. И дро эфта́то чхон, пэ пэ́рво-чхонэ́скиро дывэ́с, мэк тэ явэ́л тумэ́ндэ свэ́нто скэдыибэ́н; на кэрэ́н нисави́ буты́; мэк тэ явэ́л дава́ тумэ́ндэ радымакиро дывэ́с рогоскирэ зникоса (трубакирэ звукоса).

2. И янэ́н цэ́ло схачкирибэ́н дрэ гудло́ тхув, лачхо́ Ра́скэ-Дэвлэ́скэ: екхэ гуруво́рэс, екхэ бакрэ́с, эфта́ екхэ-бэршытконэ бакрэ́н, би дошакирэн,

3. и ваш лэ́нгэ дро маруно́ яныбэ́н тэ явэ́л пшэнично яржо́, перемешындло елеёса, трин дэшта паша́ эфатыр пэ гуруворэстэ, дуй дэшта паша́ эфатыр пэ бакрэстэ,

4. и екх дэ́што паш эфатыр пэ кажнонэ́стэ эфта́ бакрэ́ндыр,

5. и екхэ́с бузнэ́с (козлос) дрэ свэ́нто дыибэ́н Ра́скэ-Дэвлэ́скэ пал грэ́хо, ваш жужакирибэн тумаро́,

6. апри́ч нэвонэ́-чхонэскирэ цэ́ло схачкирибнэн и лэ́скиро марунэ яныбэ́н, и апри́ч цэ́ло схачкирибэ́н пэ кажно дывэ́с и лэ́скиро маруно́ яныбэ́н, и лэ́нгиро вычхуибэн, пир упхэныбэ́н, дро гудло́ тхув, лачхо́ Ра́скэ-Дэвлэ́скэ.

7. И пэ дэ́што дывэ́с далэ́ эфта́-чхонэ́скиро, мэк тэ явэ́л тумэ́ндэ свэ́нто скэдыибэ́н. Чхувэ́н пэс тэлэды́р дрэ тумарэ́ илэ, и нисаво́ рэ́ндо тэ на кэрэ́н;

8. и янэ́н цэ́ло схачкирибэ́н Ра́скэ-Дэвлэ́скэ дро гудло́ тхув: екхэ гуруво́рэс, екхэ бакрэ́с, эфта́ екхэ-бэршытконэн бакрэ́н; би дошакирэн, бангэ́ ёнэ тэ явэ́н тумэ́ндэ;

9. и ваш лэ́нгэ дро маруно́ яныбэ́н пшэнично яржо́, перемешындло елеёса, трин дэшта паша́ эфатыр пэ гуруворэстэ, дуй дэшта паша́ эфатыр пэ бакрэстэ,

10. и пир дэ́што паш эфатыр пэ кажнонэ́стэ эфтанэ бакрэ́ндыр,

11. и екхэ бузнэ́с (козлос) дрэ свэ́нто дыибэ́н Ра́скэ-Дэвлэ́скэ пал грэ́хо, апри́ч свэнтонэ́ яныбнастыр Ра́скэ-Дэвлэ́скэ пал грэ́хо, саво́ янэ́на пэ жужакирибнаскиро дывэ́с, и апри́ч кажнонэ́-дывэсэскирэ цэ́ло схачкирибэ́н и лэ́скиро маруно́ яныбэ́н, и лэ́скиро вычхуибэн.

12. И пэ дэшупанджто дывэ́с эфта́-чхонэ́скиро мэк тэ явэ́л тумэ́ндэ свэ́нто скэдыибэ́н; нисави́ буты́ тэ на кэрэ́н, и свэнкинэн Ра́скирэ-Дэвлэ́скиро свэ́нко эфта́ дывэса́;

13. и янэ́н цэ́ло схачкирибэ́н, свэ́нто яныбэ́н, гудло́ тхув, лачхо́ Ра́скэ-Дэвлэ́скэ: дэшутрин гуруворэ́н, дуе́н бакрэ́н, дэшуштар екхэ-бэршытконэн бакрэ́н; би дошакирэн, мэк тэ явэ́н ёнэ;

14. и ваш лэ́нгэ дро маруно́ яныбэ́н пшэнично яржо́, перемешындло елеёса, трин дэшта паша́ эфатыр пэ кажнонэ́стэ дэшутринэндыр гуруворэндыр, дуй дэшта паша́ эфатыр пэ кажнонэ́ дуендыр бакрэ́ндыр,

15. и пир дэ́што паш эфатыр пэ кажнонэ́стэ дэшуштарэндыр бакрэ́ндыр,

16. и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и лэ́скирэ марунэ яныбнастыр и лэ́скирэ вычхуибнастыр.

17. И пэ яви́р дывэ́с дэшуду́й гуруворэ́н, дуе́н бакрэ́н дэшуштар екхэ-бэршытконэ бакрорэ́н, би дошакирэн,

18. и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

19. и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дэвэсытконэ цэлонэ́ схачкирибнастыр и марунэ яныбнастыр и лэ́нгирэ вычхуибнастыр.

20. И пэ три́то дывэ́с дэшуекх гуруворэ́н, дуе́н бакрэ́н, дэшуштар екхэ-бэршытконэ бакрорэ́н, би дошакирэн,

21. и ваш лэ́нгэ маруно́ яныбэ́н и вычхуибэн ваш гуруворэнгэ, бакрэ́н и бакрорэ́н, пир лэ́нгиро гиныбэ́н, пир упхэныбэ́н,

22. и екхэ бузнэ́с (козлос) дро свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и марунэ яныбнастыр и лэ́скирэ вычхуибнастыр.

23. И пэ шта́рто дывэ́с дэш гуруворэ́н, дуе бакрэ́н, дэшуштар екхэ-бэршытконэн бакрорэ́н, би дошакирэн,

24. и ваш лэ́нгэ маруно́ яныбэ́н и вычхуибэн ваш гуруворэнгэ, бакрэ́н и тэрнэ́ бакрорэ́н, пир лэ́нгиро гиныбэ́н, пир упхэныбэ́н,

25. И екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсэскиро цэлонэ́ схачкирибнастыр и марунэ яныбнастыр и лэ́скирэ вычхуибнастыр.

26. И пэ па́нджто дывэ́с еня́ (биекхэ́скиро дэш) гуруворэ́н, дуе бакрэ́н, дэшуштар екхэ-бэршытконэ бакрорэ́н, би дошакирэн,

27. и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

28. и екхэ бузнэ дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и марунэ яныбнастыр и лэ́скирэ вычхуибнастыр.

29. И пэ шо́вто дывэ́с охто́ гуруворэ́н, дуе бакрэ́н, дэшуштар екхэ-бэршытконэн бакрорэ́н, би дошакирэн,

30. и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

31. и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, апри́ч кажнонэ́-дывэсытконэ́ цэ́ло схачкирибэ́н и лэ́скиро маруно́ яныбэ́н, и лэ́скиро вычхуибэн.

32. И пэ эфта́то дывэ́с эфта́ гуруворэ́н, дуе́н бакрэ́н, дэшуштар екхэ-бэршытконэн бакрорэ́н би дошакирэн,

33. и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

34. и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и марунэ яныбнастыр и лэ́скирэ вычхуибнастыр.

35. Пэ охто́то дывэ́с тумэ́ндэ мэк тэ явэ́л свэ́нто скэдыибэ́н. На кэрэ́н нисави́ буты́.

36. И янэ́н цэ́ло схачкирибэ́н, свэ́нто дыибэ́н, гудло́ тхув, лачхо́ Ра́скэ-Дэвлэ́скэ; екхэ гуруво́рэс, екхэ бакрэ́с, эфта́ екхэ-бэршытконэн бакрорэ́н, би дошакирэн;

37. и кхэтанэ́ лэ́нца маруно́ яныбэ́н и почхуибэн ваш гуруворэскэ, бакрэскэ и бакрорэнгэ пир лэ́нгиро гиныбэ́н, пир упхэныбэ́н,

38. и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, апри́ч кажнонэ́-дывэсытконэ́ цэ́ло схачкирибнэн и лэ́скиро маруно́ яныбэ́н, и лэ́нгиро вычхуибэн.

39. Янэ́н дава́ Ра́скэ-Дэвлэ́скэ дрэ тумарэ́ свэ́нки, упрэдыр долэндыр, со тумэ́ англэды́р яндлэ́, пир совэ́л, ци пир ило́, сарэ́ цэлонэ́ схачкирибнэндыр тумарэ́ и марунэ тумарэ́ яныбнастыр, и тумарэ́ вычхуибнастыр и мирнонэ свэнтонэ́ дыибна́стыр.”

Numbers 30:1-16

1. И пирипхэндя Мо́йза Израилёскирэ чхавэ́нгэ саро́, со ракирдя́ Рай Дэвэ́л Мойза́скэ.

2. И пхэндя́ Мо́йза барыдырэ́нгэ пэ ро́дыцы Израилёскирэ чхавэ́ндыр: “Ѓа́да, со припхэндя́ Рай Дэвэ́л:

3. ‘Ко́ли вари-кон дэ́ла совэ́л Ра́скэ-Дэвлэ́скэ ци совлахала кошыбнаса, чхуви отпхэныбэ́н пал пэ́скиро ди, тэды ёв нашты́ (на мусинэла) тэ парувэл пэ́скиро лав, нэ ёв исын банго́ тэ кэрэ́л саро́, со выгия́ лэ́скирэ уштэндыр.

4. Ко́ли джувлы́ дэ́ла совэ́л Ра́скэ-Дэвлэ́скэ, и чхувэ́ла пэ пэ́стэ отпхэныбэ́н дрэ пэ́скирэ-дадэ́скиро кхэр, дро пэ́скиро тэрныпэн,

5. и шунэ́ла дад ла́кири совэ́л и отпхэныбэ́н, саво́ ёй чхудя́ пэ пэ́скиро ило́, и на пхэнэ́ла пал дова́ ла́киро дад, тэды сарэ́ ла́кирэ совэла явэ́на тэ тэрдён пал ла́тэ, и кажно ла́киро отпхэныбэ́н, саво́ ёй чхудя́ пэ пэ́скиро ило́, явэ́ла;

6. ко́ли ла́киро дад, шундя́, и припхэнэла ла́кэ тэ на рикирэ́л совэ́л дурэды́р, тэды сарэ́ ла́кирэ совэла и отпхэныбэна, савэ́ ёй чхудя́ пэ пэ́скиро ило́, на явэ́на дрэ зор, и Рай Дэвэ́л отмэкэ́ла ла́кэ, пал-дава́ со ла́кэ запхэндя ла́киро дад.

7. Ко́ли ёй выджа́ла палоро́м, а пэ ла́тэ ла́кири совэ́л, ци лав ла́кирэ уштэндыр, савэ́са ёй спхандя пэс,

8. и шунэ́ла ла́киро ром, и шуны, ничи́ на пхэнэ́ла: тэды ла́кири совэ́л явэ́ла, и ла́кирэ отпхэныбэна, савэ́ ёй чхудя́ пэ пэ́скиро ило́, явэ́на;

9. ко́ли ла́киро ром, шуны, запхэнэла ла́кэ, и отлыджала ла́кири совэ́л, сави́ сыс пэ ла́тэ, и лав ла́кирэ уштэндыр, савэ́нца ёй спхандя пэс, тэды ёнэ на явэ́на, и Рай Дэвэ́л отмэкэ́ла ла́кэ.

10. Совэ́л пивлякири (удовакири) и джувлякири, сави́ розлыджияпэ ромэса, саво́ б ёй тэ на чхувэ́л отпхэныбэ́н пэ пэ́скиро ило́, явэ́ла тэ рикирэлпэ.

11. Ко́ли ромны́ дрэ пэ́скирэ-ромэскиро кхэр дыя́ совэ́л, ци чхудя́ отпхэныбэ́н пэ пэ́скиро ило́ совлахаса,

12. и ла́киро ром шундя́, и ёв сыс штыл пал дова́, и на запхэндя ла́кэ, тэды сарэ́ ла́кирэ совэла явэ́на, и кажно отпхэныбэ́н, саво́ ёй чхудя́ пэ пэ́скиро ило́, явэ́ла дрэ зор;

13. ко́ли ла́киро ром, шуны, отлыджала лэн, тэды сарэ́, савэ́ выгинэ́ ла́кирэ уштэндыр ла́кирэ совэла и отпхэныбэна ла́кирэ илэ́скирэ на явэ́на: ла́киро ром отлыя зор лэ́ндыр, и Рай Дэвэ́л отмэкэ́ла ла́кэ.

14. Кажно совэ́л и кажно совла́х кошыбнаса, соб (кай) тэ чхувэ́л тэлэды́р пэ́скиро ди, ла́киро ром сашты́ (могинэ́ла) тэ зоралякирэл, и ла́киро ром сашты́ (могинэ́ла) тэ отлыджал;

15. ко́ли ла́киро ром на ракирдя́ ничы́ пал дова́ дывэ́с, тэды ёв долэса зоралякирдя сарэ́ ла́кирэ совэла, и сарэ́ ла́кирэ совлаха́ кошыбнаса, савэ́ сыс пэ ла́тэ, ёв зоралякирдя, пал-дова́ со ёв, шуны, на ракирдя́ пал дова́;

16. а ко́ли отлыджия лэн, то пало́ (после) дова́, сыр шундя́, тэды ёв лыя́ пэ пэ́стэ ла́киро грэ́хо.

Psalms 34:15-22

15. ракх пэс тэ кэрэ́с фуипэ́н, кэр лачхипэ́н; ро́дэ рама́нё (миро) и прилэ́ зор тэ латхэс Лэс.

16. Ра́скирэ-Дэвлэ́скирэ якха́ дыкхэ́на пал чачипнаскирэ манушэ́ндэ, и лэ́скиро кан исын отпхандло, сыр ёнэ дэ́на го́дла кэ Ёв.

17. Рай Дэвэ́л отрискирэла Пэ́скиро муй одолэ́ндыр, кон кэрэ́ла чорипэ́н, соб (кай) тэ отчингирэлпэ рипирибэ́н пал лэ́ндэ пхувья́тыр.

18. Патяибнаскирэ мануша́ кхарэ́на Рас-Дэвлэ́с и Ёв шунэ́ла, И Ёв зракхэ́ла лэн сарэ́ лэ́нгирэ пхарипнастыр.

19. Рай Дэвэ́л исын пашы́л одолэ́ндэ, савэ́ндэ исын пхаро́ пэ ило́, и Ёв зракхэ́ла одолэ́н, кон дандырэла пэ́скиро ило́ пал грэ́хо.

20. Чачипнаскирэ мануша́ страдынэна бут, нэ Рай Дэвэ́л помогинэла лэ́нгэ дро саро́ дава́.

21. Ёв ракхэ́ла сарэ́ лэ́скирэ кока́лы, ние́кх лэ́ндыр исын на пхагно.

22. Фуипэ́н мулякирэ́ла фуе́ манушэ́н, и одолэ́, савэ́ бидыкхэна чачипнаскирэн, пэрэ́на тэл ка́ра.

Proverbs 11:30-31

30. Чачипэ́н исын джиибна́скиро кашт (дрэ́во) сы́рбы пхабай и годо́ ману́ш притырдэла дия́.

31. Ко́ли чачуно́ ману́ш дорэсэ́ла мазу́ри (награда) пэ пхув, тэды буты́р дорэсэ́ла грэхи́тко и фуй ману́ш.

Marek 14:27-54

27. “Сарэ́ тумэ́ Ма́ндыр отпэрэна”, – ракирэ́ла лэ́нгэ Ису́со, – палдава́ исын чхиндло́: ‘Мэ хасякира́ва Чхупнарис и роспрастанапэ бакря́;’

28. нэ пало́ дава́, ке́ли Мэ отджидёвава, Мэ сыгэды́р тумэ́ндыр ява́ва дрэ Галиле́я.’”

29. Нэ Пэ́три жа пхэндя́ Лэ́скэ: “И ко́ли сарэ́ Ту́тыр отпэрэна-мэ никели дава́ на кэра́ва.”

30. Тэды ракирэ́ла Лэ́скэ Ису́со: “Чачэс, Мэ ракира́ва Ту́кэ, со ададывэ́с бэльвэлякиро, анги́л дова́, сыр башно пробагала дуй мо́лы, ту трин мо́лы отпхэнэсапэ Ма́ндыр.”

31. А Пэ́три ишчо (инкэ́) буты́р патякирэлас: “И ко́ли ма́нгэ явэ́ла трэй тэ мэрав Ту́са, мэ на отпхэнавапэ Ту́тыр.” И сарэ́ сыкляибны́тка ракирдэ́ дова́-паць.

32. И ёнэ явнэ́ пэ штэ́то, саво́ кхарэ́лапэ Гефсимания и Ису́со пхэндя́ сыкляибнытконэ́нгэ: “Бэшэ́н кадай, пака Мэ джа́ва тэ мангавпэ Дэвлэ́скэ.”

33. И лыя́ Ёв пэ́са Пэтрис, Яково́с и Ианос, и обухтылдя Лэс бари дар и смэнтныма.

34. “Миро ило́ исын пхэрдо́ мэрибнытконэ дара́са”, – ракирэ́ла Ёв лэ́нгэ, – “явэ́н ада́й, и ракхэ́нпэ [на совэн-р.с.].”

35. И Ёв отгия́ на́бут анги́л, и пыя́ мо́са пэ пхув, мангдя́пэ Дэвлэ́скэ, соб (кай), ко́ли сашты́ (можна), тэ проджал (накхэл) дрэ риг Лэ́стыр дава́ мардо́ (шту́нда);

36. и Ёв ракирдя́: “Авва, Да́до! Ту саро́ могинэ́са. Лы́джа дава́ тахта́й (чаша) дрэ риг Ма́ндыр; а мэк тэ на явэ́л адя́кэ, сыр Ма́нгэ исын пир ило́, а сыр исын Ту́кэ пир ило́.”

37. И Ису́со явэ́ла палэ и латхэ́ла, со ёнэ исын сутэ́, и ракирэ́ла Пэтрискэ: “Симоне, ту сан суто́? Нау́што ту на могиндян екх мардо́ тэ ракхэспэ [тэ на совэс-р.с.]?

38. Ракхэ́нпэ (на совэн) и мангэ́нпэ Дэвлэ́скэ, соб (кай) тэ на поддэнпэ дро пропатакирибэн; ду́хо (фа́но) исын састо́, а маса́ исын бизорья́кирэ.”

39. Ису́со гия́ и ишчо (инкэ́) мо́ло мангдя́пэ Дэвлэ́скэ долэ́-паць мангипнаса (патерьяса).

40. И нэвэ́стыр Ёв рисия́ и латхя́, со ёнэ сыс сутэ́, пал-дова́ со лэ́нгирэ якха́ сыс зачхакирдэ и ёнэ на джиндлэ́, со Лэ́скэ тэ отпхэнэн.

41. Рисии кэ ёнэ дро три́то мо́ло, Ёв пхэндя́ лэ́нгэ: “Тумэ́ уса́ сан сутэ́ и откхинёна. Ухты́лла (до́си)! Мардо́ явдя́: дыкхэ́н, Чхавэ́с Манушэскирэс здэна дрэ грэхитконэ́-манушэ́нгирэ васта́.

42. Уштэ́н, джа́са! Акэ, ужэ сарэ́са пашы́л исын кодова́, кон здэла Ман!”

43. И пака Ёв ишчо (инкэ́) ракирдя́, явэ́лас Юда, екх дэшудуендыр, и сыс лэ́са бут мануша́ курталэнца и килэнца, савэ́н бичхадэ́ раша́нгирэ барыдыра́, лылвари́тка и годэпхурэ́.

44. Здыибнари доракирдяпэ лэ́нца пал шпэ́ра (знако): “Кадава́, Конэ́с мэ чамудава, исын Ёв; закэдэн Лэс и лыджа́н тэл ракхибэн.”

45. И екха́тыр подги́я ёв кэ Ису́со, ракири́: “Добридим, Равви!” И чамудя Лэс.

46. И ёнэ чхудэ́ васта́ пэ Лэ́стэ и ухтылдэ́ Лэс.

47. Екх манушэ́ндыр, саво́ сыс тэрдо́ ада́й, выухтылдя курта́ла пэ́скири и чингирдя ла́са раша́нгирэ барыдырэскирэ писхари́с и отчингирдя лэ́скэ кан.

48. Ису́со отпхэндя́ лэ́нгэ: “Сыр пэ розмарибнаристэ тумэ́ выгинэ́ курталэнца и килэнца тэ лэн Ман?

49. Мэ кажно дывэ́с со́мас бэшто́ тумэ́нца и сыклякирдём дрэ Кхангири́ и тумэ́ на лынэ́ Ман; нэ мэк тэ сполнинэ́лпэ Чхиныбэ́н.”

50. И сарэ́ сыкляибны́тка мэкнэ́ Лэс и нашнэ́ криг.

51. А екх тэрно́ ману́ш сатаки джа́лас пал Лэ́стэ: пэ лэ́стэ сыс екх цэ́рга пэ псикэ́ и ёнэ ухтылдэ́ лэс.

52. Нэ ёв вырискирдяпэ лэ́ндыр криг и насця одотхы́р нанго (дрэ екх цэ́рга).

53. И яндлэ́ Исусо́с кэ пэ́рво раша́нгиро барыдыро́: и скэдынэ́пэ сарэ́ раша́нгирэ барыдыра́, годэпхурэ́ и лылвари́тка.

54. И Пэ́три джа́лас дура́л пал Лэ́стэ дурипнастыр кэ пэрвонэ́-раша́нгирэ барыдырэскири грэ́да (дво́ро); и ёв бэсця́ слугэ́нца (дынарье́нца) и татёлас пашы́л яг.

Romani Bible Baltic 2019

Maintained by the United Bible Societies for the Baltic Romani Mission