Bible in one year - Пэ Балтитко Романи чиб

Bible in one year March 18

1. Ѓа́да, исын Израилёскирэ-чхавэ́нгирэ дрома́ [станы-р.с.], савэ́нца гинэ́ ёнэ Египто́скирэ пхувья́тыр пир пэ́скирэ отря́ды, тэл барыдырэндэ Мойзастэ и Аароностэ.

2. О Мо́йза, пир Ра́скирэ-Дэвлэ́скиро припхэныбэ́н, зачхиндя́ лэ́нгирэ дрома́, сыр гинэ́ ёнэ пир лэ́нгирэ дрома́ станэнца, и, ґа́да, исын лэ́нгиро дром и, кай ёнэ сыс тэрдэ́:

3. Раамсэсостыр гинэ́ ёнэ дро пэ́рво чхон, пэ дэшупанджто дывэ́с пэрвонэ́ чхонэ́скиро; пэ яви́р дывэ́с, Патради́, выгинэ́ Израилёскирэ чхавэ́ тэл вучо́ васт анги́л сарэ́ Египто́скирэ якха́;

4. дрэ дова́ часо Египтя́ни ґарадэ́ сарэ́н англатунэн чхаворэ́н, савэ́н хасякирдя́ лэ́ндэ Рай Дэвэ́л, и пэ лэ́нгирэ дэвлорэндэ Рай Дэвэ́л кэрдя́ сэ́ндо.

5. И адя́кэ гинэ́ Израилёскирэ чхавэ́ Раамсэсостыр и тэрдинэ́ стано́са (табороса) дро Сокхофо.

6. И гинэ́ Сокхофостыр, и тэрдинэ́ стано́са дро Ефамо, со пэ чхучэ́-пхувья́киро яго́ро (краё).

7. И гинэ́ Ефамостыр, и рискирдэ́ кэ Пи-Гахирофо, со исын анги́л Ваал-Цэфономо, и тэрдинэ́ стано́са анги́л Мигдоломо.

8. Тэ́ньци гинэ́ ёнэ Пи-Гахирофостыр, прогинэ́ машкира́л мо́рё (дэрья́в) пэ чхучи́ пхув, и гинэ́ трин дывэса́ дромэ́са чхучэ́ пхувья́кирэ Ефамоса, и тэрдинэ́ стано́са дрэ Ме́ра [Мара-ю.о.].

9. И гинэ́ Мератыр, и явнэ́ дро Елимо; дро Елимо сыс дэшуду́й штэ́ты ґанынгэнца, каты́р джа́ла пани́ и эфтадэша́ финикитка дрэвы, и тэрдинэ́ одо́й стано́са.

10. И гинэ́ Елимостыр, и тэрдинэ́ стано́са пашы́л Лоло́ мо́рё (дэрья́в).

11. И гинэ́ ёнэ Лолэ́ морёстыр (дэрьявэстыр), и тэрдинэ́ стано́са пэ чхучи́ пхув Син.

12. И гинэ́ чхучэ́ пхувья́тыр Син, и тэрдинэ́ стано́са дрэ Дофка.

13. И гинэ́ ёнэ Дофкатыр, и тэрдинэ́ стано́са дро Алушо.

14. И гинэ́ Алушостыр, и тэрдинэ́ стано́са дро Рефидимо, и на сыс одо́й пани́, соб (кай) тэ пьен мануша́.

15. И гинэ́ Рефидимостыр, и тэрдинэ́ стано́са пэ чхучи́ пхув Синаёскири.

16. И гинэ́ Синаёскирэ чхучэ́ пхувья́тыр и тэрдинэ́ стано́са дро Киброт-Гатаава.

17. И гинэ́ Киброт-Гатааватыр, и тэрдинэ́ стано́са дро Асирофо.

18. И гинэ́ Асирофостыр, и тэрдинэ́ стано́са дрэ Рифма.

19. И гинэ́ Рифматыр, и тэрдинэ́ стано́са дро Римнон-Фарецо.

20. И гинэ́ Римнон-Фарецостыр, и тэрдинэ́ стано́са дрэ Ливна.

21. И гинэ́ Ливнатыр и тэрдинэ́ стано́са дрэ Риса.

22. И гинэ́ Рисатыр, и тэрдинэ́ стано́са дро Кегелафо.

23. И гинэ́ Кегелафостыр и тэрдинэ́ стано́са пэ бэ́рга Шафер.

24. И гинэ́ Шаферостыр и тэрдинэ́ стано́са дрэ Харада.

25. И гинэ́ Харадатыр и тэрдинэ́ стано́са дро Макелофо.

26. И гинэ́ Макелофостыр и тэрдинэ́ стано́са дро Тахафо.

27. И гинэ́ Тахафостыр и тэрдинэ́ стано́са дро Тарахо.

28. И гинэ́ Тарахостыр и тэрдинэ́ стано́са дрэ Мафка.

29. И гинэ́ Мифкатыр и тэрдинэ́ стано́са дрэ Хашмона.

30. И гинэ́ Хашмонатыр и тэрдинэ́ стано́са дро Масерофо.

31. И гинэ́ Масерофостыр и тэрдинэ́ стано́са дрэ Бене-Яакана.

32. И гинэ́ Бене-Яаканатыр и тэрдинэ́ стано́са дро Хор-Агидгадо.

33. И гинэ́ Хор-Агидгадостыр и тэрдинэ́ стано́са дрэ Иотвафа.

34. И гинэ́ Иотвафатыр и тэрдинэ́ стано́са дро Авроно.

35. И гинэ́ Авроностыр и тэрдинэ́ стано́са дро Ецыон-Гаверо.

36. И гинэ́ Ецион-Гаверостыр и тэрдинэ́ стано́са пэ чхучи́ пхув Син, ёй адя́кэ-паць кхарэ́лапэ Кадесо.

37. И гинэ́ Кадесостыр и тэрдинэ́ стано́са пэ бэ́рга Оро, пашы́л Эдомоскирэ-пхувья́киро яго́ро (ме́жа).

38. И гия́ упрэ́ раша́й Ааро́но пэ бэ́рга пир Ра́скирэ-Дэвлэ́скиро припхэныбэ́н, и мыя́ одо́й дро штардэшытко бэрш пало́ дава́, сыр Израилёскирэ чхавэ́ явнэ́ Египто́скирэ пхувья́тыр, дро па́нджто чхон, дро пэ́рво-чхонэ́скиро дывэ́с;

39. Аароно́скэ сыс шэл тэ биш тэ трин бэрш, ке́ли мыя́ ёв пэ бэ́рга Ор.

40. Ханааноскиро кра́ли Арада, саво́ дживдя́ кэ паш-дывэ́с (юго) Ханаансконэ пхувья́тыр, шундя́, со джа́на Израилёскирэ чхавэ́.

41. И гинэ́ ёнэ бэрга́тыр Ор и тэрдинэ́ стано́са дрэ Салмона.

42. И гинэ́ Салмонатыр и тэрдинэ́ стано́са дро Пуноно.

43. И гинэ́ Пуноностыр и тэрдинэ́ стано́са дро Овофо.

44. И гинэ́ Овофостыр и тэрдинэ́ стано́са дрэ Ие Аваримо [Иймо-р.с.], пэ Моавоскиро яго́ро (ме́жа).

45. И гинэ́ Иймостыр и тэрдинэ́ стано́са дро Дивон-Гадо.

46. И гинэ́ Дивон-Гадостыр и тэрдинэ́ стано́са дро Алмон-Дивлафаимо.

47. И гинэ́ Алмон-Дивлафаимостыр и тэрдинэ́ стано́са пэ Аваримоскирэ бэ́рги анги́л Нево.

48. И гинэ́ Аваримоскирэ бэргэндыр и тэрдинэ́ стано́са пэ Моавитоскирэ лошчыны (равнины) пашы́л Иорда́но, проти Ерихо́но;

49. ёнэ тэрдинэ́ стано́са пашы́л Иорда́но Беф-Ешимофостыр кэ Аве-Ситимо пэ Моавитоскирэ лошчыны.

50. И пхэндя́ Рай Дэвэ́л Мойза́скэ пэ Моавитоскирэ лошчыны пашы́л Иорда́но, проти Ерихо́но дасавэ́ лава́:

51. “Ра́кир Израилёскирэ чхавэ́нгэ и пхэн лэ́нгэ: ‘Ке́ли пириджана тумэ́ пир Иорда́но пэ Ханаано́скири пхув,

52. тэды традэ́н криг пэ́стыр сарэ́н адалэ́-пхувья́кирэ манушэ́н, и хасякирэ́н сарэ́ лэ́нгирэ вычхиндлэ́ муя́, и хасякирэ́н сарэ́ лэ́нгирэ вычхудэ́ и́долы, и сарэ́ лэ́нгирэ вучипэна́ роспхагирэн.

53. И лэн пэ́скэ дая́ пхув, и дживэ́н пэ ла́тэ, пал-дова́ со Мэ да́ва тумэ́нгэ дая́ пхув;

54. и роздэн пхув пир жре́биё сыр мэкно́ миштыпэ́н тумарэ́ кхэритконэ́ родэ́нгэ: ко́ли барэды́р, то ро́до дэн буты́р миштыпна́скири ме́ра, а тыкнэды́р ро́до, то дэ тыкнэды́р миштыпна́скири ме́ра; конэ́скэ кай выджа́ла, одо́й лэ́скэ и явэ́ла миштыпна́скири ме́ра; пир тумарэ́-дадэ́нгиро ро́до лэн пэ́скэ миштыпна́скири ме́ра;

55. ко́ли тумэ́ на вытрадэна криг пэ́стыр адалэ́-пхувья́кирэ манушэ́н, то тэды, савэ́ ячэ́напэ лэ́ндыр мануша́, явэ́на сыр пхусадэ́ хру́сты ваш тумарэ́ якха́ и сувьенца ваш тумарэ́ пашварэ и явэ́на тэ стасавэн тумэн пэ пхув, пэ сави́ тумэ́ явэ́на тэ дживэ́н,

56. и тэды, со Мэ скэдыёмпэ лэ́нгэ тэ кэра́в, кэра́ва тумэ́нгэ.”

Numbers 34:1-29

1. И пхэндя́ Рай Дэвэ́л Мойза́скэ, ракири́:

2. “Дэ упхэныбэ́н Израилёскирэ чхавэ́нгэ и пхэн лэ́нгэ: ‘Ке́ли тумэ́ заджа́на пэ Ханаано́скири пхув, тэды, ґа́да, исын пхув, сави́ доячэлапэ тумэ́нгэ сыр мэкно́ миштыпэ́н, Ханаано́скири пхув ла́кирэ межэнца:

3. паш-дывэсы́тко (южно) ригакиро яго́ро (ме́жа) явэ́ла тумэ́ндэ чхучэ́ пхувья́тыр Син, пашы́л Эдо́мо, и джа́ла тумэ́ндэ паш-дывэсы́тко ме́жа Лондэ-морёскиро (дэрьявэ́скиро) ягоро́стыр,

4. и джа́ла ме́жа пэ паш-дывэ́с кэ Акравимоскирэ вучипэна́ и джа́ла пир Син, и явэ́на ла́кирэ выгиибэна пэ паш-дывэ́с кэ Кадес-Варна, одотхы́р джа́ла кэ Гацар-Адаро и джа́ла пир Ацмоно.

5. Ацмоностыр джа́ла ме́жа кэ Египто́скиро панитко тхадыпэн, и явэ́на ла́кирэ выгиибэна кэ мо́рё (дэрья́в);

6. а западнонэ межаса явэ́ла тумэ́ндэ баро́ мо́рё (дэрья́в): дава́ явэ́ла тумэ́ндэ ме́жа кэ западо (пал-панитко риг);

7. кэ паш-рат явэ́ла тумэ́ндэ ме́жа: барэ́ морёстыр (дэрьявэстыр) пролыджан ла кэ бэ́рга Ор,

8. бэрга́тыр Ор пролыджан ме́жа кэ Емафо, и явэ́на ригакирэ выгиибэна кэ Цэдадо;

9. одотхы́р джа́ла ме́жа кэ Цыфроно, и ла́кирэ-межакирэ выгиибэна явэ́на кэ Гацар-Энано: дая́ явэ́ла тумэ́ндэ паш-рати́тко ме́жа;

10. васточно ме́жа пролыджан пэ́скэ Гацар-Энаностыр кэ Шэфамо,

11. Шэфамостыр джа́ла ме́жа кэ Рибло, Аиноскирэ-васточнонэ рига́тыр, пало́ дава́ джа́ла ме́жа и касынэлапэ морёскирэ (дэрьявэ́скирэ) брэги васточнонэ рига́тыр Кинерефоскирэ;

12. и джа́ла ме́жа кэ Иорда́но, и явэ́на выгиибэна ла́кирэ кэ Лондо мо́рё (дэрья́в). Дая́ пхув явэ́ла тумари́ пир ла́кирэ ме́жы сарэ́ ригэ́ндыр.

13. И дыя́ припхэныбэ́н Мо́йза Израилёскирэ чхавэ́нгэ, и пхэндя́: “Ѓа́да, исын пхув, сави́ тумэ́ роздэна сыр мэкно́ миштыпэ́н пир жре́биё пир ме́ра, пал сави́ дыя́ лав Рай Дэвэ́л тэ дэл еня́ (биекхэ́скиро дэш) родыцэнгэ и пашэ́ родыцо́скэ;

14. пал-дова́ со Рувимо́скирэ-чхавэ́нгиро ро́дыцо пир лэ́нгирэ чэ́карья (семействы), и Гадо́скирэ-чхавэ́нгиро ро́дыцо пир лэ́нгирэ чэ́карья (семействы), и Манасияскири паш ро́дыцо, дорэснэ́ пэ́скири ме́ра мэкнэ́ миштыпна́стыр;

15. дуй ро́дыцы и паш ро́дыцо дорэснэ́ пэ́скири ме́ра мэкнэ́ миштыпна́стыр пал Иорда́но проти Ерихо́но кэ васто́ко.

16. И пхэндя́ Рай Дэвэ́л Мойза́скэ дасавэ́ лава́:

17. “Ѓа́да, исын муршэнгирэ лава́, савэ́ явэ́на тэ роздэн тумэ́нгэ пхув: раша́й Елиза́ро (Елеазаро) и Ису́со (Ёхошуа́), Навиноскиро чхаво́;

18. и лэн пир екхэ тхагаристэ (князёстэ) родыцо́стыр ваш пхувья́киро роздыибэн.

19. И ґа́да, исын далэ́ муршэнгирэ (тхагарьенгирэ) лава́: ваш ро́дыцо Юда́скиро о Халево, Ефонияскиро чхаво́;

20. ваш Симеоноскирэ-чхавэ́нгиро ро́дыцо о Самуи́ло, Амиудоскиро чхаво́;

21. ваш Вениаминоскиро ро́дыцо о Елидадо, Кислоноскиро чхаво́;

22. ваш Дано́скирэ-чхавэ́нгиро ро́дыцо тхага́ри о Буки, Еглиёскиро чхаво́;

23. ваш Иосифо́скирэ чхавэ́нгэ, ваш Манасия́скирэ-чхавэ́нгиро ро́дыцо о тхага́ри Ханиило, Ефодоскиро чхаво́;

24. ваш Ефремо́скирэ-чхавэ́нгиро ро́дыцо тхага́ри о Кемуило, Шифтаноскиро чхаво́;

25. ваш Завулоноскирэ-чхавэ́нгиро ро́дыцо тхага́ри о Елицафано, Фарнакоскиро чхаво́;

26. ваш Исахароскирэ-чхавэ́нгиро ро́дыцо тхага́ри о Фалтиило, Азаноскиро чхаво́;

27. ваш Асироскирэ-чхавэ́нгиро ро́дыцо тхага́ри о Ахиудо, Шеломияскиро чхаво́;

28. ваш Нефалимоскирэ-чхавэ́нгиро ро́дыцо тхага́ри о Педаило, Амиудоскиро чхаво́.”

29. Акэ, исын одолэ́, савэ́нгэ припхэндя́ Рай Дэвэ́л тэ роздэн пхувья́кири ме́ра мэкнэ́ миштыпна́стыр Израилёскирэ чхавэ́нгэ пэ Ханаано́скири пхув.

Psalms 35:9-16

9. И миро ди явэ́ла обрадындло Ра́стыр-Дэвлэ́стыр. Миро ди явэ́ла тэ радынэ́лпэ Ра́стыр-Дэвлэ́стыр, Саво́ зракхця́ ман.

10. Сарэ́ мирэ́ кокалы́ сы́рбы пхэнэ́на кхэтанэ́ ма́нца: “Раё Дэ́вла, кон жа исын дасаво, саво́ подджа́ла пэ Ту́тэ. Ту зракхэ́са бизорья́кирэ манушэ́с одолэ́стыр, кон исын зоралэды́р лэ́стыр; Ту зракхэ́са одолэ́с, саво́ хала́ дукха́ и савэ́с тасавэна; кодолэ́с, саво́ исын дрэ трэ́бима одолэ́стыр, кон чорэла лэ́стыр.”

11. Начачунэ якхи́тка (свидетели) ґаздэ́на проти ма́ндэ, ёнэ допхучэна ма́ндыр пал дова́, со мэ на джино́м (на джина́в).

12. Ёнэ отдэна палэ чорипнаса пал миро лачхипэ́н; ёнэ янэ́на калыпэ́н мирэ́ дескэ.

13. Нэ ке́ли ёнэ сыс насвалэ, мэ со́мас уридо́ дро дзарано гоно́ праскаса (пеплоса); мэ тэлякирдём пэ́скиро ди постоса и миро мангипэ́н Дэвлэ́скэ рисия́ кэ миро ило́.

14. Мэ лыджиём пэс сы́рбы дава́ сыс миро дру́го (мал) ци миро пшал, мэ со́мас сыр ману́ш, саво́ ровэла пал датэ; Мэ бандякирдём шэро́ сыр одова́, кон ровэлас пал датэ.

15. Нэ ке́ли мэ лангандыём, ёнэ обрадынлэпэ и скэдынэ́пэ кхэтанэ́: холямэ́ плёткарья скэдынэ́пэ пэ ма́ндэ. Мэ на джино́м, со́скэ ёнэ пхалькирэнас (понижынэнас) ман и на пириячэнас.

16. Ёнэ скрежынэнас дандэнца пэ ма́ндэ кхэтанэ́ одолэнца, савэ́ са́нас холямэс ма́ндыр.

Proverbs 12:2-2

2. Ра́скэ-Дэвлэ́скэ исын дро́го лачхо́ ману́ш, нэ Ёв бангякирэла манушэ́с, саво́ придуминэла фуипэ́н.

Marek 15:1-24

1. И екха́тыр (сра́зу) пэ зло́ко, сыр яця́ дывэ́с, раша́нгирэ барыдыра́ годэпхурэнца и лылваритконэнца и саро́ Синедрионо пириракирдэ дава́ рэ́ндо, пхандлэ Исусо́с и лыджинэ́ Лэс кэ Пила́то.

2. Пила́то пхуця́ Лэ́стыр: “Ту сан Кра́ли Юдэ́нгиро?” Ису́со отпхэндя́, – “адя́кэ, сыр ту ракирэ́са.”

3. Раша́нгирэ барыдыра́ бангякирэнас зоралэ́с Исусо́с.

4. Пила́то нэвэ́стыр пхуця́ Лэ́стыр: “Со́скэ Ту нисо́ на отпхэнэса? Нэ, шун, сыр бут бангипэна ёнэ ракирэ́на пэ Ту́тэ?”

5. Нэ Ису́со усае́кх нисо́ пэ дава́ на пхэндя́, и дава́ древа́н дивиндя Пилатос.

6. Пэ свэ́нко Пила́то отмэкэлас екхэ манушэ́с штарибнастыр (бэшыбнастыр) пир манушэ́нгиро мангипэ́н.

7. Дро штарибэ́н дро дова́ часо сыс бэшто́ Варава явирэ манушэ́нца, савэ́ ґаздынэ́ бу́нто и замардэ́ манушэ́с.

8. И мануша́ гинэ́ упрэ́ и лынэ́ тэ мангэ́н Пилатос пал дава́, со ёв саро́ мо́ло кэрэ́лас ваш лэ́нгэ.

9. И Пила́то отпхэндя́ лэ́нгэ, ракири́: “Ко́ли тумэ́нгэ исын пир ило́, то мэ отмэка́ва тумэ́нгэ Крали́с Юдэнгирэс?

10. Пила́то ж джиндя́, со рашая́ здынэ Исусо́с лэ́скэ зэвлыныпнастыр.

11. Нэ раша́нгирэ барыдыра́ подракирдэ манушэ́н тэ мангэ́н Пилатостыр тэ отмэкэ́л лэ́нгэ фэды́р Варавас.

12. Нэ Пила́то нэвэ́стыр отпхэндя́ лэ́нгэ: “Со ж Ма́нгэ тэ кэра́в Адалэса, Конэ́с тумэ́ кхарэ́на “Кра́ли Юдэ́нгиро?”

13. “Примар Лэс пэ трушу́л!”, – задынэ го́дла нэвэ́стыр ёнэ.

14. Нэ Пила́то пхэндя́ лэ́нгэ: “Саво́ ж чорипэ́н Ёв кэрдя́?” А ёнэ ишчо (инкэ́) зоралэды́р дынэ́ го́дла: “Примар Лэс пэ трушу́л!”

15. Пила́то ж ваш дова́, соб (кай) тэ кэрэ́л манушэ́нгэ пир ило́, отмэкця́ Варавас, а Исусо́с отдыя́ тэ марэ́н чупняса, тэ́ньчи тэ примарэн пэ трушу́л.

16. Халадэ́ лыджинэ́ Исусо́с дрэ претория и кхардэ́ кхэтанэ́ пхэрдо́ халадэ́нгиро полко.

17. Ёнэ уридэ́ Лэс дрэ пурпурно мантия, скхудэ пхусадытконэ церновникостыр вя́нка и уридэ́ пэ Лэ́скиро шэро́.

18. И ёнэ лынэ́ тэ дэн го́дла: “Яв джидо́, Кра́лё Юдэ́нгиро!”

19. Ёнэ мардэ́ Лэс трасцинитконэ дэстэса пир шэро́ и чунгардынэ пэ Лэ́стэ, пэрэнас пэ чанга́ анги́л Лэ́стэ и клонинэнаспэ.

20. И ке́ли ёнэ высандлэ холямэс Лэс, ёнэ злынэ Лэ́стыр пурпурно мантия, уридэ́ Лэс дро Лэ́скиро урибэ́н, и лыджинэ́ Лэс пэ трушу́л тэ примарэн.

21. И ёнэ зачхудэ вари-савэ́ Симонос Кириянинос, Руфоскирэ и Лександроскирэ дадэ́с, саво́ джа́лас фэлдатыр, тэ лыджа́л Лэ́скиро трушу́л.

22. И ёнэ яндлэ́ Исусо́с пэ штэ́то, саво́ кхарэ́лапэ “Голгофа”, со значынэ́ла “Чэрепо.”

23. Ёнэ дэ́нас Лэ́скэ тэ пьел мол (вино), змешындлы миро́са, нэ Ёв отпхэндяпэ.

24. Ке́ли ёнэ примардэ Лэс пэ трушу́л, ёнэ роскэрдэ (росчхудэ) урибэ́н Лэ́скиро машки́р пэ́стэ пир жре́биё, конэ́скэ со тэ лэл.

Romani Bible Baltic 2019

Maintained by the United Bible Societies for the Baltic Romani Mission