Bible in one year
March 25

1. И палдава́ сыка́в паты́в Ра́скэ-Дэвлэ́скэ, Дэвлэ́скэ тырэ́скэ, и ракх, со Ёв пхэндя́ тэ ракхэ́с, и упхэныбэна́ Лэ́скирэ и зако́ны Лэ́скирэ и припхэныбэна́ Лэ́скирэ дрэ сарэ́ дывэса́.
2. И акана́ пририпирэн, – пал-дова́ со мэ ракира́ва на тумарэ́ чхавэ́нца, савэ́ на джинэ́на и на дыкхнэ́ ка́ра Ра́скирэ-Дэвлэ́скири, тумарэ́ Дэвлэ́скири; Лэ́скири сла́ва, Лэ́скиро зорало́ васт и Лэ́скиро вучо́ псико́,
3. знаме́нии (ґертыка́) Лэ́скирэ и Лэ́скирэ рэ́нды (де́лы), савэ́ Ёв кэрдя́ машкира́л Еги́пто фараонэнца, Египто́скирэ крали́са, и сарэ́ лэ́скирэ пхувья́са,
4. и со Ёв кэрдя́ Египто́скирэ халадыбнаса, лэ́скирэ грэнца и лэ́скирэ марибнытконэ́ вурдэнэнца, савэ́н Ёв тасадя дрэ Лолэ́-морёскирэ (дэрьявэ́скирэ) паня́, ке́ли ёнэ традынэпэ пал тумэ́ндэ, – и мулякирдя́ лэн Рай Дэвэ́л аж кэ/жы́ко дава́ дывэ́с;
5. и со Ёв кэрдя́ ваш тумэ́нгэ пэ чхучи́ пхув, пака тумэ́ догинэ́ кэ дава́ штэ́то,
6. и со Ёв кэрдя́ Дафаноса и Авироноса, Елиавоскирэ чхавэ́нца, Рувимо́скирэ чхавэ́са, ке́ли пхув роскэрдя́ пэ́скирэ ушта́ машки́р саро́ Израилё и накхадя (проглыниндя) лэн, и лэ́нгирэ чэ́карья (семействы), и лэ́нгирэ ша́тры, и саро́ барвалыпэ́н лэ́нгиро, саво́ сыс лэ́ндэ.
7. Пал-дова́ со якха́ тумарэ́ дыкхнэ́ сарэ́ барэ́ Ра́скирэ-Дэвлэ́скирэ рэ́нды, савэ́ Ёв кэрдя́.
8. И палдава́ ракхэ́н сарэ́ Лэ́скирэ припхэныбэна́, савэ́ мэ ракира́ва тумэ́нгэ ададывэ́с, соб (кай) тумэ́ тэ зоралён, и тэ джа́н и тэ лэн пхув, пэ сави́ тумэ́ пириджана, соб (кай) тэ лэн ла;
9. и, соб (кай) тумэ́ тэ дживэ́н бут часо пэ доя́ пхув, сави́ совлахадя́ Рай Дэвэ́л тумарэ́ дадэ́нгэ тэ дэл лэ́нгэ и лэ́нгирэ родо́скэ пэ пхув, пэ сави́ тхадэ́ла тхуд и авги́н (мэда).
10. Пал-дова́ со пхув, пэ сави́ ту джа́са, соб (кай) тэ лэс ла, на дасави́, сыр Египто́скири пхув, савья́тыр выгинэ́ тумэ́, ту почхудян семё тыро́, панякирдян ла тырэ́ ґэрэнгирэ подрикирибнаса (помошшаса), сыр маслинитко у́нта (садо),
11. нэ пхув, пэ сави́ тумэ́ пириджана, соб (кай) тэ залэн ла, исын пхув бэргэнца и лошчынэнца, и сави́ болыбна́скирэ брышындэстыр панякирэлапэ,
12. пхув, пал сави́ Рай Дэвэ́л, Дэвэ́л тыро́, пэкэлапэ, якха́ Ра́скирэ-Дэвлэ́скирэ, Дэвлэ́скирэ тырэскирэ, саро́ часо исын пэ ла́тэ, бэршэскирэ англыпна́стыр и кэ бэршэскиро ко́нцо (кэ яго́ро).
13. Ко́ли тумэ́ явэ́на тэ шунэ́н Мирэ́ припхэныбэна́, савэ́ Мэ ракира́ва тумэ́нгэ ададывэ́с, тэ рикирэ́н сыр Дро́гима дро тумаро́ ило́ Рас-Дэвлэ́с, Дэвлэ́с тумарэс, и тэ дынаринэ́н Лэ́скэ сарэ́ тумарэ́ илэ́стыр и сарэ́ тумарэ́ дестыр,
14. то Мэ да́ва тумарэ́ пхувьякэ брышы́нд дрэ пэ́скиро часо, тасярлуно/пэрвотуно (раннё) и коригуно (позднё); и ту скэдэса тыро́ маро́ и тыри́ мол (вино), и елеё тыро́;
15. и Мэ да́ва чар пэ фэ́лда тыри́ ваш тырэ́ кхэритконэ́ мурдалэ́нгэ (ското) и, ту явэ́са тэ хас и тэ чалёс.
16. Ракхэ́нпэ, соб (кай) тэ на хохавэлпэ ило́ тумаро́, и тумэ́ тэ на отджан дрэ риг, и тэ на лэн тэ дынаринэ́н явирэ дэвлорэ́нгэ, и тэ на мангэ́нпэ лэ́нгэ;
17. и тэды, захачола холы́ Ра́скирэ-Дэвлэ́скири пэ тумэ́ндэ, и Ёв зачхакирэла болыбэ́н; со на явэ́ла брышы́нд, и пхув на янэ́ла пэ́скиро умалото (урожаё), и тумэ́ сыг хасёна лачхэ́ пхувья́тыр, сави́ Рай Дэвэ́л дэ́ла тумэ́нгэ.
18. И палдава́ чхувэ́н (прилэ́н) далэ́ Мирэ́ лава́ дро тумаро́ ило́ и дро тумаро́ ди, и пхандэн лэн пэ рипирибэ́н пэ пэ́скиро васт, и мэк тэ явэ́н ёнэ пхандыпнаса машки́р тумарэ́ якха́;
19. и сыклякирэ́н лэ́нгэ пэ́скирэ чхавэ́н, ракири́ пал лэ́ндэ, ке́ли ту сан бэшто́ дро тыро́ кхэр, и ке́ли ту джа́са дромэ́са, и ке́ли ту пасёса, и ке́ли уштэса;
20. и чхин лэн пэ тырэ́-кхэрэ́скирэ косяки и пэ тырэ́ вудара́,
21. соб (кай) ада́кицы бут тэ явэ́н тумарэ́ дывэса́ и тумарэ́-чхавэ́нгирэ дывэса́ пэ доя́ пхув, сави́ Рай Дэвэ́л совлахадя́ тэ дэл тумарэ́ дадэ́нгэ, ци бут дывэса́ болыбэ́н явэ́ла пэ пхув.
22. Ко́ли тумэ́ явэ́на тэ ракхэ́н сарэ́ далэ́ припхэныбэна́, савэ́ Мэ ракира́ва тумэ́нгэ тэ кэрэ́н саро́ пир лэ́ндэ, и тумэ́ явэ́на тэ рикирэ́н сыр Дро́гима дро пэ́скиро ило́ Рас-Дэвлэ́с, Дэвлэ́с тумарэс, тэ псирэ́н сарэ́ Лэ́скирэ дромэ́нца и тэ причхувэнпэ кэ Ёв,
23. то тэды вытрадэла Рай Дэвэ́л сарэ́ адалэ́ манушэ́н тумарэ́ мо́стыр, и тумэ́ лэ́на лофо (власть) пэ манушэ́ндэ, савэ́ исын буты́р и зоралэды́р тумэ́ндыр;
24. кажно штэ́то, пэ саво́ тэрдёла тумари́ ґэро́й, явэ́ла тумаро́; чхучэ́ пхувья́тыр и Ливаностыр, рэка́тыр (лэня́тыр) Ефратостыр, адя́кэ-паць кэ за́падно (пал-панитко) мо́рё (дэрья́в) явэ́на штэ́ты тумарэ́.
25. Нико́н на вытэрдёла проти тумэ́ндэ: Рай Дэвэ́л, Дэвэ́л тумаро́, янэ́ла дар анги́л тумэ́ндэ пэ кажно пхув, пэ сави́ тумэ́ тэрдёна, сыр Ёв ракирдя́ тумэ́нгэ.
26. Акэ, мэ выпхэнава тумэ́нгэ ададывэ́с бахтякирибэ́н и прокошыбэ́н:
27. бахтякирибэ́н, ко́ли тумэ́ шунэ́на припхэныбэна́ Ра́скирэ-Дэвлэ́скирэ, тумарэ́ Дэвлэ́скирэ, савэ́ мэ ракира́ва тумэ́нгэ ададывэ́с,
28. а прокошыбэ́н, ко́ли тумэ́ на явэ́на тэ шунэ́н припхэныбэна́ Ра́скирэ-Дэвлэ́скирэ, тумарэ́ Дэвлэ́скирэ и джа́на дрэ риг дромэ́стыр, пал саво́ ракира́ва тумэ́нгэ ададывэ́с, и джа́на пала́л пал явирэ дэвлорэндэ, савэ́н тумэ́ на джинэ́на.
29. Ке́ли янэ́ла тут Рай Дэвэ́л, Дэвэ́л тыро́, пэ доя́ пхув, пэ сави́ ту джа́са, соб (кай) тэ лэс лофо пэ ла́тэ, тэды пхэнэ́н бахтякирибэ́н пэ бэ́рга Гаризимо, а прокошыбэ́н (арман) пэ бэ́рга Гевало.
30. Ѓа́да, ёнэ исын пал Иорда́но, пир дром кэ кхамэскиро загиибэ́н, пэ пхув Хананеенгири, савэ́ дживэ́на пэ лошчы́на (равнина), проти Галга́ло, на́дур дэмбитконэ вэшорэстыр Море.
31. Пал-дова́ со тумэ́ пириджана Иорда́но, соб (кай) тэ джа́н тэ лэс пхув, сави́ Рай Дэвэ́л, тумаро́ Дэвэ́л, дэ́ла тумэ́нгэ и тумэ́ лэ́на ла, и явэ́на тэ дживэ́н пэ ла́тэ.
32. И палдава́ кэрэ́н саро́ пир сарэ́ упхэныбэна́ и Лэ́скирэ зако́ны, савэ́ Мэ выпхэнава тумэ́нгэ ададывэ́с.
1. Акэ, исын упхэныбэна́ и зако́ны, савэ́ тумэ́нгэ трэй тэ причхувэ́н зор тэ кэрэ́н кэ ко́нцо/яго́ро (тэ сполнинэн пэ пхув), сави́ Рай Дэвэ́л тырэ́-дадэ́нгиро Дэвэ́л дэ́ла ту́кэ дро хулаибэн, пэ сарэ́ дывэса́, савэ́ тумэ́ явэ́на тэ дживэ́н пэ доя́ пхув.
2. Розмарэн сарэ́са (пэ котэра́) сарэ́ штэ́ты, кай исын манушы́тка на́цыи (народы), пэ савэ́ндэ тумэ́ лэ́на лофо (власть), и савэ́ дынариндлэ́ пэ́скирэ дэвлорэ́нгэ, пэ вучэ́ бэ́рги, и пэ бэ́ргицы, и тэл кажно кашт (дрэ́во) ранденца;
3. и роспхагирэн лэ́нгирэ алта́ри, и пхагирэн лэ́нгирэ сты́лбы, и хачкирэ́н яга́са лэ́нгирэ вэладиня (рошчы), и розмарэн лэ́нгирэ-дэвлорэнгирэ истуканы, и протрадэн лэ́нгиро лав долэ́ штэто́стыр.
4. Тумэ́нгэ нашты́ тэ кэрэ́н дова́ ваш Ра́скэ-Дэвлэ́скэ, Дэвлэ́скэ тумарэскэ.
5. Нэ пэ штэ́то, саво́ выкэдэ́ла Рай Дэвэ́л, Дэвэ́л тумаро́, сарэ́ тумарэ́ родыцэндыр, соб (кай) тэ явэ́л Лэ́скиро Лав одо́й, родэ́н Лэс одо́й и явэ́н одори́к,
6. и одори́к янэ́н тумарэ́ цэ́ла схачкирибэна, и тумарэ́ свэ́нта дыибэна́ Ра́скэ-Дэвлэ́скэ, и тумарэ́ дэшэнгирья (десятины), и тумарэ́ вастэнгиро ґаздыпэн, и тумарэ́ совэла, и тумаро́ яныбэ́н пир пэ́скиро ило́, и англатунэн (пэрвонэ́ бияндлэн) тумарэ́ барэ́ и тыкнэ́ тумарэ́ кхэритконэ́ мурдалэ́ндыр (ското́стыр);
7. и тумэ́ хан одо́й анги́л Растэ-Дэвлэ́стэ, Дэвлэ́стэ тумарэстэ, и радынэ́нпэ тумэ́ и чэ́карья (семействы) тумарэ́, пал саро́, со кэрдэ́ тумарэ́ васта́, со́са бахтякирдя́ тумэн Рай Дэвэ́л, Дэвэ́л тыро́.
8. Одо́й тумэ́нгэ нашты́ тэ кэрэ́н саро́, сыр ада́й амэ акана́ кэра́са, кажно, пир пэ́скири годы́, со лэ́скэ здэлапэ чачипна́са;
9. пал-дова́ со тумэ́ акана́ ишчо (инкэ́) на загинэ́ пэ штэ́то тэ откхинён и пэ пхув дрэ миштыпна́скири ме́ра тэ прилэ́н, сави́ Рай Дэвэ́л, Дэвэ́л тыро́, дэ́ла ту́кэ.
10. Нэ ке́ли тумэ́ пириджана Иорда́но и лэ́на тэ дживэ́н пэ пхув, сави́ Рай Дэвэ́л, Дэвэ́л тумаро́, дэ́ла тумэ́нгэ дрэ миштыпна́скири ме́ра тэ прилэ́н, и ке́ли Ёв штылякирэла тумэн сарэ́ тумарэ́ вэргэ́ндыр, савэ́ явэ́на пашы́л тумэ́ндэ, и тумэ́ явэ́на тэ дживэ́н би трашакиро (би дара́киро),
11. то тэды, саво́ штэ́то выкэдэ́ла Рай Дэвэ́л, Дэвэ́л тумаро́, соб (кай) тэ явэ́л лав Лэ́скиро одо́й, одори́к янэ́н саро́, со мэ пхэна́ва тумэ́нгэ: тумарэ́ цэ́ла схачкирибэна и тумарэ́ свэ́нта дыибэна́ Ра́скэ-Дэвлэ́скэ, тумарэ́ дэшэнгирья (десятины) и тумарэ́ вастэнгиро ґаздыпэн, и саро́, со исын выкэдымо фэды́р пир тумарэ́ совэла, пал со тумэ́ дынэ́ лав Ра́скэ-Дэвлэ́скэ;
12. и радынэ́нпэ анги́л Растэ-Дэвлэ́стэ, Дэвлэ́стэ тумарэстэ, тумэ́ и тумарэ́ чхавэ́, и тумарэ́ чхая́, и тумарэ́ писха́рья, и тумарэ́ писхарицы, и Левито, саво́ исын машкира́л тумарэ́ кхэра́, пал-дова́ со нанэ лэ́скэ паш и миштыпна́скири ме́ра тумэ́нца.
13. Ракхпэ тэ янэс тыро́ цэ́ло схачкирибэ́н пэ кажно штэ́то, саво́ ту дыкхэ́са;
14. нэ пэ екх пэ дова́ штэ́то, саво́ выкэдэ́ла Рай Дэвэ́л дрэ екх тырэ́ родыцо́стыр, ян тыро́ цэ́ло схачкирибэ́н, и кэр саро́, со Мэ ракира́ва ту́кэ.
15. Нэ ко́ли закамэ́ла ди тыро́, ту́кэ сашты́ (можна) тэ зачхинэс и тэ хас, пир Ра́скирэ-Дэвлэ́скиро, тырэ́ Дэвлэ́скиро бахтякирибэ́н, мас, саво́ Ёв дыя́ ту́кэ, дрэ сарэ́ тырэ́ кхэра́: нажужо и жужо́ сашты́ (можна) тэ хан дава́, сыр серна и сыр оленёс;
16. екх рат на хан: пэ пхув вычхувэн лэс, сыр пани́.
17. Нашты́ ту́кэ тэ хас дрэ тырэ́ кхэра́ дэшэнгирья тырэ́ марэстыр, и мол (вино) тыри́ и елеё тыро́, и тырэ́ барэ́ мурдалэнгирэн (скотоскирэ) англатунэн и тырэ́ тыкнэ́ мурдалэнгирэн, и сарэ́стыр, пэ со исын тырэ́ совэла, савэ́ ту совлахадян и яныбэ́н пир пэ́скиро ило́, и тырэ́ вастэнгирэ ґаздыпнастыр;
18. нэ ха дава́ анги́л Растэ-Дэвлэ́стэ, тырэ́ Дэвлэ́стэ, пэ дова́ штэ́то, саво́ выкэдэ́ла Рай Дэвэ́л, тыро́ Дэвэ́л, – ту и тыро́ чхаво́, и тыри́ чхай, и тыро́ писха́ри, и тыри́ писхарица, и Левито, и ману́ш, саво́ явдя́ тэ дживэ́л дрэ тырэ́ кхэра́, и ра́дынпэ анги́л Растэ-Дэвлэ́стэ, тырэ́ Дэвлэ́стэ, пал саро́, со кэрдэ́ тырэ́ васта́.
19. Дыкх, на ячкир Левитос дрэ сарэ́ дывэса́, савэ́ явэ́са тэ дживэ́с пэ тыри́ пхув.
20. Ке́ли Рай Дэвэ́л, Дэвэ́л тыро́, розбуґлякирэла тырэ́ ме́жы, сыр Ёв ракирдя́ ту́кэ, и ту пхэнэ́са: “Хава мэ мас”, пал-дова́ со ди тыро́ закамэ́ла тэ хал мас, – то тэды, пир тырэ́-дескири ра́дыма, ха мас.
21. Ко́ли дур явэ́ла ту́тыр дова́ штэ́то, саво́ выкэдэ́ла Рай Дэвэ́л, тыро́ Дэвэ́л, соб (кай) тэ явэ́л Лэ́скиро лав одо́й, тэды зачхин барэ́ и тыкнэ́ тырэ́ кхэритконэ́ мурдалэ́ндыр, саво́ дыя́ ту́кэ Рай Дэвэ́л, сыр мэ припхэндём ту́кэ, и ха дрэ тырэ́ кхэра́, пир тырэ́-дескири ра́дыма;
22. нэ ха лэн адя́кэ, сыр ха́на серна и оленёс; адя́кэ нажужо, сыр и жужо́ сашты́ (можна) тэ хан.
23. екх шылалэс дыкх, соб (кай) тэ на хас рат, пал-дова́ со рат исын ди, и джиибэ́н исын дро рат, на ха ди кхэтанэ́ масэса.
24. На ха лэс; вычхув лэс пэ пхув, сыр пани́.
25. На ха лэс, соб (кай) шука́р тэ явэ́л ту́кэ и тырэ́ чхавэ́нгэ пало́ (после) ту́тэ, ко́ли ту явэ́са тэ кэрэ́с чачипэ́н анги́л Ра́скирэ-Дэвлэ́скирэ якха́.
26. Екх свэнтыми тырэ́, савэ́ исын ту́тэ, и тырэ́ совэла ян, и яв пэ дова́ штэ́то, саво́ выкэдэ́ла Рай Дэвэ́л.
27. И ян цэ́ло схачкирибэ́н тыро́, мас и рат, пэ Ра́скирэ-Дэвлэ́скиро, тыро́ Дэвлэ́скиро алта́рё; нэ рат явирэ тырэ́ свэнтонэ́ яныбнастыр Ра́скэ-Дэвлэ́скэ трэй, соб (кай) тэ явэ́л прочхудо пашы́л Ра́скирэ-Дэвлэ́скиро, тырэ́ Дэвлэ́скиро алта́рё, а мас ха.
28. Шун и кэр саро́ пир сарэ́ далэ́ лава́, савэ́ мэ припхэнава ту́кэ, соб (кай) шука́р тэ явэ́л ту́кэ и тырэ́ чхавэ́нгэ пало́ (после) ту́тэ дро ве́ко, ко́ли явэ́са тэ кэрэ́с, со исын лачхо́ и чачуно́ анги́л Ра́скирэ-Дэвлэ́скирэ, тырэ́ Дэвлэ́скирэ якха́.
29. Ке́ли Рай Дэвэ́л, Дэвэ́л тыро́ традэ́ла криг манушэ́н тырэ́ мо́стыр, кэ савэ́ ту джа́са, соб (кай) тэ лэс лофо пэ́скэ пэ лэ́ндэ, и ту, лыи лэн, лэ́са тэ дживэ́с пэ лэ́нгири пхув;
30. то ракхпэ, соб (кай) ту тэ на попэрэс дрэ фэлы́ (сетка), адя́кэ-паць сыр ёнэ, ке́ли ту традэса криг лэн тырэ́ мо́стыр, и, соб (кай) ту на родыян лэ́нгирэ дэвлорэ́, ракири́: “Сыр дынариндлэ́ далэ́ манушы́тка на́цыи пэ́скирэ дэвлорэ́нгэ, адя́кэ ява́ва и мэ тэ кэра́в.”
31. На кэр адя́кэ Ра́скэ-Дэвлэ́скэ, Дэвлэ́скэ тырэ́скэ дова́, пал-дова́ со саро́, со́стыр гинэ́ла сыр джунгалыпэ́н (гидинэлапэ) Рай Дэвэ́л, со на камэ́ла Ёв, дова́ ёнэ кэрэ́на дэвлорэ́нгэ пэскирэнгэ: ёнэ и пэ́скирэ чхавэ́н, и пэ́скирэ чхае́н хачкирэна пэ яг дэвлорэ́нгэ пэскирэнгэ.
18. Рай Дэвэ́л дыкхэ́ла пал бидошэнгирэ манушэ́ндэ и лэ́нгиро миштыпэ́н явэ́ла пэ сарэ́ ве́ки:
19. ёнэ на явэ́на ладжакирдэ́ дрэ пхарэ́ дывэса́, ёнэ явэ́на чалэ дрэ бокхалэ́ бэрша́.
20. Нэ фуй мануша́ хасёна и Ра́скирэ-Дэвлэ́скирэ вэ́рги сыр фэлдакиро шукарипэ́н, сыр тхув хасёна.
21. Фуй ману́ш лэ́ла ловэ́ дро длуго и ние́кхвар на дэ́ла палэ, чачипна́скиро ману́ш тангинэла (жалинэла) и дэ́ла.
22. Пал-дова́, со одолэ́, савэ́н Дэвэ́л бахтякирдя́, лэ́на пхув сыр мэкно́ миштыпэ́н, а одолэ́, савэ́н Дэвэ́л прокосця, явэ́на вычхурдынэ тэ хасён.
12. Фуй ману́ш исын ґа́лко тэ ухтылэл чорипнаса, нэ чачунэ́ манушэ́ндэ исын зоралы́ пхув тэл ґэра́.
13. Фуй ману́ш пэрэ́ла дрэ фэлы́ чорипнаса пэ́скирэ уштэндыр, нэ чачуно́ ману́ш джа́ла криг пхарипнастыр.
14. Ману́ш явэ́ла чало лачхипнастыр сыр пхабатыр, со выджа́ла лэ́скирэ уштэндыр, и явэ́ла дыно́ манушэ́скэ пир бутя́ лэ́скирэ-вастэнгирэ.
1. Дрэ долэ́ дывэса́ Римоскиро кхенинго (кесарё) Аўгусто дыя́ упхэныбэ́н тэ пиригинэн сарэ́ манушэ́н, савэ́ сыс пир сари́ пхув.
2. Дава́ сыс пэ́рво пиригиныбэ́н и лэс кэрэ́нас дро дова́ часо, ке́ли о Квиринеё сыс Сириякирэ-тхэмэскиро барыдыро́.
3. Кажнонэ́скэ трэиндя́ тэ явэ́л дро пэ́скиро фо́ро ваш пиригиныбэ́н.
4. И Ёза (Иосифо) адя́кэ-паць гия́ Назаретостыр, саво́ исын дрэ Галиле́я кэ Юдэ́я дро фо́ро Вифлеэмо, саво́ кхарлапэ адя́кэ-паць “Давидо́скиро фо́ро”, пал-дова́ со ёв сыс Давидо́скирэ манушэ́ндыр и родо́стыр,
5. тэ зачхинэлпэ Марияса, Сави́ гиндяпэ лэ́скэ сыр ромны́, и Сави́ сыс пхари́.
6. И сыс адя́кэ: пака ёнэ сыс одо́й, явдя́ Ла́кэ дывэ́с тэ биянэ́л,
7. и Ёй бияндя́ Пэ́скирэ Пэрвонэ́ Чхавэ́с, и патькирдя Лэс дрэ пхэрнэ, и чхудя́ Лэс дрэ ясла (кхурлы), пал-дова́ со на сыс лэ́нгэ штэ́то дро затрадыпнытко кхэр (гостиница).
8. Сыс чхупна́рья (пастухи) пэ кодоя риг пэ фэ́лда, и ракхэнас раты́ пэ́скиро гурто.
9. И екха́тыр (сра́зу) Дэвлэ́скиро Янго́ло явдя́ анги́л лэ́ндэ, и Дэвлэ́скири сла́ва сыр ягуно дуд (свэ́то) засвэнцындя пашы́л лэ́ндэ; и пыя́ пэ лэ́ндэ бари дар.
10. И Янго́ло пхэндя́ лэ́нгэ: “На дарэ́н, мэ пхэна́ва тумэ́нгэ лачхо́ нэвипэн пал бари ра́дыма ваш сарэ́ манушэ́нгэ.
11. Ададывэ́с дро Давидо́скиро фо́ро бия́ндыя тумэ́нгэ Зракхибнари, саво́ исын Христо́со, Рай Дэвэ́л.
12. И, ґа́да, тумэ́нгэ знако (шпэ́ра): тумэ́ латхэ́на Тыкнэ́ Биятос патькирдэс дрэ пхэрнэ, и Ёв явэ́ла дрэ ясла.”
13. И екха́тыр сыкадынэ бут болыбны́тка халадыбэна (Янго́лы) кхэтанэ́ далэ́ Янголоса; ёнэ шарэнас Дэвлэ́с и ракирэ́нас:
14. “Тэ славинэлпэ Дэвэ́л дрэ упратунэ болыбэна, и тэ явэ́л рама́нё (миро) пэ пхув машки́р манушэ́ндэ, савэ́ндыр Дэвэ́л радынэ́лапэ.”
15. И сыс адя́кэ: ке́ли Янго́лы гинэ́ криг лэ́ндыр пэ болыбэ́н, то чхупна́рья пхэндлэ́ екх екхэ́скэ: “Явэ́н дро Вифлее́мо тэ дыкхас, со одо́й кэрдя́пэ, пал со сыс дава́ нэвипэн Ра́стыр-Дэвлэ́стыр амарэстыр.”
16. И ёнэ сы́гэс явнэ́, и латхнэ́ Мари́я и Ёзас (Иосифос) и Тыкнэ́ Биятос, Саво́ сыс пашто́ дрэ ясла (кхурлы).
17. Ке́ли ёнэ дыкхнэ́ дава́, ёнэ роспхэндлэ́ пал дова́, со сыс пхэндло́ лэ́нгэ пал далэ́ Тыкнэ́ Биятостэ.
18. И сарэ́, кон шундлэ́ дава́, дивиндлэ́пэ пэ дова́, со лэ́нгэ чхупна́рья пхэндлэ́.
19. Нэ Мари́я рипирэлас сарэ́ далэ́ лава́, и думинэлас пал лэ́ндэ хор дро Пэ́скиро ило́.
20. И чхупна́рья рисинэ́ палэ шарэнас и парикирэнас Дэвлэ́скэ пал саро́, со ёнэ шундлэ́ и дыкхнэ́ адя́кэ, сыр лэ́нгэ сыс пхэндло́.
21. И ке́ли прогинэ́ охто́ (бидуе́нгиро дэш) дывэса́, соб (кай) тэ обчхинэн Тыкнэ́ Биятос, дынэ́ Лэ́скэ лав Ису́со, лав, саво́ дыя́ Янго́ло анги́л дава́, сыр Лэ́скири Дай яця́ пхари́ Лэ́са.
22. И ке́ли прогинэ́ (накхлэ) дывэса́, савэ́ сыс на жужэ́ пир Мойза́скиро Зако́но, ёнэ яндлэ́ лэс тэ свэнцякирэн (тэ сыкавэ́н и тэ чхувэ́н дрэ риг Лэс) анги́л Дэвлэ́стэ,
23. сыр исын чхиндло́ дро Дэвлэ́скиро Зако́но: “Кажно муршоро, саво́ выджа́ла да́кирэ лочовя́тыр (утробатыр), тэ явэ́л свэнцякирдо ваш Дэвлэ́скэ”,
24. соб (кай) тэ янэ́н свэ́нто дыибэ́н (жэртва), сыр исын пхэндло́ дро Дэвлэ́скиро Зако́но, дуе́н голумбицэн ци дуе́н голумбэнгирэ тыкнорэн.
Romani Bible Baltic 2019
United Bible Societies for the Baltic Romani Mission