Bible in one year - Пэ Балтитко Романи чиб

Bible in one year May 25

1. Сыс бокх пэ пхув дрэ Давидо́скирэ дывэса́ трин бэрш, бэрш пал бэрш. И пхуцяпэ Дави́до Ра́стыр-Дэвлэ́стыр. И пхэндя́ Рай Дэвэ́л: “Дава́ исын пал Саулостэ и пал ратпибнаскиро лэ́скиро кхэр, пал-дова́, со ёв замардя́ Гаваонитянэн.”

2. Тэды кра́ли кхардя́ Гаваонитянэн и ракирдя́ лэ́нца. Гаваонитяни сыс на Израилёскирэ чхавэ́ндыр, нэ ёнэ сыс Амореендыр, савэ́ ячнэ́пэ; Израильтя́ни дынэ́ лэ́нгэ совэ́л, нэ Са́уло камдя́ тэ замарэ́л лэн пир пэ́скиро зэвлыныпэ́н (ревность) пал ро́до Израилёскиро и Юда́скиро.

3. И пхэндя́ Дави́до Гаваонитянэнгэ: “Со ма́нгэ тэ кэра́в ваш тумэ́нгэ, и со́са тэ раманякирав (тэ примиринав) тумэн, соб (кай) тумэ́ тэ бахтякирэн Ра́скирэ-Дэвлэ́скиро мэкно́ миштыпэ́н (наследие)?”

4. И пхэндлэ́ лэ́скэ Гаваонитяни: “На трэй амэ́нгэ ни руп, ни сувнака́й Саулостыр, ци лэ́скирэ кхэрэ́стыр, и на трэй амэ́нгэ, соб (кай) тэ замарэ́л конэ́с дро Израилё.” Ёв пхэндя́: “Со тумэ́ камэ́на? Мэ кэра́ва ваш тумэ́нгэ.”

5. И пхэндлэ́ ёнэ крали́скэ: “Одолэ́ манушэ́с, саво́ хасякирдя́ амэн и камдя́ тэ домарэл амэн, соб (кай) тэ на явэ́л амэн ни дрэ екх Израилёскирэ пхувьендыр пир ме́жы, –

6. лэ́скирэ родо́стыр выдэ амэ́нгэ эфта́ манушэ́н, и амэ ублаваса лэн анги́л Растэ-Дэвлэ́стэ дрэ Гива́ Саулоскири, выкэдыно Ра́са-Дэвлэ́са.” И пхэндя́ кра́ли: “Мэ выдава.”

7. Нэ тангиндя кра́ли Мефивосфеёс, Ионафаноскирэ чхавэ́с, Сауло́скирэ чхавэ́с, ваш совэ́л Ра́скирэ-Дэвлэ́скирэ лавэ́са, сави́ сыс машки́р лэ́ндэ, машки́р Давидо́стэ и Ионафаностэ, Сауло́скирэ чхавэ́стэ.

8. И лыя́ кра́ли дуе́н чхавэ́н Рицпакирэн, Айаскирэ-чхакирэн, сави́ бияндя́ Сауло́скэ Армонос и Мефивосфеёс, и панджэн Мелхолакирэ чхавэ́н, Сауло́скирэ-чхакирэн, савэ́н ёй бияндя́ Адриэлёскэ, чхавэ́скэ Верзэлиёскирэскэ, Мехолатыр,

9. и отдыя́ лэн дрэ васта́ Гаваонитянэнгэ, и ёнэ убладэ лэн пэ бэ́рга анги́л Растэ-Дэвлэ́стэ. И мынэ́ сарэ́ эфта́ кхэтанэ́; ёнэ сыс мулякирдэ́ дрэ пэрвонэ́-укэдыибнытка дывэса́, дро англыпэ́н укэдыибэн ґэрстоскиро (ячменё).”

10. Тэды э Рицпа, Айаскири чхай, лыя́ калы цэ́рга и росчхудя́ ла пэ́скэ пэ доя́ бэ́рга, и бэшты сыс укэдыибнаскиро англыпна́стыр кэ дова́ моменто, пака чхудэпэ пэ лэ́ндэ Дэвлэ́скирэ паня́ болыбна́стыр, и на домэкця, соб (кай) тэ чилавэн лэн чирикля́ болыбна́скирэ дывэсэ́ и мурдала́ (звери) фэлды́тка раты́.

11. И роспхэндлэ́ Давидо́скэ, со кэрдя́ Рицпа, Айаскири чхай, наложница Саулоскири.

12. И гия́ Дави́до, и лыя́ кокалы́ Сауло́скирэ и кокалы́ Ионафаноскирэ, лэ́скирэ-чхавэ́скирэ, манушэ́ндыр Иависостыр Галаадсконэндыр, савэ́ чораханэ́с лынэ́ лэн гасатыр (форуня́тыр/плошча́тыр) Беф-Сано, кай убладэ Филистимля́ни, ке́ли замардэ́ Филистимля́ни Саулос пэ Гелвуя.

13. И пирилыджия ёв одотхы́р кокалы́ Сауло́скирэ и кокалы́ Ионафаноскирэ, лэ́скирэ-чхавэ́скирэ; и скэдынэ́ кокалы́ убладэнгирэ.

14. И ґарадэ́ кокалы́ Сауло́скирэ и Ионафаноскирэ, лэ́скирэ чхавэ́скирэ, пэ пхув Вениаминоскири, дрэ Цэ́ла, дрэ копли́ца Кисаскири, лэ́скирэ-дадэ́скири. И кэрдэ́ саро́, со припхэндя́ кра́ли, и сыкадя́ ла́ска Дэвэ́л пэ доя́ пхув пало́ (после) дава́.

15. И нэвэ́стыр яця́ марибэ́н машки́р Филистимлянэндэ и Израильтянэндэ. И выгия́ Дави́до и лэ́скирэ дына́рья лэ́са, и мардэ́пэ Филистимлянэнца; и Дави́до кхиныя.

16. Тэды Есвиё (Иесвиё), екх Рефаимоскирэ родо́стыр, савэ́стэ марибны́тко буст сыс пхарипнаса (вагаса) дрэ триншэла́ харко́ма и, саво́ обпхандло сыс нэвонэ́ куртала́са, камдя́ тэ замарэ́л Давидо́с.

17. Нэ лэ́скэ дыя́ васт (помогиндя) о Авеса, Саруяскиро чхаво́, и домардя́ Филистимлянинос, и мулякирдя́ лэс. Тэды мануша́ Давидо́скирэ совлахадэ, ракири́: “На джа́са ту буты́р амэ́нца пэ марибэ́н, соб (кай) тэ на мурдёл Израилёскиро момолы́тко (свети́льнико).

18. Тэ́ньци сыс нэвэ́стыр марибэ́н Филистимлянэнца дрэ Гоба; тэды Совохаё Хушатянино замардя́ Сафутос, екхэ́с Рефаимоскирэ родо́стыр.

19. Сыс и яви́р марибэ́н дрэ Гоба; тэды домардя́ Елханано, чхаво́ Ягаре-Оргимоскиро Вифлеемостыр, Голиафас Гефянинос, савэ́стэ кашт (древко) чхурдыпныконэ бустякиро сыс, сыр навоё ткачэндэ.

20. Сыс ишчо (инкэ́) марибэ́н дрэ Гефа; и сыс одо́й екх ману́ш вучо́, савэ́стэ сыс пэ шов ангушта пэ васта́ и пэ ґэра́, сарэ́ биш тэ штар, адя́кэ-паць Рефаимоскирэ родо́стыр.

21. И ёв костя Израильтянэ́н; нэ лэс замардя́ Ионафа́но, чхаво́ Сафаёскиро, Давидо́скирэ-пшалэскиро.

22. Адалэ́ штар сыс Рефаимоскирэ родо́стыр дрэ Гефа, и ёнэ мынэ́ Давидо́скирэ вастэ́стыр и лэ́скирэ дынарье́ндыр (слугэ́ндыр).

2 Samuel 22:1-51

1. И лыя́ тэ багал Дави́до гилы́ Ра́скэ-Дэвлэ́скэ дрэ дова́ дывэ́с, ке́ли Рай Дэвэ́л ракхця́ лэс вастэ́стыр сарэ́ лэ́скирэ вэргэ́ндыр и Сауло́скирэ вастэ́стыр, и пхэндя́:

2. “Рай Дэвэ́л исын тва́рдыма (диз) мири́, и зор мири́, и Зракхибнаскиро миро.

3. Дэвэ́л исын бэ́рга мири́; пэ Лэ́стэ мэ розгинава; шчы́то миро, шынг (ро́го) ракхибнаскиро мирэскиро, вучарды́ (башня) мири́ и нашыбэн миро; Зракхибнаскиро миро, бидатыр Ту зракхця́н ман!

4. Мэ кхара́ва Рас-Дэвлэ́с, Савэс трэй тэ шарэс и мэ вэргэ́ндыр мирэндыр зракхавапэ.

5. Облынэ ман валны мэрибнытка, и беззакониякирэ сыгна рэкицы страхакирдэ ман.

6. Зандирья́ (цэ́пи) адоскиро обпэнтындлэ ман, и фэля́ (сети) мэрибнаскирэ обкхудэ ман;

7. нэ и дро тасадыибэн миро мэ кхардём Рас-Дэвлэ́с, и кэ Дэвэ́л миро дыём го́дла, и Ёв шундя́ Пэ́скирэ кхангирья́тыр зан мири́, и го́дла мири́ догия́ кэ Лэ́скиро шуныбэ́н.

8. Тринскирдяпэ, куниндяпэ пхув, издрандынэ и кхардэпэ (подвининдлэпэ) болыбна́скирэ фундаменты (основы); пал-дова́ со холя́сыя пэ лэ́ндэ Рай Дэвэ́л.

9. Ѓаздыяпэ тхув холя́тыр Лэскирьятыр, и уштэндыр Лэскирэндыр яг, сави́ ха́ла саро́; хачкирдэ́ вангара чхудэпэ Лэ́стыр.

10. Бандякирдя Ёв болыбэ́н и гия́ тэлэ́; и калыпэ́н тэл Лэ́скирэ ґэра́;

11. и бэстя́ пэ херувимы, и вурняндыя, и традыя́ пэ пхака́ (крылы) балвалякирэ;

12. и калыпнаса учхакирдя́ Пэс, сыр шатраса, и Ёв скэдыя́ пани́ болыбна́скирэ облокэндыр;

13. зяиныбнастыр анги́л Лэ́стэ росхачонас вангара ягакирэ.

14. Загреминдя болыбна́стыр Рай Дэвэ́л, и Най Вучэдырэскиро дыя́ зан Пэ́скири;

15. и мэкхця марибны́тка бустя́ (стре́лы) и рострадыя лэн; зазяиндя блискавицаса и домардя́ лэн.

16. И отчхакирдэпэ/сыкадынэ морёскирэ (дэрьявэ́скирэ) источники (ґанынгорья), счхакирдэпэ фундаменты пхувья́кирэ холямэ́ Ра́скирэ-Дэвлэ́скирэ занятыр, холямэ́ пхурдыпнастыр Лэ́скирэ духо́стыр.

17. Протырдыя́ Ёв васт вучипна́стыр, и лыя́ ман, и вылыя ман бутэ́ панендыр;

18. зракхця́ ман вэргостыр мирэ́ зоралэстыр, одолэ́ манушэ́ндыр, савэ́ зоралэ́с бидыкхэна ман, савэ́ сыс зоралэды́р ма́ндыр.

19. Ёнэ ґаздынэ́пэ пэ ма́ндэ дро бидакиро дывэ́с миро; нэ Рай Дэвэ́л сыс подрикирибнаса ваш ма́нгэ

20. и вылыджия́ ман на пэ дарано штэ́то, зракхця́ ман, пал-дова́ со Ёв лачхипна́са отлыджалапэ кэ мэ.

21. И отдыя́ ма́нгэ Дэвэ́л пир чачипэ́н миро, пир жужыпэн мирэ́ вастэнгиро дыя́ мазу́ри (награда) ма́нгэ.

22. Пал-дова́ со мэ ракхцём дрома́ Ра́скирэ-Дэвлэ́скирэ, и мэ на со́мас злыднитко анги́л Растэ-Дэвлэ́стэ мирэстэ,

23. пал-дова́ со сарэ́ упхэныбэна́ Лэ́скирэ сыс анги́л ма́ндэ, и статутэндыр (уставэндыр) Лэскирэстыр мэ на отгиём,

24. и мэ со́мас бидошакиро анги́л Лэ́стэ, и мэ ракхцёмпэ, соб (кай) тэ на кэра́в грэ́хо ма́нгэ.

25. И отдыя́ ма́нгэ Дэвэ́л пир чачипэ́н миро, пир жужыпэн миро анги́л якха́ Лэ́скирэ.

26. Тангипнаскирэса (жалостнонэса) Ту, Дэ́вла, кэрэ́са пир тангипэ́н, муршэса чачунэса Ту кэрэ́са чачунэ́с,

27. жужэса – жужэс, а хоханэса – пир хохаибэ́н лэ́скиро.

28. Тэлякирдэ манушэ́н Ту зракхэ́са, и дыкхибнаса Пэскирэса Ту тэлякирэса пхутькирдэн.

29. Ту, Раё Дэ́вла, сан момолы́тко миро; Ту, Раё Дэ́вла, пирикэрэса амаро́ калыпэ́н дро свэ́то (дуд).

30. Ту́са мэ домарава халадыбэ́н; Дэвлэ́са мирэса мэ джа́ва упрэ́ пэ ва́нта.

31. Дэвэ́л! – исын бидошэ́нгиро дром Лэ́скиро, жужо́ лав Ра́скирэ-Дэвлэ́скиро, Ёв исын шчы́то ваш сарэ́нгэ, кон ужакирэ́ла лачхипэ́н (надеинэлапэ) пэ Лэ́стэ.

32. Пал-дова́ со, кон исын Дэвэ́л, апри́ч Растэ-Дэвлэ́стэ, и кон исын ска́ла тэ гарадёл, апри́ч Дэвлэ́стыр амарэстыр?

33. Дэвэ́л пхэрдякирэла ман зорья́са, Ёв сыкавэ́ла ма́нгэ чачуно́ дром;

34. Ёв кэрэ́ла ґэра́ мирэ́ сыр оленёскирэ, и пэ вучипэна́ подрикирэ́ла ман;

35. Ёв сыклякирэ́ла васта́ мирэ́ марибнаскэ, и маса́ пэ псикэ́ мирэ́ тырдэла, сыр харкуно (медно) лу́ко.

36. Ту дэ́са ма́нгэ шчы́то тэ ракхавпэ, и ковлыпэн Тыро́ барьякирэ́ла ман.

37. Ту кэрэ́са буґлыдыр дроморо миро тэл ма́ндэ, и на кунинэнапэ ґэра́ мирэ́.

38. Мэ традавапэ пал вэргэ́ндэ мирэндэ и мэ марава лэн, и на рисёва́ва, пака вымарава лэн;

39. и вымарава лэн, и домарава лэн, и ёнэ на уштэна, и пэрэ́на тэл ґэра́ мирэ́.

40. Ту дэ́са ма́нгэ зор ваш марибэ́н, и чхувэ́са анги́л ма́ндэ вэргэ́н мирэн, савэ́ джа́на пэ ма́ндэ.

41. Ту рискирэса мэняса кэ мэ вэргэ́н мирэн, и мэ вымарава одолэ́н, кон бидыкхэла ман.

42. Ёнэ мангэна, нэ нанэ зракхибнарис, – кэ Рай Дэвэ́л, нэ Ёв на отпхэнэ́ла лэ́нгэ.

43. Мэ росчхувава лэн, сыр пра́хо пхувья́киро, сыр бла́та пэ вули́ца (га́са) мэ тасавава лэн, и штакирава лэн.

44. Ту ракхцян ман манушэ́ндыр мирэндыр, савэ́ ґаздынэ́пэ проти ма́ндэ; Ту ракхцян ман, соб (кай) тэ явав ма́нгэ шэралэса пэ явирэ-родэнгирэ манушэ́ндэ, манушэ́н, савэ́н мэ на джиндём, савэ́ дынаринэна ма́нгэ.

45. Мануша́ явирэ-родэнгирэ шука́р ракирэ́на анги́л ма́ндэ; пир шуныбэ́н пал ма́ндэ кандэ́на ман.

46. Мануша́ явирэ-родэнгирэ парнёна и тринскирэнапэ дрэ пэ́скирэ фо́рья зоралэ́ тынэ́нца.

47. Тэ явэ́л Рай Дэвэ́л и бахтякирдо́ Застэмпнико (Затэрдыибнаскиро) миро! Мэк тэ явэ́л шардо Дэвэ́л, Ска́ла зракхибнаскэ мирэскирэскэ,

48. Дэвэ́л, Саво́ отхала палэ (мстинэла) пал ма́ндэ и притасавэла ваш ма́нгэ манушэ́н,

49. и, Саво́ зракхэ́ла ман вэргэ́ндыр мирэндыр! Пэ манушэ́ндэ, савэ́ ґаздынэ́пэ проти ма́ндэ, Ту ґаздыян ман вучэ́с; манушэ́стыр холямэстыр Ту зракхця́н ман.

50. Палдава́ мэ ява́ва тэ славинав Тут, Раё Дэ́вла, машки́р Наюдытконэ́ манушэ́ндэ, и мэ ява́ва тэ бага́в лавэ́скэ Тырэ́скэ,

51. Лэ́скэ, Кон зракхэ́ла крали́с Пэ́скирэс и кэрэ́ла милыма помакхибнаскирэскэ Пэскирэскэ, Давидо́скэ и родо́скэ лэскирэскирэ пэ ве́ки!”

Psalms 68:1-6

1. Хоро́скирэ Дирижоро́скэ. Давидо́скиро Пса́лмо. Гилы́.

2. Мэк Дэвэ́л тэ тэрдёл и тэ росчхурдэл Пэ́скирэ вэргэ́н, и мэк одолэ́, савэ́ бидыкхэна Лэс, явэ́на тэ нашэ́н Лэ́скирэ мо́стыр.

3. Сыр тхув роспхурдэлапэ криг, адя́кэ-паць Ту роспхурдэса лэн; сыр мом биладёла ягатыр, адя́кэ-паць фуй мануша́ биладёна одо́й, кай Дэвэ́л исын.

4. Нэ патяибнаскирэ мануша́ явэ́на бахталэ́; ёнэ явэ́на тэ радынэ́нпэ зоралэ́с, и ёнэ явэ́на тэ ґаздэ́нпэ радыма́са.

5. Бага́н Дэвлэ́скэ, бага́н шарибнытка гиля́ Лэ́скирэ лавэ́скэ, ґаздэ́н шарибнаса Лэс, Саво́ традэ́ла уклисто пир о́блоки пэ болыбэ́н: Лэ́скиро лав исын Рай Дэвэ́л, ґаздэ́нпэ шарибнаса одо́й, кай Ёв исын.

6. Дэвэ́л, Саво́ исын дрэ Пэ́скиро Свэ́нто Штэ́то, Дад пиротэнгиро (сиротэнгиро), Сэнда́ри пивленгиро (удовэнгиро).

Proverbs 17:2-4

2. Годо́ дына́ри (слуга) рикирэ́ла зор пэ чхавэ́стэ, саво́ кэрэ́ла ладж, и ёв роскэрэла (роздэла) мэкно́ миштыпэ́н машки́р пшалэ́ндэ.

3. Дрэ кака́ви (котло) билавэна (плавинэна) руп, а дрэ бов сувнака́й, нэ Рай Дэвэ́л пропатякирэла илэ.

4. Бибахтало́ ману́ш прилэ́ла кэ годы́, со ракирэ́на начачунэ ушта́, нэ хохано́ ману́ш шунэ́ла бэдо чиб, сави́ лыджа́ла пэ хасибэ́н.

Jan 8:28-59

28. Адя́кэ Ису́со пхэндя́ лэ́нгэ: “Ке́ли ґаздэ́на Чхавэ́с Манушэскирэс, тэды тумэ́ уґалёна, со дава́ сом Мэ, и со Мэ нисо́ на кэра́ва Пэ́стыр; нэ, сыр сыклякирдя́ Ман Миро Дад, адя́кэ и Мэ ракира́ва.

29. Кон бичхадя́ Ман, исын Ма́нца; Дад на ячкирдя́ Ман екхэ́с, пал-дова́ со Мэ ўса́ды (сак) кэра́ва дова́, со Лэ́скэ исын лахчо.”

30. Ке́ли Ёв ракирдя́ дава́, бут мануша́ упатя́ндынэ дрэ Лэ́стэ.

31. Тэды Ису́со пхэндя́ одолэ́ Юдэ́нгэ, савэ́ упатя́ндынэ дрэ Лэ́стэ: “Ко́ли тумэ́ндэ явэ́ла Миро Лав дрэ пэ́стэ, тумэ́, чачэс, сан Мирэ́ сыкляибны́тка;

32. и тумэ́ уджинэна чачипэ́н, и чачипэ́н кэрэ́ла тумэн вольнонэнца.

33. Ёнэ Лэ́скэ отпхэндлэ́: “Амэ сам Авраамо́скирэ родо́стыр и ние́кхвар никонэ́скэ на са́мас слу́ги (дына́рья); сыр Ту ракирэ́са дава́, со амэ ячаса вольна?”

34. Ису́со отпхэндя́ лэ́нгэ: “Чачэс, чачэс, Мэ ракира́ва тумэ́нгэ: кажно, кон кэрэ́ла грэ́хо, одова́ кокоро́ исын дына́ри грэхоскэ.

35. Нэ дына́ри на саро́ часо явэ́ла тэ дживэ́л дро кхэр; а чхаво́ дживэ́ла ве́чнэс.

36. Ко́ли Чхаво́ кэрэ́ла тумэн вольнонэнца, тэды, чачэс, тумэ́ явэ́на вольна.

37. Мэ джино́м (джина́в), со тумэ́ сан Авраамо́скирэ родо́стыр: и усае́кх тумэ́ родэ́на Ман тэ замарэ́н, пал-дова́ со Миро лав на яця́пэ дро тумаро́ ило́.

38. Мэ ракира́ва тумэ́нгэ дова́, со Мэ дыкхцём Мирэ́ Дадэ́стэ: нэ тумэ́ кэрэ́на дова́, со тумэ́ дыкхнэ́ пэ́скирэ дадэ́стэ.”

39. Ёнэ пхэндлэ́ Лэ́скэ дро отпхэныбэ́н: “Амаро́ дад исын Авраа́мо.” Ису́со ракирэ́ла лэ́нгэ: “Ко́ли тумэ́ тэ явэ́н Авраамо́скирэ чхавэ́, тэды тумэ́ кэрэ́нас Авраамо́скирэ рэ́нды;

40. нэ какана́ тумэ́ родэ́на тэ замарэ́н Ман, Манушэ́с, Саво́ пхэндя́ тумэ́нгэ чачипэ́н, Саво́ Мэ шундём Дэвлэ́стыр; Авраа́мо на кэрдя́ дава́.

41. Тумэ́ кэрэ́на дова́, со кэрдя́ тумаро́ дад.” Ёнэ пхэндлэ́ Лэ́скэ: “Амэ на бияндыям блэндостыр; амэ́ндэ исын екх Дад: Дэвэ́л.”

42. Ису́со пхэндя́ лэ́нгэ: “Ко́ли Дэвэ́л тэ явэ́л тумаро́ Дад, тэды тумэ́нгэ явавас бы дро́го Мэ, пал-дова́ со Мэ и явдём Дэвлэ́стыр и Мэ явдём на Кокоро́ Пэ́стыр, нэ Ёв Ман бичхадя́.

43. Со́скэ тумэ́ на ґалёна Миро ракирибэ́н? Пал-дова́ со тумэ́ на могинэ́на тэ шунэ́н Миро лав.

44. Тумаро дад исын на́лачхо и тумэ́ камэ́на тэ кэрэ́н пир тумарэ́-дадэ́скири ла́ска. Нэ ёв саро́ джиибэ́н сыс манушэ́нгиро замарибнари, и ёв на дживдя́ дро чачипэ́н, пал-дова́ со нанэ чачипэ́н дрэ лэ́стэ; ке́ли ёв ракирэ́ла хохаибэ́н, ракирэ́ла пэ́скиро, пал-дова́ со ёв исын хохаибнари и хохаибнаскиро дад.

45. Нэ ке́ли Мэ ракира́ва тумэ́нгэ чачипэ́н, тумэ́ на патя́на Ма́нгэ.

46. Кон тумэ́ндыр бангякирэла Ман дро грэ́хо? Ко́ли Мэ ракира́ва тумэ́нгэ чачипэ́н, со́скэ тумэ́ на патя́на Ма́нгэ?

47. Одова́, кон исын Дэвлэ́стыр, одова́ шунэ́ла Дэвлэ́скирэ лава́; тумэ́ палдава́ на шунэ́на, пал-дова́ со тумэ́ сан на Дэвлэ́стыр.”

48. Пэ дава́ Юды пхэндлэ́ Лэ́скэ: “Ци на чачипэ́н амэ ракираса, со Ту сан Самарянино и на́лачхо ду́хо (фа́но) исын бэшто́ дрэ Ту́тэ?”

49. Ису́со отпхэндя́: “Дрэ Ма́ндэ нанэ на́лачхо ду́хо (фа́но), нэ Мэ кутякирава Мирэ́ Дадэ́с, а тумэ́ калякирэна Ман.

50. Нэ Мэ на родава Пэ́скэ сла́ва: исын яви́р, Одова́, Кон родэ́ла и Ёв явэ́ла тэ сэндинэл.

51. Чачэс, Чачэс Мэ ракира́ва тумэ́нгэ: кон зракхэ́ла Миро лав, одова́ на дыкхэ́ла мэрибэ́н ние́кхвар.”

52. А Юды пхэндлэ́ Лэ́скэ: “Какана́ амэ уґалыям, со на́лачхо ду́хо (фа́но) исын бэшто́ дрэ Ту́тэ; Авраа́мо мыя́, мынэ́ и проро́ки, а Ту ракирэ́са: ‘Кон зракхэ́ла лав Миро, одова́ на мэрэ́ла ние́кхвар’.

53. Нау́што Ту сан барэды́р дадэ́стыр амарэстыр Авраамостыр, саво́ мыя́ и сарэ́ проро́ки мынэ́: пал конэ́стэ Ту Пэс гинэса?”

54. Ису́со отпхэндя́: “Ко́ли Мэ Кокоро́ Пэс славинава, тэды сла́ва Мири́ нисо́ на мол: нэ Миро Дад славинэла Ман, пал Савэ́стэ тумэ́ ракирэ́на, со Ёв исын тумаро́ Дэвэ́л.

55. Тумэ́ на джиндлэ́ Лэс, нэ Мэ джино́м (джина́в) Лэс; и ко́ли Мэ пхэна́ва, со на джино́м Лэс, тэды Мэ ява́ва адасаво́-паць хохаибнари, сыр и тумэ́ сан. Нэ Мэ джино́м Лэс и Мэ ракхава Лэ́скиро лав.

56. Авраа́мо, дад тумаро́, сыс радо тэ дыкхэ́л Миро дывэ́с: и дыкхця́, и обрадындяпэ.”

57. Пэ дава́ пхэндлэ́ Лэ́скэ Юды: “Ту́кэ нанэ и пандждэша́ бэрш, и Ту дыкхця́н Авраамос?”

58. Ису́со пхэндя́ лэ́нгэ: “Чачэс, чачэс Мэ ракира́ва тумэ́нгэ: англэды́р, сыр бия́ндыя Авраа́мо, Мэ со́мас.”

59. Тэды ёнэ ухтылдэ́ бара́, соб (кай) тэ марэ́н Лэс; нэ Ису́со счхакирдяпэ и гия́ яври́ Кхангирья́тыр, гия́ машки́р лэ́ндэ, и гия́ дурэды́р.

Romani Bible Baltic 2019

Maintained by the United Bible Societies for the Baltic Romani Mission