Bible in one year April 24Judges 13:1-251. Израилёскирэ чхавэ́ кэрдэ́ дурыдыр фуипэ́н анги́л Ра́скирэ-Дэвлэ́скирэ якха́, и отдыя́ лэн Рай Дэвэ́л дрэ Филистимлянэнгирэ васта́ пэ штардэша́ бэрш.2. Дрэ дова́ часо (цы́ро) сыс ману́ш Цоратыр, Дано́скирэ кхэритконэ́ родо́стыр, лавэ́са Маноё, ромны́ лэ́скири сыс бичхавэнгири и на биянэлас.3. И явдя́ Ра́скирэ-Дэвлэ́скиро Янго́ло ромнякэ, и пхэндя́ ла́кэ: “Ѓа́да, ту сан бичхаворэнгири и на биянэса; нэ запхарьёса и биянэса чхаворэс;4. и адя́кэ ракхпэ, на пи мол (вино) и сикера, и на ха ничы́ нажужо;5. пал-дова́ со, акэ, ту запхарьёса и биянэса чхавэ́с, и бритва (мурадлуны) на касынэлапэ лэ́скиро шэро́, пал-дова́ со кокорэ́ да́кирэ масэстыр дава́ тыкно́ бия́то явэ́ла Ра́скирэ-Дэвлэ́скиро назореё, и ёв лэ́ла тэ зракхэ́л Израилё Филистимлянэнгирэ вастэ́стыр.”6. Ромны́ явдя́ и роспхэндя́ пэ́скирэ ромэскэ: “Дэвлэ́скиро ману́ш сыс яви кэ мэ, саво́ подджа́ла, сы́рбы Дэвлэ́скиро Янго́ло, древа́н (збит) райкано, мэ на пхуцёмпэ лэ́стыр, каты́р ёв сыс, и ёв на пхэндя́ ма́нгэ лэ́скиро лав;7. нэ ёв пхэндя́ ма́нгэ: “Акэ, ту запхарьёса и биянэса чхавэ́с; и адя́кэ на пи мол и сикера, и на ха ничы́ нажужо, пал-дова́ со бия́то (тыкномас) да́кирэ лочовя́тыр (утробатыр) кэ пэ́скиро мэрибэ́н явэ́ла Дэвлэ́скиро назореё.”8. Маноё мангдя́пэ Ра́скэ-Дэвлэ́скэ, и пхэндя́: “Раё Дэ́вла! Мэк тэ явэ́л нэвэ́с (зноко) кэ амэ Дэвлэ́скиро ману́ш, савэ́с бичхадян Ту, и высыклякирэла амэн, со амэ́нгэ тэ кэрэ́с биятоса (тыкнэмасэса), саво́ бияндёла.”9. И шундя́ Дэвэ́л Маноёскири зан (глос), и Дэвлэ́скиро Янго́ло нэвэ́с явдя́ кэ ромны́, ке́ли ёй сыс пэ фэ́лда, и Маноёс, ла́кирэ ромэс, на сыс ла́са.10. Ромны́ сы́гэс праста́ндыя, и пхэндя́ пэ́скирэ ромэскэ, и пхэндя́ лэ́скэ: “Ѓа́да, явдя́ ма́нгэ ману́ш, саво́ сыс яви тэды кэ мэ.”11. Маноё уштыя́ и гия́ пэ́скирэ ромня́са, и явдя́ кэ одова́ ману́ш, и пхэндя́ лэ́скэ: “Ту сан одова́ ману́ш, саво́ ракирдя́ ла́са, джувля́са?” Янго́ло пхэндя́: “Мэ.”12. И пхэндя́ Маноё: “И адя́кэ, ко́ли кэрэ́лапэ чачипна́са (збувинэлапэ) лав тыро́, сыр амэ́нгэ тэ кэра́с адалэ́ биятоса (тыкнэмасэса) и со лэ́са тэ кэра́с?”13. Дэвлэ́скиро Янго́ло пхэндя́ Маноёскэ: “Мэк ёв тэ ракхэлпэ сарэ́стыр, пал со мэ пхэндём ромнякэ;14. мэк тэ на хал ничы́, со дэ́ла винаградоскири лоза; мэк тэ на пьел мол и сикера и тэ на хал ничы́ нажужо, и тэ приракхэл саро́, со мэ припхэндём ла́кэ.”15. И пхэндя́ Маноё Дэвлэ́скирэ Янголоскэ: “Дэ во́ля (дозволин) тэ урикирас тут, пака амэ кэраваса ваш ту́кэ бузнорэс (козлёнкос).”16. Дэвлэ́скиро Янго́ло пхэндя́ Маноёскэ: “Мэк (усае́кх) бы ту и тэ урикирэс ман, нэ мэ на ява́ва тэ хав тыро́ маро́; ко́ли камэ́са тэ кэрэ́с цэ́ло схачкирибэ́н Ра́скэ-Дэвлэ́скэ, тэды ґа́здэ лэс.” Маноё на джиндя́, со дава́ сыс Дэвлэ́скиро Янго́ло.17. И пхэндя́ Маноё Дэвлэ́скирэ Янголоскэ: “Сыр исын тыро́ лав? Соб (кай) амэ́нгэ тэ славинас тут, ке́ли кэрэ́лапэ чачипна́са тыро́ лав.”18. Дэвлэ́скиро Янго́ло пхэндя́ лэ́скэ: “Со ту пхучэса пал миро лав? Ёв исын дивно.19. И лыя́ Маноё бузнорэс (козлёнкос) и маруно́ яныбэ́н, и ґаздыя́ Ра́скэ-Дэвлэ́скэ пэ бар. И кэрдя́ Ёв ди́во, саво́ дыкхнэ́ Маноё и лэ́скири ромны́.20. Ке́ли полымя лыя́ тэ ґаздэлпэ алтарёстыр кэ болыбэ́н, то Ра́скирэ-Дэвлэ́скиро Янго́ло ґаздыя́пэ дрэ полымя жэртвеникоскири. Дыкхи́ дава́, Маноё и лэ́скири ромны́ пынэ́ мо́са пэ пхув.21. И на яця́ бицяло́ Ра́скирэ-Дэвлэ́скиро Янго́ло Манаёскэ и лэ́скирэ ромнякэ. Тэды Маноё уджиндя́, со дава́ сыс Ра́скирэ-Дэвлэ́скиро Янго́ло.22. И пхэндя́ Маноё пэ́скирэ ромнякэ: “Чачэс, амэ мэраса, пал-дова́ со амэ дыкхцям Дэвлэ́с.”23. Ромны́ лэ́скири пхэндя́ лэ́скэ: “Ко́ли бы Рай Дэвэ́л камдя́ тэ мулякирэ́л амэн, тэды на прилэлас бы амарэ́ вастэ́ндыр цэ́ло схачкирибэ́н и маруно́ яныбэ́н, и на сыкадя́ бы амэ́нгэ саро́ дова́, и какана́ на отчхакирэлас амэ́нгэ саро́.”24. И бияндя́ ромны́ чхавэ́с и дыя́ лав лэ́скэ: Самсо́но. И бария тыкномас, и бахтякирдя́ лэс Рай Дэвэ́л.25. И лыя́ Ра́скирэ-Дэвлэ́скиро Ду́хо (Фа́но) тэ кэрэ́л дрэ лэ́стэ дрэ Даноскиро ста́но, машки́р Цора и Естаоло.Judges 14:1-201. И гия́ Самсо́но дрэ Фимнафа, и дыкхця́ дрэ Фимнафа джувля́ Филистимия́кирэ чхаендыр.2. Ёв гия́ и пхэндя́ пэ́скирэ дадэ́скэ и пэ́скирэ да́кэ, и пхэндя́: “Мэ дыкхцём дрэ Фимнафа Филистимия́кирэ чхаендыр джувля́: лэн ма́нгэ ла дрэ ромны́ (ромня́тэ).”3. Лэ́скиро дад и дай пхэндлэ́ лэ́скэ: “Нау́што нанэ джувле́н машки́р тырэ́-пшалэнгирэ чхаендэ и дрэ сарэ́ мирэ́ манушэ́ндэ, со ту джа́са тэ лэс джувля́ наобчхиндлэндэ Филистимляндэ?” И пхэндя́ Самсо́но пэ́скирэ дадэ́скэ: “Лэ ла ма́нгэ, пал-дова́ со ёй исын ма́нгэ пир ило́.”4. Дад лэ́скиро и дай лэ́скири на джиндлэ́, со дава́ сыс Ра́стыр-Дэвлэ́стыр, и со ёв родэ́ла ваканцыя (случаё) тэ отомстинэл (тэ отхал палэ) Филистимлянэнгэ. А дро дова́ часо Филистимля́ни сыс хулая́ пэ Израилё.5. И гия́ Самсо́но дадэ́са пэскирэса и даса пэскирьяса дрэ Фимнафа, а ке́ли подгинэ́ кэ винаградники Фимнафакирэ, ґа́да, тэрно́ ле́во (шчэр) рычыны джа́ла пэ стреч лэ́скэ.6. И згия пэ лэ́стэ Ра́скирэ-Дэвлэ́скиро Ду́хо (Фа́но), и ёв роскустя левос сыр бузнорэс; а дро васт лэ́стэ ничы́ на сыс. И ёв на пхэндя́ пэ́скирэ дадэ́скэ и пэ́скирэ да́кэ, со ёв кэрдя́.7. И явдя́, и ракирдя́ джувля́са, и ёй яця́ пир ило́ Самсоноскэ.8. Сыр прогинэ́ вари-кицы́ дывэса́, нэвэ́с гия́ ёв, соб (кай) тэ лэс ла, и загия́ тэ подыкхэл левоскиро тру́по, и ґа́да, роё бэрлинэн (пчолэн) дро левоскиро тру́по и авги́н.9. Ёв лыя́ лэс дрэ пэ́скирэ васта́, и гия́, и хая дромэ́са; и ке́ли явдя́ кэ пэ́скиро дад и пэ́скири дай, дыя́ и лэ́нгэ, и ёнэ ханэ́; нэ на пхэндя́ лэ́нгэ, со ёв левоскирэ трупостыр лыя́ дава́ авги́н.10. И явдя́ лэ́скиро дад кэ джувлы́, и кэрдя́ одо́й Самсо́но сками́нд, сыр исын прилыно, кэрэ́на тэрнэ́.11. И сыр одо́й дыкхнэ́ лэс, то дынэ́ лэ́скэ выкэдынэ́ триндэша бьявитконэ малэн, савэ́ бы явэ́на пашы́л лэ́стэ.12. То тэ́ньчи пхэндя́ лэ́нгэ Самсо́но: “Задава мэ тумэ́нгэ шэрэпхарибнытко задыибэн (загадка); ко́ли тумэ́ роспхандэна (отгадынэна) ма́нгэ лэс пал эфта́ дывэса́ пэ пиро́ роспхандэна и чачунэ́с, тэды мэ да́ва тумэ́нгэ триндэша синдоны и триндэша зменна и́ди;13. ко́ли на дэ́на ра́да тэ роспхандэн ма́нгэ, тэды тумэ́ бангэ́ явэ́на тэ дэн ма́нгэ триндэша синдоны и триндэша зменна и́ди.” Ёнэ пхэндлэ́ лэ́скэ: “Загадын (задэ) тыро́ шэрэпхарибнытко, пошунаса.”14. И пхэндя́ лэ́нгэ: “Хабнаскирэстыр выгия́ хабнытко, и зоралэстыр выгия́ гудло́.” И на могиндлэ́ ёнэ тэ отгадынэн шэрэпхарибнытко (загадка) дрэ трин дывэ́с.15. Пэ эфта́то дывэ́с пхэндлэ́ ёнэ Самсоноскирэ ромнякэ: “Уракир тырэ́ ромэс, соб (кай) ёв тэ роспхандэл амэ́нгэ шэрэпхарибнытко (загадка); а ко́ли над, то схачкираса яга́са тут и тырэ́-дадэ́скиро кхэр; нау́што тумэ́ кхардэ́ амэн, соб (кай) тэ обкэдэн амэн?”16. рондя́ Самсоноскири ромны́ анги́л лэ́стэ и ракирэ́ла: “Ту бидыкхэса ман, и мэ на сом пир ило́ ту́кэ; ту дыя́н мирэ́-манушэ́нгирэ чхавэ́нгэ шэрэпхарибнытка, а ма́нгэ на роспхандэса лэс.” Ёв пхэндя́ ла́кэ: “Мирэ́ дадэ́скэ и мирэ́ да́кэ на роспхандём лэс; и ту́кэ ци роспхандава?”17. рондя́ ёй анги́л лэ́стэ эфта́ дывэса́, дрэ савэ́ сыс лэ́ндэ пиро́. Кэ ко́нцо (яго́ро) пэ эфта́то дывэ́с ёв роспхандя ла́кэ; пал-дова́ со ёй зоралэ́с мангдя́ лэс. А ёй розгадындя шэрэпхарибнытка пэ́скирэ манушэ́нгирэ чхавэ́нгэ.18. И пэ эфта́то дывэ́с анги́л кхамэскиро загиибэ́н пхэндлэ́ лэ́скэ мануша́: “Со исын гудлэдыр авгинэстыр, и со исын зоралэды́р левостыр!” Ёв пхэндя́ лэ́нгэ: “Ко́ли бы тумэ́ тэ на дэн го́дла пэ мирэ́ тэрнэ́ гурумнятэ, тэды на отгадынэнас бы миро шэрэпхарибнытко.”19. И згия пэ лэ́стэ Дэвлэ́скиро Ду́хо (Фа́но), и гия́ ёв дро Аскалоно, и домардя́ одо́й триндэша манушэ́н, злыя́ лэ́ндыр и́ди и отдыя́ змена лэ́нгирэ ризэндыр одолэ́нгэ, кон роспхандя (розгадындя) шэрэпхарибнытко (загадка). И захачи́я лэ́скири холы́, и гия́ ёв дрэ пэ́скирэ-дадэ́скиро кхэр.20. А Самсоноскири ромны́ выгия́ палоро́м пал бьявитконэ лэ́скирэ малэстэ, саво́ сыс дру́го (мал) пашы́л лэ́стэ.Psalms 50:16-2316. Нэ Дэвэ́л ракирэ́ла фуе́ манушэ́скэ: “Со́скэ ту ракирэ́са сарэ́нгэ пал Мирэ́ стату́ты, и ракирэ́са пэ́скирэ мо́са пал Миро Завето?17. а усае́кх ту́кэ древа́н исын на пир ило́ Миро сыклякирибэ́н пал чачипэ́н и ту чхурдэса Мирэ́ лава́ пал пэ́стэ?18. Ке́ли ту дыкхэ́са чорэс, тэды ту зджасапэ лэ́са и ту са́нас кхэтанэ́ одолэнца, савэ́ кэрэ́на биладжаипэ́н.19. Ту дэ́са во́ля пэ́скирэ москэ тэ ракирэ́л чорипэ́н и пэ́скирэ чибакэ (чибьякэ) тэ счхувэл хохаибэ́н.20. Ту сан бэшто́ и ракирэ́са пэ пэ́скирэ пшалэ́стэ: ту бангякирэса хоханэ́с тырэ́-да́кирэ чхавэ́с.21. Ту кэрдя́н Дава́ и Мэ со́мас штыл (тихо); ту думиндян, со Мэ сом адасаво́, сыр ту сан. Нэ Мэ сыкава́ва тыри́ банг и чхува́ва дава́ екх пал екх анги́л тырэ́ якха́.22. Подуминэн пал дава́ тумэ́, кон бистрэла Дэвлэ́с, соб (кай) Мэ тэ на роскушав тумэн, со на явэ́ла никонэ́с тэ зракхэ́л тумэн.23. Кон парикирэла Дэвлэ́скэ свэнтонэ́ яныбнаса, кодова́ славинэла Ман и Мэ сыкава́ва лэ́скэ, сыр Дэвэ́л зракхэ́ла лэс, и саво́ придыкхэла пал пэ́стэ тэ дживэ́л пир чачипэ́н.Proverbs 14:29-3029. Ману́ш, саво́ ле́нтэс (на сы́гэс) холясо́ла, исын баро́ годяри, нэ кодова́, савэ́стэ исын хачкирдо ду́хо (фа́но), сыкавэ́ла пэ якха́ пэ́скиро дылныпэ́н.30. Лачхо́ ило́ дэ́ла джиибэ́н масэнгэ, нэ зэвлыныпэ́н кирнякирэла кокалы́.Lukaš 17:20-3720. Фарисе́и пхучнэ́ Исусо́стыр, ке́ли явэ́ла Дэвлэ́скиро Кралипэ́н дро Болыбна́скиро Раё. Ёв отпхэндя́ лэ́нгэ: “Ние́кх ману́ш на могинэ́ла тэ пхэнэ́л пир бицялэ шпэры (приметы), ке́ли явэ́ла Дэвлэ́скиро Кралипэ́н дро Болыбна́скиро Раё;21. и нико́н на пхэнэ́ла: ‘Ѓа́да, ада́й,’ ци ‘ґа́да, одо́й,’ пал-дова́ со Дэвлэ́скиро Кралипэ́н ужэ исын дро тумаро́ ило́.”22. Тэды Ису́со ишчо (инкэ́) пхэндя́ сыкляибнытконэ́нгэ: “Явэ́на дывэса́, ке́ли тумэ́ древа́н закамэна хоць пэ екх дывэ́с тэ дыкхэ́н Чхавэ́с Манушэскирэс, ке́ли Ёв сыкадёла, нэ тумэ́ на дыкхэ́на;23. и пхэнэ́на тумэ́нгэ: ‘Ѓа́да, ада́й,’ ци ‘ґа́да, одо́й,’ – на псирэ́н и на родэ́н;24. пал-дова́ со, сыр блискавица захачола екхэ-болыбна́скирэ ягоро́стыр (краёстыр) и зяинэла дурэды́р кэ яви́р Болыбна́скиро яго́ро (ко́нцо), адя́кэ явэ́ла Чхаво́ Манушэ́скиро дро Пэ́скиро дывэ́с.25. Нэ анги́л трэй Лэ́скэ бут мэ́ньки тэ пиридживэл и Лэ́стыр отпхэнэнапэ мануша́ далэ́ родо́стыр,26. И, сыр сыс дрэ долэ́ дывэса́, ке́ли сыс Ноё, адя́кэ-паць дрэ дывэса́ явэ́ла Чхаво́ Манушэ́скиро:27. мануша́ ханэ́, пинэ́, лынэпэ, выджа́нас палоро́м анги́л дова́ дывэ́с, дро саво́ Ноё загия́ дро ковчэго, и яця́ потопо и хасякирдя́ сарэ́н;28. адя́кэ-паць сыр сыс, ке́ли сыс Лото: ханэ́, пинэ́, кинэнас, бикнэнас, чхувэ́нас дрэ пхув, ґаздэнас кхэра́;29. нэ дро дова́ дывэ́с, ке́ли Лото выгия́ Содомостыр, ягитко и дзэвэликано́ (серно) брышы́нд гия́ болыбна́стыр и хасякирдя́ сарэ́н;30. Адя́кэ явэ́ла и дро дова́ дывэ́с, ке́ли Чхаво́ Манушэ́скиро явэ́ла.31. Дро дова́ дывэ́с, кон явэ́ла пэ кхэри́тко стрэ́ха (чхаки́н), а Лэ́скиро миштыпэ́н кхэрэ́, мэк тэ на зджал тэлэ́ тэ лэл вари-со кхэрэ́скирэ миштыпна́стыр и кон явэ́ла пэ фэ́лда, мэк тэ на рисёл палэ.32. Рипирэн Лотоскирья ромня́.33. И вари-кон, кон закамэ́ла тэ ракхэ́л пэ́скиро джиибэ́н, одова́ хасякирэ́ла лэс, а кон хасякирэ́ла лэс, одова́ зракхэ́ла джиибэ́н.34. Мэ пхэна́ва тумэ́нгэ: дрэ доя́ рат дуй мануша́ явэ́на тэ пасён пэ екх чхуибэ́н: екхэ́с лэ́на, явирэ́с ячкирэна;35. дуй джувля́ явэ́на тэ сявинэн (тэ мелинэн) жэрновонэ барэ́нца; екха лэ́на, явирья ячкирэна,36. дуй мурша́ явэ́на пэ фэ́лда: екхэ́с лэ́на, явирэ́с ячкирэна.37. Сыкляибны́тка пхучнэ́ Лэ́стыр: “Кай, Раё Дэ́вла?” Ису́со отпхэндя́ лэ́нгэ: “Кай явэ́ла муло́ тру́по, одо́й скэдэ́напэ о́рлы (ки́ды).” Romani Bible Baltic 2019 Maintained by the United Bible Societies for the Baltic Romani Mission