Bible in one year
April 26

1. И сыс вари-кон пэ Ефремо́скири бэ́рга, лавэ́са Миха.
2. Ёв пхэндя́ пэ́скирэ да́кэ: “Тысёнцо шэл шэ́кели руп, савэ́ ту́тэ лынэ́ и, пал савэ́ ту пашы́л ма́ндэ пхэндя́н прокошыбэна, дава́ руп ма́ндэ, мэ лыём лэс.” Дай лэ́скири пхэндя́: “Бахтякирдо́ тэ явэ́л миро чхаво́ Растэ-Дэвлэ́стэ!”
3. И рискирдя́ ёв пэ́скирэ да́кэ тысёнцо шэл шэ́кели руп. И пхэндя́ лэ́скири дай: “Дава́ руп мэ ту́тыр отдыём Ра́скэ-Дэвлэ́скэ ваш мирэ́ чхавэ́скэ, соб (кай) тэ кэрэ́с лэ́стыр и вычхиндло муй и вычхудо о́бразо; и адя́кэ мэ отда́ва лэс ту́кэ.”
4. Нэ ёв рискирдя́ руп пэ́скирэ да́кэ. Лэ́скири дай лыя́ дуйшэла́ шэ́кели руп и отдыя́ лэн вычхуибнарискэ. Ёв кэрдя́ лэ́ндыр вычхиндло муй и вычхудо о́бразо (кумиро), саво́ и сыс дрэ Михаскиро кхэр.
5. И сыс Михастэ Дэвлэ́скиро Кхэр. И кэрдя́ ёв эфо́до и терафимо, и ёв высвэнцындя пэ́скирэ чхавэ́ндыр екхэ́с, соб (кай) ёв тэ явэ́л лэ́стэ раша́са.
6. Дрэ долэ́ дывэса́ на сыс крали́с пэ Израилё; кажно (сва́ко) кэрдя́ дова́, со лэ́скэ здыяпэ чачипна́са.
7. Екх тэрно́ ману́ш Юдэя́кирэ Вифлеемостыр, Юда́скирэ родыцо́стыр, о Левито, тэды дживдя́ одо́й;
8. адава́ ману́ш гия́ Юдэя́кирэ Вифлемоскирэ форо́стыр, соб (кай) тэ дживэ́л, кай приджалапэ, и, гии дромэ́са, явдя́ пэ Ефремо́скири бэ́рга кэ Михаскиро кхэр.
9. И пхэндя́ лэ́скэ Миха: “Каты́р ту джа́са?” Ёв пхэндя́ лэ́скэ: “Мэ сом Левито Юдэя́кирэ Вифлемостыр и мэ джа́ва тэ джива́в, кай приджалапэ.”
10. И пхэндя́ лэ́скэ Миха: “Ячпэ ма́ндэ, и яв ма́ндэ дадэ́са и раша́са; мэ ява́ва тэ дав ту́кэ пир дэш шэ́кели руп пэ бэрш, и со трэй пэ и́дя и хабэ́н.”
11. Левито гия́ кэ ёв и дыя́ лав Левито тэ ячэ́лпэ далэ́ манушэ́стэ, и сыс адава́ тэрно́ ману́ш лэ́стэ, сыр екх лэ́скирэ чхавэ́ндыр.
12. Миха высвэнцындя Левитос, и адава́ тэрно́ ману́ш сыс лэ́стэ раша́са, и дживдя́ дро Михаскиро кхэр.
13. И пхэндя́ Миха: “Какана́ мэ джино́м, со Рай Дэвэ́л явэ́ла ма́нгэ тэ кэрэ́л лачхипэ́н, пал-дова́ со Левито ма́ндэ яця́ раша́са.”
1. Дрэ долэ́ дывэса́ на сыс Израилёскирэ крали́с; и дрэ долэ́ дывэса́ Даноскиро ро́дыцо родыя пэ́скэ миштыпна́скири ме́ра (удело), кай бы тэ дживэ́л, пал-дова́ со пака на выпыя лэ́скэ пхэрды́ (цэ́ло) миштыпна́скири ме́ра машки́р Израилёскирэ ро́дыцы.
2. И бичхадэ́ Дано́скирэ чхавэ́ пэ́скирэ родыцо́стыр панджэ́ манушэ́н, зоралэн муршэ́н Цоратыр и Естаолостыр, соб (кай) ёнэ тэ обдыкхэн пхув и тэ уджинэ́н ла, и пхэндлэ́ лэ́нгэ: “Джа́н, обдыкхэн пхув.” Ёнэ явнэ́ пэ Ефремо́скири пхув кэ Михаскиро кхэр, и ратькирдэ одо́й.
3. Сыр ёнэ сыс пашы́л Михаскиро кхэр, то уджиндлэ́ ёнэ тэрнэ́-Левитоскири зан (глос), и загинэ́ одори́к, и пхучнэпэ лэ́стыр: “Кон яндя́ тут адари́к? Со ту ада́й кэрэ́са, и палсо́ ту сан датэ?”
4. Ёв пхэндя́ лэ́нгэ: “Дова́ и дова́ кэрдя́ ваш ма́нгэ о Миха, ёв лыя́ ман, и мэ яцём раша́са лэ́стэ.”
5. Ёнэ пхэндлэ́ лэ́скэ: “Пхучпэ Дэвлэ́стыр, соб (кай) тэ джинас амэ́нгэ, ци бахтало́ явэ́ла амаро́ дром, пир саво́ амэ джа́са.”
6. Раша́й пхэндя́ лэ́нгэ: “Джа́н раманёса (миро́са); анги́л Растэ-Дэвлэ́стэ тумаро́ дром, дрэ саво́ тумэ́ джа́на.”
7. И гинэ́ одолэ́ пандж мурша́, и явнэ́ дро Лаисо, и дыкхнэ́ манушэ́н, савэ́ сыс дрэ лэ́стэ, со ёнэ дживэ́на штылэ́с, пир обычаё (присыкляибэн) Сидонянэнгиро, штыл и бидарипнаскирэс (безпечнэс), и со на сыс пэ доя́ пхув, кон кэрэ́лас фуй бы лэн тэ дрэ вари-со, ци рикирдя зор (власть): Сидонянэндыр ёнэ дживдэ́ дур, и ни конэса на сыс лэ́ндэ нисаво́ рэ́ндо.
8. И рисинэ́ панджджинэ кэ пэ́скирэ пша́ла дрэ Цора и Естаоло, и пхэндлэ́ лэ́нгэ пша́ла лэ́нгирэ: “Со́са явнэ́ тумэ́?”
9. Ёнэ пхэндлэ́: “Уштаса и джа́са пэ лэ́ндэ; амэ дыкхцям пхув, ёй исын древа́н лачхи́; а тумэ́ задуминдлэпэ: ґалён, сыгэды́р джа́н и тэ лэн дро мэкно́ миштыпэ́н (наследиё) доя́ пхув;
10. ке́ли джа́на тумэ́, явэ́на кэ мануша́ бидарипнытка, и пхув доя́ бари. Дэвэ́л отдэ́ла ла дрэ тумарэ́ васта́; дава́ исын дасаво штэ́то, кай нанэ ни дрэ со наухтылыбэн, со дорэсэлапэ (лэ́лапэ) пхувья́тыр.”
11. И гинэ́ одотхы́р Дано́скирэ родыцо́стыр, Цоратыр и Естаолостыр, шовшэла́ мурша́, савэ́ сыс подпхандлэ халадытконэ мардытконэнца.
12. Ёнэ гинэ́ и тэрдинэ́ стано́са дрэ Кири́аф-Яримо, дрэ Юдэ́я. Пир саро́ и кхарэ́на дова́ штэ́то Дано́скирэ стано́са кэ дава́ дывэ́с. Ёв исын пала́л Кири́аф-Яримо.
13. Одотхы́р гинэ́ ёнэ пэ Ефремо́скири бэ́рга и явнэ́ кэ Михаскиро кхэр.
14. И пхэндлэ́ одолэ́ пандж мурша́, савэ́ псирдэ́ тэ обдыкхэн пхув Лаиса, пэ́скирэ пшалэ́нца: “Ци джинэ́на тумэ́, со дрэ екх далэ́ кхэрэндыр исын эфо́до, терафимо, вычхиндлэ́ и вычхудэ́ образы? И адя́кэ подуминэн, со тэ кэрэ́н?”
15. И рисинэ́ пэ риг, и загинэ́ дро кхэр тэрнэ́-Левитоскиро, дро Михаскиро кхэр, и дынэ́ “добридим” лэ́скэ.
16. А шовшэла́ мануша́ Дано́скирэ чхавэ́ндыр пирипхандлэ халадытконэ мардытконэнца, сыс тэрдэ́ пашы́л по́рта (вра́ты).
17. Пандж мануша́, савэ́ псирдэ́ тэ обдыкхэн пхув, гинэ́, загинэ́ одори́к, лынэ́ истукано (вычхиндло муй), и эфо́до, и терафимо, и вычхудо кумиро. Раша́й тэрдия́ пашы́л по́рта одолэнца шовшэлэнца манушэ́нца, савэ́ сыс пирипхандлэ марибнытконэ́ мардытконэнца.
18. Ке́ли ёнэ загинэ́ дро Михаскиро кхэр и лынэ́ вычхиндло муй (истукано), эфо́до, терафимо и вычхудо о́бразо (кумиро), раша́й пхэндя́ лэ́нгэ: “Со тумэ́ кэрэ́на?”
19. Ёнэ пхэндлэ́ лэ́скэ: “Яв штыл, чхув тыро́ васт пэ тырэ́ ушта́, и джа́ амэ́нца; и яв амэ́ндэ дадэ́са и раша́са. Ци фэды́р ту́кэ тэ явэс раша́са пэ екхэ-Манушэ́скиро кхэр, сыр тэ явэс раша́са пэ ро́дыцо, ци дро Израилёскиро кхэри́тко ро́до?”
20. Раша́й обрадындяпэ, и лыя́ эфо́до, терафимо и вычхиндло муй, и гия́ манушэ́нца.
21. Ёнэ рисинэ́, и гинэ́, и отмэкнэ чхавэ́н, кхэритконэ́ мурдалэ́н (ското) и пхарипэна анги́л.
22. Ке́ли ёнэ отгинэ́ Михаскирэ кхэрэ́стыр, кхэрэнгирэ мануша́, савэ́ сыс пашы́л Михаскиро кхэр, скэдынэ́пэ и традынэпэ пал Дано́скирэ чхавэ́ндэ,
23. и дынэ́ го́дла Дано́скирэ чхавэ́нгэ. Дано́скирэ чхавэ́ рисинэ́ и пхэндлэ́ Михаскэ: “Со ту адя́кэ дэ́са го́дла?”
24. Миха пхэндя́: “Тумэ́ лынэ́ мирэ́ дэвлорэ́, савэ́н мэ кэрдём, и раша́с, и гинэ́ криг: со ишчо (инкэ́) буты́р, сыр тумэ́ ракирэ́на: “Со ту́кэ?”
25. Дано́скирэ чхавэ́ пхэндлэ́ лэ́скэ: “Яв штыл (молчын), соб (кай) амэ тэ на шунас тыри́ зан; явирэ́с вари-савэ́ амэ́ндыр, росхолясови пэрэ́на пэ тумэ́ндэ, и ту хасякирэса пэс и тыри́ сэ́м΄я (ири́).”
26. И гинэ́ Дано́скирэ чхавэ́ пэ́скирэ дромэ́са; а Миха дыкхи́, со ёнэ исын зоралэды́р лэ́стыр, гия́ палэ и рисия́ дро пэ́скиро кхэр.
27. А Дано́скирэ чхавэ́ лынэ́ дова́, со кэрдя́ Миха, и раша́с, саво́ сыс лэ́стэ, и гинэ́ дро Лаисо, проти штылонэ и бидарипнаскирэ манушэ́ндэ, и домардэ́ лэн куртала́са, а фо́ро хачкирдэ́ яга́са.
28. На сыс конэ́скэ тэ помогинэл лэ́нгэ, пал-дова́ со ёв сыс дур Сидоностыр и никонэса на рикирдя рэ́нды. Дава́ фо́ро сыс дро до́ло, со исын пашы́л Беф-Рехово. И кэрдэ́ ёнэ нэвэ́стыр фо́ро и лынэ́ тэ дживэ́н дрэ лэ́стэ.
29. И дынэ́ лав фороскэ Дано, пир пэ́скирэ дадэ́скиро Даноскиро лав, Израилёскирэ-чхавэ́скиро; а англэды́р долэ́-форо́скиро лав сыс Лаисо.
30. И чхудэ́ тэ тэрдён пэ́стэ Дано́скирэ чхавэ́ вычхиндло муй (истукано); Ионафа́но, Манасия́скирэ-чхавэ́скиро, Гирсоноскиро чхаво́, кокоро́ и лэ́скирэ чхавэ́ сыс рашанца дро Даноскиро ро́дыцо кэ долэ́ дывэса́, сыр мануша́ пэ дая́ пхув сыс пиричхудэ тэ дживэ́н.
7. Ѓа́да, мэ бияндыём дро чорипэ́н и мири́ дай бияндя́ ман грэхитконэса.
8. Ѓа́да, Ту камэ́са, соб (кай) мэ тэ явав чачуно́ дро ило́ и Ту сыклякирэса ман, соб (кай) мэ тэ явав годо́ дрэ гарадэ́ мысли.
9. Выжужакир ман исопоса и мэ ява́ва жужо́, вымор ман и мэ ява́ва парнэдыр ивэстыр.
10. Дэ ма́нгэ, соб (кай) мэ тэ шунав ра́дыма и тэ явав лошало (весёло), соб (кай) тэ радынэ́нпэ мирэ́ кокалы́, савэ́ Ту пхагирдян.
11. Ѓарав Пэ́скиро муй мирэ́ грэхэ́ндыр и кхос криг саро́ миро фуипэ́н.
33. Годыпэ́н откхинёла штылэ́с дрэ барэ́-годя́киро ило́, нэ дова́, со исын дрэ дылыниньконэнгиро ило́, джиндло́ сарэ́нгэ.
34. Чачипэ́н ґаздэ́ла манушэ́н (народо), нэ грэ́хо лэ́ла криг паты́в кажнонэ́ манушэ́ндыр.
35. Кра́ли сыкавэ́ла паты́в годэ́ дынари́скэ, нэ ёв зоралэ́с холясо́ла пэ одолэ́стэ, саво́ ладжакирэла лэс.
24. А ке́ли Ису́со дыкхця́, со ману́ш яця́ древа́н смэнтно, ёв пхэндя́: “Сыр пхаро́ явэ́ла барвалэскэ тэ заджа́л дро Кралипэ́н дро Дэвлэ́скиро Раё;
25. пал-дова́ со локхэды́р верблюдоскэ тэ джал пир сувьякиро кан, сыр барвалэскэ тэ заджа́л дро Кралипэ́н дро Болыбна́скиро Раё.”
26. И мануша́, кон шундлэ́ Лэс, пхучнэ́: “Кон да могинэ́ла тэды тэ зракхэлпэ?”
27. Нэ Ису́со пхэндя́: “Со манушэ́нгэ нашты́, одова́ сашты́ Дэвлэ́скэ.”
28. И Пэ́три пхэндя́: “Амэ саро́ ячкирдям и гиям пал Ту́тэ.”
29. И пхэндя́ Ису́со: “Чачэс, Мэ ракира́ва тумэ́нгэ: нанэ никонэ́с (нанэ нико́н), кон ячкирдя́ кхэр, ци дадэ́с, ци да, ци чхаворэ́н, ци ромня́ ваш Дэвлэ́скэ,
30. соб (кай) лэ́стэ тэ на явэ́л бут мо́лы бутэды́р дро дава́ джиибэ́н, и дро ве́чно джиибэ́н, саво́ явэ́ла.”
31. Ису́со кхардя́ дрэ риг Пэ́скирэ дэшудуе́ сыкляибнытконэ́н и пхэндя́ лэ́нгэ: “Дыкхэ́н, амэ заджаса дро Ерусалимо, и саро́, со проро́ки чхиндлэ́ пал Манушэ́скирэ Чхавэ́стэ, кэрэ́лапэ кэ ко́нцо/яго́ро (сполнинэлапэ);
32. Лэс дэ́на дро васта́ (здэна) Наюдэ́нгэ; и ёнэ явэ́на тэ санпэ холямэс Лэ́стыр, и тэ ладжакирэн, и тэ чунгардэн пэ Лэ́стэ.
33. И ке́ли ёнэ домарэна Лэс, тэды ёнэ мулякирэна Лэс; и пэ три́то дывэ́с Ёв отджидёла.”
34. Нэ ёнэ на ґалынэ́ ни екх лав далэ́стыр. Далэ́-лавэнгиро смысло сыс ґарадо лэ́ндыр, и ёнэ на джиндлэ́, пал со Ису́со ракирдя́.
35. И сыс адя́кэ: ке́ли Ису́со джа́лас пашылэды́р кэ Ерихо́но, вари-саво́ короро́ бо́го сыс бэшто́ пашы́л дром и мангдя́ богитко дыибэ́н.
36. И ке́ли ёв шундя́ шумо манушэ́ндыр, савэ́ джа́нас пашы́л, ёв пхуця́, со дава́ могинэл тэ явэ́л?
37. Ёнэ пхэндлэ́ лэ́скэ: “Ису́со Назаретостыр джа́ла.”
38. И ёв дыя́ го́дла: “Ису́се, Чхаво́ Давидо́скиро! Потангинэ (пожалин) ман!”
39. Мануша́, савэ́ сыс анги́л лэ́стэ, лынэ́ тэ ракирэ́н лэ́скэ холя́са, соб (кай) ёв тэ явэ́л штыл, нэ ёв дэ́лас го́дла ишчо (инкэ́) зоралэды́р: “Чхаво́ Давидо́скиро! Потангинэ ман!”
40. Ису́со тэрдия́ и пхэндя́ тэ янэ́н лэс. И ке́ли ёв подги́я пашылэды́р кэ Ису́со, Ису́со пхуця́ лэ́стыр:
41. “Со ту камэ́са, соб (кай) Мэ тэ кэра́в ту́кэ?”
42. Ёв отпхэндя́: “Раё Дэ́вла, соб (кай) мэ могинавас тэ дыкха́в.” Ису́со пхэндя́ Лэ́скэ: “Дыкх жа: тыро́ патяибэ́н высастякирдя́ тут.”
43. Короро́ ада́й жэ лыя́ тэ дыкхэ́л и гия́ пал Лэ́стэ, и шардя Дэвлэ́с. И сарэ́ мануша́, ке́ли дыкхнэ́ дава́, славиндлэ парикирибнаса Дэвлэ́с.
Romani Bible Baltic 2019
United Bible Societies for the Baltic Romani Mission