Bible in one year
June 14

1. Пэ биш тэ эфта́то бэрш Еровоамоскиро, кон сыс кра́ли пэ Израилё, яця́ крали́са о Аза́рия, Амасияскиро чхаво́, кра́ли пэ Юдэ́я.
2. Дэшушов бэрш сыс лэ́скэ, ке́ли яця́ ёв крали́са, и пандждэша́ дуй бэрш ёв сыс крали́са дро Ерусалимо. Лав лэ́скирэ-да́киро сыс э Еходия, Ерусалимо́стыр.
3. Ёв кэрдя́ лачхипэ́н дрэ Ра́скирэ-Дэвлэ́скирэ якха́ дро саро́ адя́кэ, сыр кэрдя́ о Ама́сия, лэ́скиро дад.
4. Екх вучипэна́ на сыс отпарудэ: мануша́ кэрдэ́ ишчо (инкэ́) свэ́нта яныбэна́ (жэртвы) и хачкирдэ́ дро́га смо́лы пэ вучипэна́.
5. И домардя́ Рай Дэвэ́л дукхаса крали́с, и сыс ёв насвало́ проказаса кэ пэ́скиро мэрибнаскиро дывэ́с, и дживдя́ дро яви́р кхэр. А Иофа́мо, крали́скиро чхаво́, сыс барыдырэ́са пэ кхэр и рикирдя зор пэ пхувья́кирэ манушэ́ндэ.
6. Яви́р лав пал Азариястэ и пал саро́, со ёв кэрдя́, исын зачхиндлэ́ дрэ бэршы́тка архи́вы пал Юдэя́кирэ кралье́ндэ.
7. И пасия́ о Аза́рия пэ́скирэ дадэ́нца, и гарадэ́ лэс дадэ́нца лэскирэнца дро Давидо́скиро фо́ро. И яця́ крали́са Иофа́мо, лэ́скиро чхаво́, пэ штэ́то лэ́скиро.
8. Пэ трия́нда-охто́то бэрш Азарияскиро, крали́скиро Юдэя́тыр, яця́ крали́са о Заха́рия, Еровоамоскиро чхаво́, пэ Израилё дрэ Сама́рия, и сыс крали́са шов чхона́.
9. Ёв кэрдя́ фуипэ́н дрэ якха́ Ра́скирэ-Дэвлэ́скирэ, сыр кэрдэ́ лэ́скирэ дада́: на ячкирдя́ Еровоамоскирэ грэ́хи, Наватоскирэ чхавэ́скирэ, саво́ залыджия́ Израилё дро грэ́хо.
10. И доракирдяпэ проти лэ́стэ о Селумо, Иависоскиро чхаво́, дыя́ дрэ лэ́стэ и мардя лэс анги́л манушэ́ндэ, и мулакирдя лэс; и яця́ крали́са пэ штэ́то лэ́скиро.
11. Яви́р лав пал Захариястэ исын зачхиндло́ дрэ бэршы́тка архи́вы пал Израилёскирэ кралье́ндэ.
12. Дасаво сыс лав Ра́скирэ-Дэвлэ́скиро, саво́ ёв пхэндя́ Ииуёскэ, пхэни́: “Тырэ́ чхавэ́ кэ шта́рто ро́до явэ́на тэ бэшэ́н пэ Израилёскиро троно.” И сыс адя́кэ.
13. О Селумо, Иависоскиро чхаво́, яця́ крали́са дрэ трия́нда еня́то бэрш Азарияскиро, Юдэя́кирэ-крали́скиро, и сыс крали́са екх чхон дрэ Сама́рия.
14. И гия́ о Менаимо, Гадиёскиро чхаво́, Фирцатыр, и явдя́ дрэ Сама́рия, и чхиндя́ Селумос, Иависоскирэс чхавэ́с, дрэ Сама́рия, и замардя́ лэс, и яця́ крали́са пэ штэ́то лэ́скиро.
15. Яви́р лав пал Селумостэ и пал лэ́скиро зракирибэ́н, саво́ ёв счхудя, исын зачхиндло́ дрэ Израилёскирэ-кралье́нгирэ бэршы́тка архи́вы.
16. И домардя́ о Менаимо фо́ро Типсахо и сарэ́н манушэ́н, савэ́ сыс дрэ лэ́стэ и пашы́л лэ́стэ, лыи Фирцатыр, пал-дова́ со фо́ро на отчхакирдя́ по́рта, и розмардя́ лэс; и сарэ́ пэралэн джувле́н дрэ лэ́стэ росчингирдя [лэ́нгирэ пэра-ю.о.].
17. Пэ трия́нда еня́то бэрш Азарияскиро, кон сыс кра́ли пэ Юдэ́я, яця́ крали́са о Менаимо, Гадиёскиро чхаво́, пэ Израилё; и сыс кра́ли ёв дэш бэрш дрэ Сама́рия.
18. И кэрдя́ ёв фуипэ́н дрэ Ра́скирэ-Дэвлэ́скирэ якха́; ёв на ячкирдя́ Еровоамоскирэ грэ́хи, Наватоскирэ-чхавэ́скирэ, саво́ залыджия́ Израилё дро грэ́хо, дрэ сарэ́ пэ́скирэ дывэса́.
19. Тэды явдя́ о Фуло [Пул-ю.о.], Асирия́киро (Арамейцэнгиро) кра́ли, пэ Израилёскири пхув. И дыя́ Менаимо Фулоскэ тысёнцо шэ́кели руп, соб (кай) васта́ лэ́скирэ тэ явэ́н сыс пал лэ́стэ, и соб (кай) тэ кэрэ́л зоралэды́р кралипэ́н дрэ лэ́скиро васт.
20. И росчхудя́ о Менаимо дава́ руп пэ Израильтянэндэ, пэ сарэ́ барвалэ́ манушэ́ндэ, пир пандждэша́ шэ́кели руп пэ кажнонэ́ (сваконэ) манушэ́стэ, соб (кай) тэ отдэ́л Асирия́кирэ крали́скэ. И рисия́ палэ кра́ли Асириятыр и на яця́пэ ёв одо́й пэ пхув.
21. Яви́р лав пал Менаимостэ и пал саро́, со ёв кэрдя́, исын зачхиндло́ дрэ бэршы́тка архи́вы пал Израилёскирэ кралье́ндэ.
22. И пасия́ Менаимо пэ́скирэ дадэ́нца. И яця́ крали́са о Факия, лэ́скиро чхаво́, пэ штэ́то лэ́скиро.
23. Дрэ пандждэшытко бэрш Азарияскиро, Юдэяскирэ-крали́скиро, яця́ крали́са Факия, Менаимоскиро чхаво́, пэ Израилё дрэ Сама́рия, и сыс крали́са дуй бэрш.
24. И кэрдя́ ёв налачхэ́с дрэ Ра́скирэ-Дэвлэ́скирэ якха́; ёв на ячкирдя́ Еровоамоскирэ грэ́хи, Наватоскирэ-чхавэ́скирэ, саво́ залыджия́ Израилё дро грэ́хо.
25. И счхудя проти лэ́стэ зракирибэ́н о Факеё, Ремалияскиро чхаво́, барыдыро́ (сановнико) лэ́скиро, и мулякирдя́ лэс дрэ Сама́рия дрэ шту́ба крали́скирэ-кхэрэ́скири, кхэтанэ́ Арговоса и Ариемоса, ёв яндя́ пэ́са пандждэша́ манушэ́н Галаадитянэн, и замардя́ лэс, и яця́ крали́са пэ штэ́то лэ́скиро.
26. Яви́р лав пал Факеёстэ и пал саро́, со ёв кэрдя́, исын зачхиндло́ дрэ бэршы́тка архи́вы Израилёскирэ кралье́нгирэ.
27. Пэ пандждэша́ яви́р бэрш Азарияскиро, Юдэя́кирэ крали́скиро, яця́ крали́са Факеё, Ремалиёскиро чхаво́, пэ Израилё дрэ Сама́рия, и сыс крали́са биш бэрш.
28. И кэрдя́ ёв фуипэ́н дрэ Ра́скирэ-Дэвлэ́скирэ якха́, ёв на ячкирдя́ Еровоамоскирэ грэ́хи, Наватоскирэ чхавэ́скирэ, саво́ залыджия́ Израилё дрэ грэ́хо.
29. Дрэ дывэса́ Факеёскирэ, Израилёскирэ-крали́скирэ, явдя́ Феглафеласаро, Асирия́киро кра́ли, и лыя́ Ионо, и Асоро, и Галаа́до, и Галиле́я, сари́ пхув Нефалимоскири, и пирилыджия лэн тэ дживэ́н дрэ Асирия.
30. И счхудя зракирибэ́н о Осия, Илоскиро чхаво́, про́ти Факеёстэ, Ремалииноскирэ чхавэ́стэ, и пэкадя́ лэс, и замардя́ лэс, и яця́ крали́са заме́ст лэ́стэ пэ бишэнгиро бэрш Иоафамоскиро, Озияскирэ чхавэ́скиро.
31. Яви́р лав пал Факеёстэ и пал саро́, со ёв кэрдя́, исын зачхиндло́ дрэ бэршы́тка архи́вы Израилёскирэ-кралье́нгирэ.
32. Пэ яви́р бэрш Факеёскиро, Ремалииноскирэ чхавэ́скиро, кон сыс Израилёскиро кра́ли яця́ крали́са Иоафамо, Ози́яскиро чхаво́, кон сыс кра́ли пэ Юдэ́я.
33. Биш тэ пандж бэрш сыс лэ́скэ, ке́ли ёв яця́ крали́са, и дэшушов бэрш ёв сыс крали́са дро Ерусалимо. Лав лэ́скирэ да́киро сыс Еруша, Садокоскири чхай.
34. Ёв кэрдя́ лачхэ́с дрэ якха́ Ра́скирэ-Дэвлэ́скирэ дрэ саро́, сыр кэрдя́ Ози́я, лэ́скиро дад, адя́кэ кэрдя́ и ёв.
35. Екх вучипэна́ на сыс отпарудэ: мануша́ кэрдэ́ ишчо (инкэ́) свэ́нта яныбэна́ (жэртвы) и хачкирдэ́ дро́га смо́лы (куриныбэн) пэ вучипэна́. Ёв чхудя́ упратуны по́рта пашы́л Ра́скирэ-Дэвлэ́скиро Кхэр.
36. Яви́р лав пал Иоафамостэ и пал саро́, со ёв кэрдя́, исын зачхиндло́ дрэ Юдэя́кирэ-кралье́нгирэ бэршы́тка архи́вы.
37. Дрэ долэ́ дывэса́ лыя́ Рай Дэвэ́л тэ бичхавэл пэ Юдэ́я Рецынос, Сириякирэ крали́с, и Факеёс, Ремалииноскирэ чхавэ́с.
38. И пасия́ Иоафамо пэ́скирэ дадэ́нца, и сыс гарадо́ пэ́скирэ дадэ́нца дрэ Давидо́скиро фо́ро, лэ́скирэ дадэ́скиро. И яця́ крали́са Аха́зо, лэ́скиро чхаво́, пэ штэ́то лэ́скиро.
1. Пэ дэшуэфтато бэрш Факеёскиро, Ремалииноскирэ-чхавэ́скиро, яця́ крали́са Аха́зо, Иоафамоскиро чхаво́, кон сыс кра́ли пэ Юдэ́я.
2. Биш бэрш сыс Ахазоскэ, ке́ли ёв яця́ крали́са, и дэшушов бэрш ёв сыс крали́са дрэ Ерусалимо, и ёв на кэрдя́ лачхэ́с дрэ якха́ пэ́скирэ Ра́скирэ-Дэвлэ́скирэ, сыр Дави́до, лэ́скиро дад.
3. Нэ псирдя́ ёв дромэ́са Израилёскирэ кральенгирэса и адя́кэ-паць чхавэ́с пэ́скирэс лыджия́ пирда́л яг, кэрдя́ манушэ́нгирэ магирибэна, савэ́н протрадыя Рай Дэвэ́л мо́стыр Израилёскирэ-чхавэ́ндыр.
4. И кэрдя́ свэ́нта яныбэна́ (жэртвы) и хачкирдя́ дро́га смо́лы пэ вучипэна́ и пэ бэ́рги и тэл кажно зэлэно кашт.
5. Тэды гия́ Рецыно, Сирия́киро кра́ли, и Факия, Ремалииноскиро чхаво́, кон сыс Израилёскиро кра́ли, проти Ерусалимо, соб (кай) тэ лэн лэс, и рикирдэ Ахазос дрэ осада, нэ тэ пиризорьякирэн на могиндлэ́.
6. Дрэ дова́ часо Рецыно, Сирия́киро кра́ли, рискирдя́ Сириякэ Елафо и вытрадыя́ Юдэя́кирэ манушэ́н Елафостыр; и Идумеяни загинэ́ дро Елафо, и дживэ́на одо́й кэ дава́ дывэ́с.
7. И бичхадя́ Аха́зо манушэ́н кэ Феглафеласаро [Тиглат-Пилэсэро-ю.о.], Асирия́киро кра́ли, тэ пхэнэ́л: “Писха́ри тыро́ и чхаво́ тыро́ мэ сом; яв и зра́кх ман Сириякирэ-крали́скирэ вастэ́стыр и Израилёскирэ-крали́скирэ вастэ́стыр, савэ́ ґаздынэ́пэ пэ ма́ндэ.
8. И лыя́ Аха́зо руп и сувнака́й, саво́ сыс дрэ Ра́скирэ-Дэвлэ́скиро Кхэр и дрэ пираля́ крали́скирэ-кхэрэ́скирэ, и бичхадя́ Асирияскирэ крали́скэ сыр дрэ да́ро (почастунко).
9. И кандыя́ лэс Асирия́киро кра́ли; и гия́ Асирия́киро кра́ли пэ Дама́ско, и лыя́ лэс, и пирилыджия лэ́скирэ манушэ́н дрэ Киро, а Рецынос замардя́.
10. И гия́ кра́ли Аха́зо гил (пэ стре́ч) Феглафеласароскэ, кон сыс кра́ли пэ Асирия, дрэ Дама́ско, и дыкхця́ алта́рё (жэртвенико), саво́ сыс дро Дама́ско, и бичхадя́ кра́ли Аха́зо Урияскэ раша́скэ рисунко пал алта́рё и плано, сыр саро́ тэ кэрэ́н.
11. И кэрдя́ раша́й Урия алта́рё пир сыкаибнытко (приме́рно) рисунко, саво́ бичхадя́ кра́ли Аха́зо Дамаскостыр; и кэрдя́ адя́кэ раша́й Урия кэ явибэн Ахазо́скиро, крали́стыр пэ Дама́ско.
12. И явдя́ кра́ли Дамаскостыр, и дыкхця́ кра́ли алта́рё, и подги́я кра́ли кэ алта́рё, и яндя́ пэ лэ́стэ свэ́нто яныбэ́н Ра́скэ-Дэвлэ́скэ.
13. И хачкирдя́ цэ́ло схачкирибэ́н пэ́скиро и маруно́ яныбэ́н, и почхудя чхуибэ́н пэ́скиро, и брызгиндя ратэ́са пэ́скирэ мирнонэ свэнтонэ́-дыибна́стыр Ра́скэ-Дэвлэ́скэ пэ́скиро алта́рё.
14. А харкуно алта́рё, саво́ сыс анги́л муй Ра́скирэ-Дэвлэ́скирэ, ёв пиричхудя Кхангирья́кирэ москирэ рига́тыр, штэто́стыр, саво́ сыс машкира́л нэвонэ́ алтарёстыр и кхэрэса Ра́скирэ-Дэвлэскирэса, и чхудя́ лэс далэ́ рига́тыр пэ шылалы/паш-рати́тко (северно) риг.
15. И дыя́ упхэныбэ́н кра́ли Аха́зо раша́скэ Урияскэ, пхэни́: “Пэ баро́ алта́рё хачкир пэ зло́ко (ра́нко) цэ́ло схачкирибэ́н и бэльвэлитко маруно́ яныбэ́н, и цэ́ло схачкирибэ́н крали́стыр и марэскиро яныбэ́н лэ́стыр, и цэ́ло схачкирибэ́н сарэ́-пхувья́кирэ манушэ́ндыр и маруно́ яныбэ́н лэ́ндыр, и чхуибэ́н пэ лэ́ндэ, и кажнонэ́ ратэ́са цэ́ло схачкирибэ́н и кажнонэ́ свэнтонэ́ яныбнаскирэ Ра́скэ-Дэвлэ́скэ ратэ́са почхув лэс; а алта́рё харкуно ячэ́лапэ кэ миро дыкхибэ́н.”
16. И кэрдя́ раша́й Урия саро́ адя́кэ, сыр припхэндя́ кра́ли Аха́зо.
17. И выпхагирдя кра́ли Аха́зо крэнгла рамкицы трусця́л прэдки пэ ро́ты, и злыя́ лэ́ндыр чарэ́ ваш муй, и мо́рё (дэрья́в) злыя́ харкунэ́ гурувэндыр, савэ́ сыс тэл лэ́стэ, и чхудя́ лэс пэ баруно пэ́то (по́ло/мо́сто).
18. И отпарудя учхакирдо саватоскиро (суботакиро) псирибэн, саво́ кэрдэ́ пашы́л Кхангири́, и андратуно крали́скиро загиибэ́н кэ Ра́скирэ-Дэвлэ́скиро Кхэр, ваш Асирия́кирэ крали́стэ.
19. Яви́р лав пал Ахазостэ, со ёв кэрдя́, исын зачхиндло́ дрэ бэршы́тка архи́вы пал кралье́ндэ Юдэя́тыр.
20. И пасия́ Аха́зо пэ́скирэ дадэ́нца, и сыс гарадо́ пэ́скирэ дадэ́нца дрэ Давидо́скиро кхэр. И яця́ крали́са Езэки́я, лэ́скиро чхаво́, пэ штэ́то лэ́скиро.
21. Ке́ли миро ило́ сыс дро киркипэн, а мири́ годы́ сыс дукхады,
22. и мэ со́мас дылыно́ и мэ на ґалёвавас бут, мэ со́мас сыр мурда́л анги́л Ту́тэ.
23. Нэ сароекх мэ ўса́ды (сак) со́мас Ту́са, Ту рикирдян ман пал чачо́ васт.
24. Ту сыклякирэса и лыджа́са ман, тэ́ньчи Ту прилэса ман лачхэ́ лавэ́са.
25. Кон ишчо (инкэ́) пэ болыбэ́н исын ма́ндэ апри́ч Ту́тэ? Ма́ндэ нико́н нанэ дро́го пэ пхув апри́ч Ту́тэ.
26. Мири́ лоч и миро ило́ хасёна со дывэ́с: нэ миро Дэвэ́л исын ска́ла мирэ́ илэскэ и Ту сан саро́, со ма́ндэ исын.
27. Пал-дова́ со, ґа́да, кодолэ́, савэ́ исын дур Ту́тыр, хасёна, Ту хасякирэса сарэ́н, савэ́ гинэ́ криг Тырэ́ дромэ́стыр.
28. Нэ ваш ма́нгэ исын миштэ́с тэ явав пашылэды́р кэ Дэвэ́л: Мэ рискирдём пэ́скиро ило́ тэ зракхавпэ кэ Рай Дэвэ́л, соб (кай) тэ ракира́в сарэ́нгэ пал сарэ́ Тырэ́ рэ́нды.
20. Манушэ́скиро кужум чалёла далэ́стыр, со ракирэ́ла лэ́скиро муй, ёв ячэ́лапэ чало пэ́скирэ уштэндыр.
21. Дрэ чиб исын зор ваш джиибэ́н, ци ваш мэрибэ́н. Кон камэ́ла тэ ракирэ́л, одолэ́скэ трэй тэ ужакирэл ци екх, ци яви́р.
1. Пало́ дава́ Ису́со нэвэ́стыр сыкадя́ Пэс Пэ́скирэ сыкляибнытконэ́нгэ пашы́л Тивериадоскиро мо́рё (дэрья́в). Акэ, сыр дава́ сыс:
2. Си́моно Пэ́три сыс кхэтанэ́ Фамаса, Савэс кхарэнас “Близняко”, Нафанаило Канатыр Галилеякирьятыр, и Зеведеёскирэ чхавэ́, и дуй яви́р Лэ́скирэ сыкляибны́тка.
3. Си́моно Пэ́три ракирэ́ла лэ́нгэ: “Мэ джа́ва тэ старав мачхэн.” “И амэ кхэтанэ́ джа́са ту́са”, – ёнэ ракирэ́на лэ́скэ. Ёнэ гинэ́ и бэшнэ́ дрэ ба́рка, нэ ёнэ нисо́ на стардэ дрэ доя́ рат.
4. Нэ ке́ли сыс тасярла, Ису́со сыс тэрдо́ пэ брэ́го; нэ сыкляибны́тка на ґалынэ́, со дава́ сыс Ису́со.
5. Ису́со ракирэ́ла лэ́нгэ: “Тэрнэ́ Мануша́лэ! Ци исын тумэ́ндэ вари-саво́ хабэ́н?” Ёнэ отпхэндлэ́ Лэ́скэ: “Над.”
6. Ёв ракирэ́ла лэ́нгэ: “Зачхурдэн кхуды́ (сетка) пир чачи́ риг баркакири и тумэ́ ухтылэна.” Ёнэ зачхурдынэ кхуды́, и на могиндлэ́ тэ вытырдэн ла, пал-дова́ со одо́й сыс ада́кицы бут мачхэ́.
7. Тэды екх сыкляибны́тко, саво́ сыс дро́го Исусо́скэ, ракирэ́ла Пэтрискэ: “Ѓа́да, Рай Дэвэ́л.” Си́моно Пэ́три, ке́ли шундя́, со адава́ сыс Рай Дэвэ́л, ёв подпхандяпэ идяса, пал-дова́ со ёв сыс нанго, и чхурдыяпэ дро пани́;
8. а явирэ сыкляибны́тка приплывиндлэ (дынэ плима адари́к) дрэ ба́рка, тырдыи пал пэ́стэ кхуды́ пхэрды́ мачхэнца. Ёнэ сыс на́дур брэгостыр пашэ́ шэл метры.
9. Ке́ли ёнэ выгинэ́ пэ брэ́го, ёнэ дыкхнэ́ хачкирдэ́ вангара, и пэ лэ́ндэ сыс паштэ́ мачхэ́ и маро́.
10. Ису́со ракирэ́ла лэ́нгэ: “Янэ́н мачхэ́, савэ́ тумэ́ какана́ стардэ.”
11. Си́моно Пэ́три выгия́ и вытырдыя пэ пхув кхуды́ (сетка), со сыс пхэрды́ барэ́ мачхэнца, савэ́н сыс шэл пандждэша́ трин; и на дыкхи́ пэ дава́, со сыс ада́кицы бут мачхэ́, кхуды́ на прокусцяпэ.
12. Ису́со ракирэ́ла лэ́нгэ: “Явэ́н тэ хан.” Никонэстэ сыкляибнытконэндыр на сыс муршкипэн тэ пхучэл Лэ́стыр: “Кон Ту сан?” Ёнэ джиндлэ́, со адава́ сыс Рай Дэвэ́л.
13. Ису́со явэ́лас пашэдыр, лэлас маро́ и дэ́лас сыкляибнытконэ́нгэ, адя́кэ-паць и мачхэ́.
14. Ѓа́да, акана́ три́то мо́ло Ису́со сыкадя́ Пэс Пэ́скирэ сыкляибнытконэ́нгэ, коригэды́р (позжэды́р) Лэ́скирэ отджидыипнастыр мулэ́ндыр.
15. Ке́ли ёнэ ханэ́, Ису́со ракирэ́лас Симоноскэ Пэтрискэ: “Симоне, Ианоскиро Чхаво́! Ци сом Мэ дро́го ту́кэ бутэды́р лэ́ндыр?” Пэ́три ракирэ́ла Лэ́скэ: “Адя́кэ, Раё Дэ́вла! Ту джинэ́са, со Ту сан дро́го Ма́нгэ.” Ису́со ракирэ́ла лэ́скэ: “Чара́в Мирэ́ свэнтонэ́ бакрорэ́н.”
16. И яви́р мо́ло нэвэ́стыр Ису́со ракирэ́ла лэ́скэ: “Симоне, Ианоскиро Чхаво́! Ци сом Мэ дро́го ту́кэ?” Пэ́три ракирэ́ла Лэ́скэ: “Адя́кэ, Раё Дэ́вла!” Ту джинэ́са, со мэ Ту сан дро́го ма́нгэ.” Ису́со ракирэ́ла лэ́скэ: “Чара́в Мирэ́ бакрэ́н.”
17. И три́то мо́ло ракирэ́ла лэ́скэ Ису́со: “Симоне, Ианоскиро чхаво́! Ци сом Мэ дро́го Ту́кэ?” Пэ́три яця́ смэнтно, со дро три́то мо́ло Ису́со пхэндя́ лэ́скэ: “Ци сом Мэ дро́го ту́кэ?”, и ёв пхэндя́ Исусо́скэ: “Раё Дэ́вла! Ту саро́ джинэ́са; Ту джинэ́са, со Ту сан дро́го ма́нгэ.” Ису́со ракирэ́ла лэ́скэ: “Чара́в Мирэ́ бакрэ́н.
18. Чачэс, чачэс Мэ ракира́ва ту́кэ: ке́ли ту са́нас тэрно́, ту кокоро́ урьявэсаспэ и псирдян, карик ту камдян; нэ ке́ли ту ячэса пхурано́, тэды протырдэса пэ́скирэ васта́, и яви́р ману́ш урьявэла тут и лыджа́ла, карик ту на камэ́са.”
19. И пхэни́ дава́, Ису́со дыя́ лэ́скэ тэ ґалёл, савэ́ мэрибнаса Пэ́три прославинэла Дэвлэ́с. Тэ́ньци Ису́со ракирэ́ла лэ́скэ: “Джа́ пал Ма́ндэ.”
20. Пэ́три порисия и дыкхэ́ла, со пал лэ́стэ джа́ла сыкляибны́тко, савэ́скэ Ису́со сыкадя́ и саво́, ке́ли ёнэ ханэ́, чхудя́ шэро́ кэ Исусо́скиро колы́н и пхуця́: “Раё Дэ́вла! Кон здэла Тут?”
21. Пэ́три дыкхця́ лэс и ракирэ́ла Исусо́скэ: “Раё Дэ́вла! Нэ со явэ́ла лэ́са?
22. Ису́со ракирэ́ла лэ́скэ: “Ке́ли Мэ кама́м, соб (кай) ёв тэ явэ́л джидо́ пака Мэ ява́ва, со ту́кэ кэ дава́? Ту джа́ пал Ма́ндэ.”
23. И гия́ дава́ лав машки́р пшалэ́ндэ, со одова́ сыкляибны́тко на мэрэ́ла. Нэ Ису́со на пхэндя́ лэ́скэ, со ёв на мэрэ́ла, нэ “Ко́ли Мэ кама́м, соб (кай) ёв тэ явэ́л джидо́, пака Мэ ява́ва, со ту́кэ кэ дава́?”
24. Кадава́-паць кокоро́ сыкляибны́тко, саво́ и допхэндя пал дава́, и саро́ дава́ зачхиндя́: и амэ джина́са, со лэ́скиро допхэныбэ́н исын чачуно́.
25. Бут сыс адя́кэ-паць и яви́р рэ́нды (де́лы), со Ису́со кэрдя́: нэ, ко́ли сыс тэ чхинэн екх пал дава́, тэды пир саро́ свэ́то на ухтылэлас (на́доси) штэ́то ваш ада́кицы лылваря. Ами́нь.
Romani Bible Baltic 2019
United Bible Societies for the Baltic Romani Mission