Bible in one year - Пэ Балтитко Романи чиб

Bible in one year June 13

1. Пэ яви́р бэрш Иоасоскиро, Иоахазоскирэ-чхавэ́скиро, кон кралиндя пэ Израилё, яця́ крали́са Ама́сия, Иоасоскиро чхаво́, кра́ли пэ Юдэ́я.

2. Биш тэ пандж бэрш сыс ёв, ке́ли ёв яця́ крали́са, и биш тэ еня́ бэрш сыс крали́са дро Ерусалимо. Лав лэ́скирэ-да́киро Иегоадань, Ерусалимо́стыр.

3. И кэрдя́ ёв лачхэ́с дрэ якха́ Ра́скирэ-Дэвлэ́скирэ, сарэ́са на адя́кэ, сыр лэ́скиро дад Дави́до. Ёв дро саро́ кэрдя́ адя́кэ, сыр лэ́скиро дад Иоа́со.

4. Екх вучипэна́ на сыс отпарудэ; мануша́ ишчо (инкэ́) кэрдэ́ свэ́нта яныбэна́ Ра́скэ-Дэвлэ́скэ и хачкирдэ́ дро́га смо́лы пэ вучипэна́.

5. Ке́ли яця́ зорало́ кралипэ́н дрэ лэ́скирэ васта́, тэды ёв мулякирдя́ пэскирэн дынарье́н, савэ́ замардэ́ крали́с, лэ́скирэ дадэ́с.

6. Нэ чхавэ́н умарибнарье́нгирэн ёв на домардя́, адя́кэ, сыр исын чхиндло́ дрэ Мойза́скирэ-Законоскири лылвари́, дрэ сави́ Рай Дэвэ́л припхэндя́, ракири́: “Нашты́ тэ кэрэ́с адя́кэ, соб (кай) тэ чхувэ́н ка́ра дадэ́нгэ мэрибнаса пал чхавэ́ндэ, и чхавэ́нгэ нашты́ тэ дэн ка́ра мэрибнаса пал дадэндэ; нэ кажно (сва́ко) пал пэ́скиро рэ́ндо (де́ло) исын банго́ (мусинэла) тэ явэ́л дрэ хась (ка́ра) мэрибнаса.”

7. Ёв вымардя дэш тысёнцы Идумеянэн пэ Лондо до́ло, и лыя́ Села марибна́са, и дыя́ ла́кэ лав Иокофеило, саво́ ячэ́лапэ и кэ дава́ дывэ́с.

8. Тэды бичхадя́ о Ама́сия манушэ́н кэ Иоа́со, Израилёскиро кра́ли, кон сыс Иоахазоскиро чхаво́, и Ииуёскиро ўнуко (непото), тэ пхэнэ́л: “Выджа, дыкхасапэ екх пэ екх.”

9. И бичхадя́ о Иоа́со, Израилёскиро кра́ли, кэ Ама́сия, Юдэя́киро кра́ли, тэ пхэнэ́н: “Жылто хру́сто пхусаде́нца, саво́ сыс пэ Лива́но, бичхадя́ кэ ке́дро, саво́ сыс пэ Лива́но, тэ пхэнэ́н: ‘Отдэ́ пэскирья́ чха палоро́м мирэ́ чхавэ́скэ.’ Нэ прогинэ́ буса (дика) мурдала́ (звери), со сыс пэ Лива́но и штакирдэ дава́ жылто хру́сто пхусаде́нца (терно).

10. Ту домардян Идумеянэн, и запхутия тыро́ ило́. Пхутёв и бэш пэ́скэ кхэрэ́. Кэ со ту́кэ тэ кэрэ́с кошыбэ́н пэ пэ́скири би́да? Пэрэса ту и Ю΄да ту́са.”

11. Нэ на кандыя́ лэс о Ама́сия. И выгия́ Иоа́со, Израилёскиро кра́ли, и дыкхнэпэ, кокоро́ ёв и Ама́сия, Юдэя́киро кра́ли, дрэ Вефсамиса, со сыс дрэ Юдэ́я.

12. И розмардэ Израильтя́ни Юдэякирэн, и рознашнэпэ одолэ́ пир пэ́скирэ ша́тры.

13. И Амасияскэ, Юдэя́кирэ крали́с, Иоасоскирэ чхавэ́с, кон сыс ўнуко Охозияскэ, заухтылдя о Иоа́со, Израилёскиро кра́ли, дрэ Вефсамиса, и гия́ пэ Ерусалимо, и роспхагирдя́ ва́нта Ерусалимо́скири Ефремо́скирэ портатыр кэ вэнглытко по́рта пэ штардэша́ куня́ (локти).

14. И лыя́ саро́ сувнака́й и руп, и сарэ́ кхорэ́ (сасу́ды), савэ́ латхнэпэ дро Ра́скирэ-Дэвлэ́скиро Кхэр, и дрэ пираля́, и рисия́ дрэ Сама́рия.

15. Яви́р лав пал Иоасостэ, со ёв кэрдя́, и пал муршканэ́ лэ́скирэ рэ́нды, и сыр ёв мардя́пэ Амасияса, Юдэя́кирэ крали́са, исын зачхиндлэ́ дрэ бэршы́тка архи́вы пал Израилёскирэ кралье́ндэ.

16. И пасия́ о Иоа́со пэ́скирэ дадэ́нца, и гарадо́ сыс дрэ Сама́рия Израилёскирэ кралье́нца. И яця́ крали́са о Еровоа́мо, лэ́скиро чхаво́, пэ штэ́то лэ́скиро.

17. И дживдя́ о Ама́сия, Иоасаскиро чхаво́, кра́ли пэ Юдэ́я, пало́ мэрибэ́н Иоасоскиро, Иоахазоскирэ-чхавэ́скиро, кон сыс кра́ли пэ Израилё, дэшупандж бэрш.

18. Яви́р лав пал Амасияскирэ рэ́нды, исын зачхиндло́ дрэ бэршы́тка архи́вы пал кралье́ндэ Юдэя́тыр.

19. И доракирдэпэ проти лэ́стэ дро Ерусалимо, и настя́ ёв дро Лахисо. И бичхадэ́ пал лэ́стэ дро Лахисо, и замардэ́ лэс одо́й.

20. И яндлэ́ лэс пэ грэ́ндэ, и гарадо́ ёв сыс дро Ерусалимо пэ́скирэ дадэ́нца дро Давидо́скиро фо́ро.

21. И лынэ́ сарэ́ Юдэя́кирэ мануша́ Азарияс, савэ́скэ сыс дэшушов бэрш, и чхудэ́ лэс крали́са заме́ст лэ́скирэ дадэ́стэ Амасиястэ.

22. Ёв обкэрдя Елафо и отдыя́ лэс Юда́скэ, пало́ (после) дова́, сыр кра́ли пасия́ пэ́скирэ дадэ́нца.

23. Пэ дэшупанджто бэрш Амасияскиро, Иоасоскирэ-чхавэ́скиро, кон сыс кра́ли пэ Юдэ́я, яця́ крали́са Еровоа́мо, Иоасоскиро чхаво́, Израилёскиро кра́ли, дрэ Сама́рия, и сыс ёв крали́са штардэша́ екх бэрш.

24. И кэрдя́ ёв фуипэ́н дрэ Ра́скирэ-Дэвлэ́скирэ якха́: ёв на отгия́ сарэ́ Еровоамоскирэ грэхэ́ндыр, Наватоскирэ-чхавэскирэндыр, саво́ залыджия́ Израилё дро грэ́хо.

25. Ёв рискирдя́ брэгоскирэ рига́ Израилёскирэ, загиибнастыр дрэ Емафо кэ мо́рё (дэрья́в) пэ чхучи́ пхув, пир лав Ра́скирэ-Дэвлэ́скиро, Дэвлэ́скиро Израилёскиро, саво́ Ёв пхэндя́ пирда́л Пэ́скирэ писхаристэ Ионастэ, Амафииноскирэ чхавэ́стэ, пророкостэ Гафхеферостыр.

26. Пал-дова́ со Рай Дэвэ́л дыкхця́ би́да Израилёскири, древа́н кирки адя́кэ, со на яця́пэ ни бэшыбнарис, ни вольнонэ манушэ́с, саво́ яця́пэ, и на сыс никонэ́с, кон дэ́лас бы васт Израилёскэ.

27. И на закамдя́ Рай Дэвэ́л тэ вылыджал лав Израильтянэнгиро тэл болыбна́стыр, и зракхця́ лэн Еровоамоскирэ вастэ́са, Иоасоскирэ-чхавэскирэса.

28. Яви́р лав пал Еровоамостэ и пал саро́, со ёв кэрдя́, и пал муршканэ́ лэ́скирэ рэ́нды, сыр ёв мардя́пэ и сыр рискирдя́ Израилёскэ Дама́ско и Емафо, сави́ сыс Юдаскири, исын зачхиндло́ дрэ бэршы́тка архи́вы пал Израилёскирэ кралье́ндэ.

29. И пасия́ Еровоа́мо пэ́скирэ дадэ́нца, Израилёскиро кралье́нца. И яця́ крали́са Заха́рия, лэ́скиро чхаво́, пэ штэ́то лэ́скиро.

Psalms 73:10-20

10. Пал-дова́ и Дэвлэ́скирэ мануша́ порискирэна кэ ёнэ и сы́рбы выпьена пхэрдо́ тахта́й (чаша) лэ́нгирэ лавэ́ндыр, сыр пани́,

11. и пхэнэ́на ёнэ: “Сыр джинэ́ла Дэвэ́л? Ци уджинэла пал дава́ амо (Най) Вучэды́р?”

12. Дыкх, сыр исын бидэвлыткарьенгэ; лэ́нгэ дживэлапэ миштэ́с, ёнэ скэдэ́на буты́р и буты́р пэ́скирэ барвалыпэна.

13. Нау́што (неужэли) ивья́ мэ приракхцём пэ́скиро ило́ дрэ жужыпэн и мэ выморавас васта́, соб (кай) тэ сыкавав, со нанэ банг ма́ндэ?

14. Саро́ часо ма́нгэ сыс пхаро́ и кажно зло́ко (ра́нко) Дэвэ́л пхарэ́с сыклякирэ́ла ман.

15. Ко́ли мэ пхэнавас: “Акэ, сыр мэ ява́ва тэ ракира́в, дыкхэ́н, тэды мэ давас дукха́ (хохававас) Тырэ́-чхавэ́нгирэ ро́до.

16. И мэк мэ думиндём, со мэ, хачи, галёвавас дава́, дава́ сыс дукхано дрэ мирэ́ якха́,

17. пака мэ на гиём пэ Свэнтонэ́-Дэвлэ́скиро Штэ́то, фэ́ни, тэды мэ ґалыём ко́нцо (яго́ро) фуе́ манушэ́нгэ.

18. Чачо́, Ту чхувэ́са лэ́нгирэ ґэра́ пэ склизка штэ́ты, Ту чхувэ́са лэн тэлэ́ тэ хасён.

19. Сыр адя́кэ сы́гэс ёнэ екха́тыр хасёна, джа́на криг сарэ́са кэ хась мэрибнытконэ дара́са.

20. Сыр суно́ пэ зло́ко (ра́нко), ке́ли ману́ш джангадёла, адя́кэ-паць Ту, Раё Дэ́вла, ке́ли Ту джангадёса, тэ́ньчи Ту бистрэса пал адалэ́ фуе́ манушэ́ндэ.

Proverbs 18:18-19

18. Трэй тэ чхурдэ́н жре́биё, соб (кай) тэ тэрдёл (тэ пириячэл) чинга́рд, ке́ли зоралэ́ мануша́ камэ́на тэ пиризорьякирэн екх екхэ́с.

19. Ко́ли ту дукхавэса (росхолякирэса) пшалэ́с, тэды исын пхарэдыр тэ рискирэс палэ лэс, сыр тэ лэл зорало́ фо́ро; и чинга́рд исын сы́рбы састы́р пэ вуда́р дрэ тхагаритко тва́рдыма (букло), савья́са пшал запхандэлапэ ту́тыр.

Jan 20:1-31

1. Дро пэ́рво куркэскиро дывэ́с, пэ зло́ко, ке́ли сыс ишчо (инкэ́) кало́ (цёмно), Мари́я Магдалина явдя́ кэ копли́ца, и дыкхэ́ла, со бар сыс рискирдо загиибнастыр дрэ копли́ца.

2. Ёй ада́й жэ прастындой явдя́ кэ Си́моно Пэ́три и кэ яви́р Лэ́скиро сыкляибны́тко, саво́ сыс дро́го Исусо́скэ, и ракирэ́ла лэ́нгэ: “Ёнэ лыджинэ́ Рас-Дэвлэ́с коплицатыр криг, и амэ на джина́са, карик ёнэ чхудэ́ Лэс.”

3. Пэ́три и яви́р сыкляибны́тко гинэ́ кэ копли́ца.

4. Ёнэ праста́ндынэ дуйджинэ́; нэ яви́р сыкляибны́тко праста́ндыя сыгэды́р Пэтристыр и ёв англэды́р явдя́ кэ копли́ца.

5. И ёв бандия и дыкхця́ паштэ́ похтана, нэ ёв на загия́ андрэ́ дрэ копли́ца.

6. Пала́л пал лэ́стэ припрастандыя Си́моно Пэ́три, и загия́ дрэ копли́ца, и дыкхэ́ла, со похтана сыс паштэ́,

7. и гараибнытко дыкхло, савэ́са сыс обпхандло Лэ́скиро шэро́, и саво́ на сыс кхэтанэ́ пашто́ гараибнытконэ похтанэса, нэ сыс скрэнцындло пэ яви́р штэ́то.

8. Тэды и яви́р сыкляибны́тко загия́, саво́ анги́л припрастандыя кэ копли́ца, ёв дыкхця́, и упатяндыя;

9. пал-дова́ со ёнэ ешчэ на джиндлэ́ Свэнтонэ́ Чхиныбна́стыр, со Лэ́скэ трэиндя́ тэ отджидёл мулэ́ндыр.

10. Тэды Лэ́скирэ сыкляибны́тка рисинэ́ кхэрэ́.

11. Нэ Мари́я сыс тэрды пашы́л копли́ца и рондя́. И ке́ли ёй рондя́, ёй бандия и задыкхця дрэ копли́ца,

12. и ёй дыкхця́ дуе́н Янголэн, савэ́ сыс бэштэ́ дрэ парны и́дя пэ дова́ штэ́то, кай сыс пашто́ Исусо́скиро тру́по, екх дрэ шэро́, яви́р пашы́л ґэра́.

13. И ёнэ ракирэ́на ла́кэ: “Джувлие! Со́скэ ту ровэса?” Ёй ракирэ́ла лэ́нгэ: “Ёнэ лыджинэ́ криг мирэ́ Рас-Дэвлэ́с, и мэ на джино́м, карик ёнэ чхудэ́ Лэс.”

14. Сыр ёй пхэндя́ дава́, ёй обрисия палэ и дыкхця́ Исусо́с, Саво́ сыс тэрдо́ анги́л ла́тэ; нэ ёй на ґалыя́, со дава́ сыс Ису́со.

15. Ису́со ракирэ́ла ла́кэ: “Джувлие! Со́скэ ту ровэса? Конэ́с ту родэса?” Ёй думиндя, со дава́ исын бутярно, саво́ кэрэ́ла буты́ дрэ бар, и ракирэ́ла Лэ́скэ: “Хула́ё! Ко́ли (со) ту вылыджиян Лэс, пхэн ма́нгэ, кай ту чхудя́н Лэс, и мэ ла́ва Лэс.”

16. Ису́со ракирэ́ла ла́кэ: “Марие!” Ёй обрисия и пхэндя́ Лэ́скэ юдыткэс: “Раввуни!” (со значынэ́ла “Сыклякирибна́скиро!”)

17. Ису́со ракирэ́ла: “На чилав Ман, пал-дова́ со Мэ на рисиём кэ Миро Дад; джа́ кэ Мирэ́ пша́ла и пхэн лэ́нгэ: “Мэ рисёва́ва кэ Миро Дад и тумаро́ Дад и кэ Миро Дэвэ́л и кэ тумаро́ Дэвэ́л”.”

18. Мари́я Магдалина гия́ кэ сыкляибны́тка и пхэндя́ лэ́нгэ, со ёй дыкхця́ Рас-Дэвлэ́с и ёй роспхэндя́ лэ́нгэ дова́, со Ису́со пхэндя́ ла́кэ.

19. Дрэ доя́ пэ́рво куркэскири бэльвэ́ль, кай Лэ́скирэ сыкляибны́тка сыс кхэтанэ́ бэштэ́ палэ запхандлэ вудара́ дара́тыр Юдэндыр, явдя́ Ису́со, и тэрдия́ машкира́л, и ракирэ́ла лэ́нгэ: “Рама́нё (миро) тумэ́нгэ!”

20. Ке́ли Ёв пхэндя́ дава́, Ёв сыкадя́ лэ́нгэ васта́ и Пэ́скирэ пашварэ. Сыкляибны́тка древа́н обрадындлэпэ, ке́ли дыкхнэ́ Рас-Дэвлэ́с.

21. Ису́со пхэндя́ лэ́нгэ яви́р мо́ло: “Рама́нё тумэ́нгэ! Сыр Дад бичхадя́ Ман, адя́кэ и Мэ бичхава́ва тумэн.”

22. Ке́ли Ёв пхэндя́ дава́, Ёв пхурдыя пэ лэ́ндэ и пхэндя́ лэ́нгэ: “Прилэ́н Свэ́нто Ду́хо (Фа́но):

23. конэ́скэ тумэ́ явэ́на тэ примангэн грэ́хи, одолэ́нгэ явэ́на приманглэ, нэ пэ конэ́стэ тумэ́ ячкирэна, пэ одолэ́ндэ ёнэ ячэ́напэ.”

24. О Фама́, екх дэшэдуендыр сыкляибнытконэндыр, савэ́с кхардэ́ “Близняко”, на сыс лэ́нца, ке́ли Ису́со явдя́.

25. Яви́р сыкляибны́тка пхэндлэ́ лэ́скэ: “Амэ дыкхцям Рас-Дэвлэ́с.” Нэ ёв отпхэндя́ лэ́нгэ: “Ко́ли (со) мэ на дыкха́ва шпэ́ра гвоздэндыр (карфинэндыр) пэ Лэ́скирэ васта́, и мэ на чхува́ва миро ангу́шт дро штэ́то, кай сыс гвозды (карфина), и мэ на чхува́ва миро васт дрэ Лэ́скирэ пашварэ, Мэ на упатява.”

26. Пир охто́ (бидуе́нгиро дэш) дывэса́ Лэ́скирэ сыкляибны́тка нэвэ́стыр сарэ́ кхэтанэ́ скэдынэ́пэ дро кхэр, и Фама сыс лэ́нца. Явдя́ Ису́со, ке́ли вудара́ сыс запхандлэ, тэрдия́ машки́р лэ́ндэ, и пхэндя́: “Рама́нё тумэ́нгэ!”

27. Тэ́ньци ёв ракирэ́ла Фамаскэ: “Дэ ангу́шт (пальцо) тыро́ адари́к и подыкх Мирэ́ васта́; дэ васт тыро́ и чхув дрэ Мирэ́ пашварэ; и пирияч тэ кунинэспэ, а патя.”

28. Фама пхэндя́ Лэ́скэ дро отпхэныбэ́н: “Раё Дэ́вла миро и Дэвэ́л миро!”

29. Ису́со ракирэ́ла лэ́скэ: “Ту патяндыян, пал-дова́ со ту дыкхця́н Ман: нэ бахталэ́ исын кодолэ́, савэ́ на дыкхнэ́ Ман, а ёнэ упатя́ндынэ.”

30. Бут яви́р знаме́нии (ґертыка́) кэрдя́ Ису́со анги́л Пэ́скирэ сыкляибнытконэндэ, пал савэ́ нанэ чхиндло́ дрэ дая́ лылвари́;

31. нэ саро́, со сыс чхиндло́ дрэ дая́ лылвари́, исын ваш тумэ́нгэ, соб (кай) тумэ́ тэ патя́н, со Ису́со исын Христо́со, Дэвлэ́скиро Чхаво́, и пир патяибэ́н дрэ Лэ́стэ, тумэ́ тэ дживэ́н Лэ́скирэ лавэ́стыр.

Romani Bible Baltic 2019

Maintained by the United Bible Societies for the Baltic Romani Mission