Bible in one year - Пэ Балтитко Романи чиб

Bible in one year March 3

1. Ѓа́да, исын Мойза́скиро и Аароноскиро ро́до, ке́ли ракирдя́ Рай Дэвэ́л Мойза́скэ пэ бэ́рга Синаё,

2. и, акэ, исын Аароно́скирэ-чхавэ́нгирэ лава́: англатуно́ (пэ́рво) Надаво, Авиудо, Елиза́ро и Ифамаро;

3. акэ, исын Аароно́скирэ-чхавэ́нгирэ лава́, раша́нгирэ, савэ́н помакхнэ, савэ́н ёв (Ааро́но) высвэнцындя, соб (кай) ёнэ тэ кэрэ́н буты́ сыр рашая́;

4. нэ Надаво и Авиудо мынэ́ анги́л Растэ-Дэвлэ́стэ, ке́ли ёнэ яндлэ́ явирэ-манушэ́нгири яг анги́л Растэ-Дэвлэ́стэ пэ Синаёскири чхучи́ пхув, чхавэ́н лэ́ндэ на сыс; и ячнэ́пэ рашанца Елиза́ро и Ифамаро пашы́л пэ́скирэ дадэ́стэ Аароностэ.

5. И пхэндя́ Рай Дэвэ́л Мойза́скэ дасавэ́ лава́:

6. “Ян Левиёскиро ро́дыцо (чанг), и чхув лэс раша́са анги́л Аароностэ, соб (кай) ёнэ тэ дынаринэ́н (тэ служынэн) лэ́скэ;

7. и мэк ёнэ тэ явэ́н пэ стрэ́га пал лэ́стэ, и пэ стрэ́га пал саро́ скэдыибэ́н пашы́л ша́тра скэдыибна́скири, соб (кай) ёнэ тэ лыджа́н буты́ пашы́л ша́тра;

8. и мэк ёнэ тэ ракхэ́н сарэ́ приборы скэдыибнаскирэ шатратыр, и явэ́на пэ стрэ́га пал Израилёскирэ чхавэ́ндэ, соб (кай) тэ лыджа́н буты́ пашы́л ша́тра.

9. Отдэ́ Левитэ́н Аароно́скэ и лэ́скирэ чхавэ́нгэ сарэ́са: мэк тэ явэ́н ёнэ отдынэ́ лэ́скэ Израилёскирэ чхавэ́ндыр;

10. Аароно́с и лэ́скирэ чхавэ́н чхув тэ кэрэ́н буты́, соб (кай) ёнэ тэ дыкхэ́н пэ́скири рашаскири буты́; а ко́ли подджа́ла яви́р ману́ш, одова́ ману́ш явэ́ла отдыно́ мэрибна́скэ.”

11. И пхэндя́ Рай Дэвэ́л Мойза́скэ, ракири́:

12. “Ѓа́да, Мэ лыём Левитэ́н Израилёскирэ чхавэ́ндыр заме́ст (пэ штэ́то) сарэ́ англатунэндэ (пэрвонэндэ), саво́ выджа́ла лочовя́тыр (лоностыр) машки́р Израилёскирэ чхавэ́ндэ, Леви́ты исын бангэ́ тэ явэ́н Мирэ́;

13. пал-дова́ со сарэ́ англатунэ́ чхаворэ́ – Мирэ́; дро дова́ дывэ́с, ке́ли Мэ хасякирдём сарэ́н англатунэн бияторэн пэ Египто́скири пхув, Мэ высвэнцякирдём Пэ́скэ сарэ́н англатунэн Израилёскирэ манушэ́стыр кэ кхэри́тка мурдала́ (ското); ёнэ исын бангэ́ тэ явэ́н Мирэ́. Мэ сом Рай Дэвэ́л.”

14. И пхэндя́ Рай Дэвэ́л Мойза́скэ пэ Синаёскири чхучи́ пхув дасавэ́ лава́:

15. “Пиригин Левиёскирэ чхавэ́н пир лэ́нгирэ чэ́карья (семействы), пир лэ́нгирэ ро́ды; гин сарэ́н муршэ́н екхэ чхонэстыр и пхурэды́р.”

16. И пиригиндя лэн Мо́йза пир Ра́скирэ-Дэвлэ́скиро лав, сыр сыс припхэндло.

17. И ґа́да, исын Левиёскирэ чхавэ́ пир лэ́нгирэ лава́: Гирсоно, Каафо и Мерари.

18. И, акэ, исын Гирсоноскирэ-чхавэ́нгирэ лава́ пир лэ́нгирэ ро́ды: Ливнё и Шымеё.

19. И Каафоскирэ чхавэ́ пир лэ́нгирэ ро́ды: Амрамо и Ицгаро, Хевро́но и Узиило.

20. И Мерарискирэ чхавэ́ пир лэ́нгирэ ро́ды: Махли и Муша. Ѓа́да, исын Левиёскиро ро́до пир лэ́нгирэ чэ́карья.

21. Гирсоностыр джа́ла ро́до Ливнискиро и ро́до Шымеяскиро: дава́ исын Гирсоноскиро ро́до.

22. Пиригиндлэ сыс сарэ́ мурша́, екхэ чхонэстыр и пхурэды́р, лэн сыс эфта́ тысёнцы панджшэла́.

23. Гирсоноскирэ ро́ды бангэ́ сыс тэ тэрдён стано́са (табороса) палэ ша́тра пэ западо;

24. барыдыро́ пэ Гирсоноскирэ-чхавэ́нгиро, лэ́нгирэ-дадэнгири стрэч (поколениё) сыс Елиасафо, Лаелоскиро чхаво́.

25. Гирсоноскирэ чхавэ́нгэ допатялапэ скэдыибна́скири ша́тра тэ ракхэ́н, и ла́киро учхакирибэн (полого), и скэдыибна́скири шы́рма пэ загибэн, дрэ ша́тра,

26. и пэ грэ́да (дво́ро) и двороскирэ-загиибнаскири шы́рма, сави́ исын трусця́л (кругом) ски́ния и алта́рё, и ла́кирэ шэлэ, сарэ́нца лэ́нгирэ приборэнца.

27. Каафостыр сыс ро́до Амрамоскиро и ро́до Ицгараскиро, Хевроноскиро ро́до, и Узиилоскиро ро́до: далэ́ исын Каафоскирэ ро́ды.

28. Пир гиныбэ́н сарэ́ муршэ́н екхэ чхонэстыр и пхурэды́р, сыс охто́ тысёнцы шовшэла́, савэ́ ракхнэ свэ́нто штэ́то.

29. Каафоскирэ-чхавэ́нгирэ ро́ды сыс бангэ́ тэ чхувэ́н пэ́скиро ста́но пэ паш-дывэсы́тко (южно) шатракири риг;

30. о барыдыро́ Каафоскирэ родо́стыр сыс о Елцафано, Узиилоскиро чхаво́;

31. Лэ́нгэ сыс дыно́ тэ ракхэ́н ковчэго, сками́нд, момолы́тко (свети́льнико), алта́рё, свэ́нта кхорэ́ (сасу́ды), савэ́нца сыс трэй лэ́нгэ тэ дынаринэ́н (тэ служынэн), и шы́рма сарэ́ ла́кирэ приборэнца.

32. Шэрало́ барыдыро́ пэ Левитэ́нгирэ барыдырэндэ сыс о Елиза́ро, Аароно́скирэ-рашаскиро чхаво́; тэл лэ́скиро ракхибэн сыс одолэ́, савэ́нгэ сыс допатяндло тэ ракхэ́н свэ́нто штэ́то.

33. Мераристыр сыс Махлискиро ро́до и Мушискиро ро́до: дава́ сыс Мерарискиро ро́до;

34. пиригиндлэ сарэ́н муршэ́н, екхэ чхонэстыр и пхурэды́р – шов тысёнцы дуйшэла́;

35. о барыдыро́ Мерарискирэ-дадэ́нгиро родо́стыр сыс о Цуриило, Авихаилоскиро чхаво́; ёнэ сыс бангэ́ тэ чхувэ́н пэ́скиро ста́но пэ паш-рати́тко (северно) риг шатратыр;

36. Мерарискирэ чхавэ́нгэ допатянас тэ ракхэ́н шатракирэ бэльки (брусы) и ла́кирэ баландиня́ (шосты), и ла́кирэ сты́лбы, и ла́кирэ тэл ґэра́ прэдки и сарэ́ ла́кирэ приборы сарэ́ лэ́нгирэ кэрибнаса,

37. и сты́лбы пэ грэ́да (дво́ро) сарэ́ ригэ́ндыр и лэ́нгирэ прэдки (основы), и лэ́нгирэ килорэ и лэ́нгирэ шэлэ.

38. Англатунэ́ рига́тыр дрэ ша́тра, кэ васто́ко анги́л скэдыибна́скири ша́тра, сави́ сыс рисии, кай ґаздэ́лапэ кхам, сыс бангэ́ тэ чхувэ́н ста́но (таборо (лод)) Мо́йза и Ааро́но и лэ́скирэ чхавэ́, савэ́нгэ сыс допатяндыно тэ ракхэ́н свэ́нто штэ́то пал Израилёскирэ чхавэ́ндэ; а ко́ли вари-кон подджа́ла явирэ манушэ́ндыр (саво́ на Аароностыр), явэ́ла отдыно́ мэрибна́скэ.

39. Сарэ́н гиндлэн Левитэ́н, савэ́н пиригиндлэ Мо́йза и Ааро́но пир припхэныбэ́н Ра́стыр-Дэвлэ́стыр, пир лэ́нгирэ ро́ды, сарэ́н муршэ́н, екхэ чхонэстыр и пхурэды́р, сыс биш тэ дуй тысёнцы.

40. И пхэндя́ Рай Дэвэ́л Мойза́скэ: “Пиригин сарэ́н англатунэн чхаворэ́н Израилёскирэ чхавэ́ндыр екхэ чхонэстыр и пхурэды́р, и пиригин лэн пир лава́;

41. и лэ Левитэ́н ваш Ма́нгэ, – Мэ сом Рай Дэвэ́л, – и заме́ст (пэ штэ́то) сарэ́ндэ англатунэндэ Израилёскирэ чхавэ́ндыр, а Левитэ́нгирэ кхэритконэ́ мурдалэ́н заме́ст (пэ штэ́то) саро́ пэрвонэ́-бияныпнытко мурдалэнгиро кхэритконэ́ Израилёскирэ чхавэ́ндыр.”

42. И пиригиндя Мо́йза, сыр припхэндя́ лэ́скэ Рай Дэвэ́л, сарэ́н Израилёскирэ чхавэ́нгирэ англатунэ́ чхаворэ́н;

43. и сыс сарэ́ англатунэ́ чхаворэ́н, пир лавэнгиро гиныбэ́н, екхэ чхонэстыр и пхурэды́р биш тэ дуй тысёнцы дуйшэла́ эфтадэша́ трин.

44. И пхэндя́ Рай Дэвэ́л Мойза́скэ дасавэ́ лава́:

45. “Лэ Левитэ́н заме́ст сарэ́н англатунэн чхаворэ́н Израилёскирэ чхавэ́ндыр, и Левитэ́нгирэ кхэритконэ́ мурдалэ́н (ското) заме́ст лэ́нгирэ кхэритконэ́ мурдалэ́ндэ; мэк Леви́ты тэ явэ́н Мирэ́. Мэ сом Рай Дэвэ́л.

46. А дро выкиныбэ́н пал дуйшэла́ эфтадэша́ тринэндэ, савэ́ ячнэ́пэ буты́р Левитэ́нгирэ гиныбнастыр, Израилёскирэ англатунэ́ чхаворэндыр,

47. то лэ пэ пандж шэ́кели пал манушэ́стэ, пир свэ́нто шэ́келё лэ, биш геры дро шэ́келё,

48. и отдэ́ дава́ руп Аароно́скэ и лэ́скирэ чхавэ́нгэ, дро выкиныбэ́н пал лишнёнэ (савэ́ ячнэ́пэ) манушэ́ндэ.”

49. И лыя́ Мо́йза выкиныбнаскиро руп пал лишнёнэ манушэ́ндэ, савэ́н запарудэ Леви́ты,

50. Израилёскирэ англатунэ́ чхаворэндыр ёв лыя́ руп тысёнцо (бар) трин шэла́ шовдэша́ пандж шэ́кели, пир свэ́нто шэ́келё,

51. и отдыя́ о Мо́йза выкиныбнаскиро руп Аароно́скэ и лэ́скирэ чхавэ́нгэ пир Ра́скирэ-Дэвлэ́скиро лав, сыр припхэндя́ Рай Дэвэ́л Мойза́скэ.

Numbers 4:1-49

1. И пхэндя́ Рай Дэвэ́л Мойза́скэ и Аароно́скэ адя́кэ дасавэ́ лава́:

2. “Пиригин Каафовоскирэ чхавэ́н Левиёскирэ чхавэ́ндыр пир лэ́нгирэ ро́ды, пир лэ́нгирэ чэ́карья (семействы),

3. трия́нда бэршэ́ндыр и пхурэды́р кэ пандждэша́ бэрш, сарэ́н, кон сыс дрэ зор тэ кэрэ́л буты́, соб (кай) тэ бичхавэс тэ кэрэ́н буты́ дрэ скэдыибна́скири ша́тра.

4. ΄Гада, сави́ исын Каафоскирэ-чхавэнгири буты́ дрэ скэдыибна́скири ша́тра: тэ лыджа́н Свэ́нто-свэнтонэнгиро (сама свэ́нта предметы).

5. Ке́ли станоскэ (табороскэ) трэй явэ́ла тэ джал дро дром, Ааро́но и лэ́скирэ чхавэ́ заджа́на, и злэна полого, саво́ учхакирэ́ла, и зачхакирэна лэ́са ковчэго досыкаибна́са (откровенияса);

6. и чхувэ́на пэ лэ́стэ учхакирибэн синёнэ-цвятоскирэ барсукэнгирэ цыпатыр, и упра́л лэ́стэ чхурдэна учхакирибэн саро́ голубовонэ́ вылна́тыр (шэрсятыр), и чхувэ́на андрэ́ лэ́скирэ баландиня́ (шосты);

7. и марэскиро сками́нд учхакирэна тханяса (матерьялоса) ґолубовонэ вылна́тыр, и чхувэ́на пэ лэ́стэ чарэ́, барэ́ чарэ́, тахтая́ и кучика, соб (кай) тэ почхувэн, и, лэ́скиро маро́ ваш кажно дывэ́с трэй, соб (кай) тэ явэ́л пэ лэ́стэ;

8. и чхувэ́на пэ лэ́ндэ тхан (матерьяло) лолы, и зачхакирэна ла учхакирибнаса синэ-цвятоскирэ цыпатыр, и учхувэна лэ́скирэ баландиня́;

9. и лэ́на тхан голубовонэ́ вылна́тыр, и зачхакирэна момолы́тко (свети́льнико) и лэ́скирэ лампады, и лэ́скирэ шчыпцы (цымты), и лэ́скирэ лотки, и сарэ́ кхорэ́ (сасу́ды) ваш дзэт (елеё), савэ́нца ёнэ кэрэ́на буты́ пашы́л лэ́стэ,

10. и зачхакирэна лэс и сарэ́ лэ́скирэ судинки учхакирибнаса синёнэ цыпэндыр, и чхувэ́на пэ носилки;

11. и пэ сувнакуно́ алта́рё чхувэ́на тхан ґолубовонэ вылна́тыр, и учхакирэна ла синёнэ-барсукэнгирэ цыпэндыр учхакирибнаса, и чхувэ́на лэ́скирэ баландиня́.

12. И лэ́на сарэ́ бутярнэ́ предметы, савэ́ трэй ваш буты́ пэ свэ́нто штэ́то, и чхувэ́на дрэ тхан ґолубовонэ вылна́тыр, и зачхакирэна лэн учхакирибнаса синёнэ-барсукэнгирэ цыпэндыр, и чхувэ́на пэ носилки.

13. И выжужакирэна алта́рё праскатыр (пеплостыр), и учхакирэна лэс пурпурнонэ тханяса;

14. и чхувэ́на пэ лэ́стэ сарэ́ лэ́скирэ кхорэ́ (сасу́ды), савэ́ трэй ваш буты́ пашы́л лэ́стэ, – лопаткицы ваш вангар, бустя́ (вилки), лопатки, и тахтая́, сарэ́ кхорэ́ (сасу́ды) алтарёстыр, и учхакирэна лэс учхакирибнаса синёнэ цыпэндыр, и чхувэ́на андрэ́ лэ́скирэ баландиня́.

15. И ке́ли скэдэлапэ дрэ дром ста́но (таборо (лод)), Ааро́но и лэ́скирэ чхавэ́ учхакирэна сарэ́ свэ́нта штэ́ты и сарэ́ свэнтонэ́-штэтоскирэ предметы, тэды Каафоскирэ чхавэ́ явэ́на, соб (кай) тэ лыджа́н; нэ нашты́ ёнэ тэ чилавэн свэ́нто штэ́то, соб (кай) тэ на мэрэ́н. Далэ́-скэдыибнаскирэ скиниякирэ паша́ исын бангэ́ тэ лыджа́н Каафоскирэ чхавэ́.

16. Елизароскэ, Аароно́скирэ-рашаскирэ чхавэ́скэ, допатялапэ елеё (дзэт) оливатыр ваш момолы́тко (свети́льнико) и фимиа́мо (гудлэ́ смо́лы) тэ тхувлякирэн, и кажнонэ́-дывэсэнгиро маруно́ яныбэ́н и макхибнаскиро елеё, тэ дыкхэ́л пал сари́ ша́тра и саро́, со исын дрэ ла́тэ, свэ́нто штэ́то и ла́кирэ предметы.”

17. И пхэндя́ Рай Дэвэ́л Мойза́скэ и Аароно́скэ дасавэ́ лава́:

18. “На домэкэн, соб (кай) тэ хасён Каафоскиро кхэри́тко ро́до (племё) Левитэндыр,

19. нэ, ґа́да, со трэй лэ́нгэ тэ кэрэ́н, соб (кай) ёнэ тэ явэ́н джидэ́ и тэ на мэрэ́н, ке́ли явэ́на кэ Свэ́нто-свэнтонэнгиро: Ааро́но и лэ́скирэ чхавэ́ мэк ёнэ тэ явэ́н и тэ чхувэ́н лэн кажнонэс дрэ буты́ лэ́скири и пашы́л дро лэ́нгиро лыджаибэн;

20. нэ кокорэ́ ёнэ нашты́ тэ явэ́н, тэ дыкхэ́н свэ́нто штэ́то, ке́ли учхакирэна лэс, соб (кай) тэ на мэрэ́н.”

21. И пхэндя́ Рай Дэвэ́л Мойза́скэ дасавэ́ лава́:

22. “Пиригин и Гирсоноскирэ чхавэ́н пир чэ́карья/семействы [лэ́нгирэ-дадэнги́рэ сэм΄и (ирья́)-ю.о.], пир лэ́нгирэ ро́ды,

23. трияндэ бэршэ́ндыр и пхурэды́р кэ пандждэша́ бэрш, пиригин лэн сарэ́н, кон сыс дрэ зор тэ кэрэ́л буты́, соб (кай) тэ дынаринэ́н пашы́л скэдыибна́скири ша́тра.

24. ΄Гада, исын Гирсоноскирэ-чэкарьякирэ бутя́, пашы́л лэ́нгирэ дынарибэ́н и тэ лыджа́н пхарипэ́н:

25. ёнэ исын бангэ́ тэ лыджа́н шатракиро учхакирибэн и скэдыибна́скири ша́тра, и учхакирибэн ла́киро, и учхакирибэн синэ-цыпитко, саво́ упралэстыр, и скэдыибнаскирэ-шатракири шы́рма пашы́л загиибэ́н,

26. и грэдакирэ (двороскирэ) шырмы, и убладытко шы́рма пэ грэ́да, сави́ исын пашы́л ша́тра и алта́рё, и лэ́нгирэ шэлэ, и сарэ́ предметы, савэ́ трэй тэ дынаринэ́н и саро́, со кэрэ́лапэ пашы́л лэ́ндэ: ёнэ исын бангэ́ тэ кэрэ́н буты́.

27. Пир Аароноскиро и лэ́скирэ-чхавэ́нгиро упхэныбэ́н исын бангэ́ тэ кэрэнпэ сарэ́ Гирсоноскирэ-чхавэ́нгирэ бутя́ пашы́л кажно пхарипнаскиро лыджаибэн и кажно лэ́нгири буты́, и допатян лэнгирэскэ ракхибнаскэ саро́, со ёнэ лыджа́на.

28. Ѓа́да, исын чхавэ́нгиро отпхэныбэ́н Гирсоноскирэ родо́стыр дрэ скэдыибна́скири ша́тра, и, ґа́да, со допатялапэ лэ́нгирэ ракхибнаскэ тэл Ифамароскиро дыкхибэ́н, Аароно́скирэ, рашаскирэ чхавэ́с.

29. Мерарискирэ чхавэ́н пиригин пир лэ́нгирэ ро́ды, пир лэ́нгирэ чэ́карья (семействы),

30. триянданэ бэршэ́ндыр и пхурэды́р кэ пандждэша́ бэрш, пиригин сарэ́н, кон сыс дрэ зор тэ кэрэ́л буты́, соб (кай) тэ дынаринэ́н пашы́л скэдыибна́скири ша́тра.

31. Ѓа́да, со ёнэ исын бангэ́ тэ лыджа́н, пир дынарибэ́н пашы́л скэдыибна́скири ша́тра: ла́кирэ бруски и ла́кирэ баландиня́, и ла́кирэ сты́лбы и ла́кирэ тэл ґэра́ прэдки,

32. и сты́лбы пэ грэ́да сарэ́ ригэ́ндыр, и лэ́нгирэ основы, и лэ́нгирэ килэ (конки), и лэ́нгирэ шэлэ, и сарэ́ струме́нты пашы́л лэ́ндэ, и сарэ́ лэ́нгирэ судинки; и пир лэ́нгиро лав пиригинэн струме́нты, савэ́ ёнэ исын бангэ́ тэ лыджа́н.

33. Ѓа́да, исын бутя́ Мераринэнгирэ-чхавэ́нгирэ родо́стыр, пир лэ́нгиро дынарибэ́н пашы́л скэдыибна́скири ша́тра, тэл Ифамароскиро дыкхибэ́н, Аароно́скирэ-рашаскирэ чхавэ́стэ.”

34. И пиригиндлэ Мо́йза и Ааро́но и барыдыра́ Каафавоскирэ чхавэ́н пир лэ́нгирэ ро́ды и пир лэ́нгирэ чэ́карья,

35. трияндэ бэршэ́ндыр и пхурэды́р кэ пандждэша́ бэрш, сарэ́н, кон сыс дрэ зор тэ кэрэ́л буты́, тэ дынаринэ́л дрэ скэдыибна́скири ша́тра;

36. и сыс пиригиндло, пир лэ́нгирэ ро́ды, дуй тысёнцы эфташэла́ пандждэша́.

37. Акэ, сыс сарэ́, савэ́н пиригиндлэ Каафовоскирэ родэндыр, кон сыс дрэ зор тэ дынаринэ́л пашы́л скэдыибна́скири ша́тра, савэ́н пиригиндя Мо́йза и Ааро́но пир Ра́скирэ-Дэвлэ́скиро припхэныбэ́н, саво́ дыя́ Ёв пир Мойзастэ.

38. И пиригиндлэ Гирсоноскирэ чхавэ́н пир лэ́нгирэ ро́ды и пир лэ́нгирэ чэ́карья (семействы),

39. триянданэ бэршэ́ндыр и пхурэды́р кэ пандждэша́ бэрш, сарэ́н, кон сыс дрэ зор тэ кэрэ́л буты́, дрэ скэдыибна́скири ша́тра;

40. и пиригиндло сыс пир лэ́нгирэ ро́ды, пир лэ́нгирэ чэ́карья (семействы), сыс дуй тысёнцы шовшэла́ трия́нда;

41. акэ, исын пиригиныбэ́н Гирсоноскирэ-чхавэ́нгирэ родо́стыр, сарэ́н, кон сыс дрэ зор тэ кэрэ́л буты́ пашы́л скэдыибна́скири ша́тра, савэ́н пиригиндя Мо́йза и Ааро́но, пир Ра́скирэ-Дэвлэ́скиро припхэныбэ́н.

42. И пиригиндлэ сыс Мерариноскирэ-чхавэ́нгирэ ро́ды пир лэ́нгирэ ро́ды, пир лэ́нгирэ чэ́карья (семействы),

43. трияндэ бэршэ́ндыр и пхурэды́р кэ пандждэша́ бэрш, сарэ́н, кон сыс дрэ зор тэ кэрэ́л буты́, дрэ скэдыибна́скири ша́тра;

44. и сыс пиригиндло пир лэ́нгирэ ро́ды, трин тысёнцы дуйшэла́:

45. акэ, исын пиригиныбэ́н Мерарискирэ-чхавэ́нгирэ родо́стыр, савэ́н пиригиндя Мо́йза и Ааро́но пир Ра́скирэ-Дэвлэ́скиро припхэныбэ́н, саво́ сыс дыно́ пир Мойзастэ.

46. И пиригиндлэ сарэ́н Левитэ́н, савэ́н пиригиндя Мо́йза и Ааро́но и Израилёскирэ барыдыра́ пир лэ́нгирэ ро́ды и пир лэ́нгирэ чэ́карья,

47. Трияндэ бэршэ́ндыр и пхурэды́р кэ пандждэша́ бэрш, сарэ́н, кон сыс дрэ зор тэ кэрэ́л буты́ и тэ лыджа́л скэдыибна́скири ски́ния;

48. и сыс пиригиндло лэн охто́ (бидуе́нгиро дэ́што) тысёнцы панджшэла́ эфтадэша́;

49. кажнонэ́скэ лэ́стыр пир Дэвлэ́скиро припхэныбэ́н пир Мойзастэ сыс дыны́ пэ́скири буты́ и лыджаибэн, и пиригиндлэ, сыр припхэндя́ Рай Дэвэ́л Мойза́скэ.

Psalms 30:1-7

1. Давидо́скиро Пса́лмо. Гилы́, ке́ли багандлэ, сыр Свэнцындлэ Давидо́скиро Кхэр.

2. Мэ ява́ва тэ шара́в Тут, о Раё Дэ́вла; пал-дова́ со Ту ґаздыян ман и на дыя́н во́ля мирэ́ намалэнгэ тэ радынэ́нпэ холя́са ма́ндыр.

3. О Раё Дэ́вла, Дэвэ́л миро, мэ да́ва го́дла кэ Ту тэ помогинэс, и Ту састякирдян ман.

4. О Раё Дэ́вла, Ту вылыджиян миро ди люностыр (адостыр) и Ту зракхця́н миро джиибэ́н, соб (кай) мэ тэ на джав дрэ маґила.

5. Бага́н шарибнытка гиля́ Ра́скэ-Дэвлэ́скэ, о, тумэ́ сарэ́ Лэ́скирэ мануша́, и парикирэ́н Лэ́скэ, и рипирэ́н лэ́скиро Свэ́нто Лачхипэ́н.

6. Пал-дова́, со Лэ́скири холы́ исын фэ́ни (то́ка) пэ мэнта (минута), а Лэ́скири ла́ска исын пэ саро́ джиибэ́н. Ясва сашты́ тэ явэ́н бэльвэле́, а злокоса (ранкоса) явэ́ла ра́дыма.

7. Мэ пхэндём пэ́скэ дро мишто́ джиибэ́н: “Мэ ние́кхвар на пэрава.”

Proverbs 10:30-32

30. Чачунэ́ мануша́ ние́кхвар на кунинэнапэ, нэ фуй мануша́ на явэ́на тэ дживэ́н дурэды́р пэ пхув.

31. Чачунэ́ мануша́ ракирэ́на годэ́ лава́, нэ хоханы чиб чингирэна криг.

32. Чачунэ́-манушэ́нгирэ ушта́ джинэ́на, со тэ пхэнэ́н, нэ муй фуе́-манушэ́нгиро фэ́ни (то́ка) хохавэла.

Marek 8:1-21

1. Дрэ дола дывэса́, ке́ли нэвэ́стыр сыс бут мануша́, и манушэ́нгэ адалэнгэ на сыс нисо́ тэ хан, Ису́со кхардя́ сыкляибнытконэ́н и пхэндя́:

2. “Ма́нгэ исын танго (жалко) адалэн манушэ́н, ёнэ трин дывэса́ исын Ма́нца и лэ́ндэ на яця́пэ хабэ́н;

3. ко́ли Мэ розмэкава криг лэн пир кхэра́ бокхалэнца, ёнэ пир дром вымарэнапэ зорья́тыр, пал-дова́ со бут лэ́ндыр явнэ́ дура́л.”

4. “А сыр амэ ада́й пэ дасаво штэ́то, кай нисо́ нанэ, латхаса ада́кицы маро́, соб (кай) сарэ́н тэ чалякирас?” – отпхэндлэ́ сыкляибны́тка.

5. “Кицы́ тумэ́ндэ исын лабы маро́?”, – пхуця́ тэды Ису́со. “Эфта́ (битринэ́нгиро дэш)”, – пхэндлэ́ сыкляибны́тка.

6. Тэды Ису́со пхэндя́ сарэ́нгэ тэ бэшэ́н пэ пхув, лыя́ эфта́ лабы, парикирдя Дэвлэ́скэ пал дава́, пхагирдя́ маро́ и лыя́ тэ пиридэл лэн сыкляибнытконэ́нгэ, а одолэ́ роздэнас маро́ манушэ́нгэ.

7. Латхнэпэ лэ́ндэ и набутка мачхэ́; Ису́со парикирдя Дэвлэ́скэ пал лэ́ндэ и пхэндя́ сыкляибнытконэ́нгэ тэ роздэн лэн.

8. Сарэ́ ханэ́ и чалынэ и котэра́, савэ́ ячнэ́пэ, ёнэ скэдынэ́ дрэ эфта́ корзи́ны (кхудэ́).

9. Сарэ́н, кон хая, сыс штар тысёнцы манушэ́н. Тэ́ньци Ису́со розмэкця манушэ́н,

10. И екха́тыр Ёв бэсця́ дрэ ба́рка и кхэтанэ́ сыкляибнытконэ́нца явдя́ кэ Далмануфакирэ штэ́ты.

11. Одо́й кэ Ису́со подгинэ́ Фарисе́и и лынэ́ тэ допхэнэн Лэ́скэ. Лэ́нгэ трэиндя́ тэ ухтылэ́н Лэс дро лав и ёнэ трэбиндлэ Лэ́стыр ґерты́к (знаме́ниё), соб (кай) тэ спробинэн Лэс.

12. Ису́со хор дыя́ ґондя́ и пхэндя́: “Палсо́ адалэ́ мануша́ трэбинэна ди́вы? Ракира́ва тумэ́нгэ чачипэ́н: ни сави́ ґерты́к тумэ́нгэ на явэ́ла.”

13. Ёв ячкирдя́ лэн, нэвэ́стыр бэсця́ дрэ ба́рка и дыяпэ пэ яви́р риг.

14. И сыкляибны́тка бистырдэ тэ лэн пэ́са маро́, лэ́ндэ дрэ ба́рка сыс екх мариклы.

15. Пир дром Ису́со лэ́нгэ припхэндя́: “Дыкхэ́н, ракхэ́нпэ Фарисее́нгирэ рошчынатыр (закваскатыр) и крали́скирэ Иродоскирэ рошчынатыр.”

16. И лынэ́ ёнэ тэ роздуминэн машки́р пэ́стэ: “Палсо́ да Ёв ракирэ́ла пал дрожджы? Нау́што палдова́, со амэ на лыям пэсо маро́?”

17. Ису́со уджиндя́ дава́, пхэндя́ лэ́нгэ: “Ракирибэ́н на пал дова́, со тумэ́ на лынэ́ маро́. Нау́што усае́кх тумэ́ какана́ на дыкхэ́на, и на ґалёна? Нау́што илэ тумарэ́ сарэ́са зашутинэ?

18. Нау́што, ко́ли тумэ́ндэ исын якха́, тумэ́ усае́кх на дыкхэ́на? Исын кана́, тумэ́ усае́кх на шунэ́на? А сыр жа тумэ́ на рипирэна.

19. Ко́ли Мэ пхагирдём пандж марэ́ пэ пандж тысёнцы манушэ́ндэ, кицы́ пхэрдэ́ корзи́ны (кхудэ́) котэрэнца тумэ́ скэдынэ́?” “Дэшуду́й”, – ракирэ́на Лэ́скэ.

20. “Нэ ко́ли Мэ эфта́ (битринэ́нгиро дэш) лабэнца чалякирдём штар тысёнцы манушэ́н, кицы́ пхэрдэ́ кхудэ́ котэрэнца тумэ́ скэдынэ́?” “Эфта́”, – пхэндлэ́ ёнэ Лэ́скэ.

21. Ису́со пхэндя́: “Нэ сыр жа тумэ́ усае́кх на ґалёна?”

Romani Bible Baltic 2019

Maintained by the United Bible Societies for the Baltic Romani Mission