Bible in one year
April 12

1. Ке́ли Ису́со пхурия, и загия́ дрэ пхурэ́ бэрша́, тэды Рай Дэвэ́л пхэндя́ лэ́скэ: “Ту пхуриян, загиян дрэ пхурэ́ бэрша́, а пхув тэ лэс дрэ мэкно́ миштыпэ́н ячэ́лапэ ишчо (инкэ́) древа́н бут.
2. Ѓа́да, сави́ ячэ́лапэ пхув: сари́ провинцыя пашы́л Филистимо и сари́ Гесуроскири пхув.
3. Сихоростыр, со исын анги́л Еги́пто кэ ме́жа Екроноскири кэ паш-рати́тко (северно риг), далэ́ пхувья́ гинэнапэ Ханаансконэнца, пэ савэ́ исын пандж хулая́ Филистимоскирэ: Газско, Азотско, Аскалонско, Гефско, Екронско и Авейско;
4. кэ паш-дывэ́с (юго) сари́ Ханаано́скири пхув Меаратыр Сидонсконатыр кэ Афеко, кэ Аморее́нгирэ рига́,
5. адя́кэ-паць пхув Гевалоскири и саро́ Лива́но кэ кхамэскиро ўзгиибэн Ваал-Гадо, со исын пашы́л Ермоноскири бэ́рга, кэ загиибэ́н дрэ Емафо.
6. Сарэ́н бэргитконэн манушэ́н Ливаностыр кэ Мисрефоф-Маимо, сарэ́н Сидонянэн Мэ вытрадава Израилёскирэ-чхавэ́нгирэ мо́стыр; роздэ ла дрэ миштыпна́скири ме́ра Израилёскэ, сыр Мэ ракирдём ту́кэ;
7. роздэ дая́ пхув дрэ миштыпна́скири ме́ра еня́ родыцэнгэ и пашакэ Манасия́скирэ родыцо́скэ.
8. А ро́дыцо (чанг) Рувимоскиро и Гадоскиро явирэ пашэ́са Манасия́скирэ родыцоса дорэснэ́ пэ́скири миштыпна́скири ме́ра Мойзастыр пал Иорда́но кэ васто́ко, сыр дыя́ лэ́нгэ Мо́йза, Ра́скиро-Дэвлэ́скиро писха́ри,
9. Ароеростыр, саво́ исын пэ брэ́го Арноноскирэ рэкицакиро (лэнорьякиро), и фо́ро, саво́ исын машки́р сы́гно рэ́кица (лэнори́) пэ до́ло, и сари́ лошчы́на Медева кэ Дивоно;
10. адя́кэ-паць сарэ́ Сигоноскирэ фо́рья, Аморее́нгирэ крали́скирэ, саво́ сыс крали́са кэ Есево́но, кэ ме́жы Амонитянэнгирэ,
11. адя́кэ-паць Галаа́до и ме́жа Гесурско и Маахакирэ, и сари́ бэ́рга Ермоно и саро́ Васа́но кэ Салха,
12. саро́ Васаноскирэ-Огоскиро кралипэ́н, саво́ сыс крали́са дрэ Астарофа и дрэ Едрея. Ёв яця́пэ екх Рефаимэндыр, савэ́н Мо́йза домардя́ и протрадыя.
13. Нэ чхавэ́ Израилёскирэ на вытрадынэ́ манушэ́н Гесуроскирэн и Маахиёскирэн, и дживэ́ла Гесуро и Мааха машки́р Израилё кэ дава́ дывэ́с.
14. Екхэ родыцо́скэ Левиёскирэскэ на дыя́ миштыпна́скири ме́ра: свэ́нто яныбэ́н Ра́скиро-Дэвлэ́скирэ, Дэвлэ́скиро Израилёскиро, акэ, исын лэ́скири миштыпна́скири ме́ра, сыр пхэндя́ лэ́скэ Рай Дэвэ́л.
15. Родыцоскэ Рувимо́скирэ чхавэ́нгэ пир лэ́нгирэ кхэра́ дыя́ миштыпна́скири ме́ра Мо́йза:
16. ригаса лэнгирьяса сыс Ароеро, саво́ исын пэ Арноноскирэ-рэкицакиро (лэнорьякиро) брэ́го, и фо́ро, саво́ исын машки́р рэ́кица (лэнори́), и сари́ лошчы́на пашы́л Медева,
17. Есево́но и сарэ́ лэ́скирэ фо́рья, савэ́ исын пэ лошчы́на, и Дивоно, Вамофо-Ваало и Беф-Ваал-Меоно,
18. Иааца (Яца), Кедемофо и Мефаафо,
19. Кириафаимо, Сивма и Цэреф-Шахаро пэ бэ́рга Емеко,
20. Беф-Фегоро и штэ́ты пашы́л склоно Фасгакиро и Беф-Ешымофо,
21. и сарэ́ фо́рья пэ лошчы́на, и саро́ Сигоноскиро кралипэ́н, Аморейсконэ-крали́скиро, саво́ сыс крали́са дрэ Есево́но, савэ́с замардя́ Мо́йза, адя́кэ-паць и Мадиамсконэ шэралэн: Евияс, и Рекемос, и Цурас, и Хурас, и Ревос, Сигоноскирэ тхагарьен, савэ́ дживдэ́ пэ доя́ пхув;
22. адя́кэ-паць Валаамос, Веороскирэ чхавэ́с, зумакирибнаскирэс, замардэ́ Израилёскирэ чхавэ́ куртала́са кхэтанэ́ дрэ гиныбэ́н, кицы́ ёнэ замардэ́.
23. Ригаса пир ме́жа Рувимо́скирэ чхавэ́нгирэ сыс Иорда́но. Ѓа́да, исын миштыпна́скири ме́ра Рувимо́скирэ чхавэнгири, пир лэ́нгирэ кхэриткароды, фо́рья и гава́ лэ́нгирэ.
24. Мо́йза адя́кэ-паць дыя́ миштыпна́скири ме́ра Гадо́скирэ родыцо́скэ, чхавэ́нгэ Гадоскирэнгэ, пир кхэри́тка ро́ды лэ́нгирэ:
25. ригаса лэнгирьяса сыс Язеро (Иазеро) и сарэ́ Галаадо́скирэ фо́рья, и паш Амоноскирэ чхавэ́нгиро пэ пхув кэ Ароеро, со исын анги́л Рава,
26. и пхувья́ Есевоноскирэ кэ Рамаф-Мицфа и Ветонимо, и Маханаимостыр кэ Давироскирэ-межакирэ рига́,
27. и пэ до́ло Беф-Гарамо и Беф-Нимра и Сокхофо и Цафоно, со яця́пэ Сигоноскирэ кралипнастыр, Есевоноскирэ крали́скиро; лэ́скирэ ригаса сыс Иорда́но кэ Хинерефоскиро пани́ пал Иорда́но кэ васто́ко.
28. Ѓа́да, исын Гадо́скирэ-чхавэнгири миштыпна́скири ме́ра, пир кхэри́тка ро́ды лэ́нгирэ, фо́рья и гава́ лэ́нгирэ.
29. О Мо́йза дыя́ миштыпна́скири ме́ра и пашакэ Манасия́скирэ родыцо́скэ, саво́ сыс пал паш Манасия́скирэ-чхавэ́нгирэ родыцо́стыр, пир кхэри́тка ро́ды лэ́нгирэ;
30. Лэ́нгири риг пир ме́жа сыс: Маханаимостыр саро́ Васа́но, саро́ Огаскиро кралипэ́н, Васаноскирэ-крали́скиро, и сарэ́ гава́ Яироскирэ, со исын дрэ Васа́но, шовдэша́ фо́рья;
31. а паш Галаадаскири и Астарофоскири и Едреякири, Васаноскирэ-Огоскирэ-кралипнаскирэ фо́рья, дынэ́ Махираскирэ чхавэ́нгэ, Манасия́скирэ-чхавэ́скирэ и пашакэ Махироскирэ чхавэ́нгэ, пир кхэри́тка ро́ды лэ́нгирэ.
32. Ѓа́да, со, Мо́йза дыя́ дрэ миштыпна́скири ме́ра пэ Моавитоскирэ лошчыны пал Иорда́но проти Ерихо́но кэ васто́ко.
33. Нэ Левиёскирэ родыцо́скэ Мо́йза на дыя́ миштыпна́скири ме́ра: Рай Дэвэ́л, Дэвэ́л Израилёскиро, Кокоро́ сыс лэ́нгири миштыпна́скири ме́ра, сыр Ёв ракирдя́ лэ́нгэ.
1. Ѓа́да, со, дорэснэ́ (долынэ) дрэ миштыпна́скири ме́ра Израилёскирэ чхавэ́ пэ Ханаано́скири пхув, со роздынэ лэ́нгэ дрэ миштыпна́скири ме́ра раша́й Елиза́ро и Ису́со, Навиноскиро чхаво́, и родэнгирэ барыдыра́ пэ Израилёскирэ-чхавэ́нгирэ ро́дыцы.
2. Пир жре́биё роздынэ ёнэ, сыр припхэндя́ Рай Дэвэ́л пир Мойзастэ, еня́ родыцэнгэ и пашакэ Манасия́скирэ родыцо́скэ.
3. Палдава́ со дуе родыцэнгэ и пашакэ Манасия́скирэ родыцо́скэ Мо́йза дыя́ дрэ миштыпна́скири ме́ра пал Иорда́но, Левитэ́нгэ на дыя́ миштыпна́скири ме́ра машкира́л лэ́ндэ;
4. пал-дова́ со Иосифо́скирэ чхавэ́ндыр выгинэ́ дуй ро́дыцы: Манасия́скиро и Ефремоскиро; пир дава́ ёнэ и на дынэ́ Левитэ́нгэ паша́ пэ пхув, а екх фо́рья ваш джиибэ́н лэ́нгирэ пхувья́са ваш кхэритконэ́ мурдалэ́нгэ (ското) лэ́нгирэ и ваш яви́р лэ́нгирэ льготы (выгоды).
5. Сыр припхэндя́ Рай Дэвэ́л Мойза́скэ, адя́кэ и кэрдэ́ Израилёскирэ чхавэ́, ке́ли роздэнас пхув дрэ миштыпна́скири ме́ра.
6. Юда́скирэ чхавэ́ явнэ́ дро Галга́ло кэ Ису́со (Ёхошуа́), и пхэндя́ лэ́скэ о Халево, Ефониёскиро чхаво́, Кенезеянино: “Ту джинэ́са, со ракирдя́ Рай Дэвэ́л Мойза́скэ, Дэвлэ́скирэ манушэ́скэ, пал ма́ндэ и пал ту́тэ дрэ Кадес-Варна.
7. Ма́нгэ сыс штардэша́ бэрш, ке́ли Мо́йза, писха́ри Ра́скирэ-Дэвлэ́скиро, бичхадя́ ман Кадес-Варнатыр тэ обдыкхав пхув, и мэ яндём лэ́скэ дрэ отпхэныбэ́н, со сыс ма́ндэ пэ ило́:
8. пша́ла мирэ́, савэ́ псирдэ́ ма́нца, яндлэ́ дар дро ило́ манушэ́нгиро, а мэ кэрдём саро́ дро чачипэ́н мирэ́скэ Ра́скэ-Дэвлэ́скэ, Дэвлэ́скэ;
9. и совлахадя́ Мо́йза дрэ дова́ дывэ́с и пхэндя́: ‘Пхув, пир сави́ псирдя́ тыри́ ґэро́й, явэ́ла миштыпнаскирэ мераса ту́кэ и тырэ́ чхавэ́нгэ пэ ве́ко, пал-дова́ со ту дрэ чачипэ́н саро́ кэрдя́н Ра́скэ-Дэвлэ́скэ, Дэвлэ́скэ мирэ́скэ.’
10. И адя́кэ, ґа́да, Рай Дэвэ́л ячкирдя́ ман джидэс, сыр Ёв ракирдя́; акана́ штардэша́ пандж бэрш прогия́ долэ́ часостыр, ке́ли Рай Дэвэ́л пхэндя́ Мойза́скэ дава́ лав, и Израилё псирдя́ пир чхучи́ пхув; акана́, ґа́да, ма́нгэ охтодэша́ пандж бэрш;
11. нэ и акана́ мэ адя́кэ-паць сом зорало́, сыр и тэды, ке́ли бичхадя́ ман Мо́йза: ци бут тэды сыс ма́ндэ зор, ада́кицы и какана́ исын ваш дова́, соб (кай) тэ маравпэ, и тэ выджав и тэ заджав;
12. и адя́кэ, дэ ма́нгэ дая́ бэ́рга, пал сави́ ракирдя́ Рай Дэвэ́л дрэ дова́ дывэ́с; пал-дова́ со шундя́н дро дова́ дывэ́с, со одо́й дживэ́на Енакоскирэ чхавэ́, и фо́рья лэ́ндэ исын барэ́ и зоралэ́ тынэ́нца, могинэ́ла тэ явэ́л, со Рай Дэвэ́л явэ́ла ма́нца, и мэ вытрадава лэн, сыр ракирдя́ Рай Дэвэ́л”.
13. Ису́со бахтякирдя́ лэс, и дыя́ дрэ миштыпна́скири ме́ра Халевоскэ, Иефониёскирэ чхавэ́скэ Хевро́но.
14. Адя́кэ Хевро́но яця́пэ миштыпнаскирэ мераса Халевоскэ, Иефониёскирэ-чхавэскири, Кенезеяниноскири, кэ дава́ дывэ́с, пал-дова́, со ёв дро чачипэ́н кэрдя́ саро́, сыр пхэндя́ Рай Дэвэ́л, Дэвэ́л Израилёскиро.
15. Лав Хевроноскэ англэды́р сыс Кири́аф-Арба, сыр кхардяпэ машкира́л Енакоскирэ чхавэ́ндэ екх баро́ ману́ш. И пхув яця́ штыл марибнастыр.
20. мэк Ту роспхарадян амэн сыр ка́ра дрэ пэ штэ́то, кай исын шакалы, и гарадян амэн дрэ мэрибнаскири зэр (тенё).
21. Ко́ли амэ бистырдямас лав амарэ́ Дэвлэ́скиро и динд(з)ькирдямас амарэ́ васта́ кэ чу́жо дэвлоро,
22. ци Дэвэ́л на уджиндя́ дава́? Пал-дова́ со Ёв джинэ́ла, со исын гарадо́ дро ило́.
23. Чачо́, пал Ту́тэ амэн замарэна со дывэ́с, амэн гинэ́на сыр бакрэ́н, савэ́н чхинэна.
24. Ушты́! Со́скэ Ту сан суто́, о Раё Дэ́вла? Яв пашылэды́р! На джа́ криг сарэ́са.
25. Со́скэ Ту ґаравэса Пэ́скиро муй, бистрэса, со амэн тасавэна, со амэ́ндэ исын бари дар?
26. Пал-дова́ со амаро́ ди исын бандякирдо кэ пхувья́киро пра́хо, амаро́ кужу́м (жэлудко) рикирлапэ зоралэ́с палэ пхув.
3. Дылыно́ рикирэ́ла пхутькирдэс кэ ран пэ пэ́скиро думо, нэ годэ́ ушта́ ракхэна манушэ́н.
1. И сыс адя́кэ: ке́ли Ису́со мангдя́пэ Дэвлэ́скэ дро екх штэ́то и, сыр пирияця́, тэды екх сыкляибнытконэндыр пхэндя́ Лэ́скэ: “Раё Дэ́вла! Сыкля́кир амэн тэ мангаспэ Дэвлэ́скэ адя́кэ-паць, сыр и Иа́но сыклякирдя́ лэ́скирэ сыкляибнытконэ́н.”
2. Ису́со пхэндя́ лэ́нгэ: “Ке́ли тумэ́ мангэ́напэ Дэвлэ́скэ, тэды ракирэ́н: ‘Дад амаро́ Болыбна́скиро! Мэк тэ славинэлпэ Тыро́ свэ́нто лав; Мэк тэ явэ́л Тыро́ Кралипэ́н, Мэк тэ сполнинэ́лпэ, Тыри́ во́ля сыр пэ пхув, адя́кэ пэ болыбэ́н;
3. Подэ амэ́нгэ маро́ пэ кажно дывэ́с;
4. И приманг амэ́нгэ грэ́хи амарэ́, Сыр амэ примангаса одолэ́нгэ, Савэ исын вужлэ амэ́нгэ; И на домэк амэн кэ пропатякирибэн; Нэ зра́кх амэн налачхэстыр’”
5. И Ёв пхэндя́ лэ́нгэ: “Конэ́стэ тумэ́ндыр исын дру́го (мал), и ке́ли тумэ́ явэ́на кэ ёв дрэ пашрат и пхэнэ́на лэ́скэ: ‘Пша́ла, дэ дро вужлыпэ́н (длуго) ма́нгэ трин лабы маро́,
6. пал-дова́ со миро мал дромэ́стыр загия́ кэ мэ и ма́нгэ нанэ со тэ дав лэ́скэ;
7. и кадава́ мал отпхэнэ́ла тумэ́нгэ: ‘Дэ ма́нгэ тэ откхинёвав! Вуда́р исын пхандло и мирэ́ чхаворэ́ исын какана́ сутэ́ ма́нца; мэ на могина́ва тэ уштав и тэ псиравав (тэ отпхандав) ту́кэ?’”
8. Мэ пхэна́ва тумэ́нгэ, со мэк (хоць) ёв на уштэ́ла и на дэ́ла тумэ́нгэ, пал-дова́ со тумэ́ сан лэ́скиро мал, нэ ваш дова́, соб (кай) тумэ́ тэ на ладжакирэн лэс мангипнаса, ёв уштэ́ла и дэ́ла тумэ́нгэ ада́кицы, кицы́ тумэ́ камэ́на.
9. И Мэ ракира́ва тумэ́нгэ: мангэ́н, и явэ́ла дыно́ тумэ́нгэ; родэ́н, и латхэ́на; марэ́н дро вуда́р, и псиравэна тумэ́нгэ.
10. Пал-дова́ со кажно, кон мангэ́ла, дорэсэ́ла пэ́скиро; кажно, кон родэ́ла, латхэ́ла; кажнонэ́скэ, кон марэла дро вуда́р, явэ́ла псирадо.
11. Нэ, ци исын вари-кон тумэ́ндыр сыр дад, со, ко́ли лэ́скиро чхаво́ мангэ́ла лэ́стыр маро́, тэ дэл чхавэ́скэ бар? Ци, ке́ли мангэ́ла мачхэс, тэ дэл лэ́скэ сапэс?
12. Ци, ке́ли мангэ́ла парноро, тэ дэл лэ́скэ скорпионос?
13. Ко́ли тумэ́ сан налачхэ́ и джинэ́на тэ кэрэ́н лачхипэ́н пэ́скирэ чхавэ́нгэ, пэ кицы́ буты́р тумэ́ндыр тумаро́ Болыбна́скиро Дад дэ́ла Свэ́нто Ду́хо (Фа́но) одолэ́нгэ, савэ́ мангэна Лэ́стыр!”
14. Екхвар Ису́со вытрадэлас на́лачхо ду́хо (фа́но) немонэ (муто) манушэ́стыр. Ке́ли на́лачхо ду́хо (фа́но) выгия́ лэ́стыр, немо ману́ш лыя́ тэ ракирэ́л. И мануша́ дивиндлэ́пэ.
15. Нэ вари-савэ́ лэ́ндыр ракирдэ́: “Ёв вытрадэла налачхэ́ ду́хи (фаны) Вельзэвулоскирэ зорья́са, саво́ исын хула́й пэ налачхэ́ ду́хи.”
16. А яви́р мануша́ пропатякирэнас Лэс, трэбинэнас Лэ́стыр, соб (кай) тэ явэ́л ґерты́к (знаме́ниё) болыбна́стыр.
17. Нэ Ису́со джиндя́, со ёнэ думиндлэ и пхэндя́ лэ́нгэ: “Кажно Кралипэ́н, кай нанэ екхипэ́н андра́л, явэ́ла сыр шуки́ пхув; кажно кхэр, кай нанэ екхипэ́н андра́л, на явэ́ла тэ тэрдёл;
18. и ко́ли налачхэстэ нанэ екхипэ́н андра́л, сыр лэ́скиро кралипэ́н явэ́ла тэ тэрдёл? А тумэ́ ж ракирэ́на, со Мэ вытрадава налачхэ́ ду́хи Вельзэвулоскирэ зорья́са.
19. Нэ ко́ли Мэ вытрадава налачхэ́ ду́хи Вельзэвулоса, тэды тумарэ́ чхавэ́, савэ́ зорья́са вытрадэна? Палдава́ ёнэ явэ́на сэнда́рья тумэ́нгэ, со тумэ́ ракирэ́на начачипэ́н.
20. А ко́ли Мэ вытрадава налачхэ́ ду́хи Дэвлэ́скирэ зорья́са, тэды Дэвлэ́скиро Кралипэ́н явдя́ кэ тумэ́.
21. Ке́ли зорало́ ману́ш ракхэ́ла пэ́скиро кхэр карэдыняса, лэ́скиро миштыпэ́н нико́н на чилавэ́ла;
22. нэ ке́ли ману́ш зоралэды́р лэ́стыр пэрэ́ла пэ лэ́стэ, и пиризорьякирэла хула́с, ёв закэдэла саро́ лэ́скиро марды́тко (оружыё), пал савэ́ хула́й рикирдяпэ, и роздэла лэ́скиро чордо миштыпэ́н.
23. Кон исын на Ма́нца, одова́ исын проти Ма́ндэ, и кон на скэдэ́ла Ма́нца, одова́ росчхурдэла.
24. Ке́ли на́лачхо ду́хо (фа́но) выджа́ла манушэ́стыр, тэды ёв лодэла пир бипанескирэ штэ́ты, родэ́ла откхиныбэн и на латхэ́ла, и тэ́ньчи раки́рла: ‘Рисевава мэ дро миро кхэр, каты́р мэ явдём.’
25. И ке́ли ёв явэ́ла, латхэ́ла, со кхэр нанэ залыно, вышуладо и укэдыно;
26. тэ́ньчи ёв джа́ла и лэ́ла пэ́са эфта́ (битринэ́нгиро дэш) яви́р ду́хи, со исын фуеды́р лэ́стыр, и ёнэ заджа́на и дживэ́на одо́й; и ячэ́лапэ ваш далэ́ манушэ́скэ фуеды́р, сыр сыс анги́л дава́.”
27. И сыс адя́кэ: ке́ли Ису́со пхэндя́ дава́, вари-сави́ джувлы́, сави́ сыс машки́р манушэ́ндэ, откхардяпэ зоралэ́ заня́са и пхэндя́ Лэ́скэ: “Бахталы́ исын джувлы́, сави́ бияндя́ и чарадя колынэса Тут.”
28. А Ису́со отпхэндя́: “Чачо́, бахталэ́ исын кодолэ́, савэ́ шунэ́на Дэвлэ́скиро лав и кандэ́на лэс.”
Romani Bible Baltic 2019
United Bible Societies for the Baltic Romani Mission