Bible in one year March 5Numbers 7:1-891. Ке́ли Мо́йза чхудя́ ша́тра (ски́ния), и помакхця ла, и обсвэнцындя ла и алта́рё, и саро́, со трэй ваш лэ́скэ, и помакхця лэн и обсвэнциндя лэн,2. то явнэ́ Израилёскирэ барыдыра́, шэралэ́ лэ́нгирэ чэкарьендыр (сэмействэндыр), барыдыра́ пэ ро́дыцы, савэ́ пиригинэнас, и ёнэ яндлэ́ свэ́нта дыибэна́,3. и яндлэ́ пэ́скирэ да́ры анги́л Растэ-Дэвлэ́стэ, шов зачхакирдэ ґлябы (повозки) и дэшуду́й гурувэ́н, пир екх ґлябо дуендыр барыдырэндыр и пир екхэ гурувэстэ кажнонэ́ манушэ́стыр, и чхудэ́ дава́ саро́ анги́л ша́тра (ски́ния).4. И пхэндя́ Рай Дэвэ́л Мойза́скэ дасавэ́ лава́:5. “Лэ дава́ лэ́ндыр, дава́ явэ́ла трэй, соб (кай) тэ кэрэ́н бутя́ пашы́л скэдыибна́скири ша́тра; и отдэ́ дава́ Левитэ́нгэ, дыкхи́ пир лэ́нгири буты́.”6. И лыя́ Мо́йза ґлябы и гурувэ́н, и дыя́ лэн Левитэ́нгэ:7. дуй ґлябы и штарэн гурувэ́н дыя́ Гирсоноскирэ чхавэ́нгэ пир лэ́нгири буты́:8. и штар вурдэна́ и охто́ (бидуе́нгиро дэш) гурувэ́н дыя́ Мерарискирэ чхавэ́нгэ пир лэ́нгири буты́, тэл Ифамаро́скиро дыкхибэ́н, Аароно́скирэ-чхавэ́скирэ, саво́ сыс раша́й;9. а Каафоскирэ чхавэ́нгэ на дыя́, пал-дова́ со буты́ лэ́нгири сыс тэ лыджа́н свэ́нто штэ́то – пэ псикэ́ ёнэ сыс бангэ́ тэ лыджа́н.10. И яндлэ́ барыдыра́ свэ́нто дыибэ́н ваш алта́рё тэ обсвэнцынэн лэс дрэ лэ́скиро макхибнаскиро дывэ́с, и чхудэ́ барыдыра́ пэ́скиро яныбэ́н анги́л алта́рё.11. И пхэндя́ Рай Дэвэ́л Мойза́скэ: “Пир екхэ барыдырэстэ пэ дывэ́с мэк тэ янэ́н пэ́скирэ да́ры тэ обсвэнцынэн алта́рё.”12. Дро пэ́рво дывэ́с яндя́ пэ́скиро о Наасо́но, Аминадаво́скиро чхаво́, Юда́скирэ родыцо́стыр;13. яныбэ́н (да́ры) лэ́скиро сыс: екх рупуво́ баро́ чаро́, важындя ёв шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудо пшэничнонэ яржэса, пиримешындло елеёса, дро маруно́ яныбэ́н,14. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),15. екх телянто, екх бакро, екхэ-бэршытко бакроро́, дро цэ́ло схачкирибэ́н,16. екх бузно дрэ свэ́нто дыибэ́н пал грэ́хо,17. и дро раманёно (ми́рно) свэ́нто дыибэ́н дуе́н гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да, исын Аминадавоскирэ-чхавэ́скиро, Наасоно́скиро яныбэ́н.18. Пэ яви́р дывэ́с яндя́ да́ры о Нафанаило, Цуароскиро чхаво́, барыдыро́ Исахароскирэ родыцо́стыр;19. ёв яндя́ пэ́скирэ да́ры: екх рупуво́ баро́ чаро́ (блюдо), саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудо пшэничнонэ яржэса, перемешындло елеёса, дро маруно́ яныбэ́н,20. екх сувнакуны́ кадила дрэ дэш шэ́кели, савэ́ сыс чхудэ́ пхэрдэ́с фимиамоса (гудлэ́ смолэнца),21. екхэ телянтос, екхэ бакрэ́с, екхэ́с екхэ-бэршытконэ бакрорэс, ваш цэ́ло схачкирибэ́н,22. екхэ бузнэ́с (козлос) дро свэ́нто дыибэ́н пал грэ́хо,23. и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэн бакрорэ́н; ґа́да, сыс Цуароскирэ-чхавэ́скиро, Нафанаилоскиро яныбэ́н.24. Пэ три́то дывэ́с барыдыро́ Завулоноскирэ-чхавэ́нгиро, о Елиаво, Хелоноскиро чхаво́, яндя́ пэ́скирэ да́ры.25. Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудо пхэрдэ́с пшэничнонэ яржэса, перемешиндло елеёса, дро маруно́ яныбэ́н,26. екх сувнакуны́ кадила дрэ дэш шэ́кели, чхудэ́ пхэрдэ́с фимиамоса (гудлэ́ смолэнца),27. екхэ гуруво́рэс, екхэ бакрэ́с, екхэ екхэ-бэршытконэ бакрорэс, ваш цэ́ло схачкирибэ́н,28. екхэ бузнэ́с дро свэ́нто дыибэ́н пал грэ́хо,29. и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн (козлэн), панджэ́ екхэ-бэршытконэн бакрорэ́н; ґа́да, сыс Хелоновоскирэ-чхавэ́скиро, Елиавоскиро яныбэ́н.30. Пэ шта́рто дывэ́с барыдыро́ Рувимо́скирэ-чхавэ́нгиро, о Елицуро, Шэдеуроскиро чхаво́, яндя́ пэ́скирэ да́ры.31. Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,32. екх сувнакуны́ кадила дрэ дэш шэ́кели, сави́ сыс чхуды́ пхэрдэ́с фимиамоса (гудлэ́ смолэнца),33. екх гуруворо, екх бакро, екх екхэ-бэршытко бакроро́, ваш цэ́ло схачкирибэ́н,34. екх бузно дро свэ́нто дыибэ́н пал грэ́хо,35. и дро раманёно (ми́рно) свэ́нто дыибэ́н дуе́н гурувэ́н, панджэ́ бакрэ́н, панджэ́ бузнен и панджэ́ екхэ-бэршытконэ бакрорэ́н; ґа́да, сыс Шэдеуроскирэ-чхавэ́скиро, Елицуроскиро яныбэ́н.36. Пэ па́нджто дывэ́с барыдыро́ Симеоноскирэ-чхавэ́нгиро, о Шэлумиило, чхаво́ Цуришадоскиро.37. Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,38. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),39. екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н;40. екх бузно дро свэ́нто дыибэ́н пал грэ́хо,41. и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, и панджэ́ екхэ-бэршытконэн бакрорэ́н; ґа́да, сыс Цуришадоскирэ-чхавэ́скиро, Шэлумиилоскиро яныбэ́н.42. Пэ шо́вто дывэ́с барыдыро́ Гадо́скирэ-чхавэ́нгиро, о Елиасафо, Регуилоскиро чхаво́ яндя́.43. Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир шэ́келё свэ́нто, чхудэ́ пхэрдэ́с пшэничнонэ яржэса, перемешындла алеёса, дро маруно́ яныбэ́н,44. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),45. екх гуруворо (телянто), екх бакро, екх екхэ-бэршытко бакро, дро цэ́ло схачкирибэ́н,46. екх бузно (козло) дро свэ́нто дыибэ́н пал грэ́хо,47. и дро раманёно (ми́рно) свэ́нто дыибэ́н: дуе гурувэ́н, панджэ́ бакрэ́н, панджэ́ бузнэн и панджэ́ екхэ-бэршытконэн бакрорэ́н; ґа́да, сыс Регуилоскирэ-чхавэ́скиро, Елиасафоскиро яныбэ́н.48. Пэ эфта́то дывэ́с барыдыро́ Ефремо́скирэ-чхавэ́нгиро, о Елишамо, Амиудоскиро чхаво́.49. Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, пиримешындло елеёса дро маруно́ яныбэ́н,50. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),51. екх гуруворо (телянто), екх бакро, екх екхэ-бэршытко бакроро́ ваш цэ́ло схачкирибэ́н,52. екх бузно дро свэ́нто дыибэ́н пал грэ́хо,53. и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да, сыс Амиудоскирэ-чхавэ́скиро, Елишамоскиро яныбэ́н.54. Пэ охто́то дывэ́с барыдыро́ Манасия́скирэ-чхавэ́нгиро, о Гамалиило, Педацуроскиро чхаво́.55. Яныбэ́н лэ́скиро сыс: екх рупуво́ баро́ чаро́, саво́ важындя шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,56. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),57. екх гуруворо (телянто), екх бакро, екх екхэ-бэршытко бакрорэ, ваш цэ́ло схачкирибэ́н,58. екх бузно дро свэ́нто дыибэ́н пал грэ́хо,59. и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэн бакрорэ́н; ґа́да, сыс Педацуроскирэ-чхавэ́скиро, Гамалиилоскиро яныбэ́н.60. Пэ еня́то (биекхэ́скиро дэ́што) дывэ́с барыдыро́ Вениаминовоскирэ-чхавэ́нгиро, о Авидано, Гидеониёскиро чхаво́.61. Яныбэ́н лэ́скиро сыс: екх рупувэ́ баро́ чаро́, саво́ важындя шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, пиримешындло елеёса, дро маруно́ яныбэ́н,62. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),63. екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н,64. екх бузно дро свэ́нто дыибэ́н пал грэ́хо,65. и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да сыс Гидеониёскирэ-чхавэ́скиро, Авиданоскиро яныбэ́н.66. Пэ дэ́што дывэ́с барыдыро́ Дано́скирэ-чхавэ́нгиро, о Ахиезэро, Амишадаёскиро чхаво́.67. Яныбэ́н лэ́скиро сыс: екх рупувэ́ баро́ чаро́, саво́ важындя шэл трия́нда шэ́кели, екх рупуво́ тахта́й, эфта́ дэша шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,68. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),69. екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н,70. екх бузно дро свэ́нто дыибэ́н пал грэ́хо,71. и дро раманёно (ми́рно) свэ́нто дыибэ́н ми́рно дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэн бакрорэ́н; ґа́да, сыс Амишадаёскирэ-чхавэ́скиро, Ахиезэроскиро яныбэ́н.72. Пэ дэшупэрво дывэ́с барыдыро́ Асироскирэ-чхавэ́нгиро, о Пагиило, Охраноскиро чхаво́ яндя́.73. Яныбэ́н лэ́скиро сыс: екх рупуво́ баро́ чаро́, саво́ важындя шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, пиримешындло елеёса, дро маруно́ яныбэ́н,74. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),75. екх гуруворо (телянто), екх бакро, екх екхэ-бэршытко бакроро́, дро цэ́ло схачкирибэ́н,76. екх бузно дро свэ́нто дыибэ́н пал грэ́хо,77. и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн (козлэн), панджэ́ екхэ-бэршытконэ бакрорэ́н; ґа́да, сыс Пагиилоскиро, Охраноскирэ-чхавэ́скиро яныбэ́н.78. Пэ дэшуявир дывэ́с барыдыро́ Нефалимоскирэ-чхавэ́нгиро, о Ахиро, Энаноскиро чхаво́.79. Яныбэ́н лэ́скиро сыс: екх рупуво́ баро́ чаро́, саво́ важынэла шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,80. екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),81. екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н,82. екх бузно дро свэ́нто дыибэ́н пал грэ́хо,83. и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да, сыс Энаноскирэ-чхавэ́скиро, Ахироскиро яныбэ́н.84. Акэ, сыс Израилёскирэ барыдырэндыр яныбэ́н тэ обсвэнцынэн алта́рё дро дывэ́с, ке́ли помакхнэ лэс: дэшуду́й барэ́ чарэ́, дэшуду́й рупувэ́ тахтая́, дэшуду́й сувнакунэ́ кадилы;85. пир шэл тэ трия́нда шэ́кели руп дро кажно чаро́, и пир эфтадэша́ дро кажно тахта́й: и адя́кэ саро́ руп дрэ далэ́ кхорэ́ (сасу́ды) сыс дуй тысёнцы штаршэла́ шэ́кели, пир свэ́нто шэ́келё;86. сувнакунэ́ кадилы, чхудэ́ пхэрдэ́с фимиамоса (гудлэ́ смолэнца), дэшуду́й, дрэ кажно кадила пир дэш шэ́кели, пир свэ́нто шэ́келё: саро́ сувнака́й дрэ кадилы сыс шэл тэ биш шэ́кели.87. Дро цэ́ло схачкирибэ́н сыс дэшуду́й гуруворэ (телянты), барэ́ кхэритконэ́ мурдалэстыр (ското́стыр), дэшуду́й бакрэ́, дэшуду́й екхэ-бэршытконэн бакрорэ и пашы́л лэ́ндэ маруно́ яныбэ́н, и дро свэ́нто дыибэ́н пал грэ́хо дэшуду́й бузнэн,88. и дро раманёно (ми́рно) свэ́нто дыибэ́н саро́ кхэритконэ́ мурдалэ́ндыр (барэ́ ското́стыр) сыс биш тэ штар гуруворэ (телянты), шовдэша́ бакрэ́, шовдэша́ бузнэ, шовдэша́ екхэ-бэршытконэ бакрорэ. Акэ, саво́ сыс яныбэ́н тэ жужакирэл алта́рё пало́ лэ́скиро макхибэн.89. Ке́ли Мо́йза заджалас дрэ скэдыибна́скири ша́тра, соб (кай) тэ ракирэ́л Ра́са-Дэвлэ́са, то ёв шундя́ зан (глос), сави́ лэ́скэ ракирдя́ дэнкостыр (крышкатыр), саво́ сыс пэ ковчэго сыкадыибнаса (откровениёса) машки́р дуй херувимы, и Ёв ракирдя́ лэ́скэ.Numbers 8:1-261. И пхэндя́ Рай Дэвэ́л Мойза́скэ дасавэ́ лава́:2. “Дэ тэ джинэ́л Аароно́скэ и пхэн лэ́скэ: ‘Ке́ли ту явэ́са тэ захачкирэс лампады, тэды пэ англатуны риг дро момолы́тко (свети́льнико) трэй, соб (кай) тэ хачон эфта́ лампады.’”3. Ааро́но адя́кэ и кэрдя́: пэ англатуны риг дро момолы́тко (свети́льнико) захачкирдя лэ́скирэ лампады, сыр пхэндя́ Мойза́скэ.4. И ґа́да, сыр кэрдо́ сыс момолы́тко: ёв сыс чэкано сувнака́стыр, лэ́скирэ дэсторэстыр (ґэрьятыр) и кэ лулудя́ (цвэты) ёв сыс чэкано. Пир сыкаибэ́н (образцо) дасаво-паць, саво́ сыкадя́ Рай Дэвэ́л Мойза́скэ, ёв кэрдя́ момолы́тко.5. И пхэндя́ Рай Дэвэ́л Мойза́скэ дасавэ́ лава́:6. “Лэ Левитэ́н Израилёскирэ чхавэ́ндыр, и выжужакир лэн;7. а соб (кай) лэн тэ выжужакирэс, кэр лэ́нца адя́кэ: обчхув лэн жужакирибнаскирэ (чыстонэ) пане́са, и мэк ёнэ тэ вымуравэн пэ́скирэ (выбриинэн) сарэ́ маса́ мурадлуняса (бритваса) и тэ выморэн пэ́скирэ урибэна́, и явэ́на ёнэ жужэ́ (чыста);8. и мэк тэ лэн гуруво́рэс и кэ ёв маруно́ яныбэ́н, пшэнично яржо́, перемешындло елеёса, и явирэ гуруво́рэс лэ дро свэ́нто дыибэ́н пал грэ́хо;9. и ян Левитэ́н анги́л скэдыибна́скири ша́тра, и скэ́дэ саро́ скэдыибэ́н Израилёскирэ чхавэ́нгиро.10. И ян лэ́нгирэ Левитэ́н анги́л Растэ-Дэвлэ́стэ, и мэк тэ чхувэ́н упрэ́ Израилёскирэ чхавэ́ пэ́скирэ васта́ пэ Левитэндэ.11. А Ааро́но мэк тэ высвэнцынэл Левитэ́н анги́л Растэ-Дэвлэ́стэ Израилёскирэ чхавэ́ндыр, соб (кай) ёнэ тэ дынаринэ́н Ра́скэ-Дэвлэ́скэ;12. а Леви́ты мэк тэ чхувэ́н пэ́скирэ васта́ пэ телянтэнгиро шэро́, и ян екхэ́с дрэ свэ́нто дыибэ́н пал грэ́хо, а явирэ́с ваш цэ́ло схачкирибэ́н Ра́скэ-Дэвлэ́скэ, соб (кай) Левитэ́н тэ жужакирэн;13. и чхув Левитэ́н анги́л Аароностэ и анги́л лэ́скирэ чхавэ́ндэ, и ян лэн анги́л Растэ-Дэвлэ́стэ тэ высвэнцынэл.14. И адя́кэ роскэр (роскэдэ) Левитэ́н Израилёскирэ чхавэ́ндыр, соб (кай) Леви́ты тэ явэ́н Мирэ́.15. Пало́ дава́ Леви́ты заджа́на дрэ скэдыибна́скири ша́тра тэ кэрэ́н буты́, ке́ли ту лэн выжужакирэса и высвэнцынэса лэн, пал-дова́ со ёнэ отдынэ́ Ма́нгэ Израилёскирэ чхавэ́ндыр.16. Заме́ст (пэ штэ́то) сарэ́н англатунэн Израилёскирэ чхавэ́ндыр, кажно (сва́ко), савэ́ роскушэна дакири лочови́ (утроба), Мэ ла́ва лэн кэ Пэ;17. пал-дова́ со сарэ́ англатунэ́ (первенцы) Израилёскирэ чхавэ́ндыр исын Мирэ́, манушэ́стыр кэ кхэри́тко мурда́л (ското): дро дова́ дывэ́с, ке́ли Мэ хасякирдём сарэ́н англатунэн пэ Египто́скири пхув, Мэ освэнцындём лэн Пэ́скэ,18. и лыём Левитэ́н заме́ст (пэ штэ́то) сарэ́ англатунэ́ Израилёскирэ чхавэ́ндыр.19. И Мэ дыём Левитэ́н Аароно́скэ и лэ́скирэ чхавэ́нгэ, Израилёскирэ чхавэ́ндыр, соб (кай) ёнэ тэ лыджа́н свэ́нто буты́ пал Израилёскирэ чхавэ́ндэ пашы́л скэдыибна́скири ша́тра и тэ кэрэ́н буты́ ракхибнарьенца ваш Израилёскирэ чхавэ́нгэ, соб (кай) тэ на явэ́л пэ Израилёскирэ чхавэ́ндэ моро́во (мэрибнытка фра́нсы), ке́ли Израилёскирэ чхавэ́ тэ подджан кэ свэ́нто штэ́то.”20. И адя́кэ кэрдэ́ Мо́йза и Ааро́но и саро́ Израилёскирэ-чхавэ́нгиро скэдыибэ́н Левитэнца: сыр припхэндя́ Рай Дэвэ́л Мойза́скэ пал Левитэндэ, адя́кэ и кэрдэ́ лэ́нца Израилёскирэ чхавэ́.21. И выжужакирдэпэ Леви́ты, и вымордэ пэ́скирэ урибэна́ и высвэнцындя лэн Ааро́но анги́л Растэ-Дэвлэ́стэ, и выжужакирдя́ лэн Ааро́но, соб (кай) ёнэ тэ явэ́н жужэ́.22. Пало́ дава́ загинэ́ Леви́ты тэ кэрэ́н пэ́скирэ бутя́ дрэ скэдыибна́скири ша́тра анги́л Аароностэ и анги́л лэ́скирэ чхавэ́ндэ. Сыр пхэндя́ Рай Дэвэ́л Мойза́скэ пал Левитэндэ, адя́кэ и кэрдэ́ ёнэ лэ́нца.23. И пхэндя́ Рай Дэвэ́л Мойза́скэ дасавэ́ лава́:24. “Ѓа́да, исын Зако́но пал Левитэндэ: биш тэ панджэ́ бэршэ́ндыр и пхурэды́р ёнэ исын бангэ́ тэ лэн тэ дынаринэ́н (тэ служынэн) пэ буты́ пашы́л скэдыибна́скири ша́тра,25. а дрэ панджэша бэрш ёнэ исын бангэ́ тэ мэкэ́н пэ́скири буты́ и буты́р тэ на кэрэ́н буты́:26. тэды мэк ёнэ тэ дэн васт (тэ помогинэн) пэ́скирэ пшалэ́нгэ тэ рикирэ́н стрэ́га пашы́л скэдыибна́скири ша́тра, нэ тэ кэрэ́н буты́ мэк ёнэ кокорэ́ тэ на кэрэ́н; адя́кэ кэрэ́н Левитэнца, со пхэнэ́лапэ пал лэ́нгири буты́.”Psalms 31:1-51. Хоро́скирэ Дирижоро́скэ. Давидо́скиро Пса́лмо.2. Дрэ Ту́тэ, О Раё Дэ́вла, мэ родава гарадыипэн, мэк мэ ние́кхвар тэ на явав ладжакирдо́: зра́кх ман пир Тыро́ чачипэ́н.3. Бандёв и шун ракхунэс ман: зра́кх ман сы́гэс. Приракх ман сы́рбы дро зоралы́ ска́ла, зра́кх ман сы́рбы дрэ баруны тва́рдыма (диз).4. Пал-дова́ со Ту сан ваш ма́нгэ сыр мири́ ска́ла и мири́ баруны тва́рдыма (диз). Лы́джа ман и сыка́в дром ма́нгэ ваш Тыро́ лав.5. Выты́рдэ ман фэля́тыр (петля́тыр), со ёнэ чораханэ́с чхудэ́ пэ ма́ндэ, пал-дова́ со Ту сан миро зоралыпэ́н тэ приракхэс ман.Proverbs 11:4-64. Барвалыпэ́н на дэ́ла ни саво́ лачхипэ́н дро хасибны́тко дывэ́с, нэ чачипэ́н зракхэ́ла мэрибна́стыр.5. Чачипэ́н сыкавэ́ла дром бидошакирэ манушэ́скэ, нэ фуй мануша́ пэрэ́на пэ́скирэ фуипнастыр.6. Чачипэ́н зракхэ́ла дэвлытконэ́ манушэ́н, нэ напатяибнаскирэ пэрэ́на дрэ фэлы́ пэ́скирэ фрэнтыматыр, пал сави́ ёнэ традэнапэ.Marek 9:1-291. И Ёв ракирдя́ лэ́нгэ: “Чачэс, Мэ ракира́ва тумэ́нгэ: ада́й исын тэрдэ́ вари-савэ́, савэ́ на мэрэ́на, пака ёнэ дыкхэ́на, сыр явэ́ла Дэвлэ́скиро Кралипэ́н дрэ сари́ Лэ́скири зор.”2. Пир шов дывэса́ Ису́со лыя́ Пэ́са Пэтрис, Яково́с и Ианос и яндя́ лэн пэ вучи́ бэ́рга. Одо́й пэ якха́ сыкляибнытконэндэ Ёв парудыя:3. Лэ́скиро урибэ́н яця́ древа́н парно́, парнэдыр кажнонэ́ парныпнастыр дро свэ́то, со морибнаскиро (сукновало) могинэ́ла тэ кэрэ́л.4. Тэ́ньци сыкадынэ Или́я и Мо́йза, и ячнэ́ тэ ракирэ́н Исусо́са.5. Пэ́три пхэндя́ Исусо́скэ: “Равви, амэ́нгэ ада́й исын адя́кэ шука́р! Кэра́са ада́й трин ша́тры: екх Ту́кэ, екх Мойза́скэ и екх Илияскэ.”6. Дара́тыр ёв кокоро́ на джиндя́, со ракирдя́, пал-дова́ со ёнэ сыс дрэ бари дар.7. Нэ ада́й жа сыкадыя́ о́блоко, чхакирдя лэн и облокостыр роздыяпэ зан!: “Кадава́ исын Миро дро́го Чхаво́, Лэс шунэ́н!”8. И сарэ́ екха́тыр обдыкхнэ пашы́л и на дыкхнэ́ никонэ́с, апри́ч екхэ Исусо́стэ лэ́нца.9. Ке́ли ёнэ джа́нас тэлэ́ бэрга́тыр, Ису́со ангилприпхэндя лэ́нгэ, соб (кай) ёнэ ни конэ́скэ тэ на ракирэ́н, со ёнэ дыкхнэ́, пака Чхаво́ Манушэ́скиро на отджидёла мулэ́ндыр.10. Ёнэ ракхнэ дава́ дрэ пэ́стэ, а машки́р пэ́стэ бут мо́лы ракирдэ́ пал дава́, сыр тэ ґалён Лэ́скирэ лава́ ‘отджидёла мулэ́ндыр’.11. И пхучэнас Лэ́стыр, ракири́: “Со́скэ ж лылвари́тка (кни́жники) ракирэ́на, со Или́я англэды́р сыс банго́ (мусиндя) тэ явэ́л?”12. И Ёв отпхэндя́ лэ́нгэ: “Чачо́, со Или́я англэды́р сыс банго́ тэ явэ́л и тэ кэрэ́л саро́ нэвэ́стыр, сыр и исын чхиндло́ пал Чхавэ́стэ Манушэскирэстэ, со приявэлапэ Лэ́скэ бут тэ пирилыджал мэ́ньки, и со Ёв явэ́ла ладжакирдо́?13. Нэ Мэ ракира́ва тумэ́нгэ, со Или́я ужэ явдя́, и мануша́ кэрдэ́ Лэ́са, со сыс пэ ило́ лэ́ндэ, сыр дава́ и сыс чхиндло́ пал лэ́стэ.”14. Ке́ли ёнэ явнэ́ палэ кэ сыкляибны́тка, тэ́ньчи дыкхнэ́ пашы́л лэ́ндэ бут манушэ́н и лылваритконэн, савэ́ допхэнэнас лэ́нгэ.15. И екха́тыр (сра́зу), ке́ли сарэ́ мануша́ дыкхнэ́ Лэс, ёнэ дивиндлэ́пэ зоралэ́с, лынэ́ тэ подпрастан кэ Ёв тэ дэн “добридим” Лэ́скэ.16. “Пал со тумэ́ допхэнэна екх екхэ́скэ?” – пхуця́ Ису́со лэ́ндыр.17. И екх ману́ш отпхэндя́ Лэ́скэ: “Сыклякирибнарискиро, мэ яндём кэ Ту мирэ́ чхавэ́с, дрэ лэ́стэ загия́ на́лачхо ду́хо (фа́но) и чхаво́ на ракирэ́ла.18. И кай на́лачхо ду́хо (фа́но) лэс тэ на ухтылэл, то ёв равэла лэс тэлэ́, адава́ ману́ш мэкэ́ла пена мо́стыр, ёв скрежытынэла дандэнца и ячэ́лапэ сыр кашт. И адя́кэ мэ ракирдём Тырэ́ сыкляибнытконэ́нгэ, соб (кай) ёнэ тэ вытрадэн дава́ на́лачхо ду́хо (фа́но) яври́, нэ ёнэ на дынэ́ ра́да.19. Ису́со отпхэндя́ кадасавэ́ лавэ́нца: “О, напатяибнытко ро́до! Кицы́ Ма́нгэ тэ явав тумэ́нца? Ци бут Ма́нгэ тэ вырикирав тумэн? Янэ́н лэс кэ Мэ!”20. Тэ́ньци ёнэ яндлэ́ лэс кэ Ёв. И ке́ли ёв дыкхця́ Лэс, екха́тыр на́лачхо ду́хо (фа́но) зоралэ́с тринскирдя лэс, и ёв пыя́ пэ пхув и радяпэ, и мэкэлас пена мо́стыр.21. И пхуця́ Ису́со лэ́скирэ дадэ́стыр: “Сыр ґара́ (длу́гэс) дава́ кэрэ́лапэ лэ́са?” И ёв пхэндя́: “Тыкныбнастыр.22. И частэс ду́хо чхурдэлас лэс дрэ яг и дро пани́ тэ хасякирэ́л лэс. Нэ ко́ли ту дэ́са ра́да тэ кэрэ́с вари-со, мэк тэ явэ́л ту́кэ пэ ило́ тэ дэс васт амэ́нгэ.”23. О Ису́со пхэндя́ Лэ́скэ: “Ко́ли ту могинэ́са тэ патяс на́бут, саро́ могинэ́ла тэ явэ́л кодолэ́скэ, кон патя́ла.24. Екха́тыр (сра́зу) тэрнэ́-бэршэнгиро дад дыя́ го́дла и пхэндя́ ясвэ́нца: “Раё Дэ́вла! Мэ патя́ва, помогин Мирэ́ напатяибнаскэ!”25. Ке́ли Ису́со дыкхця́, со мануша́ лынэ́ тэ прастан кэ дава́ штэ́то, ёв штылякирдя на́лачхо ду́хо (фа́но), пхэни́ лэ́скэ: “Ду́хо (Фа́но) кашуко и муто (немо), мэ припхэнава ту́кэ, тэ джас криг лэ́стыр, и, соб (кай) буты́р тэ на заджас!”26. Тэ́ньци на́лачхо ду́хо (фа́но) дыя́ го́дла, тринскирдя зоралэ́с лэс и гия́ криг лэ́стыр. И адава́ ману́ш яця́ сы́рбы муло́, палдава́ бут мануша́ пхэндлэ́: “Ёв исын муло́.”27. Нэ Ису́со лыя́ тэрнэ́-бэршэнгирэс пало́ васт, помогиндя (дыя́ васт) тэ ґаздэлпэ и одова́ уштыя́ пэ ґэра́.28. Ке́ли Ису́со загия́ дро кхэр, Лэ́скирэ сыкляибны́тка екх пэ екх пхучнэ́ Лэ́стыр: “Со́скэ амэ на могиндям тэ вытрадас на́лачхо ду́хо (фа́но)?”29. И Ёв пхэндя́ лэ́нгэ: “Дасаво ду́хо (фа́но) вытрадэлапэ фэ́ни (то́ка) мангипнаса и постоса. Romani Bible Baltic 2019 Maintained by the United Bible Societies for the Baltic Romani Mission