Bible in one year
March 30

1. Ко́ли пэ пхув, сави́ Рай Дэвэ́л, тыро́ Дэвэ́л, дэ́ла ту́кэ, явэ́ла латхно замардо (умардо) ману́ш, саво́ явэ́ла пашто́ пэ фэ́лда, и исын на джиндло́, кон замардя́ (умардя) лэс,
2. тэды мэк тэ выджа́н пхурыдыра́ тырэ́ и сэнда́рья тырэ́, и вымеринэна штэ́то форье́ндыр, савэ́ исын пашы́л замардэстэ;
3. и пхурыдыра́ долэ́ форо́скирэ, саво́ явэ́ла пашылэды́р кэ замардо, мэк тэ лэн рэца (тэрня гурумня), пэ савьятэ на кэрдэ́ буты́, и сави́ на лыджия́ гамо,
4. и мэк долэ́-форо́скирэ пхурыдыра́ тэ лыджа́н даля рэца дрэ бусо (дико) лошчы́на, сави́ на сыс роспашындлы и на засеиндлы, и зачхинэна одо́й рэца дрэ лошчы́на;
5. и явэ́на рашая́, Левиёскирэ чхавэ́;
6. и сарэ́ долэ́-форо́скирэ пхурыдыра́, савэ́ сыс пашылэды́р кэ замардо, мэк тэ обморэн пэ́скирэ васта́ пэ рэцакиро (тэрнэ́-гурумнякиро) шэро́, сави́ сыс зачхиндлы дрэ лошчы́на,
7. и дэ́на тэ джинэ́н и пхэнэ́на: “Васта́ амарэ́ на прочхудэ дава́ рат, и якха́ амарэ́ на дыкхнэ́;
8. выжужакир (вычыстин) Тырэ́ манушэ́н, Израилёскирэн, савэ́н Ту, Раё Дэ́вла, выракхцян, и на гин манушэ́нгэ Тырэнгэ, Израилёскэ, банг пал прочхудо рат.” И ёнэ выжужакирэнапэ ратэстыр.
9. Адя́кэ ту́кэ трэй тэ отморэс пэ́стыр рат манушэ́скиро, саво́ на сыс банго́, ко́ли ту́тэ исын пэ ило́ тэ кэрэ́с лачхипэ́н и чачипэ́н анги́л Ра́скирэ-Дэвлэ́скирэ якха́.
10. Ке́ли ту выджаса пэ марибэ́н проти тырэ́ вэргэ́ндэ (врогэндэ), и Рай Дэвэ́л, Дэвэ́л тыро́, отдэ́ла лэн дрэ тырэ́ васта́, и лэ́са лэн дро пле́но,
11. и ту дыкхэ́са машки́р пленонэндэ джувля́, гожона, и явэ́ла ёй пир ило́ ту́кэ ла, и закамэса тэ лэс ла палоро́м,
12. тэды ян ла дро пэ́скиро кхэр, и мэк ёй тэ обчхинэл пэ́скиро шэро́ и тэ обчхинэл пэ́скирэ ная (ногти),
13. и ада́я злэла джувлы́ пэ́стыр пленоскиро пэ́скиро урибэ́н, и ёй дживэ́ла дро тыро́ кхэр, и обровэла пэ́скирэ дадэ́с и пэ́скирэ да саро́ чхон; и пало́ (после) дова́ ту сашты́ (могинэ́са) тэ заджас кэ ёй и тэ явэс ла́кэ ромэса, и ёй явэ́ла ту́кэ ромня́са;
14. ко́ли ёй коригэды́р (позжэды́р) на покамэлапэ ту́кэ, тэды отмэк ла, карик ёй закамэ́ла, нэ на бикин ла пал руп и на ри́скир ла дро дынарибэ́н, пал-дова́ со ту отлыян паты́в и барипэ́н ла́тыр.
15. Ко́ли вари-конэ́стэ явэ́на дуй ромня́, екх камлы, а яви́р над, и сыр камлы, адя́кэ и накамлы биянэна лэ́скэ чхавэ́н, и англатуно́ явэ́ла накамлякиро чхаво́,
16. тэды явэ́ла адя́кэ: сыр ёв явэ́ла тэ роздэл пэ́скирэ чхавэ́нгэ пэ́скиро миштыпэ́н, лэ́скэ нашты́ (на могинэл) камлякирэ-ромнякирэ чхавэ́скэ тэ дэл право пал пэрвонэстэ анги́л англатунэ́-бияныбнаскирэ чхавэ́стэ накамлэ ромнятыр;
17. нэ ёв исын банго́ тэ приґалёл англатунэса чхавэ́с накамлэ ромнятыр, и тэ дэл лэ́скэ дуй паша́ сарэ́стыр, со лэ́стэ латхэлапэ, пал-дова́ со ёв исын англатуно́ лэ́скирэ зорья́тыр, лэ́скэ исын право тэ явэ́л англатунэ́-родоскирэса.
18. Ко́ли вари-конэ́стэ явэ́ла чхаво́ накандуно и бунтяритко, саво́ на шунэ́ла, со ракирэ́ла лэ́скиро дад и дай лэ́скэ, и ёнэ сыклякирдэ́ кэ дукха́ лэс, нэ ёв на шунэ́ла лэн,
19. то тэды лэ́скиро дад и дай мэк тэ лэн и тэ янэ́н лэс кэ пэ́скирэ-форо́скирэ пхурыдыра́ и кэ вудара́ пэ́скирэ, штэтоскирэ, кай ёнэ дживэ́на,
20. и пхэнэ́на пэ́скирэ форо́скирэ пхурыдырэнгэ: “Дава́ амаро́ чхаво́ исын накандуно и исын бунтяритко, на шунэ́ла амарэ́ лава́, ёв исын обхаячо (ха́ла, сыр на дрэ пэ́стэ) и матяро”;
21. тэды сарэ́ мануша́ лэ́скирэ форо́скирэ мэк тэ марэ́н лэс барэ́нца кэ мэрибэ́н; и адя́кэ вытрадэ фуипэ́н пэ́стыр, и сарэ́ Израильтя́ни явэ́на тэ шунэ́н, и страхадёна.
22. Ко́ли вари-конэ́стэ латхэлапэ банг, сави́ мол мэрибна́скэ, и ёв явэ́ла мулякирдо, и ту ублавэса лэс пэ кашт,
23. то лэ́скиро тру́по нашты́, соб (кай) тэ ратькирэл пэ кашт (дрэ́во), нэ ґарав лэс дрэ дова́-паць дывэ́с, пал-дова́ со явэ́ла прокошно́ анги́л Растэ Дэвлэ́стэ кажно (сва́ко) ману́ш, кон исын убладо пэ кашт, и на магир тыри́ пхув, сави́ Рай Дэвэ́л, Дэвэ́л тыро́, дэ́ла ту́кэ сыр мэкно́ миштыпэ́н.
1. Ке́ли ту дыкхэ́са тырэ́-пшалэ́скирэ гурувэ́с, ци лэскирья бакря́, сави́ заблэндындя, на мэк лэн, нэ ри́скир лэн тырэ́ пшалэ́скэ.
2. Ко́ли дур явэ́ла ту́тыр тыро́ пшал, ци ту на джинэ́са лэс, тэды лэ лэн дрэ пэ́скиро кхэр, и мэк ёнэ явэ́на ту́тэ, пака тыро́ пшал лэ́ла тэ родэ́л лэн, и тэды отдэ́ лэн лэ́скэ;
3. адя́кэ кэр и лэ́скирэ ослоса, адя́кэ кэр лэ́скирэ урибнаса, адя́кэ кэр кажнонэ́-тырэ́-пшалэ́скирэ сарэ́са хасякирдэса, саво́ ёв хасякирэ́ла, и саво́ ту латхэса; нашты́ ту́кэ тэ отджас далэ́стыр.
4. Ке́ли ту дыкхэ́са тырэ́-пшалэ́скирэ осло́с, ци гурувэ́с лэскирэс, савэ́ пынэ́ пэ дром, на ячкир лэн, нэ ґа́здэ лэн кхэтанэ́ лэ́са.
5. Пэ джувля́тэ нашты́ тэ явэ́л муршкано́ урибэ́н, и мурш нашты́ тэ урьелпэ дро джувликано урибэ́н, пал-дова́ со магирдо́ явэ́ла анги́л Растэ-Дэвлэ́стэ, Дэвлэ́стэ тырэстэ, кажно (сва́ко) ману́ш, кон кэрэ́ла дава́.
6. Ко́ли попэрлапэ ту́кэ пэ дром чириклякири (чириклэскири) гня́зда (ку́фо) пэ вари-саво́ кашт (дрэ́во), ци пэ пхув чириклорэнца, ци парнорэнца, и чириклы-дай бэшты пэ чириклорэндэ, ци пэ парнорэ, тэды на лэ да кхэтанэ́ чхаворэнца:
7. мэк да, а чхаворэ́н лэ пэ́скэ, соб (кай) ту́кэ тэ явэ́л мишто́, и соб (кай) тэ явэ́н длуга тырэ́ джиибна́скирэ дывэса́.
8. Ко́ли явэ́са тэ кэрэ́с нэво́ кхэр, тэды кэр перилы трусця́л пэ яго́ро (пэ краё) пэ тыри́ стрэ́ха (чхаки́н), соб (кай) тэ на лыджас ту́кэ рат пэ тыр кхэр, ке́ли вари-кон пэрэ́ла лэ́стыр.
9. На чхув дрэ пхув винагра́днико пэ́скиро дуе-семенгирэ сортэнца, соб (кай) тэ на кэрэ́с ту́кэ прокошно́ саро́ умалото мурьенгиро, савэ́ ту чхувэ́са дрэ пхув, кхэтанэ́ пэ́скирэ винаградникоскирэ барьякирдэнца (плодэнца).
10. На пахин (на пхарав пхув) пэ гурувэстэ и пэ ослостэ кхэтанэ́.
11. На ури и́дя, кэрды разнонэ тхавэндыр, вылна́тыр и ґандладэстыр (лёностыр) кхэтанэ́.
12. Кэр пэ́скэ кисточки пэ штар вэ́нглы пэ тыро́ урибэ́н, савэ́са ту учхакирэсапэ.
13. Ко́ли кон лэ́ла ромня́, и заджа́ла кэ ёй, и ёв лэ́ла тэ бидыкхэл ла,
14. и ёв явэ́ла тэ бангякирэл ла дро биладжаипэ́н, и мэкэ́ла пал ла́тэ налачхи мавлы́н (малва), и пхэнэ́ла: “Мэ лыём адалья ромня́, и загиём кэ ёй, и на латхём ла́тэ чхаитко”,
15. тэды дад тэрниньконэ-чхакиро и дай ла́кири мэк тэ лэн и тэ вылыджан чхаитко досыкаибэн кэ форо́скирэ пхурыдыра́, кэ по́рта (кэ вра́ты);
16. и дад тэрниньконэ-чхакиро пхэнэ́ла пхурыдырэнгэ: “Чха мирья мэ отдыём палоро́м адалэ́ манушэ́скэ, и акана́ ёв ла на камэ́ла,
17. и ґа́да, ёв бангякирэла ла дро биладжаипэ́н, ракири́: ‘Мэ на латхём тырэ́ чхатэ чхаитко.’ И чхувэ́на и́дя анги́л форо́скирэ пхурыдырэндэ.”
18. Тэды пхурыдыра́ долэ́-форо́скиро мэк тэ лэн ромэс, и тэ чхувэ́н ка́ра пэ лэ́стэ,
19. и тэ чхувэ́н пэ лэ́стэ шэл шэ́кели руп намирья (пени), и тэ отдэ́н ловэ́ дадэ́скэ тэрниньконэ-чхакирэскэ пал дова́, со ёв мэкця́ налачхи мавлы́н пал Израилёскирэ чхатэ; ёй мэк тэ ячэ́лпэ лэ́скирэ ромня́са, и ёв нашты́ (на могинэ́ла) тэ розджалпэ ла́са дро саро́ пэ́скиро джиибэ́н.
20. Ко́ли дова́, со сыс пхэндло́, явэ́ла дро чачипэ́н, и на явэ́ла чхаитко досыкаибэн тэрнэ́ джувля́тэ (отроковицатэ),
21. то тэрня джувля́ мэк тэ янэ́н кэ ла́кирэ-дадэ́скирэ кхэрэ́скирэ вудара́, и адалэ́-форо́скирэ мануша́ замарэна ла барэ́нца кэ мэрибэ́н; пал-дова́ со ёй кэрдя́ ладжаипнаскиро рэ́ндо машки́р Израилё, кэрдя́ биладжаипэ́н дро пэ́скирэ-дадэ́скиро кхэр; и адя́кэ вытрадэ фуипэ́н пэ́стыр.
22. Ко́ли латхно явэ́ла, со вари-кон сыс пашто́ палоромитконэ джувля́са, то трэй тэ отдэс мэрибна́скэ дуе́н, и муршэ́с, саво́ исыс пашто́ джувля́са, и джувля́; и адя́кэ вытрадэ фуипэ́н Израилёстыр.
23. Ко́ли явэ́ла тэрны́ патывалы́ джувлы́ ангрустякирды (зарэнчындлы) ромэскэ, и вари-кон дыкхэлапэ ла́са дро фо́ро и пасёла ла́са,
24. тэды дуе́н лэн янэ́н кэ долэ́-форо́скири по́рта, и замарэ́н (умарэн) лэн барэ́нца кэ мэрибэ́н: тэрня джувля́ (отроковица) пал дова́, со ёй на годлыя дро фо́ро, а муршэ́с пал дова́, со ёв чхудя́ тэлэ́ паты́в пэ́скирэ-пашатунэскирэ ромнякири: и адя́кэ вытрадэ фуипэ́н пэ́стыр.
25. Ко́ли вари-кон пэ фэ́лда дыкхэлапэ ангрустякирдяса (обрэнчындляса) и, ухтылы ла, пасёла ла́са, тэ отдэ́н мэрибна́скэ екхэ муршэ́с, саво́ пашто́ сыс ла́са,
26. а тэрнэ́ джувля́кэ ничи́ на кэр; пэ ла́тэ нанэ банг кэ мэрибэ́н: пал-дова́ со дава́ исын дова́-паць, сыр ко́ли бы вари-кон тэ ґаздэлпэ пэ пэ́скирэ пашатунэстэ и тэ замарэ́л лэс;
27. пал-дова́ со ёв пирилыя ла пэ фэ́лда, и усае́кх, ко́ли тэрны́ патывалы́ джувлы́ ангрустякирды годлыя, нэ на сыс конэ́скэ тэ зракхэ́л ла.
28. Ко́ли вари-кон дыкхэлапэ патывалэ́ джувля́са наангрустякирдяса, и ухтылэ́ла ла и пасёла ла́са, и дыкхэ́на лэн,
29. то тэды мурш, саво́ сыс пашто́ ла́са, исын банго́ тэ дэл патывалэ́-джувлякирэ дадэ́скэ пандждэша́ шэ́кели руп, а ёй мэк тэ явэ́л лэ́скирэ ромня́са, пал-дова́ со ёв чхудя́ тэлэ́ ла́кири паты́в; саро́ пэ́скиро джиибэ́н ёв нашты́ (на могинэ́ла) тэ розлыджалпэ ла́са.
30. Никонэ́скэ нашты́ тэ лэл пэ́скирэ дадэ́скирэ ромня́ и тэ отчхакирэл яго́ро (краё) пэ́скирэ дадэ́скирэ урибнастыр.
9. Мэ нашадём пэс, мэ сом пхагирдо́, со нанэ буты́р; мэ да́ва ґондя́ годла́са пхарипнастыр пэ миро ило́.
10. Миро Раё Дэ́вла, анги́л Ту́тэ дова́, со ма́нгэ исын пир ило́, Ту́тыр исын на гарадо́, сыр мэ да́ва ґондя́ (уздыхинава).
11. Миро ило́ марэлапэ дукханэс, мири́ зор мэкэ́ла ман; аж мирэ́ якха́ на дыкхэ́на буты́р яснэс.
12. Мануша́, савэ́нгэ со́мас дро́го мэ, и мирэ́ дру́ги (мала́) исын тэрдэ́ криг мирэ́ дукхатыр, мирэ́ сэмэнцы дурьёна ма́ндыр.
13. И одолэ́, савэ́ родэ́на миро ди тэ хасякирэ́н, чхувэ́на фэля́ тэ ухтылэ́н; и кодолэ́, савэ́ родэ́на чорипэ́н пэ ма́ндэ, ракирэ́на пал миро хасибэ́н, и ёнэ пхэрдэ́ дывэсэнца россэндинэна пал хохаибэ́н пэ ма́ндэ.
14. Нэ мэ сом сыр кашуко, мэ ничы́ на шунава, и мэ сом сыр лало́ ману́ш, кон на отпхандэла пэ́скиро муй.
15. И мэ сом сыр ману́ш, саво́ на шунэ́ла, и савэскири чиб на дэ́ла ра́да тэ отпхэнэл.
16. Нэ Мэ ужакирава лачхипэ́н Ту́тыр, Раё Дэ́вла, Ту отпхэнэса ма́нгэ, Раё Дэ́вла, Дэвэ́л миро!
17. И мэ пхэндём: “Мэк тэ на радынэ́нпэ одолэ́, ке́ли мири́ ґэро́й обштавэлапэ.
18. Мэ сыг пэрава и мири́ дукх ние́кхвар на мэкэ́ла ман.
19. Пал-дова́ со мэ приджинава мири́ банг, мири́ годы́ пхадёла пал миро грэ́хо.
20. Нэ мирэ́ вэ́рги исын джидэ́ и зоралэ́, и исын дасавэ́, савэ́ бидыкхэна ман ни палсо́:
21. дава́ исын ёнэ, кон отдэ́ла палэ чорипнаса пал миро лачхипэ́н; пал-дова́ со мэ родава джидо́ лачхипэ́н.
22. О, Раё Дэ́вла, на мэк ман! О, Миро Дэ́вла, на дурьёв ма́ндыр.
26. Чачунэскэ трэй тэ выкэдэл малэн (другэн), пал-дова́ со фуй мануша́ лыджа́на криг дромэ́стыр.
27. Набутитко ману́ш на пэкэла мас, со ёв дорэсця́ пэ старибэн (охота), нэ добусово ману́ш барьякирэ́ла миштыпэ́н.
28. Чачуно́ дром лыджа́ла кэ джиибэ́н, пэ лэ́скирэ дроморэ нанэ мэрибэ́н.
1. Екхвар Ису́со сыс тэрдо́ пэ брэ́го пашы́л Генисаретоскиро зеро (озеро), а мануша́ тасавэнаспэ, соб (кай) тэ явэ́н пашылэды́р кэ Ёв и кэ Дэвлэ́скиро лав;
2. и Ёв дыкхця́ дуй барки (лодки) пашы́л зеро (озеро); а мачхибнарья выгинэ́ лэ́ндыр и халькирэнас кхудя (сети).
3. Ису́со загия́ дрэ екх ба́рка, сави́ сыс Симоноскири, и мангдя́ Лэс тэ плывинэл (тэ дэл плима) криг на́бут дурэды́р брэгостыр; и ке́ли Ёв бэсця́, лыя́ тэ сыклякирэ́л манушэ́н.
4. А ке́ли Ису́со кончындя тэ сыклякирэ́л, тэды пхэндя́ Симоноскэ: “Отплывин (дэ плима дурэдыр), кай исын хор и зачхурдэ пэ́скирэ кхудя, соб (кай) вари-со тэ старэн.”
5. И Си́моно отпхэндя́ Лэ́скэ: “Сыклякирибна́скиро! Амэ кэрдя́м буты́ сари́ рат, и нисо́ амэ на ухтылдям; нэ пал-дова́, сыр Ту ракирэ́са, мэ кэра́ва адя́кэ.”
6. И ёнэ зачхурдынэ кхудя и ухтылдэ́ ада́кицы бут мачхэ́, со лэ́нгирэ кхудя лынэ́ тэ кушэн.
7. И ёнэ лынэ́ тэ сыкавэ́н вастэ́нца пэ́скирэ малэнгэ (другэнгэ) явирэ баркатыр, соб (кай) тэ явэ́н и тэ дзн васт лэ́нгэ; кодолэ́ явнэ́ и пхэрдякирдэ адя́кэ дуй барки, со ёнэ лынэ́ лынэ́ тэ тасадён.
8. Ке́ли Си́моно дыкхця́ дава́, ёв пыя́ пэ анги́л Исусо́стэ пэ чанга́ и пхэндя́: “Мэк ман, Раё Дэ́вла, мэ сом грэхи́тко ману́ш!”
9. Си́моно и яви́р мануша́, савэ́ сыс Лэ́са, дивиндлэ́пэ дара́са пэ дасаво мачхэнгиро ухтылыбэн;
10. Яково и Иа́но, Заведеёскирэ чхавэ́, мала́ Симоноскэ, дивиндлэ́пэ адя́кэ-паць. Тэ́ньци Ису́со пхэндя́ Симоноскэ: “На, андырша, Симоне, Мэ кэра́ва адя́кэ, со ту явэ́са тэ старэс манушэ́н.”
11. И ке́ли ёнэ вытырдынэ дуй барки пэ брэ́го, то ёнэ ячкирдэ́ саро́, и гинэ́ пал Лэ́стэ.
12. Екхвар Ису́со сыс дро екх фо́ро; сыс одо́й екх ману́ш, саво́ сыс саро́ дрэ прока́за и, ке́ли ёв дыкхця́ Исусо́с, то ёв пыя́ пэ пхув мо́са, и лыя́ тэ мангэ́л Лэс, ракири́: “Раё Дэ́вла, ко́ли Ту камэ́са, могинэ́са тэ высастякирэс ман.”
13. Ису́со протырдыя́ васт, чиладя́ лэс и пхэндя́: “Кама́м, ту какана́ сан жужо́ (чысто).” И ада́й жэ ёв сыс высастякирдо проказатыр.
14. И Ёв припхэндя́ Лэ́скэ никонэ́скэ тэ на сыкадёл, а тэ джал тэ сыкавэ́л пэс раша́скэ и тэ янэл свэ́нто дыибэ́н пал пэ́скиро высастякирибэн, со припхэндя́ Мо́йза, сыр допхэныбэ́н манушэ́нгэ.
15. Нэ мавлы́н пал Исусо́стэ розджалапэ уса́ буты́р, и буты́р, и бут бут мануша́ явэ́нас тэ шунэ́н Лэс, тэ састякирэнпэ Лэ́стэ пэ́скирэ насвалыпнэндыр.
16. И Ёв джа́лас пир штэ́ты, кай на сыс мануша́, и мангдя́пэ Дэвлэ́скэ.
Romani Bible Baltic 2019
United Bible Societies for the Baltic Romani Mission