Bible in one year - Пэ Балтитко Романи чиб

Bible in one year March 21

1. И рисиям амэ одотхы́р, и гиям кэ Васа́но, и выгия́ проти амэ́ндэ пэ марибэ́н Ого, о Васаноскиро кра́ли, сарэ́ пэ́скирэ манушэ́нца, пашы́л Едрея.

2. И пхэндя́ ма́нгэ Рай Дэвэ́л: “На дар лэ́стыр, пал-дова́ со Мэ отда́ва лэс дро тыро́ васт, и сарэ́н лэ́скирэ манушэ́н, и сари́ лэ́скири пхув, и ту кэрэ́са лэ́са адя́кэ, сыр ту кэрдя́н Сигоноса [Сихоноса-ю.о.], Аморее́нгирэ крали́са, саво́ дживдя́ кэ Есево́но.”

3. И отдыя́ Рай Дэвэ́л, Дэвэ́л амаро́, дрэ амарэ́ васта́ и Огос, Васаноскирэ крали́с, и сарэ́н лэ́скирэ манушэ́н; и амэ домардям лэс адя́кэ, со нико́н на яця́пэ лэ́стэ джидо́;

4. и лыям амэ дрэ дова́ часо сарэ́ лэ́скирэ фо́рья, на сыс фо́ро, саво́ амэ тэ на лас лэ́ндыр; шовдэша́ фо́рья, сари́ Арговоскири округа, Васаноскирэ-Огоскиро кралипнастыр.

5. Сарэ́ далэ́ фо́рья, сыс кэрдэ́ зоралэ́ тынэ́нца, вучэ́ вантэнца, вударэнца, и заучхакирибнэнца, апри́ч фо́рья, савэ́ на сыс облыджинэ зоралэ́ тынэ́нца, сыс древа́н бут.

6. И отдыям амэ лэн прокошыбнаскэ, сыр кэрдя́м Сигоноса, Есевоноскирэ крали́са, отдыям прокошыбнаскэ кажно фо́ро муршэнца, джувле́нца и чхаворэнца;

7. нэ сарэ́ кхэритконэ́ мурдалэ́н (ското) и саро́ закэдыно дрэ фо́рья лыям амэ пэ́скэ дро дорэсыбэ́н (добыча).

8. И лыям амэ дрэ дова́ часо дуе Аморее́нгирэ-кральенгирэ вастэ́стыр дая́ пхув, сави́ сыс пир дая́ Иорданоскири риг, Арноноскирэ сыгнонэ рэка́тыр (лэня́тыр) кэ бэ́рга Ермоно, –

9. Сидоняни Ермоно кхарэ́на Сирионо, а Амореи кхарэ́на лэс Сениро, –

10. сарэ́ фо́рья пэ лошчы́на, саро́ Галаа́до и саро́ Васа́но кэ Салха и Едрея, Васаноскирэ-Огоскирэ кралипнаскирэ фо́рья;

11. екх Ого, о Васаноскиро кра́ли, яця́пэ Рефаимэндыр. Ѓа́да, лэ́скиро чхуибэ́н (одро), чхуибэ́н саструно, и акана́ исын дрэ Рава, Амоноскирэ чхавэ́ндэ: длэнгипэ́н лэ́скиро исын еня́ (биекхэ́скиро дэш) куня́ (логци), а лэ́скиро буґлыпэ́н исын штар куня́, муршэнгирэ куня́.

12. Пхув дая́ амэ лыям дрэ дова́ часо, лыям Ароеростыр, саво́ исын пашы́л Арноноскири сы́гно рэ́кица (лэнори́); и пашы́л бэ́рга Галаадоскири ла́кирэ форьенца отдыём мэ Рувимо́скирэ и Гадо́скирэ родыцо́скэ;

13. а со яця́пэ Галаадостыр и саро́ Васа́но, Огоскиро кралипэ́н, отдыём мэ паш пхув Манасия́скирэ родыцо́скэ, сари́ округа Арговоскири сарэ́ Васаноса.

14. Иаиро (Яиро), о Манасия́скиро чхаво́, лыя́ сари́ Аргэнгири округа кэ Гесуроскирэ и Маахакирэ ме́жы, и ёв кхардя́ ла Васа́но, пир пэ́скиро лав, Яироскирэ ґавэнца, со кэ далэ́ дывэса́;

15. И мэ дыём Галаа́до Махироскэ.

16. И Рувимо́скирэ и Гадо́скирэ родыцо́скэ дыём мэ пхув Галаадостыр кэ Арноноскири сы́гно рэ́кица (лэнори́), пхув машкира́л сы́гно рэ́кица (лэнори́) и ме́жа, кэ сы́гно рэ́кица (лэнори́) Иавокоскири, Амоноскирэ-чхавэ́нгирэ ме́жа,

17. адя́кэ-паць лошчы́на и Иорда́но, саво́ и исын ме́жа Кинерефостыр кэ лошчы́на морёскири, Лондэ-морёскири, пашы́л Фасгакирэ-бэрга́киро склоно кэ васто́ко.

18. И дыём мэ тумэ́нгэ дро дова́ часо упхэныбэ́н, ракири́: “Рай Дэвэ́л, Дэвэ́л тумаро́, дыя́ тумэ́нгэ дая́ пхув; сарэ́, кон могинэ́ла тэ джал пэ марибэ́н, лэн марибны́тко (оружыё), джа́н анги́л тумарэ́ пшалэ́ндэ, Израилёскирэ чхавэ́ндэ;

19. екх тумарэ́ ромня́ и тумарэ́ чхавэ́ и тумарэ́ кхэри́тка мурдала́ (ското) тумарэ́, мэк тэ ячэ́нпэ дрэ тумарэ́ фо́рья, савэ́ мэ дыём тумэ́нгэ,

20. пака Рай Дэвэ́л дэ́ла рама́нё (миро) тумарэ́ пшалэ́нгэ, сыр тумэ́нгэ, и пака и ёнэ дорэсэ́на дро хулаибэн пхув, сави́ Рай Дэвэ́л, Дэвэ́л тумаро́, дэ́ла лэ́нгэ пал Иорда́но; тэды рисён кажно дро пэ́скиро хулаибэн, саво́ мэ дыём тумэ́нгэ.”

21. И Исусо́скэ (Ёхошуаскэ) ракирдём мэ дро долэ́ дывэса́: “Тырэ́ якха́ дыкхнэ́ саро́, со кэрдя́ Рай Дэвэ́л, Дэвэ́л тумаро́, дуе далэ́ кральенца; дова́-паць кэрэ́ла Рай Дэвэ́л сарэ́ кралипнэнца, савэ́ ту явэ́са тэ проджас;

22. на дарэ́н лэ́ндыр, пал-дова́ со Рай Дэвэ́л, Дэвэ́л тумаро́, Кокоро́ марэлапэ пал тумэ́ндэ.”

23. И мангдёмпэ мэ Ра́скэ-Дэвлэ́скэ дрэ долэ́ дывэса́ дасавэ́ лавэ́нца:

24. “Баро́ Раё, Раё Дэ́вла, Ту лыян тэ сыкавэс Тырэ́ писхари́скэ сла́ва Тыри́ и зорало́ васт Тыро́; пал-дова́ со, саво́ дэвэл исын пэ болыбэ́н, ци пэ пхув, саво́ могиндя́ бы тэ кэрэ́л дасавэ́ рэ́нды, сыр Тырэ́, и зорья́са дасавьяса, сыр Тыри́ исын?

25. Дэ ма́нгэ тэ пириджав и тэ дыкха́в доя́ лачхи́ пхув, сави́ исын пал Иорда́но, и доя́ шука́р бэ́рга и Лива́но.”

26. Нэ Рай Дэвэ́л холясолас пэ ма́ндэ пал тумэ́ндэ, и на кандыя́ ман, и пхэндя́ ма́нгэ Рай Дэвэ́л: “Ухты́лла (до́си) ту́кэ, анги́л на ра́кир Ма́нгэ буты́р пал дава́;

27. а джа́ упрэ́ пэ Фасгакиро вучипэ́н, и подыкх тырэ́ якхэ́нца кэ мо́рё (дэрья́в), и кэ паш-рат (северо), и кэ паш-дывэ́с (юго), и кэ васто́ко, и подыкх тырэ́ якхэ́нца, пал-дова́ со ту на проджаса пир дава́ Иорда́но;

28. нэ дэ упхэныбэ́н Исусо́скэ (Ёхошуаскэ), и дэ зор лэ́скэ и зоралякир лэс дро ду́хо (фа́но); пал-дова́ со ёв явэ́ла анги́л адалэ́ манушэ́ндэ, и ёв роздэла лэ́нгэ пир миштыпна́скири ме́ра пхув, пэ сави́ ту подыкхэса.”

29. И тэрдиям амэ пэ до́ло, проти Беф-Фегоро.

Deuteronomy 4:1-49

1. И акана́, Израилё, шун упхэныбэна́ и зако́ны, савэ́ мэ сыклякирава тумэн тэ кэрэ́н, соб (кай) тумэ́ тэ явэ́н джидэ́, и тэ джа́н и тэ дорэсэн доя́ пхув, сави́ Рай Дэвэ́л, тумарэ́ дадэ́нгиро Дэвэ́л, дэ́ла тумэ́нгэ;

2. тэ на причхувэ́н кэ дова́, со мэ ракирдём тумэ́нгэ, и тэ на отлэн долэ́стыр; ракхэ́н Ра́скирэ-Дэвлэ́скирэ, тумарэ́ Дэвлэ́скирэ припхэныбэна́, савэ́ мэ да́ва тумэ́нгэ.

3. Якха́ тумарэ́ дыкхнэ́ саро́, со кэрдя́ Рай Дэвэ́л Ваал-Фегороса: кажнонэ́ манушэ́с, саво́ кэрдя́ сыр Ваал-Фегоро, традыя́ криг Рай Дэвэ́л, Дэвэ́л тыро́, тырэ́ манушэ́ндыр;

4. а тумэ́, савэ́ рикирдэпэ зоралэ́с кэ Рай Дэвэ́л, Дэвэ́л тумаро́, сан джидэ́ сарэ́ акана́.

5. Дыкхэ́н, мэ сыклякирдём тумэн упхэныбнэнгэ и законэнгэ, сыр ракирдя́ ма́нгэ Рай Дэвэ́л, Дэвэ́л миро, соб (кай) тумэ́ адя́кэ тэ кэрэ́н пэ доя́ пхув, дрэ сави́ тумэ́ заджа́на, соб (кай) тэ хулаинэн ла́са;

6. и, соб (кай) тумэ́ тэ ракхэ́н и тэ кэрэ́н пир лэ́ндэ: пал-дова́ со дрэ дава́ исын годыпэ́н тумаро́ и годы́ тумари́ анги́л якха́ манушэ́нгирэ, савэ́ шунэ́на пал сарэ́ далэ́ упхэныбэна́, и пхэнэ́на: ‘Екх адалэ́ барэ́ мануша́ исын мануша́ годэ́ и барэ́-годякирэ.’

7. Пал-дова́ со, ци исын савэ́ барэ́ мануша́, кэ савэ́ дэвэла́ лэ́скирэ тэ явэ́н бы адя́кэ пашы́л, сыр пашы́л кэ амэ Рай Дэвэ́л, амаро́ Дэвэ́л, ке́ли амэ кхараса Лэс?

8. И ци исын, савэ́ барэ́ мануша́, савэ́ндэ тэ явэ́н бы дасавэ́ чачунэ́ упхэныбэна́ и зако́ны, сыр саро́ дава́ Зако́но исын, пал саво́ мэ чхурдава лав ададывэ́с?

9. Фэ́ни (то́ка), ракхпэ, и гарав ракхунэс тыро́ ди, соб (кай) ту́кэ тэ на бистрэс долэ́ рэ́нды, савэ́ дыкхнэ́ тырэ́ якха́, соб (кай) ёнэ тэ на выджа́н тырэ́ илэ́стыр дрэ сарэ́ тырэ́ джиибна́скирэ дывэса́; и роспхэн пал лэ́ндэ тырэ́ чхавэ́нгэ и тырэ́-чхавэ́нгирэ чхавэ́нгэ,

10. пал дова́ дывэ́с, ке́ли ту са́нас тэрдо́ анги́л Растэ-Дэвлэ́стэ, тырэстэ Дэвлэ́стэ, пашы́л Хориво, и ке́ли пхэндя́ Рай Дэвэ́л ма́нгэ: ‘Скэ́дэ кэ Мэ манушэ́н, и Мэ пхэна́ва лэ́нгэ Мирэ́ лава́, савэ́ндыр ёнэ высыклёна тэ дарэ́н Ма́ндыр дрэ сарэ́ пэ́скирэ джиибна́скирэ дывэса́ пэ пхув и высыклякирэна пэ́скирэ чхавэ́н.’

11. Тумэ́ подгинэ́ и тэрдинэ́ тэл бэ́рга, а бэ́рга хачия яга́са кэ болыбэ́н, и сыс цямло (тёмно), о́блоко и калыпэ́н.

12. И ракирдя́ Рай Дэвэ́л кэ тумэ́ машкира́л яг; Лэ́скирэ-лавэнгири зан (глос) тумэ́ шундлэ́, нэ муй на дыкхнэ́, а екх зан;

13. и дыя́ тэ джинэ́л Ёв тумэ́нгэ завето Пэ́скиро, саво́ пхэндя́ тумэ́нгэ тэ кэрэ́с саро́, пир дэш лава́ (дэштунэ) и чхиндя́ лэс пэ дуй барунэ́ скрижа́ли (таблицы);

14. и пхэндя́ ма́нгэ Рай Дэвэ́л дрэ долэ́ дывэса́ тэ сыклякирав тумэн упхэныбнэнгэ и законэнгэ, соб (кай) тумэ́ тэ кэрэ́н пир лэ́ндэ пэ доя́ пхув, дрэ сави́ тумэ́ заджа́на, соб (кай) тэ хулаинэн ла́са.

15. Ракхэ́н и рикирэ́н зоралэ́с тумарэ́ дия́, со тумэ́ на дыкхнэ́ ни саво́ москиро о́бразо (стаць) дро дова́ дывэ́с, ке́ли ракирдя́ кэ тумэ́ Рай Дэвэ́л пэ Хориво ягатыр,

16. соб (кай) тумэ́ тэ на пэрэ́н дро блэ́ндо и тэ на вычхинэн пэ́скэ муя́, ци форма вари-сави́ москири, муршэ́с ци джувля́,

17. ци копия вари-савэ́ кхэритконэ́-мурдалэскири, саво́ исын пэ пхув, ци вари-савья́ чирикля́ пхакэнца (крылэнца), сави́ вурняла тэл болыбэ́н,

18. ци копия вари-савэ́с гадос, саво́ ползынэла пир пхув, копия вари-савэ́ мачхэскири, саво́ исын дро пани́ тэлэды́р пхувья́тыр;

19. и соб (кай) ту, дыкхи́ пэ болыбэ́н, и ке́ли дыкхця́н кхам, чхон и чэргэня́ и саро́, со исын пэ болыбэ́н, соб (кай) дава́ тэ на злыджал тут, и тэ на мангэспэ лэ́нгэ, и тэ на дынаринэс лэ́нгэ, адя́кэ сыр Рай Дэвэ́л, Дэвэ́л тыро́, дыя́ лэн сарэ́ манушэ́нгэ тэл саро́ болыбэ́н сыр мэкно́ миштыпэ́н (наследство).

20. А тумэн лыя́ Рай Дэвэ́л и вылыджия́ тумэн саструнэ́ бовэстыр, Египто́стыр, соб (кай) тумэ́ тэ явэ́н Лэ́скирэ мануша́ Лэ́скирэ мэкнэ́ миштыпна́стыр, сыр дава́ акана́ бицяло́.

21. И Рай Дэвэ́л холя́сыя пэ ма́ндэ пал тумэ́ндэ, и совлахадя́, со мэ на пириджава пал Иорда́но и на заджава пэ доя́ лачхи́ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра;

22. мэ мэра́ва пэ дая́ пхув, на пиригии пал Иорда́но, а тумэ́ пириджана, и явэ́на тумэ́ хулая́ пэ доя́ лачхи́ пхув.

23. Ракхэ́нпэ, соб (кай) тэ на бистрэн тумэ́нгэ дыно́ завето (лав) Ра́скирэ-Дэвлэ́скиро, саво́ Ёв чхудя́ тумэ́нца, и соб (кай) тэ на кэрэ́н пэ́скэ вари-саво́ муй дрэ вари-сави́ форма, сыр припхэндя́ ту́кэ Рай Дэвэ́л, Дэвэ́л тыро́;

24. пал-дова́ со Рай Дэвэ́л, Дэвэ́л тыро́, исын яг, сави́ ха́ла, исын Дэвэ́л зэвлыныпнаскиро.

25. Ко́ли бияндёна ту́тэ чхавэ́ и тырэ́ чхавэ́ндэ чхавэ́, и ґара́ (длу́гэс) дживи пэ пхув, а тумэ́ джа́на дро блэ́ндо, и кэрэ́на копии, савэ́ сыкавэ́на и́долы, и кэрэ́на дая́ холы́ анги́л Ра́скирэ-Дэвлэ́скирэ, тумарэ́ Дэвлэ́скирэ якха́, и росхолякирэна Лэс,

26. то тэды мэ допхэнава тумэ́нгэ ададывэ́с болыбнаса и пхувья́са, со тумэ́ сыг хасякирэна пхув, ваш пэ́скэ, пир сави́ тумэ́ пириджана пал Иорда́но; тумэ́ на явэ́на бут дывэса́ пэ ла́тэ, нэ хасёна;

27. и росчхурдэла тумэн Рай Дэвэ́л пир сарэ́ манушэ́ндэ тэ дживэ́н, и ячэ́напэ пэ на́бут машкира́л манушэ́ндэ, кэ савэ́ залыджала тумэн Рай Дэвэ́л.

28. И тумэ́ явэ́на одо́й тэ дынаринэ́н дэвлорэ́нгэ, савэ́ кэрдэ́ манушэ́нгирэ васта́ каштэ́стыр и барэстыр, савэ́ на дыкхэ́на и на шунэ́на, и на ха́на, и на сунгавэна.

29. Нэ ке́ли ту явэ́са тэ родэс одо́й Рас-Дэвлэ́с, тырэ́ Дэвлэ́с, тэды латхэса Лэс, ко́ли явэ́са тэ родэс Лэс сарэ́ тырэ́ илэ́са и сарэ́ тырэ́ деса.

30. Ке́ли ту явэ́са дрэ би́да, и ке́ли саро́ дава́ латхэ́ла тут дрэ сарэ́ дывэса́, со ишчо (инкэ́) явэ́на, тэды ту рисёса илэ́са кэ Рай Дэвэ́л, Дэвэ́л тыро́, и шунэса Лэ́скири зан (глос).

31. Пал-дова́ со Рай Дэвэ́л, тыро́ Дэвэ́л, исын Рай Дэвэ́л тангипнаскиро; Ёв на ячкирэ́ла тут и на хасякирэ́ла тут, и на забистрэла завето тырэ́ дадэ́нца, саво́ Ёв совлахаса дыя́ лэ́нгэ.

32. Пал-дова́ со пхуч англатунэндыр, савэ́ сыс англэды́р ту́тыр, долэ́ дывэсэ́стыр, дрэ саво́ Дэвэ́л создыя́ манушэ́с пэ пхув, и екхэ болыбна́скирэ ягоро́стыр (концостыр) кэ яви́р яго́ро болыбна́скиро: ци сыс вари-со дасаво, сыр дава́ баро́ рэ́ндо, ци шундло, ци со подджалас пэ дава́ (далэскэ)?

33. Ци шундлэ́ вари-савэ́ мануша́ Дэвлэ́скири зан, сави́ ракирдя́ ягатыр, и ячнэ́пэ джидэ́, сыр шундя́н ту?

34. Ци скэдэласпэ вари-саво́ Дэвэ́л тэ джал, тэ лэл пэ́скэ манушэ́н машки́р явирэ манушэ́ндэ тхагарьенца, знамение́нца (ґертыкэ́нца) и дивэнца, и марибна́са, и зоралэ́ вастэ́са, и вучэ́ вастэ́са, и барэ́ страхаса, сыр кэрдя́ ваш тумэ́нгэ Рай Дэвэ́л, тумаро́ Дэвэ́л, дро Еги́пто анги́л тырэ́ якха́?

35. Ту́кэ сыс дыно́ тэ дыкхэ́с дава́, соб (кай) ту тэ джинэ́с, со екх Рай Дэвэ́л исын Дэвэ́л, и нанэ буты́р апри́ч (кроме) Лэ́стэ;

36. болыбна́стыр Ёв дыя́ ту́кэ тэ шунэ́с Пэ́скири зан, соб (кай) тэ сыклякирэс тут, и пэ пхув сыкадя́ ту́кэ Пэ́скири бари яг, и ту шундя́н Лэ́скирэ лава́ машки́р яг;

37. и адя́кэ сыр Лэ́скэ ячнэ́ дро́га тырэ́ дада́, и Ёв выкэдыя́ тумэн, лэ́нгиро ро́до пало́ (после) лэ́ндэ, тэды и вылыджия́ Ёв тут Кокоро́ барэ́ Пэ́скирэ зорья́са Египто́стыр,

38. соб (кай) тэ традэс криг тырэ́ мо́стыр манушэ́н, савэ́ сыс барэды́р и зоралэды́р ту́тыр, и тэ залыджас тут, и тэ дэс лэ́нгири пхув дрэ миштыпна́скири ме́ра, сыр дава́ акана́ бицяло́.

39. И ту акана́ джин и чхув пэ тыро́ ило́, со Рай Дэвэ́л исын Дэвэ́л упра́л пэ болыбэ́н и пэ пхув тэла́л, и нанэ буты́р апри́ч Лэ́стэ;

40. и ракх Лэ́скирэ упхэныбэна́ и Лэ́скирэ припхэныбэна́, савэ́ мэ ракира́ва акана́ ту́кэ, соб (кай) шука́р тэ явэ́л ту́кэ и тырэ́ чхавэ́нгэ пало́ (после) ту́тэ, и, соб (кай) ту бут часо (цы́ро) тэ явэс пэ доя́ пхув, сави́ Рай Дэвэ́л, тыро́ Дэвэ́л, дэ́ла ту́кэ пэ саро́ джиибэ́н.”

41. Тэды Мо́йза отчхудя трин фо́рья пир дая́ Иорданоскири риг пэ васто́ко кхамэстыр,

42. соб (кай) тэ нашэ́л одори́к замарибнари (умарибнари), саво́ мулякирэ́ла пэ́скирэ пашатунэс, наками, саво́ на сыс вэ́рго (врого) лэ́скэ ни тася́, ни пэ три́то дывэ́с, и соб (кай) тэ нашэ́л дрэ екх далэ́ форье́ндыр, тэ ячэ́лпэ джидо́:

43. Бецэро пэ чхучи́ пхув, пэ лошчы́на (равнина) дро Рувимоскиро ро́дыцо, и Рамо́фо дро Галаа́до дро Гадоскиро ро́дыцо, и Голано дро Васа́но дрэ Манасия́скиро ро́дыцо.

44. Ѓа́да, исын Зако́но, саво́ чхудя́ анги́л (пропониндя) Мо́йза Израилёскирэ чхавэ́нгэ.

45. Ѓа́да, исын припхэныбэна́, упхэныбэна́ и зако́ны, савэ́ дыя́ Мо́йза Израилёскирэ чхавэ́нгэ, сыр ёнэ выгинэ́ Египто́стыр,

46. пал Иорда́но пэ лошчы́на проти Беф-Фегоро [Бэт Пеор-ю.о.], пэ Сигоноскири пхув, Аморее́нгирэ-крали́скири, саво́ дживдя́ кэ Есево́но, савэ́с замардя́ (умардя) Мо́йза Израилёскирэ чхавэ́нца, пир лэ́нгиро выгиибэн Египто́стыр.

47. И залынэ ёнэ лэ́скири пхув и Васаноскирэ-крали́скирэ, Огоскири пхув, дуе Аморее́нгирэ кральенгирэ, савэ́ пал Иорда́но кэ васто́ко кхамэскиро,

48. лыи Ароеростыр, саво́ исын пашто́ пэ брэ́го Арноноскиро, сыгнонэ рэкицатыр (лэнорьятыр), кэ бэ́рга Сио́но, ёй исын Ермоно,

49. и лынэ́ сари́ лошчы́на пир дая́ Иорданоскири риг кэ васто́ко, кэ мо́рё (дэрья́в), исын лошчыны пашы́л Фасгакиро склоно.”

Psalms 36:7-12

7. Тыро́ чачипэ́н-дава́ исын сыр Дэвлэ́скирэ бэ́рги. Ту сэндякирэса чачунэ́с манушэ́н, сыр хор исын мо́рё (дэрья́в). Ту зракхэ́са манушэ́н и мурдалэ́н.

8. Сыр дро́го исын Тыри́ лачхэ́-илы́ткима, о Раё Дэ́вла! И манушы́тка чхавэ́ гарадёна дрэ зэр (тень) Тырэ́ пхакэндыр.

9. Ту чалякирэса лэн барвалэ́ скаминдэстыр дро Тыро́ кхэр, Ту дэ́са тэ пьен лэ́нгэ рэка́тыр (лэня́тыр) Пэ́скирэ кучонэ́ миштыпна́стыр.

10. Пал-дова́ со Ту сан Екх, Кон дэ́ла джиибэ́н сарэскэ, Тыро́ дуд дэ́ла дуд амарэ́ джиибнаскэ.

11. Мэк тэ явэ́л бутэды́р Тыри́ латхэ-илы́ткима пэ одолэ́ндэ, савэ́ джинэ́на Тут, мэк тэ явэ́л буты́р Тыро́ чачипэ́н одолэнца, конэ́стэ исын чачипнаскирэ илэ.

12. На домэк, соб (кай) пхутькирдэ́ мануша́ тэ чхувэ́н пэ́скири ґэро́й пэ ма́ндэ, соб (кай) фуй мануша́ тэ традэ́н ман пэ́скирэ вастэ́нца.

Proverbs 12:7-7

7. Фуе манушэ́н равэна тэлэ́ и ёнэ нанэ буты́р, нэ кхэр чачунэ́-манушэ́нгиро явэ́ла тэ тэрдёл.

Lukaš 1:1-20

1. Пал-дова́ со, сыр бут мануша́ ужэ лынэпэ тэ чхинэн роспхэныбэн пал дова́, со сыс машки́р амэ́ндэ и, со исын древа́н джиндло́ тумэ́нгэ,

2. ёнэ уджиндлэ́ манушэ́ндыр, савэ́ пэ́рва дыкхнэ́ дова́ пэ́скирэ якхэ́нца и служындлэ (дынариндлэ́) ваш Дэвлэ́скиро лав, адя́кэ ёнэ пирипхэндлэ амэ́нгэ.

3. Палдава́ здыяпэ и ма́нгэ, со явэ́ла мишто́ тэ чхинав ту́кэ, баро́ Теофиле, пало́ дова́, сыр мэ лачхэ́с розґалыём дава́ саро́ англыпна́стыр,

4. соб (кай) ту тэ джинэ́с чачипэ́н пал дова́, дро со тут сыклякирдэ́.

5. Дро долэ́ дывэса́, ке́ли Иродо сыс кра́ли пир Юдэ́я, дживдя́ екх раша́й пир лав Заха́рия Авияскирэ раша́нгирэ родо́стыр, пэ́скирэ ромня́са, Ароноскирэ родо́стыр пир лав Елизавета.

6. Ёнэ ж сыс дуйджинэ́ чачунэ́ анги́л Дэвлэ́стэ, рикирдэпэ кэ Дэвлэ́скирэ припхэныбэна́ и Зако́но.

7. Лэ́ндэ на сыс чхаворэ́, пал-дова́ со Елизавета на могиндя́ тэ биянэ́л, ёнэ дуйджинэ́ сыс пхурэ́ пир бэрша́.

8. И сыс адя́кэ: е́кхвар, ке́ли Заха́рия кэрдя́ пэ́скири буты́ сыр раша́й анги́л Дэвлэ́стэ, сыр сыс прилыно пэ́скирэ родо́стыр,

9. пал раша́нгиро доракирибэ́н пир жре́биё лэ́скэ трэиндя́ тэ заджа́л дрэ Кхангири́ и тэ тхувлякирэл гудлэ́ смолэнца ладаностыр,

10. и сарэ́ мануша́ мангнэпэ Дэвлэ́скэ яври́ дро дава́ часо, ке́ли сыс тхувлякирибэн гудлэ́ смоласа.

11. И сыкадыя́ Захарияскэ Дэвлэ́скиро Янго́ло, саво́ сыс тэрдо́ пир чачи́ (право) риг тхувитконэ (кадилытконэ) алтарёстыр.

12. Заха́рия страхадыя, ке́ли дыкхця́ лэс, и дар пыя́ пэ лэ́стэ.

13. Нэ Янго́ло пхэндя́ Лэ́скэ: “На андырша, Заха́рия, пал-дова́ со Дэвэ́л шундя́ тыро́ мангипэ́н, и тыри́ ромны́ биянэ́ла чхавэ́с, и ту дэ́са лав Лэ́скэ Иа́но.

14. И явэ́ла ту́кэ бари ра́дыма и весёлыма (лош), и бут мануша́ явэ́на тэ радынэ́нпэ лэ́скирэ бияныпнастыр.

15. Пал-дова́ со ёв явэ́ла баро́ анги́л Растэ-Дэвлэ́стэ, и ёв на явэ́ла тэ пьел мол (вино) и зоралэ́ пибэна, и Свэ́нто Ду́хо (Фа́но) явэ́ла дрэ лэ́стэ ада́й жэ, сыр ёв бияндёла,

16. и ёв рискирэ́ла палэ кэ Лэ́нгиро Рай Дэвэ́л бутэн Израилёскирэ чхавэ́н.

17. И ёв явэ́ла анги́л Растэ-Дэвлэ́стэ, зорья́са и духо́са сыр Или́я, и ёв кэрэ́ла рама́не (миро) машки́р дадэндэ и чхавэ́ндэ, рискирэ́ла пэ чачуно́ дром кодолэ́н, савэ́ на кандэ́на Дэвлэ́с, соб (кай) тэ скэдэл манушэ́н ваш Ра́скэ-Дэвлэ́скэ.”

18. И Заха́рия пхэндя́ Янголоскэ: “Сыр ма́нгэ тэ джина́в, со адя́кэ явэ́ла? Мэ сом пхуро́, и мири́ ромны́ исын ужэ дрэ бэрша́.”

19. И Янго́ло отпхэндя́ Лэ́скэ: “Мэ сом Гавриило, мэ сом тэрдо́ пашы́л Дэвлэ́стэ. Ёв бичхадя́ ман тэ пхэна́в ту́кэ и тэ янав ту́кэ дава́ бахтало́ лав,

20. и, ґа́да, ту явэ́са штыл и ту на дэ́са ра́да (на змогинэса) тэ ракирэ́с анги́л дова́ дывэ́с, ке́ли саро́ дава́ кэрэ́лапэ, пал-дова́ со ту на патяндыян Мирэ́ лавэнгэ, савэ́ кэрэ́напэ кэ ко́нцо / яго́ро дро пэ́скиро часо.

Romani Bible Baltic 2019

Maintained by the United Bible Societies for the Baltic Romani Mission