Bible in one year
April 1

1. Ко́ли явэ́ла сэндытко рэ́ндо машки́р манушэ́ндэ, тэды мэк тэ янэ́н лэн пэ сэ́ндо и тэ россэндякирэн лэн, манушэ́с, саво́ исын на банго́, мэк лэс тэ отбичхавэн, а кон явэ́ла банго́, мэк лэс тэ сэндякирэн;
2. и ко́ли ману́ш, саво́ сыс банго́ явэ́ла мол марибнаскэ (дабэнгэ), тэды мэк сэнда́ри тэ пхэнэ́л тэ чхувэ́н лэс и тэ марэ́н лэс пашы́л пэ́стэ, дыкхи́ пир лэ́скири банг, пир гиныбэ́н;
3. штардэша́ мо́лы сашты́ (можна) тэ дэс лэ́скэ, нэ на буты́р, соб (кай) барэ́ марибнастыр пшал тыро́ тэ на явэ́л замардо анги́л тырэ́ якха́.
4. На замуздын муй гурувэскэ, ке́ли ёв молотинэла.
5. Ко́ли пша́ла дживэ́на кхэтанэ́, и екх лэ́ндыр мэрэ́ла, и на сыс лэ́стэ чхавэ́с, тэды мулэскирэ-пшалэскири ромны́ нашты́ тэ выджа́л палоро́м пал явирэ манушэ́стэ, нэ диверё ла́киро исын банго́ тэ джал кэ ёй и тэ лэл ла палоро́м, и тэ дживэ́л ла́са,
6. и англатуно́ пэ́рво бия́то (тыкномас), савэ́с ёй биянэ́ла, ячэ́лапэ лэ́скирэ-мулэскирэ пшалэ́скирэ лавэ́са, соб (кай) лэ́скиро лав тэ на хасёл дро Израилё.
7. Ко́ли ёв на закамэ́ла тэ лэл палоро́м пэскирья́ пшалэ́скирэ ромня́ пивля, тэды бори лэ́скири джа́ла кэ по́рта (кэ вра́ты), кэ пхурыдыра́, и пхэнэ́ла: “Диверё миро отпхэнэлапэ тэ рискирэ́л пэ́скирэ пшалэскиро лав дро Израилё, на камэ́ла тэ лэл ман палоро́м”;
8. тэды лэ́скирэ форо́скирэ пхурыдыра́ исын бангэ́ тэ кхарэ́н лэс и тэ доракирэн лэс, и ко́ли ёв тэрдёла и пхэнэ́ла: “Мэ на кама́м тэ лав ла”,
9. тэды бори лэ́скири тэ джал кэ ёв анги́л пхурыдырэнгирэ якха́, и злэла лэ́скири тырах лэ́скирэ ґэрьятыр, и чунгардэла лэ́скэ дро муй, и пхэнэ́ла: “Адя́кэ кэрэ́на манушэ́са, саво́ на чхувэ́ла палэ ро́до пэ́скирэ пшалэ́скирэ кхэрэ́скэ”,
10. и дэ́на лэ́скэ лав дро Израилё: “Кхэр розуридэскиро.”
11. Ке́ли марэнапэ машки́р пэ́стэ дуй мурша́, и ромны́ екхэскири подджа́ла, соб (кай) тэ отлэл ромэс пэ́скирэс манушэ́скирэ вастэ́ндыр, саво́ марла лэс, и, вытырдыи пэ́скиро васт, ухтылэ́ла лэс пал ладжаво штэ́то,
12. тэды отчингир ла́кэ васт: мэк тэ на тангинэ́л ла якх тыри́.
13. Дрэ тыри́ саква (сумка) нашты́, соб (кай) тэ явэ́л дуй гири, бари и тыкны;
14. дро тыро́ кхэр нашты́, соб (кай) тэ явэ́л дуй эфы, бари и тыкны;
15. гиря ту́тэ мусинэла тэ явэ́л чачипнаскири и чачуны́, и эфа ту́тэ трэй, соб (кай) тэ явэ́л чачипнаскири и чачуны́, соб (кай) тэ явэ́н длуга дывэса́ тырэ́ пэ пхув, сави́ Рай Дэвэ́л, Дэвэ́л тыро́, дэ́ла ту́кэ;
16. пал-дова́ со магирдо́ явэ́ла анги́л Растэ-Дэвлэ́стэ, Дэвлэ́стэ тырэстэ, кажно (сва́ко) ману́ш, саво́ кэрэ́ла хохаибэ́н.
17. Ри́пир, сыр кэрдя́ ту́са Амалико пэ дром, ке́ли тумэ́ гинэ́ Египто́стыр:
18. сыр ёв стрэниндя тут пэ дром, и мардя сарэ́н пала́л пал ту́тэ, савэ́ сыс бизорья́кирэ, ке́ли ту кхиныян и яця́н бизорья́киро, и ёв на задарандыя Дэвлэ́стыр;
19. и палдава́, ке́ли Рай Дэвэ́л, Дэвэ́л тыро́, штылякирэла тут сарэ́ тырэ́ вэргэ́ндыр сарэ́ ригэ́ндыр, пэ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра, соб (кай) тэ лэс ла, злэ (скхос) рипирибэ́н Амаликоскиро тэл болыбна́стыр; на бистыр.
1. Ке́ли ту явэ́са пэ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра, и явэ́са тэ лэс ла, и лэ́са тэ дживэ́с пэ ла́тэ;
2. тэды лэ пэ́рва сарэ́ барьякирдэ́ (пло́ды) пхувья́кирэ, савэ́ ту дорэсэса тырэ́ пхувья́тыр, сави́ Рай Дэвэ́л, Дэвэ́л тыро́, дэ́ла ту́кэ, и чхув дро кхудо (корзина), и джа́ пэ дова́ штэ́то, саво́ Рай Дэвэ́л, Дэвэ́л тыро́, выкэдэ́ла, соб (кай) тэ явэ́л одо́й лав Лэ́скиро;
3. и яв кэ раша́й, саво́ явэ́ла дрэ долэ́ дывэса́, и пхэн лэ́скэ: “Ададывэ́с мэ роспхэнава анги́л Растэ-Дэвлэ́стэ, Дэвлэ́стэ тырэстэ, со мэ загиём пэ дая́ пхув, сави́ Рай Дэвэ́л совлахадя́ амарэ́ дадэ́нгэ тэ дэл амэ́нгэ.’”
4. Раша́й лэ́ла кхудо тырэ́ вастэ́стыр, и чхувэ́ла лэс анги́л Ра́скирэ-Дэвлэ́скиро, тырэ́ Дэвлэ́скиро алта́рё.
5. Ту отпхэн и пхэн анги́л Растэ-Дэвлэ́стэ, Дэвлэ́стэ тырэстэ: ‘Дад миро сыс Арамеянино, саво́ лодыя, и гия́ дро Еги́пто и лыя́ тэ дживэ́л одо́й набутэ манушэ́нца, и выгинэ́ одо́й лэ́стыр барэ́ мануша́, зоралэ́ и бут;
6. нэ Египтя́ни кэрдэ́ фуипэ́н амэ́нгэ, и притасавэнас амэн, и чхувэ́нас пэ амэ́ндэ пхарэ́ бутя́;
7. и дыям амэ го́дла кэ Рай Дэвэ́л, Дэвэ́л амарэ́-дадэ́нгиро, и шундя́ Рай Дэвэ́л амари́ го́дла, и дыкхця́ амари́ би́да, буты́ амари́ и притасаибэн амаро́;
8. и вылыджия́ амэн Рай Дэвэ́л Египто́стыр зоралэ́ вастэ́са и протырдынэ псикэса, барэ́ страхаса, знамение́нца (ґертыкэ́нца) и дивэнца,
9. и яндя́ амэн пэ дава́ штэ́то, и дыя́ амэ́нгэ дая́ пхув, пхув пэ сави́ тхадэ́ла тхуд и авги́н;
10. и адя́кэ, мэ яндём пэ́рва барьякирдэ́ (начатки плодэнгирэ) пхувья́тыр, сави́ Ту, Раё Дэ́вла, дыя́н ма́нгэ.” И чхув дава́ анги́л Растэ-Дэвлэ́стэ, Дэвлэ́стэ тырэстэ, и поклонинпэ (кэр шэрэ́са) анги́л Растэ-Дэвлэ́стэ, Дэвлэ́стэ тырэстэ,
11. и ра́дынпэ пал саро́ лачхипэ́н, саво́ Рай Дэвэ́л, Дэвэ́л тыро́, дыя́ ту́кэ и кхэрэ́скэ тырэ́скэ, ту и Левито, и ману́ш, саво́ явдя́ явирэ рига́тыр, саво́ явэ́ла ту́тэ.
12. Ке́ли ту отлэса (кончынэса тэ отчхувэс дрэ риг) сарэ́ дэшэнгирья (дэшта паша́), со дэ́ла тыри́ пхув пэ три́то бэрш, дэшэнгиро бэрш, и отдэса Левитоскэ, манушэ́скэ, саво́ явдя́ явирэ рига́тыр, пиротоскэ (сиротаскэ) и пивлякэ (удовакэ), соб (кай) ёнэ тэ хан дрэ тырэ́ кхэра́ и тэ чалён,
13. то тэ́ньчи пхэн анги́л Растэ-Дэвлэ́стэ, Дэвлэ́стэ тырэстэ: “Мэ выкэдыём мирэ́ кхэрэ́стыр свэ́нта дэшэнгирья, и отдыём лэн Левитоскэ, манушэ́скэ, саво́ явдя́ явирэ рига́тыр, пиротоскэ и пивлякэ, пир саро́ Тыро́ упхэныбэ́н, саво́ Ту ракирдян ма́нгэ: мэ на пиригиём Тырэ́ припхэныбэна́ и на бистырдём;
14. мэ на хаём ла́тыр дрэ ту́га мири́, и на отчхудём дро риг ла дро нажужакирибэн, и мэ на дыём ла́тыр ваш мулэскэ; мэ кандыём Ра́скирэ-Дэвлэ́скири, мирэ́ Дэвлэ́скири зан, кэрдём саро́, со Ту припхэндян ма́нгэ.
15. Подыкх Тырэ́ свэнтонэ́ штэто́стыр, болыбна́стыр, и бахтякир Тырэ́ манушэ́н, Израилёскирэн, и пхув, сави́ Ту дыя́н амэ́нгэ, сыр Ту совлахадян дадэ́нгэ амарэнгэ тэ дэс амэ́нгэ пхув, пэ сави́ тхадэ́ла тхуд и авги́н.”
16. Дрэ дава́ дывэ́с Рай Дэвэ́л, Дэвэ́л тыро́, припхэнэла ту́кэ тэ кэрэ́с саро́ пир далэ́ упхэныбэна́ и далэ́ зако́ны: ракх и кэр кэ ко́нцо (кэ яго́ро) лэн сарэ́ тырэ́ илэ́стыр и сарэ́ тырэ́ дестыр.
17. Ра́скэ-Дэвлэ́скэ Ту пхэндя́н акана́, со Ёв явэ́ла тырэ́ Дэвлэ́са, и со ту явэ́са тэ псирэ́с Лэ́скирэ дромэ́нца и тэ ракхэ́с Лэ́скирэ упхэныбэна́, и припхэныбэна́ Лэ́скирэ, и зако́ны Лэ́скирэ, и тэ кандэс (тэ шунэ́с) Лэ́скири зан (глос).
18. И Рай Дэвэ́л ададывэ́с чхудя́ Лэ́скири зор пэ дава́, сыр Ёв дыя́ лав ту́кэ, со ту явэ́са екхэ Лэ́скирэ манушэ́ндыр, ко́ли ту явэ́са тэ ракхэ́с сарэ́ Лэ́скирэ припхэныбэна́,
19. и со ёв чхувэ́ла тут вучэды́р сарэ́ манушэ́ндыр, савэ́н Ёв создыя́, пир барипэ́н, пир лав и пир паты́в, и со тумэ́ явэ́на свэ́нта мануша́ Растэ-Дэвлэ́стэ, Дэвлэ́стэ тырэстэ, сыр Ёв ракирдя́.”
7. Дава́ исын чачо́, со ману́ш псирэ́ла сы́рбы екх зэр (тенё), чачо́, ёв чхурдэлапэ ивья́ (напра́снэс); ёв скэдэ́ла пэ́скэ, а на джинэ́ла, кон залэла дава́.
8. А какана́, со ма́нгэ тэ ужакирав, Раё Дэ́вла? Мэ ужакирава лачхипэ́н Ту́тыр.
9. Зра́кх ман сарэ́ мирэ́ чорипна́стыр, на домэк, соб (кай) дылыно́ ману́ш тэ обракирэл ман.
10. Мэ со́мас лало́, мэ на отпхандём миро муй пал-дова́, со Ту адя́кэ кэрдя́н.
11. Лэ ма́ндыр криг дукха́, со Ту чхудя́н пэ ма́ндэ: мэ мэра́ва, сыр Ту марэ́са ман Тырэ́ вастэ́са.
4. Кирнэ-масэ́нгиро ману́ш тырдэлапэ тэ хал, нэ нисо́ на дорэсэ́ла, нэ добусовэнгиро (старательно) ди явэ́ла барвало́.
5. Чачуно́ ману́ш древа́н на камэ́ла хохаибэ́н, нэ надэвлытко ману́ш лыджа́ла пэс намиштэс и дорэсэ́ла ладж.
6. Чачипэ́н ракхэ́ла одолэ́н, савэнгиро дром исын бидошэ́нгиро, нэ фуипэ́н равэла тэлэ́ [хасякирэ́ла-р.с.] грэхитконэ́ манушэ́с.
1. И сыс адя́кэ: пэ яви́р дывэ́с дро пэ́рво са́вато, пэ яви́р Патрадякиро дывэ́с Исусо́скэ пригияпэ тэ джал пир гивитко фэ́лда, и Лэ́скирэ сыкляибны́тка бокхалынэ, и лынэ́ тэ рискирэнас колосы и хан лэн, кхосыи лэн вастэ́нца.
2. Вари-савэ́ Фарисе́и пхэндлэ́ лэ́нгэ: “Ваш со тумэ́ кэрэ́на дова́, со нашты́ тэ кэрэ́н дро са́вато?”
3. Ису́со отпхэндя́ лэ́нгэ: “Нау́што тумэ́ на гиндлэ́ дро Свэ́нто Чхиныбэ́н, со кэрдя́ кра́ли Дави́до, ке́ли ёв и лэ́скирэ мала́ бокхалынэ?
4. сыр ёв загия́ дро Дэвлэ́скиро Кхэр, и ёв и мануша́ лэ́скирэ ханэ́ свэ́нто маро́, саво́ сыс нашты́ тэ хал никонэ́скэ, а екхэ рашангэ?
5. И пхэндя́ Ису́со лэ́нгэ: “Чхаво́ Манушэ́скиро исын Хула́й и пэ са́вато.”
6. И сыс адя́кэ: Исусо́скэ пригияпэ дро яви́р са́вато тэ заджа́л дрэ синагога и тэ сыклякирэ́л. И сыс одо́й екх ману́ш, савэ́стэ чачо́ (право) васт сыс шуко.
7. Лылвари́тка и Фарисе́и дыкхэнас ракхибны́ткэс пал Лэ́стэ, ци на састякирэлас Ёв дро са́вато, соб (кай) тэ латхэ́н бангипэн пэ Исусо́стэ.
8. Нэ Ису́со джиндя́, со ёнэ думиндлэ, и пхэндя́ манушэ́скэ шукэ́ вастэ́са: “Ушты́ и тэрдёв машкира́л.” И ёв уштыя́ и тэрдия́.
9. Тэ́ньци пхэндя́ лэ́нгэ Ису́со: “Мэ пхучава тумэ́ндыр: со трэй тэ кэрэ́с дро са́вато: лачхипэ́н ци фуипэ́н, тэ ракхэ́с джиибэ́н ци тэ хасякирэс?” Ёнэ сыс штыл.
10. Ёв подыкхця́ пэ лэ́ндэ сарэ́ндэ, и пхэндя́ кодолэ́ манушэ́скэ: “Протырдэ тыро́ васт.” Ёв протырдыя́, и насвало́ лэ́скиро васт яця́ састо́, сыр и яви́р васт.
11. Ёнэ нашадэ пэс тэды холя́тыр и ракирдэ́ машки́р пэ́стэ, со лэ́нгэ тэ кэрэ́н Исусо́са?
12. И сыс адя́кэ: дрэ долэ́ дывэса́ Ису́со гия́ пэ бэ́рга тэ мангэ́лпэ Дэвлэ́скэ и мангдя́пэ сари́ рат.
13. Ке́ли яця́ дывэ́с, Ёв кхардя́ Пэ́скирэ сыкляибнытконэ́н и выкэдыя́ дэшудуен, савэ́н Ёв кхардя́ Апостолэнца:
14. Симонос, савэ́с Ёв кхардя́ “Пэ́три”, и Ендрис (Андреёс), лэ́скирэ пшалэ́с, Яковонэс и Ианос, Филипос и Варфаламеёс,
15. Матфеёс и Фомас, Яково́с, Алфеёскирэс и Симонос, савэ́с кхарэнас Зилото (Активисто),
16. Юдас Яковоскирэс и Юдас Искариотос, саво́ и яця́ Лэ́скирэ здыибнариса (Лэ́скиро здыибнари).
17. Ке́ли Ису́со змэкцяпэ бэрга́тыр кхэтанэ́ Апостолэнца, Ёв тэрдия́ пэ роўно (во́рто) штэ́то кхэтанэ́ Лэ́скирэ сыкляибнытконэ́нца; и сыс бут мануша́ Юдэя́тыр и Ерусалимо́стыр, Тироскирэ и Сидоноскирэ штэтэ́ндыр, савэ́ сыс пашы́л мо́рё (дэрья́в):
18. ёнэ явнэ́ тэ шунэ́н Лэс и тэ высастякирэнпэ пэ́скирэ дукхэндыр; сыс манушэ, савэ́ мэнчындлэпэ налачхэ́ дукхэндыр, и ёнэ высастёнас.
19. Сарэ́ мануша́ камлэ́ тэ чилавэн Лэс, пал-дова́ со Лэ́стыр выджа́лас зор и Ёв састякирэлас сарэ́н.
20. И Ёв ґаздыя́ пэ́скирэ якха́ пэ Лэ́скирэ сыкляибнытконэндэ и лыя́ тэ ракирэ́л: “Бахталэ́ исын тумэ́, савэ́ исын чорорэ́ дро ду́хо, пал-дова́ со тумаро́ исын Кралипэ́н дро Болыбна́скиро Раё.
21. Бахталэ́ исын тумэ́, конэ́скиро ило́ исын бокхало пал Дэвлэ́скиро лав, пал-дова́ со Дэвэ́л пхэрдякирэла тумаро́ ило́. Бахталэ́ исын тумэ́, савэ́ ровэна, пал-дова́ со тумэ́ явэ́на тэ радынэ́нпэ.
22. Бахталэ́ исын тумэ́, ке́ли мануша́ явэ́на древа́н тэ бидыкхэн тумэн и, ке́ли ёнэ вытрадэна тумэн и явэ́на тэ обкхарэн тумэн налачхэ́ лавэ́нца и калякирэна тумаро́ лав пал Манушэ́скирэ Чхавэ́стэ.
23. Явэ́н бахталэ́ и радынэ́нпэ дро дова́ дывэ́с, пал-дова́ со бари мазу́ри (награда) Дэвлэ́стыр ужакирэ́ла тумэн дро Болыбна́скиро Раё. Адя́кэ лэ́нгирэ дада́ кэрдэ́ пророкэнца.
24. Бида тумэ́нгэ, кон исын барвалэ́! Пал-дова́ со тумэ́ндэ ужэ исын локхо джиибэ́н!
25. Бида тумэ́нгэ, конэ́стэ исын саро́, со тумэ́ камэ́на; тумэ́ явэ́на бокхалэ́. Бида тумэ́нгэ, кон салапэ какана́; пал-дова́ со тумэ́нгэ явэ́ла бари ту́га и тумэ́ явэ́на тэ ровэ́н.
26. Бида тумэ́нгэ, ке́ли сарэ́ мануша́ явэ́на тэ ракирэ́н лачхипэ́н пал тумэ́ндэ. Пал-дова́ со адя́кэ кэрдэ́ хоханэ́ пророкэнца дада́ лэ́нгирэ.
Romani Bible Baltic 2019
United Bible Societies for the Baltic Romani Mission