Beblia

1. Акэ, исын заветоскирэ лава́, саво́ Рай Дэвэ́л ракирдя́ Мойза́скэ тэ чхувэ́л Израилёскирэ чхавэ́нца пэ пхув Моавоскири, апри́ч завето, саво́ Рай Дэвэ́л чхудя́ лэ́нца пэ Хориво.

2. И скэдыя́ Мо́йза сарэ́н Израилёскирэ чхавэ́н, и пхэндя́ лэ́нгэ: “Тумэ́ дыкхнэ́ саро́, со кэрдя́ Рай Дэвэ́л анги́л тумарэ́ якха́ пэ Египто́скири пхув фараоноса и сарэ́ лэ́скирэ слугэ́нца (дынарье́нца) и сарэ́ лэ́скирэ пхувья́са;

3. долэ́ барэ́ злыджаибэна, савэ́ дыкхнэ́ тырэ́ якха́, и долэ́ барэ́ знаме́нии (ґертыка́) и ди́вы;

4. нэ кэ/жы́ко дава́ дывэ́с на дыя́ тумэ́нгэ Рай Дэвэ́л ило́, соб (кай) тумэ́ тэ ґалён, якха́, соб (кай) тэ дыкхэ́н, и кана́, соб (кай) тэ шунэ́н.

5. Штардэша́ бэрш лыджия́ тумэн Рай Дэвэ́л пир чхучи́ пхув, и тумарэ́ и́ди пэ тумэ́ндэ на роскушнэпэ и ґэритка (обув) тырэ́ на роскушнэпэ пэ тумари́ ґэро́й;

6. маро́ тумэ́ на ханэ́, и мол (вино) и сикера на пинэ́, соб (кай) тумэ́ тэ джинэ́н, со Мэ сом Рай Дэвэ́л, сом Дэвэ́л тумаро́.

7. И ке́ли явнэ́ тумэ́ пэ штэ́то дава́, выгия́ пэ амэ́ндэ о Сигоно, Есевоноскиро кра́ли, и Ого, Васаноскири кра́ли, соб (кай) тэ марэ́нпэ амэ́нца, и амэ розмардям лэн;

8. и лыям лэ́нгири пхув, и отдыям ла дрэ миштыпна́скири ме́ра Рувимо́скирэ и Гадо́скирэ родыцо́скэ и пашакэ Манасия́скирэ родыцо́стыр.

9. Ракхэ́н лава́ далэ́ заветоскирэ, и кэрэ́н кэ ко́нцо (кэ яго́ро) лэн, соб (кай) тумэ́нгэ тэ явэ́л бахт дро саро́, со тумэ́ явэ́на тэ кэрэ́н.

10. Сарэ́ тумэ́ ададывэ́с сан тэрдэ́ анги́л муй Ра́скирэ-Дэвлэ́скиро, тумарэ́ Дэвлэ́скиро, тумарэ́ шэралэ́ пэ ро́дыцы, пхурыдыра́ тумарэ́, барыдыра́ тумарэ́, сарэ́ Израильтя́ни,

11. тумарэ́ чхавэ́, тумарэ́ ромня́ и тумарэ́ мануша́, савэ́ явнэ́ явирэ рига́тыр, и дживэ́на дро тыро́ ста́но, манушэ́стыр, саво́ чингирэла кашта́ тырэ́ кэ ману́ш, саво́ лэ́ла пани́ тыро́,

12. соб (кай) тэ заджас ту́кэ дро завето Ра́скирэ-Дэвлэскирэса, тырэ́ Дэвлэскирэса, и дрэ доракирибнаскири совла́х Лэ́са, саво́ Рай Дэвэ́л, Дэвэ́л тыро́, ададывэ́с чхувэ́ла ту́са,

13. соб (кай) Ёв тэ кэрэ́л тут ададывэ́с Лэ́скирэ манушэ́нца, и Лэ́скэ тэ явэ́л ту́кэ Дэвлэ́са, сыр Ёв ракирдя́ ту́кэ и, сыр Ёв совлахадя́ тырэ́ дадэ́нгэ Авраамо́скэ, Исаако́скэ и Яково́скэ.

14. На екхэ тумэ́нца мэ чхува́ва дава́ заве́то и дава́ совлахадо доракирибэ́н,

15. нэ и одолэнца, савэ́ ададывэ́с ада́й амэ́нца исын тэрдэ́ анги́л амарэ́ Ра́скирэ-Дэвлэ́скиро, Дэвлэ́скиро муй, адя́кэ и кодолэнца, савэ́ нанэ ада́й амэ́нца ададывэ́с.

16. Пал-дова́ со тумэ́ джинэ́на, сыр амэ дживдям пэ Египто́скири пхув, и сыр амэ гиям машки́р манушэ́ндэ, пирда́л савэ́ тумэ́ гинэ́,

17. и дыкхцям магирипэ́н лэ́нгиро и и́долы лэ́нгирэ, каштунэ и барунэ́, рупувэ́ и сувнакунэ́, савэ́ сыс лэ́ндэ.

18. Мэк тэ на явэ́л машки́р тумэ́ндэ муршэ́с, ци джувля́, ци ро́до, ци ро́дыцо (чанг), савэнгиро ило́ тэ отджал бы (хай) акана́ Ра́стыр-Дэвлэ́стыр, Дэвлэ́стыр амарэстыр, соб (кай) ёв тэ псирэ́л тэ дынаринэ́л одолэ́-манушэ́нгирэ дэвлорэ́нгэ; мэк тэ на явэ́л машки́р тумэ́ндэ рукх (корнё), саво́ барьякирэ́ла трута (ядо) и палыно,

19. и, соб (кай) тэ на явэ́л ададывэ́с манушэ́с, сыр адасаво́, саво́ шундя́ далэ́ прокошыбнытка лава́, соб (кай) тэ шарэлпэ дрэ пэ́скиро ило́, ракири́: “Мэ ява́ва бахтало́, на дыкхи́ пэ дова́, со Мэ ява́ва тэ псирав пир выкэдыибэн мирэ́ илэ́скиро”; и адя́кэ хасёла кхэтанэ́ чало бокхалэса;

20. на отмэкэ́ла Рай Дэвэ́л адасавэ́ манушэ́скэ, нэ дова́-паць часо захачола холы́ Ра́скирэ-Дэвлэ́скири и мижэхипэн Лэ́скиро пэ одолэ́ манушэ́стэ, и пэрэ́на пэ лэ́стэ сарэ́ далэ́ заветоскирэ прокошыбэна, савэ́ исын чхиндлэ́ дрэ дая́ лылвари́, и лэ́ла криг (кхосэла криг) Рай Дэвэ́л лэ́скиро лав тэл болыбна́стыр;

21. и чхувэ́ла дро риг лэс адасавэ́ манушэ́с Рай Дэвэ́л пэ хасибэ́н сарэ́ Израилёскирэ родыцэндыр, кхэтанэ́ сарэ́ заветоскирэ прокошыбнэнца, савэ́ исын чхиндлэ́ дрэ дая́ лылвари́ Законоскири.

22. И пхэнэ́ла ро́до, саво́ явэ́ла пал тумэ́ндэ и тумарэ́ чхавэ́, савэ́ явэ́на палэ тумэ́ндэ, и ману́ш явирэ пхувья́тыр, саво́ явэ́ла дуратунэ́ пхувья́тыр, дыкхи́ пэ далэ́-пхувья́киро хасибэ́н и насвалыпэн, савэ́нца замэнчынэла ла Рай Дэвэ́л:

23. ‘Сера (дзэвэля) и лонд, схачкирибэ́н пир сари́ пхув; ёй на сеинэлапэ и на барьякирэ́ла, и на выджа́ла пэ ла́тэ ни сави́ чар, сыр пало́ (после) дова́, ке́ли сыс хасякирдэ́ Содо́мо, Гомо́ра, Адма и Севоимо, савэ́ хасякирдя́ Рай Дэвэ́л дрэ холы́ Пэ́скири, и дрэ Пэ́скиро мижэхипэн’.

24. И пхэнэ́на сарэ́ мануша́: “Палсо́ Рай Дэвэ́л адя́кэ кэрдя́ ла́са пхувья́са? Саво́ баро́ мижэхипэн Лэ́скирэ холя́тыр!”

25. И пхэнэ́на: “Пал-дова́ со ёнэ мэкнэ́ завето Ра́скирэ-Дэвлэ́скиро, пэ́скирэ-дадэ́нгиро Дэвлэ́скиро, саво́ Ёв чхудя́ лэ́нца, ке́ли вылыджия́ лэн Египто́скирэ пхувья́тыр,

26. и гинэ́, и лынэ́ тэ дынаринэ́н явирэ дэвлорэ́нгэ, и тэ мангэ́нпэ лэ́нгэ, дэвлорэ́нгэ, савэ́ ёнэ на джиндлэ́, и пал савэ́ндэ Ёв на ракирдя́ лэ́нгэ:

27. палдава́ ґаздыя́пэ Ра́скирэ-Дэвлэ́скири холы́ пэ дая́ пхув, и яндя́ Ёв пэ ла́тэ сарэ́ заветоскирэ прокошыбэна, савэ́ сыс чхиндлэ́ дрэ дая́ лылвари́;

28. и вытрадыя́ лэн Рай Дэвэ́л пхувья́тыр дрэ холы́, дро мижэхипэн и дрэ бари холы́ и вытрадыя́ лэн пэ яви́р пхув, сыр акана́ дыкхаса.”

29. Бут исын Растэ-Дэвлэ́стэ, амарэ́ Дэвлэ́стэ чораханыбэна (секреты), савэ́ Ёв заучхакирэла (гаравэла) манушэ́ндыр, со исын отчхакирдо амэ́нгэ и амарэ́ чхавэ́нгэ кэ ве́ко, соб (кай) амэ тэ кэра́с саро́ пир далэ́-Законо́скирэ лава́.

1. И явэ́ла адя́кэ: ке́ли явэ́на пэ ту́тэ сарэ́ далэ́ лава́ – бахтякирибэ́н и прокошыбэ́н, савэ́ ракирдём мэ ту́кэ, и ту лэ́са лэн кэ пэ́скиро ило́ машки́р сарэ́ манушэ́ндэ, машки́р савэ́ндэ росчхувэла тэ дживэ́л тут Рай Дэвэ́л, Дэвэ́л тыро́,

2. и рисёса ту кэ Рай Дэвэ́л, Дэвэ́л тыро́, и ту кандэса Лэ́скири зан, сыр мэ ракира́ва ту́кэ ададывэ́с, ту и тырэ́ чхавэ́ сарэ́ тырэ́ илэ́стыр и сарэ́ тырэ́ дестыр,

3. тэды Рай Дэвэ́л, Дэвэ́л тыро́ рискирэ́ла тырэ́ манушэ́н плено́стыр, и потангинэла тут, и нэвэ́стыр скэдэ́ла тут сарэ́ манушэ́ндыр (народэндыр), машки́р савэ́ндэ Ёв росчхудя́ тут тэ дживэ́л Рай Дэвэ́л, Дэвэ́л тыро́.

4. Усае́кх, ко́ли б ту тэ явэс росчхудо кэ болыбна́скиро яго́ро (кэ краё), и одотхы́р скэдэ́ла тут Рай Дэвэ́л, Дэвэ́л тыро́, и одотхы́р лэ́ла тут,

5. и янэ́ла тут Рай Дэвэ́л, Дэвэ́л тыро́, пэ пхув, сави́ сыс тырэ́-дадэнгири, и ту дорэсэса ла, и Ёв бахтякирэ́ла тут, и создэла ту́тыр буты́р манушэ́н, сыр сыс тырэ́ дадэндэ.

6. И обчхинэла (парувэла) Рай Дэвэ́л, Дэвэ́л тыро́, ило́ тыро́ и ило́ тырэ́-родоскиро, соб (кай) ту́кэ тэ явэ́л дро́го Рай Дэвэ́л, Дэвэ́л тыро́, сарэ́ тырэ́ илэ́стыр и сарэ́ дестыр тырэстыр, соб (кай) тэ дживэ́с ту́кэ;

7. тэ́ньчи Рай Дэвэ́л, Дэвэ́л тыро́, сарэ́ далэ́ прокошыбэна пиридэла пэ тырэ́ вэргэ́ндэ (врогэндэ) и пэ одолэ́ндэ, конэ́скэ ту на сан дро́го, савэ́ традынэ тут,

8. а ту рисёса и явэ́са тэ шунэ́с зан Ра́скирэ-Дэвлэ́скири и тэ кэрэ́с саро́ пир сарэ́ Лэ́скирэ припхэныбэна́, савэ́ мэ припхэнава ту́кэ ададывэ́с.

9. И тэ́ньчи буты́р дэ́ла ту́кэ Рай Дэвэ́л, Дэвэ́л тыро́, дро кажно тырэ́-вастэнгиро рэ́ндо, дро барьякирдо́ тырэ́ масэ́ндыр, дро барьякирдо́ тырэ́ кхэритконэ́ мурдалэ́ндыр (ското́стыр), дро барьякирдо́ тырэ́-пхувья́тыр; пал-дова́ со нэвэ́стыр явэ́ла тэ радынэ́лпэ Рай Дэвэ́л пал ту́тэ, Ёв бахтякирэ́ла тут, сыр Ёв радындяпэ пал тырэ́ дадэндэ,

10. ко́ли явэ́са ту тэ кандэс Ра́скирэ-Дэвлэ́скири, тырэ́-Дэвлэ́скири зан, тэ ракхэ́с Лэ́скирэ припхэныбэна́ и упхэныбэна́ Лэ́скирэ, савэ́ сыс чхиндлэ́ дрэ дая́ Законоскири лылвари́, и ко́ли рисёса ту кэ Рай Дэвэ́л, Дэвэ́л тыро́, сарэ́ илэ́са тырэса и сарэ́ деса тырэса.

11. Пал-дова́ со дава́ припхэныбэ́н (заповедь), саво́ мэ ракира́ва ту́кэ ададывэ́с, нанэ гарадо́ ваш ту́кэ и нанэ дур;

12. ёв (припхэныбэ́н) на пэ болыбэ́н, соб (кай) тэ явэ́л сашты́ (можна) тэ ракирэ́с: ‘Кон джа́ла упрэ́ ваш амэ́нгэ пэ болыбэ́н, и янэ́ла лэс амэ́нгэ, и дэ́ла амэ́нгэ тэ шунас лэс, и амэ сполнинаса лэс?’

13. и на пал мо́рё (дэрья́в) ёв, соб (кай) тэ явэ́л сашты́ тэ ракирэ́с: ‘Кон псирэ́ла пал амэ́ндэ пал мо́рё (дэрья́в), и янэ́ла лэс амэ́нгэ, и дэ́ла амэ́нгэ тэ шунас лэс, и амэ кэра́са саро́ пир лэ́стэ?’

14. Дава́ лав исын древа́н пашы́л кэ ту: ёв исын дрэ тырэ́ ушта́ и дро тыро́ ило́, соб (кай) тэ сполнинэс лэс.

15. Дыкх, мэ ададывэ́с пропониндём ту́кэ (чхурдыём лав анги́л ту́тэ) пал джиибэ́н и лачхипэ́н, мулыпэн (мэрибэ́н) и чорипэ́н.

16. Мэ, Мо́йза, саво́ ракира́ва ту́кэ ададывэ́с – тэ рикирэс сыр Дро́гима дро ило́ Рас-Дэвлэ́с, Дэвлэ́с тырэ́с, тэ псирэ́с пир Лэ́скирэ дрома́, и тэ кэрэ́с саро́ пир Лэ́скирэ припхэныбэна́, стату́ты и зако́ны Лэ́скирэ; и явэ́са ту дживэ́с и явэ́ла бут тумэн, и бахтякирэ́ла тут Рай Дэвэ́л, Дэвэ́л тыро́, пэ пхув, пэ сави́ ту джа́са, соб (кай) тэ лэс ла;

17. нэ, ко́ли отрисёла ило́ тыро́, и ту на явэ́са тэ шунэ́с, и заблэндынэса, и лэ́са тэ мангэспэ явирэ дэвлорэ́нгэ и ту явэ́са тэ дынаринэс лэ́нгэ,

18. то тэды мэ да́ва тэ джинэ́н тумэ́нгэ ададывэ́с, со тумэ́ хасёна, и на явэ́на ґара́ (длу́гэс) пэ пхув, соб (кай) тэ лэс ла, ваш сави́ ту пириджаса Иорда́но.

19. Соб (кай) тэ досыкавав анги́л тумэ́ндэ Мэ кхара́ва ададывэ́с болыбэ́н и пхув: джиибэ́н и мулыпэн (мэрибэ́н) мэ пропониндём ту́кэ, бахтякирибэ́н и прокошыбэ́н. Выкэдэ джиибэ́н, соб (кай) тэ дживэ́с ту, и ро́до тыро́,

20. и тэ рикирэс сыр Дро́гима дро ило́ Рас-Дэвлэ́с, Дэвлэ́с тырэ́с, тэ шунэ́с Лэ́скири зан и тэ причхувэспэ кэ Ёв; пал-дова́ со дро дава́ исын джиибэ́н тыро́ и длуга тырэ́ дывэса́, соб (кай) тэ явэс ту́кэ гара (длу́гэс) пэ пхув, сави́ Рай Дэвэ́л совлахадя́ дадэ́нгэ тырэнгэ, Авраамо́скэ, Исаако́скэ и Яково́скэ, тэ дэл лэ́нгэ.”

1. Хоро́скирэ Дирижоро́скэ. Давидо́скиро Пса́лмо.

2. Мэ древа́н ужакирдём Рас-Дэвлэ́с, и Ёв бандия кэ мэ и шундя́, со мэ ровава годлэнца.

3. И Ёв вытырдыя ман хасибнытконэ рово́стыр (хохо́стыр), артапелятыр (болотостыр) тинаса и Ёв чхудя́ мири́ ґэро́й пэ бар; и Ёв дыя́ зор мирэ́ пирэ́нгэ (стопэ́нгэ).

4. Ёв чхудя́ нэви́ гилы́ дро миро муй, соб (кай) тэ шарэ́н амарэ́ Дэвлэ́с. Бут мануша́ дыкхэ́на дава́ и явэ́на тэ дарэ́н и явэ́на тэ гарадён пал Растэ-Дэвлэ́стэ.

5. Тэ явэ́л бахтало́ одова́ ману́ш, кон ужакирэ́ла лачхипэ́н Ра́стыр-Дэвлэ́стыр, и саво́ на рисёла кэ пхутькирдэ́ и кэ одолэ́, савэ́ рисёна кэ хохаибэ́н.

9. Чачунэ́-манушэ́скиро дуд (свэ́то) хачола радыма́са, а фуе́-манушэ́скиро момолы́тко (свети́льнико) мурдёла.

10. Пхутькирибнастыр джа́ла чинга́рд, нэ, кон кандэ́ла, сыр лэ́скэ дэ́на годыпэ́н, одова́ исын годо́.

1. Ке́ли Ису́со кончындя дава́ саро́ ракирибэ́н манушэ́нгэ, Ёв явдя́ дро Капернаумо.

2. Одо́й екхэ шэлэнгирэ-халадытконэ барыдырэстэ сыс насвало́ лэ́скиро дына́ри, саво́ сыс лэ́стэ дрэ паты́в, и ёв сыс насвало́ кэ мэрибэ́н.

3. Ке́ли барыдыро́ шундя́ пал Исусо́стэ, ёв бичхадя́ кэ Ёв Юдэ́нгирэ годэпхурэн тэ мангэ́н Лэс тэ явэ́л, и тэ высастякирэл шэлэнгирэ дынари́с.

4. И годэпхурэ́ явнэ́ кэ Ису́со и древа́н мангнэ́ Лэс, ракири́: “Кадава́ ману́ш исын мол, соб (кай) Ту тэ помогинэс Лэ́скэ.

5. Пал-дова́ со лэ́скэ исын дро́га амарэ́ мануша́ и ёв чхудя́ синагога ваш амэ́нгэ.”

6. И гия́ Ису́со лэ́нца; нэ, ке́ли Ёв сыс на́дур лэ́скирэ кхэрэ́стыр, то бичхадя́ пэ́скирэ малэн тэ пхэнэ́н Лэ́скэ: “Раё Дэ́вла! На мэнчын Пэс; пал-дова́ со мэ на сом мол, соб (кай) Ту тэ заджас дро Миро кхэр;

7. и мэ гинава, со мэ на сом мол тэ явав кэ Ту; нэ Ту пхэн лав, и явэ́ла миро дына́ри нэвэ́стыр састо́.

8. И мэ адя́кэ-паць сом ману́ш, пэ конэ́стэ исын барыдыро́, и ма́ндэ исын халадэ́, савэ́ кандэ́на ман, и мэ пхэна́ва екхэ́скэ: ‘Джа́’ и джа́ла; и явирэскэ: ‘Яв’ и явэ́ла, и кадалэскэ дынари́скэ мирэ́скэ: ‘Кэр дава́,’ и кэрэ́ла.”

9. И сыр Ису́со шундя́ дава́, дивиндяпэ лэ́стыр и пхэндя́ манушэ́нгэ, савэ́ гинэ́ пал Лэ́стэ: “Чачо́, Мэ пхэна́ва тумэ́нгэ: Мэ на латхём дасаво патяибэ́н и дро Израилё.”

10. И одолэ́ мануша́, савэ́н барыдыро́ шэлэнгиро бичхадя́, рисинэ́ и дыкхнэ́, со дына́ри сыс састо́.

11. И сыс адя́кэ: пало́ дава́ Ису́со явдя́ дро фо́ро Наино и бут Лэ́скирэ сыкляибны́тка и яви́р мануша́ явнэ́ Лэ́са кхэтанэ́.

12. Ке́ли Ису́со подги́я пашылэды́р кэ форо́скири по́рта, ада́й вылыджанас мулэ́ манушэ́с тэ гаравэн, саво́ сыс екхджино́ пэ́скирэ датэ; бут мануша́ джа́нас ла́са.

13. Ке́ли Рай Дэвэ́л дыкхця́ ла, Лэ́скэ яця́ танго (жалко) ла и Ёв пхэндя́ ла́кэ: “На ров”

14. И Ёв подги́я и чиладя́ насилки (трага́чы), и мануша́, савэ́ лыджинэ́, тэрдинэ́. Ису́со пхэндя́: “Тэрно́ ману́ш, ушты́, Мэ ту́кэ ракира́ва.”

15. Муло ману́ш бэсця́ и лыя́ тэ ракирэ́л; и Ису́со отдыя́ лэс лэ́скирэ да́кэ.

16. Пэ лэ́ндэ сарэ́ндэ бари дар пыя́ и ёнэ славиндлэ Дэвлэ́с, ракири́: “Баро́ проро́ко явдя́ тэ явэ́л амэ́нца, Дэвэ́л помогинэла Пэ́скирэ манушэ́нгэ.”

17. Адая зан (звесь) гия́ пал Исусо́стэ пир сари́ Юдеякири пхув и сарэ́ пашатунэ́ штэ́ты.

18. И Ианоскирэ Болдэипнарискирэ сыкляибны́тка роспхэндлэ́ лэ́скэ саро́ пал дова́.

19. Иа́но кхардя́ дуе́н пэ́скирэ сыкляибнытконэндыр и бичхадя́ лэн кэ Ису́со тэ пхучэ́н: “Ту сан Кодова́, Савэ́скэ трэй тэ явэ́л, ци явирэ́с амэ́нгэ тэ ужакирас?”

20. Ёнэ явнэ́ кэ Ису́со и пхэндлэ́ Лэ́скэ: “Иа́но Болдэипнари бичхадя́ амэн кэ ту тэ пхучас: ‘Ту сан Кодова́, Савэ́скэ трэиндя́ тэ явэ́л, ци явирэ́с амэ́нгэ тэ ужакирас?’”

21. Дро дова́ часо Ису́со высастякирэлас бутэ́ манушэ́н насвалыпнэндыр и дукхэндыр и налачхэ́ дукхэндыр и Ёв высастякирдя́ якха́ бутэндэ корорэндэ.

22. И отпхэндя́ Ису́со лэ́нгэ: “Джа́н и пирипхэнэн Ианоскэ, со тумэ́ дыкхнэ́ и шундлэ́: корорэ́ мануша́ дыкхэ́на нэвэ́стыр и лангалэ псирэ́на: проказытка ячэ́на жужэ́, и кашукэ мануша́ шунэ́на, мулэ́ отджидёна, и бо́ги роспхэнэна бахталы́ зан (звесь);

23. и бахтало́ исын кодова́, кон на хасякирэ́ла патяибэ́н дрэ Ма́ндэ.”

24. Ке́ли Ианоскирэ бичхадэ́ мануша́ гинэ́, Ису́со лыя́ тэ ракирэ́л манушэ́нгэ пал Ианостэ: “Со псирдэ́ тумэ́ пэ чхучи́ пхув тэ дыкхэ́н? Сыр трастинитко кашт тринскирлапэ балвалятыр?

25. Ваш со тумэ́ псирдэ́ одори́к тэ дыкхэ́н? Манушэ́с, саво́ сыс уридо́ дрэ шука́р и́дя? Над, мануша́, савэ́ уридэ́ дрэ шука́р и́дя, дживэ́на дрэ кралитка барэ́ фэлатиня́ (колова).

26. Нэ, со ж тумэ́ тэды псирдэ́ тэ дыкхэ́н? Пророко́с? Чачо́, ракира́ва тумэ́нгэ: ‘Ёв исын барэды́р пророкостыр.’

27. Ёв исын кодова́, пал савэ́стэ исын чхиндло́: “Гада, Мэ бичхава́ва Мирэ́ выкэдынэ́ манушэ́с анги́л Ту́тэ, саво́ приготовинэла дром Тыро́ анги́л Ту́тэ.’”

28. Палдава́ Мэ ракира́ва тумэ́нгэ: нанэ барэды́р пророко́с Иано́стыр Болдэипнаристыр машки́р одолэ́ндэ, савэ́н джувля́ биянэна, нэ най тыкнэды́р дро Болыбна́скиро Раё исын барэды́р Иано́стыр.”

29. И сарэ́ мануша́, савэ́ шундлэ́ Лэс, и мытоскирэ скэдыибнарья приґалынэ Дэвлэ́скиро чачипэ́н и болдэпэ Ианостэ Болдэипнаристэ.

30. А Фарисе́и и Законо́скирэ сыклякирибнарья отпхэндлэпэ Дэвлэ́скирэ лавэ́стыр; ёнэ на болдэпэ Ианостэ Болдэипнаристэ.

Romani Bible Baltic 2019

United Bible Societies for the Baltic Romani Mission