Bible in one year
May 18

1. Ке́ли кра́ли дживдя́ дро пэ́скиро кхэр, и Рай Дэвэ́л штылякирдя лэс сарэ́ лэ́скирэ пашатунэ́ вэргэ́ндыр,
2. тэды пхэндя́ кра́ли пророкоскэ Нафаноскэ: “Ѓа́да, мэ джива́ва дро кедрытко кхэр, а Ра́скирэ-Дэвлэ́скиро ковчэго исын тэл ша́тра.”
3. И пхэндя́ Нафано крали́скэ: “Саро́, со исын ту́тэ пэ ило́, джа́, кэр; пал-дова́ со Рай Дэвэ́л исын ту́са.”
4. Нэ дрэ доя́ рат сыс лав Ра́скирэ-Дэвлэ́скиро кэ Нафано:
5. “Джа́, пхэн Мирэ́скэ писхари́скэ Давидо́скэ: ‘А́дякэ ракирэ́ла Рай Дэвэ́л: ци ту кэрэ́са Ма́нгэ кхэр, соб (кай) Мэ тэ явав одо́й,
6. ке́ли Мэ на дживдём долэ́ часостыр дро кхэр, сыр вылыджиём Израилёскирэ чхавэ́н Египто́стыр, и кэ дава́ дывэ́с, нэ пиригиём дрэ ша́тра и дрэ ски́ния?
7. Кай Мэ на псирдём сарэ́нца Израилёскирэ чхавэ́нца, ци ракирдём Мэ екх лав вари-савэ́скэ родо́стыр, савэ́скэ Мэ выкэдыём тэ ракхэ́л Мирэ́, Израилёскирэ манушэ́н: “Со́скэ на чхувэ́на Ма́нгэ кедрытко кхэр?’”
8. И какана́ адя́кэ пхэн Мирэ́ писхари́скэ Давидо́скэ: “А́дякэ ракирэ́ла Рай Дэвэ́л, болыбна́скирэ-янголэ́нгиро: ‘Мэ лыём тут бакрэ́нгирэ стадатыр, соб (кай) ту тэ явэс Мирэ́ Израилёскирэ манушэ́нгирэ шэралэса;
9. и Мэ со́мас ту́са усенде (везде), карик на псирдяное ту, и традыём криг сарэ́н тырэ́ вэргэ́н анги́л ту́тэ, и кэрдём лав тыро́ славутнонэса, сыр исын лав славутнонэнгиро пэ пхув.
10. И Мэ кэра́ва штэ́то ваш Мирэ́ манушэ́нгэ, ваш Израилё, и Мэ чхува́ва пэ пхув лэс, и явэ́ла ёв штылэ́с тэ дживэ́л пэ пэ́скиро штэ́то, и на явэ́ла тэ тугинэлпэ буты́р, и налачхэ́ мануша́ на явэ́на буты́р тэ традэ́н лэс, сыр англэды́р,
11. долэ́ часостыр (цыростыр), сыр Мэ чхудём сэндарьен пэ Мирэ́ Израилёскирэ манушэ́ндэ; и Мэ штылякирава тут сарэ́ тырэ́ вэргэ́ндыр. И Мэ Рай Дэвэ́л дэ́ла лав ту́кэ, со Ёв кэрэ́ла ту́кэ кхэр.
12. Ке́ли сполнинэнапэ тырэ́ дывэса́, и ту пасёса тырэ́ дадэ́нца, тэды Мэ чхува́ва пало́ (после) ту́тэ тыро́ ро́до, саво́ выджа́ла тырэ́ масэ́ндыр, и зоралякирава лэ́скиро кралипэ́н.
13. Ёв кэрэ́ла кхэр ваш Мирэ́ лавэ́скэ, и Мэ чхува́ва лэ́скиро кралипэ́н пэ ве́ко.
14. Мэ ява́ва лэ́скэ дадэ́са, и ёв явэ́ла Ма́нгэ чхавэ́са; и ко́ли (со) ёв кэрэ́ла грэ́хо, Мэ чхува́ва хась (ка́ра) пэ лэ́стэ муршэнгирэ кхенингоскирэ дэстэса и марибна́са манушытконэ́ чхавэ́ндыр;
15. нэ тангипэ́н (жалима) Миро Мэ на отлава лэ́стыр, сыр Мэ отлыём Саулостыр, савэ́с Мэ мэкцём анги́л ту́тэ.
16. И явэ́ла зоралэ́с тэрдо́ тыро́ кхэр и кралипэ́н тыро́ пэ ве́ко анги́л Ма́ндэ, и престоло тыро́ тэрдёла пэ ве́ко.’”
17. Сарэ́ далэ́ лава́ и саро́ дава́ дыкхибэ́н Нафано пирипхэндя Давидо́скэ.
18. И гия́ кра́ли Дави́до, и тэрдия́ анги́л Растэ-Дэвлэ́стэ, и пхэндя́: “Кон мэ сом, Раё Дэ́вла, Раё Дэ́вла, и со дасаво кхэр миро, со Ту ман адя́кэ барьякирдян.
19. И дава́ сыкадыя́ ишчо (инкэ́) на́бут дрэ Тырэ́ якха́, Раё Дэ́вла миро, Раё Дэ́вла; нэ Ту ракирдян ишчо (инкэ́) пал кхэр Тырэ́ дынарискиро дро англыпэ́н. Дава́ исын пир манушы́тко, Раё Дэ́вла миро, Раё Дэ́вла!
20. Со буты́р могинэ́ла тэ пхэнэ́л Ту́кэ Дави́до? Ту джинэ́са писхари́с Тырэ́с, Раё Дэ́вла миро, Раё Дэ́вла!
21. Ваш лав Тыро́ и пир ило́ Тыро́ Ту кэрэ́са дава́, сыкави саро́ дава́ Тырэ́ писхари́скэ.
22. Пир саро́ Ту сан баро́, Раё Дэ́вла миро, Раё Дэ́вла! Палдава́ со нанэ Нико́н дасаво-паць, сыр Ту сан, и нанэ Дэвлэ́с, апри́ч Ту́тэ, пир саро́, со амэ шундя́м пэ́скирэ канэнца.
23. И кон исын равно Дырэ манушэ́нгэ Израилёскэ, екхэ манушэ́нгэ пэ пхув, ваш савэ́нгэ явдя́ Рай Дэвэ́л, соб (кай) тэ зракхэ́л лэс Пэ́скэ дрэ манушэ́ндэ, и тэ прославинэл Пэ́скиро лав, и тэ кэрэ́л баро́ и дарано анги́л Тырэ́ манушэ́ндэ, савэ́н Ту лыян Пэ́скэ Египтянэндыр, традыян криг манушэ́н и лэ́нгирэ дэвлорэ́?
24. И Ту зорьякирдян пал Пэ́стэ Тырэ́ Израилёскирэ манушэ́н, сыр Пэ́скирэ манушэ́н, пэ ве́ко, и Ту, Раё Дэ́вла, яця́н лэ́скирэ Дэвлэ́са.
25. И какана́, Ту, Раё Дэ́вла, сполнин пэ ве́ки лав, саво́ ракирдян Ту пал Тырэ́ писхаристэ, и пал лэ́скиро кхэр, и кэр дова́, со Ту ракирдян.
26. И мэк тэ славинэлпэ лав Тыро́ дрэ ве́ки, соб (кай) тэ ракирэ́н: “Рай Дэвэ́л, болыбна́скирэ-янголэ́нгиро – Дэвэ́л пэ Израилё.” И кхэр писхарискиро, Тырэ́ Давидо́скиро мэк тэ явэ́л зорало́ анги́л Ту́тэ.
27. Адя́кэ сыр Ту, Раё Дэ́вла, болыбна́скирэ-янголэ́нгиро, Дэвэ́л Израилёскиро, отчхакирдян писхари́скэ Тырэ́скэ, ракири́: ‘Кэра́ва ту́кэ кхэр, тэды писха́ри тыро́ отдыя́ пэ́скиро ило́, соб (кай) тэ мангавпэ Ту́кэ дасавэ́ патерьяса (молитваса).
28. И адя́кэ, Раё Дэ́вла миро, Раё Дэ́вла! Ту сан Дэвэ́л, и лава́ Тырэ́ исын на хоханэ́, и Ту дыя́н Тырэ́ писхари́скэ дасаво лачхипэ́н!
29. И какана́ лэпэ и бахтякир Тырэ́-писхарискиро кхэр, соб (кай) ёв тэ явэ́л ве́чно анги́л Ту́тэ; пал-дова́ со Ту, Раё Дэ́вла миро, Раё Дэ́вла, пхэндя́н дава́, и бахтякирибнаса Тырэса ячэ́ла Тырэ́ писхарискиро кхэр бахтякирдо́ дро ве́ко.”
1. Пало́ (после) дава́ Дави́до домардя́ Филистимлянэн и штылякирдя лэн, и лыя́ Дави́до Мефего-Гаамма Филистимлянэнгирэ вастэ́ндыр.
2. И домардя́ ёв Моавитянэн, и змериндя лэн шэлэса, чхуви лэн пэ пхув; и отмериндя дуй шэлэ пэ мулякирдэндэ, а екх шэло тэ ячкирэн дрэ джидэндэ. И ячнэ́ Моавитяни Давидо́стэ писхарье́нца и плэскирдэ дань.
3. И замардя́ Дави́до Адраазарос, Реховоскирэ чхавэ́с, Сувакирэ крали́с, ке́ли одова́ гия́, соб (кай) тэ рискирэ́л пэ́скири зор пэ кусты́к пашы́л рэка (лэнь) Ефрато;
4. и лыя́ Дави́до лэ́стыр тысёнцо эфташэла́ манушэ́н уклистэ́ пэ грэ́ндэ и биш тысёнцы пэзал, и подчхиндя Дави́до жылы сарэ́ грэ́ндэ, савэ́ сыс дынэ́ андрэ́ дрэ марибны́тка вурдына́, а ячкирдя́ пэ́скэ лэ́ндыр ваш шэл марибны́тка вурдына́.
5. И явнэ́ Сирийцы Дамаскостыр тэ подэн васт Адразароскэ, кэ Сувакиро кра́ли; нэ Дави́до замардя́ биш тэ дуй тысёнцы манушэ́н Сирийцэн.
6. И чхудя́ Дави́до ракхибнарискирэ халадэ́н пэ Дамаскоскири Сирия, и ячнэ́ Сирийцы писхарье́нца Давидоскэ, и плэскирдэ лэ́скэ дань. И ракхця́ Рай Дэвэ́л Давидо́с усенде (везде), карик ёв тэ на джала.”
7. И лыя́ Дави́до сувнакунэ́ шчы́ты, савэ́ сыс Адраазароскирэ писхарьендэ, и яндя́ лэн дро Ерусалимо.
8. А дрэ Бефа и Берофа, фо́рья Адраазароскирэ, лыя́ кра́ли Дави́до древа́н бут харко́ма (медь).
9. И шундя́ Фоё, Имафаскиро кра́ли, со Дави́до замардя́ сарэ́ Адразароскирэ халадэ́н,
10. и бичхадя́ Фоё Иорамос, пэ́скирэ чхавэ́с, кэ кра́ли Дави́до, тэ прилэл лэс и тэ парикирэл лэс пал дова́, со ёв мардя́пэ Адраазароса и замардя́ лэс; пал-дова́ со Адраазаро лыджия́ марибэна Фоёса. Дрэ васта́ Иорамоскирэ сыс кхорэ́ (сасу́ды) рупувэ́, сувнакунэ́ и харкунэ́.
11. Лэн адя́кэ-паць кра́ли Дави́до отдыя́ Ра́скэ-Дэвлэ́скэ, кхэтанэ́ рупэ́са и сувнака́са, саво́ ёв отлыя сарэ́ манушэ́ндыр, савэ́н ёв пиризорьякирдя (збердындя):
12. Сирийцэндыр, и Моавитянэндыр, и Амонитянэндыр, и Филистимлянэндыр, и Амаликитянэндыр, дова́ и со отлыя Адраазаростыр, Реховоскирэ-чхавэ́с-тыр, крали́стыр Сувакирэстыр.
13. И ґаздыя́ Дави́до пэ́скиро лав, сыр рисия́, ке́ли ёв домардя́ дэшуохто тысёнцы манушэ́н Сирийцэндыр пэ Лондо до́ло.
14. И чхудя́ ёв ракхибнаскирэн халадэ́н пэ Идумея; пир сари́ Идумея чхудя́ ёв ракхибнаскирэн халадэ́н, и сарэ́ Идумеяни сыс Давидо́скэ писхарье́нца. И ракхця́ Дэвэ́л Давидо́с усенде, карик ёв тэ на псирэ́л.
15. И Дави́до сыс крали́са пэ саро́ Израилё, и кэрдя́ Дави́до сэ́ндо и чачипэ́н пэ сарэ́ пэ́скирэ манушэ́ндэ.
16. Иоа́во, Саруяскиро чхаво́, сыс халадэ́нгиро барыдыро́; и Иосафа́то, Ахилудаскиро чхаво́ – канцэляри;
17. Садоко, Ахитуваскиро чхаво́, и Ахимелехо, Авиафароскиро чхаво́ – рашая́, Сераё – лыла́-чхиныбнаскиро;
18. и Ванея, Иодаёскиро чхаво́ – барыдыро́ пэ Хелеямэндэ и Фелефеямэндэ, и чхавэ́ Давидо́скирэ – англатунэ́ барыдыра́.
1. Хоро́скирэ Дирижоро́скэ. Давидо́скиро Пса́лмо.
2. Шун, Дэ́вла, мири́ зан, ке́ли мэ жалинавапэ, приракх миро джиибэ́н вэргостыр, саво́ трашакирэла ман,
3. гарав ман чораханэ зракирибнастыр, саво́ лыджа́ла кэ би́да, бунтостыр, со кэрэ́на чорэ́ мануша́,
4. савэ́ точынэна (дэ́на чол) пэ́скирэ данда́ сы́рбы курта́ла; ёнэ чхудэ́ киркэ лава́ сы́рбы бустя́ пэ лу́ко,
5. соб (кай) тэ дэн карье дрэ бидошэнгирэ манушэ́стэ, ке́ли ёнэ гарадёна. Екха́тыр (сра́зу) ёнэ дэ́на карье дрэ лэ́стэ и ёнэ на страхадёна.
6. Ёнэ подмарэна пэс пэ чорэ́ рэ́нды, ёнэ зракирэнапэ тэ чхувэ́н фэля́ чораханэ́с, ёнэ ракирэ́на: “Кон явэ́ла тэ дыкхэ́л?”
7. Ёнэ придуминэна тэ кэрэ́н чорипэ́н: “Амэ скэдыямпэ тэ кэра́с дова́, со придуминдям бидошэ́нгиро.” Годы́ и ило́ манушэ́нгирэ исын хор гарадэ́.
8. Нэ Дэвэ́л явэ́ла тэ дэл карье дрэ лэ́ндэ, со лэ́нгирэ фра́нсы (раны) екха́тыр сыкадёна,
9. соб (кай) ёнэ тэ пэрэ́н екх пэ екхэ́стэ пэ́скирэ чибатыр, кажно ману́ш удыкхэ́ла, ке́ли ёнэ нашэ́на криг.
10. Сарэ́ мануша́ страхадёна и ёнэ явэ́на тэ ракирэ́н сарэ́нгэ пал Дэвлэ́скири буты́; чачо́, ёнэ явэ́на тэ ґалён Лэ́скири буты́ годя́са.
18. Пхутькирибэ́н исын усады (сак) кэ хасибэ́н, ману́ш, саво́ задэлапэ, сыг пэрэ́ла.
19. Фэды́р исын тэ явэс напхутькирдэ духо́са машки́р кандунэ / простонэ манушэ́ндэ, сыр тэ роскэрэн чордо дорэсыбэ́н машки́р пхутькирдэ́ манушэ́нца.
24. Чачэс, чачэс Мэ ракира́ва тумэ́нгэ: одова́, кон шунэ́ла Миро Лав и патя́ла Кодолэ́скэ, Кон бичхадя́ Ман, лэ́стэ исын ве́чно джиибэ́н и ёв пэ сэ́ндо на явэ́ла, ёв какана́ пиригия мэрибна́стыр дро джиибэ́н.
25. Чачэс, чачэс Мэ ракира́ва тумэ́нгэ: явэ́ла часо и ёв акана́ явдя́, ко́ли мулэ́ явэ́на тэ шунэ́н Дэвлэ́скирэ-Чхавэскири зан (глос), и, кон шунэ́ла, отджидёла.
26. Пал-дова́ со, сыр Дад рикирэ́ла джиибэ́н Кокоро́ дрэ Пэ́стэ, пал-дова́ со Ёв сыс Кокоро́ джиибна́скири ґаны́нг, адя́кэ-паць и Чхавэ́скэ Ёв дыя́ зор тэ рикирэ́л джиибэ́н дрэ Кокорэстэ Пэ́стэ;
27. и Ёв дыя́ Чхавэ́скэ право тэ сэндинэл, пал-дова́ со Ёв исын Манушэ́скиро Чхаво́.
28. На дивинэнпэ пэ дава́, пал-дова́ со явэ́ла дасаво часо, дрэ саво́ сарэ́ мулэ́, явэ́на тэ шунэ́н Дэвлэ́скирэ-Чхавэскири зан;
29. и джа́на яври́ маґилэндыр (кулэ́ндыр): одолэ́, савэ́ кэрдэ́ лачхипэ́н, отджидёна-ваш джиибнытко Кралипэ́н; а одолэ́, савэ́ кэрдэ́ налачхипэн, отджидёна ваш дова́, соб (кай) тэ явэ́н сэндиндлэ.
30. Мэ нашты́ (на могина́ва) нисо́ тэ кэра́в Кокоро́ Пэ́стыр, Мэ сэндинава адя́кэ, сыр Ма́нгэ исын пхэндло́ тэ сэндинав, и Миро сэ́ндо исын чачуно́, пал-дова́ со Мэ на кэра́ва пир Пэ́скири во́ля, а пир Мирэ́-Дадэ́скири во́ля, Саво́ Ман бичхадя́.
31. Ко́ли Мэ допхэнава Кокоро́ пал Пэ́стэ, то допхэныбэ́н Миро исын на чачуно́.
32. Исын Ма́ндэ яви́р якхи́тко (свидетелё), саво́ допхэнэ́ла пал Ма́ндэ, и Мэ джино́м, со саро́, со Ёв ракирэ́ла пал Ма́ндэ, исын чачипэ́н.
33. Тумэ́ бичхавэнас манушэ́н кэ Иа́но и лэ́скиро допхэныбэ́н исын чачуно́.
34. Ма́нгэ на трэй манушэ́нгиро допхэныбэ́н, а Мэ ракира́ва ваш дова́, соб (кай) тумэ́ тэ зракхэнпэ.
35. Иа́но сыс момолы́тко (свети́льнико), саво́ хачолас и дэ́лас яг и тумэ́ вари-саво́ часо радындлэпэ паш лэ́скири яг.
36. А Ма́ндэ исын допхэныбэ́н барэды́р Ианоскирэстыр; одолэ́ рэ́нды, савэ́ Дад дыя́ Ма́нгэ тэ кэра́в, и савэ́ Мэ кэра́ва, дава́ исын допхэныбэ́н, со бичхадя́ Ман Миро Дад.
37. Пал Ма́ндэ допхэнэ́ла Кокоро́ Миро Дад, Саво́ бичхадя́ Ман, тумэ́ ние́кхвар на шундлэ́ Лэ́скири зан, и на дыкхнэ́ Лэс
38. И тумэ́ на ракхэна Лэ́скиро лав дрэ пэ́скирэ илэ, палдова́ со тумэ́ на патя́на Одолэ́скэ, Савэс Ёв бичхадя́.
39. Тумэ́ сыклякирэ́на миштэ́с Свэ́нто Чхиныбэ́н, пал-дова́ со тумэ́ дэна годы пэскэ думинэ́на, со пир лэ́стэ тумэ́ндэ явэ́ла ве́чно джиибэ́н; а Свэ́нто Чхиныбэ́н допхэнэ́ла пал Ма́ндэ,
40. нэ тумэ́ усае́кх на камэ́на тэ явэ́н кэ Мэ, соб (кай) тэ явэ́л тумэ́ндэ ве́чно джиибэ́н.
41. Ма́нгэ на трэй, соб (кай) мануша́ тэ шарэ́н Ман.
42. Мэ джино́м (джина́в) миштэ́с тумэн, тумэ́ на рикирэ́н сыр Дро́гима Дэвлэ́с дро тумаро́ ило́.
43. Мэ явдём кэ тумэ́ ваш Мирэ́-Дадэ́скиро лав, и тумэ́ Ман на приґалёна, нэ ке́ли вари-кон яви́р явэ́ла кэ тумэ́ кокоро́ пэ́стыр, тумэ́ приґалёнас лэс.
44. Сыр тумэ́ могинэ́на тэ упатян, ке́ли тумэ́ прилэ́на манушы́тко шарибэ́н екх екхэстыр, а на родэ́на шарибэ́н екхэ Дэвлэ́стыр?
45. На́ дэн годы́ пэ́скэ (на́ думинэн), со Мэ ява́ва тэ бангякирав тумэн анги́л Дадэ́стэ: Мо́йза явэ́ла тэ бангякирэл тумэн, пэ савэ́стэ тумэ́ розгинэна.
46. Ко́ли тумэ́ патянас Мойза́скэ, тумэ́ и Ма́нгэ патянас, пал-дова́ со ёв чхиндя́ пал Ма́ндэ.
47. Нэ сыр тумэ́ на патя́на долэ́скэ, со чхиндя́ Мо́йза, сыр явэ́на тэ патя́н долэ́скэ, со Мэ ракира́ва тумэ́нгэ?”
Romani Bible Baltic 2019
United Bible Societies for the Baltic Romani Mission