Beblia

1. И выпыя жре́биё Манасия́скирэ родыцо́скэ, адя́кэ сыр ёв сыс Иосифоскиро англатуно́ чхаво́. Махироскэ, Манасия́скирэ англатунэ́ чхавэ́скэ, Галаадо́скирэ дадэ́скэ, саво́ сыс муршари пэ марибэ́н, яця́пэ Галаа́до и Васа́но.

2. Яця́пэ миштыпна́скири ме́ра и явирэ́нгэ Манасия́скирэ чхавэ́нгэ, пир лэ́нгирэ кхэри́тка ро́ды, и Авиезэроскирэ чхавэ́нгэ, и Хелекоскирэ чхавэ́нгэ, и Асриилоскирэ чхавэ́нгэ, и Хефераскирэ чхавэ́нгэ, и Шемидаскирэ чхавэ́нгэ. Ѓа́да, сыс чхавэ́ Манасия́скирэ, Иосифо́скирэ-чхавэ́скирэ мурша́, пир лэ́нгирэ кхэри́тка ро́ды (пле́ми).

3. Салпаадостэ, Хефероскирэ чхавэ́стэ, Галаадо́скирэ чхавэ́стэ, Махироскирэ чхавэ́стэ, Манасия́скирэ чхавэ́стэ, на сыс чхавэ́н, а сыс екх чхая́. Ѓа́да, исын лэ́нгирэ чхаенгирэ лава́: Махла, Ноа, Хогла, Милка и Фирца.

4. Ёнэ явнэ́ кэ раша́й Елиза́ро и кэ Ису́со, Навиноскиро чхаво́, и кэ барыдыра́, и пхэндлэ́: “Рай Дэвэ́л пхэндя́ Мойза́скэ тэ дэл амэ́нгэ миштыпна́скири ме́ра машки́р амарэ́ пшалэ́ндэ”. И дынэ́ лэ́нгэ миштыпна́скири ме́ра, пир Ра́скирэ-Дэвлэ́скиро упхэныбэ́н, машки́р лэ́нгирэ дадэ́скирэ пшалэ́ндэ.

5. И выгия́ Манасияскэ дэш роздыибэна (участки), апри́ч Галаадо́скирэ и Васаноскири пхув, сави́ сыс пал Иорда́но;

6. пал-дова́ со Манасия́скирэ чхая́ дорэснэ́ (долынэ) миштыпна́скири ме́ра машкира́л лэ́скирэ чхавэ́ндэ, а Галаадоскири пхув яця́пэ явирэ Манасия́скирэ чхавэ́нгэ.

7. Межакири риг Манасияскири джа́ла Асиростыр кэ Михмефафо, саво́ исын проти Сихема; адатхы́р джа́ла ме́жа пэ чачи́ (право) риг кэ Эн-Тапуахоскирэ мануша́.

8. Пхув Тапуахо яця́пэ Манасияскэ, а фо́ро Тапуахоскиро пашы́л межакири риг яця́пэ Манасиияскирэ-Ефремо́скирэ чхавэ́нгэ.

9. Адатхы́р межакири риг джа́ла тэлэ́ кэ сы́гно рэ́кица (лэнори́) Кано, паш-дывэсытконэ́ (южнонэ) панескирэ рига́тыр. Фо́рья далэ́ исын Ефремо́скирэ, усае́кх со ёнэ исын тэрдэ́ машки́р Манасия́скирэ фо́рья. Ме́жа Манасияскири – пэ севернонэ рэкицакири (лэньрьякири) риг, и кончынэлапэ дро мо́рё (дэрья́в).

10. Дова́, со исын кэ паш-дывэ́с, дова́ исын Ефремоскиро, а со исын кэ паш-рат, дова́ исын Манасия́скиро; мо́рё (дэрья́в) сыс лэ́нгирэ межаса; кэ Асиро ёнэ приячэна паш-дывэсытконэ́ рига́тыр, и кэ Исахаро васточнонэ рига́тыр.

11. Исахаростэ и Асиростэ исын и Манасияскэ Беф-Сан и штэ́ты, савэ́ исын тэл лэ́скири зор, Ивлеамо и лэ́скирэ штэ́ты, и мануша́ Доракирэ и штэ́ты, савэ́ сыс тэл лэ́скири зор, мануша́ Эн-Доракирэ и штэ́ты, савэ́ сыс тэл лэ́скири зор, мануша́ Фаанахоскирэ и штэ́ты, савэ́ сыс тэл лэ́скири зор, мануша́ Мегидоноскирэ и штэ́ты, савэ́ сыс тэл лэ́скири зор, и три́то округакирэ паша́ Нафефоскиро.

12. Манасия́скирэ чхавэ́ на могиндлэ́ тэ вытрадэн далэ́-форьенгирэ манушэ́н, и Хананеи ячнэ́пэ тэ дживэ́н пэ дая́ пхув.

13. Ке́ли Израилёскирэ чхавэ́ явнэ́ дрэ зор, тэды ёнэ кэрдэ́ Хананеен андынаршчыкэнца (даникэнца), нэ тэ вытрадэн лэн на вытрадынэ́.

14. Иосифо́скирэ (Ёза́скирэ) чхавэ́ ракирдэ́ Исусо́скэ и пхэндлэ́: “Со́скэ ту дыя́н ма́нгэ дрэ миштыпна́скири ме́ра екх жре́биё и екх участко, тэды сыр амэн бут мануша́, пал-дова́ со адя́кэ бахтякирдя́ ман Рай Дэвэ́л?

15. Ису́со пхэндя́ лэ́нгэ: “Ко́ли ту́тэ исын бут мануша́, тэды джа́ дро вэш и одо́й, пэ пхув Ферезеенгири и Рефаимэнгири, роскэр пэ́скэ штэ́то, ко́ли Ефремо́скири бэ́рга ваш ту́кэ исын тясно (танго).

16. Иосифо́скирэ чхавэ́ пхэндлэ́: “На ячэ́лапэ пал амэ́ндэ бэ́рга, пал-дова́ со саструнэ́ марибны́тка вурдына́ сарэ́ Хананеендэ, савэ́ дживэ́на пэ до́ло, сыр одолэ́ндэ, савэ́ исын дрэ Беф-Сана и дрэ штэ́ты, савэ́ исын тэл лэ́скири зор, адя́кэ и одолэ́ндэ, савэ́ исын пэ Израилёскиро до́ло.”

17. Нэ Ису́со пхэндя́ Иосифо́скирэ, Ефремо́скирэ и Манасия́скирэ кхэрэ́скэ: “Ту́тэ исын бут мануша́ и зор ту́тэ исын бари; на екх жре́биё явэ́ла ту́тэ:

18. и бэ́рга явэ́ла тыри́, и дава́ вэш, ту роскэрэса чашча и ёй явэ́ла кэ кокоро́ ла́киро яго́ро; пал-дова́ со ту вытрадэса Хананеен, мэк и исын лэ́ндэ марибны́тка вурдына́ саструнэ́, и мэк исын ёнэ зоралэ́.”

1. Саро́ Израилёскирэ чхавэ́нгиро скэдыибэ́н скэдыяпэ дро Сило́мо, и чхудэ́ одо́й скэдыибна́скири ша́тра (ски́ния), пал-дова́ со пхув сыс залыны лэ́нца.

2. Израилёскирэ чхавэ́ндыр яця́пэ эфта́ ро́дыцы (чанга́), савэ́ на дорэснэ́ (на долынэ) пэ́скири миштыпна́скири ме́ра.

3. И пхэндя́ Ису́со Израилёскирэ чхавэ́нгэ: “Ци ґара́ (длу́гэс) тумэ́ явэ́на тэ кунинэнпэ (тэ на радинэн) пал дова́, соб (кай) тэ джас и тэ лэс дрэ мэкно́ миштыпэ́н (наследиё) пхув, сави́ дыя́ тумэ́нгэ Рай Дэвэ́л, Дэвэ́л, тумарэ́-дадэ́нгиро?

4. Дэн пэ́стыр пир трин мануша́ родыцо́стыр, мэ бичхава́ва лэн, и ёнэ, уштыи, проджа́на пир пхув и обчхинэна ла, сыр трэй тэ роздэс лэ́нгэ пэ миштыпна́скири ме́ра, и явэ́на кэ мэ;

5. мэк тэ роздэн ла пэ эфта́ миштыпнаскирэ меры (паша́); Юда мэк тэ ячэ́лпэ пэ пэ́скири риг пэ паш-дывэ́с (юго), а Иосифоскиро кхэр мэк тэ ячэ́лпэ пэ пэ́скири риг пэ паш-рат (северно);

6. а тумэ́ росчхинэн пхув пэ эфта́ миштыпнаскирэ меры (паша́) и янэ́н ма́нгэ адари́к: мэ чхурдава тумэ́нгэ жре́биё ада́й анги́л Ра́скирэ-Дэвлэ́скиро, тумарэ́ Дэвлэ́скиро муй;

7. а Левитэ́нгэ нанэ паш машки́р тумэ́ндэ, пал-дова́ со свэнтыма Ра́скирэ-Дэвлэ́скири исын лэ́нгири миштыпна́скири ме́ра; Гадо, Рувимо и паш Манасия́скирэ родыцо́стыр дорэснэ́ (долынэ) пэ́скири миштыпна́скири ме́ра пал Иорда́но кэ васто́ко, сави́ дыя́ лэ́нгэ Мо́йза, Ра́скиро-Дэвлэ́скиро писха́ри.

8. Адалэ́ мануша́ уштынэ́ и гинэ́. Ису́со дыя́ манушэ́нгэ, савэ́ гинэ́ тэ росчхинэн пхув дасаво упхэныбэ́н: “Джа́н, обджан пхув, обчхинэн ла и рисён кэ мэ; а мэ ада́й чхурдава тумэ́нгэ жре́биё анги́л Ра́скирэ-Дэвлэ́скиро муй, дро Сило́мо”.

9. Ёнэ гинэ́, прогинэ́ пир пхув и обчхиндлэ́ ла, пир ла́кирэ фо́рья, пэ эфта́-миштыпнаскирэ меры (паша́), дрэ лылвари́, и явнэ́ кэ Ису́со дро ста́но, дро Сило́мо.

10. Ису́со чхурдыя́ лэ́нгэ жре́биё дро Сило́мо анги́л Растэ-Дэвлэ́стэ, и роздыя одо́й Ису́со пхув Израилёскирэ чхавэ́нгэ пир лэ́нгирэ участки (роздыибэна).

11. Пэ́рво жре́биё выгия́ Вениамино́скирэ-чхавэ́нгирэ родыцо́скэ, пир лэ́нгирэ кхэри́тка ро́ды (пле́ми). Риг межакири лэ́нгири пир жре́биё гия́ машки́р Юда́скирэ чхавэ́ндэ и машки́р Иосифо́скирэ чхавэ́ндэ;

12. ме́жа лэ́нгири пэ паш-рати́тко риг лэ́лапэ пашы́л Иорда́но, и проджа́ла дая́ ме́жа пашы́л Ерихо́но паш-дывэсэ́стыр (северостыр), и джа́ла упрэ́ пэ бэ́рга кэ западо, и ла́киро яго́ро исын пэ чхучи́ пхув Бефывено.

13. Одотхы́р межакири риг джа́ла кэ Луза, кэ паш-дывэсы́тко (южно) Лузакири риг, явирэ́с Вефи́лё, и на джа́ла тэлэ́ риг кэ Атароф-Адаро, кэ бэ́рга, сави́ исын пэ паш-дывэсы́тко (югоскири) риг Беф-Ороноскири тэлатуны;

14. тэ́ньчи (потом) ме́жа рискирэ́ла и змэкэлапэ кэ морёскири риг пэ паш-дывэ́с (юго) бэрга́тыр, сави́ исын пэ паш-дывэ́с анги́л Беф-Ороно, и ла́киро яго́ро исын пашы́л Кири́аф-Ваало, явирэ́с кхарлапэ Кири́аф-Иаримо, Юда́скирэ чхавэ́нгирэ фо́рья. Дая́ исын за́падно риг.

15. Паш-дывэсытконэ́ ригаса Кири́аф-Иаримостыр джа́ла ме́жа кэ мо́рё (дэрья́в) и доджа́ла кэ штэ́то, каты́р джа́ла пани́ Нефтоахостыр;

16. тэ́ньчи (потом) ме́жа джа́ла тэлэ́ кэ бэрга́киро яго́ро, саво́ исын анги́л Еномоскирэ чхавэ́скиро до́ло, пэ Рефаимоскиро до́ло, кэ паш-рат (северо), и джа́ла тэлэ́ Еномаскирэ долоса кэ паш-дывэсы́тко Евусоскири риг, и джа́ла кэ Эн-Рогело;

17. Тэ́ньци (потом) рискирэ́ла паш-ратятыр и джа́ла кэ Эн-Шемешо, и джа́ла кэ Гелилофо, саво́ исын проти Адумимоскиро вучипэ́н, и джа́ла тэлэ́ кэ Боганоскиро бар, Рувимо́скирэ чхавэ́скиро;

18. тэ́ньчи (потом) джа́ла на́дур лошчынатыр (Аравиятыр) кэ паш-дывэ́с и джа́ла тэлэ́ пэ лошчы́на (Аравия);

19. адатхы́р джа́ла межакири риг пашы́л Беф-Хогла пэ паш-рат, и ригакиро яго́ро паш дрэ паш-рати́тко (северно) Лондэ морёскиро (дэрьявэ́скиро), пашы́л паш-дывэсы́тко (южно) яго́ро Иорданоскиро. Ѓа́да, исын паш-дывэсы́тко ме́жа. Рига́тыр васточнонатыр межаса сыс Иорда́но.

20. Ѓа́да, сыс Вениамино́скирэ чхавэнгири-миштыпна́скири ме́ра, лэ́скирэ меженца сарэ́ ригэ́ндыр, пир лэ́нгирэ кхэри́тка ро́ды (пле́ми).

21. Фо́рья, со сыс Вениамино́скирэ чхавэ́ндэ лэ́нгирэ родыцо́скэ, пир лэ́нгирэ кхэри́тка ро́ды (пле́ми): Ерихо́но, Беф-Хогла и Емек-Кецицо,

22. Беф-Арава, Цэмараимо и Вефи́лё,

23. Авимо, Фара и Офра,

24. Кефар-Амонаё, Афни и Гева: дэшуду́й фо́рья лэ́нгирэ гавэнца.

25. Гавао́но, Ра́ма и Берофо,

26. Мицфэ, Кефира и Моца,

27. Рекемо, Ирфеилё и Фарала,

28. Цэ́ла, Элефо и Евусо, явирэ́с кхарлапэ Ерусалимо, Гивеафо и Кириафо: дэшуштар фо́рья лэ́нгирэ гавэнца. Ѓа́да, сыс Вениамино́скирэ-чхавэнгири миштыпна́скири ме́ра, пир лэ́нгирэ кхэри́тка ро́ды (пле́ми).

6. Тырэ́ марибны́тка бустя́ (стре́лы) исын востра (чолалэ́) дро ило́ тырэ́ вэргэ́нгирэ, манушыпнаскирэ на́цыи пэрэ́на тэл Ту́тэ.

7. Тыро́ троно, со Дэвэ́л дыя́ ту́кэ, явэ́ла пэ сарэ́ ве́ки, тыро́ крали́скиро дэсто́ сыкавэ́ла, со ту кралинэса чачипныткэс.

8. Ту́кэ исын дро́го чачипэ́н и ту бидыкхэса фуипэ́н, палдава́ Дэвэ́л, тыро́ Дэвэ́л, помакхця тут тэ свэнцякирэл бахтякирдэ дзэтэса (елеёса) анги́л тырэ́ малэндэ.

9. Сарэ́ тырэ́ урибэна́ шука́р кхандэна миро́са, алоёса и касьяса, фэлатинендыр, со исын кэрдэ́ слонытконэ кокалостыр, башаибэн пэ балытка струме́нты радынэна тут.

10. Кральенгирэ чхая́ исын машки́р Тырэ́ патывалэ́ тэрнэ́ джувлендэ, кра́лица исын тэрды пашы́л Тыро́ чачо́ васт дро сувнака́й Иростыр.

11. Шун ман, чха́ё, и дыкх, шун ракхунэс, со мэ пхэна́ва: и бистыр пэ́скирэ манушэ́н и кхэр тырэ́ дадэ́скиро.

12. Крали́с древа́н притырдэла тыро́ шукарипэ́н; пал-дова́ со ёв исын тыро́ рай и ту явэ́са тэ клонинэспэ патыва́са лэ́скэ.

13. Тироскири чхай явэ́ла дарэнца, най барвалэдыр мануша́ явэ́на тэ домарэнпэ кэ тырэ́–илэ́скиро татыпэн.

14. Крали́скири чхай исын най славутнэдыр сарэ́ барэ фэлатинятыр (колово́стыр), ла́киро урибэ́н исын кхудо сувнака́стыр.

15. Ла янэ́на дрэ санэ судэ и́дя; чхае́н, ла́кирэ малнен (подругэн) пал ла́тэ янэ́на кэ кра́ли.

16. Сыр лэн янэ́на, ёнэ явэ́на весе́ла (лошалэ́) и тэ радынэ́нпэ, ке́ли заджа́на дро крали́скиро бари фэлатин/коло́в (дворцо).

17. Тырэ́ чхавэ́ пэ штэ́то тырэ́ дадэ́нгиро; Ту чхувэ́са лэн тхагарьенца тэ кралинэн,

6. Бипатывакиро ману́ш родэ́ла годыпэ́н, и на латхэ́ла нисо́, нэ джиныбэ́н локхэс дэ́лапэ кодолэ́скэ, саво́ исын годыпнаскиро (годьваро́).

1. Дрэ дова́-паць мардо́ (шту́нда) ада́кицы бут мануша́ скэдынэ́пэ кхэтанэ́, со ёнэ лынэ́ тэ тасавэн екх екхэ́с, и Ису́со лыя́ тэ ракирэ́л англэды́р Лэ́скирэ сыкляибнытконэ́нгэ: “Ракхэ́нпэ Фарисиенгирэ рошчынатыр: ракхэ́нпэ лэ́нгирэ дуемуиткиматыр;

2. нэ нанэ нисо́ учхакирдо, соб (кай) тэ на выджа́л пэ якха́ и гарадо́, соб (кай) тэ на явэ́л джиндло́;

3. пал-дова́ со саро́, со тумэ́ пхэнэ́на дрэ калы (цямлы) рат, дова́ явэ́на тэ шунэ́н дро святло дывэ́с, и дова́, со тумэ́ пхэндлэ́ штылэ́с (тихэс) пэ кан, дова́ явэ́на тэ ракирэ́н пэ кхэри́тка стрэхи.

4. Нэ Мэ ракира́ва тумэ́нгэ, Мирэ́ дру́ги (мала́): “На андыршан кодолэндыр, савэ́ мулякирэна тумэн, нэ савэ́ на могинэ́на буты́р нисо́ тэ кэрэ́н.

5. Нэ Мэ сыкава́ва тумэ́нгэ, конэ́стыр трэй тэ дарэ́н: дарэ́н кодолэстыр, конэ́стэ исын зоралыпэ́н тэ чхурдэл тумэн дро геена. Чачо́, Мэ пхэна́ва тумэ́нгэ: дарэнпэ лэ́стыр!

6. Хай, на дуй шпаки бикнэнапэ пал екх асарие? И ни екх лэ́ндыр нанэ бистырдо Дэвлэ́стэ.

7. Тумэ́ндэ аж и бала́ пэ шэро́ сарэ́ гиндлэ́. На андыршан жа: тумэ́ сан кучыдыр, сыр кадалэ́ бут шпаки.

8. Нэ Мэ пхэна́ва тумэ́нгэ: кажнонэс, кон приґалёла Ман и роспхэнэ́ла пал Ма́ндэ анги́л манушэ́стэ, кодолэ́с Мэ приґалёвава анги́л Дэвлэ́скирэ Янголэндэ;

9. и вари-саво́, кон отпхэнэлапэ Ма́ндыр анги́л манушэ́ндэ, кодолэстыр отпхэнавапэ и Мэ анги́л Дэвлэ́скирэ Янголэндэ;

10. и ко́ли вари-кон пхэнэ́ла лав пэ Чхавэ́стэ Манушэскирэстэ, лэ́скэ грэ́хо явэ́ла отмэкно, нэ кодова́, саво́ пхэнэ́ла лав пэ Свэ́нто Ду́хо (Фа́но), лэ́скиро грэ́хо на явэ́ла отмэкно ни дро дава́ ве́ко, ни дро ве́ко, саво́ явэ́ла.

11. Ке́ли ёнэ явэ́на тэ лыджа́н тумэн дрэ синагоги и кэ барыдыра́ и пэ сэнды, на пиридживэн, сыр и со тумэ́ явэ́на тэ отпхэнэн, ци со тэ пхэнэ́н;

12. пал-дова́ со Свэ́нто Ду́хо (Фа́но) явэ́ла тэ сыклякирэ́л тумэн дрэ дова́-паць мардо́, со трэй тэ пхэнэ́н.

13. Тэды вари-кон манушэ́ндыр пхэндя́: “Сыклякирибнарискиро! Пхэн Мирэ́ пшалэ́скэ, соб (кай) ёв тэ росчхувэл пир паша́ (тэ улавэ́л) ма́нца мэкно́ миштыпэ́н, со дад ячкирдя́ амэ́нгэ.”

14. Нэ Ису́со отпхэндя́ Лэ́скэ: “Мро ману́ш, кон чхудя́ ман тэ сэндякирав, ци тэ росчхував пир паша́ (улавав) манкируют тумэ́ндэ?”

15. И Ёв ишчо (инкэ́) пхэндя́ лэ́нгэ сарэ́нгэ: “Ракхэ́нпэ и на традэнпэ тумэ́ пал барвалыпэ́н, пал-дова́ со чачуно́ Манушэ́скиро джиибэ́н на дро дова́, со ци бут барвалыпэна исын лэ́стэ.”

16. И Ису́со роспхэндя́ лэ́нгэ дасаво приме́ро: “Екхэ-барвалэскирэ манушэскири пхув дэ́лас лачхо́ аплодо:

17. и ёв думинэлас пэ́скэ: ‘Со тэ кэра́в ма́нгэ? Ма́ндэ исын на́бут штэ́то, соб (кай) тэ чхував миро гив.’

18. И ёв дурэды́р пхэндя́ пэ́скэ: ґа́да, со мэ кэра́ва? Роспхагирава мири́ шу́рна и чхува́ва нэви́ шу́рна барэды́р, и одо́й мэ кэдава саро́ миро гив и миро миштыпэ́н:

19. Тэды мэ пхэна́ва пэ́скэ: ‘Барвало́ мэ сом пэ бут бэрш: откхинёв, ха, пи, джив, сыр камэ́са.’

20. Нэ Дэвэ́л пхэндя́ лэ́скэ: ‘Дылыно́ ту сан! Дрэ дая́ рат лэ́на ту́тыр тыро́ джиибэ́н; конэ́скэ дава́ саро́ ячэ́лапэ, со ту скэдыян?’

21. Адя́кэ джа́ла кодолэндэ, савэ́ скэдэ́на кучипэ́н пэ́скэ, а на скэдэ́на дова́, со исын мишто́ анги́л Дэвлэ́стэ.”

22. И пхэндя́ Ису́со Пэ́скирэ сыкляибнытконэ́нгэ: “Палдава́ Мэ ракира́ва тумэ́нгэ: на пиридживэн пал тумаро́ джиибэ́н, со тумэ́нгэ тэ хан, ци пал тумарэ́ маса́, со тумэ́нгэ тэ урьен:

23. нау́што джиибэ́н исын на буты́р хабнастыр, нау́што маса́ исын на буты́р урибнастыр?

24. Дыкхэ́н пэ коракэндэ (воронэндэ), ёнэ на чхувэ́на дрэ пхув и на счхинэна; лэ́ндэ нанэ ни пиралы́, ни шу́рна; и Дэвэ́л чалякирэла лэн. Пэ кицы́ фэдыдыр тумэ́ сан чириклендыр?

25. Нэ кон тумэ́ндыр пиридживи пал джиибэ́н, могинэ́ла тэ барьякирэл пэ на́бут пэ́скиро барипэ́н?

26. И ко́ли тумэ́ на могинэ́на тэ кэрэ́н аж дасаво тыкно́ рэндоро, со́скэ пиридживэна тумэ́ пал яви́р кэрибэна?

27. Дыкхэ́н пэ лилии, сыр ёнэ барьёна: ёнэ на кэрэ́на буты́, на кхувэна тхава; нэ Мэ пхэна́ва тумэ́нгэ, со и Соломо́но пэ́скирэ барвалыпнаса на урьеласпэ адя́кэ, сыр кажно лэ́ндыр.

28. Ко́ли ж дасаво урибэ́н Дэвэ́л дэ́ла фэлдытконэ чарьякэ, сави́ ададывэ́с исын пэ фэ́лда, нэ атася́ явэ́ла чхурдыны дро бов, тэды пэ кицы́ фэды́р Ёв дэ́ла тумэ́нгэ урибэ́н, тумэ́ ж сан набарэ́ – патяибнаскирэ мануша́?

29. На рикирэ́н екх дро шэро́, со тумэ́нгэ тэ хан ци тэ пьен, и тумэ́ на пиридживэн;

30. пал-дова́ со сарэ́ на́цыи далэ́ свэто́стыр родэ́на дава́, и тумаро́ Дад джинэ́ла, со тумэ́ндэ исын трэ́бима дро дава́ саро́;

31. а родэ́н Лэ́скиро Кралипэ́н, и дова́ саро́ явэ́ла дыно́ тумэ́нгэ.

Romani Bible Baltic 2019

United Bible Societies for the Baltic Romani Mission