Bible in one year - Пэ Балтитко Романи чиб

Bible in one year March 23

1. Ке́ли залыджала тут Рай Дэвэ́л, Дэвэ́л тыро́, пэ пхув, пэ сави́ ту джа́са, соб (кай) тэ хулаинэс ла́са, и ёв традэ́ла криг тырэ́ мо́стыр бутэды́р-манушэ́нгири на́цыи, Хетеен, Гергесеен, Амореен, Хананеен, Ферезеен, Евеен и Евусеен, эфта́ манушы́тка на́цыи, савэ́ исын буты́р и зоралэды́р ту́тыр,

2. и отдэ́ла лэн ту́кэ Рай Дэвэ́л, Дэвэ́л тыро́, и ту домарэса лэн, то тэды отдэ́ лэн прокошыбнаскэ, и на джа́ лэ́нца дро кхэтанякирибэн и на тангинэ лэн;

3. и ту на сэмэнцынпэ (на джа́ лэ́нца дрэ сэмэ́нца): на отдэ́ чха тырья пал лэ́скирэ чхавэ́стэ и на лэ лэнгирья чха пал тырэ́ чхавэ́стэ;

4. пал-дова́ со ёнэ отрискирэна тырэ́ чхавэ́н Ма́ндыр, соб (кай) тэ дынаринэ́н явирэ дэвлорэ́нгэ, и тэды захачола пэ тумэ́ндэ Ра́скирэ-Дэвлэ́скири холы́, и Ёв сыг хасякирэ́ла тут.

5. Нэ адя́кэ кэрэ́н лэ́нца: алта́ри (жэртвеники) лэ́нгирэ роспхагирэн, сты́лбы лэ́нгирэ пхагирэн, и вэшорэ лэ́нгирэ вычингирэн и лэ́нгирэ каштунэ дэвлорэ́ хачкирэ́н яга́са;

6. пал-дова́ со Растэ-Дэвлэ́стэ, тумарэ́ Дэвлэ́стэ, тумэ́ сан свэ́нта мануша́: тумэн выкэдыя́ Рай Дэвэ́л, Дэвэ́л тумаро́, соб (кай) тумэ́ тэ явэ́н екхэ Лэ́скирэ мануша́ (манушэ́нца) сарэ́ манушэ́ндыр, савэ́ исын пэ пхув.

7. На пал-дова́, со тумэ́ са́нас буты́р сарэ́ манушэ́ндыр, рисия́ кэ тумэ́ Рай Дэвэ́л и выкэдыя́ тумэн, – пал-дова́ со тумэ́ сан тыкнэды́р сарэ́ манушэ́нгирэ нацые́ндыр,

8. нэ палдава́, со тумэ́ сан дро́га Ра́скэ-Дэвлэ́скэ, и ваш дова́, соб (кай) Ёв тэ зракхэ́л совла́х, савья́са Ёв совлахадя́ тумарэ́ дадэ́нгэ, палдава́ вылыджия́ тумэн Рай Дэвэ́л зоралэ́ вастэ́са, и выракхця тут писхарибнаскирэ кхэрэ́стыр, фараоно́скирэ вастэ́стыр, Египто́скирэ крали́стыр.

9. И адя́кэ джин, со Рай Дэвэ́л, Дэвэ́л тыро́, исын Рай Дэвэ́л чачуно́, Саво́ ракхэ́ла Пэ́скиро завето (доракирибэ́н) и тангипэ́н кэ одолэ́ мануша́, савэ́нгэ исын дро́го Ёв, кон ракхэ́ла Лэ́скирэ припхэныбэна́ кэ тысёнцы ро́ды,

10. и Ёв отдэ́ла (рискирэ́ла) палэ пэ лэ́нгиро шэро́ одолэ́нгэ, кон Лэс древа́н бидыкхэла, дро лэ́нгиро муй, хасякири лэн; Ёв на явэ́ла тэ отчхувэл фуипэ́н пэ лэ́скиро шэро́, кон Лэс древа́н бидыкхэла, кокорэскэ одолэ́ манушэ́скэ Ёв отдэ́ла палэ.

11. И палдава́ ракх припхэныбэна́, и упхэныбэна́, и зако́ны, савэ́ ададывэ́с мэ припхэнава тумэ́нгэ тэ кэрэ́н саро́ пир лэ́ндэ.

12. И ко́ли тумэ́ явэ́на тэ шунэ́н далэ́ зако́ны, и тэ ракхэ́н лэн, и тэ кэрэ́н саро́ пир лэ́ндэ, тэды Рай Дэвэ́л, Дэвэ́л тыро́, явэ́ла тэ ракхэ́л завето и тангипэ́н (жалима) кэ ту, сыр Ёв совлахадя́ тырэ́ дадэ́нгэ,

13. и явэ́са ту дро́го Лэ́скэ, и Ёв бахтякирэ́ла тут, и Ёв кэрэ́ла адя́кэ, со явэ́ла бут тумэн, и бахтякирэ́ла трэ-масэ́нгиро барьякирдо́, и тырэ́-пхувья́киро барьякирдо́, и маро́ тыро́, и мол (вино) тыри́, и алеё (дзэт) тыро́ и дова́, кон явэ́ла бияндло барэ́ тырэ́ кхэритконэ́ мурдалэ́ндыр (ското́стыр) и тырэ́ стадакирэ бакрэ́ндыр пэ доя́ пхув, сави́ Ёв совлахадя́ тырэ́ дадэ́нгэ тэ дэл ту́кэ;

14. бахтякирдо́ ту явэ́са буты́р сарэ́ манушэ́ндыр; на явэ́ла ни набияныпнытконэс-(наплодороднонэс) ни ту́тэ, ни дрэ кхэритконэ́ мурдалэ́ндэ;

15. и отлыджала ту́тыр Рай Дэвэ́л кажно насвалыпэн, и нисаво́ зорало́ Египто́скиро насвалыпэн, саво́ ту джинэ́са, на лыджа́ла пэ ту́тэ, нэ Ёв янэ́ла лэн пэ сарэ́ндэ, кон древа́н бидыкхэла тут;

16. и ту хасякирэса сарэ́ манушы́тка на́цыи, савэ́ Рай Дэвэ́л, Дэвэ́л тыро́, дэ́ла ту́кэ: мэк тэ на тангинэ́л лэн тыри́ якх; и тэ на мангэспэ лэ́нгирэ дэвлорэ́нгэ; пал-дова́ со дава́ исын фэлы́ ваш ту́кэ.

17. Ко́ли ту пхэнэ́са дрэ тыро́ ило́: ‘Адалэ́ мануша́ исын буты́р ма́ндыр; сыр мэ да́ва ра́да (могина́ва) тэ вытрадав лэн?’

18. На дар лэ́ндыр, пририпир дова́, со кэрдя́ Рай Дэвэ́л, Дэвэ́л тыро́, фараоноса и сарэ́ Египтоса,

19. дова́ сыс баро́ спробиныбэн, саво́ дыкхнэ́ тырэ́ якха́, знаме́нии (ґертыка́), ди́вы, и васт зорало́ и псико́ вучо́, савэ́нца вылыджия́ тут Рай Дэвэ́л, Дэвэ́л тыро́; дова́-паць кэрэ́ла Рай Дэвэ́л, Дэвэ́л тыро́, сарэ́ манушэ́нца, савэ́ндыр ту дарэса;

20. и бичхавэ́ла Рай Дэвэ́л, Дэвэ́л тыро́, вослэн (шэршнен) пэ лэ́ндэ, пака ёнэ хасёна, савэ́ ячнэ́пэ и ґарадёна тырэ́ мо́стыр;

21. на дар лэ́ндыр, пал-дова́ со Рай Дэвэ́л, Дэвэ́л тыро́, исын машки́р ту́тэ, Дэвэ́л баро́ и дарано.

22. И явэ́ла Рай Дэвэ́л, Дэвэ́л тыро́ тэ традэл анги́л ту́тэ на́бут пэ на́бут далэ́ манушы́тка на́цыи; и ту дэ́са ра́да тэ хасякирэс лэн сыг, соб (кай) тэ на скэдэ́нпэ бут пэ ту́тэ фэлды́тка мурдала́;

23. нэ отдэ́ла лэн ту́кэ Рай Дэвэ́л, Дэвэ́л тыро́, и янэ́ла лэн дро бари ту́га (конфузо), адя́кэ со ёнэ хасёна;

24. и отдэ́ла лэ́нгирэ кралье́н дрэ тырэ́ васта́, и ту хасякирэса лэ́нгиро лав тэл болыбна́стыр: и нико́н на тэрдёла проти ту́тэ, пака ту розмарэса лэн пэ котэра́ (куски).

25. Лэ́нгирэ дэвлорэнгирэ вычхиндлэ́ муя́ хачкирэ́н сарэ́са яга́са; на трэй ту́кэ тэ лэс пэ́скэ руп ци сувнака́й, саво́ исын пэ лэ́ндэ, соб (кай) дава́ тэ на явэ́л ваш ту́кэ сыр фэлы́ (сетка), пал-дова́ со дава́ исын магирипэ́н ваш Ра́скэ-Дэвлэ́скэ, тырэ́ Дэвлэ́скэ;

26. и на лы́джа магирипэ́н дро тыро́ кхэр, соб (кай) тэ на пэрэс совлахакэ, сыр ёв; отрисёв сарэ́стыр и гин сыр джунгалыпэ́н саро́ (гидинпэ сарэ́стыр); пал-дова́ со дава́ исын совлахадо.

Deuteronomy 8:1-20

1. Сарэ́ припхэныбэна́, савэ́ мэ ракира́ва ададывэ́с тумэ́нгэ, причхувэ́н зор тэ кэрэ́н, соб (кай) тумэ́ тэ явэ́н джидэ́ тэ ячэн тумэн буты́р, и тэ джа́н и тэ закэдэн пхув, пал сави́ совлахаса дыя́ лав Рай Дэвэ́л тумарэ́ дадэ́нгэ.

2. И ри́пир саро́ дром, савэ́са тут лыджия́ Рай Дэвэ́л, Дэвэ́л тыро́, пир чхучи́ (пусто) пхув, ґа́да, акана́ исын штардэша́ бэрш, соб (кай) тэ штылякирэл тут, соб (кай) тэ спробинэл тут и тэ уджинэл, со исын пэ тыро́ ило́, ци явэ́са ту тэ ракхэ́с Лэ́скирэ припхэныбэна́, ци над.

3. Ёв штылякирдя тут, спробиндя пхарэ́с (мориндя) тут бокхаса и чалякирдя тут маннаса, сави́ ту на джиндян, и на джиндлэ́ тырэ́ дада́, соб (кай) тэ сыкавэ́л ту́кэ, со на екхэ марэ́са дживэ́ла ману́ш, нэ кажнонэ́ лавэ́са, саво́ джа́ла Дэвлэ́скирэ уштэндыр, дживэ́ла ману́ш.

4. Урибэ́н тыро́ на кустяпэ пэ ту́тэ, и ґэро́й тыри́ на шулыя, ґа́да, сыр штардэша́ бэрш.

5. И джин дро тыро́ ило́, со Рай Дэвэ́л, Дэвэ́л тыро́, сыклякирэ́ла тут, сыр ману́ш сыклякирэ́ла пэ́скирэ чхавэ́с.

6. И палдава́ ракх припхэныбэна́ Ра́скирэ-Дэвлэ́скирэ, Дэвлэ́скирэ тырэскирэ, псир Лэ́скирэ дромэ́нца и дар Лэ́стыр.

7. Пал-дова́ со Рай Дэвэ́л, Дэвэ́л тыро́, лыджа́ла тут пэ лачхи́ пхув, пэ пхув, пир сави́ тхадэна сыгна рэкицы, и фолахара (фонтаны) и ґанынгорья (источники), савэ́ выджа́на лошчынэндыр и бэргэндыр,

8. пэ пхув, парно́ гив (пшэница), гив, винаграды́тка (дракхитка) лозы, инжыро и гранатытка кашторэ пэ пхув, маслинытка вэша́ и авги́н (мэда),

9. пэ пхув, пэ сави́ на ту явэ́са тэ хас тыро́ маро́ би меракиро и ни дро со на явэ́ла ту́тэ наухтылыбэн (явэ́ла до́си), пэ пхув, пэ сави́ исын бара́ састырэстыр, и бэргэндыр, савэ́ндыр явэ́са тэ чингирэс харко́ма (медь).

10. И ке́ли явэ́са ту тэ хас и тэ чалёс, тэды бахтякир Рас-Дэвлэ́с, Дэвлэ́с тырэ́с пал лачхи́ пхув, сави́ Ёв дыя́ ту́кэ.

11. Ракхпэ, соб (кай) ту тэ на бистрэс Рас-Дэвлэ́с, Дэвлэ́с тырэ́с, нэ ракх Лэ́скирэ припхэныбэна́, и Лэ́скирэ зако́ны, и Лэ́скирэ упхэныбэна́, пал савэ́ ададывэ́с Мэ ракира́ва ту́кэ.

12. Ке́ли ту явэ́са тэ хас и тэ чалёс, и чхувэ́са лачхэ́ кхэра́ и ту явэ́са тэ дживэ́с дрэ лэ́ндэ,

13. и ке́ли ту́тэ явэ́ла бут барэ́ и тыкнэ́ кхэри́тка мурдала́ (ското), и явэ́ла бут руп и сувнака́й, и саро́ ту́тэ явэ́ла бут,

14. тэды дыкх, соб (кай) тэ на запхутёл тыро́ ило́, и, соб (кай) ту тэ на бистрэс Рас-Дэвлэ́с, Дэвлэ́с тырэ́с, Саво́ вылыджия́ тут Египто́скирэ пхувья́тыр, писхарибнаскирэ кхэрэ́стыр;

15. Саво́ лыджия́ тут пир чхучи́ пхув бари и дараны, кай сыс сапа, василиски, скорпионы и шукэ́ штэ́ты, пэ савэ́ нанэ пани́; Саво́ кэрдя́ ваш ту́кэ панескиро тхадыпэн гранитытконэ скалатыр,

16. Саво́ чалякирдя тут пэ чхучи́ пхув маннаса, сави́ на джиндлэ́ тырэ́ дада́, соб (кай) Ёв тэ штылякирэл тут и тэ спробинэл тут, соб (кай) дурэды́р тэ кэрэ́л ту́кэ лачхипэ́н,

17. и соб (кай) ту тэ на пхэнэ́с дрэ тыро́ ило́: ‘Мири́ зор и мирэ́-вастэскири зор кэрдэ́ ма́нгэ дава́ барвалыпэ́н’,

18. нэ, соб (кай) ту тэ рипирэс Рас-Дэвлэ́с, Дэвлэ́с тырэ́с, пал-дова́ со Ёв дэ́ла ту́кэ зор тэ рикирэс барвалыпэ́н, соб (кай) тэ кэрэ́с, сыр акана́, Пэ́скиро пхэндло́ лав, савэ́са Ёв совлахаса дыя́ тырэ́ дадэ́нгэ.

19. Ко́ли ту бистрэса Рас-Дэвлэ́с, Дэвлэ́с тырэ́с, и джа́са пал явирэ дэвлорэндэ, и ту явэ́са тэ дынаринэс лэ́нгэ и тэ мангэспэ лэ́нгэ, тэды Мэ ракира́ва тумэ́нгэ ададывэ́с, со тумэ́ хасёна;

20. сыр мануша́, савэ́н Рай Дэвэ́л хасякирэ́ла тумарэ́ мо́стыр, адя́кэ хасёна и тумэ́ пал дова́, со тумэ́ на кандынэ́ Ра́скирэ-Дэвлэ́скирэ, тумарэ́ Дэвлэ́скири зан.

Psalms 37:5-11

5. Допатя пэ́скиро Ра́скэ-Дэвлэ́скэ и гарадёв пал Лэ́стэ и Ёв кэрэ́ла саро́,

6. И Ёв вылыджала тыро́ чачипэ́н пэ дуд (свэ́то) тэ зяинэл, и тыро́ патяибэ́н сыр кхам дро паш-дывэ́с.

7. Яв штыл (споко́йно) анги́л Растэ-Дэвлэ́стэ, ужакир, пака Рай Дэвэ́л затэрдёла, на холясов зоралэ́с пэ одолэ́стэ, савэ́скэ исын мишто́ тэ дживэ́л, и пэ одолэ́стэ, кон думинэ́ла тэ кэрэ́л фуипэ́н.

8. Ракх пэс дрэ риг холя́тыр и ячкир холякирибэ́н, на хачов холя́са тэ кэрэ́с чорипэ́н.

9. Одолэ́н, савэ́ кэрэ́на чорипэ́н, на явэ́ла сыг, а кодолэ́, савэ́ ужакирэ́на Рас-Дэвлэ́с, дорэсэ́на пхув сыр да́ро.

10. Ишчо на́бут, и на явэ́ла одолэ́н, савэ́ кэрэ́на фуипэ́н. Дыкхэна на́бут пэ лэ́нгиро штэ́то и нанэ лэн.

11. А ковлэ́-илы́тка мануша́ дорэсэ́на пхув сыр да́ро, и ёнэ явэ́на тэ бахталён раманё́стыр (миростыр), со на кончынэлапэ.

Proverbs 12:9-10

9. Набаро́ ману́ш, савэ́стэ исын дына́ри, фэды́р кодолэстыр, саво́ исын дрэ паты́в фэ́ни пэ́стэ, нэ лэ́стэ на ухты́лла (на́доси) маро́.

10. Чачуно́ ману́ш пэкэлапэ (заботисола) пал лэ́скирэ кхэритконэ́ мурдалэ́ндэ, нэ фуе́-манушэ́нгиро ило́ исын биманушытко (битангипнаскиро).

Lukaš 1:39-56

39. Дрэ далэ́ дывэса́ Мари́я уштыя́ и гия́ сы́гэс пир бэргитко пхув кэ фо́ро дрэ Юдэ́я,

40. и ёй загия́ дро Захарияскиро кхэр и дыя́ “добридим” Елизаветакэ.

41. И сыс адя́кэ: ке́ли Елизавета шундя́, сыр Мари́я дыя́ “добридим” ла́кэ, тыкно́ бия́то тринскирдяпэ упрэ́ екх мо́ло дро ла́киро пэр, и тэды Свэ́нто Ду́хо (Фа́но) пхэрдякирдя́ ла, обрадындя пэс

42. и ёй зоралэ́с дыя́ го́дла и пхэндя́: “Ту сан бахтякирды машки́р джувлендэ, и бахтякирдо́ явэ́ла бия́то, савэ́с Ту биянэса!

43. И каты́р дава́ явдя́ ма́нгэ, со Ра́скирэ-Дэвлэ́скири Дай явдя́ кэ Мэ?

44. Пал-дова́, ке́ли мэ шундём, сыр Ту дыя́н “добридим” ма́нгэ, миро тыкно́ бия́то обрадындяпэ радыма́тыр дро миро пэр,

45. со бахталы́ исын Кодоя, Сави́ упатяндыя дро дова́, со дава́ явэ́ла чачунэ́с, сыр Рай Дэвэ́л пхэндя́ ла́кэ.”

46. И пхэндя́ Мари́я: “Миро ило́ барьякирэ́ла паты́в Ра́скэ-Дэвлэ́скэ,

47. и Миро ду́хо (фа́но) радынэ́лапэ пал Дэвлэ́стэ, Мирэ́ Зракхибнаристэ.

48. Со Ёв подыкхця́ ласкаса пэ Пэ́скирэ писхарицатэ, сави́ исын кандуны, пал-дова́ со далэ́ дывэсэ́стыр сарэ́ ро́ды явэ́на тэ кхарэ́н Ман “бахтякирды”;

49. пал барипэ́н, саво́ со кэрдя́ Ма́нгэ Зоралыпнаскиро Дэвэ́л, мэк тэ явэ́л свэ́нто Лэ́скиро лав,

50. И Лэ́скиро тангипэ́н явэ́ла пэ сарэ́ ро́ды, кон дарэ́ла Лэ́стыр.

51. Ёв кэрдя́ барэ́ бутя́ Пэ́скирэ мышчаса (вастэ́са), рострадыя одолэ́н, савэ́ исын пхутькирдэ́ и бут камэ́на дрэ пэ́скирэ илэ;

52. Ёв радя тэлэ́ зоралэн лэ́нгирэ тронэндыр и ґаздыя́ упрэ́ кандунэ манушэ́н;

53. Ёв чалякирдя чалэ́с бокхалэн, и мэкця́ криг барвалэн чхучэ́ вастэ́нца,

54. Ёв дыя́ васт (помогиндя) Израилёскэ, Лэ́скирэ дынари́скэ, соб (кай) тэ рипирэл Лэ́скиро тангипэ́н,

55. сыр Ёв дыя́ лав и кэрдя́ амарэ́ дадэ́нгэ, Авраамостыр кэ Лэ́скиро ро́до дрэ ве́ки.”

56. Мари́я сыс кэ ёй пашэ́ трин чхона́, и тэ́ньчи Ёй рисия́ дро Пэ́скиро Кхэр.

Romani Bible Baltic 2019

Maintained by the United Bible Societies for the Baltic Romani Mission