Bible in one year - Пэ Балтитко Романи чиб

Bible in one year March 20

1. Далэ́ исын лава́, савэ́ ракирдя́ Мо́йза (Моисеё) сарэ́ манушэ́нгэ Израилёстыр [Израильтянэнгэ-р.с.] пал Иорда́но пэ чхучи́ пхув пэ лошчы́на проти Суфо, машки́р Фарано и Тофело, и Лава́но, и Асирофо и Дизагаво,

2. дава́ исын дром пэ дэшуекх дывэса́ тэ джас пэзал Хоривостыр, пир дром бэрга́тыр Сеир кэ Кадес-Варни.

3. Дава́ сыс дро штардэшытко бэрш, дэшуекхэ – чхонэ́скиро, пэ пэ́рво чхонэ́скиро дывэ́с, сыр ракирдя́ Мо́йза Израилёскирэ чхавэ́нгэ саро́, со припхэндя́ лэ́скэ Рай Дэвэ́л пал лэ́ндэ.

4. Пало́ (после) дова́, сыр ёв замардя́ (умардя) Сигонос, Аморее́нгирэ крали́с, саво́ дживдя́ кэ Есево́но, и Огос, Васаноскирэ крали́с, саво́ дживдя́ кэ Аштэрофа дрэ Едрея,

5. пал Иорда́но, пэ Моавитоскири пхув, лыя́ Мо́йза тэ ракирэ́л анги́л сарэ́ндэ пал дава́ Зако́но, и пхэндя́:

6. “О Раё Дэ́вла (Яхва́), Дэвэ́л амаро́, ракирдя́ амэ́нгэ дро Хориво и пхэндя́: ‘Ухты́лла (до́си) тумэ́нгэ тэ дживэ́н пэ дая́ бэ́рга!

7. Скэдэ́нпэ, джа́н дро дром, и джа́н пэ Амореенгири бэ́рга и кэ сарэ́ лэ́нгирэ мануша́, савэ́ дживэ́на пашы́л, пэ лошчы́на, пэ бэ́рга, пэ тылякирдэ штэ́ты и пэ паш-дывэсы́тко (южно) риг, и кэ брэги морёскирэ (дэрьявэ́скирэ), пэ Ханаано́скири пхув и кэ Лива́но, адя́кэ-паць кэ бари рэка (лэнь) Евфрато.

8. Ѓа́да, Мэ да́ва тумэ́нгэ дая́ пхув, джа́н, лэн дро маёнко пхув, сави́ совлахаса Рай Дэвэ́л дыя́ лав тэ дэл тумарэ́ дадэ́нгэ Авраамо́скэ, Исаако́скэ и Яково́скэ, лэ́нгэ и лэ́нгирэ родо́скэ.

9. И мэ пхэндём тумэ́нгэ дро дова́ часо (цы́ро): ‘Мэ нашты́ (на могина́ва) екхджино́ тэ лыджав тумэн;

10. Рай Дэвэ́л, амаро́, создыя́ бут тумэн, и ґа́да, тумэ́ акана́ сан ада́кицы бут, сыр болыбна́скирэ чэргэня́;

11. Рай Дэвэ́л, Дэвэ́л, тумарэ́-дадэ́нгиро, мэк тэ создэл тумэн бутэды́р дро тысёнцо мо́лы проти дава́, ци бут тумэн акана́, и мэк тэ бахтякирэ́л тумэн, сыр Ёв ракирдя́ тумэ́нгэ:

12. сыр ма́нгэ екхджинэскэ тэ лыджав тумаро́ пхарипэ́н, кошыбэ́н тумаро́ и чинга́рд тумари́?

13. Выкэдэн пэ́скэ пир тумаро́ ро́дыцо (чанг) муршэ́н мэндронэн, годьварэн, и пропатякирдэн, и мэ чхува́ва лэн тумарэ́ барыдырэ́нца.’

14. Тумэ́ отпхэндлэ́ ма́нгэ и пхэндлэ́: ‘Лачхо́ рэ́ндо (де́ло) ту ракирэ́са тэ кэра́с.’

15. И лыём мэ шэралэн тумарэ́ родыцэндыр (чангэндыр), муршэ́н мэндронэн и пропатякирдэн, и чхудём лэн барыдырэ́нца пэ тумэ́ндэ, тысёнцэнгирэ барыдырэ́нца, шэлэнгирэ барыдырэ́нца, пандждэшэнгирэ барыдырэ́нца, дэшэнгирэ барыдырэ́нца и дыкхибнаскирэнца пир тумаро́ ро́дыцо.

16. И дыём мэ упхэныбэ́н тумарэ́ сэндарьенгэ дро дова́ часо, пхэни́: ‘Вышунэн тумарэ́ пшалэ́н и сэндинэ́н чачунэ́с лэн, сыр пшалэ́с пшалэса, адя́кэ и лэ́скирэ манушэ́с, саво́ явдя́ явирэ рига́тыр;

17. на дыкхэ́н пэ муй пэ сэ́ндо, сыр тыкнэс, адя́кэ и барэс вышунэн, на дарэ́н манушэ́скирэ мо́стыр: пал-дова́ со сэ́ндо – рэ́ндо (де́ло) Дэвлэ́скиро. А рэ́ндо, саво́ ваш тумэ́нгэ исын пхаро́, лыджа́н лэс кэ мэ, и мэ вышунава лэс.’

18. И дыём мэ упхэныбэ́н тумэ́нгэ дро дова́ часо пал саро́, со трэй тумэ́нгэ тэ кэрэ́н.

19. И гиям амэ Хоривостыр, и гиям пир сари́ дая́ бари и дараны чхучи́ пхув, сави́ тумэ́ дыкхнэ́, пир дром кэ Амореенгири бэ́рга, сыр пхэндя́ Рай Дэвэ́л, амаро́ Дэвэ́л, и явдя́м дрэ Кадес-Варни.

20. И пхэндём мэ тумэ́нгэ: ‘Тумэ́ явнэ́ кэ Амореенгири бэ́рга, сави́ Рай Дэвэ́л амаро́ Дэвэ́л дэ́ла амэ́нгэ;

21. ґа́да, исын Рай Дэвэ́л, тыро́ Дэвэ́л дэ́ла ту́кэ дая́ пхув, джа́, лэ ла дро хулаибэн, сыр ракирдя́ ту́кэ Рай Дэвэ́л тырэ́-дадэ́нгиро, на дар и на страхадёв.’

22. Нэ тумэ́ сарэ́ явнэ́ пашылэды́р кэ мэ, и пхэндлэ́: ‘Амэ бичхаваса анги́л пэ́стэ манушэ́н, соб (кай) ёнэ амэ́нгэ тэ розґалён пхув, и тэ янэ́н амэ́нгэ джиныбэ́н пал дром, пир саво́ тэ джас амэ́нгэ, и пал фо́рья, дрэ савэ́ тэ джас амэ́нгэ.’

23. Дава́ лав ма́нгэ сыс пир ило́, и мэ лыём тумэ́ндыр дэшудуен манушэ́н, пэ екхэ манушэ́стэ кажнонэ́ родыцо́стыр.

24. Ёнэ гинэ́, гинэ́ упрэ́ пэ бэ́рга, и догинэ́ кэ до́ло Есхол, и обдыкхнэ ла.

25. И лынэ́ ёнэ дрэ пэ́скирэ васта́ пхувья́кирэ барьякирдэ́ (пло́ды), и яндлэ́ амэ́нгэ и яндлэ́ амэ́нгэ нэвипэн, и пхэндлэ́: ‘Лачхи́ исын пхув, сави́, Рай Дэвэ́л, амаро́ Дэвэ́л дэ́ла амэ́нгэ.’

26. Нэ тумэ́ на закамлэ тэ джа́н и на кандынэ́ Ра́скирэ-Дэвлэ́скиро, амарэ́ Дэвлэ́скиро упхэныбэ́н,

27. и тангиндлэпэ (жалиндлэпэ) холя́са дрэ тумарэ́ ша́тры, и ракирдэ́: “О Рай Дэвэ́л, пир холы́ кэ амэ, вылыджия́ амэн Египто́скирэ пхувья́тыр, соб (кай) тэ отдэ́л амэн дрэ Аморее́нгирэ васта́ и тэ хасякирэ́л амэн;

Deuteronomy 2:1-37

1. И рисиям амэ и гиям пэ чхучи́ (пусто) пхув кэ Лоло́ мо́рё (дэрья́в), сыр ракирдя́ ма́нгэ Рай Дэвэ́л, и бут часо псирдям пашы́л бэ́рга Сеиро.

2. И пхэндя́ ма́нгэ Рай Дэвэ́л, ракири́:

3. “Ухты́лла (до́си) тумэ́нгэ тэ псирэ́н пашы́л дая́ бэ́рга, рисён кэ паш-рат (северо);

4. и дэ манушэ́нгэ упхэныбэ́н, и пхэн: ‘Тумэ́ явэ́на тэ джа́н пир тумарэ́-пшалэнгирэ пхувья́, Исаво́скирэ чхавэ́нгирэ, савэ́ дживэ́на кэ Сеиро, и ёнэ задарэна (страхадёна) тумэ́ндыр; нэ ракхэ́нпэ, соб (кай) ёнэ,

5. тэ на залыджан тумэ́нца марибэ́н, пал-дова́ со Мэ на дава́ тумэ́нгэ лэ́нгири пхув ни пэ ґэрьякиро шаго (ламны), пал-дова́ со бэ́рга Сеиро Мэ дыём Исавоскэ;

6. кинэн лэ́ндыр хабэ́н пал руп, и хан; и кинэн пани́ лэ́ндыр пал руп, и пьен;

7. пал-дова́ со Рай Дэвэ́л, тыро́ Дэвэ́л бахтякирдя́ тут дрэ кажно тырэ́-вастэнгиро рэ́ндо, ракхця́ тут [дыкхця́ пал ту́тэ-р.с.] дро часо, ке́ли ту псирдян пир бари дая́ чхучи́ пхув; ґа́да, штардэша́ бэрш Рай Дэвэ́л, тыро́ Дэвэ́л исын ту́са; ту́тэ саро́ сыс.’”

8. И гиям амэ маму́й амарэ́ пшалэ́ндэ, Исаво́скирэ чхавэ́ндэ, савэ́ дживдэ́ пэ Сеиро, лошчынакирэ (равнинакирэ) дромэ́са, Елафостыр и Ецыон-Гаверостыр, и рискирдэ́ и гинэ́ пэ чхучи́ пхув Моавоскири.

9. И пхэндя́ ма́нгэ Рай Дэвэ́л: “На заджа́ дро кошыбэ́н Моавоса и на залыджа лэ́са марибэ́н; пал-дова́ со Мэ на дава́ ту́кэ ничи́ лэ́скирэ пхувья́тыр, пал-дова́ со Аро Мэ отдыём Лотоскирэ чхавэ́нгэ”;

10. Англэды́р одо́й дживдэ́ Эмимы, барэ́ мануша́, бут и вучэ́, сыр Енакоскирэ чхавэ́,

11. и ёнэ гиндлэпэ машки́р Рефаимэндэ, сыр Енакоскирэ чхавэ́; э Моавитяни кхарэ́на лэн Эмимы [Эмеи-ю.о.];

12. а пэ Сеиро дживдэ́ англэды́р Хореи; нэ Исаво́скирэ чхавэ́ традынэ криг лэн, и хасякирдэ́ лэн пэ́скирэ мо́стыр, и лынэ́ тэ дживэ́н заме́ст лэ́ндэ, – адя́кэ, сыр кэрдя́ Израилё пэ́скирэ пхувья́са, сави́ дыя́ лэ́нгэ о Рай Дэвэ́л;

13. и адя́кэ, уштэ́н и проджан лошчы́на [сы́гно рэ́кица (лэнори́) -ю.о.] Заредо.” И прогиям амэ лошчы́на Заредо.

14. Долэ́ часостыр, сыр амэ гиям дрэ Кадес-Варни и сыр гиям дурэды́р пир лошчы́на Заредо, прогия́ трия́нда охто́ (бидуе́нгиро дэш) бэрш, и амэ́ндэ пирилыджияпэ станостыр саро́ манушэ́нгиро ро́до, савэ́ псирдэ́ пэ марибэ́н, сыр совлахадя́ лэ́нгэ Рай Дэвэ́л;

15. И Дэвлэ́скиро васт сыс пэ лэ́ндэ, соб (кай) тэ вымулякирэс лэн станостыр, пака ёнэ вымынэ.

16. И сыс адя́кэ: пирилыджинэпэ сарэ́ мануша́, савэ́ псирдэ́ пэ марибэ́н, и савэ́ вымынэ адалэ́ манушэ́ндыр,

17. тэды пхэндя́ ма́нгэ Рай Дэвэ́л дасавэ́ лава́:

18. “Ту акана́ джа́са пашы́л Моавоскири риг, пашы́л фо́ро Аро,

19. и сыр ту явэ́са пашы́л кэ Амонитяни: на заджа́ лэ́нца дро кошыбэ́н, и на залыджа лэ́нца марибэ́н, пал-дова́ со Мэ на дава́ ту́кэ ничы́ Амоноскирэ-чхавэ́нгирэ пхувья́тыр, пал-дова́ со Мэ отдыём ла Лотоскирэ чхавэ́нгэ.”

20. и ёй гиндяпэ Рефаимэнгирэ пхувья́са; вагэдыр (ґарэдыр) дживдэ́ пэ ла́тэ Рефаимы, Амонитяни кхарэ́на лэн Замзумимы;

21. ёнэ сыс мануша́ барэ́, бут и вучэ́, сыр Енакоскирэ чхавэ́, и традыя́ криг лэн Рай Дэвэ́л анги́л лэ́нгиро муй, и вытрадынэ́ ёнэ лэн, и ячнэ́ тэ дживэ́н ёнэ пэ лэ́нгиро штэ́то,

22. сыр Ёв кэрдя́ ваш Исаво́скирэ чхавэ́нгэ, савэ́ дживдэ́ пэ Сеиро, протрадыи анги́л лэ́нгиро муй Хореен, и ёнэ вытрадынэ́ лэн, и ячнэ́ тэ дживэ́н пэ лэ́нгиро штэ́то, и дживэ́на кэ ададывэ́с;

23. Кафторимы, савэ́ выгинэ́ Кафторостыр, мулякирдэ́ и Авеен, савэ́ дживдэ́ дрэ гава́ кэ Газа, и ячнэ́ тэ дживэ́н пэ лэ́нгиро штэ́то.

24. Уштэ́н, джа́н и пириджан сы́гно рэ́кица (лэнори́) Арноно, ґа́да, Мэ пиридава дро тыро́ васт Сигонос, Есевоноскирэ крали́с, Амореянинос, и лэ́скири пхув; ту лэпэ тэ хулаинэс ла́са, и лы́джа лэ́са марибэ́н;

25. далэ́ дывэсэ́стыр Мэ ла́ва тэ розмэкав дар и траш анги́л ту́тэ пэ манушэ́ндэ тэл саро́ болыбэ́н; одолэ́, савэ́ шунэ́на пал ту́тэ, затринскирэнапэ и страхадёна ту́тыр.”

26. И бичхадём мэ манушэ́н чхучэ́ пхувья́тыр Кедемофо кэ Сигоно, Есевоноскиро кра́ли, лачхэ́ лавэ́нца, соб (кай) тэ пхэнэ́н:

27. “Мэк ман тэ джав дурэды́р пир тыри́ пхув; мэ джа́ва дромэ́са, Мэ на джа́ва дрэ риг ни пэ чачо́ (пэ право), ни пэ зэ́рво (пэ ле́во);

28. хабэ́н бикин ма́нгэ пал руп, и мэ ява́ва тэ хав, и пани́ тэ пья́в дэ ма́нгэ пал руп, и мэ ява́ва тэ пья́в, екхэ ґэрэ́нца мирэнца джа́ва дурэды́р,

29. адя́кэ, сыр кэрдэ́ ма́нгэ Исаво́скирэ чхавэ́, савэ́ дживэ́на кэ Сеиро и Моавитяни, савэ́ дживэ́на кэ Аро, пака Мэ пириджава пир Иорда́но пэ пхув, сави́ Рай Дэвэ́л, амаро́ Дэвэ́л, дэ́ла амэ́нгэ.”

30. Нэ о Сигоно, Есевоноскиро кра́ли на закамдя́ тэ мэкэл амэн тэ джас дурэды́р пир лэ́скири пхув, пал-дова́ со Рай Дэвэ́л, тыро́ Дэвэ́л, кэрдя́ на́лачхо лэ́скиро ду́хо (фа́но), и лэ́скиро ило́ кэрдя́пэ пхарэса, соб (кай) тэ пиридэл лэс дро тыро́ васт, сыр дава́ акана́ бицяло́.

31. И пхэндя́ ма́нгэ Рай Дэвэ́л: “Ѓа́да, Мэ ла́ва тэ отдав ту́кэ Сигонос и лэ́скири пхув; яв ла́кирэ хула́са.”

32. И Сигоно сарэ́ пэ́скирэ манушэ́нца выгия́ проти амэ́ндэ пэ марибэ́н кэ Яаца;

33. и отдыя́ лэс Рай Дэвэ́л, Дэвэ́л амаро́, дрэ амарэ́ васта́, и амэ домардям лэс и лэ́скирэ чхавэ́н и сарэ́ лэ́скирэ манушэ́н,

34. и лынэ́ дрэ дова́ часо сарэ́ лэ́скирэ фо́рья, и отдынэ́ прокошыбнаскэ сарэ́ фо́рья, муршэ́н и джувле́н и чхаворэ́н, на ячкирдэ́ никонэ́с джидэн;

35. екх лыям амэ пэ́скэ дро дорэсыбэ́н (добыча) лэ́нгирэ кхэритконэ́ мурдалэ́н (ското) и миштыпэ́н форье́ндыр, савэ́ амэ заухтылдям.

36. Ароиростыр, саво́ исын пэ брэ́го Арноноскиро, сыгнонэ рэкицакиро (лэнорьякиро), и форо́стыр, саво́ исын пэ лошчы́на [сы́гно рэ́кица (лэнори́) -ю.о.], аж кэ/жы́ко Галаа́до на сыс фо́ро, саво́ сыс бы ваш амэ́нгэ на пир зор: саро́ отдыя́ Рай Дэвэ́л, Дэвэ́л амаро́ дрэ амарэ́ васта́.

37. Екх кэ Амонитянэнгири пхув ту на ги́ян, ни кэ штэ́ты пашы́л Явокоскири сы́гно рэ́кица (лэнори́), ни кэ фо́рья пэ бэ́рга, ни кэ саро́, со на припхэндя́ амэ́нгэ Рай Дэвэ́л, Дэвэ́л амаро́.

Psalms 36:1-6

1. Хоро́скирэ Дирижоро́скэ. Давидо́скиро Пса́лмо, Ра́скирэ-Дэвлэ́скиро Писха́ри.

2. Ке́ли фуй ману́ш кэрэ́ла чорипэ́н, лэ́скиро ило́ сы́рбы ракирэ́ла мирэ́ илэскэ: “На трэй мирэ́ якхэнгэ тэ дарэ́н Дэвлэ́стыр.”

3. Пал-дова́ со ёв шарэла пэс хоханэ́ лавэ́нца, ёв сы́рбы родэ́ла пэ́скиро чорипэ́н, хай, дава́ выкхарэла холы́ дрэ лэ́стэ.

4. Лэ́скирэ-москирэ лава́ исын налачхэ́ и хоханэ́; ёв пирияця́ тэ явэ́л годо́ и тэ кэрэ́л лачхипэ́н.

5. Ёв придуминэла чорипэ́н, ке́ли ёв исын пашто́ пэ пэ́скиро чхуибэ́н, ёв исын тэрдо́ пэ на́лачхо дром, ёв на ячэ́ла джунгало́ (брыдинэла) чорипна́стыр.

6. Раё Дэ́вла! Тыри́ лачхэ́-илы́ткима доджа́ла кэ болыбэ́н, и тыро́ патяибэ́н исын аж кэ о́блоки.

Proverbs 12:4-6

4. Куч ромны́ исын сы́рбы коро́на пэ ромэскиро шэро́, нэ кодоя, сави́ ладжакирэла лэс, исын сы́рбы кирныпэн дрэ лэ́скирэ кокалы́.

5. Чачунэ́ мануша́ думинэ́на пал чачипэ́н, нэ фуй мануша́ кхэтанэ́ дэ́на хохано́ годыпэ́н.

6. Фуй мануша́ ракирэ́на лава́: “Подракхаса тэ замарас”, нэ дэвлытконэнгирэ лава́ выракхэна лэн.

Marek 16:1-20

1. А ке́ли прогия́ са́вато (субо́та), Мари́я Магдалина, Мари́я дай Яковоскири и Саломия, киндлэ ароматытка чарья́, соб (кай) тэ джа́н тэ макхэн Исусо́скиро тру́по.

2. Пэ зло́ко, дро пэ́рво куркэскиро дывэ́с, сыр уштыя́ кхам, ёнэ гинэ́ кэ маґила.

3. Пир дром ёнэ ракирдэ́ машки́р пэ́стэ: “Кон да амэ́нгэ отрискирэла криг бар пашы́л загиибэ́н дрэ копли́ца?

4. А ке́ли ёнэ придыкхнэпэ, дыкхэ́на, со бар отрискирдо криг, а бар сыс древа́н баро́.

5. Ёнэ гинэ́ андрэ́ и дыкхнэ́ тэрнэ́ манушэ́с, саво́ сыс уридо́ дро саро́ парныпэн; ёв сыс бэшто́ пир чачи́ риг вударэндыр, и ёнэ страха́дынэ.

6. “На андыршан”, – ракирэ́ла ёв лэ́нгэ. “Тумэ́ родэ́на Исусо́с Назаретостыр, Савэс примардэ пэ трушу́л. Ёв отджидыя́! Лэс ада́й нанэ, дава́ исын штэ́то, кай Лэс чхудэ́.

7. Какана́ джа́н и пхэнэ́н Лэ́скирэ сыкляибнытконэ́нгэ и Пэтрискэ: “Ёв джа́ла анги́л тумэ́ндэ дрэ Галиле́я, одо́й тумэ́ Лэс и дыкхэ́на, сыр Ёв и пхэндя́ тумэ́нгэ.”

8. Ёнэ выгинэ́ и дынэпэ тэ прастан маґилатыр, сыр пыя́ пэ лэ́ндэ бари дар и издраны; ёнэ никонэ́скэ нисо́ на пхэндлэ́, пал-дова́ со ёнэ дара́ндынэ.

9. Отджидыи дро пэ́рво куркэскиро дывэ́с, Ису́со сыкадыя́ анги́л Мариякэ Магдалинакэ, савья́тыр Ёв вытрадыя́ эфта́ налачхэ́ ду́хи (фаны).

10. Ёй гия́ и роспхэндя́ дава́ одолэ́нгэ, кон сыс Лэ́са и савэ́ ровэнас пал Лэ́стэ и пиридживэнас;

11. ке́ли ёнэ шундлэ́ пал дова́, со Ису́со исын джидо́ и, со ёй дыкхця́ Лэс, ёнэ на патяндынэ́.

12. Тэ́ньци Ису́со сыкадыя́ дро яви́р дыкхибэ́н дуенгэ лэ́ндыр пир дром, ке́ли ёнэ гинэ́ пал фо́ро.

13. Кадалэ́ дуй мануша́ рисинэ́ и роспхэндлэ́ явирэ́нгэ, нэ ёнэ и лэ́нгэ на патяндынэ́.

14. Тэ́ньци Ису́со сыкадыя́ дэшуекхэ сыкляибнытконэ́нгэ, савэ́ ханас пал сками́нд. Ёв выракирдя лэ́нгэ, со на ухты́лла (на́доси) лэ́ндэ патяибэ́н и лэ́нгиро ило́ исын пхаро́ дро дова́, со лэ́нгэ сыс на пир ило́ тэ патя́н одолэ́нгэ, савэ́ дыкхнэ́ Лэс коригэды́р (позжэды́р), сыр Ёв отджидыя́.

15. Ису́со пхэндя́ лэ́нгэ: “Джа́н пир саро́ свэ́то (лот) и пхэнэ́н лав Евангелиятыр кажнонэ́ джидэ́ создыибнаскэ.

16. Одолэ́, савэ́ патя́на и явэ́на тэ болэнпэ, явэ́на зракхнэ́. Нэ одолэ́, савэ́ на явэ́на тэ патя́н-явэ́на сэндиндлэ.

17. Патяибнаскирэ явэ́на тэ сыкавэ́н дасавэ́ ди́вы: ёнэ явэ́на Мирэ́ лавэ́са тэ традэ́н налачхэ́ ду́хи, ёнэ явэ́на тэ ракирэ́н пэ нэвэ чиба́ (чибья́);

18. ёнэ явэ́на тэ лэн сапэн вастэ́нца ци тэ пьен трута (отрава) и ни саво́ чорипэ́н на явэ́ла лэ́нгэ, ёнэ явэ́на тэ чхувэ́н васта́ пэ́скирэ пэ насвалэндэ, и кодолэ́ явэ́на тэ састён.”

19. И ке́ли Рай Дэвэ́л Ису́со пхэндя́ лэ́нгэ саро́, тэды Ёв сыс ґаздыно́ пэ болыбэ́н и бэсця́ пэ чачо́ васт Дэвлэ́стэ Дадэ́стэ.

20. И ёнэ выгинэ́ и роспхэндлэ́ лав усенде (везде), Рай Дэвэ́л сыс пашы́л лэ́нгирэ рэ́нды и Ёв допхэнэлас лэ́нгирэ лавэнгиро чачипэ́н знамение́нца (ґертыкэ́нца), савэ́ джа́нас ада́й жэ пал лэ́нгирэ лава́.

Romani Bible Baltic 2019

Maintained by the United Bible Societies for the Baltic Romani Mission