Bible in one year - Пэ Балтитко Романи чиб

Bible in one year April 9

1. Нэ Израилёскирэ чхавэ́ кэрдэ́ чорипэ́н и лынэ́ совлахадэстыр (прокошнэстыр): Ахано Хармияскиро чхаво́, Завдияскирэ-чхавэ́скиро, Заракирэ чхавэ́скиро, Юда́скирэ родыцо́стыр, лыя́ совлахадэстыр, и холы́ Ра́скирэ-Дэвлэ́скири захачи́я пэ Израилёскирэ чхавэ́ндэ.

2. Ису́со (Ёхошуа́) Ерихоностыр бичхадя́ манушэ́н дро Гаё, со исын пашы́л Беф-Авено, васточнонэ Вефилёскирэ рига́тыр, и пхэндя́ лэ́нгэ: “Джа́н, обдыкхэн пхув”. Ёнэ гинэ́ и обдыкхнэ Гаё.

3. И рисинэ́ кэ Ису́со, и пхэндлэ́ лэ́скэ: “На сарэ́ мануша́ мэк тэ джа́н, а мэк тэ джа́н пашы́л дуй тысёнцы ци пашы́л трин тысёнцы манушэ́н, и тумэ́ домарэн Гаё; сарэ́ манушэ́н на лы́джа одори́к, пал-дова́ со лэн на́бут одо́й”.

4. И адя́кэ гинэ́ одори́к пашы́л трин тысёнцы манушэ́н народо́стыр; нэ ёнэ мэкнэпэ дро нашыбэн Гаёскирэ манушэ́ндыр.

5. Мануша́ Гаёскирэ замардэ́ лэ́ндыр кэ трия́нда шов манушэ́н, и традынэ лэн вударэндыр кэ / жы́ко Севаримо, и домардэ́ лэн пэ змэкибэн бэрга́тыр; со́стыр ило́ манушэ́нгиро розбиладя и яця́, сыр пани́.

6. Ису́со роскустя и́ди пэ́скирэ, и пыя́ пэ́скирэ мо́са пэ пхув анги́л Ра́скиро-Дэвлэ́скиро ковчэго, и пасия́ кэ бэльвэ́ль, ёв и Израилёскирэ пхурыдыра́, и обчхувэнас прахоса пэ́скирэ шэрэ́.

7. И пхэндя́ Ису́со: “Нэ, Раё Дэ́вла, Хула́ё! Ваш со Ту пирилыджиян адалэ́ манушэ́н пир Иорда́но, соб (кай) тэ отдэс амэн дрэ Аморее́нгирэ васта́, и тэ хасякирэс амэн? Нэ, ко́ли бы амэ тэ ячаспэ и тэ джива́с пал Иорда́но!

8. О, Раё Дэ́вла! Со ма́нгэ тэ пхэна́в пало́ дава́, сыр Израилё рисия́ думэса кэ пэ́скирэ вэ́рги?

9. Хананеи и сарэ́ пхувья́кирэ мануша́ ушунэна, и обджана сарэ́ ригэ́ндыр амэн, и хасякирэна лав амаро́ пхувья́тыр. И со скэрэса тэды лавэ́скэ Тырэ́скэ барэскэ?”

10. Рай Дэвэ́л пхэндя́ Исусо́скэ: “Ушты́, ваш со ту пыян пэ муй тыро́?

11. Израилё кэрдя́ грэ́хо, и пиригинэ́ ёнэ Миро завето, саво́ Мэ дыём лав лэ́нгэ; и лынэ́ совлахадэстыр, и чордэ, и схачкирдэ́, и чхудэ́ машки́р пэ́скирэ вешчы (вешча).

12. Палдава́ Израилёскирэ чхавэ́ на могиндлэ́ тэ вытэрдён анги́л пэ́скирэ вэргэ́ндэ, и сыкадэ палуй (тыло) пэ́скирэ вэргэ́нгэ, пал-дова́ со ёнэ попынэ тэл совэ́л (прокошыбэ́н); Мэ на ява́ва буты́р тумэ́нца, ко́ли на хасякирэна пэ́стыр засовлахадэс.

13. Ушты́, обсвэнцын манушэ́н и пхэн: обсвэнцынэнпэ кэ зло́ко (ра́нко); пал-дова́ со адя́кэ ракирэ́ла Рай Дэвэ́л, Дэвэ́л Израилёскиро: совлахадо исын машки́р ту́тэ, Израилё: палдава́ ту на могинэ́са тэ затэрдёс анги́л вэргэ́ндэ тырэндэ, пака протрадэса пэ́стыр засовлахадэс.

14. Атася́ подджан сарэ́ пир тумаро́ ро́дыцо, саво́ упхэнэла Рай Дэвэ́л, мэк тэ подджа́л пир кхэри́тко ро́до (племё); кхэри́тко ро́до, саво́ упхэнэла Рай Дэвэ́л, мэк тэ подджа́л пир чэ́карь (семейство), сави́ упхэнэла Рай Дэвэ́л, мэк тэ подджа́л пир екхэ манушэ́стэ.

15. И манушэ́с угалёна, кон чордя совлахадэстыр, мэк лэс тэ схачкирэн яга́са, лэс и саро́, со лэ́стэ, пал-дова́ со ёв пиригия Ра́скирэ-Дэвлэ́скиро завето и кэрдя́ проти зако́но машки́р Израилё.

16. Ису́со, уштыя́ тася́рлэс (ра́нэс) ранкоса, и пхэндя́ тэ подджа́л Израилёскэ пир лэ́скиро ро́дыцо; и сыс упхэндло́ ро́дыцо Юда́скиро.

17. Коригэды́р (позжэ) пхэндя́ тэ подджа́л Юда́скирэ кхэритконэ́ родо́скэ; и упхэндло́ кхэри́тко ро́до Заракиро. Пхэндя тэ подджа́л Зариноскиро родо́скэ пир чэ́карь, и сыс упхэндлы сыс чэ́карь (семейство) Завдиёскири.

18. Пхэндя тэ подджа́л лэ́скирэ чэкарьякэ пир екхэ манушэ́стэ, и сыс упхэндло́ Ахано, Хармиёскиро чхаво́, Завдиёскиро чхаво́, Заракиро чхаво́, Юда́скирэ родыцо́стыр.

19. Тэды Ису́со пхэндя́ Аханоскэ: “Миро чхава! Воздэ Ра́скэ-Дэвлэ́скэ, Израилёскирэ Дэвлэ́скэ сла́ва, и приґалёвпэ анги́л Лэ́стэ, и дэ тэ джина́в ма́нгэ, со ту кэрдя́н; на счхакир ма́ндыр”.

20. Дрэ отпхэныбэ́н Исусо́скэ Ахано пхэндя́: “Чачунэ́с, мэ кэрдём грэ́хо анги́л Растэ-Дэвлэ́стэ, Дэвлэ́стэ Израилёскирэстэ и кэрдём дова́ и дова́.

21. Машкира́л дорэсыбэ́н (добыча) екх шука́р Сенаароскири и́дя, и дуй шэла́ шэ́кели руп, и котэ́р (куско) сувнака́й вагаса дрэ пандждэша́ шэ́кели; дава́ ма́нгэ покамдяпэ, и мэ лыём дава́; и гада, ёв исын гарадо́ дрэ пхув машкира́л мири́ ша́тра, и руп тэл ла́тэ”.

22. Ису́со бичхадя́ манушэ́н, и ёнэ праста́ндынэ дрэ ша́тра; и ґа́да, саро́ дава́ сыс гарадо́ дрэ лэ́скири ша́тра, и руп тэл ла́тэ.

23. Ёнэ лынэ́ дава́ шатратыр, и яндлэ́ кэ Ису́со и кэ сарэ́ Израилёскирэ чхавэ́, и чхудэ́ анги́л Растэ-Дэвлэ́стэ.

24. Ису́со и сарэ́ Израильтя́ни лэ́са лынэ́ Аханос, Зариёскирэ чхавэ́с, и руп, и и́дя, и котэ́р сувнака́й, и лэ́скирэ чхавэ́н, и лэ́скирэ чхае́н, и лэ́скирэ гурувэ́н, и лэ́скирэ ослэн, и лэ́скирэ бакрэ́н, и лэ́скири ша́тра, и саро́, со лэ́стэ сыс, и вылыджинэ́ лэн пэ до́ло Ахороскиро.

25. И пхэндя́ Ису́со: “Пал дова́, со ту яндян пэ амэ́ндэ би́да, Рай Дэвэ́л пэ ту́тэ янэ́ла би́да дрэ дава́ дывэ́с”. И мардэ́ лэс сарэ́ Израильтя́ни барэ́нца, и схачкирдэ́ лэн яга́са, и чхурдынэ́ пэ лэ́ндэ бара́.

26. И чхурдынэ́ пэ лэ́стэ бари куча бара́, сави́ исын и кэ дава́ дывэ́с. Пало́ дава́ штылыя Раскири-Дэвлэ́скири холы́. Палдава́ дова́ штэ́то сыс кхардо долоса Ахор адя́кэ-паць кэ дава́ дывэ́с.

Joshua 8:1-35

1. Рай Дэвэ́л пхэндя́ Исусо́скэ: “На дар и на страхадёв; лэ пэ́са сарэ́ манушэ́н, савэ́ исын лачхэ́ кэ марибэ́н, и уштыи, джа́ кэ Гаё; ґа́да, Мэ отда́ва дрэ тырэ́ васта́ Гаёскирэ крали́с и лэ́скирэ манушэ́н, лэ́скиро фо́ро и лэ́скири пхув.

2. Кэр Гаёса и лэ́скирэ крали́са дова́-паць, со ту кэрдя́н Ерихоноса и лэ́скирэ крали́са, екх лэ́скиро дорэсыбэ́н и лэ́скирэ кхэри́тка мурдала́ (ското) роскэрэн пэ́скэ. Кэр засада пал фо́ро”.

3. Ису́со и сарэ́ мануша́, савэ́ сыс лачхэ́ кэ марибэ́н, уштынэ́, соб (кай) тэ джас пэ Гаё; и выкэдыя́ Ису́со трия́нда тысёнцы манушэ́н муршканэн, и бичхадя́ лэн раты́.

4. И дыя́ лэ́нгэ упхэныбэ́н, и пхэндя́: “Дыкхэ́н, тумэ́ явэ́на тэ чхувэ́н засада пашы́л фо́ро пало́ фо́ро; на джа́н дур форо́стыр, и явэ́н сарэ́ скэдынэ́.

5. А мэ и сарэ́ мануша́, савэ́ исын ма́нца, подджаса кэ фо́ро. И, ке́ли Гаёскирэ мануша́ выджа́на проти амэ́ндэ, сыр и англэды́р, тэды амэ нашаса лэ́ндыр.

6. Ёнэ джа́на пал амэ́ндэ, адя́кэ со амэ отлыджаса лэн форо́стыр; пал-дова́ со ёнэ пхэнэ́на: “Нашэ́на амэ́ндыр, сыр и гарэдыр, ке́ли амэ нашасас лэ́ндыр,

7. то тэды тумэ́ уштэна засадатыр и залэна фо́ро; и Рай Дэвэ́л, Дэвэ́л тумаро́, отдэ́ла лэс дрэ тумарэ́ васта́.

8. Ке́ли лэ́на фо́ро, захачкирэн фо́ро яга́са, пир лав Дэвлэ́скиро кэрэ́н. Дыкхэ́н, мэ ракира́ва тумэ́нгэ”.

9. Адя́кэ бичхадя́ лэн Ису́со, и ёнэ гинэ́ дрэ засада, и гарадынэ машки́р Вефлиемо и машки́р Гаё, палатунэ́ Гаёскирэ рига́тыр; а Ису́со дрэ доя́ рат ратькирдя машки́р манушэ́ндэ.

10. Уштыи тася́рлэс (ра́нэс) пэ ра́нко, Ису́со обдыкхця манушэ́н, и гия́ ёв и Израилёскирэ пхурыдыра́ анги́л манушэ́ндэ кэ Гаё;

11. И сарэ́ мануша́, годна кэ марибэ́н, савэ́ сыс лэ́са, гинэ́, подгинэ́ пашэдыр и гинэ́ кэ фо́ро.

12. И чхудя́ ста́но паш-ратитконэ́ (севернонэ) Гаёскирэ рига́тыр, а машки́р лэ́стэ и Гаёстэ сыс до́ло. Коригэды́р (позжэ) ёв лыя́ пашы́л пандж тысёнцы манушэ́н и чхудя́ лэн дрэ засада машки́р Вефлиемо и Гаё, палатунэ́ форо́скирэ рига́тыр.

13. И мануша́ чхудэ́ саро́ ста́но, саво́ сыс паш-дывэсытконэ́ форо́скирэ рига́тыр адя́кэ, со палатуны (о) пашы́л сыс форо́скирэ палатунэ́ рига́тыр. И гия́ Ису́со дрэ доя́ рат машкира́л лошчы́на.

14. Ке́ли дыкхця́ дава́ кра́ли Гаёскиро, саво́ сыс дова́-паць моменто форо́скирэ манушэ́нца, ёв уштыи тася́рлэс (ра́нэс), выгия́ пэ Израилё пэ марибэ́н, ёв и сарэ́ лэ́скирэ мануша́, пэ упхэндло́ штэ́то анги́л лошчы́на. Нэ ёв на джиндя́, со ваш лэ́скэ исын засада (забэшыбэн) пал фо́ро.

15. Ису́со и саро́ Израилё, хай (сы́рбы) домардэ́ лэ́нца, нашнэ́ пэ чхучи́ пхув.

16. А ёнэ кхардэ́ кэ пэ сарэ́ манушэ́н, савэ́ сыс дро фо́ро, соб (кай) тэ традэ́н лэн; и, традыи Исусо́с, отгинэ́ дур форо́стыр.

17. Дро Гаё и Вефи́лё на яця́пэ ни екхэ манушэ́с, саво́ на традыяпэ пал Израилё. И фо́ро пэ́скиро ячкирдэ́ отчхакирдэса, традыи Израилё.

18. Тэды Рай Дэвэ́л пхэндя́ Исусо́скэ: “Протырдэ чхурдыбнытко буст (коп΄ё), сави́ исын дрэ тыро́ васт, кэ Гаё, пал-дова́ со Мэ отда́ва лэс дрэ тырэ́ васта́”. Ису́со протырдыя́ чхурдыбнытко буст, сави́ сыс дрэ лэ́скиро васт, кэ фо́ро.

19. Мануша́, савэ́ бэштэ́ сыс дрэ засада, сы́гэс уштынэ́ пэ́скирэ штэто́стыр и праста́ндынэ, сыр сыг ёв протырдыя́ пэ́скиро васт, загинэ́ дро фо́ро, и лынэ́ лэс, и сы́гэс захачкирдэ фо́ро яга́са.

20. Мануша́ Гаёскирэ дыкхнэ́ палэ, и дыкхнэ́, со тхув форо́стыр ґаздэ́лапэ кэ болыбэ́н. И на сыс ваш лэ́нгэ штэ́то, карик бы тэ нашэ́н, ни одори́к, ни адари́к; пал-дова́ со мануша́, савэ́ нашнэ́ пэ чхучи́ пхув, рисинэ́ пэ адалэ́ манушэ́ндэ, савэ́ традынэпэ пал лэ́ндэ.

21. Ису́со и саро́ Израилё, дыкхнэ́, со мануша́, савэ́ сыс бэштэ́ дрэ засада, лынэ́ фо́ро, и тхув форо́стыр ґаздэласпэ кэ болыбэ́н, рисинэ́ и лынэ́ тэ марэ́н Гаёскирэ манушэ́н.

22. А далэ́ форо́стыр выгинэ́ гил лэ́нгэ, адя́кэ со ёнэ сыс машкира́л Израильтянэндэ, савэ́ екх сыс долэ́ рига́тыр, а яви́р явирьятыр. Адя́кэ мардэ́ лэн, со на ячкирдэ́ ни екхэ́с лэ́ндыр, джидэс ци знашибнарис.

23. А крали́с Гаёскирэс лынэ́ джидэс, и яндлэ́ лэс кэ Ису́со.

24. Ке́ли Израильтя́ни домардэ́ сарэ́н манушэ́н Гаёскирэн пэ фэ́лда, пэ чхучи́ пхув, карик ёнэ традынэ лэн, и ке́ли сарэ́ ёнэ кэ палатуно́ ману́ш пынэ́ куртала́тыр, то тэды сарэ́ Израильтя́ни рисинэ́ кэ Гаё, и домардэ́ лэс куртала́са.

25. Мулэн дро дова́ дывэ́с муршэ́н и джувле́н, сарэ́н Гаёскирэ манушэ́н, сыс дэшуду́й тысёнцы.

26. Ису́со на обмэкця пэ́скиро васт, саво́ протырдыя́ чхурдыбнытко буст, пака на отдыя́ совлахакэ (прокошыбнаскэ) сарэ́ Гаёскирэ манушэ́н.

27. Екх кхэри́тка мурдала́ (ското) и дорэсыбэ́н (добыча) далэ́ кхэритконэ́ мурдалэ́н форо́скиро, Израилёскирэ чхавэ́ роскэрдэ машки́р пэ́стэ, пир Раскир-Дэвлэ́скиро лав, саво́ Рай Дэвэ́л пхэндя́ Исусо́скэ.

28. И схачкирдя́ Ису́со Гаё, и кэрдя́ лэс дрэ векоскирэ росчхурдыпэна (руи́ны), пэ чхучи́ пхув, кэ дава́ дывэ́с.

29. А крали́с Гаёскирэс убладя пэ вэш, кэ бэльвэ́ль: ке́ли загия́ кхам, то припхэндя́ Ису́со, и злынэ лэс мулэс вэшэ́стыр, и чхурдынэ́ лэс пашы́л форо́скирэ вудара́, и чхурдынэ́ пэ лэ́стэ бари куча бара́, сави́ исын кэ дава́ дывэ́с.

30. Тэды Ису́со кэрдя́ алта́рё (жэртвенико) Ра́скэ-Дэвлэ́скэ, Израилёскирэ Дэвлэ́скэ, пэ бэ́рга Гевало.

31. Сыр ракирдя́ Мо́йза, писха́ри Ра́скирэ-Дэвлэ́скиро, Израилёскирэ чхавэ́нгэ, пал со исын зачхиндло́ дрэ Мойза́скирэ-законоскири лылвари́, – алта́рё (жэртвенико) барэндыр цэлонэндыр, пэ савэ́ на ґаздынэ́ састыра́; и яндлэ́ пэ лэ́стэ цэ́ло схачкирибэ́н Ра́скэ-Дэвлэ́скэ, и кэрдя́ свэ́нта мирна яныбэна́.

32. И чхиндя́ Ису́со одо́й пэ бара́ счхиныбнытко (списко) Мойза́скирэ Законо́стыр, саво́ ёв зачхиндя́ анги́л Израилёскирэ чхавэ́ндэ.

33. Саро́ Израилё, пхурыдыра́ лэ́скирэ, и дыкхибнарья лэ́скирэ и сэнда́рья, тэрдинэ́ долэ́ и явирэ рига́тыр ковчэгоскирэ проти рашандэ и Левитэндэ, савэ́ лыджа́нас Ра́скирэ-Дэвлэ́скиро завето́скиро ковчэго, сыр мануша́ явирэ рига́тыр, адя́кэ и далэ́-пхувья́кирэ мануша́, екх лэ́нгири паш маму́й бэ́рга Гаризимо, а яви́р паш пашы́л бэ́рга Гевало, сыр англэды́р ракирдя́ Мо́йза, писха́ри Ра́скиро-Дэвлэ́скиро, тэ бахтякирэс Израилёскирэ манушэ́н.

34. И коригэды́р (позжэ) Ису́со гиндя дрэ зан сарэ́ Законо́скирэ лава́, бахтякирибэ́н и прокошыбэ́н, сыр сыс зачхиндло́ дрэ лылвари́ Законоскири.

35. Сарэ́стыр, со Мо́йза ракирдя́ Исусо́скэ, на сыс ние́кх лав, саво́ Ису́со на прогиндя анги́л саро́ Израилёскиро скэдыибэ́н и джувлендэ, и чхавэ́ндэ, и манушэ́ндэ, савэ́ явнэ́ явирэ рига́тыр, и дживэ́на машки́р лэ́ндэ.

Psalms 43:1-5

1. Па́тери (Моли́тва) Дэвлэ́скэ дро Пхаро́ Часо. Сэндя́кир ман, о Дэ́вла, и затэрдев пал миро рэ́ндо (де́ло) анги́л бидэвлытка на́цыи, зра́кх ман хоханэ́ и начачунэ манушэ́ндыр.

2. Пал-дова́ со Ту сан Дэвэ́л мирэ́ зорьякиро, со́скэ Ту ги́ян криг ма́ндыр? Со́скэ мэ псирава и издрава, ке́ли вэ́рго тасавэла ман?

3. Бичха́в Тыро́ дуд и Тыро́ чачипэ́н, мэк ёнэ тэ лыджа́н ман и тэ янэ́н пэ Тыри́ свэ́нто бэ́рга и пэ штэ́то, кай Ту сан.

4. Тэды мэ джа́ва кэ Дэвлэ́скиро алта́рё, кэ Дэвэ́л мирэ́ радыма́тыр, мирэ́ бахталыпнастыр: чачо́, мэ ява́ва тэ парикира́в Ту́кэ и тэ башавав пэ гусли, о Дэ́вла, миро Дэ́вла!

5. Со́скэ ту тугинэса, миро ило́? Со́скэ ту издраса андра́л ма́ндэ? Ужакир лачхипэ́н Дэвлэ́стыр, и мэ ява́ва тэ шара́в Лэс, Кон зракхця́ ман.

Proverbs 13:22-23

22. Лачхо́ ману́ш ячкирэ́ла мэкно́ миштыпэ́н (наследство) лэ́скирэ-чхавэ́нгирэ чхавэ́нгэ, нэ барвалыпэ́н грэхитконэ́-манушэ́нгиро приракхэлапэ ваш чачунэ́ манушэ́нгэ.

23. Бут маро́ исын пэ чхучэ́ фэ́лды чорорэ́ манушэ́нгирэ, нэ, кай на ухты́лла (на́доси) чачипэ́н машки́р манушэ́ндэ, одо́й явэ́ла хасибэ́н.

Lukaš 9:37-62

37. Пэ яви́р дывэ́с, ке́ли Ису́со сыкляибнытконэ́нца гинэ́ тэлэ́ бэрга́тыр, бут мануша́ пирилынэ Исусо́с.

38. И, гада, вари-кон манушэ́ндыр, дыя́ го́дла: “Сыклякирибнарискиро! Мэ древа́н манга́ва Тут тэ дыкхэ́н мирэ́ чхавэ́стэ, ёв исын екх ма́ндэ;

39. на́лачхо ду́хо (фа́но) ухтылэ́ла лэс, и ёв ада́й жэ дэ́ла го́дла и ду́хо (фа́но) мэнчынэла лэс кэ пена мо́стыр; и ду́хо (фа́но) пэ на́бут отмэкэ́ла лэс, ке́ли змэнчынэла зоралэ́с лэс;

40. мэ мангдём Тырэ́ сыкляибнытконэ́н тэ вытрадэл ду́хо (фа́но), нэ ёнэ на могиндлэ́ тэ дын ра́да.”

41. Ису́со отпхэндя́: “О, тумэ́ сан напатяибнаскиро и пхарэ́-манушэ́нгиро ро́до! Кицы́ Мэ ява́ва тумэ́нца и кицы́ Мэ ява́ва тэ вырикирав тумэн? Ян пэ́скирэ чхавэ́с адари́к!”

42. Ке́ли тэрнэ́-бэршэнтиро джа́лас, на́лачхо ду́хо (фа́но) радя лэс и лыя́ тэ издралякирэл лэс; нэ Ису́со припхэндя́ на́лачхо духоскэ; Ёв высастякирдя́ тэрнэ́-бэршэнгирэс и отдыя́ палэ лэс дадэ́скэ.

43. И сарэ́ мануша́ дивиндлэ́пэ пэ Дэвлэ́скиро райкано барипэ́н. Ке́ли сарэ́ дэнаспэ дивоскэ, со кэрдя́ Ису́со, Ёв пхэндя́ Пэ́скирэ сыкляибнытконэ́нгэ:

44. “Рипирэн лачхэ́с далэ́ лава́: ‘Чхаво́ Манушэ́скиро явэ́ла отдыно́ дрэ манушэ́нгирэ васта́.’”

45. Нэ сыкляибны́тка на ґалынэ́ далэ́ лава́; лэ́нгиро смысло сыс ґарадо лэ́ндыр адя́кэ, со ёнэ на джиндлэ́, пал со Ису́со ракирдя́, а тэ пхучэ́н Лэ́стыр пал дава́ лав ёнэ дара́ндынэ.

46. Дасаво пхучибэн сыс пэ ило́ сыкляибнытконэндэ: “Кон исын барэды́р машки́р амэ́ндэ?”

47. Ису́со джиндя́, со ёнэ думиндлэ, лыя́ биято́с, чхудя́ лэс анги́л Пэ́стэ,

48. и пхэндя́ лэ́нгэ: “Кон прилэ́ла кэ пэ екхэ́с адасавэ́ биято́с ваш Миро лав, одова́ и Ман прилэ́ла, а кон прилэ́ла Ман, одова́ прилэ́ла Одолэ́с, Кон бичхадя́ Ман, кон исын тыкнэды́р машки́р тумэ́ндэ, мэк тэ явэ́л ёв са́мо барэды́р.”

49. Иа́но тэды пхэндя́: “Сыклякирибна́скиро! Амэ дыкхцям манушэ́с, саво́ Тырэ́ лавэ́са вытрадэла налачхэ́ ду́хи (фаны) и амэ припхэндям Лэ́скэ тэ пириячэл, пал-дова́ со ёв на псирэ́ла амэ́нца.”

50. Ису́со пхэндя́ лэ́скэ: “На припхэнэн лэ́скэ; пал-дова́ со кон исын на проти тумэ́ндэ, одова́ исын пал тумэ́ндэ.”

51. Ке́ли явнэ́ пашылэды́р дывэса́, дрэ савэ́ Исусо́скэ трэиндя́ тэ ґаздэлпэ пэ болыбэ́н далэ́ свэто́стыр, ёв закамдя́ тэ джал дро Ерусалимо,

52. и Ёв бичхадя́ выкэдынэ́ манушэ́н анги́л Пэ́стэ; и ёнэ гинэ́ и загинэ́ дро екх Самариякиро гав, соб (кай) тэ кэдэн ваш Лэ́скэ штэ́то тэ откхинёл,

53. нэ мануша́ одо́й на прилынэ́ Лэс, пал-дова́ со Ёв выдыкхця, сыр о ману́ш, саво́ джа́лас пир дром дро Ерусалимо.

54. Ке́ли Лэ́скирэ сыкляибны́тка Яково и Иа́но дыкхнэ́ дава́, ёнэ пхэндлэ́: “Раё Дэ́вла! Ко́ли Ту камэ́са, амэ пхэна́са, соб (кай) тэ явэ́л яг болыбна́стыр и тэ хачкирэл лэн?”

55. Нэ Ису́со порисия и выракирдя лэ́нгэ, пхэни́: “Тумэ́ на джинэ́на, саво́ ду́хо (фа́но) исын тумэ́ндэ.

56. Пал-дова́ со Чхаво́ Манушэ́скиро явдя́ тэ на хасякирэ́л манушэ́нгиро джиибэ́н, а тэ зракхэ́л.” И ёнэ гинэ́ дро яви́р гав.

57. И сыс адя́кэ: ке́ли ёнэ джа́нас дромэ́са, вари-кон пхэндя́ Исусо́скэ: “Раё Дэ́вла! Мэ джа́ва Ту́са, карик и Ту джа́са.”

58. Ису́со пхэндя́ Лэ́скэ: “Локхне́ндэ (лисэнды) исын норы, болыбна́скирэ чириклендэ гня́зды (ку́фы), а Манушэ́скирэ Чхавэ́скэ нанэ, кай шэро́ тэ чхувэ́л.”

59. Ёв пхэндя́ явирэ манушэ́скэ: “Яв Ма́нца!” Одова́ ж пхэндя́: “Раё Дэ́вла! Мэк ман анги́л тэ гаравав Мирэ́ дадэ́с.”

60. Нэ Ису́со пхэндя́ Лэ́скэ: “Мэк мулэ́ тэ гаравэн пэ́скирэ мулэн; а ту, яв, роспхэн бахталы́ зан (звесь) пал Дэвлэ́скиро Кралипэ́н дро Болыбна́скиро Раё.”

61. И ишчо (инкэ́) яви́р ману́ш пхэндя́: “Мэ джа́ва пал Ту́тэ, Раё Дэ́вла! Нэ мэк ман анги́л тэ розячавпэ мирэ́ сэмэнцаса.”

62. Нэ Ису́со пхэндя́ Лэ́скэ: “Ние́кх, кон чхувэ́ла пэ́скиро васт пэ плуго (пхарады) и обдыкхэлапэ палэ, исын на лачхо́ ваш Дэвлэ́скиро Кралипэ́н дро Болыбна́скиро Раё.”

Romani Bible Baltic 2019

Maintained by the United Bible Societies for the Baltic Romani Mission