Bible in one year
April 8

1. Ке́ли сарэ́ Аморее́нгирэ кра́лья, савэ́ дживдэ́ пир дая́ риг Иорданоскири кэ мо́рё (дэрья́в), и сарэ́ Ханааноскирэ кра́лья, савэ́ сыс пашы́л мо́рё (дэрья́в), шундлэ́, со Рай Дэвэ́л, Дэвэ́л вышутькирдя пани́ Иорданоскиро анги́л Израилёскирэ чхавэ́ндэ, пака ёнэ пириджанас: то тэды яця́ би зорьякиро лэ́нгиро ило́, и на яця́ буты́р дрэ лэ́ндэ ду́хо проти Израилёскирэ чхавэ́ндэ.
2. Дро дова́-паць часо Рай Дэвэ́л пхэндя́ Исусо́скэ: “Кэр пэ́скэ востра чхурья и обчхин Израилёскирэ чхавэ́н дро яви́р мо́ло”.
3. И кэрдя́ пэ́скэ Ису́со востра чхурья, и обчхиндя Израилёскирэ чхавэ́н пэ штэ́то, саво́ сыс кхардо “обчхиныбнаскири бэ́рга”.
4. Ѓа́да, со́скэ обчхиндя Ису́со Израилёскирэ чхавэ́н: сарэ́ мануша́, савэ́ выгинэ́ Египто́стыр, мурша́, сарэ́, кон сыс лачхо́ кэ марибэ́н помынэ пэ чхучи́ пхув пэ дром пир выгиибэн Египто́стыр;
5. сарэ́, савэ́ выгинэ́ мануша́, сыс обчхиндлэ́; нэ сарэ́ мануша́, савэ́ бия́ндынэ пэ чхучи́ пхув пэ дром, пало́ дава́, сыр выгинэ́ Египто́стыр, на сыс обчхиндлэ́.
6. Пал-дова́ со Израилёскирэ чхавэ́ штардэша́ бэрш псирдэ́ пир чхучи́ пхув, пака мынэ́ сарэ́ мануша́, савэ́ сыс лачхэ́ кэ марибэ́н, савэ́ выгинэ́ Египто́стыр, савэ́ на шундлэ́ Раскири-Дэвлэ́скири зан, и савэ́нгэ Рай Дэвэ́л совлахадя́, со ёнэ на дыкхэ́на пхув, сави́ Рай Дэвэ́л совлахаса дыя́ лав лэ́нгирэ дадэ́нгэ, тэ дэл лэ́нгэ пхув, кай тхадэ́ла тхуд и авги́н.
7. А заме́ст лэ́ндэ ґаздыя́ лэ́нгирэ чхавэ́н, савэ́н обчхиндя Ису́со, пал-дова́ со ёнэ сыс наобчхиндлэ; пал-дова́ со лэн пир дром на обчхинэнас.
8. Ке́ли сарэ́ мануша́ сыс обчхиндлэ́, ячэнаспэ ёнэ пэ пэ́скиро штэ́то дрэ ста́но, пака высастёнас.
9. И пхэндя́ Рай Дэвэ́л Исусо́скэ (Ёхошуаскэ): “Акана́ Мэ злыём тумэ́ндыр ладж Египто́скири. Со́скэ и кхарэ́лапэ дова́ штэ́то: Галга́ло, адя́кэ-паць кэ дава́ дывэ́с”.
10. И сыс тэрдэ́ Израилёскирэ чхавэ́ стано́са дро Галга́ло, и кэрдэ́ Патради́ пэ дэшуштарто чхонэ́скиро дывэ́с бэльвэле́ пэ Ерихоноскирэ лошчыны.
11. И пэ яви́р дывэ́с Патради́ лынэ́ тэ хан, со выбария пэ дая́ пхув, опресноки и шукэ́ зя́рки (зёрны) дрэ дова́-паць дывэ́с.
12. А манна пирияця́ тэ пэрэ́л пэ яви́р дывэ́с пало́ дова́, сыр ёнэ лынэ́ тэ хан, со барьёла пэ пхув, и на сыс буты́р манна Израилёскирэ чхавэ́ндэ, нэ ёнэ ханэ́ дрэ дов-паць бэрш дова́, со барьёла пэ Ханаано́скири пхув.
13. О Ису́со, сыс на́дур Ерихоностыр, дыкхця́ упрэ́ и дыкхэ́ла, и, ґа́да, сыс тэрдо́ анги́л лэ́стэ ману́ш, и дрэ лэ́скиро васт сыс вытырдыны курта́ла. Ису́со подги́я кэ ёв и пхэндя́ лэ́скэ: “Ци амаро́ ту, ци вэргэ́ндыр амарэндыр?”
14. Ёв пхэндя́: “Над; мэ сом шэрало́ пэ Ра́скирэ-Дэвлэ́скирэ халадыбэ́н (воинства), акана́ явдём дарик”. Ису́со пыя́ пэ́скирэ мо́са пэ пхув, и поклониндяпэ, и пхэндя́ лэ́скэ: “Со хула́й миро пхэнэ́ла пэ́скирэ писхари́скэ?”
15. Шэрало́ пэ Ра́скирэ-Дэвлэ́скиро халадыбэ́н пхэндя́ Исусо́скэ: “Лэ тырэ́ ґэритка тырэ́ ґэрэндыр, пал-дова́ со штэ́то, пэ саво́ ту сан тэрдо́, исын свэ́нто”. Ису́со адя́кэ и кэрдя́.
1. Ерихо́но зачхакирдяпэ, и сыс зачхакирдо дара́тыр Израилёскирэ чхавэ́ндыр: нико́н на выгия́ лэ́стыр, и нико́н на загия́.
2. Тэды Рай Дэвэ́л пхэндя́ Исусо́скэ: “Ѓа́да, Мэ пиридава дрэ тырэ́ васта́ Ерихо́но и лэ́скирэ крали́с, и зоралэн манушэ́н, савэ́ исын дрэ лэ́стэ.
3. Джа́н пашы́л фо́ро сарэ́, савэ́ исын лачхэ́ кэ марибэ́н, и обджан фо́ро е́кхвар дрэ дывэ́с; и кэр дава́ шов дывэса́.
4. И эфта́ рашая́ мэк тэ лыджа́н эфта́ ро́ги (трубы) свэнкитка анги́л ковчэго; а пэ эфта́то дывэ́с обджан пашы́л фо́ро эфта́ мо́лы, и рашая́ мэк тэ трубинэн дрэ ро́ги.
5. Ке́ли затрубинэла свэнкитко шынг (ро́го), ке́ли ушунэна зан рогоскири, тэды сарэ́ мануша́ мэк тэ задэн го́дла зоралэ́ заня́са; и ва́нта форо́скири роспэрэлапэ кэ пэ́скиро фунда́менто, и сарэ́ мануша́ явэ́на тэ джа́н дрэ фо́ро, и явэ́на тэ заджа́н сы́гэс кажно (сва́ко) пэ́скирэ рига́тыр.
6. И кхардя́ кэ пэ Ису́со, Навиноскиро чхаво́, Израилёскирэ раша́н, и пхэндя́ лэ́нгэ: “Лыджа́н завето́скиро ковчэго; а эфта́ рашая́ мэк тэ лыджа́н эфта́ ро́ги свэнкитка анги́л Ра́скирэ-Дэвлэ́скиро ковчэго”.
7. И пхэндя́ манушэ́нгэ: “Джа́н и обджан пашы́л фо́ро: мардытконэнца мэк тэ джа́н анги́л Ра́скирэ-Дэвлэ́скиро ковчэго”.
8. Сыр сыг Ису́со пхэндя́ манушэ́нгэ, эфта́ рашая́, савэ́ лыджынэ эфта́ ро́ги свэнкитка анги́л Растэ-Дэвлэ́стэ, гинэ́ и затрубиндлэ рогэ́нца, и Ра́скирэ-Дэвлэ́скиро завето́скиро ковчэго гия́ пал лэ́ндэ.
9. Мануша́ мардытконэнца гинэ́ анги́л рашандэ, савэ́ трубиндлэ рогэ́нца; а мануша́, савэ́ гинэ́ пала́л, гинэ́ пал ковчэго, ке́ли гинэ́ и трубиндлэ рогэ́нца.
10. Манушэ́нгэ Ису́со дыя́ упхэныбэ́н и пхэндя́: “На дэн го́дла и на дэн тэ шунэ́н тумари́ зан (глос), и соб (кай) лав тэ на выджа́л тумарэ́ уштэндыр кэ дова́ дывэ́с, пака мэ пхэна́ва тумэ́нгэ: ‘Задэн го́дла’, и тэды тумэ́ задэн го́дла”.
11. Адя́кэ Ра́скирэ-Дэвлэ́скиро завето́скиро ковчэго гия́ пашы́л фо́ро, и обгия е́кхвар; и явнэ́ дрэ ста́но, и ратькирдэ дро ста́но.
12. Пэ яви́р дывэ́с Ису́со уштыя́ тася́рлэс (ра́нэс) пэ ра́нко, и рашая́ лыджинэ́ Ра́скирэ-Дэвлэ́скиро завето́скиро ковчэго.
13. И эфта́ рашая́, савэ́ лыджинэ́ эфта́ ро́ги свэнкитка анги́л Ра́скиро-Дэвлэ́скиро ковчэго, гинэ́ и трубиндлэ рогэ́нца; мануша́ мардытконэнца гинэ́ анги́л лэ́ндэ, а мануша́, савэ́ гинэ́ пала́л, гинэ́ пал Ра́скирэ-Дэвлэ́скиро завето́скиро ковчэго и гии, трубиндлэ рогэ́нца.
14. Адя́кэ-паць и пэ яви́р дывэ́с обгинэ пашы́л фо́ро е́кхвар, и рисинэ́ дрэ ста́но. И кэрдэ́ дава́ шов дывэса́.
15. Пэ эфта́то дывэ́с уштынэ́ тася́рлэс (ра́нэс), анги́л зло́ко пэ зоря, и обгинэ адя́кэ-паць пашэ́ фо́ро эфта́ мо́лы; дрэ екх дава́ дывэ́с обгинэ пашы́л фо́ро эфта́ мо́лы.
16. Ке́ли пэ эфта́то мо́ло рашая́ трубиндлэ рогэ́нца, Ису́со пхэндя́ манушэ́нгэ: “Задэн го́дла, пал-дава́ со Рай Дэвэ́л пиридыя тумэ́нгэ фо́ро!”
17. Фо́ро явэ́ла тэл арманя (прокошыбэ́н), и саро́, со исын дрэ лэ́стэ, Ра́скэ-Дэвлэ́скэ; екх Раав биладжакуны джувлы́ мэк тэ ячэ́лпэ джиды, ёй и кажно (сва́ко) ману́ш, кон явэ́ла ла́тэ дро кхэр; пал-дова́ со ёй гарадя манушэ́н, савэ́н амэ бичхадям.
18. Нэ тумэ́ ракхэ́нпэ долэ́стыр, со исын прокошно́, соб (кай) и кокорэнгэ тэ на пэрэ́н тэл прокошыбэ́н, ко́ли лэ́на вари-со прокошнэстыр, и соб (кай) пэ ста́но Израилёскирэ чхавэ́нгиро тэ на лыджас прокошыбэ́н и тэ на кэрэ́с лэ́скэ би́да.
19. И саро́ руп, и сувнака́й, и кхорэ́ (сасу́ды) харкунэ́ и саструнэ́, мэк тэ явэ́н свэ́нта Ра́скэ-Дэвлэ́скэ, и заджа́на дрэ Ра́скирэ-Дэвлэ́скири пиралы́”.
20. Мануша́ задынэ го́дла, и затрубиндлэ рогэ́нца. Сыр сыг шундлэ́ мануша́ зан рогоскири, задынэ мануша́ зоралэ́ заня́са; и роспыяпэ ва́нта форо́скири кэ пэ́скиро фунда́менто и мануша́ гинэ́ дро фо́ро, кажно (сва́ко) пэ́скирэ рига́тыр, и лынэ́ фо́ро.
21. И отдынэ́ прокошыбнаскэ саро́, со сыс дрэ фо́ро, и муршэ́н и джувле́н, и тэрнэн и пхуранэн, и гурувэ́н, и бакрэ́н, и ослэн, саро́ хасякирдэ́ куртала́са.
22. А дуе тэрнэ́ манушэ́нгэ, савэ́ обдыкхэнас пхув, Ису́со пхэндя́: “Джа́н дро кхэр адалэ́ биладжакунэ́-джувля́киро и вылыджан одотхы́р ла и сарэ́н, кон исын ла́тэ, адя́кэ сыр тумэ́ совлахадэ ла́кэ”.
23. И гинэ́ тэрнэ́ мануша́, савэ́ обдыкхэнас фо́ро, дро кхэр джувля́киро и вылыджинэ́ Раав, и дадэ́с лакирэс, и да лакирья, и пшалэ́н лакирэн, и сарэ́н, кон ла́тэ сыс, и сарэ́ сэмэнцэн лакирэн вылыджинэ́, и чхудэ́ лэн пал ста́но Израилёскирэ.
24. А фо́ро и саро́, со сыс дрэ лэ́стэ, схачкирдэ́ яга́са; екх руп, и сувнака́й, и кхорэ́ (сасу́ды) харкунэ́ и саструнэ́ отдынэ́ дро зракхибэ́н дро Ра́скирэ-Дэвлэ́скиро Кхэр.
25. Раав, биладжакуна джувля́, и кхэр ла́кирэ дадэ́скиро, и сарэ́н, кон ла́тэ сыс, Ису́со ячкирдя́ джидэн, и ёй дживэ́ла машки́р Израилё кэ дава́ дывэ́с: пал-дова́ со ёй гарадя манушэ́н, савэ́н бичхадя́ Ису́со тэ обдыкхэн Ерихо́но.
26. Дрэ дова́ часо Ису́со совлахадя́ и пхэндя́: “Прокошно́ явэ́ла анги́л Растэ-Дэвлэ́стэ одова́, кон ґаздэ́ла и скэрэла фо́ро дава́ Ерихо́но; пэ англатунэстэ чхавэ́стэ пэскирэстэ ёв чхувэ́ла фунда́менто лэ́скиро, и пэ тыкныдыршонэстэ пэ́скирэ чхавэ́стэ чхувэ́ла вудара́ лэ́скирэ”.
27. И Рай Дэвэ́л сыс Исусо́са, и сла́ва лэ́скири розгия́пэ пир сари́ пхув.
6. О миро ди, со́скэ ту тугинэса и издраса дрэ ма́ндэ? Ужакир лачхипэ́н Дэвлэ́стыр; и мэ ява́ва тэ парикира́в Лэ́скэ, Кон зракхця́ ман.
7. О, миро Дэ́вла, миро ди исын дрэ ту́га дрэ ма́ндэ; мэ пририпирава пал Ту́тэ Иорданоскирэ пхувья́тыр, Гармоноскирэ вучипнэндыр, Мизароскирэ бэрга́тыр.
8. Хорипэ́н прикхарэла хорипэ́н лопотымаса, сыр паня́ пэрэ́на, сарэ́ Тырэ́ валны (вэлны) и панинга́, со кунякирэнапэ, гинэ́ упрэ́ вучэды́р ма́ндыр.
9. Рай Дэвэ́л дэ́ла Лэ́скири лачхэ́-илы́ткима дывэсэ́, а раты́ мэ багава гилы́ Лэ́скэ и мэ мангавапэ Дэвлэ́скэ, мирэ́ Джиибнаскирэскэ.
10. Мэ пхэна́ва Дэвлэ́скэ, мирэ́ Бэргакэ: “Со́скэ Ту бистырдян пал ма́ндэ? Со́скэ мэ псирава и издрава, ке́ли вэ́рго тасавэла ман.
11. Мирэ́ вэ́рги обракирэна ман адя́кэ, со аж мирэ́ кокалы́ пхарадёна, ке́ли ёнэ ракирэ́на ма́нгэ со дывэ́с: “Кай исын тыро́ Дэвэ́л?
19. Ке́ли зоралы́ мысля кэ вари-со кэрэ́лапэ кэ ко́нцо (кэ яго́ро), дава́ гудлякирэла ило́, нэ дылынэскэ на пир ило́ тэ джал криг фуипнастыр.
20. Кон кумплинэлапэ (малынэлапэ) годэ́ манушэ́нца, явэ́ла годо́, нэ кампания (малыпэн) дылыниньконэнца хасякирэ́ла лэс.
21. Фуипэ́н родэ́ла грэхитконэ́ манушэ́н, нэ чачунэ́ манушэ́нгэ отплэскирэлапэ палэ лачхипна́са.
18. Екхвар, ке́ли Ису́со сыс екхджино́ и мангдя́пэ Дэвлэ́скэ, а Лэ́скирэ сыкляибны́тка сыс Лэ́са, Ёв пхуця́ лэ́ндыр: “Пал конэ́стэ мануша́ гинэ́на Ман?”
19. Ёнэ отпхэндлэ́: “Пал Ианостэ Болдэипнаристэ, яви́р-пал Илиястэ; яви́р ракирэ́на, со екх ґаратунэ́ пророкэндыр отджидыя́.”
20. Ёв пхуця́ лэ́ндыр: “Нэ тумэ́ пал конэ́стэ Ман гинэ́на?” Пэ́три отпхэндя́: “Пал Дэвлэ́скирэ Христосо́стэ.”
21. Нэ Ису́со припхэндя́ шылалэс ни конэ́скэ тэ на ракирэ́н пал дава́.
22. И Ёв адя́кэ-паць пхэндя́, со Манушэ́скирэ Чхавэ́скэ трэй тэ пиридживэл бут мэ́ньки, со Лэс на приґалёна годэпхурэ́ и раша́нгирэ барыдыра́ и лылвари́тка, со Ёв явэ́ла замардо, и со пал трин дывэса́ Ёв отджидёла.
23. И Ёв пхэндя́ лэ́нгэ сарэ́нгэ: “Ко́ли вари-кон камэ́ла тэ джал пал Ма́ндэ, мэк тэ на думинэл буты́р пал пэ́стэ, мэк тэ лэл трушу́л пэ́скиро и тэ джал пал Ма́ндэ;
24. пал-дова́ со, кон камэ́ла пэ́скиро джиибэ́н тэ зракхэ́л, одова́ хасякирэ́ла лэс, и кон отдэ́ла пэ́скиро джиибэ́н пал Ма́ндэ, одова́ зракхэ́ла лэс,
25. нэ саво́ лачхипэ́н манушэ́скэ, ко́ли лэ́стэ явэ́ла саро́, со Ёв камэ́ла далэ́ свэто́стыр, а кокоро́ пэс ёв хасякирэ́ла, ци кэрэ́ла пэ́скэ чорипэ́н?
26. Пал-дова́ со кон ладжала Ма́ндыр и Мирэ́ лавэ́ндыр, одолэ́стыр и Чхаво́ Манушэ́скиро явэ́ла тэ ладжал, ке́ли явэ́ла дрэ Пэ́скирэ-Дадэ́скири ярко сла́ва свэнтонэ́ Янголэнца,
27. Чачэс, Мэ ракира́ва тумэ́нгэ: ада́й исын вари-савэ́ мануша́, савэ́ на мэрэ́на, ко́ли ёнэ на дыкхэ́на Дэвлэ́скиро Кралипэ́н дро Болыбна́скиро Раё.”
28. Прогинэ́ вари-савэ́ охто́ (бидуе́нгиро дэш) дывэса́, сыр Ису́со пхэндя́ далэ́ лава́, и Ёв лыя́ Пэ́са Пэтрис, Ианос и Яково́с и ґаздыя́пэ пэ бэ́рга тэ мангэ́лпэ Дэвлэ́скэ.
29. Пака Ёв мангдя́пэ Дэвлэ́скэ, Лэ́скиро муй и мина парудынэ, Лэ́скиро муй яця́ тэ зяинэл и парнёл.
30. И, ґа́да, дуй мурша́ ракирдэ́ Лэ́са, савэ́ сыс Мо́йза (Моисеё) и Или́я;
31. и савэ́ сыкадынэ болыбна́скирэ зяиныбнаса; ёнэ ракирдэ́ Исусо́са пал Лэ́скиро мэрибэ́н, пир саво́ Лэ́скэ трэиндя́ тэ проджал дро Ерусалимо.
32. Нэ Пэ́три и лэ́скирэ мала́ сыс пхарэ́с сутэ́; нэ ке́ли ёнэ джангадынэ, тэды дыкхнэ́ ёнэ Исусо́с дро зяиныбэн и дуе муршэ́н, савэ́ сыс Лэ́са.
33. Ке́ли адалэ́ мурша́ отджанас Исусо́стыр, Пэ́три пхэндя́ Исусо́скэ: “Сыклякирибна́скиро! Сыр шука́р амэ́нгэ тэ явас ада́й; кэра́са трин ша́тры; екх Ту́кэ, екх Мойза́скэ, екх Илияскэ – ёв на джиндя́, со ракирдя́.
34. Пака ёв ишчо (инкэ́) ракирдя́ дава́, сыкадыя́ о́блоко и учхакирдя́ лэн; и ёнэ страха́дынэ, ке́ли о́блоко гарадя Мойза́с и Илияс.
35. И сыс шундлы зан облокостыр, сави́ ракирдя́: “Кадава́ исын Миро дро́го Чхаво́, Лэс шунэ́н.”
36. Ке́ли зан пирияця́, Ису́со яця́пэ екхджино́. Сыкляибны́тка сыс штыл и на ракирдэ́ ни конэ́скэ дрэ долэ́ дывэса́, со ёнэ дыкхнэ́.
Romani Bible Baltic 2019
United Bible Societies for the Baltic Romani Mission