Bible in one year
June 16

1. Ке́ли шундя́ кра́ли Езэки́я дава́, то тэды роскустя пэ́скирэ и́ди, и учхакирдяпэ гонэса дрэ пра́ска (пепло), и гия́ дро Ра́скирэ-Дэвлэ́скиро Кхэр.
2. И бичхадя́ кра́ли Елиакимос, фэлатинякирэ барыдырэ́с, и Севнас, и пхурэдыршонэ раша́н, учхакирдэн гонэнца дрэ пра́ска, кэ Исаё проро́ко, Амасоскиро чхаво́.
3. И ёнэ пхэндлэ́ лэ́скэ: “Адя́кэ ракирэ́ла Езэки́я: ‘Дава́ дывэ́с исын дывэ́с ваш ту́га и ваш напхэныбэн и ваш ладжаипэ́н пхаро́, и кало́, и ладжакирдо́; пал-дова́ со догинэ́ тыкнэмаса кэ кула (выгиибэн) дрэ лочови́ (утроба) дае́нгири, а тэ биянэ́л джувля́кэ нанэ зор.
4. Сашты́ (могинэ́ла) тэ явэ́л, со шунэ́ла Рай Дэвэ́л, Дэвэ́л тыро́, сарэ́ Рабсакоскирэ лава́, савэ́ бичхадя́ Асирия́киро кра́ли, лэ́скиро хула́й, тэ кошэл Дэвлэ́с джидэс и тэ калякирэл лэс лавэ́нца, савэ́ шундя́ Рай Дэвэ́л, Дэвэ́л тыро́. Пхэн упрэ́ па́тери (моли́тва). Мангпэ пал манушэ́ндэ, савэ́ ячнэ́пэ, савэ́ исын ишчо (инкэ́) джидэ́.”
5. И явнэ́ дына́рья крали́скирэ Езэкияскирэ кэ Исаё.
6. И пхэндя́ лэ́нгэ Исаё: “Адя́кэ пхэнэ́н тумарэ́ хула́скэ: ‘Адя́кэ ракирэ́ла Рай Дэвэ́л: на дар лавэ́ндыр, савэ́ ту шундя́н, савэ́нца калякирдэ Ман Асирия́кирэ-крали́скирэ дына́рья.
7. Ѓа́да, Мэ бичхава́ва дрэ лэ́стэ ду́хо (фа́но), и ёв шунэ́ла зан (звесь), и рисёла пэ пэ́скири пхув, и Мэ домарава лэс куртала́са пэ лэ́скири пхув.’”
8. И рисия́ о Рабсако, и латхя́ Асирия́кирэ крали́с, саво́ мардя́пэ проти Ливна; пал-дова́ со ёв шундя́, со одова́ отгия́ Лахисостыр.
9. И шундя́ ёв зан (звесь) пал Тиргакостэ, Ефиопиякирэ крали́стэ; сыр лэ́скэ пхэндлэ́: “Ѓа́да, ёв выгия́ тэ марэ́лпэ ту́са.” И нэвэ́с бичхадя́ ёв манушэ́н кэ Езэки́я тэ пхэнэ́н.
10. “Адя́кэ пхэнэ́н Езекияскэ, Юдэя́кирэ крали́скэ: ‘Мэк тэ на хохавэ́л тут Дэвэ́л тыро́, пэ Савэ́стэ ту рикирэса наде́я, думины: на явэ́ла отдыно́ Ерусалимо дрэ Асирия́кирэ-крали́скирэ васта́.
11. Хай, ту шундя́н, со кэрдэ́ Асирия́кирэ кра́лья сарэ́ пхувье́нца, чхудэ́ пэ лэ́ндэ прокошыбэна (арманя), – и со, ту зракхэсапэ?
12. Дэвлорэ́ манушэ́нгирэ, савэ́н роспхагирдэ́ мирэ́ дада́, ци зракхнэ́ лэн? Ци зракхнэ́ ёнэ Гозанос, и Харанос, и Рецэфос, и Еденоскирэ чхавэ́н, савэ́ сыс дрэ Фаласара?
13. Кай исын кра́ли Емафоскиро, и кра́ли Арпадоскирэ, и кра́ли пэ фо́рья Сепарваимо, Ена и Ива’?”
14. И лыя́ Езэки́я лыл вастэ́стыр манушэнгирэндыр, савэ́ сыс прибичхадэ, и гиндя (дыя упрэ) лэс, и гия́ дро Ра́скирэ-Дэвлэ́скиро Кхэр, и розрискирдя лэс Езэки́я анги́л Ра́скирэ-Дэвлэ́скиро муй.
15. И мангдя́пэ Езэки́я анги́л Растэ-Дэвлэ́стэ, и ракирдя́: “Раё Дэ́вла, Дэвэ́л Израилёскиро, Саво́ исын бэшто́ пэ херувимы! Ту сан е́кх Дэвэ́л пэ сарэ́ пхувья́кирэ кралипэна́, Ту создыян болыбэ́н и пхув.
16. Раё Дэ́вла, причху́в кан Тыро́, и шун; откэр, Раё Дэ́вла, якха́ Тырэ́, и ўздыкх, и шун лава́ Сенахиримоскирэ, саво́ бичхадя́ тэ калякирэн Дэвлэ́с джидэс!
17. Чачипэ́н, о, Раё Дэ́вла, кра́лья Асирия́кирэ роспхагирдэ́ кэ руи́ны манушэ́н и лэ́нгирэ пхувья́.
18. И чхурдынэ́ лэнгирэн дэвлорэ́ дрэ яг; нэ далэ́ нанэ дэвэла́, а вычхиндлы буты́ манушэ́нгирэ-вастэнгири, кашт и бар; пал-дова́ и хасякирдэ́ лэн.
19. И какана́, Раё Дэ́вла, Дэвэ́л амаро́, зра́кх амэн лэ́скирэ вастэ́стыр, и мэк тэ джинэ́н сарэ́ пхувья́кирэ кралипэна́, со Ту, Раё Дэ́вла, сан Дэвэ́л Екх.”
20. Тэ́ньци бичхадя́ Исаё, Амососкиро чхаво́ зан (звесь), кэ Езэки́я тэ пхэнэ́л: ‘Адя́кэ ракирэ́ла Рай Дэвэ́л, Дэвэ́л Израилёскиро: Дова́, пал со ту мангдя́пэ Ма́нгэ проти Сенахиримостэ, Асирия́кирэ крали́стэ, Мэ шундём.
21. Ѓа́да, исын лав, саво́ выпхэндя Рай Дэвэ́л пал лэ́стэ: ‘Подыкхэла вучипна́стыр пэ ту́тэ, и явэ́ла тэ салпэ ту́тыр патывалы́ Сионо́скири чхай; пала́л пал ту́тэ кунинэла шэрэ́са Ерусалимо́скири чхай.
22. Конэ́с ту калякирдян и прокостян? И пэ конэ́стэ ту ґаздыян зан (глос), и газдыян адя́кэ вучэ́с якха́ пэ́скирэ? Пэ Свэ́нто Израилё?
23. Пирда́л манушэ́ндэ тырэндэ, савэ́н ту прибичхадян ту калякирдян Рас-Дэвлэ́с, и пхэндя́н: ‘Бутэ́ мирэ́ марибнытконэ́ вурдынэнца мэ гиём упрэ́ пэ бэргэнгиро вучипэ́н, пэ пашварэ Ливаноскирэ, и чингирдём барэ́ лэ́скирэ кипарисы, фэдырша лэ́скирэ кипарисы и явдём пэ са́мо ягороскиро (краёскиро) штэ́то лэ́скиро, дро лэ́скиро унтакиро (садытко) вэшоро.
24. И ґанадёмпэ мэ и пиём пани́ чу́жо, и мэ вышутькирава Мирэ́-ґэрэнгирэ подэшваса (пирэ́са) сарэ́ Египто́скирэ рэ́ки (лэня́).
25. Нау́што ту на шундя́н, со Мэ ґарым кэрдём дава́, дрэ ґаратунэ́ дывэса́ придуминдём дава́, а какана́ кэрдём лэ́нгэ, со ту кэрэ́са чхучэ́ фо́рья зоралэ́ тынэ́нца, кэри лэ́ндыр руи́ны.
26. И мануша́ лэ́нгирэ кэрдэ́пэ бизорья́кирэ, тринскирэнапэ и ячэ́напэ дрэ ладж. Ёнэ ячнэ́ сыр чар пэ фэ́лда и негитко зэлэныбэн, сыр забарино пэ стрэхи (чхакиня́) и пирипэкно маро́ англэды́р, сыр поспеинэла.
27. Бэшэса ци ту, ци выджаса, ци заджаса Мэ саро́ джино́м (джина́в) и холы́ тыри́ проти Ма́ндэ.
28. Пал тыри́ холы́ проти Ма́ндэ и пал дова́, со пхутькирибэ́н тыро́ догия́ кэ кана́ Мирэ́, Мэ чхува́ва нанглоро Миро дрэ рутхуня (храпы) тырэ́ и замуздка (цугля) Мирэ́ дрэ муй тыро́, и рискира́ва тут палэ долэ́-паць дромэ́са, савэ́са ту явдя́н.
29. И ґа́да ту́кэ, Езэки́я, ґерты́к (знаме́ниё): хан дрэ дава́ бэрш, со выбария зяркатыр, сави́ пыя́, и пэ яви́р бэрш – кокоро́ бияныбнаскиро, а пэ три́то бэрш сеинэн и укэдэн, и чхувэ́н дрэ пхув винаграды́тка унты (сады) и хан лэ́нгирэ барьякирдэ́ (пло́ды).
30. И мануша́, савэ́ ячэ́напэ джидэ́ дрэ Юда́скиро кхэр, кон яця́пэ, ёнэ мэкэ́на нэвэ́с рукх (корнё) тэла́л и янэ́на барьякирдэ (пло́ды) упрэ́.
31. Пал-дова́ со Ерусалимо́стыр выджа́ла ячаибэ́н, и зракхно Сионоскирэ бэрга́тыр, Ра́скирэ-Дэвлэ́скиро, болыбна́скирэ-янголэ́нгиро зэвлыныпэ́н кэрэ́ла дава́.
32. Палдава́ адя́кэ ракирэ́ла Рай Дэвэ́л пал Асирия́кирэ крали́стэ: ‘На заджа́ла ёв дро дава́ фо́ро, и на чхурдэ́ла одори́к марибны́тка бустя́ (стре́лы), и на поджала кэ ёв шчытоса, и на чхувэ́ла вучэ́с проти лэ́стэ вало.
33. Долэ́-паць дромэ́са, савэ́са ёв явдя́н, тэ рисёс долэ́ дромэ́са ёв рисёла, и дрэ дава́ фо́ро ёв на заджа́ла,’ – ракирэ́ла Рай Дэвэ́л.
34. Мэ ява́ва тэ ракхав дава́ фо́ро, соб (кай) тэ зракхэс лэс ваш Пэ́скэ и ваш Давидо́скэ, Мирэ́ писхари́скэ.’”
35. И акэ, со кэрдя́пэ дрэ дая́ рат: гия́ Янго́ло Ра́скирэ-Дэвлэ́скиро и мулякирдя́ дрэ Асирия́киро халадыбэ́н шэл охтодэша́ пандж тысёнцы манушэ́н. И уштынэ́ ёнэ пэ зло́ко (пэ ра́нко), и ґа́да, сыс сарэ́ тру́пы.
36. И скэдыяпэ, и гия́, и рисия́ Сенахиримо, Асирияскиро кра́ли, и дживдя́ кэ Нине́вия.
37. И ке́ли ёв мангдя́пэ дро кхэр Нисрохоскиро, пэ́скирэ дэвлорэскиро, тэды Адрамеле́хо и Шарецэро, лэ́скирэ чхавэ́, замардэ́ лэс куртала́са, а кокорэ́ нашнэ́ пэ Араратоскири пхув. И яця́ крали́са Асардано, лэ́скиро чхаво́, пэ штэ́то лэ́скиро.
1. Дрэ долэ́ дывэса́ занасвалыя о Езэки́я кэ мэрибэ́н; и явдя́ кэ ёв Исаё, Амососкиро чхаво́, проро́ко, и пхэндя́ лэ́скэ: “Адя́кэ ракирэ́ла Рай Дэвэ́л: ‘Припхэн со тэ кэрэ́с тырэ́ кхэрэса, пал-дова́ со мэрэ́са ту, и на высастёса.’”
2. И отрисия Езэки́я пэ́скирэ мо́са кэ ва́нта (сцяна), и мангдя́пэ Ра́скэ-Дэвлэ́скэ, ракири́:
3. “О, Раё Дэ́вла! Пририпир, со мэ псирдём анги́л муй Тыро́ чачунэ́с и чачунэса кэ Ту илэ́са, и кэрдём лачхэ́с дрэ якха́ Тырэ́.” И зарондя Езэки́я зоралэ́с.
4. Исаё ишчо (инкэ́) на выгия́ форо́стыр, сыр сыс кэ ёв Ра́скирэ-Дэвлэ́скиро лав:
5. “Рисёв и пхэн Езэкияскэ, хула́скэ Мирэ́ манушэнгирэскэ: Адя́кэ ракирэ́ла Рай Дэвэ́л, Дэвэ́л Давидо́скиро, тырэ́ дадэ́скиро: ‘Мэ шундём тыро́ мангипэ́н, дыкхцём тырэ́ ясва. Ѓа́да, Мэ высастякирава тут; пэ три́то дывэ́с ту джа́са дро Ра́скирэ-Дэвлэ́скиро Кхэр.
6. И дочхувава Мэ кэ тырэ́ дывэса́ дэшупандж бэрш, и вастэ́стыр Асирия́кирэ-кралискирэстыр Мэ зракха́ва тут и дава́ фо́ро, и зракха́ва дава́ фо́ро ваш Пэ́скэ и ваш Давидо́скэ, Мирэ́ писхари́скэ.’”
7. И пхэндя́ Исаё: “Лэн пучко инжыро.” И лынэ́, и причхудэ кэ чыльча́ко (нарыво); и ёв высастия.
8. И пхэндя́ Езэки́я Исаёскэ: “Сави́ исын ґерты́к (знаме́ниё), со Рай Дэвэ́л высастякирэла ман, и со мэ джа́ва пэ три́то дывэ́с дро Ра́скирэ-Дэвлэ́скиро Кхэр.”
9. И пхэндя́ Исаё: “Ѓа́да, ту́кэ исын ґерты́к Ра́стыр-Дэвлэ́стыр, со рикирэ́ла Рай Дэвэ́л лав, саво́ Ёв пхэндя́: “Анги́л ци тэ проджал зэрья́кэ (тенякэ) пэ дэш ґеруня (ступеньки); ци тэ рисёл пэ дэш ґеруня.”
10. И пхэндя́ Езэки́я: “Локхэс тенякэ (зэрьякэ) тэ джал анги́л (тэ кхарэлпэ) пэ дэш ґеруня; над, мэк тэ рисёл зэр (тень) палэ пэ дэш ґеруня.”
11. И кхардя́ зоралэ́с Исаё проро́ко кэ Рай Дэвэ́л, и рискирдя́ зэр (тень) палэ пэ дэш ґеруня (ступеньки), кай ёй змэкэласпэ пир стылба (лесвица) Ахазоскири, пэ дэш ґеруня (ступеньки).
12. Дрэ долэ́ дывеса бичхадя́ Беродахо Баладано, чхаво́ Баладаноскиро, Вавилоно́скиро кра́ли, лыла́ и почастунко Езэкияскэ; пал-дова́ со ёв шундя́, со Езэки́я сыс насвало́.
13. Езэки́я, вышундя манушэ́н, савэ́ сыс бичхадэ́ кэ ёв, сыкадя́ лэ́нгэ пираля́ пэ́скирэ, руп и сувнака́й, и ароматытка смо́лы, и дро́га масти, и саро́ арсенало (мардярня) дро пэ́скиро кхэр и саро́, со исыс дрэ тыкнорья и пираля́ лэ́скирэ; на яця́пэ ние́кх предмето (чыса), саво́ тэ на сыкавэ́л бы лэ́нгэ Езэки́я дро пэ́скиро кхэр и дро саро́ пэ́скиро хулаибэн.
14. И явдя́ Исаё проро́ко кэ кра́ли Езэки́я, и пхэндя́ лэ́скэ: “Со ракирдэ́ адалэ́ мануша́, и каты́р ёнэ явнэ́ кэ ту?” И пхэндя́ Езэки́я: “Дуратунэ пхувья́тыр ёнэ явнэ́, Вавилоно́стыр.”
15. И пхэндя́ Исаё: “Со ёнэ дыкхнэ́ дрэ тыро́ кхэр?” И пхэндя́ Езэки́я: “Саро́, со исын дрэ кхэр миро, ёнэ дыкхнэ́; на яця́пэ ни екх предмето, саво́ мэ тэ на сыкавав бы лэ́нгэ дрэ тыкнорья мирэ́.”
16. И пхэндя́ Исаё Езэкияскэ: “Вышу́н Ра́скирэ-Дэвлэ́скиро лав:
17. ‘Ѓа́да, явэ́на дывэса́, и лыно́ явэ́ла саро́, со исын дро кхэр тыро́, и со скэдынэ́ тырэ́ дада́ кэ дава́ дывэ́с, дро Вавило́но; ничы́ на ячэ́лапэ”, – ракирэ́ла Рай Дэвэ́л.
18. “Чхавэ́ндыр тырэндыр, савэ́ явэ́на ту́тыр, савэ́ ту́тыр бияндёна, лэ́на, и явэ́на ёнэ е́внухи дрэ Вавилоно́скирэ-крали́скири фелатин/колов (дворцо).”
19. И пхэндя́ Езэки́я Исаёскэ: “Лачхо́ исын лав Ра́скирэ-Дэвлэ́скиро, саво́ ту пхэндя́н.” И ракирдя́ дурэды́р: “Мэк тэ явэ́л рама́нё (миро) и лачхипэ́н дрэ мирэ́ дывэса́!”
20. Яви́р лав пал Езэкиястэ и пал сарэ́ муршканэ́ рэ́нды лэ́скирэ, и пал дова́, со ёв кэрдя́ вэндэри (прудо) и панитко пролыджиибэн и пролыджия пани́ дро фо́ро, исын зачхиндло́ дрэ бэршы́тка архи́вы пал Юдэя́кирэ кралье́ндэ.
21. И пасия́ ве́чнэс Езэки́я пэ́скирэ дадэ́нца, и яця́ кралиска Мана́сия, лэ́скиро чхаво́, пэ штэ́то лэ́скиро.
1. Дэшуду́й бэрш сыс Манасияскэ, ке́ли ёв яця́ крали́са, и пандждэша́ бэрш сыс ёв крали́са дро Ерусалимо; лав лэ́скирэ-да́киро сыс Хефцыба.
2. И кэрдя́ ёв фуипэ́н дрэ якха́ Ра́скирэ-Дэвлэ́скирэ, кэри пир приме́ро (сыкаибэ́н) магирипэ́н сыр яви́р манушы́тка на́цыи, савэ́н протрадыя Рай Дэвэ́л Израилёскирэ чхавэ́нгирэ мо́стыр.
3. И нэвэ́с кэрдя́ вучипэна́, савэ́ роспхагирдя́ сарэ́са лэ́скиро дад о Езэки́я, и чхудя́ алта́ри Ваалоскэ, и кэрдя́ дэмбитко вэшоро, сыр кэрдя́ Аха́во, Израилёскиро кра́ли; и мангдя́пэ пэ́скирэ болыбнытконэ халадыбнаскэ, и дынариндя́ лэ́скэ.
4. И кэрдя́ алта́ри дрэ Ра́скирэ-Дэвлэ́скиро Кхэр, пал саво́ пхэндя́ Рай Дэвэ́л: “Дро Ерусалимо чхува́ва Мэ Миро лав.”
5. И кэрдя́ ёв алта́ри сарэ́ болыбнытконэ халадыбнаскэ пэ дуй грэды (дворы) Ра́скирэ-Дэвлэ́скирэ Кхэрэскирэ.
6. И лыджия́ пэ́скирэс чхавэ́с пирда́л яг, и драбакирдя, и човаханякирдя, и залыджыя манушэ́н, савэ́ выкхарэна мулэн и човаханэн пир приме́ты (шпэры); бут кэрдя́ фуипэ́н ёв дрэ якха́ Ра́скирэ-Дэвлэ́скирэ, соб (кай) тэ холякирэл Лэс.
7. И чхудя́ вычхиндло муй Астартакиро, саво́ кэрдя́ ёв дро кхэр, пал саво́ ракирдя́ Рай Дэвэ́л Давидо́скэ и Соломоно́скэ, лэ́скирэ чхавэ́скэ: “Дро дава́ Кхэр и дро Ерусалимо, саво́ Мэ выкэдыём сарэ́ Израилёскирэ родэндыр, Мэ да́ва лав Миро пэ ве́ко.
8. И Мэ на да́ва́ буты́р, соб (кай) тэ выджа́л ґэро́й манушэскири Израильтяниноскиро пхувья́тыр, сави́ Мэ дыём лэ́нгирэ дадэ́нгэ, ко́ли екх ёнэ явэ́на тэ причхувэ́н зор тэ кэрэ́н дрэ екх годы́ сарэ́са долэса, со Мэ пхэндём лэ́нгэ, и сарэ́ Законоса, саво́ припхэндя́ лэ́нгэ Миро писха́ри Мо́йза.
9. Нэ ёнэ на кандынэ́; и затырдыя лэн Мана́сия кэ дова́, со ёнэ кэрдэ́ фуеды́р долэ́ манушытконэ́ нацые́ндыр, савэ́н вымардя Рай Дэвэ́л Израилёскирэ чхавэ́ндыр.
10. И ракирдя́ Рай Дэвэ́л пирда́л Пэскирэндэ дынарье́ндэ, пророкэ́ндэ, и пхэндя́:
11. “Пал-дова́, со кэрдя́ Мана́сия, Юдэя́киро кра́ли, дасавэ́ магирипэна, фуеды́р сарэ́стыр долэ́стыр, со кэрдэ́ Аморе́и, савэ́ сыс англэды́р лэ́стыр, и лыджия́ Юдас дро грэ́хо пэ́скирэ идолэнца,
12. палдава́, – адя́кэ ракирэ́ла Рай Дэвэ́л, Дэвэ́л Израилёскиро, – ґа́да, Мэ яна́ва дасави́ холы́ пэ Ерусалимо и пэ Юдастэ, пал савэ́стэ, кон шунэ́ла, кудунёла (зазвининэла) дрэ дуй кана́ одолэ́стэ.
13. И протырдава Мэ пэ Ерусалимо шэло тэ меринэн Самариятыр и отвесо Ахавоскирэ кхэрэ́стыр, и выкхосава Ерусалимо адя́кэ, сыр выкхосэна тахта́й, – выкхосэна и пиририскирэна лэс.
14. И Мэ отрискирава ячаибэ́н (остатко) Мирэ́ миштыпнаскирэ мератыр, и Мэ отда́ва лэн дрэ лэ́нгирэ вэргэ́нгирэ (врогэнгирэ) васта́, и ёнэ явэ́на тэ откэдэн саро́ лэ́ндыр сарэ́ лэ́нгирэ вэ́рги.”
15. Палдава́, со ёнэ кэрдэ́ фуипэ́н дрэ якха́ Мирэ́, и холякирдэ Ман долэ́ дывэсэ́стыр, сыр выгинэ́ лэ́нгирэ дада́ Египто́стыр, и кэ дава́ дывэ́с.”
16. Ишчо прочхудя Мана́сия древа́н бут рат бибангипнаскирэ манушэ́нгиро адя́кэ, со пхэрдякирдя́ лэ́нца Ерусалимо ягоро́стыр кэ яго́ро, буты́р пэ́скирэ грэхостыр, со ёв залыджия́ Юдас дро грэ́хо – тэ кэрэ́л фуипэ́н дрэ якха́ Ра́скирэ-Дэвлэ́скирэ.
17. Яви́р лав пал Манасиястэ и пал саро́, со ёв кэрдя́, и пал лэ́скирэ грэ́хи, дро со ёв кэрдя́ грэ́хо, исын зачхиндло́ дрэ бэршы́тка архи́вы пал Юдэя́кирэ кралье́ндэ.
18. И пасия́ ве́чнэс Мана́сия пэ́скирэ дадэ́нца, и гарадо́ сыс дрэ у́нта (садо) пашы́л кхэр лэ́скиро, дрэ у́нта Узаскири. И яця́ крали́са Амоно, лэ́скиро чхаво́, пэ штэ́то лэ́скиро.
19. Биш тэ дуй бэрш сыс Амоноскэ, ке́ли ёв яця́ крали́са, и дуй бэрш ёв сыс крали́са дро Ерусалимо; лав лэ́скирэ да́киро сыс Мешуллемеф, Харуцоскири чхай, Ятбатыр.
20. И кэрдя́ ёв налачхэ́с (фуипэ́н) дрэ якха́ Ра́скирэ-Дэвлэ́скирэ адя́кэ, сыр кэрдя́ о Мана́сия, лэ́скиро дад.
21. И псирдя́ долэ́-паць дромэ́са, савэ́са псирдя́ лэ́скиро дад, и дынариндя́ идолэ́нгэ, савэ́нгэ дынариндя́ лэ́скиро дад, и мангдя́пэ лэ́нгэ.
22. И ячкирдя́ ёв Рас-Дэвлэ́с, пэ́скирэ дадэнги́рэ Дэвлэ́с, на псирдя́ Ра́скирэ-Дэвлэ́скирэ дромэ́са.
23. И счхудэ зракирибэ́н Амоноскирэ дына́рья проти лэ́стэ, и замардэ́ крали́с дро лэ́скиро кхэр.
24. Нэ мануша́ долэ́-пхувья́кирэ пиримардэ сарэ́н манушэ́н, савэ́ сыс дрэ зракирибэ́н проти крали́стэ Амоностэ; и мануша́ долэ́-пхувья́кирэ чхудэ́ крали́са Иосияс, лэ́скирэ чхавэ́с, пэ штэ́то лэ́скиро.
25. Яви́р лав пал Амоностэ, со ёв кэрдя́, исын зачхиндло́ дрэ бэршы́тка архи́вы пал Юдеякирэ кралье́ндэ.
26. И гарадэ́ лэс дрэ лэ́скири копли́ца, дрэ Узаскири у́нта (садо). И яця́ крали́са Иосия, лэ́скиро чхаво́, пэ штэ́то лэ́скиро.
9. Амэ на дыкхаса амарэ́ знаме́нии (ґертыка́), нанэ буты́р проро́ко, и ние́кх машки́р амэ́ндэ на джинэ́ла, кицы́ адя́кэ явэ́ла?
10. О, Дэ́вла, кицы́ вэ́рго явэ́ла тэ ракирэ́л чорипэ́н? Ци ўса́ды (сак) явэ́ла вэ́рго тэ калякирэл Тыро́ лав?
11. Со́скэ Ту обрикирэса Тыро́ васт и аж Тыро́ чачо́ васт? Тырдэ яври́ лэс Тырэ́ брэкатыр тэ хасёл ёв.
12. Нэ Ту, Дэ́вла, сан миро Рай самонэ англыпна́стыр, Саво́ зракхэ́ла манушэ́н пэ пхув.
13. Ту роскэрдян пэ паша́ мо́рё (дэрья́в) Тырэ́ зорья́са, Ту роспхарадян шэрэ́ морёскирэ (дэрьявэ́скирэ) рупучэ́нгэ (чудовишчэнгэ) дрэ паня́.
14. Ту пхарадян шэрэ́ Левиафаноскэ (рупучэ́скэ), и Ту дыя́н лэн тэ хан манушэ́нгэ, савэ́ дживэ́на пэ чхучи́ пхув.
15. Ту зачхудян тэ тхадэн фолахара (фонтаны) и барэ́ панинга́. Ту шутькирдян барэ́ рэ́ки (лэня́).
16. Дывэ́с исын Тыро́, рат исын адя́кэ-паць Тыри́: Ту чхудя́н чхон и кхам.
17. Ту учхудян сарэ́ кустыка (границы) пэ пхув, Ту кэрдя́н лынай и ивант (зима).
1. Фэды́р тэ явэ́л чороро́ ману́ш, саво́ дживэ́ла пир чачипэ́н, сыр тэ явэ́л хоханэ́-чибакиро (чибьякиро) ману́ш и дылыно́.
2. Исын намишто, ке́ли манушэ́стэ нанэ джиныбэ́н, адя́кэ-паць и кон сы́гэс псирэ́ла, одова́ обштавэлапэ (обстэмпинэлапэ).
1. Ке́ли явдя́ Духо́скирэ-свэнкитко дывэ́с (Ду́хо), сарэ́ сыкляибны́тка скэдынэ́пэ кхэтанэ́.
2. И екха́тыр (сра́зу) болыбна́стыр яця́ шундло ґлумо, саво́ сыс сы́рбы зоралы́ балва́л, со зоралэ́с пхурдэла, и пхэрдякирдя́ саро́ кхэр, кай ёнэ сыс.
3. И сыкадынэ сыкляибнытконэ́нгэ чиба́ (чибья́), савэ́ хачинэ яга́са, ёнэ росчхудэпэ и згинэ пир екх пэ кажнонэ́стэ лэ́ндыр.
4. И Свэ́нто Ду́хо (Фа́но) пхэрдякирдя́ сарэ́н и ёнэ лынэ́ тэ ракирэ́н пэ яви́р чиба́ (чибья́), сыр Ду́хо (Фа́но) дыя́ во́ля лэ́нгэ.
5. Кэ Ерусалимо дживдэ́ Юды, савэ́ сыс дэвлы́тка мануша́; ёнэ явнэ́ кажнонэ́ ригэ́ндыр сарэ́ парнэ́ свэто́стыр.
6. Ке́ли мавлы́н (малва) прогия́ (накхця́) пал дава́, скэдынэ́пэ бут мануша́, и сарэ́ ячнэ́ дро на ґалыибэ́н, пал-дова́ со кажно ману́ш лэ́ндыр шундя́, сыр вари-кон дэвлытконэндыр ракирдя́ пэ лэ́нгири чиб.
7. Сарэ́ мануша́ сыс кокорэ́, сыр на дрэ пэ́стэ далэ́ дивостыр, и ракирдэ́ машки́р пэ́стэ: “Адалэ́ мануша́, савэ́ ракирэ́на, со ёнэ исын на Галилеяни?
8. Сыр да кажно амэ́ндыр ману́ш шунэ́ла, сыр ёнэ ракирэ́на пэ каждонэскири амэ́ндыр родно чиб.
9. Машкир амэ́ндэ исын ада́й Парфяни, и Мидяни, и Еламиты, мануша́, савэ́ дживэ́на кэ Месопотамия; Юдэя́тыр и Кападокиятыр, Понтиятыр и Асиятыр,
10. Фригиятыр и Памфилиятыр, Египто́стыр, адя́кэ-паць сыс мануша́ Ливиякирэ штэто́стыр, саво́ сыс на́дур Кириниятыр, явнэ́ мануша́ Римостыр, Юды и прозелиты.
11. Критяни и Арабы и амэ сарэ́ шунаса лэн, сыр ёнэ ракирэ́на пал барэ́ Дэвлэ́скирэ рэ́нды пэ кажнонэ́ – манушэ́нгирэ чиба́ (чибья́)?”
12. И дивиндлэ́пэ сарэ́, и на ґалынэ́ нисо́ и ракирдэ́ екх екхэ́скэ: “Со дасаво сашты́ (могинэ́ла) тэ явэ́л?”
13. Нэ яви́р ракирдэ́ саиндой: “Ёнэ выпинэ бут гудлы мол (вино).”
14. Нэ Пэ́три уштыя́ кхэтанэ́ пэ́скирэ дэшудуенца Апостолэнца ґаздыя́ пэ́скири зан, и зоралэ́ заня́са пхэндя́ лэ́нгэ: “Юды и сарэ́ мануша́, кон дживэ́ла дро Ерусалимо! Мэк тэ явэ́л дава́ джиндло́ тумэ́нгэ, и ракхибны́ткэс шунэ́н мирэ́ лава́.
15. Кадалэ́ мануша́ исын на матэ, сыр дава́ тумэ́нгэ здэлапэ, пал-дова́ со какана́ еня́ (биекхэ́скиро дэш) мардэ́ (штунды) дывэсэ́.
16. Нэ дава́ исын дова́, со пхэндя́ проро́ко Иоилё:
17. “И дрэ палатунэ́ (последня) дывэса́, – ракирэ́ла Дэвэ́л, – Мэ чхува́ва Миро Ду́хо (Фа́но) пэ кажно лоч (плоть), тумарэ́ чхавэ́ и чхая́ явэ́на тэ ангилпхэнэн и тэрнэ́ мануша́ явэ́на тэ дыкхэ́н дова́, со Дэвэ́л дэ́ла лэ́нгэ, а пхурэ́ мануша́ явэ́на тэ дыкхэ́н сунэ́;
18. и пэ Мирэ́ писхарьендэ, сыр пэ муршэндэ адя́кэ-паць и пэ джувлендэ, Мэ чхува́ва Миро Ду́хо (Фа́но) дрэ долэ́ дывэса́, и ёнэ явэ́на тэ ангилпхэнэн.
19. И Мэ сыкава́ва ди́вы упра́л пэ болыбэ́н и знаме́нии (ґертыка́) тэла́л пэ пхув, рат, яг и о́блоко тхувэса.
20. Кхам кэрэ́лапэ дро калыпэ́н, и чхон дро рат, анги́л сыр явэ́ла Дэвлэ́скиро дывэ́с, бахтало́ и лачхо́.
21. И явэ́ла адя́кэ: кажно, кон кхарэ́ла Дэвлэ́скиро лав, зракхэ́лапэ. Исусо́скирэ рэ́нды допхэнэна, со Ёв исын Дэвэ́л.
Romani Bible Baltic 2019
United Bible Societies for the Baltic Romani Mission