3. И лыя́ тэ рикирэ́л дро пэ́скиро ило́ Соломо́но Рас-Дэвлэ́с сыр Дро́гима, псирдя́ пир упхэныбэ́н Давидо́скиро, пэ́скирэ-дадэ́скиро; нэ и ёв янэлас свэ́нта дыибэна́ Ра́скэ-Дэвлэ́скэ и тхувлякирэлас дрогонэ́ смолэнца пэ вучэ́ штэ́ты.
4. И гия́ кра́ли дро Гавао́но, соб (кай) тэ янэл одо́й свэ́нто дыибэ́н Ра́скэ-Дэвлэ́скэ, пал-дова́ со одо́й сыс главно алта́рё. Тысёнцо цэ́ло схачкирибэ́н лыджия́ упрэ́ Соломо́но пэ дова́ алта́рё.
5. Дро Гавао́но явдя́ Рай Дэвэ́л Соломоно́скэ дро сунэ́ раты́, и пхэндя́ Дэвэ́л: “Манг, со тэ дав ту́кэ.”
6. И пхэндя́ Соломо́но: “Ту кэрдя́н писхари́скэ Тырэ́скэ, Давидо́скэ, дадэ́скэ мирэ́скэ, баро́ лачхипэ́н; и пал дова́, со ёв псирдя́ анги́л Ту́тэ дро патяибэ́н и чачипэ́н, и чачунэ́ илэ́са сыс анги́л Ту́тэ, Ту зракхця́н лэ́скэ дава́ баро́ лачхипэ́н и дыя́н лэ́скэ чхавэ́с, саво́ бэшэлас бы пэ лэ́скиро троно, сыр дава́ и исын акана́.”
7. И акана́, Раё Дэ́вла, Дэвэ́л миро, Ту чхудя́н писхари́с Тырэ́с кра́ли пэ штэ́то Давидо́скиро, мирэ́ дадэ́скиро; нэ мэ – тэрно́ ману́ш тыкно́, мэ на джино́м (на джина́в) ни миро выгиибэн, ни загиибэ́н.
8. И писха́ри Тыро́ исын – машки́р манушэ́ндэ Тырэндэ, савэ́н зракхця́н Ту, манушэ́н ада́кицы бут, со лэн нашты́ ни тэ пиригинэс, ни тэ згинэс якхэ́нца.
9. Дэ Тырэ́ писхари́скэ ило́ годьваро́, соб (кай) мэ тэ сэндинякирав манушэ́н Тырэ́н и тэ розґалёвав, со исын лачхипэ́н, и со исын чорипэ́н; пал-дова́ со кон могинэ́ла тэ сэндякирэ́л адалэ́ дакицы бут Тырэ́ манушэ́н?”
10. И мишто́ сыс Ра́скэ-Дэвлэ́скэ, со Соломо́но мангдя́ дава́.
11. И пхэндя́ лэ́скэ Рай Дэвэ́л: “Пал-дова́ со ту мангдян дава́ и на мангдян пэ́скэ длуго джиибэ́н, на мангдян пэ́скэ барвалыпэ́н, на мангдян пэ́скэ тырэ́ вэргэнгиро мэрибэ́н, нэ мангдян пэ́скэ годы́, соб (кай) тэ джинэ́с тэ сэндякирэс,
12. то ґа́да, Мэ кэра́ва пир лав тыро́. Акэ, Мэ да́ва ту́кэ ило́ годо́ и годьваро́, адя́кэ со шэра́ (ра́внэс) ту́кэ на сыс англэды́р ту́тыр, и пало́ (после) ту́тэ на явэ́ла ровня ту́кэ.
13. И дова́, со ту на мангдян, Мэ да́ва ту́кэ, и барвалыпэ́н и сла́ва адя́кэ, со на явэ́ла шэра́ (ра́внэс) ту́кэ машки́р кралье́ндэ дрэ сарэ́ дывэса́ тырэ́.
14. И ко́ли ту явэ́са тэ псирэ́с дромэ́са Мирэса, ракхи упхэныбэна́ Мирэ́, и припхэныбэна́ Мирэ́, сыр псирдя́ дад тыро́ Дави́до, то Мэ кэра́ва длугэдыр и дывэса́ тырэ́.”
15. И джангадыя (прошниндяпэ) Соломо́но, и ґа́да, дава́ сыс, со Рай Дэвэ́л ракирдя́ лэ́са дро суно́. И гия́ ёв дро Ерусалимо, и тэрдия́ анги́л Ра́скирэ-Дэвлэ́скиро завето́скиро ковчэго, и яндя́ цэ́ло схачкирибэ́н, и яндя́ раманёно (ми́рно) свэ́нто дыибэ́н Ра́скэ-Дэвлэ́скэ, и кэрдя́ баро́ свэ́нко ваш сарэ́ пэ́скирэ дынарье́нгэ.
27. И одолэ́ упратунэ (приставники) янэ́нас крали́скэ Соломоно́скэ саро́, со сыс трэй кэ крали́скиро сками́нд, кажно (сва́ко) дро пэ́скиро чхон, и на домэкэнас наухтылыбэн ни дрэ со.
28. И ґэрсто (ячменё), и пхус ваш грэнгэ и ваш мулэнгэ янэ́нас кажно (сва́ко) дрэ пэ́скири стэчка (рядо) пэ штэ́то, кай сыс кра́ли.
29. И дыя́ Дэвэ́л Соломоно́скэ годыпэ́н и древа́н бари годы́, буґло́ ило́, сыр пра́хо пэ морёскиро (дэрьявэ́скиро) брэ́го.
30. И сыс годы́ Соломоно́скири вучэды́р годятыр сарэ́ чхавэ́ндыр Вастоко́стыр и сарэ́ Египтянэнгирэ годятыр.
31. Ёв сыс годьварэдыр сарэ́ манушэ́ндыр, годьварэдыр и Ефаностыр Езрахитяниностыр, и Еманостыр, и Халколостыр, и Дардястыр, Махоласкирэ чхавэ́ндыр, и лав лэ́скиро сыс дрэ сла́ва сарэ́ пашатунэ́ ригэнгирэ манушэ́ндэ.
32. И роспхэндя́ ёв трин тысёнцы притчы (масала), и гиля́ лэ́скирэ сыс тысёнцо и пандж.
33. И ракирдя́ ёв пал вэша́ кедростыр, со сыс дро Лива́но, кэ исопо, саво́ барьёла вантатыр; ракирдя́ пал мурдалэ́ндэ (жывёлэндэ), и пал чириклендэ, и пал долэндэ, савэ́ ползынэна пир пхув, и пал мачхэндэ.
12. а ману́ш, саво́ исын доракирдо пэ буты́ пал ловэ́, ёв исын на чхупна́ри, пал-дова́ со далэ́ бакрэ́ исын на лэ́скирэ, ёв дыкхэ́ла, сыр рув подджа́ла и мэкэ́ла бакрэ́н и кокоро́ нашэла, и рув чорэла бакрэ́н и рострадэла лэн.
13. Ёв исын на чхупна́ри, нэ ёв исын доракирдо пэ буты́ пал ловэ́, и ёв нашэла, и ёв на думинэ́ла пал бакрэндэ
14. Мэ сом лачхо́ Чхупна́ри, и Мэ джино́м Мирэ́ бакрэ́н, и Мирэ́ бакрэ́ джинэ́на Ман.
15. И сыр Ман Дад джинэ́ла, адя́кэ и Мэ джино́м (джина́в) Дадэ́с, и Мэ отда́ва пэ́скиро джиибэ́н пал бакрэндэ.
16. Исын Ма́ндэ и яви́р бакрэ́, савэ́ на далэ́ грэдатыр, и одолэ́н трэй Ма́нгэ тэ янав: и ёнэ явэ́на тэ шунэ́н Мири́ зан, и явэ́ла екх скэдыибэ́н и екх Чхупна́ри.
17. Палдава́ Мэ сом дро́го Дадэ́скэ, со Мэ отда́ва Миро джиибэ́н, соб (кай) нэвэ́стыр тэ прилав лэс.
18. Нико́н Миро джиибэ́н на отлэла, нэ Мэ Кокоро́ отда́ва лэс: Ма́ндэ исын зор тэ отдав джиибэ́н и палэ тэ прилав; пал-дова́ со дава́ припхэныбэ́н Мэ дорэсцём Мирэ́ Дадэ́стыр.”