Bible in one year - Пэ Балтитко Романи чиб

Bible in one year April 17

1. Сыр прогия́ бут часо пало́ дова́, сыр Рай Дэвэ́л штылякирдя Израилё сарэ́ лэ́скирэ вэргэ́ндыр сарэ́ ригэ́ндыр, Ису́со пхурия, загия́ дрэ пхурэ́ бэрша́.

2. И кхардя́ кэ пэ Ису́со сарэ́н Израилёскирэ чхавэ́н, лэ́нгирэ пхурыдырэн, лэ́нгирэ барыдырэ́н, лэ́нгирэ сэндарьен и лэ́нгирэ дыкхибнаскирэн, и пхэндя́ лэ́нгэ: “Мэ пхуриём, загиём дрэ пхурэ́ бэрша́.

3. Тумэ́ дыкхнэ́ саро́, со кэрдя́ Рай Дэвэ́л, Дэвэ́л тумаро́, анги́л тумаро́ муй сарэ́нца адалэ́ манушэ́нца, пал-дова́ со Рай Дэвэ́л, Дэвэ́л тумаро́, Кокоро́ мардя́пэ пал тумэ́ндэ.

4. Ѓа́да, мэ роскэрдём (роздыём) тумэ́нгэ пир жре́биё адалэ́ манушэ́н, савэ́ ячнэ́пэ дрэ миштыпна́скири ме́ра тумарэ́ родыцэнгэ, сарэ́ мануша́, савэ́н мэ традыём криг, Иорданостыр кэ баро́ мо́рё (дэрья́в), пэ кхамэскиро загиибэ́н.

5. Рай Дэвэ́л, Дэвэ́л тумаро́, Кокоро́ традэ́ла криг лэн тумэ́ндыр, и замарэла лэн анги́л тумэ́ндэ, соб (кай) тумэ́ тэ дорэсэн (тэ долэн) дро мэкно́ миштыпэ́н (наследиё) лэ́нгири пхув, сыр ракирдя́ тумэ́нгэ Рай Дэвэ́л, тумаро́ Дэвэ́л.

6. Пир саро́ адя́кэ-паць старинэнпэ тэ ракхэ́н и кэрэ́н саро́, со чхиндло́ дрэ Мойза́скирэ-Законоскири лылвари́, на отгии лэ́стыр ни пэ чачо́ (право), ни пэ зэ́рво (ле́во).

7. На явэ́н кхэтанэ́ далэ́ манушэ́нца, савэ́ ячнэ́пэ машки́р тумэ́ндэ, на пририпирэн лэ́нгирэ дэвлорэнгиро лав, на совлахан лэ́нца, и на дынаринэ́н лэ́нгэ, и на мангэ́нпэ лэ́нгэ,

8. нэ приячэн кэ Рай Дэвэ́л, Дэвэ́л тумаро́, сыр тумэ́ кэрдэ́ кэ дава́ дывэ́с;

9. О Рай Дэвэ́л традыя́ криг тумэ́ндыр барэ́ и зоралэ́ манушэ́н, и анги́л тумэ́ндэ нико́н на вытэрдия кэ дава́ дывэ́с;

10. екх тумэ́ндыр протрадэла тысёнцо, пал-дова́ со Рай Дэвэ́л, тумаро́ Дэвэ́л, Кокоро́ марэлапэ пал тумэ́ндэ, сыр ракирдя́ тумэ́нгэ.

11. Палдава́ кажно мо́ло причхувэ́н тэ рикирэ́н сыр Дро́гима Рас-Дэвлэ́с, Дэвлэ́с тумарэс.

12. Ко́ли тумэ́ отрисёна и приячэна кэ мануша́, савэ́ ячнэ́пэ адалэ́ манушэ́ндыр, савэ́ ячнэ́пэ машкира́л тумэ́ндэ, и заджа́на дро сэмэнцыпэн лэ́нца, и явэ́на тэ псирэ́н кэ ёнэ и ёнэ кэ тумэ́,

13. то тэды джинэ́н, со тумаро́ Рай Дэвэ́л, Дэвэ́л, на явэ́ла буты́р тэ традэл тумэ́ндыр адалэ́ манушэ́н, нэ ёнэ явэ́на ваш тумэ́нгэ фэляса и сеткаса, чупняса ваш тумарэ́ пашварэ и пхусадытконэ хрустоса ваш тумарэ́ якха́, пака тумэ́ явэ́на протрадынэ долэ́ лачхэ́ пхувья́тыр, сави́ дыя́ тумэ́нгэ Рай Дэвэ́л, Дэвэ́л тумаро́.

14. Ѓа́да, мэ акана́ джа́ва сарэ́са дро дром сарэ́ пхувья́киро. А тумэ́ джинэ́н сарэ́ тумарэ́ илэ́са и сарэ́ тумарэ́ деса, со на яця́пэ ивья́ ни екх лав сарэ́ лачхэ́ лавэ́ндыр, савэ́ ракирдя́ пал тумэ́ндэ Рай Дэвэ́л, Дэвэ́л тумаро́; саро́ кэрдя́пэ чачипна́са ваш тумэ́нгэ, ни екх лав на яця́пэ, саво́ тэ на кэрэ́лпэ.

15. Нэ сыр кэрдя́пэ чачипна́са пэ тумэ́ндэ кажно (сва́ко) лачхо́ лав, саво́ ракирдя́ тумэ́нгэ Рай Дэвэ́л, Дэвэ́л тумаро́, адя́кэ Рай Дэвэ́л кэрэ́ла пэ тумэ́ндэ кажно (сва́ко) холямо́ лав, пака Ёв традэ́ла криг кэ хасибэ́н тумэн далэ́ лачхэ́ пхувья́тыр, сави́ дыя́ тумэ́нгэ Рай Дэвэ́л, Дэвэ́л тумаро́.

16. Ко́ли тумэ́ пириджана (кэрэ́на банг) Ра́скирэ-Дэвлэ́скиро, тумарэ́ Дэвлэ́скиро завето, саво́ Ёв чхудя́ тумэ́нца, и джа́на и явэ́на тэ дынаринэ́н явирэ дэвлорэ́нгэ и тэ мангэ́нпэ лэ́нгэ: тэды захачола пэ тумэ́ндэ Ра́скирэ-Дэвлэ́скири холы́, и сыг хасёна тумэ́ далэ́ лачхэ́ пхувья́тыр, сави́ дыя́ тумэ́нгэ Рай Дэвэ́л”.

Joshua 24:1-33

1. И скэдыя́ Ису́со сарэ́ Израилёскиро ро́дыцы дро Сихемо, и кхардя́ Израилёскирэ пхурыдырэн, и лэ́скирэ барыдырэ́н, и лэ́скирэ сэндарьен, и лэ́скирэ дыкхибнаскирэн, и тэрдинэ́ ёнэ анги́л Растэ-Дэвлэ́стэ, Дэвлэ́стэ.

2. И пхэндя́ Ису́со сарэ́ манушэ́нгэ: “Адя́кэ ракирэ́ла Рай Дэвэ́л, Дэвэ́л Израилёскиро: ‘Пал рэка (лэнь) ґара́ дживдэ́ тумарэ́ дада́, Фара, Авраамо́скиро дад и Нахороскиро дад, и дынариндлэ́ явирэ дэвлорэ́нгэ.

3. Нэ Мэ лыём тумарэ́ дадэ́с Авраамос пирда́л рэка (лэнь), и лыджиём лэс пир сари́ Ханаано́скири пхув, и создыём баро́ лэ́скиро ро́до, и дыём лэ́скэ Исаакос.

4. Исаако́скэ дыём Яково́с и Исавос. Исавоскэ дыём Мэ бэ́рга Сеиро дрэ мэкно́ миштыпэ́н (наследиё); Яково и лэ́скирэ чхавэ́ пиригинэ́ дро Еги́пто.

5. И бичхадём Мэ Мойза́с и Аароно́с и Мэ домардём Еги́пто язвэнца (франсэнца), савэ́ кэрдём Мэ машки́р лэ́стэ, и коригэды́р (позже) вылыджиём тумэн.

6. Мэ вылыджиём тумарэ́ дадэн Египто́стыр, и тумэ́ явнэ́ кэ Лоло́ мо́рё (дэрья́в). Тэды Египтя́ни традынэпэ пал тумарэ́ дадэндэ пэ марибны́тка вурдэна́ вурдэнэнца и манушэ́нца, савэ́ сыс бэштэ́ уклистэ́ пэ грэ́ндэ кэ Лоло́ мо́рё (дэрья́в);

7. Нэ ёнэ лынэ́ тэ дэн го́дла кэ Рай Дэвэ́л, и Ёв чхудя́ калыпэ́н машки́р тумэ́ндэ и Египтянэндэ, и Ёв яндя́ пэ лэ́ндэ мо́рё (дэрья́в), саво́ лэн и зачхакирдя. Тумарэ́ якха́ дыкхнэ́, со Мэ кэрдём дро Еги́пто. Коригэды́р (позже) бут дывэса́ тумэ́ са́нас пэ чхучи́ пхув.

8. И яндём Мэ тумэн пэ Амореенгири пхув, савэ́ дживдэ́ пал Иорда́но; ёнэ мардэ́пэ тумэ́нца, нэ Мэ отдыём лэн дрэ тумарэ́ васта́, и тумэ́ дорэснэ́ (долынэ) дро мэкно́ миштыпэ́н (наследиё) лэ́нгири пхув, и Мэ традыём криг лэн анги́л тумэ́ндэ.

9. Газдыяпэ о Вала́ко, Сепфороскиро чхаво́ Моавоскиро кра́ли, и гия́ марибна́са пэ Израилё, и бичхадя́ и кхардя́ Валаамос, Веоровоскирэ чхавэ́с, соб (кай) ёв тэ прокошэл тумэн;

10. нэ Мэ на камдём тэ кандав Валаамос, и ёв бахтякирдя́ тумэн, и Мэ зракхцём тумэн лэ́скирэ вастэ́ндыр.

11. Тумэ́ пиригинэ́ Иорда́но и явнэ́ кэ Ерихо́но. И лынэ́ тэ марэ́нпэ тумэ́нца Ерихоноскирэ мануша́, Амореи, и Ферезеи, и Хананеи, и Хетеи, и Гергесеи, нэ Мэ отдыём лэн дрэ тумарэ́ васта́.

12. Мэ бичхадём анги́л тумэ́ндэ шершнен, савэ́ традынэ криг лэн тумэ́ндыр, дуе́н Аморее́нгирэ кралье́н; на тырэ́ куртала́са и на тырэ́ лукоса дава́ сыс кэрдо́.

13. И дыём Мэ тумэ́нгэ пхув, пэ сави́ ту на кэрдя́н буты́, и фо́рья, савэ́ тумэ́ на кэрдэ́, и тумэ́ дживэ́на дрэ лэ́ндэ; винаградытконэ и инжыритконэ унтэндыр (садэндыр), савэ́ тумэ́ на чхудэ́ дрэ пхув, тумэ́ ха́на барьякирдэ́ (пло́ды).

14. И адя́кэ, дарэ́н Ра́стыр-Дэвлэ́стыр, и дынаринэ́н Лэ́скэ дрэ жужыма и дро чачипэ́н: отчхурдэн дэвлорэ́, савэ́нгэ дынариндлэ́ тумарэ́ дада́ пал рэка (лэнь) дро Еги́пто, а дынаринэ́н Ра́скэ-Дэвлэ́скэ.

15. Ко́ли тумэ́нгэ нанэ пир ило́ тэ дынаринэ́н Ра́скэ-Дэвлэ́скэ, то тэды выкэдэн пэ́скэ акана́, конэ́скэ тэ дынаринэс, ци дэвлорэ́нгэ, савэ́нгэ дынариндлэ́ тумарэ́ дада́, савэ́ сыс пал рэка (лэнь), ци Аморее́нгирэ дэвлорэ́нгэ, пэ пхув савэнгири тумэ́ дживэ́на; а мэ и миро кхэр ява́са тэ дынарина́с Ра́скэ-Дэвлэ́скэ”.

16. И отпхэндлэ́ мануша́ и пхэндлэ́: “Над, на явэ́ла дова́, соб амэ тэ ячкирас Рас-Дэвлэ́с и яця́м тэ дынарина́с явирэ дэвлорэ́нгэ!

17. Палдава́ со Рай Дэвэ́л, Дэвэ́л амаро́, Ёв вылыджия́ амэн и амарэ́ дадэн Египто́скирэ пхувья́тыр, дынарибнаскирэ кхэрэ́стыр, и кэрдя́ анги́л амарэ́ якха́ барэ́ знаме́нии (ґертыка́), и ракхця́ амэн пэ саро́ дром, пир саво́ амэ гиям, и машки́р сарэ́ манушэ́ндэ, пирда́л савэ́ндэ амэ прогиям.

18. О Рай Дэвэ́л традыя́ криг амэ́ндыр сарэ́ манушэ́н и Амореен, савэ́ дживдэ́ пэ дая́ пхув, пал-дова́ и амэ ява́са тэ дынарина́с Ра́скэ-Дэвлэ́скэ, пал-дова́ со Ёв исын амаро́ Дэвэ́л”.

19. Ису́со пхэндя́ манушэ́нгэ: “Тумэ́нгэ нашты́ тэ дынаринэ́н Ра́скэ-Дэвлэ́скэ, пал-дова́ со Ёв, Дэвэ́л, исын свэ́нто, исын Дэвэ́л зэвлыныпнытко (ревнителё), Ёв на явэ́ла тэ вырикирэл тумаро́ проштавибэн (беззакониё) и тумарэ́ грэ́хи.

20. Ко́ли тумэ́ ячкирэна Рас-Дэвлэ́с и явэ́на тэ дынаринэ́н явирэ дэвлорэ́нгэ, тэды Ёв янэ́ла пэ тумэ́ндэ хась и протрадэла тумэн, пало́ дава́, сыр Ёв кэрдя́ лачхипэ́н тумэ́нгэ”.

21. И пхэндлэ́ мануша́ Исусо́скэ: “Над, амэ ява́са тэ дынарина́с Ра́скэ-Дэвлэ́скэ”.

22. Ису́со пхэндя́ манушэ́нгэ: “Тумэ́ сан якхи́тка пал пэ́стэ, со тумэ́ выкэдынэ́ пэ́скэ Рас-Дэвлэ́с – тэ дынаринэ́н Лэ́скэ?” Ёнэ отпхэндэ: “Якхи́тка сам амэ”.

23. “И адя́кэ, отчхурдэн на пэ́скирэ дэвлорэ́, савэ́ исын тумэ́ндэ, и рискирэ́н пэ́скиро ило́ кэ Рай Дэвэ́л, Дэвэ́л Израилёскиро”.

24. Мануша́ пхэндлэ́ Исусо́скэ: “Амарэ́ Ра́скэ-Дэвлэ́скэ, Дэвлэ́скэ, амэ ява́са тэ дынарина́с, и Лэ́скири зан (глос) ява́са тэ шунас”.

25. И кэрдя́ Ису́со манушэ́нца завето дро дова́-паць дывэ́с, и дыя́ лэ́нгэ упхэныбэ́н и Зако́но дро Сихемо.

26. И дочхиндя Ису́со далэ́ лава́ дрэ Дэвлэ́скирэ-Законоскири лылвари́, и лыя́ баро́ бар, и чхудя́ лэс одо́й тэл дэмбо, саво́ сыс пашы́л Ра́скирэ-Дэвлэ́скиро свэ́нто штэ́то.

27. И пхэндя́ Ису́со сарэ́ манушэ́нгэ: “Ѓа́да, дава́ бар явэ́ла тумэ́нгэ якхитконэса, пал-дова́ со ёв шундя́ сарэ́ Ра́скирэ-Дэвлэ́скирэ лава́, савэ́ Ёв ракирдя́ амэ́нца; мэк ёв тэ явэ́л якхитконэса проти тумэ́ндэ, соб (кай) тумэ́ тэ на хохавэн анги́л тумарэ́ Дэвлэ́стэ”.

28. И отмэкхця Ису́со манушэ́н, кажнонэс (сваконэс) дрэ пэ́скири миштыпна́скири ме́ра.

29. Пало́ дава́ мыя́ о Ису́со (Ёхошуа́), Навиноскиро чхаво́, Ра́скиро-Дэвлэ́скиро писха́ри, сыс шэл еня́ бэрш лэ́скэ.

30. И гарадэ́ лэс пэ лэ́скири миштыпна́скири меракири риг дрэ Фамнаф-Сараи, со исын пэ Ефремо́скири бэ́рга [Сэрах-ю.о.], пэ паш-рат (северо) бэрга́тыр Гаашатыр.

31. И дынариндя́ Израилё Ра́скэ-Дэвлэ́скэ дрэ сарэ́ дывэса́ Исусо́скирэ и дрэ пхурыдырэнгирэ дывэса́, дживдэ́ пал Исусо́стэ и, савэ́ дыкхнэ́ сарэ́ Дэвлэ́скирэ рэ́нды, савэ́ Ёв кэрдя́ Израилёскэ.

32. И кокалы́ Иосифо́скирэ (Ёза́скирэ), савэ́ вылыджинэ́ Израилёскирэ чхавэ́ Египто́стыр, гарадэ́ дро Сихемо, дрэ фэ́лда, сави́ киндя Яково Емороскирэ чхавэ́ндыр, Сихемоскирэ дадэ́стыр, пал шэл рупувэ́ ґасталя, и саво́ яця́пэ дрэ миштыпна́скири ме́ра Иосифо́скирэ чхавэ́нгэ.

33. Пало́ саро́ мыя́ и Елеазаро, Аароноскиро чхаво́, и гарадэ́ лэс пэ Финеесоскири бэ́рга, лэ́скирэ чхавэскири, сави́ сыс дыны́ лэ́скэ пэ Ефремо́скири бэ́рга.

Psalms 47:1-9

1. Хоро́скирэ Дирижоро́скэ. Кареёскирэ Чхавэ́нгиро Пса́лмо.

2. Сарэ́, манушы́тка на́цыи, марэ́н дрэ васта́, радынэ́нпэ зоралэ́с Дэвлэ́скэ вучонэ заня́са.

3. Со Рай Дэвэ́л, Са́мо (Най) Вучэды́р, дэла дар, Ёв исын баро́ Кра́ли пир сари́ пхув!

4. Ёв тэлякирэла сарэ́ манушы́тка расы тэл амэ́ндэ и Наюды́тка на́цыи тэл амарэ́ ґэра́.

5. Ёв выкэдыя́ амаро́ мэкно́ миштыпэ́н ваш амэ́нгэ, баро́ вычэдырипэн Яково́скиро, кон исын дро́го Лэ́скэ. Сэ́ла.

6. Дэвэ́л гия́ упрэ́ пэ троно годлыпнаса, рогоскирэ (трубакирэ) башаибнаса, Рай Дэвэ́л.

7. Бага́н шарибнытка гиля́ Дэвлэ́скэ, бага́н шарибнытка гиля́ амарэ́ Крали́скэ, бага́н шарибнытка гиля́.

8. Со Дэвэ́л исын Кра́ли пир сари́ пхув; бага́н пса́лмо годьварэс.

9. Дэвэ́л кралинэла пэ Наюды́тка на́цыи; Дэвэ́л исын бэшто́ пэ Лэ́скиро свэ́нто троно.

Proverbs 14:14-14

14. Бэдэ-илэ́скиро ману́ш чалёла пэ́скирэ фуе́ бутендыр, нэ лачхо́ ману́ш явэ́ла чало пэскирэндыр.

Lukaš 13:23-35

23. Вари-кон пхэндя́ Лэ́скэ: “Раё Дэ́вла!” Нау́што исын на́бут адасавэ́ мануша́, савэ́ зракхэнапэ?” Ису́со отпхэндя́ лэ́нгэ:

24. “Спробинэн зоралэ́с тэ заджа́н пир цясно вуда́р, пал-дова́ со бут мануша́, Мэ пхэна́ва тумэ́нгэ, явэ́на тэ родэ́н, соб (кай) тэ заджа́н андрэ́, и ёнэ на дэ́на ра́да (змогинэна).

25. Пало́ дава́, ке́ли кхэрэ́скиро хула́й уштэ́ла и запхандэла вуда́р, тэды тумэ́ явэ́на тэ тэрдён яври́ и явэ́на тэ марэ́н дро вуда́р, ракири́: ‘Раё Дэ́вла! Раё Дэ́вла.” Псирав (отпхандэ) вуда́р амэ́нгэ,” а Ёв отпхэнэ́ла тумэ́нгэ: “Мэ на джино́м (на джина́в) тумэн, каты́р тумэ́ сан?’

26. тэды тумэ́ пхэнэ́на: ‘Амэ хаям и пиям Ту́са, и Ту сыклякирдян пир амарэ́ вули́цы (га́сы);’

27. нэ Ёв пхэнэ́ла: ‘Мэ на джино́м тумэн, каты́р тумэ́ сан; джа́н Ма́ндыр криг тумэ́ сарэ́, кон кэрэ́ла чорипэ́н.’

28. Одо́й явэ́ла роибэ́н и дандэнгири скрежыма, ке́ли дыкхэ́на тумэ́ Авраамос, Исаёс и Яково́с и сарэ́ пророкэ́н дро Дэвлэ́скиро Кралипэ́н дро Болыбна́скиро Раё, а тумэн кокорэн вытрадэна яври́.

29. И явэ́на мануша́ вастоко́стыр и западостыр, паш-ратитконэ́ и паш-дывэсытконэ́ ригэ́ндыр, и ёнэ явэ́на тэ бэшэ́н пал сками́нд дро Дэвлэ́скиро Кралипэ́н дро Болыбна́скиро Раё.

30. И, ґа́да, исын палатунэ́, савэ́ явэ́на англатунэ́; а исын англатунэ́, савэ́ явэ́на палатунэ́.”

31. Дрэ дова́ дывэ́с явнэ́ Фарисе́и кэ Ису́со и пхэндлэ́ Лэ́скэ: “Джа́ адатхы́р и джа́ (пэ́скэ), пал-дова́ со Иродо камэ́ла тэ мулякирэ́л Тут.”

32. Ису́со отпхэндя́ лэ́нгэ: “Джа́н и пхэнэ́н далэ́ локхнякэ (лисакэ); ґа́да, Мэ традава криг налачхэ́ ду́хи (фаны) и высастякирава ададывэ́с, атася́ и пэ три́то дывэ́с Мэ кончынава мири́ буты́;

33. нэ Ма́нгэ трэй тэ псирав ададывэ́с и атася́ и яви́р дывэ́с, пал-дова́ со нашты́ тэ явэ́л, соб (кай) проро́ко тэ хасёл яври́ Ерусалимо́стыр.

34. Ерусалимо! Ерусалимо! Дро саво́ мулякирэнас пророкэ́н и шулякирэнас барэ́нца кодолэ́н, савэ́н бичхадя́ кэ ту. Кицы́ мо́лы Ма́нгэ исын пэ ило́ тэ скэдав чхаворэ́н тырэ́н, сыр чириклы скэдэ́ла чириклорэн тэл пхак и тумэ́ на камлэ́!

35. Ѓа́да, кхэр тумаро́ явэ́ла мэкно́ чхучо́ тумэ́нгэ; и Мэ ракира́ва тумэ́нгэ: тумэ́ на явэ́на тэ дыкхэ́н Ман кадалэ́ дывэсэ́стыр, пака тумэ́ на пхэнэ́на: “Бахтякирдо́ исын Одова́, Саво́ джа́ла ваш Дэвлэ́скиро лав.”

Romani Bible Baltic 2019

Maintained by the United Bible Societies for the Baltic Romani Mission