Bible in one year April 11Joshua 11:1-231. Сыр шундя́ дава́ Иавино (Явино), Асороскиро кра́ли, то бичхадя́ кэ Иоваво, Мадороскиро кра́ли, и кэ Шимроноскиро кра́ли, и кэ Ахсафоскиро кра́ли,2. и кэ кра́лья, савэ́ дживдэ́ пэ паш-рати́тко риг пэ бэ́рга и пэ лошчы́на паш-дывэсытконэ́ Хинарофоскирэ рига́тыр, и пэ тэлатунэ́ штэ́ты, и дрэ Нафоф-Дора кэ западо,3. кэ Хананеи, савэ́ дживдэ́ кэ васто́ко и кэ мо́рё (дэрья́в), кэ Амореи и Хитеи, кэ Ферезеи и кэ Евусеи, савэ́ дживдэ́ пэ бэ́рга, и кэ Евеи, савэ́ дживдэ́ на́дур Ермоностыр пэ пхув Маси́фа.4. И выгинэ́ ёнэ и сарэ́ лэ́нгирэ отря́ды (ополчэнии) лэ́нца, бут мануша́, савэ́н сыс адя́кэ бут, кицы́ исын пра́хо пэ морёскиро (дэрьявэ́скиро) брэ́го; и грэн и марибны́тка вурдына́ сыс древа́н бут.5. И скэдынэ́пэ сарэ́ далэ́ кра́лья, и явнэ́ и тэрдинэ́ стано́са кхэтанэ́ пашы́л Меромоскирэ паня́, соб (кай) тэ марэ́нпэ Израилёса.6. Нэ Рай Дэвэ́л пхэндя́ Исусо́скэ: “На дар лэ́ндыр, пал-дова́ со атася́, пашы́л дава́ часо, Мэ отда́ва лэн сарэ́н пэ марибэ́н чхавэ́нгэ Израилёскирэнгэ; грэнгэ лэнгирэнгэ пиричхин жылы и вурдына́ лэ́нгирэ схачкир яга́са”.7. Ису́со и лэ́са сарэ́ мануша́, савэ́ сыс лачхэ́ пэ марибэ́н, сы́гэс выгинэ́ пэ лэ́ндэ кэ Меромоскирэ паня́ и пынэ́ пэ лэ́ндэ.8. И отдыя́ лэн Рай Дэвэ́л Израильтянэнгэ дрэ васта́, и домардэ́ ёнэ лэн, и традынэ лэн кэ баро́ Сидоно, и кэ Мисрефоф-Маима, и кэ до́ло Мицфа кэ васто́ко, и пиримардэ лэн адя́кэ, со никонэ́с лэ́ндыр на яця́пэ, кон бы тэ явэ́л джидо́.9. И кэрдя́ Ису́со лэ́нца адя́кэ, сыр пхэндя́ лэ́скэ Рай Дэвэ́л: лэ́нгирэ грэнгэ ёв пиричхиндя жылы и лэ́нгирэ марибны́тка вурдына́ схачкирдя́ яга́са.10. Дрэ дова́-паць часо, Ису́со рисия́, лыя́ Асорос и лэ́скирэ крали́с замардя́ куртала́са (Асоро англэды́р сыс сарэ́ далэ́-кралипнаскирэ шэралэса);11. и пиримардэ ёнэ саро́ джидо́, со сыс дрэ лэ́стэ, куртала́са, отдыи совлахакэ (прокошыбнаскэ); на яця́пэ ние́кх джидо́ ди; а Асоро схачкирдя́ ёв яга́са.12. И сарэ́ далэнгирэ-кральенгирэ фо́рья и сарэ́н кралье́н лэнгирэн лыя́ Ису́со, и домардя́ куртала́са, отдыи лэн совлахакэ, сыр ракирдя́ Мо́йза, Ра́скиро-Дэвлэ́скиро писха́ри;13. нэ сарэ́ фо́рья, савэ́ сыс пэ вучипэ́н, на хачкирдэ́ Израильтя́ни, апри́ч екхэ Асоро, саво́ схачкирдя́ Ису́со.14. А саро́ дорэсыбэ́н (добыча) далэ́ форьенгиро и кхэритконэ́ мурдалэ́н (ското) росчордэ Израилёскирэ чхавэ́ пэ́скэ; манушэ́н сарэ́н пиримардэ куртала́са адя́кэ, со протрадынэ сарэ́н лэн: на ячкирдэ́ ние́кх ди.15. Сыр припхэндя́ Рай Дэвэ́л Мойза́скэ, Пэ́скирэ писхари́скэ, адя́кэ Мо́йза припхэндя́ Исусо́скэ, а Ису́со адя́кэ и кэрдя́: на отгия́ ни екхэ лавэ́стыр дро саро́, со припхэндя́ Рай Дэвэ́л Мойза́скэ.16. Адя́кэ Ису́со лыя́ сари́ дая́ пхув пэ бэ́ргицы, сари́ пхув паш-дывэсы́тко (полудёно), сари́ пхув Гошэн и тэлатунэ́ штэ́ты, и лошчы́на и бэ́рга Израилёскири, и тэлатунэ́ штэ́ты,17. бэрга́тыр Халако, сави́ залэла штэ́то кэ Сеиро, кэ Ваал-Гадо пэ Ливаноскиро до́ло, пашы́л Ермоноскири бэ́рга, и сарэ́н лэ́нгирэ кралье́н лыя́, и домардя́ лэн, и мулякирдя́ лэн.18. Длуго часо Ису́со лыджия́ марибэ́н сарэ́ адалэ́ кральенца.19. На сыс фо́ро, саво́ кэрдя́ бы рама́нё (миро) Израилёскирэ чхавэ́нца, апри́ч Евеендэ, савэ́ дживдэ́ кэ Гавао́но: сарэ́ лынэ́ ёнэ марибна́са;20. пал-дова́ со Ра́стыр-Дэвлэ́стыр сыс дова́, со ёнэ холякирдэ ило́ пэ́скиро и марибна́са стрэниндлэ Израилё, ваш дова́, соб (кай) тэ явэ́н отдынэ́ совлахакэ и соб (кай) тэ на явэ́л лэ́нгэ отмэкибэн, нэ, соб (кай) тэ явэ́н протрадынэ адя́кэ, сыр припхэндя́ Рай Дэвэ́л Мойза́скэ.21. Дро дова́-паць часо явдя́ Ису́со и домардя́ Енакимэн пэ бэ́рга, дро Хевро́но, дро Давиро, дрэ Анава, пэ сари́ Юдаскири бэ́рга и пэ сари́ Израилёскири бэ́рга; лэ́нгирэ форьенца отдыя́ лэн Ису́со совлахакэ;22. на яця́пэ ниекхэс Енакимостыр манушэ́с пэ Израилёскирэ-чхавэнгири пхув; яця́пэ екх дро Газо, дро Гефо и дро Азото.23. И адя́кэ лыя́ Ису́со сари́ пхув, сыр ракирдя́ Рай Дэвэ́л Мойза́скэ, и отдыя́ ла Исусо́скэ дрэ миштыпна́скири ме́ра Израильтянэнгэ, пир дова́, сыр пхув роскэрдяпэ машкира́л лэ́нгирэ ро́дыцы. И штылыя пхув марибнастыр.Joshua 12:1-241. Акэ, исын кра́лья долэ́ пхувья́кирэ, савэ́н домардэ́ Израилёскирэ чхавэ́ и савэнгири пхув лынэ́ пэ́скэ пир доя́ Иорданоскири риг кэ кхамэскиро ўзгиибэн, Арноноскирэ сыгнонэ рэкицатыр (лэнорьятыр) кэ Ермоноскири бэ́рга и сари́ лошчы́на кэ васто́ко:2. О Сигоно, Амореенгиро кра́ли, саво́ дживдя́ кэ Есево́но, саво́ рикирдя пхув Ароеростыр, со исын пашы́л брэ́го Арноноскирэ рэкицатыр (лэнорьятыр), и кэ паш рэ́кица (лэнори́), пашы́л Галаа́до, кэ Явокоскири рэ́кица (лэнори́), кай сыс Амонитянэнгири риг,3. и кэ лошчы́на кэ Хинерефоскиро мо́рё (дэрья́в) кэ васто́ко и кэ морёскири лошчы́на, Лондо мо́рё (дэрья́в), кэ васто́ко пир дром кэ Беф-Ешымофо, а кэ паш-дывэ́с (юго) штэтэнца, савэ́ сыс паштэ́ тэла́л пашы́л Фасга;4. и Огоскири провинцыя, кон сыс Васаоскиро кра́ли, палатуно́ (последнё) Рефаимэндыр, саво́ дживдя́ кэ Астарофо и дрэ Едрея,5. саво́ рикирдя бэ́рга Ермоно, и Салха, и саро́ Васа́но, кэ Гесуроскиро и Маахоскиро-межакири риг, и паш Галаа́до, кэ Сигоноскири риг, Есевонсконэ-крали́скири.6. О Мо́йза, Ра́скирэ-Дэвлэ́скиро писха́ри, и Израилёскирэ чхавэ́ домардэ́ лэн; и дыя́ ла Мо́йза, Ра́скирэ-Дэвлэ́скиро писха́ри, дрэ мэкно́ миштыпэ́н (наследиё) Рувимо́скирэ и Гадо́скирэ родыцо́скэ и паш Манасия́скирэ родыцо́скэ.7. И, ґа́да, исын кра́лья Аморее́нгирэ пхувья́кирэ, савэ́н домардя́ Ису́со и Израилёскирэ чхавэ́ пир дая́ Иорданоскири риг кэ западо, Ваал-Гадостыр пэ Ливаноскиро долоскэ Халака, бэ́рга, сави́ тырдэлапэ кэ Сеиро, сави́ отдыя́ Ису́со Израилёскирэ родыцэнгэ дро мэкно́ миштыпэ́н (наследиё), пир лэ́нгиро роскэрибэн,8. пэ бэ́рга, пэ тэлатунэ́ штэ́ты пэ лошчы́на, пэ штэ́ты, савэ́ исын пашы́л бэ́рги, и пэ чхучи́ пхув, и пэ паш-дывэ́с (юго), Хетеен, Амореен, Хананеен, Ферезеен, Евеен и Евусеен:9. екх кра́ли Ерихоноскиро, екх Гаёскиро, со исын пашы́л Вефи́лё,10. екх кра́ли Ерусалимоскиро, екх кра́ли Хевроноскиро,11. екх кра́ли Ярмуфаскиро, екх кра́ли Лахисоскиро,12. екх кра́ли Еглоноскиро, екх кра́ли Гезероскиро,13. екх кра́ли Давироскиро, екх кра́ли Гадероскиро,14. екх кра́ли Хормакиро, екх кра́ли Арадоскиро,15. екх кра́ли Ливнакиро, екх кра́ли Одоламоскиро,16. екх кра́ли Македоскиро, екх кра́ли Вефилёскиро,17. екх кра́ли Тапуахоскиро, екх кра́ли Хефероскиро,18. екх кра́ли Афекоскиро, екх кра́ли Шароноскиро,19. екх кра́ли Мадоноскиро, екх кра́ли Асороскиро,20. екх кра́ли Шимроно-Мероноскиро, екх кра́ли Ахсафоскиро,21. екх кра́ли Фаанахоскиро, екх кра́ли Мегидоноскиро,22. екх кра́ли Кедесоскиро, екх кра́ли Иокнеамоскиро пашы́л Кармило,23. екх кра́ли Дороскиро пашы́л Нафаф-Доро, екх кра́ли Гоимоскиро дро Галга́ло,24. екх кра́ли Фирцакиро: сарэ́н кралье́н сыс трия́нда екх (савэ́н пиризорьякирдэ Израилёскирэ чхавэ́).Psalms 44:4-194. Тырэ́ мануша́ на дорэснэ́ пхув пэ́скирэ куртала́са и ёнэ на зракхнэ́ пэс пэ́скирэ вастэ́са, нэ дава́ сыс Тыри́ зор и Тыро́ васт и дуд Тырэ́ москиро, пал-дова́ со Ту́кэ ячнэ́ дро́га ёнэ.5. Ту сан миро Кра́ли! Миро Дэ́вла! Дэ припхэныбэ́н, соб (кай) Яково тэ лэл упралыпэ́н.6. Ту́са амэ пиризорьякираса амарэ́ вэргэ́н, Тырэ́ лавэ́са амэ ява́са тэ штакирас одолэ́н, савэ́ ґаздэ́напэ пэ амэ́ндэ.7. Мэ на ява́ва тэ допатяв мирэ́ луко́скэ, ци мирэ́ куртала́кэ тэ зракхэ́л ман.8. Нэ Ту зракхця́н амэн амарэ́ вэргэ́ндыр, и Ту ладжакирдян одолэ́н, савэ́ древа́н на камлэ́ амэн.9. Амэ ява́са тэ ґаздас шарибэ́н пал Дэвлэ́стэ со дывэ́с и амэ ява́са тэ шарас Тыро́ лав пэ сарэ́ ве́ки. Сэ́ла.10. Нэ Ту сатаки (усае́кх) ячкирдян амэн и ладжакирдян амэн, и Ту на ги́ян анги́л амарэ́ халадыпнэнца.11. Ту кэрдя́н адя́кэ, со амэ дыямпэ палэ вэргэ́ндыр и кодолэ́, савэ́ бидыкхнэ амэн, лучкирэнас амэн.12. Ту дыя́н амэн сыр бакрэ́н пэ хабэ́н, и Ту росчхудян амэн машки́р Наюды́тка на́цыи.13. Ту бикиндян Пэ́скирэ манушэ́н ни пал со, Ту́кэ нанэ нисави́ льго́та (ко́фо) далэ́ тиминатыр.14. Ту кэрдя́н адя́кэ, со амарэ́ пашатунэ́ обракирэна амэн; санапэ холямэс и просана амэн одолэ́, савэ́ исын пашы́л амэ́ндэ.15. Ту кэрдя́н амэ́ндыр сабнытко приме́ро (сыкаибэ́н) машки́р Наюды́тка на́цыи, мануша́ кунякирэна шэрэнца паш амэ́ндэ.16. Мири́ ладж исын усады (сак) анги́л ма́ндэ, мирэ́-москиро ладжаипэ́н сы́рбы гарадя ман занятыр одолэнгирэндыр,17. савэ́ бангякирэна хоханэ́с и калякирэна ман, вэргэ́ндыр и одолэ́н, савэ́ исын холынакирэ.18. Саро́ дава́ явдя́ пэ амэ́ндэ, амэ усае́кх на бистырдям Тут, ци амэ пхагирдян Тыро́ Завето:19. Амаро́ ило́ на рисия́ палэ, и амарэ́ пирэ́ (сто́пы) на штадэ дрэ риг Тырэ́ дромэ́стыр;Proverbs 14:1-21. Годы́ джувлы́ рикирэ́ла кхэр, нэ набарэ́-годякири джувлы́ пхагирэ́ла лэс пэ́скирэ дылныпнаса.2. Кон кэрэ́ла саро́ пир чачипэ́н, кодова́ кутякирэла кэ дар Рас-Дэвлэ́с, нэ кон кэрэ́ла чорипэ́н пэфроми, одова́ на прилэ́ла кэ годы́ Лэс.Lukaš 10:25-4225. И, ґа́да, екх Законоскиро сыклякирибнари, уштыя́ и ками тэ пропатякирэл Исусо́с, пхэндя́: “Сыклякирибнарискиро! Со ма́нгэ тэ кэра́в, соб (кай) тэ дорэсав ве́чно джиибэ́н?”26. Ису́со отпхэндя́ Лэ́скэ: “Со исын чхиндло́ дро Зако́но? Со ту гинэса?”27. Ману́ш отпхэндя́: “Рикир дрэ пэ́стэ сыр Дро́гима Рас-Дэвлэ́с тырэ́с сарэ́ илэ́са пэскирэса, и сарэ́ тырэ́ духо́са (фаноса), и сарэ́ тырэ́ зорья́са и сарэ́ тырэ́ годя́са, и сыка́в паты́в пэ́скирэ пашатунэ́ манушэ́скэ, сыр кокоро́ пэ́скэ.”28. Ису́со пхэндя́ Лэ́скэ: “Ту чачунэ́с отпхэндян, кэр адя́кэ, и ту явэ́са тэ дживэ́с.”29. Нэ Законоскиро сыклякирибнари, ками тэ сыкавэ́л пэс чачунэса, пхуця́ Исусо́стыр: “Кон исын миро пашатуно ману́ш?”30. Ису́со ж отпхэндя́: “Екх ману́ш гия́ Ерусалимо́стыр дро Ерихо́но и пынэ́ пэ лэ́стэ розмарибнарья; ёнэ злынэ лэ́стыр урибэ́н, домардэ́ лэс и гинэ́; и мэкнэ́ лэс пашджидэс.31. И сыс адя́кэ, со екх раша́й гия́ долэ́ дромэ́са и, ке́ли дыкхця́ лэс, гия́ дурэды́р.32. И Левито адя́кэ-паць сыс пэ дова́ штэ́то, подги́я, подыкхця́ и гия́ дурыдыр.33. Нэ екх самарянино, саво́ традыя́ долэ́ дромэ́са, латхя́ лэс, ке́ли дыкхця́ лэс, яця́ лэ́скэ танго (жалко) далэ́ манушэ́с;34. и ёв подги́я кэ дава́ ману́ш, пирипхандя лэ́скирэ фра́нсы (раны), чхудя́ дзэт (олеё) и мол (вино) пэ раны; тэ́ньчи ёв ґаздыя́ далэ́ манушэ́с пэ ослостэ, яндя́ лэс дро затрадыпнытко кхэр (гостиница) и дыкхця́ пал лэ́стэ.35. И пэ яви́р дывэ́с, ке́ли ёв традэлас пэ́скэ, ёв вытырдыя дуй динарии, дыя́ хула́скэ затрадыпнытконэ кхэрэ́стыр и пхэндя́ лэ́скэ: ‘Дыкх пал лэ́стэ; и, ко́ли ту́тэ уджана буты́р ловэ́, то мэ выплэскирава ту́кэ, ке́ли ява́ва палэ.’36. Кон далэ́ тринэндыр, ту думинэса, исын пашылэды́р кодолэ́скэ, пэ конэ́стэ пынэ́ розмарибнарья?”37. Законоскиро сыклякирибнари отпхэндя́: “Кодова́, кон яця́пэ пашы́л адалэ́ манушэ́стэ.” Тэды Ису́со пхэндя́ Лэ́скэ: “Джа́ и ту кэр адя́кэ-паць.”38. Ке́ли Ису́со и Лэ́скирэ сыкляибны́тка ишчо (инкэ́) гинэ́ дромэ́са, Ису́со загия́ дро екх гав; одо́й сыс екх джувлы́, савья́ кхардэ́ Марфа, ёй прилыя́ Лэс радыма́са дро пэ́скиро кхэр.39. Ла́тэ сыс пхэн, савья́ кхардэ́ Мари́я, ёй бэсця́ кэ Исусо́скирэ ґэра́ и шундя́ Лэ́скирэ лава́.40. А Марфа сыс древа́н залыны (залыми) бутяса пир кхэр, и ёй подги́я и пхэндя́: “Раё Дэ́вла! Со Ту думинэса пал дова́, со пхэн мэкця́ ман екхджиня тэ кэра́в сари́ кхэри́тко буты́? Пхэн ла́кэ тэ дзн васт ма́нгэ!”41. Ису́со отпхэндя́ ла́кэ: “Марфе! Марфе! Ту думинэса и кэрэ́са пхаро́ пэ ило́ пэ́скэ пал бут бутя́,42. нэ екх трэй. Мари́я выкэдыя́ чачуны́ паш, сави́ нико́н на отлэла ла́тыр.” Romani Bible Baltic 2019 Maintained by the United Bible Societies for the Baltic Romani Mission