Bible in one year - Пэ Балтитко Романи чиб

Bible in one year April 16

1. Тэ́ньци Левитэ́нгирэ-стрэчакирэ барыдыра́ явнэ́ кэ раша́й Елиза́ро и кэ Ису́со, Навиноскиро чхаво́, и кэ Израилёскирэ-чхавэ́нгирэ барыдыра́ пэ стрэ́чы,

2. и ракирдэ́ лэ́нгэ дро Сило́мо, пэ Ханаано́скири пхув, и пхэндлэ́: “Рай Дэвэ́л ракирдя́ пир Мойзастэ тэ дэн амэ́нгэ фо́рья ваш джиибэ́н и лэ́нгири пхув ваш амарэ́ кхэритконэ́ мурдалэ́нгэ (ското)”.

3. И дынэ́ Израилёскирэ чхавэ́ Левитэ́нгэ пэ́скирэ миштыпнаскирэ мератыр, пир Ра́скирэ-Дэвлэ́скиро упхэныбэ́н, далэ́ фо́рья лэ́нгирэ пхувья́са.

4. Выгия́ жре́биё Каафовоскирэ кхэритконэ́ родэ́нгэ; и яця́пэ пир жре́биё рашаскирэ Аароно́скирэ чхавэ́нгэ, Левитэ́нгэ, Юда́скирэ родыцо́стыр, и Симеоноскирэ родыцо́стыр, и Вениамино́скирэ родыцо́стыр, дэшутрин фо́рья;

5. а явирэ́нгэ Каафоскирэ чхавэ́ндыр: Ефремо́скирэ кхэритконэ́ родэндыр родыцо́стыр, и Дано́скирэ родыцо́стыр, и Манасия́скирэ родыцоскирэ пашатыр (пашэстыр), пир жре́биё, яця́пэ дэш фо́рья.

6. А Гирсоноскирэ чхавэ́нгэ – Исахароскирэ-кхэритконэ́ родо́стыр, со исын дрэ лэ́нгиро ро́дыцо и Асироскирэ родыцо́стыр, и Нефалимоскирэ родыцо́стыр, и Манасия́скирэ-родоскирэ пашатыр дрэ Васа́но, пир жре́биё, ячнэ́ дэшутрин фо́рья;

7. Мерариноскирэ чхавэ́нгэ, пир лэ́нгирэ кхэри́тка ро́ды, Рувимо́скирэ родыцо́стыр, Гадо́скирэ родыцо́стыр и Завулоноскирэ родыцо́стыр дэшуду́й фо́рья.

8. И отдынэ́ Израилёскирэ чхавэ́ Левитэ́нгэ далэ́ фо́рья лэ́нгирэ пхувья́са, сыр ракирдя́ Рай Дэвэ́л пирда́л Мойзастэ, пир жре́биё.

9. Юда́скирэ-чхавэ́нгирэ родыцо́стыр и Симеоноскирэ-чхавэ́нгирэ родыцо́стыр дынэ́ фо́рья, савэ́ ада́й кхардэ́ пир лав:

10. Аароно́скирэ чхавэ́нгэ, Каафоноскирэ кхэритконэ́ родо́стыр, Левиёскирэ чхавэ́ндыр, адя́кэ сыр жре́биё лэ́нгиро сыс пэ́рво,

11. дынэ́ фо́ро Кири́аф-Арба, Енакоскиро дад, явирэ́с кхарлапэ Хевро́но, пэ Юдаскири бэ́рга, паш-форитко пхув сыс пашы́л ла́тэ;

12. а фэ́лда далэ́ форо́скири и лэ́скирэ гава́ отдынэ́ дрэ маёнко Халевоскэ, Ефонияскирэ чхавэ́скэ.

13. И адя́кэ рашаскирэ Аароно́скирэ чхавэ́нгэ дынэ́ знашыбнаскирэ фо́рья ваш умарибнарьенгэ – Хевро́но и лэ́скири пхув, – Ливна и ла́кири пхув,

14. Иатиро и лэ́скири кхэтаны́ пхув, – Ештэмо и лэ́скири кхэтаны́ пхув,

15. Холоно и лэ́скири кхэтаны́ пхув, – Давиро и лэ́скири кхэтаны́ пхув,

16. Аино и лэ́скири кхэтаны́ пхув, – Юта и ла́кири кхэтаны́ пхув, – Беф-Шэмешо и лэ́скири кхэтаны́ пхув: еня́ фо́рья дуе далэ́ родыцэндыр;

17. а Вениамино́скирэ родыцо́стыр: – Гавао́но и лэ́скири кхэтаны́ пхув, – Гева и ла́кири кхэтаны́ пхув,

18. Анафофо и лэ́скири кхэтаны́ пхув, – Алмоно и лэ́скири кхэтаны́ пхув: штар фо́рья.

19. Сарэ́ фо́рья Аароно́скирэ чхавэ́нгэ, рашангэ, ячнэ́пэ дэшутрин фо́рья лэ́нгирэ кхэтанунэ пхувьенца.

20. И Каафоскирэ чхавэ́нгирэ кхэритконэ́ родыцэнгэ, Левитэ́нгэ, явирэ Каафоноскирэ чхавэ́ндыр, пир лэ́нгиро жре́биё, ячнэ́пэ фо́рья Ефремо́скирэ родыцо́стыр;

21. и дынэ́ лэ́нгэ знашыбнаскиро фо́ро ваш умарибнарискэ – Сихемо и лэ́скири кхэтаны́ пхув, пэ Ефремо́скири бэ́рга, – Гезеро и лэ́скири кхэтаны́ пхув,

22. и Кивцаимо и лэ́скири кхэтаны́ пхув, Беф-Ороно и лэ́скири кхэтаны́ пхув: штар фо́рья;

23. Дано́скирэ родыцо́стыр: Елфеке и лэ́скири кхэтаны́ пхув, – Гивефоно и лэ́скири кхэтаны́ пхув,

24. Аиалоно и лэ́скири кхэтаны́ пхув, – Гаф-Римоно и лэ́скири кхэтаны́ пхув: штар фо́рья;

25. пашатыр (пашэстыр) Манасия́скирэ родыцо́стыр: – Фаанахо и лэ́скири кхэтаны́ пхув, – Гаф-Римоно и лэ́скири кхэтаны́ пхув: дуй фо́рья.

26. Сарэ́ фо́рья лэ́нгирэ пхувьенца сыс дэш, со ячнэ́пэ явирэ родэ́нгэ Каафоскирэ чхавэ́ндыр.

27. А Гирсоноскирэ чхавэ́нгэ, Левитоскирэ родо́стыр, дынэ́: пашатыр Манасия́скирэ родыцо́стыр знашыбнаскиро фо́ро ваш умарибнарискэ – Голано дрэ Васа́но и лэ́скири кхэтаны́ пхув, и Беештера и ла́кири кхэтаны́ пхув: дуй фо́рья;

28. Исахароскирэ родыцо́стыр: – Кишыоно и лэ́скири кхэтаны́ пхув, – Даврафо и лэ́скири кхэтаны́ пхув,

29. Ярмуфо и лэ́скири кхэтаны́ пхув, – Ен-Ганимо и лэ́скири кхэтаны́ пхув: штар фо́рья;

30. Асироскирэ родыцо́стыр: – Мишало и лэ́скири кхэтаны́ пхув, Авдоно и лэ́скири пхув,

31. Хелкафо и лэ́скири кхэтаны́ пхув, – Рехово и лэ́скири кхэтаны́ пхув: штар фо́рья;

32. Нефалимоскирэ родыцо́стыр знашыбнаскиро фо́ро ваш умарибнарискэ – Кедесо дрэ Галиле́я и лэ́скири кхэтаны́ пхув, – Хамоф-Доро и лэ́скири кхэтаны́ пхув, – Карфано и лэ́скири кхэтаны́ пхув: трин фо́рья.

33. Гирсоноскирэ чхавэ́нгэ пир лэ́нгирэ кхэри́тка ро́ды (пле́ми), дорэснэ́ дэшутрин фо́рья лэ́нгирэ пхувья́са сарэ́ форье́ндыр.

34. Мерарискирэ-чхавэ́нгирэ кхэритконэ́ родо́скэ, палатунэ́ (последнёнэ) Левитэ́нгэ, дынэ́: Завулоноскирэ родыцо́стыр Иокнеамо и лэ́скири кхэтаны́ пхув, Карфо и лэ́скири кхэтаны́ пхув,

35. Димна и ла́кири кхэтаны́ пхув, Нагалало и лэ́скири кхэтаны́ пхув: штар фо́рья;

36. Рувимо́скирэ родыцо́стыр Бецэро и лэ́скири кхэтаны́ пхув, Яца и лэ́скири кхэтаны́ пхув,

37. Кедемофо и лэ́скири кхэтаны́ пхув, – Мефаафо и лэ́скири кхэтаны́ пхув: штар фо́рья;

38. Гадо́скирэ родыцо́стыр: знашыбнаскирэ фо́рья ваш умарибнарискэ – Рамо́фо дрэ Галаа́до и лэ́скири кхэтаны́ пхув, – Маханаимо и лэ́скири кхэтаны́ пхув,

39. Есево́но и лэ́скири кхэтаны́ пхув, – Иазеро и лэ́скири кхэтаны́ пхув: сарэ́ сыс штар фо́рья.

40. Сарэ́ фо́рья Мерарискирэ чхавэ́нгэ пир лэ́нгирэ кхэри́тка ро́ды, палатунэ́ (последнёнэ) Левитэнтирэ родыцэнгэ, пир жре́биё, ячнэ́пэ дэшуду́й фо́рья.

41. Сарэ́ Левитэ́нгирэ фо́рья машки́р Израилёскирэ-чхавэ́нгиро маенко (владениё) сыс штардэша́ охто́ фо́рья лэ́нгирэ пхувья́са кхэтанунэ.

42. Пашэ далэ́ фо́рья сыс: пашы́л кажно фо́ро, пашы́л лэ́стэ сыс кхэтаны́ пхув – адя́кэ сыс пашы́л далэ́ сарэ́ фо́рья.

43. Адя́кэ отдыя́ Рай Дэвэ́л Израилёскэ сари́ пхув, пал сави́ совлахадя́ Ёв тэ дэл лэ́нгирэ дадэ́нгэ, и ёнэ дорэснэ́ (долынэ) ла дро мэкно́ миштыпэ́н (наследиё) и лынэ́ тэ дживэ́н пэ ла́тэ.

44. И дыя́ лэ́нгэ Рай Дэвэ́л рама́нё (покоё) сарэ́ ригэ́ндыр, сыр совлахадя́ лэ́нгирэ дадэ́нгэ; и нико́н лэ́нгирэ сарэ́ вэргэ́ндыр на вырикирдя проти лэ́ндэ; сарэ́н лэ́нгирэ вэргэ́н Рай Дэвэ́л отдыя́ дрэ лэ́нгирэ васта́.

45. На яця́пэ ние́кх лав, саво́ на кэрдя́пэ чачипна́са сарэ́ лачхэ́ лавэ́ндыр, савэ́ Рай Дэвэ́л ракирдя́ Израилёскирэ кхэрэ́скэ; саро́ кэрдя́пэ кэ ко́нцо (кэ яго́ро) (сполниндяпэ).

Joshua 22:1-34

1. Тэды Ису́со кхардя́ кэ пэ ро́дыцо Рувимоскиро, Гадоскиро и паш Манасия́скиро ро́дыцо, и пхэндя́ лэ́нгэ:

2. “Тумэ́ кэрдэ́ саро́, со ракирдя́ тумэ́нгэ Мо́йза, Ра́скирэ-Дэвлэ́скиро писха́ри, и кандынэ́ мирэ́ лава́ дрэ саро́, со мэ припхэндём тумэ́нгэ;

3. тумэ́ на ячкирдэ́ пэ́скирэ пшалэ́н пэ бут дывэса́ кэ дава́ дывэ́с, и кэрдэ́, со трей тэ кэрэ́н пир Ра́скирэ-Дэвлэ́скиро, тумарэ́ Дэвлэ́скиро упхэныбэ́н:

4. акана́ тумаро́ Рай Дэвэ́л, Дэвэ́л, штылякирдя (успокоиндя) тумарэ́ пшалэ́н, сыр ракирдя́ лэ́нгэ; и адя́кэ, рисён и джа́н дрэ тумарэ́ ша́тры, пэ тумарэ́ пхувья́, сави́ дыя́ тумэ́нгэ Мо́йза, Ра́скирэ-Дэвлэ́скиро писха́ри пал Иорда́но;

5. екх причхувэ́н зор (старинэнпэ) кучэс тэ кэрэ́н саро́ (заповеди) и Зако́но, саво́ дыя́ тэ кэрэ́н кэ ко́нцо (кэ яго́ро) тумэ́нгэ Мо́йза, Ра́скирэ-Дэвлэ́скиро писха́ри: тэ рикирэ́н сыр Дро́гима Рас-Дэвлэ́с, тумарэ́ Дэвлэ́с дро пэ́скиро ило́, тэ псирэ́н сарэ́ Лэ́скирэ дромэ́нца, тэ ракхэ́н Лэ́скирэ припхэныбэна́, тэ причхувэспэ кэ Ёв и тэ дынаринэс Лэ́скэ сарэ́ тумарэ́ илэ́са и сарэ́ тумарэ́ деса”.

6. Коригэды́р (позже) Ису́со бахтякирдя́ лэн и отмэкхця лэн, и ёнэ розгинэпэ пир пэ́скирэ ша́тры.

7. Екхэ Манасия́скирэ родыцоскирэ пашакэ дыя́ Мо́йза миштыпна́скири ме́ра дро Васа́но, а явирэ лэ́скирэ пашакэ дыя́ Ису́со миштыпна́скири ме́ра лэ́скирэ пшалэ́нца пир дая́ риг Иорда́но кэ западо. И ке́ли лэн отмэкця́ Ису́со дрэ лэ́нгирэ ша́тры и бахтякирдя́ лэн,

8. то пхэндя́ лэ́нгэ: “Барэ́ барвалыпнаса тумэ́ рисёна дрэ тумарэ́ ша́тры, бутэ́ скотоса, рупэ́са, сувнака́са, харкомаса и састырэса, и бутэ́ идяса; роздэн дорэсыбэ́н, саво́ лынэ́ тумэ́ тумарэ́ вэргэ́ндыр, машки́р пэ́скирэ пшалэ́ндэ”.

9. И рисинэ́, и гинэ́ чхавэ́ Рувимо́скирэ и чхавэ́ Гадо́скирэ и паш Манасия́скиро ро́дыцо Израилёскирэ чхавэ́ндыр Силомостыр, саво́ исын пэ Ханаано́скири пхув, соб (кай) тэ джас пэ Галаадоскиро пхув, пэ пхув пэ́скирэ маёнкостыр (владениё), сави́ дорэснэ́ ёнэ дрэ миштыпэ́н (владениё) пир Ра́скирэ-Дэвлэ́скиро упхэныбэ́н, саво́ сыс дыно́ пир Мойзастэ.

10. Сыр явнэ́ ёнэ пашы́л ме́жы пэ пхув, со исын пашы́л Иорда́но пэ Ханааноскиро пхув, чхавэ́ Рувимо́скирэ и чхавэ́ Гадо́скирэ и Манасияскири паш ро́дыцо кэрдэ́ одо́й пашы́л Иорда́но алта́рё, баро́ жэртвенико пир бицялыбэн.

11. И шундлэ́ яви́р Израилёскирэ чхавэ́, со ракирэ́на: Ѓа́да, чхавэ́ Рувимо́скирэ и чхавэ́ Гадо́скирэ и паш Манасияскири ро́дыцо кэрдэ́ алта́рё пэ Ханаано́скири пхув, пэ Иорданоскири пхув, анги́л Израилёскирэ чхавэ́ндэ.

12. Ке́ли шундлэ́ дава́ Израилёскирэ чхавэ́, тэды скэдыяпэ саро́ Израилёскирэ-чхавэ́нгиро скэдыибэ́н дро Сило́мо, соб (кай) тэ джас проти лэ́ндэ марибна́са.

13. Ѓалён, и Израилёскирэ чхавэ́ англэды́р бичхадэ́ кэ чхавэ́ Рувимо́скирэ и кэ чхавэ́ Гадо́скирэ и кэ паш Манасия́скиро ро́дыцо пэ Галаадоскири пхув Финеесос, раша́с, Елизароскирэ чхавэ́с.

14. И лэ́са лынэ́ дэшэн барыдырэ́н, пир барыдырэстэ пэ стрэ́чы (поколении) сарэ́ Израилёскирэ родэндыр; кажно (сва́ко) лэ́ндыр сыс родоскирэ барыдырэ́са пэ тысёнцы Израилёскирэ.

15. И явнэ́ ёнэ кэ чхавэ́ Рувимо́скирэ и кэ чхавэ́ Гадо́скирэ и кэ паш Манасия́скиро ро́дыцо, пэ Галаадоскири пхув, и ракирдэ́ лэ́нгэ и пхэндлэ́:

16. “Адя́кэ ракирэ́ла саро́ Ра́скирэ-Дэвлэ́скиро скэдыибэ́н: ‘Саво́ дасаво чорипэ́н (приступлениё) кэрдэ́ тумэ́ анги́л Израилёскирэ Дэвлэ́стэ, со отгинэ́ какана́ Дэвлэ́стыр, кэри пэ́скэ алта́рё и ґаздынэ́пэ акана́ проти Растэ-Дэвлэ́стэ?

17. Нау́што на ухты́лла (на́доси) ваш тумэ́нгэ Фегороскиро чорипэ́н, савэ́стыр амэ на выжужакирдямпэ кэ дава́ дывэ́с, и пал саво́ сыс мэрибэ́н пэ Ра́скирэ-Дэвлэ́скиро скэдыибэ́н?

18. А тумэ́ ададывэ́с отджана Ра́стыр-Дэвлэ́стыр! Дадывэс тумэ́ ґаздэ́напэ проти Растэ-Дэвлэ́стэ, атася́ росхолясола Рай Дэвэ́л пэ сарэ́ Израилёскирэ манушэ́ндэ.

19. Ко́ли пхув со тумэ́ дорэснэ́ здэлапэ тумэ́нгэ нажужы, тэды пириджан пэ пхув Ра́скирэ-Дэвлэ́скиро маёнкоскири (владениёскири), пэ сави́ исын Ра́скирэ-Дэвлэ́скири ша́тра (ски́ния), лэн миштыпна́скири ме́ра машки́р амэ́ндэ, и на ґаздэ́нпэ проти Растэ-Дэвлэ́стэ, и пэ амэ́ндэ на ґаздэ́нпэ, на кэрэ́н пэ́скэ алта́рё, апри́ч амарэ́ Ра́скирэ-Дэвлэ́скирэ, Дэвлэ́скирэ алтарёстыр.

20. Ци на екх Ахано, Заракиро чхаво́, кэрдя́ проштавибэн (приступлениё), лыя́ совлахадэстыр, а холы́ сыс пэ сарэ́ Израилёскирэ манушэ́ндэ? На екх ёв, кон мыя́ пал пэ́скиро чорипэ́н.’”

21. Чхавэ́ Рувимо́скирэ и чхавэ́ Гадо́скирэ и паш Манасия́скиро ро́дыцо дрэ отпхэныбэ́н пэ дава́ ракирдэ́ Израилёскирэ тысёнцэнгирэ барыдырэ́нгэ:

22. “Дэвэ́л дэвлэнгиро, Рай Дэвэ́л, Дэвэ́л дэвлэнгиро, Рай Дэвэ́л, Ёв джинэ́ла, и Израилё мэк тэ джинэ́л! Ко́ли амэ ґаздасапэ и отджаса Ра́стыр-Дэвлэ́стыр, тэды мэк тэ на тангинэ́л амэн Рай Дэвэ́л дрэ дава́ дывэ́с!

23. Ко́ли амэ кэрдя́м алта́рё (жэртвенико) ваш дова́, соб (кай) тэ отджас Ра́стыр-Дэвлэ́стыр, и ваш дова́, соб (кай) тэ янас пэ лэ́стэ цэ́ло схачкирибэ́н и маруно́ яныбэ́н и, соб (кай) тэ кэра́с пэ лэ́стэ рама́нё (ми́рно) свэ́нто яныбэ́н Ра́скэ-Дэвлэ́скэ: тэды мэк тэ пхучэл Кокоро́ Рай Дэвэ́л!

24. Нэ амэ кэрдя́м дава́ пир зракхибэ́н долэ́стыр, соб (кай) дрэ яви́р часо тэ на пхэнэ́н тумарэ́ чхавэ́ амарэ́ чхавэ́нгэ: “Со тумэ́нгэ кэ Рай Дэвэ́л, Дэвэ́л Израилёскиро!

25. О Рай Дэвэ́л чхудя́ межакирэ ригаса Иорда́но машки́р амэ́ндэ и тумэ́ндэ, чхавэ́ Рувимо́скирэ и чхавэ́ Гадо́скирэ: нанэ тумэ́нгэ паш дрэ Растэ-Дэвлэ́стэ”. Адя́кэ тумарэ́ чхавэ́ на домэкэнас бы амарэ́ чхавэ́н тэ дэн паты́в Ра́скэ-Дэвлэ́скэ.

26. Палдава́ амэ пхэндям: ‘Кэра́са пэ́скэ алта́рё на ваш цэ́ло схачкирибэ́н и на ваш свэ́нто яныбэ́н Ра́скэ-Дэвлэ́скэ’,

27. нэ, соб (кай) ёв, алта́рё машки́р амэ́ндэ и тумэ́ндэ тэ явэ́л якхитконэса, машки́р явирэ амарэ́ ро́ды, тэ явэ́л якхитконэса, со амэ могинаса тэ дынарина́с Дэвлэ́скэ цэлонэ́ схачкирибнаса амарэса и амарэ́ свэнтонэ́ яныбнаса и амарэ́ парикирибнаса, и, соб (кай) дро яви́р часо тэ на пхэнэ́н тумарэ́ чхавэ́ амарэ́ чхавэ́нгэ: ‘Нанэ тумэ́нгэ паш дрэ Растэ-Дэвлэ́стэ’.

28. Амэ ракирдям: ‘Ко́ли пхэнэ́на адя́кэ амэ́нгэ и родэ́нгэ амарэнгэ дрэ яви́р часо, тэды амэ пхэна́са: Тумэ́ дыкхэ́на Раскири-Дэвлэ́скири алтарёскири копия, сави́ кэрдэ́ амарэ́ дада́ на ваш цэ́ло схачкирибэ́н и на ваш свэ́нто яныбэ́н Раске-Дэвлэ́скэ, нэ соб (кай) дава́ тэ явэ́л якхитконэса машки́р тумэ́ндэ и амэ́ндэ.’

29. Мэк тэ на явэ́л дава́, соб (кай) тэ ґаздэспэ амэ́нгэ проти Растэ-Дэвлэ́стэ и тэ отджас акана́ Ра́стыр-Дэвлэ́стыр, и тэ кэра́с свэ́нто яныбэ́н Дэвлэ́скэ ваш цэ́ло схачкирибэ́н и ваш марэскиро яныбэ́н и ваш свэ́нто яныбэ́н, апри́ч амарэ́ Ра́скирэ-Дэвлэ́скиро, Дэвлэ́скиро алта́рё, саво́ исын анги́л Лэ́скири ша́тра (ски́ния)”.

30. Раша́й Финеесо, скэдыибнаскирэ барыдыра́ и шэралэ́ пэ тысёнцы Израилёскирэ, савэ́ сыс лэ́са, шундлэ́ лава́, савэ́ ракирдэ́ чхавэ́ Рувимо́скирэ и чхавэ́ Гадо́скирэ и чхавэ́ Манасия́скирэ, и шардэ лэн.

31. И пхэндя́ Финеесо, Елизароскиро чхаво́, раша́й, чхавэ́нгэ Рувимоскирэнгэ и чхавэ́нгэ Гадоскирэнгэ и чхавэ́нгэ Манасияскирэнгэ: “Ададывэ́с амэ уджиндям, со Рай Дэвэ́л исын машки́р амэ́ндэ, со тумэ́ на кэрдэ́ анги́л Дэвлэ́стэ проштавибэн дро дава́, акана́ тумэ́ зракхнэ́ Израилёскирэ чхавэ́н Ра́скирэ Дэвлэ́скирэ вастэ́стыр”.

32. И рисия́ Финеесо, чхаво́ Елизароскиро, раша́й, и барыдыра́ Рувимо́скирэ чхавэ́ндыр и Гадо́скирэ чхавэ́ндыр пэ Ханаано́скири пхув кэ Израилёскирэ чхавэ́, и яндлэ́ лэ́нгэ отпхэныбэ́н.

33. И чхавэ́ Израилёскирэ шардэ дава́, и бахтякирдэ Израилёскирэ чхавэ́ Рас-Дэвлэ́с, и отчхудэ гиибэн проти лэ́ндэ марибна́са, соб (кай) тэ на нангякирэн пхув, пэ сави́ дживдэ́ чхавэ́ Рувимо́скирэ и чхавэ́ Гадо́скирэ.

34. И кхардэ́ чхавэ́ Рувимо́скирэ и чхавэ́ Гадо́скирэ алта́рё Эд (Якхи́тко), пал-дова́ со ёнэ пхэндлэ́: Эд исын Якхи́тко машки́р амэ́ндэ, со Рай Дэвэ́л исын амаро́ Дэвэ́л.

Psalms 46:7-11

7. На́цыи росхолясынэ, кралипэна́ кхардэпэ криг (згинэ) штэто́стыр, а Дэвэ́л пхэндя́ Пэ́скирэ заня́са и пхув биладыя.

8. Рай Дэвэ́л, болыбна́скирэ-янголэ́нгиро, исын амэ́нца, Яково́скиро Дэвэ́л исын амаро́ гарадыипэн. Сэ́ла.

9. Явэ́н, дыкхэ́н Ра́скирэ-Дэ-влэскирэ бутя́, Кон кэрдя́ замэкибэн пэ пхув;

10. Кон кэрэ́ла адя́кэ, со марибэна кэ пхувья́кирэ яго́ры (краи́) кончынэнапэ, Ёв пхагирэ́ла лу́ко и пхагирэ́ла чхурдыпнытко буст (коп΄е) пэ котэра́; Ёв хачкирэ́ла сарэ́са яга́са марибны́тка вурдэна́.

11. Явэ́н штыл и уджинэ́н: со мэ сом Дэвэ́л. Ман явэ́на тэ барьякирэ́н кэ вучипэ́н на́цыи, Ман явэ́на тэ барьякирэ́н кэ вучипэ́н сарэ́, кон исын пэ пхув.

Proverbs 14:12-13

12. Исын дром, саво́ здэлапэ манушэ́скэ, со ёв исын маму́й (пря́мо), нэ пэ ко́нцо (пэ яго́ро) ёв лыджа́ла кэ мэрибэ́н.

13. Мэк ману́ш и салапэ, нэ пэ ило́ лэ́стэ сашты́ тэ явэ́л дукх; и бари ра́дыма яви́р мо́ло пириджала дро калыпэ́н.

Lukaš 13:1-22

1. Дро дова́-паць часо явнэ́ мануша́ и роспхэндлэ́ Исусо́скэ пал манушэ́ндэ Галилеятыр, сыр Пила́то змешындя кхэтанэ́ лэ́нгирэ рата ратэнца, савэ́ сыс сыр свэ́нто дыибэ́н Дэвлэ́скэ.

2. И ке́ли Ёв отпхэнэ́лас лэ́нгэ пэ дава́, то пхэндя́ адя́кэ: “Со тумэ́ думинэ́на, со кадалэ́ Галилеякирэ мануша́ сыс барэды́р грэхи́тка, сыр сарэ́ яви́р Галилеякирэ мануша́, со ёнэ ада́кицы мэнчындлэпэ?

3. Над, Мэ пхэна́ва тумэ́нгэ, со, ко́ли тумэ́ на рискирэна пэ́скиро джиибэ́н кэ Дэвэ́л, тэды тумэ́ адя́кэ-паць хасёна.

4. Ци тумэ́ думинэ́на, со кодолэ́ дэшуохто (бидуе́нгиро биш) манушорэ, пэ конэ́стэ пыя́ Силаамоскири вучарды́ (башня) и примардя лэн, сыс буты́р бангэ́, сыр сарэ́ яви́р мануша́, савэ́ дживэ́на кэ Ерусалимо?

5. Над, Мэ пхэна́ва тумэ́нгэ, со, ко́ли тумэ́ на рискирэна пэ́скиро джиибэ́н грэхэ́ндыр кэ Дэвэ́л, тэды тумэ́ адя́кэ-паць хасёна.”

6. И пхэндя́ Ису́со дасаво приме́ро (сыкаибэ́н): “Вари-савэ́ манушэ́стэ сыс инжыритко кашт (дрэ́во), саво́ сыс чхудо дро винагра́днико, и ёв явдя́ тэ родэ́л барьякирдэ́ (пло́ды) пэ лэ́стэ и на латхэлас ни екх.

7. И ёв пхэндя́ садовникоскэ (барьякирэскэ): ‘Дыкх, Мэ ужэ три́то бэрш, сыр мэ ява́ва тэ родав барьякирдэ́ пэ дава́ инжыритко кашт и на латхава нисо́: чингир дава́ кашт тэлэ́; со́скэ ёв ивья́ (дармэс) залэла пхув?’

8. Нэ барьякирэскиро отпхэндя́ хула́скэ: ‘Раё, мэк лэс ишчо (инкэ́) пэ бэрш, пака Мэ обґанавава лэс и чхува́ва упрэ́ гнэё (мэста),

9. и, ко́ли кашт дэ́ла фэды́р барьякирдо́; а ко́ли над, тэды ту могинэ́са тэ чингирэс тэлэ́.’”

10. И Ёв сыклякирдя́ дрэ екх синагога дро са́вато.

11. Одо́й сыс екх джувлы́, сави́ сыс бизорьякири дэшуохто бэрш налачхэ́ духо́стыр (фаностыр); ёй сыс бандькирды и на могиндя́ тэ розбандёл.

12. И ке́ли Ису́со дыкхця́ ла, Ёв кхардя́ ла кэ Пэ и пхэндя́: “Джувлие, яв састы тырэ́ бизорьякирибнастыр.”

13. И Ёв чхудя́ упрэ́ Лэ́скирэ васта́ пэ ла́тэ; и ада́й жэ ёй яця́ роўно и славиндя парикирибнаса Дэвлэ́с.

14. Нэ синагогакиро барыдыро́ холя́сыя, со Ису́со высастякирдя́ дро са́вато, и палдава́ ёв пхэндя́ манушэ́нгэ: “Исын шов дывэса́, ке́ли сашты́ (можна) тэ кэрэ́н буты́; явэ́н дрэ далэ́ дывэса́ и састён, а на дро са́вато.”

15. Пал дава́ Рай Дэвэ́л отпхэндя́ лэ́скэ адя́кэ: “Дуемуитко, ту сан! Ци кажно тумэ́ндыр на пирипхандэла пэ́скирэ гурувэ́с ци осло́с катухостыр и на лыджалэс лэс тэ панякирэл?

16. И кадая́ джувлы́, сави́ исын Авраамоскири прачхай, савья́ на́лачхо спхандя пэ дэшуохто бэрш, со ж, ци на трэиндя́ ла тэ отмэкав далэ́ пхандыпнастыр саватонэ́ (суботонэ́)?”

17. И ке́ли Ёв пхэндя́ дава́, сарэ́ Лэ́скирэ вэ́рги ладжандынэ; и сарэ́ мануша́ радындлэпэ Лэ́скирэ славнонэ бутендыр, савэ́ Ёв кэрдя́.

18. Ису́со ж пхэндя́: “Пэ со зджа́ла (поджала) Дэвлэ́скиро Кралипэ́н дро Болыбна́скиро Раё. Со́са Мэ могина́ва тэ припарував (тэ прироўнинав) лэс?

19. Ёв исын сы́рбы гарчычно зя́рка, сави́ ману́ш чхудя́ дрэ пхув пэ пэ́скири бар; и ёй выбария и яця́ сыр баро́ кашт (дрэ́во), кай чирикля́ болыбны́тка гарадёнас дрэ лэ́скирэ рандя́.”

20. И нэвэ́стыр Ёв пхэндя́: “Со́са Мэ могина́ва тэ припарував (тэ прироўнинав) Дэвлэ́скиро Кралипэ́н дро Болыбна́скиро Раё?

21. Дэвлэ́скиро Кралипэ́н дро Болыбна́скиро Раё исын сы́рбы дрожджы (рошчына), савэ́ джувлы́ лыя́ и замешындя дрэ трин меры яржо́, пака саро́ хумэр (цясто) на яця́ шутло.”

22. И джа́лас Ису́со пир фо́рья и гава́ и сыклякирэлас манушэ́н, ке́ли Ёв джа́лас дро Ерусалимо.

Romani Bible Baltic 2019

Maintained by the United Bible Societies for the Baltic Romani Mission