Bible in one year
April 13

1. И сыс жре́биё Юда́скирэ чхавэ́нгирэ родо́скэ, пир лэ́нгирэ кхэри́тка ро́ды, выпыя дасаво: пэ ме́жа Идумеяса сыс чхучи́ пхув Син, кэ паш-дывэ́с (юго), пашы́л Феманоскиро яго́ро (краё);
2. паш-дывэсытконэ́ лэ́нгирэ ригаса пир ме́жа сыс Лондэскирэ-морёскиро (дэрьявэ́скиро) яго́ро (краё), саво́ тырдэлапэ кэ паш-дывэ́с заливостыр;
3. пэ паш-дывэ́с ёв джа́ла кэ вучипэ́н Акравимоскиро, джа́ла пашы́л Цино, и, джа́ла упрэ́ паш-дывэсытконэ́ рига́тыр кэ Кадес-Варни, джа́ла пашы́л Хецроно, и, джа́ла упрэ́ кэ Адаро, порискирэла кэ Каркая,
4. Пало́ дава́ ёв проджа́ла Ацмоно, джа́ла пашылэды́р кэ Египто́скири рэ́кица (лэнори́) адя́кэ, со яго́ро далэ́ ригакиро исын мо́рё (дэрья́в). Дава́ явэ́ла паш-дывэсы́тко тумари́ риг.
5. Ригаса пир ме́жа кэ васто́ко сыс Лондо мо́рё (дэрья́в), кэ яго́ро Иорданоскиро; а риг паш-ратитконэ́ севернонэ рига́тыр лэ́лапэ морёскирэ (дэрьявэ́скирэ) заливостыр, Иорданоскирэ ягоро́стыр;
6. адатхы́р риг джа́ла упрэ́ кэ Беф-Хогла и проджа́ла паш-ратитконэ́ рига́тыр кэ Беф-Арава, и джа́ла риг упрэ́ кэ Боганоскиро бар, Рувимо́скирэ чхавэ́скиро;
7. Тэ́ньци (потом) джа́ла упрэ́ риг кэ Давиро долостыр Ахоро, и пэ паш-рат (северо) рискирэ́ла кэ Галга́ло, саво́ исын проти Адумимоскиро вучипэ́н, саво́ исын пашто́ паш-дывэсытконэ́ рэкицакирэ рига́тыр; адатхы́р риг проджа́ла кэ Ен-Шэмешоскирэ паня́ и кончынэлапэ пашы́л Ен-Рогело.
8. Адатхы́р риг пир ме́жа джа́ла упрэ́ кэ Еномоскирэ-чхавэ́скиро до́ло паш-дывэсытконэ́ Евусоскирэ рига́тыр, саво́ исын Ерусалимо, и ґаздэ́лапэ риг пэ бэрга́киро вучипэ́н, саво́ исын кэ западо проти Рефаимоскиро до́ло кэ паш-рат;
9. бэргакирэ вучипна́стыр межакири риг рискирэ́ла кэ Нефтоахоскири панескири ґанынгори (источнико) и джа́ла кэ фо́рья Ефроноскирэ бэргакирэ, и рискирэ́ла межакири риг кэ Ваало, саво́ исын Кири́аф-Яримо;
10. Тэ́ньци (потом) рискирэ́ла ме́жа Ваалатыр кэ мо́рё (дэрья́в), кэ бэ́рга Сеиро, и джа́ла паш-ратитконэ́ бэргакирэ Иеаримоскирэ ригаса, сави́ исын Кесалоно, и доджа́ла тэлэ́ кэ Вефсамисо, и проджа́ла пирда́л Фимна.
11. Адатхы́р межакири риг джа́ла паш-ратитконэ́ (севернонэ) Екроноскирэ ригаса, и рискирэ́ла риг кэ Шикароно, проджа́ла пирда́л бэ́рга Ваало и доджа́ла кэ Иавнеило, и яго́ро межакиро доджа́ла кэ са́мо мо́рё (дэрья́в). Западнонэ-межакири риг исын пир брэ́го барэ́ морёстыр (дэрьявэстыр).
12. Ѓа́да, исын межакири риг Юда́скирэ-чхавэ́нгиро пир лэ́нгирэ кхэри́тка ро́ды (пле́ми) сарэ́ ригэ́ндыр.
13. И Халевоскэ, Ефониёскирэ чхавэ́скэ, Ису́со дыя́ паш машки́р Юда́скирэ чхавэ́ндэ, сыр припхэндя́ Рай Дэвэ́л Исусо́скэ: Кири́аф-Арба, Енакоскирэ дадэ́скиро, явирэ́с дава́ штэ́то кхарэ́лапэ Хевро́но.
14. И вытрадыя́ одотхы́р Халево тринэн Енакоскирэ чхавэ́н: Шешаёс, Ахиманос и Фалмаёс, Енакоскирэ чхавэ́н.
15. Адатхы́р гия́ ёв проти Давироскирэ манушэ́ндэ (лав Давироскиро англэды́р сыс Кири́аф-Сеферо).
16. И пхэндя́ Халево: “Кон джа́ла марибна́са пэ Кири́аф-Сеферо и лэ́ла лэс, одолэ́скэ отда́ва Ахса, чха мирья, палоро́м”.
17. И лыя́ лэс Гофониило, Кеназоскиро чхаво́, Халевоскирэ-пшалэскиро, и отдыя́ ёв лэ́скэ Ахса, пэскирья́ чха, дрэ ромня́ (ромня́тэ).
18. Ке́ли явдя́ часо ла́кэ тэ джал, ла высыклякирдэ тэ мангэ́л ла́кирэ дадэ́стыр фэ́лда, и ёй згия ослостыр. Халево пхэндя́ ла́кэ: “Со ту́кэ?”
19. Ёй пхэндя́: “Дэ ма́нгэ бахтякирибэ́н; ту дыя́н ма́нгэ пхув паш-дывэсы́тко (полудёно), дэ ма́нгэ ґанынгорья (источники) панескирэ”. И дыя́ ёв ла́кэ ґанынгорья упратунэ и ґанынгорья тэлатунэ́.
20. Ѓа́да, исын миштыпна́скири ме́ра Юда́скирэ чхавэ́нгирэ родыцоскирэ, пир кхэри́тка ро́ды (пле́ми) лэ́нгирэ:
21. фо́рья пэ яго́ро (краё) Юда́скирэ чхавэ́нгирэ родыцо́стыр сыс кхэтанэ́ Идумеёса пэ паш-дывэсы́тко (таты) риг: Кавцэило, Едеро и Иагуро,
22. Кина, Димона, Адада,
23. Кедесо, Асоро и Ифнано,
24. Зифо, Телемо и Валофо,
25. Гацор-Хадафа, Кириафо, Хецроно, явирэ́с кхарэ́лапэ Гацоро,
26. Амамо, Шэма и Молада,
27. Хацар-Гада, Хешмоно и Веф-Палето,
28. Хацар-Шуало, Вирса́вия и Визиофея,
29. Ваало, Иимо и Ацэмо,
30. Елфоладо, Кесило и Хорма,
31. Цыклаго, Мадмано и Сансана,
32. Леваофо, Шэлихимо, Аино и Римоно: сарэ́ биш тэ еня́ фо́рья лэ́нгирэ гавэнца.
33. Пэ тэлатунэ́ штэ́ты: Ештаоло, Цора и Ашна,
34. Заноахо, Ен-Ганимо, Тапуахо и Гаенамо,
35. Иарамуфо, Одоламо, Сохо и Азека,
36. Шаараимо, Адифаимо, Гедера ци Гедерофаимо: дэшуштар фо́рья лэ́нгирэ гавэнца.
37. Цэнано, Хадаша, Мигдал-Гадо,
38. Дилеано, Мицфэ и Иокфеило,
39. Лахисо, Воцкафо и Еглоно,
40. Хабоно, Лахмасо и Хифлисо,
41. Гедерофо, Беф-Дагоно, Наема и Македо: дэшушов фо́рья лэ́нгирэ гавэнца.
42. Ливна, Еферо и Ашано,
43. Ифофахо, Ашна и Нецыво,
44. Кеила, Ахзиво и Мареша: еня́ фо́рья лэ́нгирэ гавэнца.
45. Екроно лэ́скирэ форьенца и гавэнца, савэ́ сыс тэл лэ́скири зор.
46. И Екроностыр саро́ кэ мо́рё (дэрья́в), со исын пашы́л Азото, лэ́нгирэ гавэнца,
47. Азото, лэ́скирэ фо́рья и гава́, савэ́ сыс тэл лэ́скири зор, Газа ла́кирэ фо́рья и гава́, савэ́ сыс тэл ла́кири зор, кэ кокори Египто́скири сы́гно рэ́кица (лэнори́) и баро́ мо́рё (дэрья́в), савэскиро брэ́го исын межакири риг.
48. Пэ бэ́рги сыс: Шамиро, Иатиро и Сохо,
49. Дана, Кириафо-Сана, явирэ́с Давиро,
50. Анафо, Эштэмо и Анимо,
51. Гошэно, Холоно и Гило: дэшуекх фо́рья лэ́нгирэ гавэнца.
52. Араво, Дума и Ешано,
53. Ианумо, Беф-Тапуахо и Афека,
54. Хумта, Кири́аф-Арбы, явирэ́с кхарлапэ Хевро́но и Цыгоро: еня́ фо́рья лэ́нгирэ гавэнца.
55. Маоно, Кармило, Зифо и Юта,
56. Изреелё, Иокдамо и Заноахо,
57. Каино, Гива́ и Фимна: дэш фо́рья лэ́нгирэ гавэнца.
58. Халхуло, Беф-Цуро и Гедоро,
59. Маарафо, Беф-Анофо и Елтеконо: шов фо́рья лэ́нгирэ гавэнца.
60. Кири́аф-Ваало, явирэ́с кхарлапэ Кириафо-Яримо, и Арава: дуй фо́рья лэ́нгирэ гавэнца.
61. Пэ чхучи́ пхув: Беф-Арава, Мидино и Секаха,
62. Нившано, Ир-Мелахо и Эн-Геди: шов фо́рья лэ́нгирэ гавэнца.
63. Нэ Евусеен, Ерусалимо́скирэ манушэ́н, на могиндлэ́ тэ вытрадэн Юда́скирэ чхавэ́, и палдава́ Евусеи дживэ́на Юда́скирэ чхавэ́нца кэ Ерусалимо аж кэ дава́ дывэ́с.
1. Тэ́ньци (потом) выпыя жре́биё Иосифо́скирэ (Ёза́скирэ) чхавэ́нгэ: Иорданостыр пашы́л Ерихо́но, пашы́л Ерихоноскиро пани́ пэ васто́ко, кэ чхучи́ пхув, сави́ тырдэлапэ Ерихоностыр кэ Вефилёскири бэ́рга;
2. Вефилёстыр джа́ла межакири риг кэ Луза, и пириджала кэ Архакири ме́жа кэ Атарофо,
3. и змэкэлапэ кэ мо́рё (дэрья́в), кэ Иафлетоскири риг, пэ Тэлатуны риг Беф-Ороноскири и кэ Газеро, и яго́ро исын пашы́л мо́рё (дэрья́в).
4. Дава́ дорэснэ́ (долынэ) дрэ миштыпна́скири ме́ра Иосифо́скирэ (Ёза́скирэ) чхавэ́: Мана́сия и Ефре́мо.
5. Риг пир ме́жа Ефремо́скирэ чхавэ́нгиро пир лэ́нгирэ кхэри́тка ро́ды сыс дасави́: вастоко́стыр лэ́нгирэ миштыпнаскирэ меракирэ ригаса сыс Атарофо-Адаро кэ Беф-Ороно упратуно;
6. Тэ́ньци (потом) джа́ла межакири риг кэ мо́рё (дэрья́в) севернонэ Михмефафоскирэ ригаса и рискирэ́ла кэ васточно риг пэ Фаанаф-Сило́мо, и обджала лэс васточнонэ Ианохоскирэ рига́тыр;
7. Ианохостыр, ме́жа джа́ла тэлэ́ кэ Атарофо и Наарафо, приячэла кэ Ерихо́но и доджа́ла кэ Иорда́но.
8. Тапуахостыр джа́ла межакири риг кэ мо́рё (дэрья́в), кэ сы́гно рэ́кица (лэнори́) Кана́, и ла́киро яго́ро заджа́ла дрэ мо́рё (дэрья́в). Ѓа́да, исын миштыпна́скири ме́ра Ефремо́скирэ чхавэ́нгирэ пир ро́дыцы, пир кхэри́тка ро́ды (пле́ми).
9. И фо́рья отгинэ́ Ефремо́скирэ чхавэ́нгэ дрэ Манасия́скирэ-чхавэнгири миштыпна́скири ме́ра, сарэ́ фо́рья лэ́нгирэ гавэнца.
10. Нэ Ефремляни на вытрадынэ́ Хананеен, савэ́ дживдэ́ кэ Газеро; палдава́ Хананеи дживдэ́ машкира́л Ефремлянэндэ кэ дава́-паць дывэ́с, плэскири лэ́нгэ дань.
1. Хоро́скирэ Дирижоро́скэ. Сыклякирибэ́н. Кареёскирэ Чхавэ́ндыр. Бьявэскири Гилы́.
2. Миро ило́ исын пхэрдо́ бахталэ́ лавэ́нца: мэ ракира́ва пал крали́скирэ рэ́нды, мири́ чиб исын сыр лачхэ́-чхиныбнарискиро дэсторо (трость).
3. Ту сан най шукарэдыр манушыпаскирэ чхавэ́ндыр, бахталыпэ́н вычхудяпэ тырэ́ уштэндыр: пал-дова́ со Дэвэ́л бахтякирдя́ тут пэ сарэ́ ве́ки.
4. Пхандэ трусця́л пэ́скири курта́ла кэ пэ́скири ґэро́й (бёдро), мурш баро́, пэ́скирэ слава́са и барэ́ вучэдырипнаса,
5. и традэ уклистэ́ миштэ́с пэ́скирэ барэ́ вучэдырипнаса тэ затэрдёс пал патяибэ́н, ковлэ́-илы́ткима и чачипэ́н, а тыро́ чачо́ васт явэ́ла тэ сыклякирэ́л тут тэ кэрэ́л дова́, со́стыр дар лэ́ла.
4. Кай нанэ гурувэ́н, одо́й ясла (кхурлы) исын чхучи́, нэ баро́ прибытко (умалото) явэ́ла гурувэскирэ зорья́тыр.
5. Патяибны́тко якхи́тко на явэ́ла тэ хохавэ́л, нэ начачуно якхи́тко явэ́ла тэ пхэнэ́л хохаибэ́н.
29. Ке́ли мануша́ скэдынэ́пэ кхэтанэ́, Ису́со лыя́ тэ ракирэ́л: “Ѓа́да, исын на́лачхо и напатяибнытко ро́до, саво́ родэ́ла ґерты́к (знаме́ниё); на явэ́ла лэ́нгэ ґерты́к апри́ч Ионаскири ґерты́к.
30. Адя́кэ, сыр Иона сыс ґерты́к ваш манушэ́нгэ Ниневиятыр, адя́кэ-паць Чхаво́ Манушэ́скиро явэ́ла ваш дава́ ро́до.
31. Паш-Дывэсэскири (Татэ-Ригакири) Кра́лица ґаздэ́лапэ тэ сэндинэлпэ манушэ́нца далэ́ родо́стыр и допхэнэ́ла пэ лэ́ндэ: пал-дова́ со ёй явэ́лас пхувья́кирэ ягоро́стыр (краёстыр) тэ шунэ́л Соломоно́скиро годьварипэн; и ада́й исын Екх, Саво́ исын барэды́р Соломоностыр.
32. Ниневиякирэ мануша́ ґаздэ́напэ тэ сэндинэнпэ далэ́ родоса и ёнэ допхэнэна пэ лэ́ндэ, пал-дова́ со ёнэ на рисинэ́ грэхэ́ндыр кэ Дэвэ́л, ке́ли Иона пхэндя́ лав; и ада́й исын Екх, Саво́ исын барэды́р Ионастыр.
33. И ке́ли захачкирэна момолы, на гаравэна ла ци чхувэ́на ла тэл пири́, а дро шандало (подсвечнико), соб (кай) тэ дыкхэ́н мануша́, савэ́ джа́на андрэ́ дро кхэр.
34. Момолытко (свети́льнико) ваш маса́ исын яг. Палдава́, ко́ли якх тыри́ явэ́ла жужы, то кокорэ́ маса́ явэ́на жужэ́; ко́ли якх тыри́ на явэ́ла жужы, тэды ту кокоро́ явэ́са дро цямлыпэ́н (калыпэ́н).
35. Дыкх жа, соб (кай) дуд (свэ́то), саво́ исын дрэ ту́тэ, тэ на явэ́л цямло.
36. Пал-дова́ со, ко́ли сарэ́ тырэ́ маса́ исын святла сыр яг, а нанэ пэ лэ́стэ ни екх цямло штэтыцо, тэды ту явэ́са тэ зяинэс дудэса сыр момолытконэстыр (светильникостыр), саво́ захачкирдо.”
37. Ке́ли Ису́со ракирдя́, екх Фарисеё кхардя́ Лэс кэ хал лэ́стэ; Ёв загия́ и бэсця́ пал сками́нд.
38. Фарисе́и дивиндэпэ, ке́ли дыкхнэ́, со Ису́со на мордя васта́ анги́л хабэ́н.
39. Нэ Рай Дэвэ́л пхэндя́ Лэ́скэ: “Тумэ́, Фарисе́и, какана́ морэна тахтая́ (чашы) и чарэ́ яврестыр, а андра́л, дро тумаро́ ило́ исын пхэрдо́ бокх кэ чу́жо миштыпэ́н и налачхэ́ ду́мы.
40. Тумэ́ сан бигодякирэ! Ци да на Дэвэ́л, Кон кэрдя́ дава́ саро́ яврестыр и андрэстыр.
41. Нэ тумэ́ фэды́р отдэ́н дыибэ́н илэ́стыр долэ́стыр, со тумэ́ндэ исын дрэ тахтая́, и тумэ́ явэ́на жужэ́.
42. Бида тумэ́нгэ, Фарисе́и; пал-дова́ со тумэ́ дэ́на дэ́што ме́ра мятатыр, рутатыр и кажнонэ́ чарьятыр, нэ тумэ́ на думинэ́на пал сэ́ндо и Дэвлэ́скири ла́ска; дава́ трэиндя́ тэ кэрэ́н и адя́кэ-паць тэ на бистрэн пал яви́р.
43. Бида тумэ́нгэ, Фарисе́и: пал-дова́ со тумэ́ камэ́на най фэдэды́р штэ́ты дрэ синагоги и, соб (кай) мануша́ тэ дэн ‘паклоно’ тумэ́нгэ пэ таргитка штэ́ты.
44. Бида тумэ́нгэ: пал-дова́ со тумэ́ сан сы́рбы надыцьлэ маґилы, со мануша́ псирэ́на пир лэ́ндэ и на джинэ́на лэн.”
45. И екх лылваритконэндыр отпхэндя́ Исусо́скэ: “Сыклякирибнарискиро! Ко́ли Ту ракирэ́са адя́кэ, Ту ладжакирэса адя́кэ-паць амэн!”
46. И пхэндя́ Ису́со: “Бида тумэ́нгэ, лылвари́тка: пал-дова́ со тумэ́ чхувэ́на барэ́ пхарипэна дро джиибэ́н пэ манушэ́ндэ, а кокорэ́ на камэ́на ангуштэса тэ чилавэн лэн.
47. Бида тумэ́нгэ; пал-дова́ со тумэ́ кэрэ́на коплицы пророкэнгэ, савэ́н тумарэ́ дада́ замардэ́.
48. Адя́кэ тумэ́ допхэнэна ж пэ тумарэ́ дадэндэ, и подрикирэна лэн дро дова́, со ёнэ кэрдэ́; пал дава́, со ёнэ замарэнас пророкэ́н, а тумэ́ лэ́нгэ кэрэ́на коплицы.
49. Ваш дава́ и Дэвлэ́скирэ годя́са исын пхэндло́: ‘Мэ бичхава́ва лэ́нгэ пророкэ́н и Апостолэн; ёнэ замарэна екхэн, а явирэ́н ёнэ вытрадэна сыр джуклэн’,
50. мэк тэ явэ́л сэ́ндо пэ дава́ ро́до пал пророкэ́нгирэ рата, савэ́ прочхудэ свэто́скирэ англыпна́стыр
51. Авелёскирэ ратэстыр кэ Захариёскиро рат, савэ́с замардэ́ машки́р алта́рё и Кхангирья́кири паш; чачэс, Мэ, ракира́ва тумэ́нгэ: явэ́ла пхучно, сыр трэй далэ́ родо́стыр.
52. Бида тумэ́нгэ, лылвари́тка: пал-дова́ со тумэ́ гаравэна клыдына вударэндыр дро джиныбнаскиро кхэр; тумэ́ ж кокорэ́ на загинэ́ и на мэкнэ́ явирэ́н.”
53. И ке́ли Ису́со пхэндя́ саро́ дава́ лэ́нгэ, лылвари́тка и Фарисе́и лынэ́ тэ рэсэн кэ Ёв холя́са, соб (кай) Ёв тэ отпхэнэл пэ бут пхучыбэна;
54. а кокорэ́ ужакирдэ чораханэ́с тэ ухтылэ́н Лэс дро лав, и соб (кай) ёнэ могинэ́нас тэ бангякирэн Лэс.
Romani Bible Baltic 2019
United Bible Societies for the Baltic Romani Mission